ⴼⴰⴹⵎⴰ ⴼⴰⵔⵔⴰⵙ
ⴼⴰⴹⵎⴰ ⴼⴰⵕⴰⵙ, ⵜⴳⴰ ⵉⵍⵍⵉⵙ ⵏ ⴰⵢⵜ ⴰⵎⵎⵔ ⴳ ⵜⵎⴰⵣⵉⵔⵜ ⵏ ⵉⵃⴰⵃⴰⵏ, ⵜⵥⵕⴰ ⵜⵉⴼⴰⵡⵜ ⴰⵙⵙ ⵏ 04 ⵓⴽⵜⵓⴱⵕ ⴳ ⵓⵙⴳⴳⵯⴰⵙ ⵏ 1991, ⵜⵖⵔⴰ ⴳⵉⵙ ⵜⴰⵎⵥ ⵜⵓⴳⴳⴰ ⵏ ⵍⴱⴰⴽⴰⵍⵓⵔⵢⴰ ⴳ ⵓⵙⴳⴳⵯⴰⵙ ⵏ 2010, ⵉⵍⵎⵎⴰ ⵜⵖⵔ ⴳ ⵜⵙⴷⵡⵉⵜ ⵏ ⵉⴱⵏ ⵣⵓⵀⵔ ⵜⴰⵎⵥ ⴳⵉⵙ ⵜⵓⴳⴳⴰ ⵏⵏⵙ ⴳ ⵜⵓⵜⵍⴰⵢⵜ ⵏ ⵜⴰⵄⵔⴰⴱⵜ ⴳ ⵓⵙⴳⴳⵯⴰⵙ ⵏ 2013, ⵉⵍⵎⵎⴰ ⵜⴰⵎⵥ ⴷⴰⵖ ⴰⵛⴱⴰⵔ ⵏ ⵜⵖⵔⵉ ⵜⵙⵏⵜⵉ ⵜⵉⵖⵔⵉ ⵏⵏⵙ ⵓⵙⴰⴽⴰ ⵏ ⵜⵖⵓⵔⵉⵡⵉⵏ ⵜⴰⵎⴰⵣⵉⵖⵜ ⵜⴰⵎⵥ ⴳⵉⵙ ⵜⵓⴳⴳⴰ ⴳ ⵓⵙⴳⴳⵯⴰⵙ ⵏ 2016, ⵓⵔ ⵜⴱⴷ ⴼⴰⴹⵎⴰ ⴼⴰⵔⵔⴰⵙ ⵜⵙⵏⵜⵉ ⵉⵍⵎⵎⴰ ⵜⵉⵖⵔⵉ ⵏⵏⵙ ⵜⵉⴽⵍⵉⵜ ⵢⴰⴹⵏ ⴳ ⵓⵎⴰⵙⵜⵔ ⵜⴰⵎⵣ ⴳⵉⵙ ⵜⵓⴳⴳⴰ ⵏⵏⵙ ⴳ ⵓⵙⴳⴳⵯⴰⵙ ⵏ 2019. ⵜⴳ ⴳ ⵓⵙⴳⴳⵯⴰⵙ ⵏ 2020 ⵜⴰⵎⵣⵔⴰⵡⵜ ⵜⴰⵎⵔⵣⵓⵜ ⴳ ⵓⵙⴰⴽⴰ ⵏ ⴷⴷⵓⴽⵜⵓⵔⴰ ⴳ ⵜⵖⵉⵡⴰⵏⵜ ⵏ ⵜⵙⴽⵍⴰ ⴷ ⵜⵎⴰⵙⵙⴰⵏⵉⵏ ⵜⵉⵏⴰⴼⴳⴰⵏⵉⵏ; ⵜⴰⵙⴷⴰⵡⵉⵜ ⵏ ⵉⴱⵏ ⵣⵓⵀⵔ ⴳ ⵓⴳⴰⴷⵉⵔ. ⵜⴳ ⴰⵡⴷ ⵜⴰⵎⴰⵔⴰⵜ ⵙ ⵜⵎⴰⵣⵉⵖⵜ. ⵢⴰⵜ ⴳ ⵉⵏⴱⴷⴰⴷⵏ ⵏ ⵜⵣⵍⵖⴰ ⵏ ⵉⵎⴰⵔⴰⵜⵏ ⵙ ⵜⵎⴰⵣⵉⵖⵜ ⵜⵉⵔⵔⴰ. ⵜⵉⵡⵉ ⵜⴰⵙⵎⵖⵓⵔⵜ ⵏ ⵍⵎⵖⵔⵉⴱ ⵏ ⵓⴷⵍⵉⵙ ⴳ ⵓⵙⴳⴳⵯⴰⵙ ⵏ 2018؛ ⴰⵏⴰⵡ ⵏ ⵡⴰⵍⵍⴰⵙ ⵉⵜⵜⵢⴰⵔⴰⵏ ⵙ ⵜⵎⴰⵣⵉⵖⵜ. ⵎⴽ ⵍⵍⵉ ⵜⵉⵡⵉ ⵜⴰⵙⵎⵖⵓⵔⵜ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵍⵍⵉ ⵉⵙⵏⵎⴰⵍⴰ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴳ 2016؛ ⴰⵏⴰⵡ ⵏ ⵜⵎⴷⵢⴰⵣⵜ. ⵜⵉⵡⵉ ⴰⵡⴷ ⵜⴰⵙⵎⵖⵓⵔⵜ ⵏ ⵜⵣⵍⵖⴰ ⵏ ⵜⵉⵔⵔⴰ ⴳ ⵓⵙⴳⴳⵯⴰⵙ ⵏ 2015 ⴳ ⵡⴰⵏⴰⵡ ⵏ ⵡⵓⵏⴳⴰⵍ.
ⵢⴰⵏ ⵓⵙⵎⴰⵇⵍ ⴳ ⵓⴷⵍⵉⵙ ⵏⵏⵙ[ⵙⵏⴼⵍ | ⵙⵏⴼⵍ ⴰⵙⴰⴳⵎ]
ⴼⴰⴹⵎⴰ ⴼⴰⵔⵔⴰⵙ ⵜⴳⴰ ⵢⴰⵜ ⵜⵄⵔⵔⵉⵎⵜ ⵉⵙⵜⵉⵏ ⴰⴷ ⵜⵜⴰⵔⴰ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳⵔ ⵜⵓⵜⵍⴰⵢⵉⵏ ⴰⵏⵏ ⵢⴰⴹⵏ ⴰⴼⴰⴷ ⴰⴷ ⵜⵙⵙⵍⴽⵎ ⵉⵙⵢⴰⴼⴰⵜⵏ ⴷ ⵜⵓⴼⵔⴰⵢⵉⵏ ⵏⵏⵙ ⵉ ⵓⴳⴷⵓⴷ ⴰⵎⴰⵣⵉⵖ, ⵎⴰⵢⴰⵏⵏ ⴰⴼ ⵜⵙⵙⵏⵜⵉ ⴰⴱⵔⵉⴷ ⵏⵏⵙ ⵙ ⵓⵏⴳⴰⵍ ⴰⴷ ⴷⴷⴰⵡ ⵓⵛⴹⴰⴹ ⵏ ⵜⵛⴰⴳⴰ ⵏⵏⵎ (2015), ⵉⵍⵎⵎⴰ ⵜⵚⵚⴹⴼⵔ ⴰⵙ ⴷ ⵉⴷⵍⵉⵙ ⵏ ⵢⴰⴹⵏ ⴳ ⵢⵉⴳⵔ ⵏ ⵜⵓⵍⵍⵉⵙⵜ ⵣⵓⵏ ⴷ ⵜⵉⴽⵔⴽⴰⵙ ⴷ ⵓⴳⴳⴰⵔ (2016) ⴷ ⵉⵣⵡⵓⵍⵏ ⵏ ⵜⴼⴼⵓⵖⵍⴰ ⴳ ⵓⵙⴳⴳⵯⴰⵙ ⵏ 2018, ⴳ ⵉⴳⵔ ⵏ ⵜⵎⴷⵢⴰⵣⵜ ⵜⵓⵔⴰ ⵓⴷⴷⵉⵎⵏ ⵏ ⵎⴰⵔⵓⵔ (2016). ⴼⴰⴹⵎⴰ ⴼⴰⵔⵔⴰⵙ ⴳ ⵜⴳⵉⵔⴰ ⵏ ⵉⵙⴳⴳⵯⴰⵙⵏ ⴰⴷ ⵜⵙⴽⵔ ⵢⴰⵜ ⵜⴳⵔⴰⵡⵍⴰ ⴼ ⵓⵏⴳⴰⵍⵏ ⵍⵍⵉ ⴳ ⵜⵓⵔⴰ ⴰⵙⴽⵯⵜⵉ ⵏ ⵜⵍⴽⴰⵡⵜ (2017) ⴷ ⵓⵏⴳⴰⵍ ⵢⴰⴹⵏ ⵉⴳⵯⵏⵜⵔⵏ ⴷ ⵉⴼⴰⵖⵔⵏ (2018), ⴳ ⵜⴳⵉⵔⴰ ⵏ ⵉⵙⵙⴳⵯⴰⵙⵏ ⵍⵍⵉ ⵉⵣⵔⵉⵏ 2020 ⵉⵍⵓⵍ ⴷ ⴷⴰⵔ ⵙ ⵢⴰⵏ ⵓⵏⴳⴰⵍ ⵢⴰⴹⵏ ⵜⴳⴰ ⴰⵙ ⵙ ⵡⴰⵙⵙⴰⵖ ⵉⴱⵉⵡ ⵏ ⵜⴰⵔⵉⵔ ⴷ ⵡⴰⵢⵢⴰⴹ ⵢⴰⴹⵏ ⵜⴳⴰ ⴰⵙ ⵙ ⵡⴰⵙⴰⵖ ⵜⵉⴼⴼⵉⵍⵍⴰ ⵏ ⵜⵎⴰⴳⵓⵙⵜ, ⵜⵉⵣⵉ ⵏⵏⴰ ⵏⴹⴼⵕ ⵜⵉⵔⵔⴰ ⵏ ⵎⴰⵙⵙⴰ ⴰⵔ ⵜⵜ ⵉⵏⵏ ⵏ ⵏⵜⵜⴰⴼⴰ ⵎⴰⵙ ⴷ ⴰⵔ ⵜⵜⴰⵔⴰ ⴳ ⵜⵓⴳⵜⵜ ⵏ ⵉⵙⵏⵜⴰⵍ ⵎⴰⵛⵛ ⴼⴰⴹⵎⴰ ⴼⴰⵔⵔⴰⵙ ⵜⵙⵜⵉ ⴰⴷ ⴱⴰⵀⵔⴰ ⵜⵜⴰⵔⴰ ⴼ ⵜⵡⵜⵎⵜ ⴷ ⵜⵎⵓⴽⵔⵉⵙⵉⵏ ⵍⵍⵉ ⴳ ⴰⵔ ⵜⵏⴳⴳⴹ.
ⴰⵣⵡⵍ ⵉⴳⴰ ⵢⴰⵜ ⵜⵉⵙⵉⵜ ⵍⵍⵉ ⴷ ⵉⵎⵎⴰⵍⵏ ⵎⴰⴷ ⵉⵃⴹⴰⵏ ⴳ ⵜⵉⵔⵔⴰ ⵏ ⵓⴹⵕⵉⵚ ⵉⴳ ⵢⴰⵏ ⵉⵜⵔⵉ ⵉⵎⵎⴰⵍⵏ ⵓⵖⴰⵔⴰⵙ ⵍⵍⵉ ⵢⵓⵎⵥ ⵓⵎⴰⵔⴰ ⴳ ⵜⵉⵔⵔⴰ ⵏⵏⵙ, ⵉⴳ ⴷ ⵏⵓⵙⵉ ⵜⴰⴳⵓⵔⵉ ⵏ ⵓⵛⴹⴰⴹ ⵔⴰⴷ ⴰⵖ ⵜⵎⵎⴰⵍ ⵎⴰⵙ ⴷ ⵉⴳⴰ ⵜ "ⴰⴽⵯⴱⴰ, ⵉⴳⵉⵡⴰⵍ" ⵖⵉⵍⵍⵉ ⴳ ⴰⵔ ⵏⵙⵔⵓⵙ ⴰⵣⵣⴰⵏ ⵜⵉⵣⵉ ⵏⵏⴰ ⵏⵔⴰ ⴰⴷ ⴰⵙ ⵏⴼⴽ ⵜⵉⴱⴱⵉⵜ ⴰⴷ ⵉⵙⵙⵓⵎⵎ ⴰⴽⵯⴼⴰⵢ, ⵜⴰⵛⴰⴳⴰ ⵜⴳⴰ ⵜⵜ "ⵜⵉⵔⴳⵉⵜⵜ, ⵜⴰⴽⴰⵜ" ⵍⵍⵉ ⵉⵏⴳⴹⵏ ⵜⵣⴷⵖ ⴳ ⵡⵓⵍ ⵏ ⴽⵔⴰ ⵏ ⵢⴰⵏ, "ⴷⴷⴰⵡ ⵏ ⵓⵛⴹⴰⴹ ⵏ ⵜⵛⴰⴳⴰ ⵏⵏⵎ" ⵉⴳⴰ ⵢⴰⵏ ⵓⵣⵡⵍ ⵍⵍⵉ ⵉⵎⴰⵍⴰⵏ ⵎⴰⵙ ⴷ ⵓⵏⴳⴰⵍ ⴰⴷ ⵔⴰⴷ ⵉⵙⴰⵡⵍ ⴼ ⵜⵡⵜⵎⵜ ⴷ ⵜⵉⵔⴳⵉⵏ ⴷ ⵓⵥⴱⴱⴰⵕ ⵍⵍⵉ ⵜⵜⴰⵙⵉ ⵙⴳ ⵜⵍⴰⵍⵉⵜ ⴰⵔ ⴽⵉⵖ ⵜⵜ ⵜⵉⵡⵉ ⵜⵎⵜⵜⴰⵏⵜ, ⵉⴳⵉⵡⴰⵍ ⴰⵏⵏ ⵍⵍⵉ ⴳ ⴰⵔ ⴷ ⵜⵜⵙⵙⵓⵎⵓⵎ ⵜⴰⴳⴰⵜ ⴷ ⵜⴰⴽⴰⵜ.
ⵜⵉⵡⵍⴰⴼⵉⵏ ⵍⵍⵉ ⵜⴳⴳⴰⵏ ⵉⵎⵙⵏⴼⵍⵓⵍⵏ ⴳ ⵓⴷⵍⵉⵙ ⵏⵏⵙⵏ, ⴰⵔ ⵜⴰⵙⵉⵏ ⵜⵓⴳⵜⵜ ⵏ ⵉⵏⵓⵎⴰⴽ ⵍⵍⵉ ⵉⵣⴷⵉⵏ ⴷ ⵓⴷⵍⵉⵙ ⵍⵍⵉ ⵜⵓⵔⴰⵏ ⴳ ⵓⴳⵯⵏⵙ ⵏ ⵓⴷⵍⵉⵙ ⵏⵏⵙ , ⵖⵉⴽ ⴰⵏⵏ ⴷ ⵎⴰⵙⵙⴰ ⴼⴰⴹⵎⴰ ⴼⴰⵔⵔⴰⵙ ⵍⵍⵉ ⵉⵙⵜⵉⵏ ⴰⴷ ⵜⴳ ⴳ ⵓⵏⴳⴰⵍ ⵏⵏⵙ ⵢⴰⵏ ⵓⴷⵔⴰⵔ ⴷ ⵢⴰⵜ ⵜⴰⴷⴷⴰⴳⵜ ⵉⵍⵍⴰⵏ ⴰⴽⵍⵓ ⴰⵙⴳⴳⴰⵏ ⴳ ⵎⵏⵉⴷ ⵏⵏⵙ ⵏ ⵢⴰⵜ ⵜⵡⵜⵎⵜ ⴷ ⵢⴰⵏ ⵓⵡⵜⵎ ⵉⵣⴷⵉⵏ ⵜⵉⵏⴼⵓⵔⵉⵏ ⵏⵏⵙ , ⵏⵓⴼⴰⵕ ⴰⴷ ⵏⵉⵏⵉ ⵎⴰⵙ ⴷ ⵜⴰⵡⵍⴰⴼⵜ ⴰⴷ ⴰⵔ ⵜⴰⴽⴽⴰ ⵢⴰⵏ ⵓⵏⴰⵎⴽ ⵎⴰⵙ ⴷ ⵜⴰⵢⵔⵉ ⴳ ⵓⵣⵎⵣ ⴰⴷ ⴰⵔ ⵜⵜ ⵙⵙⵏⵜⴰⵍⵏ ⵓⵔ ⵜⴼⴰⵡ ⵎⴽ ⵍⵍⵉ ⵏⵓⴼⴰⵕ ⴰⴷ ⴰⴽⴽⵯ ⵏⵉⵏⵉ ⵎⴰⵙ ⴷ ⵜⴳⵯⴷⵍ .
ⵜⵙⵜⵉ ⵜⵎⴰⵔⴰⵜ ⴳ ⵓⵏⴳⴰⵍ ⴰⴷ ⴰⴷ ⵜⵜⴰⵔⴰ ⴼ ⵜⵡⵜⵎⵜ ⵍⵍⵉ ⴳ ⵏⵏ ⵜⵥⵍⵉ ⴰⴷ ⵜⴳ "ⵏⴰⵜⵉⵔ" ⵜⴰⵚⴹ ⵜ ⵏ ⵓⵏⴳⴰⵍ ⴰⴷ ⵏⵏⵙⴰⴼⴰⴷ ⴰⴷ ⵜⵙⵙⵍⴽⵎ ⵜⴰⴱⵔⴰⵜ ⵍⵍⵉ ⴼ ⵜⵓⵔⴰ ⴰⴹⵕⵉⵚ ⵏⵏⵙ ⵍⵍⵉ ⴳ ⴰⵔ ⵜⵙⵙⵓⵜⵓⵔ ⴳ ⵜⵎⵖⴰⵔⵜ ⴰⴷ ⵜⵙⴽⵔ ⵜⴰⴳⵔⴰⵡⵍⴰ ⴼ ⵜⵎⵢⵓⵔⵉⵏ ⴷ ⵉⵙⵡⵉⵏⴳⵉⵎⵏ ⵍⵍⵉ ⵉⴳⴰⵏ ⴰⴱⵍⵓⵥ ⴼ ⵜⵡⵜⵎⵜ ⴷ ⵜⵏⵏⴰ ⵎⴰⵙ ⴷ ⵉⵇⵇⴰⵏ ⵜⵜ ⴷ ⴰⴷ ⵜⴰⵍⵍ ⵉⵅⴼ ⵏⵏⵙ ⴷ ⵓⵙⵡⵉⵔ ⵏⵏⵙ ⴳⵔ ⵉⵡⵜⵎⴰⵏ, ⴷ ⵜⴳ "ⵏⴰⵜⵉⵔ ⵉⵍⵍⵙ ⵉⵙⴰⵡⴰⵍⵏ ⴳ ⵓⴷⵖⴰⵔ ⵏ ⵜⵎⵖⴰⵔⵉⵏ ⵍⵍⵉ ⴳ ⵏⵏ ⵜⵓⵏⵏⵉ ⵎⴰⵙ ⴷ ⵓⵍⵜⵎⴰⵙ "ⵜⵉⴼⵢⵓⵔ" ⵜⵡⵙⵙⵔ ⴱⴰⵀⵔⴰ ⴷ ⵜⵏⵖⵓⴱⴰ ⴳⵉⵙ ⵜⵄⵔⵎⴰ ⴷ ⵓⴼⵓⵍⴽⵉ ⴷⴼⴼⵉⵔ ⵎⴰⴷ ⵜⵉⵡⵍ, ⵜⵙⴰⵡⵍ ⴰⵡⴷ ⴼ ⵓⵔⴳⴰⵣ ⵏ ⵓⵍⵜⵎⴰⵙ " ⵍⵎⵓⵙⵟⴰⴼⴰ" ⵍⵍⵉ ⵓⵔ ⵉⵔⴰⵏ ⵜⵉⴼⵔⵅⵉⵏ ⵎⴰⵢⴰⵏⵏ ⴰⴼ ⴷ ⵉⵚⴹⴼⵕ ⵜⴰⵔⵡⴰ ⵢⴰⵏ ⵜⴰⵎⴰ ⵏ ⵡⴰⵢⵢⴰⴹ, ⵓⵔ ⴷ ⵉⵙⵏⵜⴰⵍ ⴰⴷ ⴽⴰ ⴰⴼ ⵜⵙⴰⵡⵍ ⵜⵎⴰⵔⴰⵜ ⵜⵙⴰⵡⵍ ⴰⵡⴷ ⴼ ⵉⵄⵔⵔⵉⵎⵏ ⵍⵍⵉ ⵉⵙⵜⵉⵏ ⴰⴷ ⵎⵓⴷⴷⵓⵏ ⵙ ⵓⵔⵓⴱⴱⴰ ⵙ ⵜⵖⴰⵔⴰⵙⵜ ⵜⵓⵔⵣⴰⴼⵜ, ⴰⵡⴷ ⵜⵙⵜⵉ ⴰⴷ ⵢⵉⵍⵉ ⴳ ⵓⵏⴳⴰⵍ ⵏⵏⵙ ⵢⴰⵜ ⵜⵓⵍⵍⵉⵙⵜ ⵏ ⵜⴰⵢⵔⵉ ⴳⵔ "ⵏⴰⵜⵉⵔ" ⴷ "ⵙⵉⴼⴰⵡ" ⵍⵍⵉ ⵎⵉ ⵓⵔ ⵉⵔⵡⴰⵙ ⵓⵙⵡⵉⵏⴳⵎ ⵉⵡⵜⵎⴰⵏ ⵢⴰⴹⵏ, ⵍⵍⵉ ⴳ ⵉⴼⴽⴰ ⴰⴷⴷⵓⵔ ⵉ ⵜⵡⵜⵎⵜ ⵉⴼⴽ ⴰⵙ ⵢⴰⵏ ⵡⴰⵜⵉⴳ ⴱⴰⵀⵔⴰ ⵉⵎⵇⵇⵓⵔⵏ, ⵎⴰⵛⵛ ⵉⵎⴽⴽⵓⵙⵏ ⵏ ⵡⴰⴽⵓⵛ ⵎⴽ ⵍⵍⵉ ⵙⵙⵜⵉⵏ ⴰⵙⵙⴰⵖ ⴰⴷ ⵉ ⵉⵅⴼ ⵏⵏⵙⵏ ⵜⵍⵍⴰ ⴷⴰⵔⵙⵏ ⵜⵉⵏⵏⴰⵢⵉⵏ ⵢⴰⴹⵏ ⵍⵍⵉ ⴳ ⵏⵏ ⵓⵏⵏⵉⵏ ⵎⴰⵙ ⴷ ⵜⴰⵎⵖⴰⵔⵜ ⵜⴳⴰ ⴰⵄⵓⵕⵉⴹ ⴷ ⵢⴰⵏ ⵓⵛⵎⵓⵜⵉ ⴳ ⵜⵓⴷⵔⵜ ⴰⴷ, ⵎⴰⵢⴰⵏⵏ ⴰⴼ ⴰⵔ ⴳⵉⵙ ⵣⵣⵏⵣⴰⵏ ⴰⵔ ⴳⵉⵙ ⵙⵙⴰⵖⵏ, ⵜⴰⵎⴰⵔⴰⵜ ⴼⴰⵔⵔⴰⵙ ⵜⵙⴽⵔ ⵢⴰⵜ ⵜⴳⵔⴰⵡⵍⴰ ⴳ ⵓⵏⴳⴰⵍ ⴰⴷ ⵍⵍⵉ ⴳ ⵜⵎⵎⴰⵖ ⴰⴷ ⵟⵕⵥ ⵉⵙⴽⵔⴰⴼ ⵏ ⵜⵡⵜⵎⵜ ⵜⴼⵔⵏ ⵉⵙⵡⵉⵏⴳⵉⵎⵏ ⵍⵍⵉ ⵜⵙⵙⵉⴼⵉⴼ ⴰⵍⵍⵉⴳ ⴷ ⵜⵍⵍⴷⵉ ⴰⵥⵎⴰⵢ ⵏ ⵜⵡⵏⴳⵎⵉⵏ.
ⵜⴰⵎⴰⵔⴰⵜ ⵜⵙⴱⵓⵖⵍⴰ ⵓⵏⴳⴰⵍ ⴰⴷ ⵏⵏⵙ ⵙ ⵜⵓⴳⵜⵜ ⵏ ⵜⵡⵍⴰⴼⵉⵏ ⵍⵍⵉ ⵜⵙⵜⵉ, ⵜⵉⵣⵉ ⵍⵍⵉ ⴷ ⵏⴰⵇⵇⵔⴰ ⴰⵔ ⵏ ⴳⵉⵙ ⵏⵜⵜⴰⴼⴰ ⵜⴰⵎⵉⵎⵜ ⴷⴰ ⴽ ⵉⵜⵜⴰⵊⵊⴰⵏ ⴰⴷ ⵜⵎⵎⴰⵖⵜ ⴰⴷ ⵜⵙⵎⴷⵜ ⵜⵉⵖⵔⵉ ⵏⵏⵙ ⴳ ⵎⴰ ⵏⵏ ⵓⵔ ⵢⴰⴳⵓⴳⵏ, ⵜⵣⵓⵣⵣⵔ ⵖⵉⵏⵏ ⵜⵉⴳⵓⵔⵉⵡⵉⵏ ⴰⵔ ⵜⵏⵜ ⴳⵉⵙ ⵜⴽⴽⵔⵣ ⴰⴼ ⴰⴷ ⴰⴷ ⵜⵏⵜ ⵉⵎⵎⴳⵔ ⵉⵎⵖⵔⵉ ⵉⵙⵢⴰⴼⴰ ⵙⵉⵙⵏⵜ.
ⵎⴽ ⵍⵍⵉ ⵏⵏⵙⵏ ⵎⴰⵙ ⴷ ⵎⴰⵙⵙⴰ ⴼⴰⴹⵎⴰ ⴼⴰⵔⵔⴰⵙ ⵜⴳⴰ ⵜⴰⴳⵍⵉⴷⵜ ⵏ ⵜⴳⵓⵔⵉⵡⵉⵏ, ⵜⵓⴳⵎ ⴷ ⵉⵍⵙ ⵏ ⵜⵎⴰⵣⵉⵖⵜ ⵏ ⵜⵎⴰⵣⵉⵔⵜ ⵏⵏⵙ ⵉⵃⴰⵃⴰⵏ ⵜⵙⵙⵏⴳⴹ ⵉⴹⵕⵉⵚⵏ ⵏⵏⵙ ⴳ ⵉⵏⵓⵎⵎⴰⴽ ⴷ ⵜⴳⵓⵔⵉⵡⵉⵏ ⵢⵓⵙⵉⵏ ⵎⴰⴷ ⵉⵥⴹⴰⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵉⵙ ⴷ ⴰⴽⴽⵯ ⵜⵓⵙⵉ ⴽⵔⴰ ⴳ ⵉⵡⴰⵍⵉⵡⵏ ⵍⵍⵉ ⵏⵜⵜⵉⵏⵉ ⴳ ⵜⵓⵜⵍⴰⵢⵜ ⵜⴰⵎⵉⵡⴰⵏⵜ ⵣⵓⵏ ⴷ "ⴼⴼⴰⵖⵏ ⵉⴹⴰⵕⵏ ⵏⵏⵙ ⴰⵛⵡⴰⵔⵉ" ⴷ ⵜⵉⵢⵢⴰⴹ .
ⵜⵙⵜⵉ ⵜⵎⴰⵔⴰⵜ ⴼⴰⵔⵔⴰⵙ ⴰⴷ ⵜⵉⵍⵉ ⵜⵓⵍⵍⵉⵙⵜ ⵏ ⵓⵏⴳⴰⵍ ⴰⴷ ⴳ ⴽⵕⴰⴹ ⵉⴷⵖⴰⵔⵏ, ⴰⵎⵣⵡⴰⵔⵓ ⴳⵉⵙ ⵏ ⵜⵉⵎⵣⴳⵉⴷ ⵍⵍⵉ ⴳ ⴰⵔ ⵜⵎⵚⴰⵡⴰⴹⵏ ⵉⵎⴽⴽⵓⵙⵏ ⵏ ⵡⴰⴽⵓⵛ ⴳ ⵉⴳⴳⵉ ⵏ ⵡⴰⴽⴰⵍ, ⵉⴹⴼⵓⵔ ⵜ ⵉⴷ "ⴰⵙⴰⵍⴰⵢ" ⴷ "ⵜⴰⴼⴰⵛⴳⴰ" ⵉⴷⵖⴰⵔⵏ ⴰⴷ ⴰⴼ ⴰⵔ ⴱⴰⵀⵔⴰ ⵜⵣⵣⵉⴳⵉⵣ ⵜⵓⵍⵍⵉⵙⵜ ⵏ ⵓⵏⴳⴰⵍ ⴰⴷ ⵎⴰⵛⵛ ⵍⵍⴰⵏ ⵡⵉⵢⵢⴰⴹ ⵣⵓⵏ ⴷ "ⵜⴰⵡⵔⵉⵔ" ⵍⵍⵉ ⴱⴰⵀⵔⴰ ⵜⵃⵎⵍ "ⵏⴰⵜⵉⵔ" ⴰⵛⴽⵓ ⵉⴳⴰ ⵢⴰⵏ ⵓⴷⵖⴰⵔ ⵍⵍⵉ ⴳ ⴰⵔ ⵏⵏ ⵜⵜⵎⵉⴳⵉⵔ ⵉⵎⵉⵔⵉ ⵏⵏⵙ "ⵙⵉⴼⴰⵡ" ⴷ ⴰⵡⴷ ⵉⵍⴰ ⵓⴷⵖⴰⵔ ⵏ " ⵜⵃⴰⵏⵓⵜ" ⵉⵍⵍⵉ ⴳ ⴰⵔ ⵜⵜⵎⵉⴳⴳⵉⵔⵏ ⵉⴱⵔⴳⴰⴳⵏ ⵏ ⵜⵎⴰⵣⵉⵔⵜ, ⴰⵔ ⴳⵉⵙ ⵜⵉⴳⴳⵓⵜⵏ ⵉⵡⵏⵏⴰⵏ ⴼ ⵓⴼⴳⴰⵏ.
ⵜⵥⴹⴰⵕⵕ ⴼⴰⴹⵎⴰ ⴼⴰⵔⵔⴰⵙ ⴰⴷ ⵜⵙⵙⵍⴽⵎ ⵜⵉⴱⵔⴰⵜⵉⵏ ⵍⵍⵉ ⵜⵔⴰ ⵙ ⵢⴰⵜ ⵜⵖⴰⵔⴰⵙⵜ ⵉⴼⵓⵍⴽⵉⵏ ⵍⵍⵉ ⵉⵜⵜⴰⵡⵉⵏ ⵉⵎⵖⵔⵉ ⴳⵔ ⵉⵙⴰⴼⴼⵏ ⵏ ⵜⴳⵓⵔⵉⵡⵉⵏ, ⵜⴼⵙⵔ ⴰⴹⵕⵉⵙ ⵏⵏⵙ ⵙ ⵢⴰⵜ ⵜⵖⴰⵔⴰⵙⵜ ⵜⴰⵎⴰⵢⵏⵓⵜ ⵍⵍⵉ ⵉⵥⴹⴰⵕⵏ ⴰⴷ ⵜⵙⴽⵔ ⵢⴰⵜ ⵜⴳⵔⴰⵡⴰⵍⴰ ⴳ ⵓⵏⵏⵍⵉ ⵏ ⵡⴰⵍⵍⵉ ⵜⵜ ⵢⴰⵇⵇⵔⴰⵏ, ⵉⵍⵎⵎⴰ ⵜⵙⵜⵉ ⵉⵙⵏⵜⴰⵍ ⵍⵍⵉ ⵏⵏ ⵜⵓⵏⵏⵉ ⴳⴰⵏ "ⵟⵟⴰⴱⵓ" ⵜⵎⵎⴰⵖ ⴰⴷ ⵜⵏ ⵜⴼⵔⵏ ⵢⴰⵏ ⵙ ⵡⴰⵢⵢⴰⴹ ⴰⵍⵍⵉⴳ ⴷ ⴳⵉⵙ ⵏ ⵜⵍⴷⵉ ⵜⵉⵎⵓⴽⵔⵉⵙⵉⵏ ⵍⵍⵉ ⴳ ⵉⵏⴳⴹ ⵓⵎⵓⵏ ⵏⵏⵖ, ⴼⴰⴹⵎⴰ ⴼⴰⵔⵔⴰⵙ ⵜⵥⴹⴰⵕ ⴱⴷⴷⴰ ⴰⴷ ⵜⴼⴽ ⵉ ⵜⵡⵓⵔⵉ ⵏⵏⴰ ⵜⵙⵜⵉ ⴷ ⴰⵏⴰ ⵜⵙⴽⵔ ⵢⴰⵏ ⵡⴰⵜⵉⴳ ⵎⵇⵇⵓⵔⵏ ⵙ ⵜⵖⴰⵔⴰⵙⵉⵏ ⵍⵍⵉ ⴷ ⵉⵙⵙⴰⵏ ⴳ ⵉⴷⵍⵉⵙⵏ ⵏ ⵓⵎⴰⴹⴰⵍ ⴰⴽⴽⵯ, ⵏⵥⴹⴰⵕ ⴽⵔⴰⵏ ⵡⴰⵙⵙ ⴰⴷ ⵏⵥⵕ ⵜⴰⵎⴰⵔⴰⵜ ⴼⴰⴹⵎⴰ ⴼⴰⵔⵔⴰⵙ ⴳ ⵓⵙⵡⵉⵔ ⴰⵏⵏ ⴰⵎⴰⴹⵍⴰⵏ, ⵎⴰⵛⵛ ⵏⵏⵉⵖ ⵔⴰⴷ ⴱⴰⵀⵔⴰ ⵜⴼⵓⵍⴽⵉ ⵜⵉⵔⵔⴰ ⵏⵏⵙ ⵜⴱⵓⵖⵍⵓ ⵓⴳⴳⴰⵔ ⵜⵉⵣⵉ ⵏⴰ ⵜⴱⴹⴰ ⴷ ⵜⵎⵓⴽⵔⵉⵙⵉⵏ ⵏ ⵜⵎⵖⴰⵔⵉⵏ ⴳ ⵓⵏⴳⴰⵍⵏ ⴰⵏⵏ ⵢⴰⴹⵏ ⵍⵍⵉ ⴷ ⵢⵓⵛⴽⴰ ⵏ ⴳ ⵎⴰ ⵏⵏ ⵓⵔ ⵢⴰⴳⴳⵓⴳⵏ ⴰⵛⴽⵓ ⵜⵉⵣⵉ ⵏⴰ ⵏ ⵜⴻⵜⵜⴰⵔⵔⴰ ⴳ ⵢⴰⵏ ⵓⵙⵏⵜⵍ ⵉⵙ ⴰⵔ ⴷⵉⴷⵏⵖ ⵢⴰⵟⵟⴰ ⵉⵎⵖⵔⵉ ⴰⵛⴽⵓ ⵏⵜⵜⴰⵏ ⴰⵔ ⵜ ⴱⴷⴰ ⵉⵜⵜⴰⵖ ⵉⵔⵉⴼⵉ ⵏ ⵜⵖⵔⵉ ⵏ ⵎⴰ ⴷ ⵉⴳⴰⵏ ⴰⵎⴰⵢⵏⵓ ⴷ ⵎⴰ ⴷ ⵏⵏ ⵓⵔ ⵉⵜⴰⵎ ⴳ ⵓⵎⴰⵔⴰ.
ⵉⵙⴰⵡⵍ ⵎⴰⵙⵙ "ⴱⴰⵀⴰ ⵎⴰⵏⵙⵓⴱ" ⴼ ⵎⴰⵙⵙⴰ ⴼⴰⴹⵎⴰ ⴼⴰⵔⵔⴰⵙ ⵢⵉⵏⵉ ⴼⵍⵍⴰⵙ:
ⵙⵎⵎⵓⵙ ⵏ ⵡⵓⵏⴳⵍⴰⵏ ⵏ ⵜⵏⴳⴳⴰⵍⵜ ⵜⴰⵎⴰⵣⵉⵖⵜ ⵎⴰⵙⵙⴰ ⴼⴰⴹⵎⴰ ⴼⴰⵔⵔⴰⵙ. ⵜⵉⴷⵢⴰⵏⵉⵏ ⵏ ⵡⵓⵏⴳⴰⵍⵏ-ⵏⵏⵙ ⵎⴰⵕⵕⴰ ⵜⵜⵓⵙⴽⴰⵏⵜ ⵖⴼ ⵜⵎⵖⴰⵔⵉⵏ ⴷ ⵉⵎⴷⴰⵏⵏ ⴷ ⵜⵎⴰⵔⵉⵡⵉⵛ ⵏⵏⵙⵏⵜ... ⵜⵜⵜⴳⴳ ⵜⵎⵢⴰⵔⵓⵜ ⴰⵣⵖⴰⵏ ⵉⵏⵎⵏ ⵉ ⵜⵎⵜⵜⵉ ⴳ ⵜⵜⵜⵉⴷⵉⵔ ⵙ ⵜⵓⵜⵍⴰⵢⵜ ⵜⴰⵙⴽⵍⴰⵏⵜ ⵉⵎⵎⵉⵎⵏ. ⴳ ⵜⵉⵔⵔⴰ ⵏⵏⵙ ⴽⵉⴳⴰⵏ ⵏ ⵜⴱⵖⴻⵙⵜ ⴷ "ⵍ'ⴰⵓⴷⴰⵛⴻ". ⴷⴰ ⵜⵔⴷⴷⵎ ⵉⴳⵯⴷⴷⵉⵎⵏ ⵏ ⵙⵉⵙⵙⵓⵎⴳⴰ ⴷ ⵜⵍⴽⴽⴰⵡⵜ ⵍⵍⵉ ⵉⵜⵜⵉⴷⵉⵔ ⵓⴼⴳⴰⵏ ⴰⵎⴰⵣⵉⵖ... ⵓⵏⴳⴰⵍⵏ ⵏⵏⵙ ⵓⴽⵍⴰⵍⵏ ⴰⴷ ⵜⵜⵓⵖⵔⵏ, ⵜⵜⵓⴳⵏⵜ ⵖⵉⴼⵏ ⵜⵣⵔⴰⵡⵉⵏ, ⵉⵜⵜⵓⵍⵎⴷ ⵙⴳⵙⵏ ⵎⴰⵎⴽ ⵜⵜⵜⵢⵉⵔⵉ ⵜⵙⵔⵉⵜ ⵉⵜⵜⴰⵡⵉⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵖⵔ ⴰⴼⵍⵍⴰ...
ⵜⵉⵥⵕⵉⴳⵉⵏ[ⵙⵏⴼⵍ | ⵙⵏⴼⵍ ⴰⵙⴰⴳⵎ]
- 2021: ⵉⴱⵉⵡ ⵏ ⵜⴰⵔⵉⵔ (ⵓⵏⴳⴰⵍ)
- 2020 : ⵜⵉⴼⴼⵉⵍⵍⴰ ⵏ ⵜⵎⴰⴳⵓⵙⵜ (ⵓⵏⴳⴰⵍ)
- 2018 : ⵉⴳⵯⵏⵜⵔⵏ ⴷ ⵉⴼⴰⵖⵔⵏ (ⵓⵏⴳⴰⵍ) ⴷ ⵉⵣⵡⵓⵍⵏ ⵏ ⵜⴼⴼⵓⵖⵍⴰ (ⵜⴰⵡⵛⴽⵉⵏⵜ ⵏ ⵜⵓⵍⵍⵉⵙⵉⵏ)
- 2017 : ⴰⵙⴽⵯⵜⵉ ⵏ ⵜⵍⴽⴽⴰⵡⵜ (ⵓⵏⴳⴰⵍ)
- 2016 : ⵓⴷⴷⵉⵎⵏ ⵏ ⵎⴰⵔⵓⵔ (ⵜⴰⵡⵛⴽⵉⵏⵜ ⵏ ⵜⵎⴷⵢⴰⵣⵜ) ⴷ ⵜⵉⴽⵔⴽⴰⵙ ⴷ ⵓⴳⴳⵯⴰⵔ (ⵜⵓⵍⵍⵉⵙⵉⵏ)
- 2015 : ⴷⴷⴰⵡ ⵓⵛⴹⴰⴹ ⵏ ⵜⵛⴰⴳⴰ ⵏⵏⵎ (ⵓⵏⴳⴰⵍ)
ⵉⵙⴰⵖⵓⵍⵏ[ⵙⵏⴼⵍ | ⵙⵏⴼⵍ ⴰⵙⴰⴳⵎ]
- كتاب جماليات وقضايا في السرد الأمازيغي القصة والرواية، مؤلف جماعي، 2022، منشورات رابطة تبرأ للكتاب الأمازيغي.
- Adlis " tirra n ⵯungal, imsaⵯaln d Ayt ungal s tmaziɣt" 2022, tiẓṛigin n tirra.
- - دراسات في الأدب الأمازيغي الحديث. منشورات رابطة تيرا، 2013.
- قراءات في الرواية الأمازيغية.منشورات رابطة تيرا، 2014.