ⵡⵉⴽⵉⴱⵉⴷⵢⴰ:ⴰⵎⵏⵏⵉ ⵓⴼⵔⵉⵏ/23
ⴰⵃⵡⴰⵛ ⵏ ⵜⴰⵙⴽⵉⵡⵉⵏ ⴷ ⵢⴰⵏ ⵡⴰⵏⴰⵡ ⵏ ⵓⵃⵡⴰⵛ ⴰⵎⴰⵣⵉⵖ, ⵏⵏⴰ ⵙⵓⵍ ⵉⴷⴷⵔⵏ ⴳ ⴳⵔ ⵡⵓⵔⴰⵔⵏ ⵏ ⵎⵉⴷⴷⵏ, ⵢⵉⵍⵉ ⵙⵓⵍ ⴳ ⵉⴼⴼⵓⴳⵍⵓⵜⵏ ⵏ ⵉⵎⴰⵣⵉⵖⵏ ⵉⵣⴷⵖⵏ ⴳ ⵢⵉⵥⵥⵍⵎⴹ ⵏ ⵓⴷⵔⴰⵔ ⵏ ⴷⵔⵏ, ⵎⵇⵇⴰⵔ ⵉⵜⵜⵉⴷⵔⵓⵙ ⵓⵃⵡⴰⵛ ⴰⴷ ⴰⵔ ⵉⵜⵜⵎⵎⵜⴰⵜ ⴳ ⵜⵎⵢⵓⵔⵉⵏ ⵏⵏⵙⵏ. ⵉⴳⴰ ⵓⵃⵡⴰⵛ ⴰⴷ ⵏ ⵜⴰⵙⴽⵉⵡⵉⵏ ⴰⵢⴷⴰ ⴷ ⴼⵍⵏ ⵉⵎⵣⵡⵓⵔⴰ ⵉⵎⴰⵣⵉⵖⵏ ⵉ ⵜⵓⵙⵙⵏⴰ ⵏ ⵓⴼⴳⴰⵏ. ⵜⵉⵍⵉ ⴷⴰⵔⵙ ⵜⵎⴰⵜⴰⵔⵜ ⵉⴳⴳⵓⵜⵏ ⵖ ⵉⵙⴽⴽⵉⵏⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵉⴼⴽ ⵡⴰⵏⴰⵡ ⴰⴷ ⵏ ⵓⵃⵡⴰⵛ ⵜⵓⴳⴳⴰ ⵅⴼ ⴽⵉⴳⴰⵏ ⵏ ⵉⵎⵙⴰⵔⵏ ⵉⵣⵔⵉⵏ ⴳ ⵓⵎⵣⵔⵓⵢ ⵉⵣⴷⵉⵏ ⴷ ⵉⵎⵏⵖⵉ. ⴰⵃⵡⴰⵛ ⵏ ⵜⴰⵙⴽⵉⵡⵉⵏ ⵉⵍⴰ ⴰⴷⴷⵓⵔ ⴰⴽⵙⵡⴰⵜ ⴳ ⵜⵓⵙⵙⵏⴰ ⴷ ⴼⵍⵏ ⵎⵉⴷⴷⵏ ⵏ ⵣⵉⴽ, ⵉⴳ ⵜⴰⵏⴷⵔⴰ ⵏ ⵉⵎⴰⵏ ⵏⵏⵙⵏ ⴳ ⵜⵉⵣⵉ ⵏ ⵉⵎⵏⵖⴰⵏ ⵏⵏⵙⵏ, ⵉⴳ ⴰⵡⴷ ⵜⴰⵖⵍⴰⵖⴰⵍⵜ ⵏⵏⵙⵏ ⴷ ⵉⴽⴽⴰⵏ ⵣⵉⴽⴽ ⵏ ⵜⴰⵙⵓⵜⵉⵏ. ⴰⵃⵡⴰⵛ ⵏ ⵜⴰⵙⴽⵉⵡⵉⵏ ⵜⴳⴰ ⵜ ⵖⵉⵍⴰⴷ ⵢⵓⵏⵉⵙⴽⵓ ⵖ ⵓⵖⴰⵡⴰⵙ ⵏⵏⵙ ⵉⵥⵍⵉⵏ ⵙ ⵡⴰⵢⴷⴰ ⴷ ⴼⵍⵏ ⵉⵎⵣⵡⵓⵔⴰ ⵖ ⵜⵓⵙⵙⵏⴰ ⵏ ⵓⴼⴳⴰⵏ, ⴷ ⵍⵍⵉⵖ ⵉⵔⴰ ⵓⵃⵡⴰⵛ ⴰⴷ ⴰⵃⵟⵟⵓ ⵉⴳⴳⵓⵜⵏ ⵃⵎⴰ ⴰⴷ ⵉⵖⴰⵎⴰ ⵖ ⵜⵎⵢⵓⵔⵜ ⵏ ⵓⴼⴳⴰⵏ ⴰⵎⴰⵣⵉⵖ ⴰⴷ ⵓⵔ ⵉⵎⵎⵜ.
ⴰⵃⵡⴰⵛ ⵏ ⵜⴰⵙⴽⵉⵡⵉⵏ ⴰⵔ ⴰⵖ ⵉⵙⵙⴽⵜⴰⵢ ⴰⵎⵣⵔⵓⵢ ⵏⵏⵖ ⴷ ⵉⵎⵏⵖⴰⵏ ⵉⵣⵔⵉⵏ ⵖ ⵜⵎⵏⴰⴹⵜ ⴰⵏⵏ ⵖ ⵉⵍⵍⴰ ⵡⴰⵏⴰⵡ ⴰⴷ ⵏ ⵓⵃⵡⴰⵛ, ⴷ ⵉⵎⵓⵙⵙⵓⵜⵏ ⵏ ⵜⵓⵏⵏⵓⵏⵜ ⵍⵍⵉ ⴳⵉⵙ ⵉⵍⵍⴰⵏ, ⵍⵍⵉ ⴰⵖ ⵉⵙⵙⴽⵜⴰⵢⵏ ⵜⵉⴷⴷⴰⵙ ⴷ ⵜⵓⵔⵔⴳⵣⴰ ⵏ ⵉⵔⴳⴰⵣⵏ ⴳ ⵢⵉⵎⵏⵖⵉ, ⵉⴳ ⵓⵃⵡⴰⵛ ⵏ ⵜⴰⵙⴽⵉⵡⵉⵏ ⵜⵓⵍⵍⵉⵙⵜ ⵜⵜⴰⵍⵍⵙⵏ ⵎⵉⴷⴷⵏ ⵅⴼ ⵉⵎⵏⵖⵉ ⵍⵍⵉ ⵉⵣⵔⵉⵏ. ⴰⵔ ⵙⵙⴼⴰⵍⵏ ⵉⵎⵓⵙⵙⵓⵜⵏ ⵏ ⵓⵃⵡⴰⵛ ⵏ ⵜⴰⵙⴽⵉⵡⵉⵏ ⵙ ⵜⴰⵖⴹⴼⵜ ⴷ ⵜⵉⴳⴳⵯⴰⵙ ⵃⵎⴰ ⴰⴷ ⴽⵛⵎⵏ ⵉ ⵉⵎⵏⵖⵉ (ⵉⵊⵖⴰⵢⵎ), ⴷ ⵉⴳ ⵏⵏ ⵓⴽⵉⵏ ⵅⴼ ⵓⴼⵏⴰ (ⴰⵙⴽⴽⵓⵔ - ⴱⵓⵜⵙⴽⴰ - ⵃⵔⵔⴽ ⵓⵛⵛⵏ), ⴷ ⵉⵖ ⵓⴽⵉⵏ ⵉⵡⵓⵜⵜⴰ ⴷ ⵉⴹⵕⵕⴰⵚⵏ, ⴷ ⵉⵖ ⴳⴰⵏ ⵉⵎⵏⴰⵢⵏ (ⴰⵀⵢⵢⴰⴹ - ⵍⵎⵉⵣⴰⵏ - ⴱⵊⵊⵔ ⴰⴼⵓⵍⵍⵓⵙ), ⵉⴳ ⴰⵔ ⵜⵜⵍⵍⵉⵏ ⵙ ⵜⵎⴰⵜⴰⵔⵜ ⵉⴼⵍ ⵓⴼⵏⴰ ⴳ ⴹⴰⵕⴰⵜ ⵏⵏⵙ, ⴰⵔ ⵙⵉⵙ ⵜⵜⵍⵍⵉⵏ ( ⴼⵜⵜⵛ ⴰⴽⴰⵍ), ⴷ ⵉⵖ ⵔⵡⵍⵏ ⵏⵉⵖ ⵉⵖ ⵔⴽⵯⵙⵏ (ⴰⵎⴽⵍⴱ - ⵀⵔⴷ), ⴷ ⵉⵖ ⵔⵏⴰⵏ ⵉⵎⵏⵖⵉ ⵉⵎⵎⵜ ⵓⴼⵏⴰ ( ⵓⴼⵓⵖ - ⴰⵙⵙⵓⵙⵙ).