ⴰⵃⵡⴰⵛ ⵏ ⵜⴰⵙⴽⵉⵡⵉⵏ
ⵜⴰⵙⴽⵉⵡⵉⵏ, ⴰⵏⴰⵡ ⵏ ⵓⵃⵡⴰⵛ ⴰⵎⴰⵣⵉⵖ, ⵙⵓⵍ ⵉⴷⴷⵔⵏ ⵖ ⴳⵔ ⵓⵔⴰⵔⵏ ⵏ ⵎⵉⴷⴷⵏ ⵉⵍⵉ ⵙⵓⵍ ⴳ ⵉⴼⴼⵓⴳⵍⵓⵜⵏ ⵏ ⵉⵎⴰⵣⵉⵖⵏ ⵉⵣⴷⵖⵏ ⵖ ⵉⵥⵥⵍⵎⴹ ⵏ ⵓⴷⵔⴰⵔ ⵏ ⴷⵔⵏ, ⵎⵇⵇⴰⵔ ⵉⵜⵜⵉⴷⵔⴰⵙ ⵓⵃⵡⴰⵛ ⴰⴷ ⴰⵔ ⵉⵜⵜⵎⵜⴰⵜ ⵖ ⵜⵎⵢⵓⵔⵉⵏ ⵏⵏⵙⵏ. ⵉⴳⴰ ⵓⵃⵡⴰⵛ ⴰⴷ ⵏ ⵜⵙⴽⵉⵡⵉⵏ ⴰⵢⴷⴰ ⴷ ⴼⵍⵏ ⵉⵎⵣⵡⵓⵔⴰ ⵉⵎⴰⵣⵉⵖⵏ ⵉ ⵜⵓⵙⵙⵏⴰ ⵏ ⵓⴼⴳⴰⵏ. ⵜⵉⵍⵉ ⴷⴰⵔⵙ ⵜⴰⵎⴰⵜⴰⵔⵜ ⵉⴳⴳⵓⵜⵏ ⵖ ⵉⵙⴽⴽⵉⵏⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵉⴼⴽ ⵡⴰⵏⴰⵡ ⴰⴷ ⵏ ⵓⵃⵡⴰⵛ ⵜⵓⴳⴳⴰ ⵅⴼ ⴽⵉⴳⴰⵏ ⵏ ⵉⵎⵙⴰⵔⵏ ⵉⵣⵔⵉⵏ ⵖ ⵓⵎⵣⵔⵓⵢ ⵉⵣⴷⵉⵏ ⴷ ⵉⵎⵏⵖⵉ. ⴰⵃⵡⴰⵛ ⵏ ⵜⴰⵙⴽⵉⵡⵉⵏ ⵉⵍⴰ ⴰⴷⴷⵓⵔ ⴰⴽⵙⵡⴰⵜ ⴳ ⵜⵓⵙⵙⵏⴰ ⴷ ⴼⵍⵏ ⵎⵉⴷⴷⵏ ⵏ ⵣⵉⴽ, ⵉⴳ ⵜⴰⵏⴷⵔⴰ ⵏ ⵉⵎⴰⵏ ⵏⵏⵙⵏ ⴳ ⵜⵉⵣⵉ ⵏ ⵉⵎⵏⵖⴰⵏ ⵏⵏⵙⵏ, ⵉⴳ ⴰⵡⴷ ⵜⴰⵖⵍⴰⵖⴰⵍⵜ ⵏⵏⵙⵏ ⴷ ⵉⴽⴽⴰⵏ ⵣⵉⴽⴽ ⵏ ⵜⴰⵙⵓⵜⵉⵏ. ⵉⵃⵡⴰⵛ ⵏ ⵜⴰⵙⴽⵉⵡⵉⵏ ⵜⴳⴰ ⵜ ⵖⵉⵍⴰⴷ ⵓⵏⴻⵙⵛⵓ ⵖ ⵓⵖⴰⵡⴰⵙ ⵏⵏⵙ ⵉⵥⵍⵉⵏ ⵙ ⵡⴰⵢⴷⴰ ⴷ ⴼⵍⵏ ⵉⵎⵣⵡⵓⵔⴰ ⵖ ⵜⵓⵙⵙⵏⴰ ⵏ ⵓⴼⴳⴰⵏ, ⴷ ⵍⵍⵉⵖ ⵉⵔⴰ ⵓⵃⵡⴰⵛ ⴰⴷ ⴰⵃⵟⵟⵓ ⵉⴳⴳⵓⵜⵏ ⵃⵎⴰ ⴰ ⵉⵖⴰⵎⴰ ⵖ ⵜⵎⵢⵓⵔⵜ ⵏ ⵓⴼⴳⴰⵏ ⴰⵎⴰⵣⵉⵖ ⴰⴷ ⵓⵔ ⵉⵎⵎⵜ.
ⴰⵃⵡⴰⵛ ⵏ ⵜⴰⵙⴽⵉⵡⵉⵏ ⴰⵔⴰⵖ ⵉⵙⵙⴽⵜⴰⵢ ⴰⵎⵣⵔⵓⵢ ⵏⵏⵖ ⴷ ⵉⵎⵏⵖⴰⵏ ⵉⵣⵔⵉⵏ ⵖ ⵜⵎⵏⴰⴹⵜ ⴰⵏⵏ ⵖ ⵉⵍⵍⴰ ⵡⴰⵏⴰⵡ ⴰⴷ ⵏ ⵓⵃⵡⴰⵛ, ⴷ ⵉⵎⵓⵙⵙⵓⵜⵏ ⵏ ⵜⵓⵏⵏⵓⵏⵜ ⵍⵍⵉ ⴳⵉⵙ ⵉⵍⵍⴰⵏ, ⵍⵍⵉ ⴰⵖ ⵉⵙⵙⴽⵜⴰⵢⵏ ⵜⵉⴷⴷⴰⵙ ⴷ ⵜⵓⵔⵔⴳⵣⴰ ⵏ ⵉⵔⴳⴰⵣⵏ ⵖ ⵉⵎⵏⵖⵉ, ⵉⴳ ⵓⵃⵡⴰⵛ ⵏ ⵜⴰⵙⴽⵉⵡⵉⵏ ⵜⵓⵍⵍⵉⵙⵜ ⵜⵜ ⴰⵍⵍⵙⵏ ⵎⵉⴷⴷⵏ ⴼ ⵉⵎⵏⵖⵉ ⵍⵍⵉ ⵉⵣⵔⵉⵏ. ⴰⵔ ⵙⵙⴼⴰⵍⵏ ⵉⵎⵓⵙⵙⵓⵜⵏ ⵏ ⵓⵃⵡⴰⵛ ⵏ ⵜⴰⵙⴽⵉⵡⵉⵏ ⵙ ⵜⴰⵖⴹⴼⵜ ⴷ ⵜⵉⴳⴳⵯⵙ ⵃⵎⴰ ⴰⴷ ⴽⵛⵎⵏ ⵉ ⵉⵎⵏⵖⵉ (ⵉⵊⵖⴰⵢⵎ), ⴷ ⵉⵖ ⵏⵏ ⵓⴽⵉⵏ ⴼ ⵓⴼⵏⴰ (ⴰⵙⴽⴽⵓⵔ - ⴱⵓⵜⵙⴽⴰ - ⵃⵔⵔⴽ ⵓⵛⵛⵏ), ⴷ ⵉⵖ ⵓⴽⵉⵏ ⵉⵡⵓⵜⵜⴰ ⴷ ⵉⴹⵕⵕⴰⵙⵏ, ⴷ ⵉⵖ ⴳⴰⵏ ⵉⵎⵏⴰⵢⵏ (ⴰⵀⵢⵢⴰⴹ - ⵍⵎⵉⵣⴰⵏ - ⴱⵊⵊⵔ ⴰⴼⵓⵍⵍⵓⵙ), ⵉⵖ ⴰ ⵜⵜⵍⵍⵉⵏ ⵙ ⵜⵎⴰⵜⴰⵔⵜ ⵉⴼⵍ ⵓⴼⵏⴰ ⵖ ⴹⴰⵕⴰⵜ ⵏⵏⵙ, ⴰⵔ ⵙⵉⵙ ⵜⵜⵍⵍⵉⵏ ( ⴼⵜⵜⵛ ⴰⴽⴰⵍ), ⴷ ⵉⵖ ⵔⵡⵍⵏ ⵏⵉⵖ ⵉⵖ ⵔⴽⵯⵙⵏ (ⴰⵎⴽⵍⴱ - ⵀⵔⴷ), ⴷ ⵉⵖ ⵔⵏⴰⵏ ⵉⵎⵏⵖⵉ ⵉⵎⵎⵜ ⵓⴼⵏⴰ ( ⵓⴼⵓⵖ - ⴰⵙⵙⵓⵙⵙ). ⵉⵎⵓⵙⵙⵓⵜⵏ ⴰⴷ ⵎⵓⵏⵏ ⴷ ⵓⵣⴷⵓⵇⵇⵕ ⵏ ⵡⴰⵡⴳⴰⵍⵏ, ⴷ ⵓⵙⵉⵏⵚⴳ ⵏ ⵜⴳⵯⵎⴰⵎⵜ, ⴷ ⵓⵥⴰⵡⴰⵏ ⵏ ⵡⴰⵍⵍⵓⵏ. ⴰⵔ ⵜⵜⵃⵡⴰⵛⵏ ⵉⵎⵓⵔⴰⵔ ⴰⵃⵡⴰⵛ ⴰⴷ ⵖ ⵢⴰⵜ ⵜⵙⵓⵜⵍⵜ ⵉⵇⵇⵏⵏ, ⴰⵛⴽⵓ ⵉⵎⵓⵔⴰⵔ ⴳⴰⵏ ⵣⵓⵏ ⴷ ⵉⵎⵏⴰⵢⵏ ⵍⵍⵉ ⵉⵜⵜ ⵇⵇⵍⵏ ⵙ ⵓⴼⵏⴰ ⴰⴷ ⵜ ⴳⵍⵉⵏ, ⵜⴳ ⵜⵙⵓⵜⵍⵜ ⴰⴷ ⵜⴰⵎⴰⵜⴰⵔⵜ ⵏ ⵜⵡⵉⵣⵉ ⴷ ⵜⴰⵎⵓⵏⵜ ⵏ ⵜⵇⴱⵉⵍⵉⵏ ⴳ ⵓⵙⵙⴰⵏ ⵏ ⵉⵎⵏⵖⵉ, ⴽⵓ ⵢⴰⵏ ⵣⵖ ⵜⵔⴰⴱⴱⵓⵜ ⴰⵏⵏ ⴰⵔ ⵉⵜⵜⴱⴷⴷⴰⴷ ⵖ ⵓⴷⵖⴰⵔ ⵏⵏⵙ, ⵉⵃⵓⵡⵛ ⵉⵥⵕ ⵓⵍⴰ ⵉⵎⴷⴷⵓⴽⴽⵯⴰⵍ ⵏⵏⵙ ⵍⵍⵉ ⴷⵉⵙ ⵉⵜⵜⵃⵡⴰⵛⵏ ⵖ ⵓⵙⴰⵢⵙ.
ⵉⵜⵜⵢⴰⵡⵙⵙⴰⵏ ⵓⴼⴳⴰⵏ ⴰⵎⴰⵣⵉⵖ ⵙ ⵜⴰⵢⵔⵉ ⵏⵏⵙ ⵉ ⵜⵥⵓⵕⵉ ⴷ ⵓⴼⵓⵍⴽⵉ ⴷ ⵜⴰⵢⵔⵉ ⵜⴰⵙⵓⵜⵉⵏ ⴼ ⵜⴰⵙⵓⵜⵉⵏ ⴰⵢⴰⴷ, ⵜⴳ ⵜⵣⴷⵓⴳⵉ ⴷ ⵉⴳⴰⵎⵉⵡⵏ ⴰⵖⴱⴰⵍⵓ ⵏ ⵉⵙⵡⵉⵏⴳⵎ ⵏⵏⵙ ⵍⵍⵉ ⵙ ⵉⵥⴹⴰ ⵉⴼⴰⵍⴰⵏ ⵣⵡⴰⵔⵏ ⵏ ⵜⵉⴼⵔⴰⵙ ⵏ ⵜⵓⵙⵙⵏⴰ ⵏⵏⵙ ⴷ ⵜⵎⴰⴳⵉⵜ ⵏⵏⵙ ⵜⴰⵎⴰⵣⵉⵖⵜ. ⵉⵥⵍⵉ ⵓⴼⴳⴰⵏ ⴰⵎⴰⵣⵉⵖ ⴰⵥⴰⵡⴰⵏ ⵏⵏⵙ ⵖ ⵜⵍⵍⴰ ⵜⵖⵍⴰⵖⴰⵍⵜ ⵏ ⵉⵙⴰⴼⴼⵏ ⵏ ⵜⴰⵢⵔⵉ ⴷ ⵓⵏⴰⵔⵓⵣ ⴷ ⵜⵉⴷⴷⴰⵙ ⴰⵡⴷ ⵜⵓⵎⵔⵜ. ⵉⴼⴽ ⴰⵙ ⵎⴰⵢⴰⵏ ⵜⵓⴷⵔⵜ ⵉⴱⵓⵖⵍⴰⵏ ⵙ ⵉⵙⵢⴰⴼⴰⵜⵏ ⵏ ⵡⴰⴼⵓⵍⴽⵉ ⴷ ⵉⵎⴰⵏ ⵉⵖⵓⵙⵏ ⵏ ⵜⴼⴳⴰⵏⵉⵜ, ⵉⴼⵔⴽ ⴰⵡⴷ ⵙ ⵡⴰⵜⵉⴳ ⵏ ⵜⵉⵔⵍⵍⵉ ⵢⴰⵜⵜⵓⵢⵏ, ⵉⴼⴽ ⴰⵙ ⴰⴷⵖⴰⵔ ⵏⵏⵙ ⴳ ⵓⵙⴳⴷ ⴰⵡⴷ ⵜⴰⵙⵔⵜⵉⵜ, ⴷ ⵜⴷⴰⵎⵙⴰ, ⵜⵉⵍⵉ ⴰⵡⴷ ⵖ ⵓⵥⴰⵡⴰⵏ ⵏⵏⵙ ⴷ ⵜⵓⵙⵙⵏⴰ ⴷ ⵜⵙⴽⵍⴰ ⵏⵏⵙ ⴰⴽⴽⵯ.
ⵣⵖ ⵜⵎⴰⴳⵉⵜ ⵏ ⵜⵉⵔⵍⵍⵉ ⴰⴷ ⵣⵖ ⵉⵍⴰⵍ ⵓⵏⴰⵥⵓⵕ ⴰⵎⴰⵣⵉⵖ, ⵍⵍⵉ ⵢⵓⵔⵎⵏ ⴽⵉⴳⴰⵏ ⵏ ⵉⵣⵣⵯⴳⴰⵔ ⵏ ⵉⵙⴰⴼⴼⵏ ⵏ ⵜⵓⴷⵔⵜ ⵙ ⵎⴰ ⵜⵍⴰ ⵏ ⵉⴽⵯⵍⴰⵏ. ⵜⴳ ⴷⴰⵔⵙ ⵜⵓⴷⵔⵜ ⵜⴰⵎⴰⵣⵉⵖⵜ ⵜⴰⵎⴳⴷⵓⴷⵜ ⵉⴼⵔⵉ ⵖ ⴰⴷ ⵉⵜⵜ ⴰⴳⵯⵎ ⵉ ⵜⵥⵓⵕⵉ ⵏⵏⵙ…ⵉⴳ ⵓⵏⴰⵥⵓⵕ ⴳ ⵜⴼⴼⵓⴳⵍⵉⵡⵉⵏ ⴷ ⵜⵎⵖⵔⵉⵡⵉⵏ ⴷ ⵜⴼⴰⵙⴽⵉⵡⵉⵏ, ⵜⵉⵙⵙⵉⵜ ⵏ ⵜⵓⴷⵔⵜ ⵏ ⵎⵉⴷⴷⵏ, ⵉⵙⵓⵍⴼ ⵜⴰⵙⵔⵜⵉⵜ ⴷ ⵜⵙⴽⵍⴰ ⴷ ⵜⴷⴰⵎⵙⴰ ⴷ ⵓⵙⴳⴷ ⵙ ⵜⵥⵓⵕⵉ ⵏⵏⵙ, ⵉⵎⵎⴰⵖ ⴰ ⵉⵎⵍ ⵓⴷⵎ ⵏ ⵜⵎⴰⴳⵉⵜ ⵏⵏⵙ ⵉ ⵓⵎⴰⴹⴰⵍ, ⵜⴰⵎⴰⴳⵉⵜ ⴰⵏⵏ ⵜⴰⵥⴰⵡⴰⵏⵜ, ⵜⴰⵎⴰⴳⵉⵜ ⴰⵏⵏ ⵜⴰⵙⴽⵍⴰⵏⵜ, ⵜⴰⵎⴰⴳⵉⵜ ⴰⵏⵏ ⵉⵥⵍⵉⵏ ⵙ ⵓⴼⴳⴰⵏ ⴰⵎⴰⵣⵉⵖ ⵓⵔ ⵉⵟⵟⴼⵏ ⴰⵏⴰⵡ.
ⵜⴰⵥⵓⵕⵉ ⵏ ⵓⵃⵡⴰⵛ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]
ⴰⵃⵡⴰⵛ ⵍⵍⵉ ⵉⴳⴰⵏ ⵜⴰⵎⵓⵏⵜ ⵉⴳ ⵜⴰⵔⴰⴱⴱⵓⵜ ⵉⴳ ⴰⵡⴷ ⵓⴷⵎ ⵏ ⵜⵡⵉⵣⵉ ⵢⴰⴹⵏⵉⵏ. ⵉⵙⵎⴰⵏ ⵓⵃⵡⴰⵛ ⵜⴰⵔⴰⴱⴱⵓⵜ ⵏ ⵓⴼⴳⴰⵏ ⴷ ⵓⵎⴰⵔⴳ ⴷ ⵓⵥⴰⵡⴰⵏ, ⵉⵙⵎⴰⵏ ⵙ ⵖⵉⴽⴰⵏ ⵉⵙⵢⴰⴼⴰⵜⵏ ⵏ ⵎⵉⴷⴷⵏ. ⵓⵔ ⵉⵥⵍⵉ ⵓⵃⵡⴰⵛ ⵙ ⵓⵔⴳⴰⵣ ⴰⵡⴷ ⵜⴰⵡⵜⵎⵜ, ⵓⵔ ⵉⴳⵉ ⵡⵉⵏ ⵡⵉⴷ ⵎⵥⵥⵉⵢⵏ ⴰⵡⴷ ⵡⵉⴷ ⵎⵇⵇⵓⵕⵏ ⵉⵙⵎⴰⵏ ⵎⵉⴷⴷⵏ ⴰⴽⴽⵯ, ⴷ ⵓⵔ ⵉⴳⵍⵉ ⵎⵉⴷⴷⵏ ⵙ ⴽⵔⴰ ⵏ ⵓⵟⵟⵓⵏ, ⴰⵃⵡⴰⵛ ⵉⵙⵎⵓⵏ ⵎⵉⴷⴷⵏ ⵣⵖ ⵙⵉⵏ ⴰⵔ ⵉⴼⴹ ⵏ ⵓⴼⴳⴰⵏ ⴷ ⵓⴳⴳⴰⵔ.
ⵜⴰⵡⴰⵍⵜ ⵏ ⵓⵃⵡⴰⵛ ⵜⴳⴰ ⴰⵙⵙⴰⵖ ⵉ ⵎⴰⵕⵕⴰ ⵜⵉⵔⴰⴱⴱⵓⵜⵉⵏ ⵏ ⵓⵥⴰⵡⴰⵏ ⴷ ⵓⵎⴰⵔⴳ ⵍⵍⵉ ⵖⵯⵎⴰⵏⵉⵏ ⵙ ⵜⵎⴰⴳⵉⵜ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵣⵓⵏⴷ ⴽⵓⵍⵍⵓ ⵉⵃⵡⴰⵛⵏ ⵏ ⵙⵓⵙ (ⴰⵎⵚⵎⵓⴷⵉ), ⴷ ⵉⵃⵡⴰⵛⵏ ⵏ ⴰⵢⵜ ⵓⵣⴰⵖⴰⵔ ⴷ ⴰⵢⵜ ⵓⴷⵔⴰⵔ, ⵎⴰⵛⵛ ⵓⵔ ⵏⵥⴹⴰⵕ ⴰ ⵏⴳⵍⵉ (ⵍⵓⵏⴰⵙⵜ, ⵜⵉⵎⴷⵢⴰⵣⵉⵏ ⵏ ⵃⵎⴰⴷⴰ, ⵍⵄⵉⵟⴰ, ⵃⵓⵔⴰⵏ, ⵜⴰⵀⵔⴰⵎⵜ, ⵍⵀⵉⵜ, ⵍⵎⵍⵃⵓⵏ, ⵜⴰⴽⵔⵉⵃⵜ, ⵜⴰⴼⵔⵔⴰⵃⵜ ⵏ ⵜⵔⵓⴷⴰⵏⵜ…) ⴳ ⵡⴰⵙⵙⴰⵖ ⵏ ⵓⵃⵡⴰⵛ ⵍⵍⵉⵖ ⴼⵍⵍⴰⵙ ⴷⵡⵔⵏ ⵡⴰⵏⴰⵡⵏ ⴰⴷ ⵏ ⵓⵥⴰⵡⴰⵏ, ⴷ ⵓⵔⵜ ⵙⵓⵍ ⵔⵡⴰⵙⵏ ⵙ ⴽⵉⴳⴰⵏ, ⴳⴰⵏ ⵉⵃⵡⴰⵛⵏ ⵜⵜⵄⵕⵕⴱⵏⵉⵏ ⵍⵍⵉ ⵙⵓⵏ ⵓⵔ ⵉⴳⵉⵏ ⴰⵎⴰⵣⵉⵖ, ⴰⵛⴽⵓ ⵉⵖ ⵏⵏⴰ ⴰⵃⵡⴰⵛ ⵏⵓⴽⵣ ⵏⵏ ⴽⵉⴳⴰⵏ ⵏ ⵉⵃⵡⴰⵛⵏ ⵍⵍⵉ ⵍⵍⴰⵏ ⵉⵏⵏ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵍⵍⵉ ⵉⵍⵙⴰⵏ ⵜⴰⵎⴰⴳⵉⵜ ⵜⴰⵎⴰⵣⵉⵖⵜ, ⴳ ⵙⵓⵙ ⴷ ⵍⵃⵓⵣ ⴷ ⵡⴰⵙⵉⴼ ⵏ ⴷⵔⴰ. ⵡⴰⵅⵅⴰ ⵉⵍⵍⴰ ⵓⵃⵡⴰⵛ ⵙ ⴽⵉⴳⴰⵏ ⵡⴰⵏⴰⵡⵏ ⴷ ⴽⵉⴳⴰⵏ ⵏ ⵉⴽⵯⵍⴰⵏ ⴷ ⵓⵥⴰⵡⴰⵏ ⵎⴰⵛⵛ ⵉⴳⴰ ⵢⴰⵏ ⵙ ⵜⵖⴰⵔⴰⵙⵜ ⵏⵏⵙ ⵉⵥⵍⵉⵏ ⵖ ⵜⵓⵙⵙⵏⴰ ⵜⴰⵎⴰⵣⵉⵖⵜ.
ⴰⵏⴰⵡⵏ ⴰⴷ ⵏ ⵉⵃⵡⴰⵛⵏ ⵎⵎⵔⴽⵙⵏⵉⵏ ⵍⵍⴰⵏ ⴳ ⵙⵓⵙ, ⴰⵃⵡⴰⵛ ⵏ ⵉⴷⴰ ⵓⵙⵎⵍⴰⵍ ⵓⵔ ⵉⴳⵉ ⴰⵃⵡⴰⵛ ⵏ ⴰⵡⵍⵓⵥ, ⵉⵍⵍⴰ ⴽⵔⴰ ⵏ ⵓⵣⵉⵍⴰⵍ ⴳⵔⴰⵙⵏ ⵖ ⵓⵥⴰⵡⴰⵏ ⴷ ⵓⴽⵍⵓ ⴷ ⵜⵖⴰⵔⴰⵙⵜ ⵍⵍⵉ ⵙⴰ ⴳⵉⵙ ⵜⵜ ⵃⵓⵛⵏ. ⵉⵍⵉⵏ ⵜⵎⵏⴰⴹⵉⵏ ⵎⵇⵇⴰⵔ ⵉⴳⴰ ⵡⴰⵙⵙⴰⵖ / ⵉⵙⵎ ⵢⴰⵏ, ⵎⴰⵛⵛ ⴰⵃⵡⴰⵛ ⵓⵔ ⵉⴳⵉ ⵢⴰⵏ, ⴰⵏⴰⵡⵏ ⵏ ⵉⵃⵡⴰⵛⵏ ⵉⵍⵍⴰⵏ ⵖ ⵓⴷⵔⴰⵔ ⵏ ⴷⵔⵏ ⵎⵇⵇⵓⵕⵏ ⵓⵔ ⵉⴳⵉ ⵣⵓⵏ ⴷ ⵉⵃⵡⴰⵛⵏ ⵉⵍⵍⴰⵏ ⴳ ⵓⴷⵔⴰⵔ ⵏ ⵍⴰⵟⵍⴰⵚ ⴰⵎⵕⵡⴰⵚⵓ, ⵓⵔ ⵎⵎⵔⵡⴰⵙⵏ ⵖ ⵉⵣⵍⵉ ⴰⵡⴷ ⵉⵎⴰⵙⵙⵏ ⵓⵍⴰ ⵓⵔ ⴳⵉⵏ ⵢⴰⵏ ⵖ ⵓⴽⵍⵓ ⵏ ⵜⵔⴰⴱⴱⵓⵜ ⴷ ⵜⵖⴰⵔⴰⵙⵜ ⵏ ⵓⵃⵡⴰⵛ. ⴰⴱⵟⵟⵓ ⴰⴷ ⵉⵍⵍⴰⵏ ⵏⴳⵔ ⴰⵃⵡⴰⵛ ⵏ ⵓⴷⵔⴰⵔ ⵏ ⴷⵔⵏ ⵎⵇⵇⵓⵕⵏ ⴷ ⵓⴷⵔⴰⵔ ⴰⵎⵕⵡⴰⵚⵓ ⴷ ⵙⵓⵙ ⴰⴽⴽⵯ ⴷ ⵍⵃⵓⵣ, ⵉⵔⵡⴰⵙ ⵉⵙ ⴷ ⵉⴽⴽⴰ ⴰⵏⴰⵡ ⵏ ⵜⵣⴷⴳⵉ ⴷ ⵉⴳⴰⵎⵉⵡⵏ ⵍⵍⵉⵖ ⵣⴷⵖⵏ ⵉⵎⴰⵣⵉⵖⵏ, ⵉⴳ ⵓⵎⵣⵔⵓⵢ ⴰⵡⴷ ⵏⵜⵜⴰⵏ ⵣⵖ ⴰ ⵉⵍⵍⵉ ⵉⴼⴼⴰⵍⵏ ⵜⵉⴼⵉⵔⴰⵙ ⵏⵏⵙ ⴳ ⵜⵥⵓⵕⵉ ⴷ ⵜⵓⵙⵙⵏⴰ ⴰⴽⴽⵯ.
ⵉⵃⵡⴰⵛⵏ ⵍⵍⵉ ⴰⴽⴽⵯ ⵉⵍⵍⴰⵏ ⵖ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵎⵇⵇⴰⵔ ⴳⴰⵏ ⴰⵏⴰⵡⵏ ⵉⴳⴳⵓⵜⵏ, ⵉⴳⴰ ⵢⴰⵜ ⵜⵥⵓⵕⵉ ⵍⵍⵉ ⵙ ⵜⵥⵍⵉ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵉⴳ ⴰⵢⴷⴰ ⵍⵍⵉ ⴷ ⴼⵍⵏ ⵉⵎⵣⵡⵓⵔⴰ ⵉ ⵓⴼⴳⴰⵏ ⴷⵉⵙ ⵢⵓⵙⵉⵏ ⴰⴽⵍⵓ ⵏ ⵜⵖⵔⵎⴰ ⴷ ⵜⵎⴰⴳⵉⵜ ⵜⴰⵎⴰⵣⵉⵖⵜ.
ⵜⵉⵎⵍⵙⵉⵜ ⵏ ⵓⵃⵡⴰⵛ ⵓⵔ ⵜⴳⵉ ⵢⴰⵜ, ⴽⵓ ⵜⴰⵎⴰⵣⵉⵔⵜ ⵎⴰⵏ ⵜⵎⵍⵙⵉⵜ ⵍⵙⵙⴰⵏ ⵉⵎⵓⵔⴰⵔ ⴳ ⵓⵃⵡⴰⵛ. ⴷ ⴽⵔⴰ ⵉⴳⴰ ⵜⵜ ⵜⴰⵎⵓⵔⵜ ⵜⵥⵍⵉ ⵜⵎⵍⵙⵉⵜ ⵏⵏⵙⵏ ⴳ ⵜⴼⴼⵓⴳⵍⵉⵡⵉⵏ ⵏⵏⵙⵏ ⴷ ⵜⵎⵢⵓⵔⵉⵏ ⵏⵏⵙⵏ, ⵉⵖ ⵏⵥⵕⴰ ⵜⵉⵎⵍⵙⵉⵜ ⵖ ⵉⵃⵡⴰⵛⵏ ⵏ ⴰⵢⵜ ⵜⵎⴰⵣⵉⵔⵜ ⵏ ⵡⴰⵇⵇⴰ ⴷ ⵜⵙⴽⵜⴰⵏⵜ ⴷ ⵟⴰⵟⴰ ⵓⵔ ⴳⵉⵏⵜ ⵣⵓⵏ ⴷ ⵜⵎⵍⵙⴰ ⵏ ⵉⵃⵡⴰⵛⵏ ⵏ ⴰⵢⵜ ⵓⵣⴰⵖⴰⵔ ⵏ ⵜⵣⵏⵉⵜ, ⴷ ⵅⵜⵉⴷ ⴰⴽⴽⵯ ⵓⵔ ⴳⵉⵏⵜ ⵣⵓⵏ ⴷ ⵜⵉⵏⵏ ⵍⵍⵉ ⵍⵙⵙⴰⵏ ⴰⵢⵜ ⵓⴷⵔⴰⵔ ⵏ ⵍⴰⵟⵍⴰⵚ, ⵉⴳ ⵎⴰⵢⴰⵏ ⴰ ⵉⵍⵍⵉ ⵉⵥⵍⵉⵏ ⵙ ⴽⵔⴰ ⵉⴳⴰ ⵜⵜ ⵜⴰⵎⴰⵣⵉⵔⵜ. ⵉⵏⴰⵡⵏ ⴰⴷ ⵏ ⵜⵎⵍⵙⴰ ⴷ ⵉⴽⵯⵍⴰⵏ ⴰⴷ ⵉⵎⵎⵔⴽⴽⵙⵏ ⴳ ⵜⵎⵉⵣⴰⵔ ⵉⴳⴰ ⴰⴼⵓⵍⴽⵉ ⵍⵍⵉ ⵜⵍⴰ ⵜⵖⵔⵎⴰ ⵜⴰⵎⴰⵣⵉⵖⵜ, ⵍⵍⵉ ⵎⵉ ⵉⵕⵛⵎ ⵓⵎⵣⵔⵓⵢ ⵜⵉⴼⵔⴰⵙ ⵏⵏⵙ.
ⴰⵥⴰⵡⴰⵏ ⵏ ⵓⵃⵡⴰⵛ ⴰⵡⴷ ⵏⵜⵜⴰⵏ ⵉⵎⵎⵔⴽⴽⵙ ⵉⴳⴳⵓⵜ ⵉⴳⴰ ⴰⵏⴰⵡⵏ ⵖ ⵓⵃⵡⴰⵛ ⴰⵎⴰⵣⵉⵖ. ⵉⵍⵉⵏ ⵙⵉⵏ ⵡⴰⵏⴰⵡⵏ ⵏ ⵉⵙⴰⴼⴼⵏ ⵏ ⵓⵥⴰⵡⴰⵏ, ⴰⵎⵣⵡⴰⵔⵓ : ⴰⵥⴰⵡⴰⵏ ⴰⵎⴰⵣⵉⵖ ⴰⵣⴰⵢⴽⵓ, ⵍⵍⵉ ⵓⵔ ⵉⴼⴼⴰⵖⵏ ⵉⵙⴰⴼⴼⵏ ⵏ ⵓⵎⴰⵔⴳ ⴰⵣⴰⵢⴽⵓ ⴰⵎⴰⵣⵉⵖ, ⵉⴳ ⴰⵡⴷ ⵏⵜⵜⴰⵏ ⵙⵉⵏ ⵡⴰⵏⴰⵡⵏ ⵢⴰⵏ ⵉⴳⴰ ⴰⵛⵍⵃⵉ ⵡⵉⵙ ⵙⵉⵏ ⵉⴳⴰ ⴰⴱⵓⴷⵔⴰⵔ, ⴷ ⵡⴰⵏⴰⵡ ⵡⵉⵙ ⵙⵉⵏ ⵖ ⵉⵙⴰⴼⴼⵏ ⵏ ⵓⵥⴰⵡⴰⵏ ⵉⵍⵍⴰ : ⴰⵥⴰⵡⴰⵏ ⵏ ⵜⴰⴼⵔⵉⵇⵜ, ⵍⵍⵉ ⵉⴳⴰⵏ ⴰⵥⴰⵡⴰⵏ ⴷ ⵉⴽⴽⴰⵏ ⴰⴳⵯⵏⵙ ⵏ ⵜⴼⵔⵉⵇⵜ ⵍⵍⵉ ⵉⵎⴰⵏⵏ ⴳ ⵢⴰⵏ ⵓⴽⵍⵓ ⵏ ⵉⵣⵍⵉ ⴰⵔ ⴰⵙ ⵜⵜ ⵉⵏⵉⵏ ‘ⴳⵏⴰⵡⴰ / ⵜⴰⴳⵏⴰⵡⵉⵜ’.
ⵉⵙⴰⴼⴼⵏ ⵏ ⵓⵥⴰⵡⴰⵏ ⴰⵎⴰⵣⵉⵖ ⴰⵔ ⵜⵏ ⵉⵣⵓⵣⵣⵓⵔ ⵡⴰⵍⵍⵓⵏ, ⴷ ⵉⵙⴰⴼⴼⵏ ⵏ ⵓⵥⴰⵡⴰⵏ ⵏ ⵜⴼⵔⵉⵇⵜ ⴰⵔ ⵜⵏ ⵉⵣⵓⵣⵣⵓⵔ ⴳⴰⵏⴳⴰ ⵉⵎⴰⵏ ⴷⵉⵙ ⴰⵡⴷ ⵡⴰⵍⵍⵓⵏ. ⴰⵥⴰⵡⴰⵏ ⴰⴷ ⵏ ⵜⴼⵔⵉⵇⵜ ⴰⵔ ⵜⵉⵏ ⴱⴰⵀⵔⴰ ⵏⵜⵜⴰⴼⴰ ⴳ ⵍⴰⵟⵍⴰⵚ ⵎⵥⵥⵉⵢⵏ ⴷ ⵓⴳⵯⵏⵙ ⵏ ⵉⴼⴼⵓⵙ ⴷ ⵉⴼⴼⵓⵙ ⴰⵜⴰⵡⴰⵏ.
ⵉⵃⵡⴰⵛⵏ ⵏ ⵓⵎⴰⵣⵉⵖ ⵍⵍⴰⵏ ⴼ ⵙⵎⵎⵓⵙⵜ ⵜⵉⵡⴰⵍ (أشكال), ⵎⵇⵇⴰⵔ ⵉⴳⴰ ⵓⵃⵡⴰⵛ ⵡⵉⵏ ⵉⵔⴳⴰⵣⵏ ⵡⴰⵀⴰ ⵏⵉⵖ ⵉⴳⴰ ⵡⵉⵏ ⵉⵔⴳⴰⵣⵏ ⴷ ⵜⵎⵖⴰⵔⵉⵏ ⵏⵉⵖ ⵡⵉⵏ ⵜⵎⵖⴰⵔⵉⵏ ⵡⴰⵀⴰ ⵏⵉⵖ ⵉⴳⴰ ⵡⵉⵏ ⵜⴼⵔⵅⵉⵏ.
ⵜⵉⵡⴰⵍ ⵏ ⵉⵃⵡⴰⵛⵏ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]
- Amaɣʷd (استقامة)
- ⴰⵎⴰⵖⵯⴷ (استقامة)
- ⵡⴰⴷ ⴽⵯⵏⴰⵏⵉⵏ (مقوس)
- ⵙⵉⵏ ⵉⵎⴰⵖⵯⴷⵏ ⵎⴳⴰⴱⴰⵍⵏⵉⵏ (استقامة متقابلة)
- ⵙⵉⵏ ⵉⵎⴰⵖⵯⴷⵏ ⵎⵙⴰⵙⴰⵏⵉⵏ (استقامة متوازية)
- ⵜⴰⵙⵓⵜⵍⵜ ⵉⵇⵏⵏ (دائرة مغلقة)
ⵜⵉⵡⴰⵍ ⴰⴷ ⵏ ⵓⵃⵡⴰⵛ ⵉⵍⵍⴰ ⵎⴰⵖ ⵎⵓⵏⵏⵜ ⵖ ⵢⴰⵏ ⵡⴰⵏⴰⵡ ⵏ ⵓⵃⵡⴰⵛ, ⵉⵍⵉ ⵎⴰⵖ ⴳⵉⵙ ⵢⴰⵜ ⵏⵉⵖ ⵙⵏⴰⵜ, ⵉⵍⵍⴰ ⴷⴰⵖ ⵎⴰⵖ ⵉⵙⵙⴼⴰⵍ ⵓⵃⵡⴰⵛ ⵙ ⵓⵎⴰⵖⵯⴷ ⵉⴷⵡⵔ ⵙ ⵜⵙⵓⵜⵍⵜ ⵉⵇⵇⵏⵏ, ⴷ ⵉⵖ ⵉⵙⵙⴼⴰⵍ ⵙ ⵙⵉⵏ ⵉⵎⴰⵖⵯⴷⵏ ⵎⴳⴰⴱⴰⵍⵏⵉⵏ ⵉⴱⵕⵕⵎ ⵙ ⵜⵙⵓⵜⵍⵜ ⵉⵇⵇⵏⵏ, ⵉⴷⵡⵔ ⵙ ⵜⵉⵡⴰⵍ ⵢⴰⴹⵏⵉⵏ, ⵉⴳ ⵓⵃⵡⴰⵛ ⵙ ⵉⴽⵍⵍⵉ ⵜ ⵉⴳⵍⵍⵉ (ⵓⵄⵍⵍⴰⵎ / ⵕⵕⴰⵢⵙ), ⵏⵜⵜⴰⵏ ⴰⴷ ⴰⵙⵏ ⵉⵎⵎⴰⵍⵏ ⵜⵉⵣⵉ ⵏⵏⴰ ⵖ ⵔⴰⴷ ⵜⴷⵡⵔ ⵜⵡⵉⵍⴰ ⵏ ⵓⵃⵡⴰⵛ ⵙ ⵜⴰⵢⵢⴰⴹ, ⵣⵖ ⵡⴰⴷ ⵉⴽⵯⵏⴰⵏ ⵙ ⵓⵎⴰⵖⵯⴷ ⵏⵉⵖ ⵣⵖ ⵜⵙⵓⵜⵍⵜ ⴰⵔ ⵙⵉⵏ ⵉⴽⵯⵏⴰⵏ. ⵉⵍⵉ ⴰⵏⴰⵡ ⵏ ⵓⵃⵡⴰⵛ ⵍⵍⵉ ⵉⵜⵜ ⵖⴰⵎⴰⵏ ⴳ ⵢⴰⵜ ⵜⵡⵉⵍⴰ, ⵉⵖⴰⵎⴰ ⴼⵍⵍⴰⵙ ⴰⵔ ⴷ ⵉⴽⵎⵎⵍ ⵉⵡⵉⵣ, ⵉⴽⵍⵍⵉ ⵉⵍⵍⴰⵏ ⴳ ⴽⵔⴰ ⵏ ⵜⴰⵙⴳⵉⵡⵉⵏ ⵏ ⵙⵓⵙ.
ⵣⵖ ⵡⴰⵏⴰⵡⵏ ⵏ ⵓⵃⵡⴰⵛ ⵍⵍⵉ ⵉⵍⵍⴰⵏ, ⵔⴰ ⵏⴱⴷⵔ, ⴰⵃⵡⴰⵛ ⵏ ⵜⴰⵙⴽⵉⵡⵉⵏ.
.jpg)
ⵜⵉⵇⴱⵉⵍⵉⵏ ⵖ ⵉⵍⵍⴰ ⵓⵃⵡⴰⵛ ⵏ ⵜⴰⵙⴽⵉⵡⵉⵏ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵜⴰⵔⴰⴱⴱⵓⵜ ⵏ ⵓⵃⵡⴰⵛ ⵏ ⵜⴰⵙⴽⵉⵡⵉⵏ, ⴰⴷⵡⵡⴰⵕ ⵏ ⵉⵔⵃⵃⴰⵍⵏ ⴳ ⵉⵍⴱⵏⵙⵉⵔⵏ ⵜⵉⵎⵣⴳⴰⴷⵉⵡⵉⵏ.
- ⵉⵕⵓⵀⴰⵍⵏ
- ⴰⵢⵜ ⴷⵔⵉⵙ
- ⵉⴷⴰⵡ ⵉⵣⵉⵎⵎⵔ
- ⵉⴷⴰ ⵓⵎⵃⵎⵓⴷ
- ⵉⵎⵏⵜⴰⴳⵏ
- ⵉⵔⴳⵉⵜⵏ
- ⴰⵢⵜ ⵡⴰⴷⵃⴰⵙ ⴰⴳⵯⵏⵙⴰⵏ
- ⵉⵎⴷⵍⴰⵡⵏ
- ⵜⵉⴳⵓⴳⴰ
- ⵉⴷⴰ ⵓⵎⵚⴰⵜⵜⵓⴳ
- ⴰⵖⴱⴰⵕ
- ⴰⵎⵥⵎⵉⵥ
- ⴰⵢⵜ ⵛⵄⴰⵢⴱ
- ⴰⵢⵜ ⵃⴷⴷⵓ ⵢⵓⵙⴼ
- ⴰⵢⵜ ⵎⵃⵏⴷ ⴰⵢⵜ ⵜⵉⴽⵙⵉⵜ
- ⴰⵢⵜ ⴱⵅⴰⵢⵔ ⴳ ⵜⵇⴱⵉⵍⵜ ⵏ ⵉⵍⴱⵏⵙⵉⵔⵏ : ⵜⵜⴰⵡⵙⵙⴰⵏ ⴰⵢⵜ ⴱⵅⴰⵢⵔ ⵉⵍⵍⴰⵏ ⴳ ⵜⵇⴱⵉⵍⵜ ⵏ ⵉⵍⴱⵏⵙⵉⵔⵏ ⵙ ⵓⵃⵡⴰⵛ ⵏ ⵜⴰⵙⴽⵉⵡⵉⵏ, ⵉⴳ ⴷⴰⵔⵙⵏ ⵓⵃⵡⴰⵛ ⴰⴷ ⴰ ⵉⵍⵍⵉ ⵉⵣⴷⵉⵏ ⴷ ⵓⵎⵣⵔⵓⵢ ⵏⵏⵙⵏ. ⵍⵍⴰⵏⵜ ⵖ ⴰⵢⵜ ⴱⵅⴰⵢⵔ ⵖ ⵜⵇⴱⵉⵍⵜ ⵏ ⵉⵍⴱⵏⵙⵉⵔⵏ ⴽⵉⴳⴰⵏ ⵏ ⵜⵎⵙⵎⵓⵏⵉⵏ ⵍⵍⵉ ⵉⵎⵎⴰⵖⵏ ⴰⴷ ⵉⵙⵓⵍ ⵓⵃⵡⴰⵛ ⵏ ⵜⴰⵙⴽⵉⵡⵉⵏ ⵖ ⵜⵎⵢⵓⵔⵉⵏ ⵏⵏⵙⵏ. ⵢⴰⵜ ⵣⵖ ⴳⵉⵙⵏ ⵍⵍⵉ ⴱⴰⵀⵔⴰ ⵉⵜⵜⴰⵡⵙⵙⴰⵏ ⵜⴳⴰ ⵜⵜ : جمعية أحواش تاسكيوين أفلايزداتن أيت بخاير للفنون ⵍⵍⵉ ⵉⵡⴰⵍⴰⵏ ⵉ ⵜⵇⴱⵉⵍⵜ ⵏ ⵉⵍⴱⵏⵙⵉⵔⵏ ⵜⴰⴼⵓⵙⵜ ⵏ ⴰⵢⵜ ⴱⵅⴰⵢⵔ ⵜⴰⴳⵔⴰⵡⵜ ⵏ ⵓⴼⵍⵍⴰ ⵉⵙⵙⵏ ⵜⴰⵙⴳⴰ ⵏ ⵛⵉⵛⴰⵡⴰ, ⴳⵏ ⵡⴰⵙⵙⴰⵖⵏ ⴰⴷ ⵡⵉⵍⵍⵉ ⵉⵎⵓⵏⵏ ⴳ ⵜⵎⵙⵎⵓⵏⵜ ⴰⴷ ⴼⴽⵏ ⴰⵜⵉⴳ ⴳⴳⵓⵜⵏ ⵉ ⵓⵃⵡⴰⵛ ⵏ ⵜⴰⵙⴽⵉⵡⵉⵏ : ⵍⵃⵓⵙⴰⵢⵏ ⴱⵓⵍⵣⵎⵉⵏ, ⵙⴰⵍⵎ ⴰⵎⵣⵉⵍ, ⵍⵃⵓⵙⴰⵢⵏ ⴰⵢⵜ ⴱⵕⴰⵎ, ⵍⵃⵓⵙⴰⵢⵏ ⴰⵕⵃⵃⴰⵍ, ⴱⵕⴰⵀⵉⵎ ⴰⵎⵣⵉⵍ, ⵎⵓⵃⵎⵎⴰⴷ ⵉⴳⵔⵏⴰⵎ, ⵃⵎⴰⴷ ⵓⴼⵇⵇⵉⵔ, ⵎⴱⴰⵕⴽ ⵍⵎⵉⵊ; ⵎⴱⴰⵕⴽ ⴰⵥⵕⵡⴰⵍ.
ⵢⵓⵙⵉ ⵓⵃⵡⴰⵛ ⵏ ⵜⴰⵙⴽⵉⵡⵉⵏ, ⵉⵙⵎ ⵏ ⵜⴰⵙⴽⵉⵡⵉⵏ, ⵣⵖ ⵜⵉⵙⴽⵜ ⵏ ⵉⵣⵉⵎⵎⵔ ⵉⵕⵛⵎⵏ ⵙ ⵉⴼⴰⵍⴰⵏ ⴷ ⵉⴽⵯⵍⴰⵏ ⵍⵍⵉ ⵜⵜ ⴳⴳⴰⵏ ⵉⵎⴰⵔⵉⵔⵏ ⴼ ⵜⵖⵕⵓⴹⵜ ⵏⵏⵙⵏ ⵜⴰⵥⵍⵎⴰⴹⵜ.
ⵉⵏⵉⵏ ⵉⵎⵣⵡⵓⵔⴰ ⵎⴰⵙ ⵜⵜ ⵉⵏⵏ ⴽⴽⴰⵏ ⵉⵎⴰⵔⵉⵔⵏ ⵏ ⵓⵃⵡⴰⵛ ⵏ ⵜⴰⵙⴽⵉⵡⵉⵏ ⴰⵔ ⵜⵜ ⴳⴳⴰⵏ ⵍⴱⴰⵕⵓⴹ ⵖ ⵜⵉⵙⴽⵜ ⵙⵙⵍⴽⵎⵏ ⵜⵜ ⵉ ⵓⴷⵡⵡⴰⵕ ⵙ ⵡⴰⵢⵢⴰⴹ, ⵎⴰⵢⴰⴷ ⵖ ⵓⵣⵎⵣ ⵏ ⵉⵎⵏⵖⵉ ⴷ ⴼⵕⴰⵏⵚⴰ, ⴰⵡⴷ ⵉⵖⵏⴰⵏ ⵏ ⵜⵇⴱⵉⵍⵉⵏ ⵖ ⵖⴰⴷ ⵉⵣⵔⵉⵏ, ⵓⵍⴰ ⵉⵎⵏⵖⴰⵏ ⵏⴳⵔ ⴰⵙⵏ ⴷ ⵜⵇⴱⵉⵍⵉⵏ ⵢⴰⴹⵏⵉⵏ, ⵏⵥⴹⴰⵕ ⴰ ⵏⵉⵏⵉ ⵎⴰⵙ ⵉⵍⵓⵍ ⵓⵃⵡⴰⵛ ⵏ ⵜⴰⵙⴽⵉⵡⵉⵏ ⴳ ⵓⵣⵎⵣ ⵍⵍⵉⵖ ⵉⵍⵓⵍ ⵉⵎⵏⵖⵉ ⵉⴳⴰⵜⵏ ⵉⵖⵏⴰⵏ ⵉⴳ ⵉⵎⵏⵖⵉ ⴰⵏⵣⴳⵓⵎ ⵉ ⵜⵇⴱⵉⵍⵉⵏ ⴰⴽⴽⵯ.
ⵖ ⵓⵃⵡⴰⵛ ⵏ ⵜⴰⵙⴽⵉⵡⵉⵏ, ⴰⵔ ⵜⵜ ⴳⴳⴰⵏ ⵉⵎⴰⵔⵉⵔⵏ ⵓⴳⴳⴰⵔ ⵏ 20 ⵏ ⵓⵔⴳⴰⵣ, ⵍⵙⴰⵏ ⵜⵉⵎⵍⵙⴰ ⵜⵓⵎⵍⵉⵍⵜ (ⵍⴼⵓⵇⵉⵢⴰⵜ / ⵜⵛⴰⵎⵉⵔ), ⴱⵉⴽⵙⵏ ⵜⵜ ⵙ ⵉⵛⴷⴷⴰⴷⵏ ⵉⵕⵛⵎⵏ ⵙ ⵉⴽⵯⵍⴰⵏ ⵏ ⵓⵛⵏⵢⴰⵍ ⴰⵏⴰⵎⵓⵔ, ⵉⴳ ⵎⴰⵢⴰⵏ ⵜⴰⵎⴰⵜⴰⵔⵜ ⵉ ⵜⴰⵎⵓⵏⵜ ⵜⴰⵏⴰⵎⵓⵔⵜ, ⴳⵏ ⵉⵙⴽ ⴼ ⵉⴳⴳⵉ ⵏ ⵜⵖⵕⵓⴹⵜ ⵏⵏⵙⵏ ⵜⴰⵥⵍⵎⴰⴹⵜⵏ ⴰⴳⵯⵍⵏ ⵍⴽⵯⵎⵎⵉⵜ ⴼ ⵜⵙⴳⴰ, ⴰⵙⵉⵏ ⵉⵡⴳⴰⵍⵏ ⴷ ⵜⵉⵍⵍⵓⵏⴰ ⴷ ⵜⴳⵯⵎⴰⵎⵉⵏ ⵍⴰⵄⵡⵡⴰⴷ, ⴳ ⵜⵎⵢⵓⵔⵜ ⴰⵔ ⵜⵜ ⴳⴳⴰⵏⵜ ⵜⵉⵍⵍⵓⵏⴰ ⵏ ⵉⵍⵎ ⴽⵕⴰⴹⵜ ⵖ ⵜⵔⴰⴱⴱⵓⵜ, ⴰⵙⵉⵏ ⵏⴳⵔ ⵢⴰⵏ ⴰⵔ ⴽⴽⵓⵥ ⵜⵉⴳⵯⵎⴰⵎⵉⵏ, ⵡⵉⵍⵍⵉ ⵉⵜⵜ ⵖⴰⵎⴰⵏ ⵣⵖ ⵉⵎⴰⵔⵉⵔⵏ ⵏ ⵜⵔⴰⴱⴱⵓⵜ ⴰⵔ ⵜⵜ ⴰⵙⵉⵏ ⴰⵡⴳⴰⵍ ⵉ ⵢⴰⵏ ⴰⵔ ⵜⴽⴽⴰⵜⵏ ⴰⵔ ⵜⵜ ⵃⵡⴰⵛⵏ.
ⵜⴰⵖⴰⵔⴰⵙⵜ ⵏ ⵓⵙⴼⵓⴳⵍⵓ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⴰⵔ ⵙⵙⴼⴰⵍⵏ ⵎⵉⴷⴷⵏ ⴰⴷ ⵃⵓⵡⵛⵏ ⵜⴰⵙⴽⵉⵡⵉⵏ, ⵖ ⵜⵓⵥⵥⵓⵎⵜ ⵏ ⵢⵉⴹ, ⴳ ⵓⵙⴰⵢⵙ ⵏⵉⵖ ⴷⴷ ⴰⵙⴰⵔⴰⴳ, ⴰⵔ ⵙⵙⵔⵖⴰⵏ ⵉⵎⵓⵔⴰⵔ ⵜⴰⴽⴰⵜ ⴳ ⵢⴰⵜ ⵜⵙⴳⴰ, ⵃⵎⴰ ⴰⴷ ⵙⵉⵙ ⵙⵙⵔⵖⵏ ⵜⵉⵍⵍⵓⵏⴰ ⵏⵏⵙⵏ ⴷ ⵉⵡⴳⴰⵍⵏ ⵏⵏⵙⵏ, ⴷ ⴰ ⵙⵉⵙ ⵉⵙⴼⴰⵡⵏ ⵜⵓⵥⵥⵓⵎⵜ ⵏ ⵓⵙⴰⵢⵙ, ⴰⴳⵯⵍⵏ ⵍⴰⵎⴱⴰⵜ ⵏ ⵍⴳⴰⵣ ⵖ ⵜⵖⵯⵎⵔⵉⵏ ⵏ ⵓⵙⴰⵢⵙ, ⴰⵔ ⴼⵍⵍⴰⵙⵏ ⵉⵜⵜⴳⴳⵯⴰ ⵡⴰⵢⵢⵓⵔ ⵣⵖ ⴷⴷⵓ ⵜⴰⴳⵓⵜ ⵜⵉⴽⵍⵉⵜ ⴰⵔ ⵜⴰⵢⵢⴰⴹ, ⵉⵙⵙⴰⴳⴳⵯ ⵏⵏ ⵢⴰⵜ ⵜⵙⵓⵜⵍⵜ ⴰⵣⴳⵏ ⵏⵏⵙ ⵉⴳⴰ ⵉⵔⴳⴰⵣⵏ ⵉⵍⵙⴰⵏ ⵓⵎⵍⵉⵍ, ⴰⵣⴳⵏ ⵡⵉⵙ ⵙⵉⵏ ⵍⵍⴰⵏⵜ ⴳⵉⵙ ⵜⵎⵖⴰⵔⵉⵏ, ⴳ ⵜⵓⵥⵥⵎⵜ ⵏ ⵜⵙⵓⵜⵍⵜ ⴰⵏⵏ ⵉⴱⴷⴷ (ⵕⵕⴰⵢⵙ) ⴷ ⵉⴷ ⴱⵓ ⵜⵉⵍⵍⵓⵏⴰ, ⴷ ⵉⴷ ⴱⵓ ⵜⴳⵯⵎⴰⵎⵉⵏ, ⵙⵙⵓⵜⵍⵏ ⴰⵙⵏ ⵎⵉⴷⴷⵏ ⵉⵔⴳⴰⵣⵏ ⴷ ⵜⵎⵖⴰⵔⵉⵏ ⴷ ⵜⵃⵓⴷⵔⵉⵢⵉⵏ ⴷ ⵜⴰⵣⵣⴰⵏⵉⵏ ⴰⵔ ⵙⵎⵓⵇⵇⵓⵍⵏ ⵉⵡⵉⵣ.
ⵜⴰⴼⵔⵓⵅⵜ ⵍⵍⵉ ⵉⵎⵥⵥⵉⵢⵏ ⴳ ⵜⵉⵎⵀⴹⴹⵕⵉⵏ ⵏ ⵜⴰⵙⴽⵉⵡⵉⵏ ⴷⴰⵔⵙ ⴽⴽⵓⵥ ⵏ ⵉⵙⴳⴳⵯⴰⵙⵏ, ⴷ ⵜⴰⴷ ⵉⵎⵇⵇⵓⵕⵏ ⴳⵉⵜⵙⵏⵜ ⵓⵔⴰ ⵏⵏ ⵜⵣⵔⴰⵢ ⵚⴹⵉⵚ ⴷ ⵎⵔⴰⵡ ⵏ ⵓⵙⴳⴳⵯⴰⵙ, ⵉⴹⴰⵕⵏ ⵏⵏⵙⵏ ⵉⴷⵍⵜⵏⵜ ⵓⵃⴰⵢⴽ ⵓⵎⵍⵉⵍ ⴷ ⵉⴳⴳⵯⵣⵏ ⵣⵖ ⵜⴰⴽⴽⵯⵙⵜ ⵉⵕⵛⵎⵏ ⵙ ⵉⴽⵯⵍⴰⵏ ⵉⵙⵓⴼⴰⵏ ⵙ ⵓⵎⵓⵣⵓⵏ, ⴰⵔ ⵉⵜⵜⵎⵓⵙⵙⵓ ⵙ ⵉⵙⵓⴼⴰ ⵏ ⵓⵎⵓⵣⵓⵏ ⵏⵏⵙ ⵜⵉⵣⵉ ⵏⵏⴰ ⵜⵜ ⵃⵡⴰⵛⵏⵜ, ⴰⵔ ⵜⵜⵎⵓⵙⵙⵓⵏⵜ ⵜⴰⵍⵎⵕⵊⴰⵏⵉⵏ ⴷ ⵜⴰⵍⵍⵓⴱⴰⵏⵉⵏ ⴷ ⵉⵥⵕⵥⴰ ⵏ ⵏⵇⵇⵯⵕⵜ ⵍⵍⵉ ⵓⴳⵍⵏⵜ, ⴳⵏⵜ ⴳ ⵉⵎⵣⴳⴰⵏ ⵏⵏⵙⵏⵜ ⵜⵉⴳⵯⵔⵉⵛⵉⵏ ⵏ ⵏⵏⵇⵇⵯⵕⵜ ⵉⴳⴰⵏ ⵣⵓⵏⴷ ⵜⵉⴷⵉⴽⵍⵜ ⵏ ⵓⴼⵓⵙ, ⴰⵔ ⴰⵙⵏⵜ ⵜⵜⵉⵏⵉⵏ (ⵉⵎⵓⵃⵉⴷⵏ). ⵉⵥⴹⴰⵕ ⴰⴷ ⴷ ⵉⴽⴽ ⵉⵙⵎ ⴰⴷ ⴰⵎⵣⵔⵓⵢ ⴰⵇⴱⵓⵔ ⵏ ⵜⴳⵍⴷⵉⵜ ⵏ ⵉⵎⵓⵃⵉⴷⵏ(الموحدين) . ⵍⵙⵏⵜ ⵉ ⵉⴳⵯⵢⵢⴰ ⵏⵏⵙⵏⵜ ⵍⵎⵍⴼ ⴰⵣⴳⴳⵯⴰⵖ ⵉⵍⴰⵏ ⵉⵥⴰⴽⴽⵯⵏ ⵖ ⵍⵍⴰⵏⵜ ⵜⵡⵏⵣⵉⵡⵉⵏ ⴷ ⵍⵎⵛⴱⴰⵃ ⵏ ⵏⵇⵇⵯⵕⵜ.
ⵉⵔⴳⴰⵣⵏ ⴰⵡⴷ ⵏⵜⵜⵏⵉ ⵍⵙⴰⵏ ⵍⴼⵓⵇⵉⵢⴰⵜ ⵜⵓⵎⵍⵉⵍⵉⵏ (ⵜⵛⴰⵎⵉⵔ), ⵙⵙⵍⵙⵏ ⵉ ⵉⴳⵯⵢⵢⴰ ⵏⵏⵙⵏ ⵜⴰⵕⵥⵥⴰⵜⵉⵏ ⵜⵓⵎⵍⵉⵍⵉⵏ, ⵓⵎⵥⵏⵜ ⵉⵊⵊⵉⴳⵏ ⴼ ⵉⴳⴳⵉ ⵏ ⵉⴳⵏⵣⵉ ⵏⵏⵙⵏ, ⴳ ⵜⵖⵕⵓⴹⵜ ⵜⴰⵥⵍⵎⴰⴹⵜ ⵓⴳⵯⵍⵏ ⵉⵛⴷⴷⴰⴷⵏ ⵉⵣⴳⴳⵯⴰⵖⵏ ⵢⵓⵎⵥⵏ ⴼ ⵉⴳⴳⵉ ⵏ ⵜⵖⵕⵓⴹⵜ (ⵜⵉⵙⴽⵜ) ⵍⵍⵉ ⵣⵖ ⵢⵓⵙⵉ ⵓⵃⵡⴰⵛ ⴰⴷ ⴰⵙⵙⴰⵖ ⵏⵏⵙ. ⵉⵍⵍⴰ ⵎⴰⵖ ⵜⴳⴰ ⵜⵉⵙⴽⵜ ⵜⵉⵏ ⵉⵣⵉⵎⵎⵔ ⵉⵖⵯⵎⴰⵏ ⵙ ⵉⴽⵯⵍⴰⵏ ⵉⵍⴰⵏ ⵍⵎⵓⵣⵓⵏ, ⵉⵍⵉ ⵎⴰⵖ ⵜⴳⴰ ⴰⴽⵛⵛⵓⴹ ⵉⵖⵯⵎⴰⵏ ⴰⵡⴷ ⵏⵜⵜⴰⵏ ⵙ ⵉⴽⵯⵍⴰⵏ ⵉⵍⴰ ⴰⵎⵓⵣⵓⵏ ⵉⵜⵜ ⵙⵓⴼⵓⵏ, ⵜⴳ ⵜⵉⵙⴽⵜ ⵣⵓⵏ ⴷ ⵍⴽⵯⵎⵎⵉⵜ ⴰⵔ ⵜⵜ ⵢⴰⴽⴽⴰ ⵓⴼⵓⵙ ⵉ ⵡⴰⵢⵢⴰⴹ ⵜⴰⵙⵓⵜⵉⵏ ⴼ ⵜⴰⵙⵓⵜⵉⵏ. ⴰⵙⵉⵏ ⵉⵔⴳⴰⵣⵏ ⵖ ⵉⴼⴰⵙⵙⵏ ⵏⵏⵙⵏ (ⴰⵡⴳⴰⵍ / ⴰⵜⵃⵃⴰⵍ) ⴰⵔ ⵜⵉ ⵜⵏⵇⵇⴰⵔⵏ ⵙ ⵉⵅⴼⴰⵡⵏ ⵏ ⵉⴹⵓⴹⴰⵏ ⵉⵖ ⴰ ⵜⵜ ⵃⵡⴰⵛⵏ, ⴰⴳⵯⵍⵏ ⵜⴰⵇⵇⵯⵔⴰⴱⵜ ⴼ ⵜⵙⴳⴰ ⵜⴰⴼⴰⵙⵉⵜ, ⴰⴳⵯⵍⵏ ⵍⴽⵯⵎⵎⵉⵜ ⵅⴼ ⵜⵙⴳⴰ ⵜⴰⵥⵍⵎⴰⴹⵜ ⵏⵏⵙⵏ, ⴱⵉⴽⵙⵏ ⵜⵉⵎⵍⵙⴰ ⵏⵏⵙⵏ ⵙ ⵓⵛⴷⴷⴰⴷ ⴰⵣⴳⴳⵯⴰⵖ ⴰⵔ ⴰⵙ ⵜⵜ ⵉⵏⵉⵏ (ⵜⴰⵊⴱⴱⴰⴷⵜ). ⵙ ⵖⵉⴽⴰⵏ ⴳⵏⵜ ⵜⵎⵖⴰⵔⵉⵏ ⵜⵉⵎⵓⵔⴰⵔ ⴷ ⵉⵔⴳⴰⵣⵏ ⵉⵎⵓⵔⴰⵔ ⵜⴰⵙⵓⵜⵍⵜ ⴰⵔ ⵜⵜ ⵃⵡⴰⵛⵏ ⴰⵔ ⵜⵜ ⵏⵇⵇⴰⵕⵏ ⴰⵡⴳⴰⵍⵏ, ⵉⵍⵉⵏ ⵖ ⵜⵓⵥⵥⵓⵎⵜ ⵏ ⵜⵙⵓⵜⵍⵜ ⴰⵏⵏ ⴽⴽⵓⵥ ⵉⵔⴳⴰⵣⵏ ⴰⵔ ⴽⴽⴰⵜⵏ ⴰⵍⵍⵓⵏ, ⴷ ⵢⴰⵏ ⵏⵉⵖ ⵙⵉⵏ ⴰⵔ ⵙⵉⵏⵚⵉⴳⵏ ⵖ ⵜⴳⵯⵎⴰⵎⵉⵏ.
ⵉⵙⵙⴼⴰⵍ ⵉⵡⵉⵣ ⴰⵔ ⵜⵜ ⵃⵓⵛⵏ ⵉⵎⵓⵔⴰⵔ, ⴰⵔ ⵣⵖ ⴳⵉⵙⵏ ⵉⵜⵜ ⴼⴼⴰⵖ ⵢⴰⵏ ⵍⵍⵉ ⴳⵉⵙⵏ ⵓⵔ ⵉⵜⴰⵀⵍⵏ, ⵍⵍⵉ ⵉⵙⵉⴳⴳⵉⵍⵏ ⵙ ⵍⵉⵜⵉⵀⴰⵍ, ⴰⵔ ⵉⵣⵣⵉⴳⵉⵣ ⴰⵔ ⵉⵜⵜ ⵃⵡⴰⵛ ⴰⵔ ⴷ ⵉⵍⴽⵎ ⴷⴰⵔ ⵜⵎⵓⵔⴰⵔ ⵜⵉⵍⵍⵉ ⵉⵍⵍⴰⵏ ⴳ ⵓⵡⵜⴰⵢ ⵏ ⵍⵉⵜⵉⵀⴰⵍ, ⵉⵥⵍⵉ ⵜⴰⵍⵍⵉ ⵉⵔⴰ ⵢⴰⵎⵥ ⴰⵙ ⴰⴼⵓⵙ, ⵉⴽⵛⵎ ⴳⵔⴰⵜⵙⵏⵜ ⴰⵔ ⴷⵉⵙⵏⵜ ⵉⵜⵜ ⵃⵡⴰⵛ, ⵉⵖ ⵥⵕⴰⵏ ⵎⵉⴷⴷⵏ ⵙⵉⵏ ⵉⵄⵣⵔⴰⵢ ⵎⵓⵏⵏ ⴳ ⵓⵃⵡⴰⵛ, ⴰⵔ ⵜⵜ ⵉⵍⵉ ⵜⵖⵯⵔⵉⵜ, ⵍⵓⵃⵏ ⵉⵏⵏ ⴼⵍⵍⴰⵙⵏ ⵎⵉⴷⴷⵏ ⵉⵊⵊⵉⴳⵏ ⴷ ⵍⵃⴱⴰⵇ ⴷ ⵡⴰⵇⵇⴰⵢⵏ ⵏ ⵜⵉⵙⵏⵜ, ⵉⴳ ⵎⴰⵢⴰⵏ ⵜⴰⵎⴰⵜⴰⵔⵜ ⵉⵣⵡⴰⵔⵏ ⵉ ⵜⵎⵖⵔⴰ ⵏ ⵉⵎⴰⵍ.
ⴰⵀⵢⵢⴰⴹ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵓⵔ ⵉⴳⵉ ⵢⴰⵏ ⵓⵃⵡⴰⵛ, ⵉⴳⴰ ⵓⵀⵢⵢⴰⴹ ⵎⵏⵏⴰⵡ ⵉⵃⵡⴰⵛⵏ, ⵉⵍⵍⴰ ⵓⵀⵢⵢⴰⴹ ⵏ ⵉⵃⴰⵃⴰⵏ, ⵉⵍⵉ ⵓⵀⵢⵢⴰⴹ ⵏ ⴰⵡⵍⵓⵥ, ⵉⵍⵉ ⵓⵀⵢⵢⴰⴹ ⵏ ⵓⵣⴰⵖⴰⵔ ⵏ ⵜⵣⵏⵉⵜ, ⴷ ⵓⵀⵢⵢⴰⴹ ⵏ ⵜⴰⵙⴽⵉⵡⵉⵏ, ⵜⵉⵍⵉ ⵢⴰⵜ ⵜⵔⴰⴱⴱⵓⵜ ⵉⵙⵎⵔⴽⵙⵏ ⵏⴳⵔ ⵜⴰⴹⵚⴰ ⴷ ⵜⵓⵏⵏⵓⵏⵜ ⴷ ⵓⵃⵡⴰⵛ, ⵜⴳⴰ ⵙ ⵉⵙⵎ ⵉⵀⵢⵢⴰⴹⵏ, ⵜⴰⵔⴰⴱⴱⵓⵜ ⵍⵍⵉ ⵉⵜⵜⴰⵡⵙⵙⴰⵏⵏ ⵙ ⵡⴰⵙⵙⴰⵖ ⵏ ⵜⴰⵔⵡⴰ ⵏ ⵙⵉⴷⵉ ⵃⵎⴰⴷ ⵓⵎⵓⵙⴰ.
ⵉⵖ ⵏⴻⵏⵏⴰ ⴰⵀⵢⵢⴰⴹ ⵏⵔⴰ ⵙ ⵡⴰⵡⴰⵍ ⵢⴰⵏ ⵡⴰⵏⴰⵡ ⵏ ⵓⵃⵡⴰⵛ ⵉⵍⵍⴰⵏ ⴳ (ⴰⵡⵍⵓⵥ - ⵉⵃⴰⵃⴰⵏ -ⵜⵉⵣⵏⵉⵜ - ⵉⴷⴰ ⵓⴽⵏⵙⵓⵙ) ⴷ ⵉⵥⴹⴰⵕ ⴰ ⵉⵍⵉ ⵖ ⵉⴷⵖⴰⵔⵏ ⵢⴰⴹⵏ ⵖ ⵙⵓⵙ.
ⵉⵍⵉ ⵢⴰⵏ ⵡⴰⵏⴰⵡ ⵏ ⵓⵥⴰⵡⴰⵏ ⵉⵍⵍⴰⵏ ⴳ ⵓⵃⵡⴰⵛ ⵏ ⵜⴰⵙⴽⵉⵡⵉⵏ ⵍⵍⵉ ⵏⴱⴷⵔ, ⵉⵜⵜⴰⵡⵙⵙⴰⵏ ⵙ ⵉⵎⵓⵙⵙⵓⵜⵏ ⵏⵏⵙ ⵙⵉⵙ ⵉⵥⵍⵉⵏ ⴷ ⵓⵥⴰⵡⴰⵏ ⵏⵏⵙ, ⴰⵔ ⴰⵙ ⵜⵜ ⵉⵏⵉⵏ ⴰⵀⵢⵢⴰⴹ ⵏ ⵜⴰⵙⴽⵉⵡⵉⵏ.
ⵓⵔ ⵏⵙⵙⵏ ⵎⴰⵏⵉ ⵜⵡⴰⵍⴰ ⵜⴰⵡⴰⵍⵜⵜ ⴰⴷ ⵏ ⵓⵀⵢⵢⴰⴹ ⴳ ⵓⵎⴰⵡⴰⵍ ⴰⵎⴰⵣⵉⵖ, ⵉⵙ ⵉⴳⴰ ⴰⵙⵙⴰⵖ ⵏ ⵓⴼⴳⴰⵏ ⵏⵉⵖ ⵉⵙⵎ ⵏ ⵓⴷⵖⴰⵔ ⵏⵉⵖ ⵡⵉⵏ ⴽⵔⴰ ⵉⵎⵉⵙⵙ. ⵎⴰⵛⵛ ⵜⴰⵡⴰⵍⵜ ⴰⴷ ⵜⵣⴷⵉ ⵉⵅⴼ ⵏⵏⵙ ⴷ ⵓⴳⴳⴰⵔ ⴷ ⵉⵔⴳⴰⵣⵏ ⵍⵍⵉ ⵉⵜⵜ ⵉⵍⵉⵏ ⵖ ⵜⵔⵓⴱⴱⴰ ⵡⵉⵍⵍⵉ ⵉⵙⵎⵔⴽⵙⵏ ⵏⴳⵔ ⵜⴰⴹⵚⴰ ⴷ ⵜⵓⵏⵏⵓⵏⵜ ⴰⵡⴷ ⴰⵃⵡⴰⵛ, ⵉⴳ ⵡⴰⵙⵙⴰⵖ ⵏ ⴽⵓ ⵢⴰⵏ ⴳⵉⵙⵏ ⴰⵀⵢⵢⴰⴹ, ⵉⴳⴰ ⵓⵃⵡⴰⵛ ⵏ ⵉⵀⵢⵢⴰⴹⵏ ⴰⵃⵡⴰⵛ ⴱⴰⵀⵔⴰ ⵢⵓⵜⵏ ⵙ ⵉⵥⵓⵕⴰⵏ ⵖ ⵓⵎⵣⵔⵓⵢ, ⴰⵃⵡⴰⵛ ⴰⴷ ⵉⵍⵍⴰ ⴳ ⵓⵣⴰⵖⴰⵔ ⵏ ⵜⵣⵏⵉⵜ ⵣⵖ ⵡⴰⵀⵍⵉ ⵏ ⵜⴰⵙⵓⵜⵉⵏ, ⵉⵍⴰⵇ ⴰ ⵉⴳ ⵓⵥⵓⵕ ⵏⵏⵙ ⴰⵎⵣⵡⴰⵔⵓ ⴰⵣⴰⵖⴰⵔ ⵏ ⵜⵣⵏⵉⵜ, ⵎⴰⵛⵛ ⴽⵔⴰ ⵉⵎⵔⵣⵓⵜⵏ ⵢⴰⴹⵏⵉⵏ ⴰⵔ ⵜⵜ ⵉⵏⵉⵏ, ⵎⴰⵙ ⴷ ⵉⴽⴽⴰ ⵓⵃⵡⴰⵛ ⵏ ⵉⵀⵢⵢⴰⴹⵏ ⵜⴰⵎⴰⵣⵉⵔⵜ ⵏ ⵉⵃⴰⵃⴰⵏ, ⴳⵏ ⵉⵃⴰⵃⴰⵏ ⴰⵥⵓⵕ ⵉⵣⵡⴰⵔⵏ ⵏ ⵓⵃⵡⴰⵛ ⴰⴷ, ⵉⵎⵎⵓⴷⴷⵓ ⵙ ⵓⵣⴰⵖⴰⵔ ⵏ ⵜⵣⵏⵉⵜ ⴳ ⵓⵎⵣⵡⴰⵔⵓ ⵏ ⵜⴰⵙⵓⵜ ⵎⵔⴰⵡⵜ ⴷ ⴽⴽⵓⵥ ⴰⵀⵉⵊⵔⵉ, ⵜⵉⴳⵉⵔⴰ ⵏ ⵜⴰⵙⵓⵜ ⵜⵉⵙ ⵜⵜⵥⴰ ⵏ ⵜⵍⴰⵍⵉⵜ, ⵍⵍⵉⵖ ⵜⵍⴽⵎ ⵜⵏⴱⴰⴹⵜ ⵏ ⵓⵎⵖⴰⵔ (ⴰⴳⵉⵍⵓⵍ ⵉⵃⵉⵃⵉ) ⴰⵣⴰⵖⴰⵔ ⵏ ⵙⵓⵙ ⵏⴳⵔ (1314 ⵀ -1896 ⵜ) ⴷ (1318 ⵀ - 1900 ⵜ). ⵍⵍⵉⵖ ⵜⵜ ⵉⵏⵏ ⵉⴽⴽⴰ ⵓⵎⵖⴰⵔ ⴰⴷ ⵉⵃⵎⵍ ⴱⴰⵀⵔⴰ ⴰⵃⵡⴰⵛ ⴷ ⵉⵡⵉⵣ, ⵉⴽⴽⴰ ⵜⵜ ⵉⵏⵏ ⴰⵔ ⵉⵙⴼⴼⵓⴳⵍⵓ ⵙ ⵓⵃⵡⴰⵛ ⵖ ⵡⴰⴽⵓⴷ ⵏ ⵉⵎⵏⵖⵉ, ⵉⵖ ⴷⴰⵔⵙ ⵎⵓⵏⵏ ⵉⵎⵖⴰⵔⵏ ⴷ ⵉⵎⵏⴰⵢⵏ ⴷ ⵉⵏⵎⵖⵓⵕⵏ ⵏ ⵜⵇⴱⵉⵍⵉⵏ, ⵍⵍⵉ ⵉⵙⵙⵓⵜⵍⵏ ⵉ ⵜⵉⵣⵏⵉⵜ. ⵎⴰⵛⵛ ⴰⵥⵓⵕ ⵏ ⵓⵀⵢⵢⴰⴹ ⵏ ⴰⵡⵍⵓⵥ ⵉⴼⵙⵙ ⴼⵍⵍⴰⵙ ⵓⵎⵣⵔⵓⵢ ⵓⵔ ⵉⵙⵙⵏ ⵢⴰⵏ ⵎⴰⵏⵉ ⵉⴳⴰⵏ ⴰⵥⵓⵕ ⵏⵏⵙ ⴰⵎⵣⵡⴰⵔⵓ.
ⵉⴳⴰ ⵓⵀⵢⵢⴰⴹ ⴰⵃⵡⴰⵛ ⵍⵍⵉ ⵉⵍⵍⴰⵏ ⵖ ⴽⵉⴳⴰⵏ ⵏ ⵜⵎⵏⴰⴹⵉⵏ ⵏ ⵙⵓⵙ, ⴰⵔ ⵜⵉ ⵜⵜ ⵃⵓⵡⵛⵏ ⵉⵔⴳⴰⵣⵏ, ⴰⵔ ⴳⵉⵙ ⴽⴽⴰⵜⵏ ⴰⵍⵍⵓⵏ ⴰⵔ ⵙⵎⵓⵔⵉⴳⵏ ⵉⵍⵉ ⴷⵉⵙ ⵍⵄⵡⵡⴰⴷ ⴷ ⵏⵏⴰⵇⵓⵙ, ⵉⵍⵉ ⵓⵀⵢⵢⴰⴹ ⵖ ⵉⵍⵍⴰ ⵡⴰⵍⵍⵓⵏ ⵓⵔ ⴳⵉⵙ ⵉⵍⵍⵉ ⵓⵎⴰⵔⴳ.
ⴷⴷⵔⵙⵜ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⴰⵔ ⵜⵜ ⵉⵏⵉⵏ ⵉ ⵜⵔⴰⴱⴱⵓⵜ ⵏ ⵎⵉⴷⴷⵏ…ⵜⴰⵊⵊⵓⵇⵜ… ⵏ ⵉⵔⴳⴰⵣⵏ ⵏⵉⵖ ⵜⵉⵎⵖⴰⵔⵉⵏ ⵏⵉⵖ ⵜⵉⴼⵔⵅⵉⵏ ⵏⵉⵖ ⴷⴷ ⵉⴳⴹⴰⴹ ⴷ ⵉⵎⵉⵍⵍⵉⵡⵏ… ⵉⵏⵉⵏ ⴰⴷⵔⵔⴰⵙ ⵉ ⵓⴳⴰⴷⵔ ⵉⴳⵣⵣⵓⵍⵏ, ⵏⵉⵖ ⵉ ⴽⵔⴰ ⵏ ⵜⴳⵓⴷⵉⵜ ⵏ ⵉⵥⵕⴰⵏ ⵉⵎⵓⵏⵏ ⵢⴰⵜ ⴼ ⵉⴳⴳⵉ ⵏ ⵢⴰⵜ. ⵣⵖ ⵣⵉⴽⴽ ⴳⴰⵏ ⵎⵉⴷⴷⵏ ⴰⵙⵙⴰⵖ ⵏ ⴷⴷⵔⵙⵜ ⵉ ⵡⴰⵏⴰⵡⵏ ⵏ ⵉⵃⵡⴰⵛⵏ ⵖ ⵎⵎⵔⵡⵉⵏ ⵉⵥⴰⵡⴰⵏⵏ ⴷ ⵉⵎⵓⵙⵙⵓⵜⵏ… ⴽⵔⴰ ⵉⴳⴰ ⵜⵜ ⵜⴰⵎⴰⵣⵉⵔⵜ ⵎⴰⵏⵉⴽ ⴷⴰⵔⵙ ⵉⴳⴰ ⵓⵃⵡⴰⵛ ⵏ ⴷⴷⵔⵙⵜ.
ⴰⴷⵔⴰⵔ ⵏ ⴷⵔⵏ ⵏ ⵡⴰⵟⵍⴰⵙ ⵎⵇⵇⵓⵕⵏ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵍⵍⴰⵏ ⵙⵉⵏ ⵡⴰⵏⴰⵡⵏ ⴷ ⵜⵡⵉⵍⴰ ⵏ ⵓⵃⵡⴰⵛ ⵏ ⴷⴷⵔⵙⵜ. ⴰⵎⵣⵡⴰⵔⵓ ⵉⵍⵍⴰ ⵖ ⵉⵎⵉ ⵏ ⵜⴰⵏⵓⵜ - ⵉⵎⵏⵜⴰⴳⵏ - ⵉⴷⴰ ⵓⵎⵃⵎⵓⴷ ⴰⵔ ⴳⵉⵙ ⵜⵜⵃⵡⴰⵛⵏ ⵉⵔⴳⴰⵣⵏ ⴷ ⵜⴼⵔⵅⵉⵏ ⵍⵍⵉ ⵓⵔ ⵉⵜⴰⵀⵍⵏ, ⴳⵏ ⵙⵉⵏ ⵉⵎⴰⵖⵯⴷⵏ ⵎⴳⴰⴱⴰⵍⵏⵉⵏ, ⴰⵔ ⵙⵎⵓⵔⵉⴳⵏ ⴰⵔ ⵜⵜⵃⵡⴰⵛⵏ.
ⵢⵉⵍⵉ ⵡⵉⵙ ⵙⵉⵏ ⵉⵍⵍⴰ ⵖ ⵜⵇⴱⵉⵍⵉⵏ ⵏ ⵉⴷⴰ ⵓⵣⴷⴰⵖ ⵖ ⵉⵎⴰⴷⵍⵉⵡⵏ ⵏ ⵉⴼⴼⵓⵙ ⵏ ⵓⴷⵔⴰⵔ ⵏ ⴷⵔⵏ, ⵉⵥⵥⵍⵎⴹ ⵏ ⵏⵏⴰⴱⵀⴰ ⴷ ⵉⵅⴼ ⵏ ⵡⴰⵙⵉⴼ. ⴰⵃⵡⴰⵛ ⴰⴷ ⵏ ⴷⴷⵔⵙⵜ ⴰⵔ ⴳⵉⵙ ⵜⵜ ⵃⵓⵡⵛⵏ ⵉⵔⴳⴰⵣⵏ ⵖ ⵢⴰⵏ ⵓⵎⴰⵖⵯⴷ, ⵉⵍⵉⵏⵜ ⵜⴼⵔⵅⵉⵏ ⴰⵔ ⴷⵉⵙⵏ ⵜⵜ ⵃⵡⴰⵛⵏⵜ ⵖ ⵎⵏⵉⴷ ⵏⵏⵙⵏ, ⴰⵔ ⵜⵜ ⵃⵡⴰⵛⵏⵜ ⵜⴼⵔⵅⵉⵏ ⵖ ⵡⴰⵏⴰⵡ ⴰⴷ ⵏ ⵓⵃⵡⴰⵛ ⵙ ⵎⴽⵏⵏⴰ ⵔⴰⵏⵜ ⵙ ⵜⵖⴰⵔⴰⵙⵜ ⵍⵍⵉ ⵜⵏⵜ ⵉⵙⵙⵓⵙⵎⵏ, ⵃⵎⴰ ⴰⴷ ⵜⵙⴱⴰⵢⵏⵜ ⴰⴼⵓⵍⴽⵉ ⵏⵏⵙⵜ, ⵉⵡⴰⵍⵍⵉ ⵔⴰⵏⵜ ⵉⵙⵙⵓⵙⵎⵜⵏⵜ. ⵜⴰⵎⵥ ⵖ ⵓⴼⵓⵙ ⵏⵏⵙ ⵢⴰⵏ ⵓⵊⵡⴰⵢ ⵓⵎⵍⵉⵍ ⵉⴳ ⵜⴰⵎⴰⵜⴰⵔⵜ ⵏ ⵓⵖⵓⵙ ⴷ ⵡⴰⴼⵓⵍⴽⵉ.
ⵖ ⵜⵎⵏⴰⴹⵜ ⵏ ( ⵉⴷⴰ ⵓⵣⴷⴰⵖ) ⴰⵔ ⵙⵎⵓⵔⵉⴳⵏ ⵜⴰⵎⴷⵢⴰⵣⵜ ⵏ ( ⵜⴰⵣⵔⴰⵔⵜ) ⵜⴳⴰ ⵜⴰⵎⴷⵢⴰⵣⵜ ⴱⴰⵀⵔⴰ ⵉⵖⵣⵣⵉⴼⵏ ⴰⵔ ⵜⵜⵉ ⵜⵜ ⴳⴳⴰⵏ ⵖ ⵓⵎⴰⵔⴳ ⵏ ⵓⵃⵡⴰⵛ ⵏ ⴷⴷⵔⵙⵜ. ⵖ ⵡⴰⵡⵍⵓⵥ ⴰⵔ ⵜⵜⵉⵏⵉⵏ ⵉ ⵓⵃⵡⴰⵛ ⵏ ⴷⴷⵔⵙⵜ ( ⴰⵊⵊⵓⴽⵕ), ⵍⵍⵉⵖ ⴰ ⵙⵙⴼⴰⵍⵏ ⴰⵃⵡⴰⵛ ⵙ ⵓⵥⴰⵡⴰⵏ ⵉⴷⵔⵓⵙⵏ, ⴰⵔ ⵉⵜⵜ ⴰⵢⵡⵡⵓⵍ ⵉⵎⵉⴽⴽ ⵙ ⵉⵎⵉⴽⴽ ⴰⵔ ⴷ ⵍⴽⵎⵏ ⵜⵜⵎⵉ ⵏ ⵣⵣⵔⴱ ⵖ ⵓⵃⵡⴰⵛ, ⴰⵔ ⵜⵉ ⵜⵜⵃⵡⴰⵛⵏ ⵉⵔⴳⴰⵣⵏ ⴰⵡⴷ ⵜⵉⵎⵖⴰⵔⵉⵏ. ⵖ (ⵜⴰⵍⵉⵡⵉⵏ) ⴰⵔ ⴰⵙ ⵜⵜ ⵉⵏⵉⵏ ⴷⴷⵔⵙⵜ, ⴰⵔ ⴳⵉⵙ ⵜⵜ ⵃⵡⴰⵛⵏ ⵉⵔⴳⴰⵣⵏ ⵡⴰⵀⴰ, ⵉⵔⵡⴰⵙ ⵓⵃⵡⴰⵛ ⵏⵏⵙⵏ ⵡⵉⵏ ⴰⵡⵍⵓⵥ, ⴰⵛⴽⵓ ⵍⵍⵉⵖ ⵎⵃⴰⴷⴰⵏ ⵉⵇⴱⵉⵍⵏ ⴰⴷ ⵙ ⵙⵉⵏ.
ⴰⴷⵔⴰⵔ ⵏ ⵡⴰⵟⵍⴰⵙ ⵎⵥⵥⵉⵢⵏ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵖ ⵜⵎⵉⵣⴰⵔ ⴰⴷ ⵏ ⵡⴰⵟⵍⴰⵙ ⵎⵥⵥⵉⵢⵏ ⵍⵍⴰⵏ ⵙⵉⵏ ⵡⴰⵏⴰⵡⵏ ⵏ ⴷⴷⵔⵙⵜ ⴳ ⵜⵎⵏⴰⴹⵜ ⵏ (ⵡⴰⵇⵇⴰ) ⴷ ( ⵟⴰⵟⴰ), ⵉⵎⵎⵔⵡⴰⵙ ⵓⵃⵡⴰⵛ ⵏ ⵟⴰⵟⴰ ⴷ ⵡⴰⵇⵇⴰ ⵖ ⵓⵥⴰⵡⴰⵏ ⴷ ⵉⵎⵓⵙⵙⵓⵜⵏ ⵏ ⵓⵃⵡⴰⵛ ⴰⵔ ⴳⵉⵙ ⵜⵜ ⵃⵡⴰⵛⵏ ⵉⵔⴳⴰⵣⵏ. ⵉⵍⵉ ⵢⴰⵏ ⵡⴰⵏⴰⵡ ⴳ ⵜⵣⵏⵉⵜ ⴰⵔ ⴰⵙ ⵜⵜ ⵉⵏⵉⵏ ⴰⵃⵡⴰⵛ, ⵉⵔⵡⴰⵙ ⵡⴰⴷ ⵉⵍⵍⴰⵏ ⴳ ⵡⴰⵇⵇⴰ ⴷ ⵟⴰⵟⴰ, ⵎⴰⵛⵛ ⵏⵜⵜⴰⵏ ⵉⴳⴰ ⵡⵉⵏ ⵜⵎⵖⴰⵔⵉⵏ ⵡⴰⵀⴰ.
ⵜⴰⵡⴰⵍⵜ ⵏ ⴷⴷⵔⵙⵜ ⵜⴳⴰ ⵉⵙⵎ ⵏ ⵎⵉⴷⴷⵏ ⵍⵍⵉ ⵉⵜⵜ ⵃⵓⵡⵛⵏ, ⵎⴰⵛⵛ ⴰⵃⵡⴰⵛ ⵏⵜⵜⴰⵏ ⵉⴳⴰ ⴰⵏⴰⵡⵏ.
ⴰⵃⵡⴰⵛ ⵏ ⵉⵙⵎⴳⴰⵏ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵜⵍⵍⴰ ⵣⵖ ⴽⵉⴳⴰⵏ ⵏ ⵜⴰⵙⵓⵜⵉⵏ ⵢⴰⵜ ⵜⵣⴷⴰⵢⵜ, ⵏⴳⵔ ⵜⵎⵓⵔⵜ ⵏ ⵍⵎⵕⵕⵓⴽ ⴷ ⵓⴳⵯⵏⵙ ⵏ ⵜⴼⵔⵉⵇⵜ, ⵉⴼⴼⵓⵙ ⵏ ⵡⴰⵙⵉⴼ ⵏ ⵙⵙⵉⵏⵉⴳⴰⵍ, ⴳⴰⵏⵜ ⵜⵣⴷⴰⵢⵉⵏ ⴰⴷ ⵜⵉⵏ ⵜⴷⴰⵎⵙⴰ ⴷ ⵓⵎⵣⵔⵓⵢ, ⴷⵔⵓⵏ ⵜⴰⵖⵔⵎⴰ ⵏⵏⵙⵏ, ⵡⴰⵅⵅⴰ ⵉⵖⵣⵣⵉⴼ ⵓⴱⵔⵉⴷ, ⵎⴰⵛⵛ ⵉⴳⴰ ⵉⴼⵉⵍⵉ ⵏ ⵓⵎⵚⴰⵡⴰⴹ ⵏⴳⵔ ⵜⵎⵉⵣⴰⵔ ⴷ ⵜⵇⴱⵉⵍⵉⵏ ⵍⵍⵉ ⴳⵉⵙ ⵉⵣⴷⵖⵏ.
ⵉⵎⵍⴰⵍ ⵓⵣⴰⵖⴰⵔ ⵏ ⵙⵓⵙ ⵉ ⵡⴰⴳⵯⵏⵙ ⵏ ⵜⴼⵔⵉⵇⵜ, ⵜⵉⵍⵉ ⴷⴰⵔⵙ ⵜⴰⵣⴷⴰⵢⵜ ⵜⴰⵣⴰⵢⴽⵓⵜ ⴷ ⵓⴼⴳⴰⵏ ⵏ ⵓⴳⵯⵏⵙ ⵏ ⵜⴼⵔⵉⵇⵜ, ⵜⵎⵙⴰⵙⴰ ⵜⵥⵓⵕⵉ ⴷ ⵜⴰⵢⵢⴰⴹ, ⵎⵎⵔⴽⵙⵏⵜ ⵜⴰⵡⵙⵙⵏⵉⵡⵉⵏ, ⵖⵉⴽⴰⵏ ⴰⵔ ⵜ ⵏⵥⵕⵕⴰ ⵖ ⵜⵥⵓⵕⵉ ⵏⵏⵖ ⵍⵍⵉ ⴰⵖ ⴷ ⵉⴼⵍ ⵓⵎⵣⵔⵓⵢ, ⵣⵓⵏⴷ ⴰⵃⵡⴰⵛ ⴳ ⵓⵥⴰⵡⴰⵏ ⵏⵏⵙ ⴰⵡⴷ ⵉⵎⴰⵙⵙⵏ ⵏⵏⵙ ⴰⵡⴷ ⵉⵎⵓⵙⵙⵓⵜⵏ ⵏⵏⵙ.
ⵖ ⵓⵣⴰⵖⴰⵔ ⵏ ⵙⵓⵙ ⵍⵍⴰⵏ ⴽⵉⴳⴰⵏ ⵏ ⵉⵃⵡⴰⵛⵏ ⵍⵍⵉ ⵉⵥⵍⵉⵏ ⵙ ⵓⵥⴰⵡⴰⵏ ⵏ (ⵜⴳⵏⴰⵡⵉⵜ), ⴷ ⵉⵎⵉⵙⵙ ⵏ ⵓⵥⴰⵡⴰⵏ (ⴳⴰⵏⴳⴰ) ⴷ (ⵜⵇⵔⵇⴰⵡⵉⵏ), ⵉⵍⵉ ⵓⵃⵡⴰⵛ ⴰⴷ ⵙ ⵉⵙⵎ ⴰⵃⵡⴰⵛ ⵏ ⵉⵙⵎⴳⴰⵏ. ⴰⵔ ⵏⵜⵜⴰⴼⴰ ⵃⴰⵡⴰⵛ ⴰⴷ ⴳ ⵉⵥⵍⵎⴰⴹⵏ ⴷ ⵉⴼⴼⵓⵙⵏ ⵏ ⵍⴰⵟⵍⴰⵙ ⵎⵥⵥⵉⵢⵏ ⴷ ⵉⵙⴽⵜⴰⵏⵏ ⴷ ⵜⴰⵍⵉⵡⵉⵏ, ⴷ ⵡⴰⵇⵇⴰ ⴷ ⵟⴰⵟⴰ, ⴷ ⵉⵅⴼ ⵏ ⵡⴰⵙⵉⴼ, ⴷ ⵉⴼⵜⴰⵙⵏ ⵏ ⵎⵓⴳⴰⴷⵉⵔ, ⴷ ⵉⴼⴼⵓⵙ ⵏ ⵍⴰⵟⵍⴰⵙ ⵎⵇⵇⵓⵕⵏ.
ⴷ ⵍⵍⵉⵖ ⵉⴳⴰ ⵓⵥⴰⵡⴰⵏ ⵏ (ⵜⴳⵏⴰⵡⵉⵜ) ⵣⵖ ⵡⴰⵙⵉⴼ ⵏ ⵙⵎⵎⵓⵙ ⵏ ⵓⵥⴰⵡⴰⵏ, ⵉⵎⵙⴰⵙⴰ ⴷ ⵉⵎⵓⵔⵉⴳ ⵏ ⵕⵕⵡⴰⵢⵙ ⵍⵍⵉ ⴰⵡⴷ ⵏⵜⵜⴰⵏ ⵉⵍⵍⴰ ⵢⴰⴷⴷⴰ ⴼ ⵡⴰⵙⵉⴼ ⴰⵏⵏ ⵏ ⵙⵎⵎⵓⵙ.
ⴰⵢⵍⵍⵉ ⵉⵎⵎⴰⵍⵏ ⵎⴰⵙ ⵉⴳⴰ ⵓⵥⴰⵡⴰⵏ ⴰⵎⴰⵣⵉⵖ ⴰⵥⴰⵡⴰⵏ ⵏ ⵜⴼⵔⵉⵇⵜ ⵙ ⵓⵥⵓⵕ ⵉⴳ ⵉⵡⵉⵙ ⵏ ⵡⴰⴽⴰⵍ ⵏⵏⵙ.
ⴰⵃⵡⴰⵛ ⵏ ⵉⵙⵎⴳⴰⵏ ⵉⵍⵍⴰ ⵖ ⴽⵉⴳⴰⵏ ⵏ ⵜⵎⵏⴰⴹⵉⵏ ⵏ ⵙⵓⵙ ⴷ ⴷⵔⴰ ⴷ ⴽⵔⴰ ⵣⵖ ⵍⵃⵓⵣ, ⴰⵔ ⵉⵜⵜ ⵉⵍⵉ ⵖ ⵜⴼⴼⵓⴳⵍⵉⵡⵉⵏ ⵏ ⵜⵎⴰⵄⵛⵓⵕⵜ, ⴷ ⵜⵎⵖⵔⵉⵡⵉⵏ ⵏ ⵉⵙⵎⴳⴰⵏ ⵖ ⵣⵉⴽⴽ.
ⵜⴰⵃⵡⴰⵛⵜ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵉⵍⵍⴰ ⵓⵃⵡⴰⵛ ⴰⴷ ⵖ ⵉⵎⴰⴷⵍⵉⵡⵏ ⵉⴼⴼⵓⵙⵏ ⵏ ⵡⴰⵟⵍⴰⵙ ⵎⵇⵇⵓⵕⵏ, ⵉⴳ ⵓⵃⵡⴰⵛ ⴰⴷ ⵡⵉⵏ ⵉⵔⴳⴰⵣⵏ, ⴰⵔ ⴳⵉⵙ ⵜⵜ ⵎⵓⵏⵏ ⵉⵎⴷⵢⴰⵣⵏ ⴰⵔ ⵙⵎⴰⵣⵖⵏ ⴰⵎⵚⴰⵡⴰⴹ ⴳⵔⴰⵜⵙⵏ ⵙ ⵓⵎⴷⵢⴰⵣ, ⵉⵍⵉ ⴳⵉⵙ ⵉⵎⵓⵙⵙⵓⵜⵏ ⵙⵉⵙ ⵉⵥⵍⵉⵏ ⴰⵔ ⴰⵙ ⵜⵜ ⵉⵏⵉⵏ (ⵜⴰⵔⵓⵣⵉ), ⵉⵍⵍⴰ ⵓⵃⵡⴰⵛ ⴳ ( ⴰⵡⵍⵓⵥ - ⵜⵉⵣⵏⵉⵜ), ⴰⵃⵡⴰⵛ ⴰⵏⵏ ⵏ ⴰⵡⵍⵓⵥ ⵉⴳⴰ ⵣⵓⵏ ⴷ ⵡⴰⵍⵍⵉ ⵉⵍⵍⴰⵏ ⴳ ⵉⵎⴰⴷⵍⵉⵡⵏ ⵏ ⴷⵔⵏ. ⵡⵉⵏ ⵜⵣⵏⵉⵜ ⴷ ⵎⴰⴷ ⴰⵙ ⵉⵙⵙⵓⵜⵍⵏ ⵉⴳⴰ ⵡⵉⵏ ⵜⵎⵖⴰⵔⵉⵏ, ⴰⵔ ⴳⵉⵙ ⵙⵎⵓⵔⵉⴳⵏⵜ ⵙ ⵜⵓⵜⵍⴰⵢⵜ ⵏ ⵜⵎⴰⵣⵉⵖⵜ ⴷ ⴷⴷⴰⵔⵉⵊⴰ.
ⵖ ⵜⵎⵏⴰⴹⵉⵏ ⵏ (ⵟⴰⵟⴰ - ⵡⴰⵇⵇⴰ - ⵍⴼⵉⵊⴰ - ⴼⵓⵎ ⵍⵃⵚⵏ - ⵉⴱⵓⵣⴱⵓⵏ - ⴰⵡⵍⵓⵥ - ⵉⵏⴷⵓⵣⴰⵍ - ⴰⵢⵜ ⵙⵎⴽ - ⵜⴰⵙⴽⵜⴰⵏⵜ - ⵉⵏⵜⴰⵡⵏ …) ⴳⴰⵏ ⵉ ⵓⵃⵡⴰⵛ ⵎⴽⵏⵏⴰ ⵉⴳⴰ ⵡⴰⵏⴰⵡ ⵏⵏⵙ ⵉⵙⵎ ⵏ ( ⴰⵡⴳⴰⵍ), ⴷ ⵉⴳ ⴱⴰⵀⵔⴰ ⴰⵃⵡⴰⵛ ⵏ ⵜⵎⴰⵖⴰⵔⵉⵏ.
ⵜⵍⵍⴰ ⵢⴰⵜ ⵜⵃⵡⴰⵛⵜ ⵜⵜⴰⵡⵙⵙⴰⵏ ⵖ (ⵜⴰⵍⵉⵡⵉⵏ) ⴷ ( ⴰⵢⵜ ⵡⴰⵥⴽⵉⵜ) ⴷ ( ⵉⴳⵍⵓⵡⴰ), ⵜⵍⴰ ⵉⵙⵎ ⵏ ( ⵜⴰⴱⵍⵓⵢⴷⵉⵜ), ⵉⴳ ⵓⵃⵡⴰⵛ ⴰⴷ ⵡⵉⵏ ⵉⵔⴳⴰⵣⵏ, ⴰⵔ ⵙⵉⵙ ⵙⴼⴼⵓⴳⵍⵓⵏ ⵖ ⵜⵎⵖⵔⵉⵡⵉⵏ ⵎⵇⵇⵓⵕⵏⵉⵏ, ⵜⵉⵍⵉ ⵜⴰⵢⵢⴰⴹ ⵜⵍⴰ ⵉⵙⵎ ( ⴱⵓⵜⵙⴽⴰ), ⵉⴳⴰ ⵓⵃⵡⴰⵛ ⵡⵉⵏ ⵉⵔⴳⴰⵣⵏ ⴷ ⵡⵉⵏ ⵜⵎⵖⴰⵔⵉⵏ.
ⴰⵀⵏⴰⵇⵇⴰⵕ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⴰⵍⵍⴰ ⵓⵃⵡⴰⵛ ⴰⴷ ⴳ ⵜⵎⵏⴰⴹⵉⵏ ⵏ ( ⵟⴰⵟⴰ - ⵍⴼⴰⵢⵊⴰ - ⴷ ⵜⵉⵏⵉⵔⵉ / ⵜⵏⵣⵔⵓⴼⵜ ⵏ ⴷⵔⴰ - ⴷ ⵜⵇⴱⵉⵍⵉⵏ ⵏ ⵉⴷⴰ ⵓⴽⵏⵙⵓⵙ - ⵜⴰⴼⵔⴰⵡⵜ - ⵉⴷⴰ ⵓⴳⵏⵉⴹⵉⴼ- ⵉⵙⴰⴼⴼⵏ - ⴰⵡⵍⵓⵥ - ⵉⵙⵏⴷⴰⵍⵏ …) ⵓⵔ ⵢⵓⴽⵣ ⵢⴰⵏ ⴳ ⵓⵎⴰⵡⴰⵍ ⵎⴰ ⵉⴳⴰⵏ ⴰⵀⵏⴰⵇⵇⴰⵕ, ⵎⴰⵛⵛ ⵣⵓⵏⴷ ⵜⴰⵡⴰⵍⵜ ⴰⴷ ⵜⵍⵍⴰ ⴳ ⵓⵎⴰⵡⴰⵍ ⴰⵜⴰⵔⴳⵉ, ⵏⴽⴽ ⵏⵏⵉⵖ ⵎⴰⵙ ⵜⴷⵡⵔ ⵜⴰⵡⴰⵍⵜ ⵣⵖ ⵜⴰⵡⴰⵍⵜ ⵏ ⵓⵀⴳⴳⴰⵕ ⵍⵍⵉ ⵉⴳⴰⵏ ⴰⵙⵙⴰⵖ ⵏ ⵢⴰⵜ ⵜⵇⴱⵉⵍⵜ ⵏ ⵉⵜⴰⵔⴳⵉⵏ ⵏ ⵜⵉⵏⵉⵔⵉ, ⵜⴳ ⵜⴰⵡⴰⵍⵜ ⴰⴷ ⵖⵉⴽⴰⴷ (ⴰⵀⵏⴰⵇⵇⴰⵕ).
ⵍⴰⵄⵡⵡⴰⴷ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵉⴳⴰ ⵍⴰⵄⵡⵡⴰⴷ ⵉⵎⵉⵙⵙ ⵏ ⵓⵥⴰⵡⴰⵏ, ⵙ ⵜⵓⵜⵍⴰⵢⵜ ⵏ ⵜⵎⴰⵣⵉⵖⵜ ⵉⴳ ( ⵜⴰⴳⵯⵎⴰⵎⵜ), ⵉⵎⴰⵏ ⵓⵥⴰⵡⴰⵏ ⵏ ⵜⴳⵯⵎⴰⵎⵜ ⴷ ⵡⴰⵍⵍⵓⵏ, ⵜⴳⴰ ⵜⴰⴳⵯⵎⴰⵎⵜ ⵉⵎⵉⵙⵙ ⴱⴰⵀⵔⴰ ⵉⴳⴰⵏ ⴰⵣⴰⵢⴽⵓ ⵖ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵜⵎⴰⵏ ⴷ ⵓⵥⴰⵡⴰⵏ ⴷⵔⴰⵏⵜ ⵜⵔⵓⴱⴱⴰ ⴰⵡⴷ ⵜⴳ ⵜⴰⴷ ⵉⴳⴰⵏ ⵜⵉⵏ ⵢⴰⵏ.
ⵉⵖ ⵉⵙⵉⵏⵚⴳ ⵓⴳⵯⵎⴰⵎ, ⴰⵔ ⴷⵉⵙ ⵉⵜⵜ ⵎⵓⵏ ⵓⴱⵔⴷⴰⴽⴽ ⵏ ⵉⵔⴳⴰⵣⵏ ⴷ ⵉⵃⵡⴰⵛⵏ ⵖ ⵍⵍⴰⵏ ⵉⵎⵓⵙⵙⵓⵜⵏ ⵉⴳⴳⵓⵜⵏ. ⴷ ⵕⵕⵡⴰⵢⵙ ⵏ ⵜⵉⵍⵍⵓⵏⴰ ⴰⵔ ⵜⵜ ⵎⵓⵏⵏ ⴷ ⵡⴰⵙⵉⴼ ⵏ ⵓⵥⴰⵡⴰⵏ ⵍⵍⵉ ⵜⴳⵍⵉ ⵜⴳⵯⵎⴰⵎⵜ. ⴰⵔ ⵏⵏ ⵏⵜⵜⴰⴼⴰ ⴰⵥⴰⵡⴰⵏ ⵏ ⵍⴰⵄⵡⵡⴰⴷ ⴳ ⵜⴰⵏⵉⵍⴰ ⵏ ⵎⵓⴳⴰⴷⵉⵔ (ⵉⵃⴰⵃⴰⵏ) ⴷ ⴷⴰⵔ ⵜⵇⴱⵉⵍⵉⵏ ⵏ ⵉⴷⴰ ⵓⴱⵓⵣⵢⴰ ⴷ ⵉⵏⵜⵓⴳⴳⴰ ⴷ ⵜⵇⴱⵉⵍⵉⵏ ⵏ ⴰⵢⵜ ⵅⵟⵟⴰⴱ.
ⴰⵊⵎⴰⴽ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⴰⵃⵡⴰⵛ ⴰⴷ ⵉⵜⵜⴰⵡⵙⵙⴰⵏ ⴳ ( ⴰⵛⵜⵓⴽⵏ - ⵉⵎⵉ ⵎⵇⵇⵓⵕⵏ - ⴰⵢⵜ ⵎⵥⴰⵍ - ⵉⵀⵍⴰⵍⵏ - ⴰⵢⵜ ⵡⴰⴷⵔⵉⵎ - ⵙⵉⴷⵉ ⵄⴰⴱⴷ ⵍⵍⴰⵀ ⵍⴱⵓⵛⵡⴰⵔⵉ - ⵜⵉⵣⵉ ⵏ ⵜⴰⴽⵓⵛⵜ - ⵜⴰⵔⴳⴰ ⵏ ⵜⵉⵛⴽⴰ - ⵅⵎⵉⵙ ⴰⵢⵜ ⵎⵓⵙⴰ - ⵉⵡⵙⵉⵎⵏ - ⵜⴰⵏⴰⵍⵜ - ⴰⵢⵜ ⵡⴰⵍⵢⴰⴹ - ⴰⵢⵜ ⴱⴰⵀⴰ ⵓⴷⵔⴰⵔ - ⴰⵢⵜ ⴱⴰⵀⴰ ⵓⵎⵍⴰⵍ - ⴰⵣⴰⵖⴰⵔ ⵏ ⵜⵉⵣⵏⵉⵜ …), ⴰⵔ ⴳⵉⵙ ⵜⵜ ⵃⵡⴰⵛⵏ ⵉⵔⴳⴰⵣⵏ ⴷ ⵜⵎⵖⴰⵔⵉⵏ, ⴳ ⵙⵉⵏ ⵉⵎⴰⵖⵯⴷⵏ ⵉⵏⴳⴰⴱⴰⵍⵏ.
ⴱⴰⵄⵕⵕⵓⵊ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵉⴳⴰ ⴰⵃⵡⴰⵛ ⵉⵥⵍⵉⵏ ⵙ ⵜⵎⵖⴰⵔⵉⵏ, ⴰⵔ ⵜⵜ ⵃⵡⴰⵛⵏⵜ ⵖ ⵜⵙⵓⵜⵍⵜ ⵉⵇⵇⵏⵏ ⴰⵔ ⴳⵉⵙ ⴽⴽⴰⵜⵏⵜ (ⴰⵡⴳⴰⵍ), ⵜⵍⴰ ⵙ ⵉⵙⵎ ⴱⴰⵄⵕⵕⵓⵊ. ⵉⵍⵍⴰ ⵓⵃⵡⴰⵛ ⴰⴷ ⴳ ⵓⵣⴰⵖⴰⵔ ⵏ ⵙⵓⵙ.
ⴰⵎⴷⵢⴰⵣ ⵏ ⵓⵙⴰⵢⵙ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵎⵇⵇⴰⵔ ⴷ ⴽⵛⵎⵏⵜ ⵜⴰⵡⵙⵙⵏⵉⵡⵉⵏ ⴷ ⵉⴽⴽⴰⵏ ⴱⵕⵕⴰ ⵏ ⵡⴰⴽⴰⵍ ⵏ ⵜⵎⴰⵣⵖⴰ, ⴷ ⴽⵉⴳⴰⵏ ⵏ ⵉⵙⵡⵉⵏⴳⵉⵎⵏ ⵢⴰⴹⵏ ⴷ ⵜⵖⵔⵎⴰⵡⵉⵏ ⵢⴰⴹⵏ, ⵖⴰⵎⴰⵏ ⵉⵎⴰⵣⵉⵖⵏ ⵃⴹⴰⵏ ⵜⴰⵎⴰⴳⵉⵜ ⵏⵏⵙⵏ ⴷ ⵜⵓⵙⵙⵏⴰ ⵏⵏⵙⵏ ⴼ ⵉⴳⴳⵉ ⵏ ⵡⴰⴽⴰⵍ ⵏ ⵜⵎⵓⵔⵜ ⵏⵏⵙⵏ (ⵜⴰⵎⴰⵣⵖⴰ).
ⵖ ⵜⵉⵏⵎⵍ ⵏ ⵓⵙⴰⵢⵙ, ⵓⵔ ⵉⵍⵍⵉ ⵓⵏⵎⵖⵓⵕ ⴷ ⵡⴰⴷ ⵎⵥⵥⵉⵢⵏ, ⴰⵔ ⴳⵉⵙ ⵜⵜⵎⵓⵏⴰⵏ ⵎⵉⴷⴷⵏ ⴰⴽⴽⵯ ⵎⴽⵏⵏⴰ ⴳⴰⵏ ⴷ ⴰⵢⵏⵏⴰ ⵎⵉ ⵡⴰⵍⴰⵏ, ⵃⵎⴰ ⴰⴷ ⵙⵙⴼⵍⴷⵏ ⵉ ⴱⴰⴱ ⵏ ⵓⵎⴰⵔⴳ ⴷ ⵓⵙⵎⴰⵣⵖ ⵏ ⵡⴰⵡⴰⵍ.
ⵏⵙⵙⵏ ⴱⴰⴱ ⵏ ⵓⵎⴷⵢⴰⵣ ⵙ ⴽⵉⴳⴰⵏ ⵏ ⵉⵙⵎⴰⵡⵏ (ⴰⵎⴰⵔⵉⵔ - ⴰⵏⴹⴹⴰⵎ - ⴰⵎⴷⵢⴰⵣ - ⴰⵏⵛⵛⴰⴷ …), ⵎⴰⵛⵛ ⵡⴰⵏⵏⴰ ⵉⵔⴰⵏ ⴰ ⵉⴽⵛⵎ ⴰⵙⴰⵢⵙ ⴰ ⵉⴳ ⴱⴰⴱ ⵏ ⵡⴰⵡⴰⵍ, ⵉⵇⵇⴰⵏⴷ ⴰⴷ ⴳⵉⵙ ⵉⵍⵉⵏⵜ ⵜⵎⴰⵜⴰⵔⵉⵏ ⵍⵍⵉ ⵉⴳⴰⵏ ⵜⵉⵏ ⵉⴷ ⴱⴰⴱ ⵏ ⵓⵙⵎⴰⵣⵖ ⵏ ⵡⴰⵡⴰⵍ.
ⴰⴽⵓⴷ ⵏ ⵓⵎⴷⵢⴰⵣ ⵖ ⵜⵓⵥⵥⵓⵎⵜ ⵏ ⵓⵙⴰⵢⵙ ⵉⵟⵟⴼ ⴰⵜⵉⴳ ⵉⴳⴳⵓⵜⵏ, ⴷ ⵉⵖ ⴽⵓⵍⵍⵓ ⴼⵙⵙⵏ ⵎⵉⴷⴷⵏ, ⵉⴳⵍⵉ ⵏⵜⵜⴰⵏ ⴰⵙⵡⵉⵏⴳⵎ ⵉⵥⵍⵉ ⵜⴰⵡⴰⵍⵉⵏ.
ⵜⵉⵎⴰⵡⵉⵜⵉⵏ ⵏ ⵜⴰⵙⴽⵉⵡⵉⵏ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⴰⵔ ⵜⵜⵉⵏⵉⵏ ⵉⵙ ⵍⵍⴰⵏ 42 ⵏ ⵜⵎⴰⵡⵉⵜ ⵜⴰⵙⵔⴷⴰⵙⵜ ⵖ ⵜⵙⴽⵉⵡⵉⵏ, ⵎⴰⵛⵛ ⵓⵔ ⴳⵉⵙⵏ ⵖⴰⵎⴰⵏ ⴰⵎⵔ ⵢⴰⵏ ⵎⵏⵏⴰⵡ, ⵖⵉⴷ ⴽⵔⴰ ⵙⵙⵖ ⴳⵉⵙⵏ:
- ⴰⵙⵜⴰⵔⴰ (ⵏⵜⵜⴰ ⴰ ⵙ ⵣⴳⴳⵓⵔⵏ)
- ⴰⵊⵖⴰⵢⵎⵉ
- ⵜⴰⵡⴰⴷⴰ ⵏ ⵉⵢⵙⴰⵏ
- ⵀⵎⵣ
- ⵔⴽⵣ
- ⴼⵜⵜⵛ ⴰⴽⴰⵍ
- ⴰⴽⵯⵉ ⵜⴰⵔⴳⴰ
- ⴱⵓ ⵜⵙⴳⴰ
- ⴰⵙⴳⴳⴰⵡⵔ
- ⵎⵎⵕⵥ ⵉⴳⵡⴰⵍⵏ
- ⵙⵙⵉⴽⵍ ⴰⴳⵯⴰⵍ
- ⴰⵡⵉⵣⵉⵎⵎⵔ
- ⴰⵙⵙⵓⴼⵖ
- ⵙⴽⵔ ⵜⵉⵎⵜⴷⵉⵏ
- ⵔⵉⵢⵢⵛ ⴰⵎⴰⵔ
- ⵀⵔⴷ
- ⵜⵉⴼⵔⵉⵣⵉⵜ
- ⴳⴳⴰⵡⵔ ⴰⵙⵙⵓⵙ
- ⴱⵓ ⵍⴰⵇⴷⴰⵎ
- ⴰⵀⵉⵢⵢⴰⴹ
- ⵜⴰⵎⵙⵙⵓⵙⵜ
- ⴰⴷⵔⵙⵉⵢ (ⵏⵜⵜⴰ ⴰ ⵙ ⵙⴳⴳⵔⵓⵏ)
ⵜⵉⵎⴰⵜⴰⵔⵉⵏ ⵍⵍⵉ ⵉⵜⵜⵉⵍⵉⵏ ⵖ ⵓⵎⴷⵢⴰⵣ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]- ⴰⴷ ⵉⵙⵙⵏ ⵉⵙⴰⴼⴼⵏ ⵏ ⵓⵎⴷⵢⴰⵣ, ⵉⴽⵜⵉ ⵉⵡⵓⵜⵜⴰ ⵏⵏⵙ.
- ⴰⴷ ⵜⴳ ⵜⵓⵜⵍⴰⵢⵜ ⵏⵏⵙ ⵜⴰⵎⴰⵣⵉⵖⵜ ⵖ ⵍⵍⴰⵏ ⵉⵏⵣⵉⵜⵏ.
- ⴰⴷ ⵉⴳ ⴱⴰⴱ ⵏ ⵜⵓⵙⵙⵏⴰ ⵉⵔⴰⵔ ⵜⴰⵖⴹⴼⵜ ⵙ ⵉⵙⴽⴽⵉⵏⵏ ⵏ ⵜⵓⴷⵔⵜ ⵏ ⵓⴳⴷⵓⴷ ⵏⵏⵙ.
- ⴰⴷ ⵉⴼⵔⵔⵣ ⴰⵡⴰⵍ, ⵉⴳ ⴰⵔⴳⴰⵣ ⵎⵎⵉ ⵉⵣⴳⴰ ⵉⵍⵙ.
- ⴰⴷ ⵉⴳ ⵉⵍⵙ ⵏⵏⵙ, ⵉⵍⵙ ⵢⴰⵥⵏ ⵓⵍ ⴷ ⵓⵏⵍⵍⵉ.
- ⴰⴷ ⵓⵔ ⵉⴽⴽⵕⴹ ⵢⴰⵏ ⵙ ⵓⵣⴰⵡⴰⵔ, ⵉⵏⴳⴰⵔⴰ ⴷ ⵡⴰⵡⴰⵍ ⵍⵍⵉ ⵔⴰⴷ ⴷ ⵢⴰⵍⵍ ⵉⵎⵏⵖⵉ ⵏⴳⵔ ⵜⵇⴱⵉⵍⵉⵏ.
- ⴰⴷ ⵉⴳ ⴱⴰⴱ ⵏ ⵉⵍⵙ ⵉⵙⵎⴰⵣⵖⵏ ⵜⵓⵜⵍⴰⵢⵜ.
ⵉⴳⴰ ⵓⵊⵎⵎⴰⵄ, ⴰⵥⵓⵍⵉⴹ ⴷ ⵓⵟⵟⴰⵍⴱ ⵍⵎⵥⵓⴹⵉ ⵡⵉⵍⵍⵉ ⴱⴰⵀⵔⴰ ⵉⵜⵜⴰⵡⵙⵙⴰⵏⵏ ⴳ ⵙⵓⵙ ⴷ ⵍⵃⵓⵣ, ⵎⴰⵙ ⴳⴰⵏ ⵉⵎⴷⵢⴰⵣⵏ ⵏ ⵉⵙⵓⵢⴰⵙ. ⵉⵍⵍⴰ ⵡⴰⵏⴰⵡⵏ ⵢⴰⴹⵏ ⵏ ⵉⵃⵡⴰⵛⵏ ⵖ ⵍⵍⴰⵏ ⵉⵎⴷⵢⴰⵣⵏ ⵖ ⴽⵉⴳⴰⵏ ⵏ ⵜⵎⵏⴰⴹⵉⵏ ⵜⵉⵎⴰⵣⵉⵖⵉⵏ ⵣⵓⵏ ⴷ ⴰⵃⵉⴷⵓⵙ ⵖ ⵜⵎⴰⵣⵉⵔⵜ ⵏ ⵥⴰⵢⴰⵏ (ⵍⴰⵟⵍⴰⵚ), ⴰⵔ ⴳⵉⵙ ⵜⵜⵉⵍⵉⵏ ⵉⵏⵛⵛⴰⴷⵏ ⵉⵜⵜ ⵏⴹⴰⵎⵏ ⵙ ⵓⵎⴷⵢⴰⵣ ⴰⵎⴰⵣⵉⵖ.
ⵖ ⵓⴹⵕⵉⵚ ⴰⴷ ⵏⴱⴷⵔ ⴽⵔⴰ ⵣⵖ ⴰⵏⴰⵡⵏ ⵏ ⵉⵃⵡⴰⵛⵏ ⵉⵎⴰⵣⵉⵖⵏ ⵍⵍⵉ ⴱⴰⵀⵔⴰ ⵉⵜⵜⴰⵡⵙⵙⴰⵏⵏ, ⵏⵙⵙⴼⴰⵍ ⵜⵉⵔⵔⴰ ⵏ ⵓⴹⵕⵉⵚ ⴰⴷ ⵙ ⵡⴰⵏⴰⵡ ⵍⵍⵉ ⴱⴰⵀⵔⴰ ⵙⵙⵏⵏ ⵎⵉⴷⴷⵏ, ⵎⴰⵛⵛ ⵉⵖⴰⵎⴰ ⵙⵓⵍ ⵎⴰⵢⴰⴷ ⵉⵥⵍⵉⵏ ⵙ ⵓⵥⴰⵡⴰⵏ ⴰⵎⴰⵣⵉⵖ ⵉⵔⴰ ⵙⵓⵍ ⴽⵉⴳⴰⵏ ⵏ ⵜⵡⵡⵓⵔⵉ ⴷ ⵉⵔⵣⵣⵓⵜⵏ, ⵃⵎⴰ ⴰ ⵏⴼⴽ ⵉⵎⴰⵏⵏ ⵉ ⴽⵔⴰ ⵡⴰⵏⴰⵡⵏ ⵏ ⵉⵃⵡⴰⵛⵏ ⵍⵍⵉ ⵉⵜⵜ ⴰⴼⵓⴹⵏ ⴰⵔ ⵜⵜ ⵏⵖⵓⴱⵓⵏ ⵣⵖ ⵜⵎⵢⵓⵔⵉⵏ ⵏ ⵓⵎⴰⵣⵉⵖ.
ⵥⵕ ⵓⴳⴳⴰⵔ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]- ⴰⵃⵡⴰⵛ
- ⴰⵥⴰⵡⴰⵏ ⴰⵎⴰⵣⵉⵖ
ⵉⵙⴰⵖⵓⵍⵏ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]- أحمد بوزيد الكنساني, أحواش : الرقص و الغناء الجماعي بسوس, عادات و تقاليد, منشورات عكاظ, الرباط, 1996.
- عمر أمرير, حفلات الزواج و الحب في الأطلس الكبير, التراث الشعبي, العدد12 السن1977.
- أحمد عصيد, بيان ضد الفولكلور, مجلة تاوسنا, العدد1 يناير 1995 ص 3 .
- محمد أقوضاض, شعرية السرد الأمازيغي, منشورات المعهد الملكي للثقافة الأمازيغية, مطبعة المعارف الجديدة الرباط,2008.
- صور ومقاطع فيديو ومقاطع صوتية لمناسبات احتفالية في منطقة دمسيرة.
- .شهادات كبار السن من منطقة دمسيرة وأعضاء جمعية أحواش تاسكيوين أفلايزداتن أيت بخاير للفنون قبيلة دمسيرة جماعة أفلايسن عمالة شيشاوة حول بعض المعلومات الخاصة بالرقص أحواش.