ⵡⵉⴽⵉⴱⵉⴷⵢⴰ:ⴰⵎⵏⵏⵉ ⵓⴼⵔⵉⵏ/5
ⴼⴰⵙⵉⵍⵉⵙⴰ ⵜⴰⴼⴰⵍⴽⴰⵢⵜ (ⵙ ⵜⵔⵓⵙⵉⵜ: василиса прекрасная,Vassilissa Prekrasnaïa ) ⵜⴳⴰ ⵢⴰⵜ ⵜⵏⴼⵓⵙⵜ ⵜⴰⵔⵓⵙⵉⵜ ⵉⴼⵓⵍⴽⵉⵏ, ⴷ ⵍⵍⵉ ⴱⴰⵀⵔⴰ ⵉⵜⵜⵢⵓⵙⵙⴰⵏⵏ. ⵢⵓⵔⴰ ⵜⵜ ⴰⵍⵉⴽⵙⴰⵏⴷⵔ ⴰⴼⴰⵏⴰⵙⵉⴼ ⴳ ⵓⴷⵍⵉⵙ ⵏⵏⵙ ⵜⵉⵏⴼⵓⵙⵉⵏ ⵜⵉⵎⴰⴷⵏⴰⵏⵉⵏⵏ ⵜⵉⵔⵓⵙⵉⵢⵉⵏ, ⴷⴷⵓ ⵡⵓⵟⵟⵓⵏ ⵡⵉⵙ 59. ⵉⵙⵓⵖⵍ ⵜⵜ ⵓⵎⴰⵔⴰ ⵎⵇⵇⵓⵔⵏ ⵎⵓⵃⵎⵎⴰⴷ ⴰⴽⵓⵏⴰⴹ ⵙ ⵜⵛⵍⵃⵉⵜ.
ⵣⵉⴽⴽ ⵍⵍⵉ ⵏⵏ ⴱⴰⵀⵔⴰ ⵢⴰⴳⴳⵓⴳⵏ, ⴰⴷ ⵜ ⵉⵏⵏ ⵉⴽⴽⴰ ⵉⴷⴷⵔ ⵢⴰⵏ ⵓⵔⴳⴰⵣ ⵉⴳⴰⵏ ⴰⵡⵙⵙⴰⵔ, ⵏⵜⵜⴰⵏ ⴷ ⵜⵎⵖⴰⵔⵜ ⴷ ⵉⵍⵍⵉⵜⵙⵏ ⵍⵍⵉ ⵎⵉ ⵙⵙⴰⵖⵏ ⴼⴰⵙⵉⵍⵉⵙⴰ ⵜⴰⴼⴰⵍⴽⴰⵢⵜ. ⵜⵓⵎⵔⵜ ⴷ ⵜⴰⴷⴰⵡⵉⵜ ⴰⵙ ⴷⴷⵔⵏ ⴳ ⵢⴰⵜ ⵜⴳⵎⵎⵉ ⵎⵥⵥⵉⵢⵏ ⵏ ⵓⴽⵛⵛⵓⴹ ⵍⵍⵉ ⵉⵟⵟⴼⵏ, ⵎⴰⵛⴰ ⵜⴼⵜⴰ ⴰⵙⵏ ⵜⵓⴷⵔⵜ ⴰⵏⵏ ⵉⵎⵎⵉⵎⵏ ⴰⵙⵙ ⵍⵍⵉ ⴷ ⵉⴹⵕ ⵢⴰⵏ ⵡⴰⵟⵟⴰⵏ ⵢⵓⵎⵥ ⵜⴰⵎⵖⴰⵔⵜ ⵍⵍⵉ. ⴰⵙⵙ ⵍⵍⵉ ⵜⵙⵙⵏ ⵉⵙ ⵔⴰⴷ ⵙⵓⵍ ⵓⵔ ⵜⵏⴽⵉⵔ ⴳ ⵡⴰⵟⵟⴰⵏ ⴰⵏⵏ, ⵜⵙⵙⵏ ⵉⵙ ⵜⵜ ⵜⴰⵥ ⵜⵎⵜⵜⴰⵏⵜ ⵏⵏⵙ, ⵜⵖⵔⴰ ⴷ ⵉ ⵢⵉⵍⵍⵉⵙ ⵜⴼⴽ ⴰⵙ ⵢⴰⵜ ⵜⵙⵍⵉⵜ ⵉⵜⵜⵓⵙⴽⴰⵔⵏ ⴳ ⵓⴽⵛⵛⵓⴹ, ⵜⵉⵏⵉ ⴰⵙ: "ⵃⴹⵓ ⴷⴰⵔⵎ ⴰ ⵉⵍⵍⵉ ⵜⵉⵙⵍⵉⵜ ⴰⴷ ⴷ ⴰⴷ ⵜⵜ ⵓⵔ ⵜⵎⵍⴷ ⵉ ⵎⵇⵇⴰⵔ ⴷ ⵢⴰⵏ. ⴰⴽⵓⴷ ⵏⵏⴰ ⵜⵍⵍⵉⴷ ⴳ ⴽⵔⴰ ⵏ ⵜⴰⵙⵙⴰⵙⵜ. ⴼⴽ ⴰⵙ ⴰⵔ ⴷ ⵜⵛⵛ ⵜⵙⵓⵜⵔⵜ ⵜⵜ ⴰⴷ ⴰⵎ ⵜⴰⵡⵙ ⴰⵔ ⴷ ⴳⵉⵙ ⵜⴼⴼⴰⵖⴷ. ⵀⴰⵏ ⵔⴰⴷ ⴰⵎ ⵜⴰⵡⵙ.) ⵜⴰⵎⵥ ⵉⵍⵎⵎⴰ ⵜⵎⵖⴰⵔⵜ ⵍⵍⵉ ⵉⵍⵍⵉⵙ ⵜⵙⵙⵓⴷⵎ ⵜⵜ, ⵓⵔ ⵜⴽⴽⵉ ⴰⵎⵢⴰ ⵜⵎⵎⵜ. ⴰⵔ ⵢⴰⵍⵍⴰ ⵓⵡⵙⵙⴰⵔ ⵍⵍⵉ ⴼ ⵜⵎⵖⴰⵔⵜ ⵏⵏⵙ ⴰⵢⵍⵍⵉⴳ ⴼⵜⴰⵏⵜ ⴰⴷ ⴱⵓⴽⴹⵏⵜ ⵡⴰⵍⵍⵏ ⵏⵏⵙ. ⵎⴰⵛⴰ ⴳ ⵜⴳⵉⵔⴰ ⵢⵉⵡⵍ ⵢⴰⵜ ⵜⵎⵟⵟⵓⴹⵜ ⵢⴰⴹⵏⵉⵏ. ⵉⵖⴰⵍ ⵉⴳⵍⵍⵉⵏ ⵉⵙ ⵔⴰⴷ ⵜⴳ ⵉ ⵢⵉⵍⵍⵉⵙ ⵣⵓⵏ ⴷ ⵉⵏⵏⴰⵙ ⵍⵍⵉ ⵉⵎⵎⵓⵜⵏ. ⵎⴰⵛⴰ ⵓⵀⵓⵢ! ⵓⵔ ⵜⴳⵉ ⵜⴰⴷ ⴰⵎⵔ ⵢⴰⵜ ⵜⵓⵇⵊⵉⵔⵜ ⴷ ⵜⵅⵛⵛⴰⵏⵜ ⵏ ⵜⵎⵖⴰⵔⵉⵏ. ⵜⴰⵎⵟⵟⵓⴹⵜ ⵜⵓⵡⵉ ⴷ ⴷⵉⴷⵙ ⵙⵏⴰⵜ ⵜⴼⵔⵅⵉⵏ ⵍⵍⵉ ⵎⵓ ⴳⴳⵓⵜⵏ ⵉⴱⵊⴳⴳⵉⵜⵏ ⵎⴰⵛⴰ ⵏⵜⵜⴰⵜ ⴳⴰⵏⵜ ⴷⴰⵔⵙ ⵣⵓⵏ ⴷ ⴰⵍⵍⵏ ⵏⵏⵙ. ⴳ ⵜⵖⵣⵉ ⵏ ⵡⴰⵙⵙ ⴰⵔ ⵜⵏⵜ ⵀⵍⵍⵉ ⵜⴻⵜⵜⵃⵍⵍⵉⵍ. ⵎⴰⵛⴰ ⵜⵕⵥⴰⴳ ⵜⵓⴷⵔⵜ ⵉ ⴼⴰⵙⵉⵍⵉⵙⴰ ⵜⴳⵍⵍⵉⵏⵜ. ⵙ ⴽⵕⴰⴹⵜ ⵉⵜⵙⵏⵜ ⴰⵔ ⵜⵜⵥⵉⵏⵜ ⵖⴼⵠⴼⴰⵙⵉⵍⵉⵙⴰ. ⴰⵔ ⵜⵜ ⴽⴽⴰⵜⵏⵜ. ⵙⵙⵕⵎⵉⵏⵜ ⵜⵜ ⵙ ⵜⵡⵓⵔⵉⵡⵉⵏ. ⵔⴰⵏ ⵜⵜ ⴰⴷ ⵜⵎⴷⵓ ⴷ ⵡⴰⴷ ⴰⵙ ⵜⵊⴷⵔ ⵜⴰⴼⵓⴽⵜ ⴷ ⵡⴰⴹⵓ ⴰⴼⴰⵍⴽⴰⵢ ⵍⵍⵉ ⴷⴰⵔⵙ ⵉⵍⵍⴰⵏ. ⴳ ⵜⵖⵣⵉ ⵏ ⵓⵣⴰⵍ, ⵓⵔ ⴰⵔ ⵜⵙⵙⴼⵍⵉⴷ ⴳ ⵜⴳⵎⵎⵉ ⴰⵎⵔ ⵉ ⵎⴽⴰⴷ: ⵠⴼⴰⵙⵉⵍⵉⵙⴰ , ⴰⵣⵣⵍ ⴰⴷ ⵜⵙⴽⵔⵜ ⵜⵉⵔⵎⵜ! ⴼⴰⵙⵉⵍⵉⵙⴰ ⴰⵣⵣⵍ ⵙⵖⵓⵙ ⵜⵉⴳⵎⵎⵉ! ⴷⴷⵓ ⴰⵡⵉ ⴷ ⵉⴽⵛⵛⵓⴹⵏ ⵙⴳ ⵜⴰⴳⴰⵏⵜ, ⵥⵥⵉⴳ ⵜⵉⵙⵉⵜⴰⵏ. ⴰⵣⵣⵍ ⵓⴳⴳⴰⵔ ⵏ ⵎⴽⴰⴷ ⵍⵍⵉ ⵙ ⴰⵔ ⵜⵜⴰⵣⵣⴰⵍⵜ.