ⵜⵉⴱⵔⴰⵜⵉⵏ ⵏ ⵎⴰⵔⵣⵓⵇ
| ⴰⵙⵓⴼⵖ | ⵜⴰⵔⵉⵇ ⵍⵉⴷⵔⵉⵙⵉ |
|---|---|
| ⴰⵙⵉⵏⴰⵔⵢⵓ | ⵎⵓⵃⴰⵎⵎⴷ ⴱⵓⵣⴳⴳⵓ |
| ⴰⴼⴰⵔⵙ | ⵜⴰⵎⴰⵣⵉⵖⵜ TV |
| ⴰⴱⴷⴷⵉ ⵅⴼ ⵓⴼⴰⵔⵙ | ⵜⴰⵣⵉⵔⵉ ⴱⵕⵓⴷⵉⴽⵙⵢⵓⵏ |
| ⴰⵙⴳⴳⵯⴰⵙ ⵏ ⵡⵓⴼⵓⵖ | 2022 |
| ⵉⵙⵎⴷⴰⵢⵏ | ⵄⴰⴱⴷⵍⵡⴰⵃⵉⴷ ⵣⵣⴰⵡⴽⵉ, ⵎⵉⵎⵓⵏ ⵣⵏⵏⵓⵏ, ⴱⵏⵄⵉⵙⴰ ⵍⵎⵙⵜⵉⵔⵉ, ⵏⵓⵎⵉⴷⵉⴰ (ⵜⴰⵙⵎⴷⴰⵢⵜ), ⵕⴰⵛⵉⴷ ⴰⵎⵄⵟⵓⴽ, ⵀⵓⵢⴰⵎ ⵍⵎⵙⵉⵙⵉ, ⵎⵃⵊⵓⴱ ⴱⵏ ⵙⵙⵉ ⵄⵍⵉ, ⵡⴰⴼⴰ ⵎⵉⵔⴰⵙ, ⵙⴰⵎⵉⵔⴰ ⵎⵚⵍⵓⵃⵉ, ⵄⴰⵍⴰ ⴱⵏⵃⴷⴷⵓ, ⵛⴰⵀⵉⵔⴰ (ⵜⴰⵙⵎⴷⴰⵢⵜ), ⵃⴰⵙⴰⵏ ⴰⵊⵡⴰⵡ, ⵄⴰⴱⴷⵍⵖⵏⵉ ⴱⵓⵃⵎⵉⴷⵉ, ⵉⵙⵍⴰⵎ ⴰⴽⴱⵉⵛⴰ, ⴰⵛⵔⴰⴼ ⵍⵢⴰⵄⵇⵓⴱⵉ |
| ⴰⴽⵓⴷ | 30 ⵏ ⵜⵅⵔⴰⵙⵉⵏ, ⵎⴽⵓⵍ ⵉⵊⵜ ⴷⴳⵙ 25 ⵏ ⵜⵎⵉⵏⵓⵜⵉⵏ |
| ⴰⵙⵎⵉⵍ | ⴷⵔⴰⵎⴰ |
ⵜⵉⴱⵔⴰⵜⵉⵏ ⵏ ⵎⴰⵔⵣⵓⵇ, ⴷ ⵉⵊⵊ ⵏ ⵓⵙⴷⴷⵉ ⴰⵎⴰⵣⵉⵖ ⵙ ⵢⵉⵍⵙ ⵏ ⴰⵔⵉⴼⵉ, ⵉⵙⵙⵏⵜⴰ ⵙⴳ ⵓⵏⴳⴳⴰⵔ, ⵉⵎⵎⴰⵍ ⴰⵏⵖ ⴷ ⵎⴰⵎⴽ ⵖⴰ ⵉⴳⴳⵯⵔⴰ ⴷⴳ ⵉⵊⵊ ⵏ ⵜⵡⵍⴰⴼⵜ ⴷⵖⵢⴰ ⵜⴻⵜⵜⴽ ⵜⵄⴷⴷⵓ, ⵓⵛⴰ ⵉⵜⵜⴷⵡⴰⵍ ⵖⵔ ⵎⴰⵔⵣⵓⵇ ⵉⵇⵇⵉⵎ ⵓⴷⵎ ⴷⴳ ⵓⴷⵎ ⴷ ⵜⵏⴱⴹⴰⵢⵜ (ⵜⴰⵍⵇⴰⴹⵉⵜ), ⵉⵜⵜⴰⵍⵙ ⴰⵙ ⵜⴰⵃⴰⵊⵉⵜ ⵏⵏⵙ, ⵏⵜⵜⴰⵜ ⵜⴻⵜⵜⵙⵇⵇⵙⴰⵜ. ⵙ ⵙⵏⵏⵉ ⵉⵜⵜⵎⵓⵜⵜⵓⵢ ⵣⴳⵏⵖ ⵓⵙⴷⴷⵉ ⴷⵉ ⵜⵅⵔⴰⵣⵉⵏ ⵏⵏⵙ ⵖⵔ ⵜⵡⵍⴰⴼⵉⵏ ⵉ ⵅⴼ ⵉⵜⵜⴰⵍⵙ ⵎⴰⵔⵣⵓⵇ.
ⴷⴳ ⵉⵊⵊ ⵏ ⵓⵙⵓⵏ ⵇⵇⴰⵔⵏ ⴰⵙ ⵜⴰⵎⵔⴰⴱⴹⵜ ⵏ ⵓⵣⵣⵓ, ⴳ ⵜⵓⴷⴷⵎⴰ ⵏ ⵉⴷ 80, ⴷ ⵡⴰⵎⵎⴰⵙ ⵏ ⵉⴷ 90, ⵙ ⵓⵙⵉⴹⵏ ⵏ ⵎⵉⵏ ⴷⴰ ⴰⵏⵖ ⴷ ⵜⵙⵙⵉⵡⴹ ⵜⵡⵍⴰⴼⵜ, ⴰⵥⴰⵡⴰⵏ, ⴰⴷⵉⴽⵓⵔ, ⴷ ⵜⵃⴰⵊⵉⵜ. ⵉⵊⵊ ⵏ ⵡⴰⴽⵓⴷ ⵉⵣⵡⴰⵔ ⵉ ⵜⵜⵉⵍⵉⴼⵓⵏ ⴷ ⵙⵉⵏⵜⴰⵜ. ⴰⴽⵓⴷ ⵏ ⵜⴱⵔⴰⵜⵉⵏ.
ⵎⴰⵕⵣⵓⵇ ⴷ ⴰⴼⴰⴽⵜⵓⵔ ⴰⵎⴰⵢⵏⵓ, ⵢⵓⵙⴰ ⴷ ⵣⵉ ⵜⵎⴷⵉⵏⵜ ⵖⵕ ⵓⵙⵓⵏ ⴰ, ⵎⴰⵏⵉ ⵖⴰ ⵢⴰⴼ ⴰⵟⵟⴰⵚ ⵏ ⵉⵎⵅⵓⵎⴱⴰⵍ, ⴱⴷⴷⴰⵏ ⴷ ⵣⵉ ⵓⵎⵙⵙⵓⴳⵓⵔ ⵏⵏⵙ ⵉⵅⴷⴷⵎⵏ ⴼⴰⵔⵢⴰⴹⵉ, ⵄⴷⴷⴰⵏ ⴷ ⵅ ⵉⵎⵅⵓⵎⴱⴰⵍ ⵏ ⴰⵢⵜ ⴱⴰⴱ ⵏ ⵓⵙⵓⵏ, ⵜⴽⵎⵎⴰⵍⵏ ⵖⵔ ⵉⵎⵅⵓⵎⴱⴰⵍ ⵏⵏⵙ ⵏⵜⵜⴰ, ⴰⴽⴷ ⵜⵎⵖⴰⵔⵜ ⵏⵏⵙ.[1]
ⵜⴰⵡⵍⴰⴼⵜ ⴷ ⵜⵎⵙⵍⵉⵡⵜ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵣⵉ ⵜⵅⵔⴰⵣⵜ ⵜⴰⵎⵣⵡⴰⵔⵓⵜ, ⵜⴻⵜⵜⴱⴰⵏ ⴰⵏⵖ ⴷ ⵜⵡⵍⴰⴼⵜ ⵜⵛⵏⴰ ⴰⵟⵟⴰⵙ, ⴷⴳⵙ ⵉⴽⵯⵍⴰⵏ ⵃⴷⵇⵏ, ⵉⵖⵍⴱ ⵅⴰⵙⵏ ⵓⴽⵍⵓ ⵏ ⵓⵜⵉⵍⵉⴼⵉⵣⵢⵓⵏ ⵏ ⵓⵣⵎⵣ ⵏⵏⵉ. ⵜⴰⵡⵍⴰⴼⵜ ⵜⵎⵎⵡⵛ ⴰⵙ ⴷⴳ ⵓⵙⴷⴷⵉ ⴰ ⵉⵊⵊ ⵏ ⵜⴰⵢⵏⵉⵜ ⵜⵎⵖⴰⵔ, ⵜⴻⵜⵜⵇⴹⵉⵄ ⵎⴰⵏⵉ ⵉⵜⵜⵅⵙⵙⴰ ⴰⴷ ⵜⵇⴹⴰⵄ, ⵜⴻⵜⵜⴽⵛⵉⴼ ⵎⴰⵏⵉ ⵖⴰ ⵜⴽⵛⴼ, ⵜⴻⵜⵜⵊⵊⴰ ⵓⵏⵏⵉ ⵖⴰ ⵉⴼⴼⵓⵔⵊⵏ ⴰⴷ ⵉⵏⵏⵅⴹⴼ ⵖⵉⵔ ⵣⴳⵙ ⵇⴱⵍ ⵎⴰ ⴰⴷ ⴼⴼⵓⵔⵊ ⴷⵉ ⵜⵃⴰⵊⵉⵜ. ⵙ ⵉⵊⵊ ⵏ ⴽⴰⵍⵉⵜⵉ ⵏⵜⵜⴰⴼ ⵜⵉⵡⵍⴰⴼⵉⵏ ⵣⴳ ⵓⵊⵏⵏⴰ ⵎⵎⴰⵍⵏⵜ ⴷ ⵜⵓⵣⵣⴳⵣⵡⵜ ⴷ ⵜⴰⵣⴳⵣⴰⵡⵜ, ⵜⵉⵏⵏⵉ ⵏ ⵢⵉⴹ ⵎⵎⴰⵍⵏⵜ ⴷ ⵉⴹ ⵙ ⵜⴼⴰⵡⵜ ⵏ ⵜⵣⵉⵔⵉ ⵏⵉⵖ ⵙ ⵛⵡⴰⵢⵜ ⵏ ⵜⴼⴰⵡⵜ ⵡⴰⵀⴰ, ⵓⵔ ⵜⵜⵡⴹⴹⵉⵔⵏⵜ ⵜⴼⵔⴰⵣ, ⵓⵔ ⵜⵜⵇⵏⵉⴹⵏⵜ ⵜⵉⵟⵟⴰⵡⵉⵏ.
ⴰⵙⴷⴷⵉ ⵉⵜⵜⵉⵔⴰⵔ ⴷⵉ ⴽⵕⴰⴹ ⴰⵔ ⴽⴽⵓⵥ ⵉⵎⵓⴽⴰⵏ, ⴰⵣⴳⵏ ⴰⵎⵇⵇⵔⴰⵏ ⵏⵏⵙ ⴷⵉ ⴷⵔⵓⵙⵜ ⵏ ⵉⵅⴰⵎⵏ ⵡⴰⵀⴰ: ⵉⵅⴰⵎⵏ ⵏ ⵓⵙⵇⵉⴼ ⵏ ⵉⵎⵣⴷⴰⵖ ⵏ ⴷⴷⵛⴰⵔ, ⴷⵉ ⵍⵍⴰ ⵜⵎⴰⵜⴰⵔⵜ ⵏ ⵍⴱⵏⵉ ⴰⵇⴷⵉⵎ, ⴷ ⵍⴱⵉⵔⵓ ⵏ ⵍⴱⴰⵔⵉⴷ ⵉ ⴷⵉ ⵉⵍⵍⴰ ⵓⴷⵉⴽⵓⵔ ⵏ ⵍⵡⵇⵜ ⵜⴰⵇⴷⵉⵎⵜ, (ⵍⵢⵡⵎⵉⵢⵢⴰ ⵏ ⴱⵓⵉⵄⵉⵢⵢⴰⴷ, ⵜⵜⵙⴰⵡⴰⵔ ⴷ ⵜⵉⵇⴷⵉⵎⵉⵏ, ⵙⵉⵢⵢⵓⵜ, ⴰⵔⵔⴰⴹⵢⵓ, ⵜⵜⵉⵍⵉⴼⵓⵏ …), ⵜⵉⵡⵍⴰⴼⵉⵏ ⵏⵏⵉⴹⵏ ⵏ ⴷⴷⵛⴰⵔ, ⴷⵉ ⵜⵓⵣⵣⴳⵣⵡⵜ, ⵍⴱⵉⵔⵓ ⵏ ⵍⵇⴰⴹⵉ ⴷⵉ ⵜⵎⴷⵉⵏⵜ, ⴷ ⵍⵇⵀⵡⴰ ⵏ ⵜⵎⴷⵉⵏⵜ. ⵜⵉⵡⵍⴰⴼⵉⵏ ⵏ ⵉⵎⵓⴽⴰⵏ ⵎⴰⵏⵉ ⵉⵍⵍⴰ ⵍⵖⴰⵛⵉ ⴰⵟⵟⴰⵙ, ⵓⴷⵔⵓⵙⵏⵜ, ⴰⵎ ⵓⴼⵉⵍⴰⵊ ⵏⵉⵖ ⴱⴰⵔⴰⴷⴰ ⵏ ⵜⴰⴽⵙⵉ. ⵎⴰⵎⵛ ⵏⵜⵜⴰⴽⴰ ⴰⴽⴷ ⵏⵏⴰⵇⵙ ⵣⴳ ⵓⵖⵣⴷⵉⵙ ⵏ "ⵍⵊⵡ ⵏ ⵍⴽⴰⵎⴱⵓ" (ⵜⵉⴼⵓⵇⴰⵏ, ⵉⵢⴰⵥⵉⴷⵏ, ⵜⵉⵖⴰⴹⵉⵏ…).
ⴰⵙⴷⴷⵉ ⴷⴳⵙ ⵜⴰⴷⵡⵍⴰ ⵖⵔ ⵢⵉⵊⵊ ⵏ ⵉⴹⵏⵏⴰⴹⵜ ⵄⵇⵍⵏ ⴰⵙ ⴰⵟⵟⴰⵙ ⵏ ⵉⵡⴷⴰⵏ ⴷⴷⵔⵏ ⵄⴰⴷ. ⵉⵊ ⵏ ⵡⴰⴽⵓⴷ ⵉⴷⴷⵔ ⵉⵜ ⴱⵓⵣⴳⴳⵓ ⵉ ⵜ ⵢⵓⵔⵉⵏ, ⴷ ⵍⵉⴷⵔⵉⵙⵙⵉ ⵉ ⵜ ⵉⵙⵙⵓⴼⵖⵏ, ⴷ ⵛⴰ ⵣⴳ ⵉⵜⴰⵔⵔⴰⵙⵏ ⴷ ⵙ ⵢⵉⵔⴰⵔⵏ. ⵙ ⵓⵢⴰ, ⴽⵙⵉⵏ ⴷ ⴰⵟⵟⴰⵙ ⵏ ⵜⵡⵍⴰⴼⵉⵏ ⵎⴰⵎⴽ ⵜⵏⵜ ⵜⵜⵓⵖⴰ ⴷⵉ ⵍⵡⵇⵜ ⵏⵏⵉ, ⵔⵔⵉⵏ ⵜⴰⵢⵏⵉⵜ ⵉ ⵡⴰⵟⵟⴰⵙ ⵏ ⵜⵎⵙⵍⴰⵢⵉⵏ ⴷ ⵜⵉⵎⵥⵥⵢⴰⵏⵉⵏ, ⵉ ⴷⴰⵏⵖ ⵉⵜⵜⵊⵊⴰⵏ ⵓⵔ ⵏⵜⴻⵜⵜⵜⵓ ⵎⵍⵎⵉ ⴷ ⵎⴰⵏⵉ ⵉⵜⵜⵉⵔⴰⵔ ⵓⵙⴷⴷⵉ ⵢⴰ, ⵡⴰⵅⵅⴰ ⵣⴳⴳⴰ ⵖⴰ ⵏⵜⵜⵓ ⵙ ⵡⴰⵔⵔⵓⴹ ⵉ ⵓⵔ ⵉⵍⵍⵉⵏ ⵏ ⵍⵡⵇⵜ ⵏⵏⵉ (ⵏⵉⵖ ⵓⵔ ⵉⵜⵜⴱⴷⴷⵉⵍⵏ ⴷⵉ ⵛⴰ ⵏ ⵜⵡⴰⵍⴰⵜⵉⵏ), ⵏⵉⵖ ⵉⵎⵅⵓⵎⴱⴰⵍ ⵜⵉⴽⵏⵉⴽ ⵉ ⵅⴼ ⵉⵙⵙⵉⵡⵍ ⵎⴰⵔⵔⴰ ⵡⵉ ⴷⴳ ⵙ ⵉⴼⴼⵓⵔⵊⵏ, ⴰⵎ ⵜⵙⵏⵢⴰⵏⵉⵏ ⵏ ⵜⵜⵔⵉⵙⵉⵏⵜⵉ, ⵏⵉⵖ ⴷ "ⵍⴰⵎⴱⴰⵜ ⵏ ⵜⵜⵔⵉⵙⵉⵏⵜⵉ", ⵉ ⵉⵊⵊⵉⵏ ⵎⴰⵔⵔⴰ ⵉⵡⴷⴰⵏ ⵜⵜⵙⵇⵙⴰⵏ, ⵎⴰⵏⵉ ⵙ ⵉⴷⴷ ⵜⴽⴽⴰ ⵜⴼⴰⵡⵜ ⴷⴳ ⵡⴰⴽⵓⴷ ⵏ ⵜⴱⵔⴰⵜⵉⵏ? ⵎⴰⵛⴰ ⵅⵎⵉ ⵏⵜⵜⴰⴼ ⴰⵙⵎⵍⵓⵙⵙⴰⵏ ⴱⴷⴷⵍⵏ ⴷⴳⵙ ⵉⵎⴹⴰⵏⵏ¸ ⵏⵜⵜⵙⵙⵏ ⴱⵍⵍⵉ ⵡⴰⵅⵅⴰ ⴰⵎⵏⵏⵉ, ⵜⴻⵜⵜⵡⴰⵔⵔ ⵢⵉⵊⵊ ⵏ ⵜⴰⵢⵏⵉⵜ ⵜⵎⵖⴰⵔ ⵉ ⵜⵎⵙⵍⴰⵢⵉⵏ ⵜⵉⵎⵥⵥⵢⴰⵏⵉⵏ.
ⵣⴳ ⵓⵖⵥⴹⵉⵙ ⵏ ⵙⵙⵓⵜ ⵏⵜⵜⴰⴼ ⵄⴰⵡⴷ ⵉⵊⵊ ⵏ ⵜⴰⵢⵏⵉⵜ ⵜⵎⵖⵔ ⵉ ⵍⵃⵙⵙ ⵏ ⵜⵡⵏⵏⴰⴹⵜ. ⵎⴰⵎⴽ ⵏⵜⵜⴰⴼ ⵉⵊ ⵏ ⵜⴰⵢⵏⵉⵜ ⵜⵓⵊⵔ ⵉ ⵉⵣⵍⴰⵏ, ⴷ ⵍⵍⵖⴰ ⵏ ⵣⵉⴽ, ⵍⴰⵍⵍⴰ ⴱⵓⵢⴰ ⵏ ⵍⵡⵇⵜ ⵏⵏⵉ, ⴷⵉ ⵔⵔⴰⴹⵢⵓ, ⵏⵉⵖ ⵙ ⵜⵏⵉⵅⵜ ⵏ "ⵎⵓⵍⴰⵢ" ⴷ "ⵇⴰⵙⵙⵎ". ⵎⴰⵛⴰ ⵉⴹⵉⵚⵏ ⵉⵎⵙⵉⵙⵍⵉⵜⵏ ⵏⵇⵙⵏ ⴰⵟⵟⴰⵙ, ⵊⵊⵉⵏ ⵜⴰⵢⵛⵉⵜ ⵓⵔ ⵜⴻⵜⵜⵉⵡⴹ ⵎⴰⵎⴽ ⵉⵜⵜⵅⵙⵙⴰ ⴰⴷ ⵜⴰⵡⴹ, ⴽⵟⴰⵔ ⵄⴰⴷ ⵜⵉⵅⵔⴰⵥⵉⵏ ⵉⵖⵍⴱ ⵅⴰⵙⵏⵜ ⵢⵉⵊ ⵏ ⵍⵍⵖⴰ, ⵉⵜⵜⴰⵡⵉ ⵉⵜⵔⵔⴰ ⴷⴳ ⵓⵙⴷⴷⵉ ⴰⵎⵏ ⵉⴽⵎⵍ, ⵉⴹⵉⵚⵏ ⵉⵎⵙⵉⵙⵍⵉⵜⵏ ⴷⵉ ⵜⴱⵔⴰⵜⵉⵏ ⵏ ⵎⴰⵔⵣⵓⵇ, ⵏⵉⵖ ⴰⵥⴰⵡⴰⵏ ⵉ ⴷ ⵉⵜⵜⵎⵓⵏⴰⵏ ⴰⴽⴷ ⵓⵅⵉⵢⵢⵇ, ⵍⴼⵔⴰⵃⵜ, ⵜⵉⴳⴳⵯⴷⵉ …, ⵏⵜⵜⴰⴼ ⵉⵜⵜ ⵜⵃⴹⴰⵔ ⴰⵎ ⵓⵔ ⵜⵃⴹⴰⵔ, ⵅⵍⵍⵉ ⵡⴰ ⴷ ⵉⵊⵊ ⵏ ⵓⵎⵅⵓⵎⴱⵍ ⵏⵜⵜⵙⵓⵔⴰ ⴷⴳⵙ ⴷⵉ ⵎⴰⵔⵔⴰ ⵉⵙⴷⴷⴰⵏ ⴷⵉ ⵏⴼⴼⵓⵔⵊ.
ⴰⵖⵏⵏⵉⵊ ⵏ ⴱⴷⴷⵓ ⴷ ⵓⴽⵎⵎⵍ ⵉⵛⵏⴰ, ⵙ ⵜⵏⵉⵅⵜ ⵏ ⴽⴰⵔⵉⵎ ⵍⵎⴰⵔⵙⵉ, ⵉⴳⴳⴰ ⵙ ⵍⵍⵖⴰ ⵏ ⵍⴰⵍⵍⴰ ⴱⵓⵢⴰ ⵏ ⵍⵡⵇⵜ ⵏⵏⵉ. ⵎⴰⵛⴰ ⵜⴰⵎⵓⵙⵉⵇⵜ ⵏⵏⵙ, ⵜⵇⵇⵉⵎ ⴷⴳ ⵢⵉⵊ ⵏ ⵓⴽⵍⴰⵙⵉ ⵓⵔ ⵜⵜ ⵉⵜⵜⵊⵊⵉ ⴰⴷ ⵜⵇⵇⵉⵎ ⴷⵉ ⵍⴱⴰⵍ ⵄⵎⵎⴰⵔⵙ ⴰⴷ ⵜⴻⵜⵜⵡⴰⵜⵜⵓ.[1]
ⵉⵙⵎⴷⴰⵢⵏ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵉⵙⵎⴷⴰⵢⵏ ⵉⴷⵙⵍⴰⵏⵏ ⵢⵉⵔⴰⵔⵏ ⴷⴳ ⵓⵙⴷⴷⵉ ⴰ, ⵏⵜⵜⴰⴼ ⵡⵉ ⵣⵣⴰⴳⵙⵏ ⵉⴳⴳⵉⵏ ⵜⵉⵣⵎⵎⴰⵔ ⵎⵖⵔⵏⵜ ⴰⵟⵟⴰⵙ ⴰⴷ ⵉⵔⴰⵔⵏ ⵎⴰⵎⴽ ⵉⵜⵜⵅⵙⵙ, ⴰⴷ ⴰⵏⵖ ⴷ ⵙⵙⵉⵡⴹⵏ ⵜⵃⴰⵊⵉⵜ ⴰⵎ ⴰⵅⵎⵉ ⵉ ⵜⵜ ⴷⴷⵔⵏ. ⵙ ⵓⵏⵀⵣⵣⵉ, ⴰⵏⵅⴹⴼ, ⵜⵉⴼⵔⴰⵣ, ⴰⵎⵛⵓⴱⴱⵛ, ⵉⵎⵟⵟⴰⵡⵏ…. ⴷⵉⵏ ⵡⵉⴷ ⵉⴽⴽⵙⵏ ⵏⵏⴼⵙ ⴰⵎ ⵀⵓⵢⴰⵎ ⵍⵎⵙⵉⵙⵉ (ⵙⵉⵀⴰⵎ), ⵛⴰⵀⵉⵔⴰ (ⵃⴰⵙⴰⵏⴰ), ⵕⴰⵛⵉⴷ ⴰⵎⵄⵟⵓⴳ (ⵍⴼⵇⵉⵀ). ⵎⵓⵃⵎⵎⴰⴷ ⴱⵏⵙⵄⵉⴷ (ⵍⵎⵇⴷⴷⵎ), ⴱⵏⵄⵉⵙⴰ ⵍⵎⵙⵉⵜⵉⵔⵉ (ⵎⵏⵙⵓⵔ) ⵉⵏⴰ ⵓⵛⵉⵏ ⴰⵙ ⵜⵓⴷⵔⵜ ⵉ ⵓⵙⴷⴷⵉ ⴰ, ⵅⴷⵎⵏ ⵅ ⵜⴼⵔⴰⵣ ⵏⵏⵙⵏ ⴷ ⵜⵎⵉⵊⵊⴰ ⵏⵏⵙⵏ. ⵔⴰ ⴷ ⵉⵙⵎⴷⴰⵢⵏ ⵉ ⵢⵉⵔⴰⵔⵏ ⵓⵙⵉⵏ ⴷ ⴰⴽⵉⴷⵙⵏ, ⵉⵔⴰⵔⵏ ⵜⵏ ⵎⵍⵉⵃ, ⴼⵙⵢⵏ ⴷⴳⵙⵏ.
ⵎⵉⵎⵓⵏ ⵣⵏⵏⵓⵏ, ⵉⵡⵛⴰ ⴰⵟⵟⴰⵙ ⵏ ⵜⴹⵃⵃⴰⴽⵜ ⵉ ⵓⵙⴷⴷⵉ ⵉⵛⵛⵓⵔ ⵙ ⵉⵅⵢⵢⵉⵇⵏ, ⵉⴼⵙⵉ ⴷⵉ ⵜⵉⴱⴱⵓⵀⵍⵢⴰ ⵏ ⵎⵓⵍⴰⵢ, ⴰⵔ ⵎⴰⵏⵉ ⵉⴷⵡⵍ ⵓⵔ ⵜ ⵜⵄⵇⵇⵍⴷ, ⵉⵙⵅⴷⴷⴰⵎ ⴰⴷⴷⵓⴷ ⵏⵏⵙ ⵣⴳ ⵓⵥⵓⵟⵟⵓ ⴰⵔ ⵜⵉⴼⴷⵏⵜ, ⵎⴰⵎⴽ ⵉⴱⴷⴰ ⴰⵎⵏⵏⵉ ⵉⵙⵉⵖⵉ, ⴰⵎⵏⵏⵉ ⵉⴽⵎⵎⵍ, ⵜⵉⵡⵍⴰⴼⵉⵏ ⵉ ⵢⵉⵔⴰⵔ ⵎⵔⵔⴰ ⵇⴰⴷⵏⵜ ⴰⵙ.
ⵄⴱⴷⵍⵡⴰⵃⵉⴷ ⵣⵣⴰⵡⴽⵉ, ⵉⵊ ⵏ ⵓⵏⴰⵥⵓⵕ ⴷ ⴰⵎⵇⵇⵔⴰⵏ, ⵉⵟⵟⴼ ⴰⵙⵎⴷⴰⵢ ⴰⵎⵣⵡⴰⵔ ⵏ ⵓⵙⴷⴷⵉ ⴰ, ⵏⵉⵖ ⵅⴰⵙ ⵉ ⵜⴻⵜⵜⵉⵔⴰⵔ ⴱⵉⵍⵉⴽⵓⵍⴰ, ⵉⵙⵙⵅⴷⵎ ⵜⵉⴼⵔⴰⵣ ⵏⵏⵙ ⴷ ⵜⵎⵉⵊⵊⴰ ⵎⵍⵉⵃ, ⵣⵣⴰⵡⴽⵉ ⵏⴻⵏⵏⵓⵎ ⵣⴳⵙ ⵉⴼⵙⵙⵉ ⴷⴳ ⵜⵉⵍⴰⵍ ⵉ ⵉⵜⵜⵉⵔⴰⵔ, ⵎⴰ ⴷ ⵜⴰⴹⵃⵃⴰⴽⵜ ⵎⴰ ⴷ ⴷⴷⵔⴰⵎⴰ, ⵇⴰⵄ ⴽⵓⵍⵛⵉ ⵉⵙⵙⵏ ⴰⵙ, ⵄⴰⴷ ⵏⵜⵜⴰ ⴷ ⵉⵊⵊ ⵏ ⵓⵏⴰⵥⵓⵕ ⵉⴽⴽⴰ ⴰⵎⵣⴳⵓⵏ, ⵎⴰⵛⴰ ⵜⵖⴷⵔ ⵉⵜ ⵔⵔⵉⵎⵜ ⵏⵏⵙ ⴷⴳ ⵓⵙⴷⴷⵉ ⵢⴰ, ⵓⵔ ⵢⵉⵔⴰⵔ ⵛⴰ ⵎⴰⵎⵛ ⵢⵉⵔⴰⵔ ⴷⴳ ⵉⴼⵉⵔⴰⵏ ⵏ ⵜⵔⴰⵛⵛⴰ, ⴰⵙⵓⵙⵎ ⵉⵏⵇⵇⵏ, ⵏⵉⵖ ⴰⵎⵥⵉⵡⵏ.
ⵄⴰⵍⴰ ⴱⵏⵃⴷⴷⵓ (ⵛⵄⴰⵢⴱ ⴱⵓⵜⵃⴰⵏⵓⵜ), ⵉⵎⵎⴰⵍ ⵉ ⵉⵡⴷⴰⵏ ⵓⵎⵉ ⵉⵜⵜⵄⵊⵉⴱ ⴱⵍⵍⵉ ⴰⵔⵜⵉⵙⵜⴰ ⵏⵉⵛⴰⵏ, ⵉⵙⵙⵏ ⵓⵍⴰ ⵉ ⴷⴷⵔⴰⵎⴰ, ⵓⵔ ⵉⴷ ⵉ ⵜⵃⵓⵊⴰ ⵏ ⵜⴹⵃⵃⴰⴽⵜ ⵡⴰⵀⴰ, ⵉⵅⴷⵎ ⴷⴳ ⵓⵙⴷⴷⵉ ⴰ ⵎⵍⵉⵃ ⵅ ⵡⵓⴷⵎ ⴷ ⵜⵛⵍⵉ ⵏⵏⵙ, ⵅⵎⵉ ⵉⵜⵜⴼⴼⴰⵔ, ⵅⵎⵉ ⵉⵙⵅⴰⵔⵔⵉⵇ, ⵅⵎⵉ ⵉⵜⵜⵅⵢⵢⵇ, ⵏⵜⵜⵡⴰⵍⴰ ⵜ ⵖⵉⵔ ⴷⴳ ⵡⵓⴷⵎ ⵏⵏⵙ, ⴱⵍⴰ ⵎⴰ ⵉⵙⵙⵉⵡⵍ.
ⴰⵟⵟⴰⵙ ⵏ ⴰⵔⵜⵉⵙⵜⴰⵜ ⵏⵏⵉⴹⵏ ⴷ ⵉⵎⵇⵇⵔⴰⵏⵏ ⵓⵔ ⴷⴰⵙⵏ ⵜⵙⴹⵉⵇ ⵛⴰ ⵜⵡⴰⵍⴰⵜ ⴰ, ⴱⴰⵏⴻⵏ ⴷ ⴰⵎ ⴰⵅⵎⵉ ⴷ ⵇⵇⴰⵔⵏ ⵣⵉ ⵜⵡⵔⵉⵇⵜ ⵡⴰⵀⴰ, ⵓⵔ ⴷⴳⵙⵏ ⵏⵥⵔⵉ ⵛⴰ ⴰⵔⵜⵉⵙⵜⴰⵜ ⴷⴳ ⵙⵏ ⵏⵥⴰⵔⵔ ⴷⴳ ⵉⴼⵉⵍⵎⵏ, ⵍⴰ ⵣⴳ ⵉⵏⵏⵉ ⵢⵉⵔⴰⵔⵏ ⵜⵉⵡⵍⴰⴼⵉⵏ ⴷ ⵜⵉⵇⵓⴹⴰⴹⵉⵏ, ⵍⴰ ⵉⵏⵏⵉ ⴷⴷ ⵉⵜⵜⴱⴰⵏⵏ ⴷⵉ ⵜⵅⵔⴰⵥⵉⵏ ⵎⵔⵔⴰ. ⵎⴰⵛⴰ ⵎⴰⵎⵛ ⵏⵔⴱⵃ ⵣⵉ ⵜⴱⵔⴰⵜⵉⵏ ⵏ ⵎⴰⵔⵣⵓⵇ ⵉⵊ ⵏ ⵓⵏⴰⵥⵓⵔ̣ ⵏ ⴷⵔⴰⵎⴰ ⵇⵇⴰⵔⵏ ⴰⵙ ⵄⴰⵍⴰ ⴱⵏⵃⴷⴷⵓ, ⵏⵔⴱⵃ ⴷ ⵓⴷⵎⴰⵡⵏ ⴷ ⵉⵎⴰⵢⵏⵓⵜⵏ ⵉ ⵓⵜⵍⵉⴼⵉⵣⵢⵓⵏ; ⵉⴽⵔ̣ⴰⵎ ⵃⵉⵊⴰⵣⵉ (ⵎⵉⵏⴰ), ⴷ ⴰⵛⵔ̣ⴰⴼ ⵢⴰⵄⵇⵓⴱⵉ (ⵇⴰⵙⵙⵎ) , ⵉ ⵉⵙⵙⵓⴼⵖⵏ ⴷⵉ ⵜⴱⵔⴰⵜⵉⵏ ⵏ ⵎⴰⵔⵣⵓⵇ ⵎⵔⵔⴰ ⵎⵉⵏ ⴷ ⵔⴱⵓⵏ ⴷ ⴰⵍⵎⵎⵓⴷ ⵣⴳ ⵓⵎⵣⴳⵓⵏ.
ⵉⵙⵎⴷⴰⵢⵏ ⵏⵏⵖⵏⵉ, ⵏⵉⵖ ⵉⵎⵙⴱⵔⵉⴷⵏ ⵏ ⵓⵙⴷⴷⵉ, ⴰⵣⴳⵏ ⴰⵎⵇⵇⵔⴰⵏ ⵏⵏⵙⵏ ⴱⴰⵏⴻⵏ ⴷ ⵜⵙⵍⵍⴰⵏ ⵉ ⵜⴱⵔⴰⵜⵉⵏ, ⵏⵉⵖ ⵇⵇⴰⵔⵏ ⴰⵙ ⵉ ⴼⴰⴽⵜⵓⵔ ⵎⵉⵏ ⵖⴰ ⵢⴰⵔⵉ ⵡⴰⵀⴰ. ⴱⴰⵏⴻⵏ ⴷ ⴷⵉ ⵜⵡⵍⴰⴼⵉⵏ ⵙ ⴷⵔⵓⵙⵜ ⵏⵉⵖ ⵙ ⴱⵍⴰ ⴰⵡⴰⵍ, ⴱⵍⴰ ⴰⵟⵟⴰⵙ ⵏ ⵜⵉⵔⴰⵔⵜ, ⵎⴰⵛⴰ ⴷⵉⵏ ⵎⴰⵏⵉ ⴷ ⴱⴰⵏⴻⵏ ⵜⵜⵉⵔⴰⵔⵏ ⴷ ⴱⴰⴱⴰⵙ ⵏ ⵛⴰ ⵏ ⵢⵉⵊⵊⵏ ⵣⴳ ⵉⵙⵎⴷⴰⵢⵏ ⵉⴷⵙⵍⴰⵏⵏ, ⵏⵉⵖ ⵟⵟⴼⵏ ⵛⴰ ⵏ ⵜⵉⵍⴰⵍⵜ ⵜⵎⵖⴰⵔ, ⴰⵎ ⵃⵓⵙⴰⵎ, ⴷⵉⵏ ⵎⴰⵏⵉ ⵜⵜⵓⵖⴰ ⵉⵜⵜⵅⵙⵙⴰ ⴰⵔⵜⵉⵙⵜⴰⵜ ⵙⵙⵏⵏ ⴰⴷ ⵉⵔⴰⵔⵏ, ⵏⵉⵖ ⴽⴽⵉⵏ ⵜⴰⵎⵣⴳⵉⴷⴰ ⵏ ⵓⵎⵣⴳⵓⵏ ⵏⵉⵖ ⵏ ⵓⵜⵍⵉⴼⵉⵣⵢⵓⵏ.[1]
ⵜⵉⵎⵙⴰⵔⵉⵏ ⴷ ⵉⵎⵔⵙⵉⵜⵏ ⵏ ⵓⵙⴷⴷⵉ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵜⵃⴰⵊⵉⵜ ⵏ ⵓⵙⴷⴷⵉ ⵜⵛⵛⵓⵔ ⵙ ⵜⵎⵙⵉⵔⵉⵏ, ⵓⵔ ⵜⵙⵙⵇⵏⵉⴹ, ⵎⵉⵏⵣⵉ ⴷⴳⵙ ⵓⵔ ⵉⴷ ⴷ ⵛⵡⴰⵢⵜ ⵏ ⵉⵎⵓⵏⴰⵙ, ⴰⴷ ⵜⵉⵏⵉⴷ ⵜⵔⴱⵓ ⵉⵎⵅⵓⵎⴱⴰⵍ ⵏ ⵣⵉⴽ ⴷ ⵉⵏⵏⵉ ⵏ ⵢⵉⴹⴰ: ⵜⵜⴰⵄⴷⴷⵓ, ⴰⵙⵃⵇⴰⵔ, ⵜⴰⵙⵖⴰⵔⵜ ⵏ ⵜⵎⵖⴰⵔⵜ, ⵍⵎⵍⴰⴽ ⵏ ⴼⴰⵎⵉⵍⵉⵢⵢⴰ, ⵉⴱⵅⵔⵓⵔⴰⵙ, ⴰⵅⴹⴰⴼ ⵏ ⵉⵃⵏⵊⵉⵔⵏ ⵉⵣⵓⵀⵔⵉⵢⵢⵏ… ⴰⵟⵟⴰⵙ ⵏ ⵉⵎⵅⵓⵎⴱⴰⵍ ⵄⵇⵍⵏ ⴰⵙⵏ ⵉⵡⴷⴰⵏ ⵉⴷⴷⵔⵏ ⴰⴽⵓⴷ ⵏⵏⵉ. ⴰⵟⵟⴰⵙ ⵣⴳⵙⵏ, ⵇⴰ ⵄⴰⴷ ⵓⵙⵓⵏ ⵉⴷⴷⵔ ⴷⴳⵙⵏ. ⴰⵙⴷⴷⵉ ⴰ ⵉⴽⴽⵙ ⵅⴰⵙⵏ ⴰⴼⵔⴰⵢ ⵎⴰⵔⵔⴰ, ⵎⴰⵔⵣⵓⵇ ⵉⵅⵙ ⴰⴷ ⵜⵏ ⵉⴼⴽⴽ ⵎⴰⵔⵔⴰ. ⵎⴰⵛⴰ ⵅⵎⵉ ⵜⵜⴽⵜⴰⵔⵏ, ⵇⵟⵟⵡⵏ ⵣⴳⵏⵖ ⵏⵛⵛⵉⵏ ⵉⵜⵜⴼⵓⵔⵔⵓⵊⵏ ⵉⴼⵉⵔⴰⵏ, ⵓⵔ ⵏⵜⵜⴰⵔⵔⵉ ⵜⴰⵢⵏⵉⵜ ⵓⵍⴰ ⵉ ⵢⵉⵊ ⵏ ⵓⵎⵅⵓⵎⴱⵍ.
ⴷⵉ ⵜⵅⵔⴰⵥⵉⵏ ⴷ ⵢⵉⴹⴼⴰⵔⵏ ⵜⴰⵎⵣⵡⴰⵔⵓⵜ, ⵓⵛⵉⵖ ⴰⴽⴷ ⵎⵖⵔⵉⴷⵓ ⴷⵉ ⵜⴱⵔⴰⵜⵉⵏ ⵏ ⵎⴰⵔⵣⵓⵇ, ⵔⴰ ⴷⵉ ⵍⵇⴰⵍⴱ ⵏ ⵜⵃⴰⵊⵉⵜ, ⵍⴰ ⴷⵉ ⵜⵡⵍⴰⴼⵉⵏ ⵎⴰⵎⴽ ⵜⵜⵉⵔⴰⵔⵏⵜ, ⵎⴰⵏⵉ ⵏⵜⵜⴰⴼ ⴰⵙⵎⴷⴰⵢ ⵉⵙⵙⴰⵡⴰⵍ ⴰⴽⴷ ⵢⵉⵅⴼ ⵏⵏⵙ ⴰⵟⵟⴰⵙ (ⵎⵓⵏⵓⵍⵓⴳ), ⴰⵅⴰⵔⵔⵙ ⵏⵉⵖ ⴰⵡⴰⵍ ⴰⴽⴷ ⵢⵉⵅⴼ, ⵉⵙⵙⵇⵏⵉⴹ, ⵎⴰⵎⴽ ⵉⵣⵣⵓⵣⵣⴰⵔⴰ ⵎⴰⵔⵔⴰ ⵜⵉⴼⵔⴰⵢ ⵏ ⵜⵃⴰⵊⵉⵜ, ⵓⵔ ⴷⴰ ⴰⵏⵖ ⵉⵜⵜⵊⵊⵉ ⴰⴷ ⵏⵅⵔⵔⵙ ⵏⵉⵜ ⴷⵉ ⵎⵉⵏ ⴷ ⵖⴰ ⵢⴰⵙⵏ, ⵓⵔ ⵉⵜⵜⵖⵉⵎⵉ ⵡⴰⵍⵓ ⵉⴼⴼⴰⵔ. ⵏⴷⴷⴰⴽⴽⵯⴰⵍ, ⵏⵙⵙⵏ ⵎⵉⵏ ⴷ ⵖⴰ ⵢⴰⵙⵏ ⴽⵟⴰⵔ ⵣⵉ ⴰⵔⵜⵉⵙⵜⴰ, ⴷⵉ ⵛⴰ ⵉⵎⵓⵛⴰⵏ ⵜⵜⵓⵖⴰ ⵉⵜⵜⵅⵙⵙⴰ ⴰⴷ ⵏⴻⵏⵏⵅⵍⴰⵄ ⵅⵎⵉ ⵖⴰ ⵏⵙⵙⵏ ⵜⵉⴷⵜ.
ⵜⵉⴱⵔⴰⵜⵉⵏ ⵏ ⵎⴰⵔⵣⵓⵇ ⵢⵓⵔⴰ ⵙ ⵡⴰⵡⴰⵍ ⵏ ⵜⴱⵔⴰⵜⵉⵏ ⴽⵜⴰⵔ ⵣⵉ ⵎⵉⵏ ⵢⵓⵔⴰ ⵙ ⵡⴰⵡⴰⵍ ⵉⵣⵉ ⵙⵙⴰⵡⴰⵍⵏ ⵉⵡⴷⴰⵏ ⵍⴱⴷⴰ. ⴷⴳⵙ ⴰⵟⵟⴰⵙ ⵏ ⵜⵛⵓⵏⵉ, ⴷ ⵡⴰⵟⵟⴰⵙ ⵏ ⵜⵎⴰⵣⵉⵖⵜ ⵜⵇⴰⴷ. ⵎⴰⵏⴰⵢⴰ ⵏⴻⵏⵏⵓⵎ ⵉⵜ ⵣⵉ ⵎⵓⵃⵎⵎⴰⴷ ⴱⵓⵣⴳⴳⵓ, ⵉ ⵉⵜⴽⴽⵏ ⵜⵉⵣⵎⵎⴰⵔ ⵎⵖⴰⵔⵏⵜ ⵎⴰⵃⵏⴷ ⴰⴷ ⵉⵡⵛ ⵉⵊⵊ ⵏ ⵍⵇⴰⵍⴱ ⵉⵛⵏⴰ ⵉ ⵜⵎⴰⵣⵉⵖⵜ. ⵏⵜⵜⴰⴼ ⴰⵟⵟⴰⵙ ⵏ ⵡⴰⵡⴰⵍⵏ ⵓⵎⵉ ⵉⵔⵔⴰ ⵜⴰⵢⵏⵉⵜ ⵓⵙⵉⵏⴰⵔⵉⵙⵜ “ⵜⴰⵢⵔⵉ, ⴰⵎⵅⵓⵎⴱⵍ, ⵜⴰⵏⴼⵓⵙⵜ, ⵜⴰⵢⵛⵉⵜ …, ⴰⵟⵟⴰⵙ ⵏ ⵡⴰⵡⴰⵍ ⵏ ⵍⵎⵄⴰⵏⵉ ⵉ ⵉⵜⵜⵔⴰⵃⵏ ⵉⵜⵜⵡⴰⵜⵜⵓ “ⵟⵟⴼⵏ ⵜⵏ ⵉⵥⵔⴰ ⵏⵙⵏ”.
ⴰⵟⵟⴰⵙ ⵏ ⵜⵡⴰⵍⴰⵜⵉⵏ ⵏⵜⵜⴰⴼ ⵉⵡⴰⵍⵏ ⵓⵔ ⵜⵏ ⵙⵅⴷⵎⵏ ⵛⴰ ⴷⴳ ⵡⴰⴷⴷⴰⴷ ⵏⵏⵙⵏ ⵉⵇⴰⴷⵏ, ⴰⵎ «ⴰⴷ ⵔⴰⵃⵖ ⵖⵔ “ⵜⴰⵎⴷⵉⵏⵜ”», «ⵉⵊⵊ ⵏ “ⵜⴰⴱⵔⴰⵜ”», ⵎⴰⵏⵉ ⵙⵙⵇⵙⵉⵖ ⵉⵅⴼ ⵉⵏⵓ, ⵅ ⵡⴰⴷⴷⴰⴷ ⴰⵎⴰⵔⵓⵣ “ⵜⵎⴷⵉⵏⵜ”, “ⵜⴱⵔⴰⵜ”!, ⵅⵍⵍⵉ ⴱⵓⵣⴳⴳⵓ ⴷ ⴰⵎⴰⵔⵉⵔ ⴷ ⴰⵎⵇⵇⵔⴰⵏ, ⵉⵙⵎⴷⴰⵢⵏ ⴰ ⵉ ⵉⴳⴳⵉⵏ ⵉⵥⵏⴱⵉⴹⵏ ⴰ ⵜⵖⵉⵢⵢⵣⵏ ⵜⵎⴰⵣⵉⵖⵜ! ⴷ ⵡⴰⵟⵟⴰⵙ ⵏ ⵢⵉⵡⴰⵍⵏ ⵓⵔ ⵙⵅⴷⵎⵏ ⴷⴳ ⵓⵎⴽⴰⵏ ⵏⵏⵙⵏ ⵏⵉⵛⴰⵏ.
ⵛⴰ ⵏ ⵜⵡⴰⵍⴰⵜⵉⵏ ⵏⵜⵜⴰⵛⴰ ⴱⵍⵍⵉ ⵉⵜⴰⵔⵔⴰⵙⵏ ⴰⵅⵎⵉ ⴷⴷ ⵓⴹⴰⵏ ⵣⴳ ⵓⵊⵏⴻⵏ ⵜⵍⵇⴰ ⵜⵏ ⴷⴷ ⵜⵎⵓⵔⵜ, ⵓⵔ ⵖⵔⵙⵏ ⵃⴷⴷ. ⴰⵎ ⵎⴰⵔⴰⵎ, ⵎⵓⵍⴰⵢ ⵉⵜⵜⵄⴰⵡⴰⴷⵏ ⵅ ⵉⵎⵎⴰⵙ, ⵏⵉⵖ ⵙⵉⵀⴰⵎ ⵜⵎⵎⵓⵜ ⵉⵎⵎⴰⵙ ⵓⵔ ⵜⵜ ⵏⵥⵔⵉ ⵖⵉⵔ ⴷⵉ ⵍⴽⴼⵏ.
ⵖⵔ ⵓⵏⴳⴳⴰⵔ ⵏ ⵜⵃⴰⵊⵉⵜ, ⵉⵎⵅⵓⵎⴱⴰⵍ ⴷⴰⵏⵖ ⴷⴷ ⵉⵊⴱⴷ ⵎⴰⵔⵣⵓⵇ ⵎⴰⵔⵔⴰ, ⵏⵜⵜⴰⵛⴰ ⴰⵟⵟⴰⵙ ⵣⴳⵙⵏ ⵓⵔ ⵏⴼⴽⴽⵏ, ⴰⵟⵟⴰⵙ ⵏ ⵉⵜⴰⵔⵔⴰⵙⵏ ⵜⵃⴰⵊⵉⵜ ⵏⵙⵏ ⵜⵢⵓⵔⴰ ⴰⵎ ⵓⵏⴳⴰⵍ ⵉ ⵜⵜⵓⵖⴰ ⵉⵜⵜⴰⵔⵉ ⵎⴰⵔⵣⵓⵇ, ⵓⵔ ⵏⵙⵙⵉⵏ ⵎⴰⵏⵉ ⵜⵉⵡⴹ.[1]
ⵉⵙⴰⵖⵓⵍⵏ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]- ^ a b c d ⵜⵉⴱⵔⴰⵜⵉⵏ ⵏ ⵎⴰⵔⵣⵓⵇ - ⴰⵙⴷⴷⵉ ⵏ ⵟⴰⵕⵉⵇ ⵍⵉⴷⵔⵉⵙⵉ. ⵎⴰⵊⵉⴷ ⴰⵇⵍⵄⵉ. ⵜⵉⴼⵔⴰⵢ.ⴽⵓⵎ