ⵚⴰⵍⵃ ⵍⴱⴰⵛⴰ
ⵚⴰⵍⵃ ⵍⴱⴰⵛⴰ  | |
|---|---|
 | |
| ⵓⵎⵍⴰⵏ ⵓⴷⵎⴰⵡⴰⵏⵏ | |
| ⴰⴷⵖⴰⵔ ⵏ ⵜⵍⴰⵍⵉⵜ | ⵜⴰⵚⵚⵓⵕⵜ |
| ⴰⵙⴰⴽⵓⴷ ⵏ ⵜⵍⴰⵍⵉⵜ | 1965 |
| ⴰⴷⵖⴰⵔ ⵏ ⵜⵎⵜⵜⴰⵏⵜ | ⴷⴷⵔⴰⵔⴳⴰ |
| ⴰⵙⴰⴽⵓⴷ ⵏ ⵜⵎⵜⵜⴰⵏⵜ | 13 ⵢⵓⵍⵢⵓⵣ 2025 |
| ⵜⴰⵖⵍⴰⵏⵜ ⴷ ⵜⵣⴷⵓⵖⵜ | |
| ⵜⴰⵖⵍⴰⵏⵜ | ⵍⵎⵖⵔⵉⴱ  |
| ⵜⴰⵎⵓⵔⵉ | ⵍⵎⵖⵔⵉⴱ |
| ⴰⵙⴳⴷ | |
| ⴰⵙⴳⴷ | ⵉⵙⵍⴰⵎ |
| ⵜⴰⵎⴰⴳⵔⴰⵡⵜ ⵜⴰⵙⴳⴷⴰⵏⵜ | ⵉⵙⵍⴰⵎ |
| ⵜⵓⴷⵔⵜ ⵜⴰⵣⵣⵓⵍⵜ | |
| ⵜⴰⵣⵣⵓⵍⵜ | ⵕⵕⴰⵢⵙ ⴰⵏⴹⴹⴰⵎ ⴰⵎⵖⵏⵏⵊ |
| ⵉⵙⴳⴳⵯⴰⵙⵏ ⵏ ⵓⵏⵏⵓⵛⵛⴳ | 1996, 2025 |
| ⴰⵙⵍⵎⴷ | |
| ⵜⵓⵜⵍⴰⵜⵢ ⵜⴰⵢⵎⵎⴰⵜ | ⵜⴰⵎⴰⵣⵉⵖⵜ ⵏ ⵢⵉⴼⴼⵓⵙ |
| ⵜⵓⵜⵍⴰⵢⵉⵏ ⵢⴰⴹⵏⵉⵏ | ⵜⴰⵎⴰⵣⵉⵖⵜ ⵏ ⵢⵉⴼⴼⵓⵙ, ⵜⵓⵜⵍⴰⵢⵜ ⵜⴰⵄⵕⴰⴱⵜ |
ⵙⵏⴼⵍ ⴰⵙⴰⴳⵎ - ⵙⵏⴼⵍ - ⵡⵉⴽⵉⴷⴰⵜⴰ  | |
ⵚⴰⵍⵃ ⵍⴱⴰⵛⴰ ⴷ ⵢⴰⵏ ⵓⵎⴰⵔⵉⵔ ⴷ ⵢⴰⵏ ⵕⵕⴰⵢⵚ ⴷ ⵢⴰⵏ ⵓⵏⴹⴹⴰⵎ ⴰⵎⴰⵣⵉⵖ ⴰⵎⵖⵔⵉⴱⵉ, ⵉⵍⵓⵍ ⴳ ⵓⵙⵓⵏ ⵏ ⵉⴷ ⵓ ⴰⴳⵕⴹ ⴳ ⵓⵙⴳⴳⵯⴰⵙ 1965, ⴳ ⵢⵉⵎⵉⵙⵉ ⵏ ⵎⵓⴳⴰⴷⵓⵔ ⴳ ⵜⵇⴱⵉⵍⵜ ⵏ ⵉⵃⴰⵃⴰⵏ, ⵉⵙⵙⵏⵜⵉ ⵜⴰⵡⴰⴷⴰ ⵏⵏⵙ ⴳ ⵜⵥⵓⵕⵉ ⵏ ⵓⵎⴰⵔⴳ ⵙⴳ ⵓⵙⴳⴳⵯⴰⵙ 1996, ⵉⵎⵎⵜ ⴳ ⵡⴰⵢⵢⵓⵔ ⵏ ⵢⵓⵍⵢⵓⵣ ⴳ ⵓⵙⴳⴳⵯⴰⵙ 2025, ⵉⵜⵜⵢⴰⵡⵙⵙⴰⵏ ⵚⴰⵍⵃ ⵉⵙ ⴷⴰⵔⵙ ⵜⵍⵍⴰ ⵢⴰⵜ ⴳ ⵜⴰⵇⵇⴰⵢⵉⵏ ⵍⵍⵉ ⴰⴽⴽⵯ ⵓⵎⴰⵏⵉⵏ ⴳ ⵜⵎⵉⵣⴰⵔ ⵏ ⵉⵛⵍⵃⵉⵢⵏ, ⵉⴼⴽⴰ ⴽⵉⴳⴰⵏ ⵉ ⵓⵙⴰⵔⴰⴳ ⵏ ⵓⵎⴰⵔⴳ ⴰⵎⴰⵣⵉⵖ ⵙ ⵉⵙⵎⴰⴷⵏ ⵏⵏⵙ ⵙⵙⵓⵙⵎⵏⵉⵏ ⴰⵢⵍⵍⵉ ⵜ ⵢⵓⵊⵊⴰⵏ ⴰⴷ ⵢⴰⵡⵉ ⵢⴰⵏ ⵓⴷⵖⴰⵔ ⵉⵥⵍⵉⵏ ⴳ ⵜⵎⴽⵜⵉⵜ ⵏ ⵓⴳⴷⵓⴷ ⵏⵏⵙ, ⵉⴼⵍ ⴷ ⴳ ⵜⵉⵖⵔⴷⵉⵏ ⵏⵏⵙ ⵎⴰⴷ ⵉⵙⵙⵓⵔⴼⵏ 14 ⵏ ⵉⴷ ⵍⴰⵍⴱⵓⵎ.
ⴷ ⵀⴰⵜ ⵢⵓⵔⴰ ⴼⵍⵍⴰⵙ ⵓⵎⴰⵏⴰⴳ ⵉⵃⵉⵃⵉ "ⵃⴰⵙⴰⵏ ⵀⵎⵎⵓⵛ" ⵢⴰⵏ ⵓⴷⵍⵉⵙ ⵉⴼⴽⴰ ⴰⵙ ⵉⵙⵎ ⵏ "ⴰⴱⵔⵉⴷ ⵏ ⵜⵥⵓⵕⵉ ⴰⵏⴰⵡ: ⵚⴰⵍⵃ ⵍⴱⴰⵛⴰ"[1][2] ⵉⵙⵙⵓⵙ ⴳⵉⵙ ⴰⴳⴹⵕⵓⵕ ⴼ ⵢⴰⵏ ⵎⵏⵏⴰⵡ ⵏ ⵡⵓⴷⵎⴰⵡⵏ ⵏ ⵓⵎⴰⵔⴳ ⵏ ⵚⴰⵍⵃ ⵍⴱⴰⵛⴰ ⴷ ⵍⵍⵉⴳ ⵉⴷⵍ ⵜⵉⵎⵙⴰⵍⵉⵏ ⵍⵍⵉ ⵣⴷⵉⵏⵉⵏ ⴷ ⵜⵡⵔⵏⴰⵏⵜ ⴷ ⵡⴰⵎⵓⵏ ⴰⵎⴰⵣⵉⵖ ⴷ ⵓⵏⵣⴳⵓⵎ ⵏⵏⵙ, ⵉⵙⴰⵡⵍ ⵓⵍⴰ ⴼ ⵜⵎⴰⴳⵉⵜ ⵜⴰⵎⴰⵣⵉⵖⵜ.
ⵜⵓⴷⵔⵜ ⵏⵏⵙ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵉⵕⵥⵎ ⵚⴰⵍⵃ ⴰⵍⵍⵏ ⵏⵏⵙ ⵜⵉⴽⵍⵉⵜ ⴰⴽⴽⵯ ⵉⵣⵡⵓⵔⵏ ⵖ ⵓⵙⴳⴳⵯⴰⵙ 1965 ⴳ ⵓⵙⵓⵏ ⵏ ⵉⴷ ⵏⵄⵓⵎ ⴳ ⵉⴷ ⵓ ⴳⵕⴹ ⴳ ⵜⵙⴳⴰ ⵏ ⵎⵓⴳⴰⴷⵓⵔ ⴳ ⵜⵇⴱⵉⵍⵜ ⵏ ⵉⵃⴰⵃⴰⵏ. ⴷ ⵉⴽⴽⴰ ⵜ ⵉⵏⵏ ⴱⴰⴱⴰⵙ ⵍⵃⵙⵏ ⴱⵏ ⵕⵕⴰⵢⵙ ⵃⵎⴰⴷ ⵍⴱⴰⵛⴰ ⴰⴷ ⵉⴳⴰⵏ ⵕⵕⴰⵢⵚ ⵏ ⵜⵔⴰⴱⴱⵓⵜ ⵏ ⵓⵃⵡⴰⵛ ⵏ ⵉⵃⴰⵃⴰⵏ ⵖ ⵉⵙⴳⴳⵯⴰⵙⵏ ⵏ ⵜⵎⵔⴰⵡⵜ ⵜⵉⵙ ⵚⴹⵉⵚⵜ, ⵉⵜⵜⵢⴰⵡⵙⵙⴰⵏ ⵙ ⵓⵔⴽⴰⵣ ⵏⵏⵙ ⵉⴳⴰⵏ ⵡⴰⵥ ⵍⵍⵉⴳ ⴰⵔ ⵉⵜⵜⴳⴳⴰ ⴼ ⵉⴳⴳⵉ ⵏ ⵓⴳⴰⵢⵢⵓ ⵏⵏⵙ ⵢⴰⵏ ⵍⵎⵕⵊⵍ ⵉⵔⵖⴰⵏ ⵏ ⵡⴰⵎⴰⵏ ⴳ ⵉⴳⴳⵉ ⵏ ⵢⴰⵏ ⵓⵎⵙⵙⵏⴼⴰⴷ ⵏ ⵉⵏⴽⴰⵏ ⵏ ⵉⵜⵇⵇⵉ ⴳⵉⵙ ⵜⵉⵔⴳⵉⵏ. ⵉⴳⴰ ⵎⴰ ⵉⵜⵜⵢⴰⵡⴱⴷⴰⵔⵏ ⵉⵙ ⵜ ⵉⵏⵏ ⵉⴽⴽⴰ ⴱⴰⴱⴰⵙ ⵉⴳⴰ ⵡⴰⵍⵍⵉ ⵉⵜⵜⴰⵎⵥⵏ ⴰⵏⵢⴰ ⵉ ⵜⵔⴰⴱⴱⵓⵜ ⵙ ⵜⴰⵍⵍⵓⵏⵜ, ⵉⵎⵓⵏ ⴷⵉⴷⵙⵏ ⵅⴰⵍⵉⵙ ⵃⴰⵙⴰⵏ ⵍⴱⴰⵛⴰ ⵍⵍⵉ ⵉⴳⴰⵏ ⵢⴰⵏ ⵍⵄⵓⵡⵡⴰⴷ ⵉⵛⵕⵎⴹⵏ, ⵉⵎⵎⴰ ⵉⵏⵏⴰⵙ ⵜⴳⴰ ⴱⴰⵛⴰ ⵍⴱⴰⵛⴰ ⵓⵍⵜ ⵄⵎⴰⵕ.
ⵉⵣⵣⵔⵉ ⵚⴰⵍⵃ ⵜⵓⴷⵔⵜ ⵏ ⵎⵥⵥⵉ ⴳ ⵓⵙⵓⵏ, ⴳ ⵜⵎⴰⵣⵉⵔⵜ, ⵣⵓⵏ ⴷ ⵉⵏⴳⴳⵯⴰ ⵏⵏⵙ, ⵉⴽⴽⴰ ⵜ ⵉⵏⵏ ⴰⵔ ⵉⵜⵜⴰⵎⵥ ⵜⴰⵡⴰⵍⴰ ⴷ ⴰⵢⵜⵎⴰⵙ ⴼ ⵜⴰⵢⵙⵙⴰ ⵏ ⵡⵓⵍⵍⵉ ⵏ ⵜⴰⵡⵊⴰ ⵏⵏⵙ, ⴷ ⴰⵔ ⵉⵜⵜⴽⴽⴰ ⵜⵉⵎⵣⴳⵉⴷⴰ ⵍⵍⵉ ⵉⵍⵍⴰⵏ ⵜⴰⵎⴰ ⵏ ⵜⵣⴷⴷⵓⵖⵜ ⵏⵏⵙ, ⴰⵔ ⵉⴳⵯⵎⵎⵉ, ⴰⵔ ⵉⵃⵙⵙⵓ ⵎⴰ ⵎⵉ ⵢⵓⴼⴰ ⴳ ⵍⵉⵙⴼⴰⵔ ⵏ ⵕⴱⴱⵉ, ⴷⴰⵔ ⵡⴰⴳⴳⴰⴳ ⵙⵉⴷⵉ ⵄⵍⵉ ⵏ ⵉⴷ ⴱⵕⴰⵀⵉⵎ. ⵍⵍⵉⴳ ⵉⵍⴽⵎ ⴼ ⵜⵖⵔⵉ, ⵉⵎⵓⵏ ⴷ ⵉⵏⴳⴳⵯⴰ ⵏⵏⵙ ⵙ ⵜⵉⵏⵎⵍ ⵏ ⵜⵏⴱⴰⴹⵜ ⴷⴰ ⵉⵎⴳⴰⵍⴰⵏ ⴷ ⵜⴳⵎⵎⵉ ⵏⵏⵙ ⵙ ⵓⴳⴳⴰⵔ ⵏ 3 ⴽⵎ, ⴰⵔ ⵜ ⵉⴽⴽⴰⵜ ⵙ ⵓⴹⴰⵕ ⴽⵔⴰⵢⴳⴰⵜⵜ ⴰⵙⵙ, ⴰⵢⵍⵍⵉⴳ ⵢⵓⵎⵥ ⴰⵙⵍⴽⵉⵏ ⵏ ⵓⵍⵎⵎⵓⴷ ⵉⵣⵡⵓⵔⵏ, ⵎⵇⵇⴰⵔ ⵎⴽⴰⵏⵏ ⵓⵔ ⵊⵊⵉⵏ ⵉⴼⵍ ⵍⵉⵃⴹⴰⵕ ⴳ ⵜⵎⵣⴳⵉⴷⴰ ⵍⵍⵉ ⴷ ⵉⵜⵜⴽⴽⴰ ⵜⵉⴽⵍⵉⵜ ⴰⵔ ⵜⵉⴽⵍⵉⵜ.
ⵜⵓⴳⴳⵓⴳⵜ ⵏ ⵓⵙⵉⵏⴰⵏ ⵏ ⵓⵙⵎⵓⵜⵜⴳ ⵍⵍⵉ ⴷ ⵢⵓⵛⴽⴰⵏ ⴳ ⵎⵓⴳⴰⴷⵓ, ⵜⵓⵡⵉ ⵚⴰⵍⵃ ⴰⴷ ⵉⴼⵍ ⵜⴰⵣⵣⵉⴳⵉⵣⵜ ⵏⵏⵙ ⴳ ⵓⵍⵎⵎⵓⴷ ⴰⵜⵔⴰⵔ, ⵉⵣⵓⴳ ⵙ ⵓⵍⵎⵎⵓⴷ ⴰⵇⴱⵓⵕ, ⵉⴷⴷⴰ ⵉⵍⵎⵎⴰ ⵙ ⵓⵥⵕⵓ ⴳ ⵙⵓⵙ, ⵉⵍⵎⴷ ⴷⴷⵓ ⵓⴼⵓⵙ ⵏ ⵓⵎⵖⴰⵔ ⵍⵃⴰⵊⵊ ⵎⵓⵃⵎⵎⴰⴷ ⴰⵔⵙⵎⵓⴽ. ⵉⵖⵉ ⴷⴰⵖ ⵢⴰⵜ ⵜⴱⵔⴰⵜ ⵙⴳ ⵓⵎⵖⴰⵔ ⵏⵏⵙ ⴱⴰⵛ ⴰⴷ ⵉⵙⵍⵉ ⵢⴰⵜ ⵜⵉⵏⵎⵍ ⵢⴰⴹⵏⵉⵏ ⵍⵍⵉ ⴳ ⵔⴰⴷ ⵉⵙⵎⵙⴷ ⵜⴰⵡⵙⵙⵏⴰ ⵏⵏⵙ, ⴰⴷ ⵜⵜ ⵉⴳⴰⵏ ⴷ ⵜⵉⵏ ⵙⵉⴷⵉ ⴱⵉⴱⵉ ⴷⴰⵔ ⵙⵉⴷⵉ ⵄⵍⵉ ⴰⵎⴰⵄⵉ, ⵉⴼⵔⴰⵡⵙ ⴱⴰⵀⵔⴰ ⵙ ⵓⵏⵖⵎⵉⵙ ⴰⴷ, ⵢⵓⵊⵊⴰ ⵜⵜ ⴰⴷ ⵉⴷⵎⵔ ⴳ ⵓⵙⵉⴳⴳⵍ ⵏ ⵜⴰⵡⵙⵙⵏⴰ, ⵢⴰⴼ ⵢⴰⵜ ⵜⵡⵉⵣⵉ ⵉⴷⵓⵙⵏ ⵙⴳ ⴷⴰⵔ ⴱⴰⴱⴰⵙ ⴷ ⵉⴷ ⵅⴰⵍⵉⵙ, ⵍⵃⵙⵏ ⴷ ⵙⵄⵉⴷ ⴷ ⵍⵃⵓⵙⴰⵢⵏ, ⴰⴷ ⴷⴰⵔⵙ ⵢⵉⵍⵉ ⵢⴰⵏ ⵉⴷⴰ ⵢⴰⵜⵜⵓⵢⵏ ⴳ ⵢⵉⴳⵔ ⴰⴷ, ⵖⵉⵏⵏ ⴰ ⴳ ⵢⵓⴼⴰ ⵚⴰⵍⵃ ⴰⵙⵓⵏⴼⵓ ⵏⵏⵙ, ⴷ ⴰⵔ ⵏⵉⵜ ⵉⵜⵜⴰⵔⴰ ⴽⵔⴰ ⵏ ⵜⵎⴷⵢⴰⵣⵉⵏ ⵙ ⵓⵙⴰⴳⴳⵎ ⴰⴷ ⵉⵙⵙⵔⵡⵍ ⵉⵖⴼ ⵏⵏⵙ ⵉ ⵓⵣⵡⴰⴳ ⴷ ⵡⴰⵏⵢⴰ ⵉⵜⵜⵢⴰⵍⴰⵙⵏ ⵏ ⵜⵓⴷⵔⵜ ⵙ ⵓⵙⴰⵔⴰⴳ ⵉⴼⵍⵉⵏ ⵏ ⵜⵓⴷⵔⵜ ⴷⴰ ⵉⵔⴰ ⵡⵓⵍ ⵏⵏⵙ ⵏⵜⵜⴰⵏ.
ⵉⵖⵉⵎ ⵏ ⵚⴰⵍⵃ ⵍⴱⴰⵛⴰ ⴳ ⵙⵉⴷⵉ ⴱⵉⴱⵉ ⵓⵔ ⵔⴰⴷ ⵉⵖⵣⵣⵉⴼ, ⴰⴼⴰⴷ ⴰⴷ ⵉⵙⵎⴷ ⴰⵍⵎⵎⵓⴷ ⵏⵏⵙ, ⵉⵎⵛⴰⵡⴰⵕ ⴷ ⴱⴰⴱⴰⵙ, ⵢⵓⵡⵉ ⵜⵉⵖⴰⵡⵙⵉⵡⵉⵏ ⵏⵏⵙ ⵙ ⵜⵉⵏⵎⵍ ⵏ ⴰⵢⵜ ⵙⵄⵉⴷ, ⴳ ⵎⴰⵚⵚⵜⵜⴰⵙⴳⵉⵡⵉⵏ ⵏ ⵜⵣⵏⵉⵜ, ⵉⵙⵙⵃⴹⵕ ⵜ ⵜⵉⴽⵍⵉⵜ ⴰⴷ ⵓⵎⵖⴰⵔ ⵙⵉⴷⵉ ⵙⵄⵉⴷ ⵍⴱⵓⵛⵡⴰⵔⵉ ⵍⵍⵉ ⴱⴰⵀⵔⴰ ⵉⵙⵙⵏⵏ ⴳ ⵜⵏⴼⵓⵙⵜ ⵏ ⵍⴱⵓⵚⴰⵢⵕⵉ, ⵢⵉⵍⵉ ⴷⴰⵔⵙ ⴳ ⵜⵡⴰⴳⴳⴰⴳⵜ ⴷ ⵜⵊⵕⵕⵓⵎⵜ ⵢⴰⵏ ⵓⵎⵓⵔ ⵓⵔ ⵉⴷⵔⵓⵙⵏ, ⵉⵟⵟⴰⴼ ⵙⴳ ⴷⴰⵔⵙ ⵜⴰⵡⵙⵙⵏⴰ ⵏ ⵛⵛⵕⵄ, ⵣⵓⵏ ⴷ ⵜⵉⴼⵉⴹⵉⵜ ⵏ ⵓ ⵎⴰⵍⵉⴽ ⴷ ⵜⵉⵢⵢⴰⴹ.
ⵜⴰⵎⵎⴰⵔⴰ ⵏ ⵜⵓⴷⵔⵜ ⵜⵙⵖⵉ ⵉ ⵚⴰⵍⵃ ⴰⴷ ⵉⴼⴼⵓⵖ ⴰⴷ ⵉⵙⵉⴳⴳⵍ ⵢⴰⵏ ⵓⵙⴰⴷⵓⵔ ⵍⵍⵉ ⵔⴰⴷ ⴰⵙ ⵢⴰⵡⵙ ⴰⴷ ⵉⵙⵎⴰⴷ ⵜⵉⵖⵔⵉ ⵏⵏⵙ, ⵢⵓⵜ ⵜⴰⵎⵍⴷⴰ ⴳ ⵢⴰⵜ ⵜⵎⵣⴳⵉⴷⴰ ⴳ ⵢⵉⵎⵉⵙⵉ ⵏ ⵜⵔⵓⴷⴰⵏⵜ, ⴳ ⵜⵎⴰⵣⵉⵔⵜ ⵏ ⵉⵙⴰⴼⴼⵏ, ⴰⵔ ⴰⵙ ⵜⵜⵉⵏⵉⵏ "ⴰⵙⵉⴼ ⵏ ⴰⵢⵜ ⵀⴰⵕⵓⵏ" ⵉⴳⵉⵡⵔ ⴳⵉⵙ ⵎⴰ ⵢⵓⵜⵉⵏ ⵚⴹⵉⵚ ⵉⵢⵢⵉⵔⵏ, ⴰⵔ ⴳⵉⵙ ⵉⵜⵜⵥⴰⵍⵍⴰ ⵙ ⵎⴷⴷⵏ, ⵉⵙⵙⵃⴹⵕ ⵉ ⵡⴰⵛⵜⴰⵍ, ⴼⵔⵓⵏ ⴰⵙ ⴳ ⵜⵎⵔⴰⵔⵓⵜ ⵙ ⴽⵔⴰ ⵏ ⵜⵉⵔⴰⵎ ⴷ ⵢⴰⵏ ⵓⵏⵙⵓ ⵏ ⵉⵇⴰⵕⵉⴹⵏ ⴳ ⵓⵙⴳⴳⵯⴰⵙ ⵓⵔ ⴱⴰⵀⵔⴰ ⵉⴳⴳⵓⵜⵏ ⴷ ⵜⴼⴰⵙⴽⴰ ⵜⵍⵍⴰ ⴼ ⵓⵙⵎⵎⵉⴳⵍ ⵏⵏⵙⵏ. ⵉⵙ ⴽⴰ ⵎⴰⵢⴰⵏⵏ ⵓⵔ ⵜ ⵉⴳⵓⵎ, ⵉⴼⵜⴰ ⵙⵓⵍ ⴰⵔ ⵉⵙⵉⴳⴳⵉⵍ ⴽⵔⴰ ⵏ ⵜⴰⵡⵓⵔⵉ, ⵢⴰⴼ ⵢⴰⵜ ⴳ ⵓⴳⴰⴷⵉⵔ, ⴳ ⵢⴰⵜ ⵜⵍⵎⵅⴱⴰⵣⴰⵜ ⵖⵉⵏⵏ, ⵉⵙⵡⵓⵔⵉ ⴳⵉⵙ ⴳ ⵓⵥⵓⵥⴹ ⴰⴷ ⵙⵓⵍ ⵢⴰⴼ ⵎⴰ ⵜⵜ ⵢⵓⴼⵏ. ⵍⵍⵉⴳ ⵜⵜ ⵉⵙⴰⵍⴰ, ⵉⴽⴽⴰ ⵜ ⵉⵏⵏ ⴰⵔ ⵉⵏⵏⴰⵔ ⵜⴰⵎⵎⴰⵔⴰ ⵏ ⵜⵡⵓⵔⵉ ⵏⵏⵙ ⵙ ⵉⵔⵉⵔ ⵏ ⵎⴰ ⵢⴰⴷⵍⵍⵉ ⵉⵏⴹⵎ ⴳ ⵓⵎⴰⵔⴳ, ⵢⴰⵏ ⵡⴰⵙⵙ ⵉⵙⵙⴼⵍⴷ ⴰⵙ ⵢⴰⵏ ⵓⵔⴳⴰⵣ ⵉⵙⵎ ⴰⵙ "ⵃⵎⴰⴷ ⴱⵍⵄⵟⵕⵉ" ⵉⴹⵕ ⴳ ⵜⴰⵢⵔⵉ ⵏ ⵓⵎⴰⵔⴳ ⴰⵏⵏ. ⵉⵙⵇⵙⴰ ⵜ ⵎⴰⵏⵡⴰ ⴰⴷ ⵉⵏⴹⵎⵏ ⵉⴷ ⵡⴰⵏ ⵜⵉⴳⵓⵔⵉⵡⵉⵏ ⴰⵏⵏ ⵓⵔ ⵉⴼⵍⵉⵙ ⵉⵙ ⴷ ⵎⴰⴷ ⵉⴽⴽⴰⵏ ⵉⵎⵣⴳⴰⵏ ⵏⵏⵙ ⵓⵔ ⵉⴳⵉ ⴰⵎⵔ ⵡⵉⵏ ⵚⴰⵍⵃ ⵍⴱⴰⵛⴰ ⵙ ⵓⴳⴰⵢⵢⵓ ⵏⵏⵙ. ⵍⵍⵉⴳ ⵉⵙⵙⵏ ⵎⴰⵢⴰⵏⵏ, ⵉⵙⵙⴳⵔⴼ ⴰⵙ ⴰⴷ ⵉⴽⵛⵎ ⴰⵎⴰⴹⴰⵍ ⵏ ⵜⵥⵓⵕⵉ ⵏ ⵢⵉⵔⵉⵔ, ⴰⵛⴽⵓ ⴰⵢⵍⵍⵉ ⵉⵜⵜⴰⵔⴰ ⵢⵓⵜⵉ ⴱⴰⵀⵔⴰ ⴳ ⵓⵙⵡⵉⵔ ⴰⵢⵍⵍⵉ ⵉⵜⵜⵎⵓⵙⵙⵓⵏ ⴳ ⵓⴳⴰⴷⴰⵣ ⵏ ⵓⵎⴰⵔⴳ ⴰⵎⴰⵣⵉⵖ ⵏ ⵕⵕⵡⴰⵢⵙ ⵏ ⵍⵊⴷⵉⴷ ⴰⴽⵓⴷⴰⵏⵏ. ⴷ ⵖⵉⴷ ⴰ ⴳ ⵏⵉⵜ ⵜⵙⵙⵏⵜⵉ ⵜⵡⴰⴷⴰ ⵜⴰⵏⴰⵥⵓⵕⵜ ⵏ ⵓⵏⴰⵥⵓⵕ ⵚⴰⵍⵃ ⵍⴱⴰⵛⴰ ⵍⵍⵉ ⵓⵔ ⵊⵊⵓ ⵉⵙⵙⵏⵜⵍ ⵜⴰⵢⵔⵉ ⵏⵏⵙ ⵉ ⵕⵕⴰⵢⵚ ⵎⵇⵇⵓⵔⵏ ⵎⴱⴰⵕⴽ ⴰⵢⵙⴰⵔ ⴷ ⵢⵉⴹⵉⵚ ⵏⵏⵙ ⴼⵍⵍⴰⵙ. ⴷ ⵢⵓⵔⴰ ⵉ ⵜⵓⴳⴷⵜ ⵏ ⵉⵏⴰⵥⵓⵕⵏ ⵣⵓⵏ ⴷ: ⵓⴷⴰⴷⴰⵏ, ⵉⵜⵔⴰⵏ ⵏ ⴰⵢⵜ ⴱⴰⵄⵎⵔⴰⵏ (ⵏⵓⵊⵓⵎ ⴰⵢⵜ ⴱⴰⵄⵎⵕⴰⵏ), ⴷ ⵜⵓⴳⴷⵜ ⵏ ⵉⵏⴰⵥⵓⵕⵏ ⴷ ⵜⵔⵓⴱⴱⴰ ⴰⵔ ⵓⴽⴰⵏ ⵙⵓⵔ ⵜⵜⴰⵍⵙⵏ ⵉ ⵓⵎⴰⵔⴳ ⵏⵏⵙ ⴷ ⵜⵍⵖⴰⵜⵉⵏ ⵏⵏⵙ ⵙ ⵖⵉⵍⴰⴷ.
ⴳ ⵓⵣⴰⵣⵓ ⴰⵥⴰⵡⴰⵏ ⴷⴰⵜ ⴷ ⴹⴰⵕⵜ ⵏ ⵜⵙⵓⵙⵏⵜ ⵏⵏⵙ ⴳ 2004 ⴷⴰⵔⵙ ⵜⵓⴳⴷⵜ ⵏ ⵜⵉⵙⴼⵉⴼⵉⵏ, ⴷ ⵉⴷⵔⵓ ⴳ ⵜⵓⴳⴷⵜ ⵏ ⵉⵍⵎⵓⴳⴳⴰⵔⵏ ⴷ ⵉⵡⵉⵣⵏ.
ⵉⴳⴰ ⵢⴰⵏ ⵓⵏⴰⵥⵓⵕ ⴰⵎⴰⴷⴰⵏ ⵉⵄⵣⵣⴰ ⴱⴰⵀⵔⴰ ⴷⴰⵔ ⵓⴳⴷⵓⴷ ⵏⵏⵙ. ⵜⵜⵓⵢⵙⴽⴰⵔ ⵜ ⴳⵉⵙ ⵎⵏⵏⴰⵡ ⵏ ⵜⴽⴽⴰⵍ ⵙⴳ ⵉⵙⵡⵓⴷⴷⵓⵜⵏ ⵏⵏⴰ ⴳ ⵜ ⵉⵏⵏ ⵉⴽⴽⴰ ⴷⴰ ⴳⵉⵙⵏ ⵉⵙⵡⵓⵔⵉⵏ, ⴰⵢⴰⵏⵏ ⴰ ⵖⴼ ⵉⴷⴷⵔ ⴽⵔⴰ ⵏ ⵓⵙⵙⴰⵏ ⵜⴰⵙⵙⴰⵙⵉⵏ ⴳ ⵜⵙⴳⴰ ⵏ ⵉⴷⵔⵉⵎⵏ, ⵖⵉⵍⴰⴷ ⵉⴳⴰ ⵙⴳ ⵉⵜⵔⴰⵏ ⵏ ⵜⵥⵓⵕⵉ ⵏ ⵉⴼⴼⵓⵙ ⴷ ⴰⵣⵡⵍ ⴰⵎⵣⵡⴰⵔⵓ ⴳ ⵉⵍⵎⵓⴳⴳⴰⵔⵏ ⴷ ⵜⴼⵓⴳⵍⵉⵡⵉⵏ ⵜⴰⵎⴰ ⵏ ⵉⵏⵓⵥⴰⵕⵏ ⵢⴰⴹⵏⵉⵏ ⵣⵓⵏ ⴷ: ⵍⵃⵓⵙⴰⵢⵏ ⴰⵎⵕⵕⴰⴽⵛⵉ, ⵟⵟⴰⵍⴱ ⵍⵎⵥⵓⴹⵉ ⴷ ⵍⵃⵓⵙⴰⵢⵏ ⵟⵟⴰⵡⵙ ⴷ ⵡⵉⵢⵢⴰⴹ.
ⴰⵣⴰⵣⵓ ⴰⵥⴰⵡⴰⵏ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵚⴰⵍⵃ ⵍⴱⴰⵛⴰ ⵉⴳⴰ ⵢⴰⵏ ⵓⵏⴰⵥⵓⵕ ⵉⴼⵍⵏ ⴰⵙⴳⵎⴹ ⵏⵏⵙ ⴳ ⵢⵉⴳⵔ ⵏ ⵜⵎⴷⵢⴰⵣⵜ ⵉⴼⵍ ⵜ ⵓⵍⴰ ⴳ ⵢⵉⴳⵔ ⵏ ⵓⵥⴰⵡⴰⵏ, ⵉⵍⵎⴷ ⵙⴳ ⵕⵕⵡⴰⵢⵙ ⵉⵎⵣⵡⵓⵔⴰ ⴰⵎ ⵎⴱⴰⵔⴽ ⴰⵢⵙⵙⴰⵔ, ⵉⴽⴽⴰ ⵜ ⵉⵏⵏ ⴰⵔ ⵉⵜⵜⵉⵔⵉⵔ ⵙ ⵢⴰⵏ ⵓⵙⵢⴰⴼⴰ ⴰⵏⵢⴰⵍⴽⴰⵎ ⵉ ⴽⵓ ⵎⴰⴷ ⴰⵙ ⵉⵙⴼⵍⴷⵏ, ⵙⵡⴰ ⴳ ⵜⵣⵍⴰⵜⵉⵏ ⵏ ⵜⴰⵢⵔⵉ, ⵉⵎⵉⵔⵙⵏ ⵏ ⵡⴰⵎⵓⵏ, ⵜⵓⴷⵔⵜ ⵜⴰⴽⵓⵢⴰⵙⵙⵜ ⴷ ⵉⵅⵓⴱⵏ ⵏ ⵜⵓⴷⵔⵜ. ⵉⵏⴰⵃⵢⴰ ⵕⵕⴰⵢⵙ ⵚⴰⵍⵃ ⵍⴱⴰⵛⴰ ⵅⴼ ⵉⵏⵓⵥⴰⵕⵏ ⵢⴰⴹⵏⵉⵏ ⵙ ⵡⴰⵏⵢⴰ ⵉⵖⵓⴷⴰⵏ ⵉⵎⵓⵏⵏ ⴷ ⵉⵡⴰⵍⵉⵡⵏ ⵥⵥⴰⵢⵏⵉⵏ ⵙ ⵓⵏⴰⵎⴽ ⴷ ⵜⵓⵜⵍⴰⵢⵜ ⵉⵣⴷⵉⴳⵏ, ⴰⵢⴰⵏⵏ ⴰ ⵖⴼ ⵜ ⵉⵃⵎⵍ ⵓⴳⴷⵓⴷ ⵏⵏⵙ ⵍⵍⵉⴳ ⵉⵙⵎⵓⵏ ⵡⵉⵍⵍⵉ ⵃⵎⵍⵏ ⴰⵏⵢⴰ ⴷ ⵓⵀⵉⵢⵢⴰⴹ, ⴷ ⵡⵉⵍⵍⵉ ⵃⵎⵍⵏⵉⵏ ⵜⴰⵎⴷⵢⴰⵣⵜ ⴷ ⵉⵡⴰⵍⵉⵡⵏ ⵙ ⵓⵏⴰⵎⴽ. ⵉⵙⵙⵏⵜⵉ ⵓⵣⴰⵣⵓ ⵏⵏⵙ ⴳ ⵓⵙⴳⴳⵯⴰⵙ 1996 ⵙ ⵡⴰⴽⴰⵎ ⵏ ⵢⴰⵏ ⵓⵎⴷⴷⵓⴽⴽⵯⴰⵍ ⵏⵏⵙ ⵜⴳ ⵓⵍⴰ ⴰⵙⵏⵜⵉ ⵏ ⵜⴰⵢⵔⵉ ⵏ ⵉⵎⵙⴼⵍⵉⴷⵏ ⵏⵏⵙ ⵍⵍⵉ ⵓⵔ ⵃⵚⵉⵕⵏ ⴳ ⵜⵎⵏⴰⴹⵜ ⵍⵍⵉⴳ ⵉⵍⵓⵍ ⵎⴰⵛⴰ ⵜⴷⴷⴰ ⵙ ⵉⴼⴼⵓⵙ ⴰⴽⴽⵯ ⴷ ⵡⴰⵎⵓⵔ ⵏ ⵍⵎⵖⵔⵉⴱ ⵙⵍⴰⵡⵏ ⴰⴽⴽⵯ ⴹⴰⵕⵜ ⵏ 2004, ⵉⴳ ⴷⵖⵉ ⵢⴰⵏ ⵓⵙⴰⵖⵓⵍ ⵏ ⵓⵎⴰⵔⴳ ⴷ ⵜⵥⵓⵕⵉ ⴷ ⵢⴰⵏ ⵓⵎⴷⵢⴰ ⴹⴼⴰⵕⵏ ⵜ ⵉⴷ ⵜⵓⴳⴷⵜ ⵏ ⵉⵏⵓⵥⴰⵕⵏ ⵉⵄⵔⵔⵉⵎⵏ ⴷ ⵜⵔⴰⴱⴱⵓⵜⵉⵏ. ⵎⵇⵇⴰⵔ ⵉⵍⴽⵎ ⵚⴰⵍⵃ ⵍⴱⴰⵛⴰ ⵜⴰⵎⵙⵓⵙⵏⵜ ⴰⵏⵏ ⵉⵖⴰⵎⴰ ⴱⴷⴷⴰ ⵢⴰⵏ ⵓⴼⴳⴰⵏ ⴳ ⵜⴳⴰⵎⴰⵜ ⵏⵏⵙ ⵡⴰⵔ ⵛⵉⴽⵉ, ⵉⵃⵎⵍ ⴰⴳⴷⵓⴷ ⵏⵏⵙ ⵃⵎⵍⵏ ⵜ ⵓⵍⴰ ⵏⵜⵜⵏⵉ.
ⵉⵙⴼⴼⵓⵖ ⴷ ⵚⴰⵍⵃ ⵍⴱⴰⵛⴰ ⵓⴳⴳⴰⵔ ⵏ 16 ⵏ ⵡⴰⵍⴱⵓⵎ ⴷ 4 ⵏ ⵜⵉⵙⴼⵉⴼⵉⵏ, ⴳⴰⵏ ⴰⵙⴰⵖⵓⵍ ⴷ ⵓⵖⵎⴰⵍⵓ ⵏ ⵜⵣⵍⵉⵜ ⵜⴰⵎⴰⵣⵉⵖⵜ ⵜⴰⵎⵜⵔⴰⵔⵜ ⴳ ⵡⴰⵏⴰⵡ ⵏ ⵜⵉⵕⵕⵓⵢⵙⴰ ⵏⵖ ⵜⵥⵓⵕⵉ ⵜⴰⵎⴰⵣⵉⵖⵜ ⵙ ⵓⵎⴰⵜⴰ[3].
ⵉⵎⵉⵔⵙⵏ ⵉⵏⴰⵎⵓⵔⵏ ⴷ ⵜⴰⵙⵇⵙⴰⵢⵜ ⵜⴰⵎⴰⵣⵉⵖⵜ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵉⴳⴰ ⵓⵏⴰⵥⵓⵕ ⵚⴰⵍⵃ ⵍⴱⴰⵛⴰ ⵢⴰⵏ ⵓⵎⴷⵢⴰⵣ ⵉⵜⵜⵢⵓⵙⵙⴰⵏⵏ ⵙ ⵉⵡⴰⵍⵉⵡⵏ ⵏⵏⵙ ⴷ ⵜⵎⴷⵢⴰⵣⵉⵏ ⵅⴼ ⵜⴰⵢⵔⵉ ⴷ ⵓⵖⴷⵊⴰⵊ,[4] ⵎⴰⵛⴰ ⵎⵇⵇⴰⵔ ⵎⴽⴰⵏⵏ, ⴰⵏⴰⵥⵓⵕ ⴰⴷ ⵓⵔ ⵉⵜⵜⵓ ⵉⵎⵉⵔⵙⵏ ⵍⵍⵉ ⵉⵣⴷⵉⵏ ⵙ ⵓⴼⴳⴰⵏ ⴰⵎⴰⵣⵉⵖ ⴳ ⵜⵙⴳⴰ ⵏ ⵜⴷⵎⵙⴰ ⵓⵍⴰ ⵜⴰⵙⵇⵙⴰⵢⵜ ⵜⴰⵎⴰⵣⵉⵖⵜ, ⵍⵍⵉⴳ ⵉⵙⴰⵡⵍ ⴽⵉⴳⴰⵏ ⵅⴼ ⵜⴰⵎⵓⵏⵜ ⵏ ⵉⵎⴰⵣⵉⵖⵏ ⴷ ⵉⴼⴽⴰ ⵓⵍⴰ ⵉⵙⵇⵙⵉⵜⵏ ⵉ ⵓⵡⴰⵏⴽ ⵅⴼ ⵉⵣⵔⴼⴰⵏ ⵏ ⵜⵓⵜⵍⴰⵢⵜ ⴷ ⵜⴷⵍⵙⴰ ⴳ ⵜⵙⴼⵉⴼⵉⵏ ⵏⵏⵙ.
ⴳ ⵜⵙⴳⴰ ⵢⴰⴹⵏⵉⵏ ⵉⵙⴰⵡⵍ ⵓⵍⴰ ⵅⴼ ⵉⵎⵉⵔⵙⵏ ⵉⵏⴰⵎⵓⵔⵏ ⴰⵎ ⵓⵙⵙⵎⵖⵔ ⵏ ⵓⴳⵍⵍⵉⴷ ⵏ ⵍⵎⵖⵔⵉⴱ, ⵜⴰⵎⵓⴽⵔⵉⵙⵜ ⵏ ⵜⴰⵏⵣⵔⵓⴼⵜ ⵜⴰⵎⵖⵔⵉⴱⵉⵜ ⵍⵍⵉ ⵉⴳⴰ ⵢⴰⵏ ⵙⴳ ⵉⵎⵏⵣⴰⵖⵏ ⴼⵍⵍⴰⵙ ⴷ ⵉⵙⵓⵔⵙⵏ ⵉⵏⴰⵎⵓⵔⵏ.
ⵜⴰⵏⵏⴰⵢⵜ ⵅⴼ ⵜⴰⵢⵔⵉ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵉⵏⵏⴰ ⵚⴰⵍⵃ ⴳ ⵢⴰⵜ ⵜⵎⴷⵢⴰⵣⵜ ⵏⵏⵙ:
ⵍⵃⵓⴱⴱ ⵉⵙ ⵢⴰⴷⵍⵍⵉ ⴳⵉⵙ ⴽⵔⴰ
ⵓⵔⵔⵉⵖ ⴷ ⴰⴷ ⵏⵥⵕ ⵎⴰ ⵔⴰⴷ ⴰⵖ ⵉⵏⵏⴰ
ⵉⵏⵏⴰ ⵉⵢⵉ ⴰⵎⵏ ⴰ ⵡⴰ ⵙ ⵕⴱⴱⵉ ⵓⵎⴰ
ⵎⵉⵢⵢⴰⵜ ⴰⵍⴼ ⵏ ⵍⴽⵜⴰⴱ ⴰⴷ ⵏⵖⵔⴰ
ⵓⴼⵉⵖ ⵏⵏ ⴳⵉⵙ ⵍⵃⵓⴱⴱ ⵉⵃⵍⴰ
— ⵚⴰⵍⵃ ⵍⴱⴰⵛⴰ
ⵜⴰⴷⵉⵙⴽⵓⴳⵕⴰⴼⵜ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]- ⵉⴳⵉⴳⵉⵍ
- ⵎⴰⴷ ⵉⴳⴰ ⵉⵢⵉ ⵜⵏⵏⵉⵜ ⵚⴱⵕ
- ⵍⵄⴰⵕ ⴰ ⵉⵎⴷⴷⵓⴽⴽⴰⵍ ⵉⵏⵓ
- ⵊⵊⵓⵄ ⵉⵏⵓ ⵖ ⵓⵃⵍⵉⴳ ⵉⵏⵓ
- ⴰⴷ ⴽ ⵓⵔ ⵉⵙⵙⴼⵕⵃ ⵛⵛⴱⴰⴱ ⴰⵜⵉ ⴰⵄⴽⴽⴰⵣ ⴰ ⴼ ⵔⴰⴷ ⵜⴽⵏⵓⵜ
- ⴰⵔ ⵉⵜⵜⵉⵍⵉ ⵢⴰⵏ ⵡⴰⵙⵙ
- ⵓⵍ ⵉⵏⵓ ⵜⴳⵉⵜ ⵉⴳⵣⵎⴰⵏ
- ⵢⴰⵕⴱⴱⵉ ⵙⵙⴰⵍⴰⵎⴰ / ⴰ ⵕⴱⴱⵉ ⵙⵙⴰⵍⴰⵎⴰ
- ⵕⵡⴰⵃ ⴰ ⵡⴰ ⴷⴰⵔ ⵍⵇⵇⴰⴹⵉ ⵙ ⵜⵉⴽⵉⵡⵉⵏ
- ⴰⵊⵊ ⵡⴰⵏⵏⴰ ⵉⵙⴰⵡⴰⵍⵏ
- ⵉⵏⵉ ⴰⵙ ⵜ
- ⵓⵔ ⵉⵜⵜⵢⴰⵎⴰⵕ ⴰ ⴰⵢⵢⵉⵙ
- ⵜⵙⵜⴰⵀⵍⵍⴰⵎ ⴷⴰⵔⵉ
- ⵉⵍⵍⴰ ⵎⴰ ⴷⴰⵔ ⵖⴰⵔ ⵉⵛⵔⵎⵉ
- ⴰ ⵡⴰ ⴰⵡⵉ ⵏⵏ ⴷⴰⵔⵉ ⵅⵜⵜⴰ
- ⵓⵔ ⴳⵉⴳⵉ ⵎⴰ ⵖ ⴰⵔ ⵜⵜⵉⵍⵉⵜ ⴰ ⵍⵀⵎⵎ ⵓⵔ ⴽ ⵔⵉⵖ
ⵉⵙⴰⵖⵓⵍⵏ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]- ^ "كتاب جديد يوثق تجربة الفنان الأمازيغي صالح الباشا". www.hespress.com. Retrieved 2026-02-05.
- ^ تيفي, أكادير (2017-08-19). "كتاب «أبْرِيدْ نْ تْزُورِي» يوثق سيرة الفنان الأمازيغي صالح الباشا". أكادير تيفي (in ⵜⴰⵄⵔⴰⴱⵜ). Retrieved 2026-02-05.
- ^ admin (2015-12-24). "كتاب جديد يوثق تجربة الفنان الأمازيغي صالح الباشا". Hespress - هسبريس جريدة إلكترونية مغربية (in ⵜⴰⵄⵔⴰⴱⵜ). Retrieved 2026-01-03.
- ^ "ⴰⵖⴷⵊⴰⵊ - Wt/zgh - Wikimedia Incubator". incubator.wikimedia.org (in ⵜⴰⵏⴳⵍⵉⵣⵜ). Archived from the original on 2025-11-17. Retrieved 2026-01-03.