ⵍⵃⴰⵊⵊ ⵃⵎⴰⴷ ⵓⴳⴷⵓⵔⵜ

ⵉⵡⴰⵍⴰ  ⵍⵃⴰⵊⵊ  ⵃⵎⴰⴷ  ⵓ  ⴳⴷⵓⵔⵜ  ⴰⴼⴰⵔⴰ   ⴳ   ⵜⵇⴱⵉⵍⵜ   ⵏ  ⵉⵙⵉ  ⵉⴳⵏⴰⵏ ⴰⴼⵍⵍⴰ  ⵏ  ⵉⵖⵉⵔ, ⵉⵙⵎ ⵏⵏⵙ  ⴳⴷⵓⵔⵜ ⵢⴰⵙⵉ  ⴰⵙⵙⴰⵖ  ⵏ  ⵓⴼⴰⵔⴰ  ⴰⴷ  ⵎⴰⴷ  ⵉⴽⴽⴰ  ⴳ   ⵜⵓⴷⵔⵜ  ⵏⵏⵙ, ⵎⵇⵇⴰⵔ  ⵉⴳⴰ  ⵡⴰⵙⵙⴰⵖ  ⵏⵏⵙ  ⴰⵡⵊⴰⵡⴰⵏ   "ⴱⵏ  ⵛⵛⵉⵅ" ⵎⴰⵛⴰ  ⵉⵜⵜⵡⴰⵙⵙⴰⵏ  ⵖⴰⵙ  ⵙ   ⵓ  ⴳⴷⵓⵔⵜ, ⵉⵡⴰⵍⴰ  ⵉ   ⵜⵙⴳⴰ  ⴰⴷ  ⵙⴳ  "ⵉⴳⵏⴰⵏ" ⵏⵏⴰ  ⵢⵓⵔⵓⵏ  ⴽⵉⴳⴰⵏ  ⵏ  ⵉⵎⵓⵙⵏⴰⵡⵏ  ⴷ  ⵉⴷ  ⴱⵓ  ⵓⵎⵏⴰⴷ,  ⵍⵍⵉⵖ  ⵜⴰⵥ  ⵉ  "ⵜⵉⵎⴳⴳⵉⴷⵛⵜ" ⵎⴰⵢⴰⵏⵏ   ⴰ   ⴼ   ⴷⴰⵔⵙ  ⵢⵉⴹⵉⵚ  ⵅⴼ  ⵜⵎⵙⴰⵔⵉⵏ  ⴷ  ⵉⵎⵏⵖⴰⵏ   ⵏ  ⵜⵇⴱⵉⵍⵉⵏ  ⴷ   ⵉⵎⵏⵣⴰⵖⵏ   ⴼⴼⵉⵏⵉⵏ   ⵉⴷⴰⵎⵎⵏ  ⴳⵔ  ⵙⵉⴷⵉ  ⵎⵓⵃⵎⵎⴰⴷ   ⵍⵀⴰⵛⵎ, ⴷ  ⵙⵉⴷⵉ  ⵍⵄⵔⴱⵉ, ⴷ ⵙⵉⴷⵉ  ⵍⵃⴰⵏⴰⴼⵉ, ⴷ ⴰⵢⵜ ⵜⵉⵡⴰⴹⵓ, ⵙ ⵜⵡⵉⵙⵉ ⵏ ⴰⵢⵜ ⵅⴱⴱⴰⵛ.

ⵏⵜⵜⴰ ⴷ ⴰⵏⵎⴽⵔⵔⴰ ⵏⵏⴰ ⵉⵙⵜⵉⵏ ⵜⴰⵏⴰⵔⴰ ⵉ ⵡⴰⴼⵓⵍⴽⵉ ⴷ ⵜⵏⴰⴼⵓⵜ ⵏ ⵡⴰⵎⵓⵏ, ⵖⵓⵔⵙ ⴰⵙⵜⴰⵢ ⴳⵔ ⵜⴰⵙⵖⵏⵜ ⵜⴰⵎⴰⵜⵜⴰⵢⵜ ⴷ ⴳⵔ ⵜⵏⴰⵔⴰ, ⵉⵙⵜⵉ ⵜⴰⵎⴳⴳⴰⵔⵓⵜ, ⵙ ⵓⵙⵔⵓⵙ ⵙⴳ ⴷⴰⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵙⵎⵎⵓⵙ, ⵙ ⵓⵎⵣⵡⴰⵔⵓ ⵍⵍⵉⵖ ⵉⵡⴰⵍⴰ ⵉ ⵜⴳⵉⵣⵓⵍⵜ, ⵡⵉⵙ ⵙⵉⵏ ⴰⴷ ⵉⴼⴽ ⵜⴰⴳⴰⵍⵍⵉⵜ ⵏⵏⵙ, ⵉⴳⴳⴰⵍⵍ ⵉ ⵓⵏⴱⴱⴰⴹ ⴰⵙⵔⴷⴰⵙ ‘’ⴷⵓⵛⴰⵕⵊ’’ ⵉⴳ ⴷⴰⵔⵙ ⴰⵏⴽⵔⵓⴼ ⴳ ⵡⴰⵎⵎⴰⵙ ⵏ ⵜⴼⵔⴰⵡⵜ ⵢⵉⵏⵉ ⴰⵙ: ‘’ ⴰⴷ ⵜⵙⵙⵏⵜ ⵎⴰⵙ ⵔⴰⴷ ⴷ ⵢⴰⵛⴽ ⵢⴰⵏ ⵡⴰⵙⵙ ⵔⴰⴷ ⴳⵉⵡⵔⵖ ⴳ ⵓⵙⵖⵉⵎ ⴰⴷ ⵏⵏⴰ ⵜⴳⵉⵡⵔⵜ ⵖⵉⵍ ⴰⴷ’’.

ⴳ ⵢⵉⴳⵔ ⵏ ⵜⵏⵣⴱⴰⵢⵜ ⴷ ⵓⵙⴷⵔⴼⵉ ⵏ ⵍⵎⵖⵔⵉⴱ ⵙⴳ ⵓⵙⴷⵓⵔⵔⵉ ⴰⴼⵕⵏⵙⵉⵙ, ⵉⴱⴷⵔ ⵓⵙⵍⵎⴰⴷ ⵎⵓⵚⵟⴰⴼⴰ ⵍⵄⴰⵍⴰⵡⵉ ⴳ ⵢⴰⵏ ⴳ ⵡⵓⵟⵟⵓⵏⵏ ⵏ ⵓⵖⵎⵉⵙ ‘’ⵍⴽⴰⵡⴰⵍⵉⵙ’’ ⵎⴰⵙ ⴷ ⴰⴼⵔⴷⵉ ⴰⵎⵣⵡⴰⵔⵓ ⵜⵙⵙⵏⵜⵉ ⵙⵉⵙ ⵜⵏⵣⴱⴰⵢⵜ ⵜⴰⵎⵖⵔⵉⴱⵉⵜ ⵉⵜⵜⵓⵙⵖⴰ ⵙ ⵜⴷⵔⵉⵎⵜ ⵏ ⵍⵃⴰⵊⵊ ⵃⵎⴰⴷ ⵓⴳⴷⵓⵔⵜ ⴳ ⵜⵖⵔⵎⵜ ⵏ ⵕⵕⴱⴰⵟ, ⵍⵍⵉⵖ ⵉⴳⴰ ⵢⴰⵏ ⵙⴳ ⵉⵙⴱⴱⴰⴱⵏ ⵉⵜⵜⵢⴰⵡⵙⵙⴰⵏⵏ ⴳ ⵕⵕⴱⴰⵟ ⵉⵥⴹⴰⵕ ⴰⴷ ⵉⵙⵖⵔ ⵢⴰⵡⵉ ⴷ ⴰⵇⵇⵔⵢⴰⵏ ⵏⵏⴰ ⵜⵜ ⵉⵏⵏ ⵉⴽⴽⴰⵏ ⵓⵔ ⵍⵍⴰⵏ, ⴷ ⵓⵙⵏⵖⵓⴱⵓ ⵏ ⵜⵓⴳⵜ ⵏ ⵉⵏⴰⵎⵓⵔⵏ, ⵢⵉⵍⵉ ⴷⴰⵔⵙ ⵓⵏⵢⴰⵍⴽⴰⵎ ⵙ ⵜⵖⵔⴰⵙⵜ ⵏ - ⵜⴰⵎⵓⵏⵜ ⵏ ⵢⵉⴼⴼⵓⵙ - ⵜⴰⵖⵔⴰⵙⵜ ⵏ ⵕⵕⴱⴰⵟ, ⴰⴷ ⵓⵔ ⵏⵜⵜⵓ ⴰⴷ ⴱⴷⵔⵖ ⵎⴰⵙ ⵖⵓⵔⵙ ⵜⴰⵣⴷⴰⵢⵜ ⵙ ⵡⴰⵎⵎⴰⵙ ⵏ ⵜⵏⵣⴱⴰⵢⵜ ⴳ ⵜⴼⵔⴽⴰ ⵏ ⵡⴰⴷ ⵉⴽⵎ ⵜⴰⵙⴳⵉⵡⵉⵏ ⵏ ⵕⵕⴱⴰⵟ, ⵉⵏⵏⴰ ⵓⵎⵖⵏⴰⵙ ⵄⴱⴷⵕⵕⵃⵎⴰⵏ ⵄⴱⴷⵍⵍⴰⵀ ⵚⵚⵏⵀⴰⵊⵉ ⴳ ⵓⴷⵍⵉⵙ ⵏⵏⵙ ‘’ ⴰⵎⵣⵔⵓⵢ ⵏ ⵜⵏⵣⴱⴰⵢⵜ ⴷ ⵜⵙⴷⵔⴰⵙⵜ ⵏ ⵓⵙⴷⵔⴼⵉ ⴰⵎⵖⵔⵉⴱⵉ’’ (ⵜⴰⵙⵏⴰ 20) ‘’ ⵎⴰⴷ ⵉⵎⵙⴰⵔⵏ ⴹⴰⵕⵜ ⵏ ⵓⴱⴰⵇⵇⴰⵢ ⵏ ⵜⵙⵏⴼⵔⵜ ⴳ ⵓⴳⴰⴷⴰⵣ ⴰⵏⴰⵎⵎⴰⵙ ⴳ ⵜⴳⵎⵎⵉ ⵜⵓⵎⵍⵉⵍⵜ? ⵜⵎⵙⴰⵔ ⵜⵖⴰⵡⵙⴰ ⵏⵏⴰ ⴰⴷⵍⵍⵉ ⴽⵚⵓⴹⵖ, ⵍⴱⵓⵍⵉⵙ ⴰⴼⵕⴰⵏⵙⵉⵙ ⵉⵙⵎⵓⵏ ⴰⴽⴽⵯ ⵜⴰⴳⴳⴰⵍⵉⵏ ⴷ ⵜⵣⵎⵎⴰⵔ ⵏⵏⵙ, ⴰⴷ ⵙⵉⵙ ⵉⵙⵙⵏ ⴰⴷⵖⴰⵔ ⵏ ⵓⵙⴰⴽⵯⵏ ⵏ ⵓⵇⵇⵔⵢⴰⵏ ⴷ ⵓⵙⵏⴼⵉ ⵏⵏⵙ, ⵙ ⵜⵉⴷⵜ ⵢⵓⴼⴰ ⵙⵓⵍ ⴰⵎⵎⴰⵙ ⵏ ⵜⵏⵣⴱⴰⵢⵜ ⴳ ⵜⴼⵔⴽⴰ ⵏ ⵡⴰⴷ ⵉⴽⵎ ⵜⴰⵙⴳⵉⵡⵉⵏ ⵏ ⵕⵕⴱⴰⵟ’’.

ⵉⵔⵏⵓ ⵓⵎⵖⵏⴰⵙ ⵄⴱⴷⵕⵕⵃⵎⴰⵏ ⵄⴱⴷⵓⵍⵍⴰⵀ ⵚⵚⵏⵀⴰⵊⵉ ⴳ ⵜⵎⵙⵙⴽⵜⴰⵢ ⵏⵏⵙ (ⵜⴰⵙⵏⴰ 122) ‘’ ⵎⴽⵍⵍⵉ ⵜⵜⵢⴰⵎⴰⵥⵏ ⵓⴼⵔⵉⴷⵏ ⵏ ⵜⵔⴰⴱⴱⵓⵜ ⵢⴰⴹⵏ ⵉⴹⴼⵕⵏ ⵉ ⵜⴳⵔⵓⵎⵎⴰ ⵏ ⵡⴰⴷ ⵉⴽⵎ. ⵖ ⵏⵉⵜ ⵉⵍⵍⴰ ⴰⵢⵜ ⵍⵇⵓⵍ ⵍⵃⴰⵊⵊ ⵍⵃⵓⵙⴰⵢⵏ, ⴷ ⵍⵃⴰⵊⵊ ⵃⵎⴰⴷ ⵓⴳⴷⵓⵔⵜ, ⴷ ⵎⵓⵃⵎⵎⴰⴷ ⵍⵅⵏⴱⵓⴱⵉ, ⴳⵉⵏ ⴰⴽⴽⵯ ⵙⴳ ⵜⵙⴳⴰ ⵏ ⵓⴳⴰⴷⵉⵔ’’ ⵅⴼ ⵓⵙⵜⴰⵢ ⵏ ⵍⵃⴰⵊⵊ ⵃⵎⴰⴷ ⵓⴳⴷⵓⵔⵜ ⵏ ⵜⵏⴰⵔⴰ ⴷ ⵙ ⵓⵙⵔⵓⵙ ⵙⴳ ⴷⴰⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵙⵎⵎⵓⵙ ⵉⵏⵏⴰ ⵓⵙⵍⵎⴰⴷ ⵎⵓⵃⵎⵎⴰⴷ ⵍⵡⴰⴷⵉⵄ ⵍⴰⵙⴰⴼⵉ ⴳ ⵓⴷⵍⵉⵙ ⵏⵏⵙ ‘’ ⵜⴰⵙⴳⴰ ⵏ ⴰⵢⵜ ⴱⴰⵄⵎⵕⴰⵏ’’ (ⵜⴰⵙⵏⴰ 94): ‘’ ⵣⵎⵔⵏ ⵉⵎⴰⵙⴰⵢⵏ ⵏ ⵜⵏⵣⴱⴰⵢⵜ ⴷ ⵜⵙⴷⵔⴰⵙⵜ ⵏ ⵓⵙⴷⵔⴼⵉ ⵜⵉⵣⵉ ⴰⵏⵏ ⴰⴷ ⴰⵎⵥⵏ ⴰⵎⵙⴰⵙⴰ ⵏ ⵉⵎⴰⵙⴰⵢⵏ ⴰⴷ ⵙⵙⵡⵓⵔⵉⵏ ⴽⵉⴳⴰⵏ ⵏⵏⴰ ⵉⵙⵙⵎⵏⵉⴷⵏ ⵜⵉⵎⵏⴽⴰⴷ ⵏⵏⵙⵏ ⵉ ⵉⵡⵜⵜⴰⵙⵏ ⵜⵜⵢⴰⴱⴷⴰⵔⵏⵉⵏ, ⵎⴽⴰⵏⵏ ⴰⴷ ⵉⴳⴰ ⵍⵃⴰⵍⵓⵔ ⵣⵔⵉⵏ ⵖⴰⵙ ⵎⵏⵏⴰⵡ ⵓⵙⵙⴰⵏ ⵢⵉⵍⵉ ⵓⵙⵔⵓⵙ ⵏ ⵓⴼⵔⵉⴷⵏ ⵉⵜⵜⵓⵙⵎⴰⵜⴰⵔⵏ ⴷ ⵉⵎⴰⵡⴰⵢⵏ ⵅⴼ ⵜⵇⴱⵉⵍⵉⵏ ⵙⵙⵓⵜⵍⵏⵉⵏ ⵉ ⵜⵙⴳⴰ ⵉⵙⵖⵏⵙⴰⵏ ⵙⵡⵓⴷⴷⵓⵏ ⵜⵜ ⵙ ⵓⵙⵓⴼⵓ ⴷ ⵓⵖⵓⴷⵓ, ⴰⵡⵣⵏ ⵅⴼ ⵜⵏⵓⴼⴰ ⵏⵏⵙ ⵙ ⵜⵖⵣⵏⵜ ⴷ ⵓⵙⵓⴼⵓ ⴷ ⵓⵙⴼⴰⵙⴽⴰ, ⵙ ⵎⴽⴰⴷ ⵉⴳⴰ ⵉⴳⵍⵍⵉⵏ ⵄⴱⴷⵍⵄⵣⵉⵣ ⵍⵎⴰⵙⵉ ⴰⵎⴰⵙⴰⵢ ⵅⴼ ⵜⵇⴱⵉⵍⵉⵏ ⴰⴷ: ⴰⴳⵍⵓ, ⵙⵙⵉⵃⵍ, ⴰⵢⵜ ⴱⵕⴰⵢⵉⵎ, ⴰⵢⵜ ⵊⵕⵕⴰⵕ, ⵡⵉⵊⵊⴰⵏ, ⵉⵔⵙⵎⵓⴽⵏ, ⵎⴰⵙⵙⵜ ⵍⵎⵄⴷⵔ, ⵍⵅⵏⴰⴱⵉⴱ.

ⵍⴼⵇⵉⵀ ⵎⵓⵃⵎⵎⴰⴷ ⵍⵅⵏⴱⵓⴱⵉ ⴰⴳⵏⵙⴰⵙ ⵏ ⵍⴱⴰⵛⴰ ⵏ ⵜⵣⵏⵉⵜ, ⴰⵎⵖⵏⴰⵙ ⵄⵍⵉ ⴰⴱⵕⵏⵉ ⵅⴼ ⵜⵇⴱⵉⵍⵉⵏ ⴰⴷ: ⴰⵏⵣⵉ ⴷ ⵜⵙⴹⴼⴰⵕ ⵏⵏⵙ/ ⴰⵏⵣⴱⴰⵢ ⵎⵓⵃⵎⵎⴰⴷ ⵎⵕⵡⴰⵏ, ⵅⴼ ⵜⵇⴱⵉⵍⵉⵏ ⴰⴷ: ⴱⵉⵣⴰⴽⴰⵔⵏ, ⵍⴰⵅⵚⴰⵚ, ⴰⵢⵜ ⵔⵔⵅⴰ/ ⴰⵏⵣⴱⴰⵢ ⴱⴰⴹⵕ ⵄⴰⴱⴷⵓⵍⵍⴰⵀ ⵊⵡⴰⵏ ⴰⴱⴰⵄⵎⵕⴰⵏ: ⵅⴼ ⵉⴼⵔⴰⵏ ⴷ ⵜⵇⴱⵉⵍⵉⵏ ⵏⵏⴰ ⴰⵙ ⵢⴰⵥⵏ, ⴰⵏⵣⴱⴰⵢ ⵎⵓⵃⵎⵎⴰⴷ ⴱⵏ ⵎⵓⵙⴰ (ⴰⵏⴱⵔⴰⵣ ⵏ ⵜⵎⴳⴳⵉⵜ ⵏ ⵓⴳⴰⴷⴰⵣ ⴰⵏⴰⵎⵎⴰⵙ): ⵅⴼ ⵙⵙⵉⵃⵍ, ⵟⴰⵟⴰ, ⵜⴰⵍⵙⵉⵏⵜ/ ⴰⵏⵣⴱⴰⵢ ⵉⴳⵍⵍⵉⵏ ⵏ ⵃⵎⵎⵓⴷⵉ ⵎⵓⵃⵎⵎⴰⴷ ⵙⴳ ⵓⵙⴼⵉ: ⵅⴼ ⵓⵇⵇⴰ ⴷ ⵉⵎⵉ ⵏ ⵓⴳⴰⴷⵉⵔ/ ⴰⵎⵖⵏⴰⵙ ⵎⵓⵃⵎⵎⴰⴷ ⵓⵀⵎⵎⵓ: ⴰⵎⴰⵡⴰⵢ ⵅⴼ ⴰⵢⵜ ⵄⵍⵉ ⴱⴰⵀⴰ/ ⵃⵎⴰⴷ ⵍⴳⴷⵓⵔⵜⵉ ⴰⵎⴰⵡⴰⵢ ⵅⴼ: ⵜⴼⵔⴰⵡⵜ/ ⵎⵓⵃⵎⵎⴰⴷ ⴱⵏ ⵄⵓⵎⴰⵕ ⵍⵎⴳⴳⵓⵏⵉ: ⴰⵎⴰⵡⴰⵢ ⵅⴼ ⵜⵇⴱⵉⵍⵜ ⵏ ⴰⵢⵜ ⵄⴱⵍⵍⴰ.

ⴳ ⵜⵉⵣⵉ ⵏ ⵓⵎⵓⵜⵜⵉ ⵉⵍⴽⵎ ⵍⵃⴰⵊⵊ ⵃⵎⴰⴷ ⵓⴳⴷⵓⵔⵜ ⵜⴰⴼⵔⴰⵡⵜ ⴳ ⵢⴰⵜ ⵜⴼⵓⴳⵍⴰ ⵢⵓⵎⵎⵔⵏ, ⴷ ⵢⴰⵏ ⵓⵙⵏⵓⴱⴳ ⵉⴳⴰⵏ ⵡⴰⵥ, ⴰⵖⴰⵡⴰⵙ ⴰⵎⵣⵡⴰⵔⵓ ⵏⵏⴰ ⵎⵉ ⵉⵕⵥⵎ ⵙⴳ ⵓⵙⵉⵔⴰ ⵏⵏⵙ, ⴰⴱⵣⵣⴻⵣ ⵏ ⵓⵙⵍⵎⴷ, ⵉⵙⵖⵓⴷⵓ ⵜⵉⵏⵎⵍ ⵜⵓⵙⵍⵉⵎⵜ ⴳ ⵜⴼⵔⴰⵡⵜ, ⵉⴼⴽ ⴰⵙ ⵉⵙⵍⵎⴷⵏ ⵖⵓⵔ ⵜⵉⵣⵎⵎⴰⵔ, ⵉⴱⴷⴷ ⵅⴼ ⵓⵙⵍⵎⴷ ⴷ ⵓⵍⵎⵎⵓⴷ ⵙ ⵢⵉⵅⴼ ⵏⵏⵙ, ⴷ ⵜⴳⴳⵉⵡⵙⵜ ⵜⴰⵙⵓⵍⴰⵏⵜ ⵙ ⴽⵓ ⵎⴰⴷ ⵉⵥⵍⵉⵏ ⵙ ⵜⵖⴰⵡⵙⵉⵡⵉⵏ ⵏ ⵓⵏⵍⵎⴰⴷ ⵙⴳ ⵉⵎⴰⵙⵙⵏ ⵏ ⵜⵖⵔⵉ ⵙ ⵜⵙⵉⵔⵎⵜ ⵜⴰⵏⵎⵍⴰⵏⵜ, ⵉⵙⴽⵔ ⴳ ⵜⵡⵍⵍⵓⵖⵜ ⵜⴰⴷⴷⴰⵔⵜ ⵉ ⵡⵉⴷ ⴰⴳⴳⵓⴳⵏⵉⵏ ⵅⴼ ⵜⴼⵔⴰⵡⵜ, ⵉⵙⴽⵔ ⵜⵉⴷⴰⵍⵉⵡⵉⵏ ⵢⴰⴹⵏ ⴰⵎ ⴰⵢⵢⴰⵡⵏ ⴳ ⵜⵓⴳⵜ ⵏ ⵉⵙⵓⵏⵏ ⴳ ⵜⵙⵓⵏⴹⵜ, ⵉⵙⴱⵣⵣⵉⵣ ⴰⵙⵍⵎⴷ ⵅⴼ ⵜⴼⵔⵓⵅⵜ ⵏⵏⴰ ⵅⴼ ⵜⴻⵜⵜⵓⴳⴷⴰⵍ ⵜⵉⵏⵎⵍ ⴷⴰⵜ ⵏ ⵜⵙⵉⵎⴰⵏⵜ, ⵉⵙⵏⵎⴰⵍⴰ ⵉⵎⵣⵉⵣⵣⵍⵏ ⵏ ⵓⵙⴼⵔⴽ ⴳ ⵓⵙⴰⵜⵉ ⵏ ⵓⵛⵛⵉⵍ ⵏ ⴽⵓ ⵢⴰⵏ ⴰⴷ ⵉⵍⵜⵖ ⴳ ⵜⵎⵙⵉⵔⵉⵏ ⵏ ⵓⵙⵉⴷⵍⴼ, ⴰⵔ ⵙⵓⵍ ⴽⵯⵜⵜⵉⵖ ⵍⵍⵉⵖ ⴷⴰⵔⵙ ⵉⴼⵜⴰ ‘’ⵎ.ⵃ’’ ⵙ ⵡⴰⵎⵎⴰⵙ ⴰⴷ ⴷ ⵉⵙⵙⴼⵖ ⴰⵍⵓⴳ ⵏ ⵡⴰⴷⴷⴰⴷ ⵓⵖⵔⵉⵎ, ⴷⴰⵜ ⴰⴷ ⴰⵙ ⵜ ⵉⴼⴽ ⵉⵜⵜⵔ ⴳⵉⵙ ⴰⴷ ⵉⵙⴳⵎⴹ, ⵉⵙⵓⵔⴼ ⴰⵛⴽⵓ ⵓⵔ ⵉⵙⵙⵉⵏ ⴰⴷ ⵢⴰⵔⴰ ⵉⵙⵎ ⵏⵏⵙ, ⵜⴳ ⵜⵎⵔⴰⵔⵓⵜ ⵏ ⵍⵃⴰⵊⵊ ⵃⵎⴰⴷ ⵓⴳⴷⵓⵔⵜ: ‘’ ⵓⵔ ⴰⴷ ⴰⴽ ⴼⴽⵖ ⴰⵍⵓⴳ ⵏ ⵡⴰⴷⴷⴰⴷ ⵓⵖⵔⵉⵎ ⴰⵔ ⴽⵉⵖ ⵜⵙⵙⵏⵜ ⴰⴷ ⵜⴰⵔⴰⵜ ⵉⵙⵎ ⵏⵏⴽ, ⵉⴼⴽ ⴰⵙ ⵢⴰⵜ ⵜⵛⵛⴽⴰⵕⵜ ⴳⵉⵙ ⵢⴰⵏ ⵓⴷⵍⵉⵙ ⴷ ⵉⵍⵓⴳⵏ ⴷ ⵉⵖⴰⵏⵉⴱⵏ, ⵉⴼⵜⵓ ⵓⵡⵙⵙⴰⵔ ⴰⵏⵏ, ⴰⵢⵍⵍⵉⵖ ⵉⵙⵙⵏ ⴰⴷ ⵢⴰⵔⴰ ⵉⵃⵙⵓ ⵉⵙⴽⴽⵉⵍⵏ, ⵉⵙⵙⵏⵜⵉ ⴰⵔ ⵢⴰⵇⵇⵔⴰ ⴰⵔ ⵉⵜⵜⴰⵔⴰ ⵜⵉⵣⵉ ⵏ ⵢⴰⵏ ⵡⴰⵢⵢⵓⵔ, ⵍⵍⵉⵖ ⵉⵏⵔⴰ ⵜⴰⵇⵇⴱⴰⵏⵉⵜ, ⵉⵙⴽⵔ ⴰⵙ ⵍⵃⴰⵊⵊ ⵢⴰⵏ ⵢⵉⵔⵉⵎ ⴷⴰⵜ ⴰⴷ ⴰⵙ ⵉⴼⴽ ⴰⵍⵓⴳ ⵏ ⵡⴰⴷⴷⴰⴷ ⵓⵖⵔⵉⵎ.

ⴳ ⵢⴰⵜ ⵜⵙⴳⴰ ⵢⴰⴹⵏ, ⵉⴽⴽⴰ ⵜⵜ ⵉⵏⵏ ⴷⴰ ⵉⵙⵙⵎⵏⵉⴷ ⵜⵉⵎⵖⴰⵔⵉⵏ ⵙ ⵓⵙⵍⵎⴷ ⴳ ⵓⵙⴰⵜⵉ ⵏ ⵜⵏⵉⴹⵉ ⵙⴳ ⵓⵥⵟⵟⴰ ⵙ ⵜⵣⵓⵣⴰⴼ ⴷ ⵡⵓⵏⵓⵖ, ⵉⵣⵎⵔ ⴰⴷ ⵉⵙⴽⵔ ⵜⵉⵎⵔⵙⴰⵍ ⵜⵉⵏⴰⵎⵓⵏⵉⵏ ⵜⵉⵙⴳⵎⴰⵏⵉⵏ ⵎⵇⵇⴰⵔ ⵉⴱⴱⴰⵢⴹⴰⵕⵏ ⴳⴳⵓⵜⵏⵉⵏ ⴳ ⵜⴼⵔⴰⵡⵜ ⵙⵍⴰⵡⴰⵏ ⴰⴽⴽⵯ ⴳ ⵢⵉⴳⵔ ⵏ ⵜⵎⵖⴰⵔⵜ, ⵜⵎⵎⴰⵜⵜⵉ ⵜⴳⵔⴰⵡⵍⴰ ⵏⵏⵙ ⵅⴼ ⵜⵎⵙⵓⵜⴰⵍ ⵙ ⵓⵍⵖⵓ ⴽⵓ ⵉⵎⴰⵍⴰⵙⵙ ⵙ ‘’ⵓⴱⵔⵔⴰⵃ’’ ⵎⴰⵙⴷ ⵉⵇⵇⴰⵏ ⴰⴷ ⴼⵜⵓⵏ ⵜⴰⵔⵡⴰ ⵙ ⵜⵉⵏⵎⵍ, ⵙⴰⴷⵎⵔⵏ ⴽⵉⴳⴰⵏ ⵉ ⵜⵖⵓⵔⵉ ⴰⴷ, ⴼⴼⵉⵖ ⴷ ⵅⴼ ⵜⵉⵏⵎⵍ ⵏ ⵜⴼⵔⴰⵡⵜ ⵜⵓⴳⵜ ⵏ ⵡⵉⴷ ⵔⴰⵏⵉⵏ ⴰⴷ ⴰⵇⵇⵔⴰⵏ, ⴳ ⵡⴰⵎⵎⵍⵏ ⴷ ⵓⵎⴰⵏⵓⵣ ⴷ ⵜⵙⵔⵉⵔⵜ ⴷ ⴰⵢⵜ ⵓⵙⵙⵉⵎ, ⴷ ⵜⵀⴰⵍⴰ, ⵉⵍⴽⵎ ⵓⵎⵣⵉⵣⵣⵍ ⴰⴷ ⵜⵉⵇⵇⴱⵉⵍⵉⵏ ⴰⴽⴽⵯ ⴰⴳⴳⵓⴳⵏⵉⵏ ⵣⵓⵏ ⴷ ⵉⴷⴰⵡⵙⵎⵍⴰⵍ ⴷ ⵓⵏⵣⵉ ⴷ ⵉⵎⵊⵊⴰⴹ ⴷ ⵜⵙⴳⵉⵡⵉⵏ ⵏ ⵜⵣⵏⵉⵜ.

ⵓⵔ ⵉⴱⴷⴷ ⵍⵃⴰⵊⵊ ⵃⵎⴰⴷ ⵖⴰⵙ ⵅⴼ ⵓⵙⵍⵎⴷ, ⵉⵙ ⴰⴽⴽⵯ ⵉⵙⴽⵔ ⴳ ⵜⴰⵎⴰ ⵏ ‘’ ⵜⵉⵏⵎⵍ ⵜⴰⵣⴰⵢⴽⵓⵜ ⵏ ⵜⴼⵔⴰⵡⵜ’’ ⵢⴰⵜ ⵜⴽⴰⴼⵓⵜ ⵜⴰⴳⴷⵓⴷⴰⵏⵜ ⵏ ⵉⴷⵍⵉⵙⵏ ⵜⴳⴰ ⴰⴱⵓⵔⵙ ⵉ ⵉⴷⵔⴰⵔⵏ ⵏ ⵜⴳⵉⵣⵓⵍⵜ ⵙ ⴰⵢⵍⵍⵉ ⴳⵉⵙ ⵉⵍⵍⴰⵏ ⵙⴳ ⵉⴷⵍⵉⵙⵏ ⴷ ⵜⵙⵓⵖⴰⵍ ⵉⵏⴼⵔⴰⵔⵏ, ⵥⵕⵉⵖ ⵢⴰⴷ ⴳ ⵜⴽⴰⴼⵓⵜ ⴰⴷ ⴰⵏⴰⵡⵏ ⵏ ⵡⴰⵔⵔⴰⵜⵏ ⵉⵎⴰⵣⵉⵖⵏ ⵉⵜⵜⵢⴰⵔⴰⵏ ⵙ ⵓⴼⵓⵙ ⵏ ⵓⵙⵍⵎⴰⴷ ⵙⵉⴷⵉ ⵄⵍⵉ ⵙⴳ ⵓⵙⵓⵏ ⵏ ‘’ ⵓⵎⵙⵏⴰⵜ’’ ⴷ ⵜⵓⴳⵜ ⵜⵏⵜⴰⵎⵉⵏ ⴷⵔⵓⵙⵏⵉⵏ ⵙⴳ ⵜⵡⵍⴰⴼⵉⵏ ⴷ ⵉⴷⵍⵉⵙⵏ ⵏ ⵍⵎⵅⵜⴰⵔ ⴰⵙⵓⵙⵉ ⴳ ⵓⵣⵎⵣ ⵏⵏⵙⵏⵜ ⵉⵣⵡⴰⵔⵏ, ⵜⴽⴽⴰ ⵜⵜ ⵉⵏⵏ ⵢⴰⵜ ⵜⵥⵕⵉⴳⵜ ⴰⵔ ⴷ ⵜⴻⵜⵜⴼⴼⴰⵖ ⴳ ⵜⴼⵔⴰⵡⵜ ⵜⵥⵍⵉ ⵙ ⵜⵉⵍⴰⵍ ⵏ ⵓⵙⵇⵇⵉⵎ ⴰⴼⴰⵔⴰⵏ, ⴳ ⵜⵙⴷⵍⵉⵙⵜ ⴰⴷ ⴰ ⴳ ⵉⵜⵜⵓⵣⵎⵎⴰⵎ ⵓⴼⵛⵛⴰⴷ ⵏ ⵉⴳⵍⵍⵉⵏ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵙⵎⵎⵓⵙ ⴹⴰⵕⵜ ⵏ ⵜⵎⵜⵜⴰⵏⵜ ⵏⵏⵙ ⴰⵙⴳⴳⵯⴰⵙ ⵏ 1961.

ⵎⴰⵛⴰ ⵜⴰⵙⴷⵍⵉⵙⵜ ⵜⴰⴳⴷⵓⴷⴰⵏⵜ ⵜⴻⵜⵜⵢⴰⴽⴰⵔ ⵙⴳ ⴷⴰⵔ ⵉⴼⴰⵙⵙⵏ ⵓⵔ ⵉⵜⵜⵉⵍⵉⵃ, ⴳ ⵓⵙⴳⴳⵯⴰⵙ ⵏ 1980, ⵉⵜⵜⵓⴼⵙⴰⵔ ⵢⴰⵏ ⵓⵎⴰⴳⵔⴰⴷ ⴳ ⵓⵖⵎⵉⵙ ⵏ ‘’ⵍⵀⵓⴷⵀⵓⴷ’’ ⵏⵏⴰ ⴷ ⵉⵙⵙⵓⴼⵓⵖ ⵃⵎⴰⴷ ⵙⵙⵏⵏⵓⵙⵉ ⵉⵜⵜⵓⵙⵙⴰⵏⵏ ⵙ ‘’ ⴱⵣⵉⵣ’’ ⵏⵏⴰ ⴳ ⵜⵜ ⵉⵏⵏ ⴽⴽⵉⵖ ⴰⵔ ⴳⵉⵙ ⵜⵜⵃⵢⵢⴰⵍⵖ ⴽⵔⴰ ⵏ ⵉⵙⵏⵜⴰⵍⵏ ⵉⵎⴰⵣⵉⵖⵏ ⴷ ⵓⴽⴰⵔⵉⴽⴰⵜⵓⵔ, ⵙⴰⵡⵍⵖ ⴳ ⵓⵎⴳⵔⴰⴷ ⴰⵏⵏ ⵎⴰⵙ ⴷ ⵉⵇⵇⴰⵏ ⴰⴷ ⵉⵜⵜⵓⵙⴽⴰⵔ ⵢⴰⵏ ⵓⵔⵣⵣⵓ ⵅⴼ ⵜⵓⴽⴽⵕⴹⴰ ⵏ ⵜⵙⴷⵍⵉⵙⵜ ⵜⴰⴳⴷⵓⴷⴰⵏⵜ ⴳ ⵜⴼⵔⴰⵡⵜ, ⵓⵔ ⵉⵍⵍⵉ ⵎⴰⴷ ⵉⵙⵙⴼⵍⴷⵏ, ⵓⵍⴰ ⵎⴰⴷ ⵉⵔⴰⵔⵏ (ⵜⵍⵍⴰ ⵓⵍⴰⵏ ⵜⵓⵜⵔⴰ ⵅⴼ ⵓⵙⵏⵜⵍ ⴰⴷ’’.

ⵉⴽⴽⴰ ⵜⵜ ⵉⵏⵏ ⵎⴰⵙⵙ ⵍⵃⴰⵊⵊ ⵃⵎⴰⴷ ⵓⴳⴷⵓⵔⵜ ⵜⵉⵣⵉ ⵏⵏⴰ ⵉⵎⵎⴰⴳⴳⴰⵔ ⴽⵔⴰ ⵏ ⵡⴰⵣⵣⴰⵏ ⵉⴷⴷⴰ ⵙ ⵜⵉⵏⵎⵍ, ⵓⵔ ⴰⴷ ⵜ ⵉⴼⵍ ⴰⵔ ⴷ ⵜ ⵉⵏⵏ ⵉⵙⵙⵍⴽⵎ ⵙ ⵜⵀⵉⵔⵉⵜ ⵏⵏⵙ ‘’ⵊⵊⵉⴱ’’ ⵜⴰⵙⴳⴳⴰⵏⵜ ⵙ ⵜⵉⵏⵎⵍ ⵏⵉⵖ ⴰⵙⵓⵏ ⵏⵏⵙ, ⴳ ⵓⴷⵍⵉⵙ ‘’  ⵜⵉⵢⴰⴼⵓⵜⵉⵏ ⵏ ⵉⵎⵓⵙⵏⴰⵡⵏ ⵏ ⵙⵓⵙ ⴳ ⵓⵣⵎⵣ ⵏ ⵎⵓⵃⵎⵎⴰⴷ ⵡⵉⵙ ⵚⴹⵉⵚ’’ (ⵜⴰⵙⵏⴰ 40): ‘’ⵎⴰⵙ ⴷ ⵍⵃⴰⵊⵊ ⵃⵎⴰⴷ ⵓⴳⴷⵓⵔⵜ ⵉⴼⴽⴰ ⵜⴰⴽⴰⴼⵓⵜ ⵏⵏⵙ ⵏ ⵉⴷⵍⵉⵙⵏ ⴰⴽⴽⵯ ⵉ ⵓⵙⵉⵏⴰⴳ ⵓⵙⵍⵉⵎ ⴳ ⵜⴼⵔⵓⴷⴰⵏⵜ, ⴰⵔ ⴽⵯⵜⵜⵉⵖ ⵉⴽⴽⴰ ⵜⵜ ⵉⵏⵏ ⴷⴰ ⵢⴰⴽⴽⴰ ⴰⴷⵍⵉⵙ ⵏ ⵙⵓⵙ ⵜⴰⵎⴰⵜⵜⴰⵢⵜ ⴰⵎ ⵜⴰⵔⵔⴰⴳⵜ ⵉ ⵉⵏⵍⵎⴰⴷⵏ ⵉⵎⵓⴼⴰⵢⵏ ⴷ ⵉⵎⵣⵔⴰⵡⵏ ⵏ ⵜⵉⵏⵎⵍ ⵜⴰⵇⴱⵓⵔⵜ’’.

ⵉⴽⴽⴰ ⵜⵜ ⵉⵏⵏ ⵓⵔⴳⴰⵣ ⴰⵔ ⴱⴰⵀⵔⴰ ⵉⵜⵜⵎⵓⵙⵙⵓ, ⴰⵔ ⵉⵜⵜⵎⴰⵜⵜⴰⵢ ⴳⵔ ⵜⵇⴱⵉⵍⵉⵏ, ⵓⵔ ⴰⴷ ⵉⵣⴳⵍ ⵜⴰⵥⴰⵍⵍⵉⵜ ⴷ ⵜⵔⴰⴱⴱⵓⵜ, ⵜⵉⵣⵉ ⵏⵏⴰ ⵉⵎⵎⴰⴳⴳⴰⵔ ⴽⵔⴰ ⵏ ⵢⴰⵏ ⵉⵙⴰⵇⵙⴰ ⵜ ⵉⵙ ⵜⵥⵥⵓⵍⵜ, ⵢⴰⵏ ⵡⴰⵙⵙ ⵉⵎⵎⴰⴳⴳⴰⵔ ‘’ⵄⴷⵕⵃⵎ ⵓ ⵚⴰⵍⵃ, ⵏⵜⵜⴰ ⴷ ⴰⵏⴰⴼⴰⵍ, ⵉⵙⴰⵇⵙⴰ ⵜ ⵉⵙ ⵜⵥⵥⵓⵍⵜ? ⵉⵔⵓⵔ ⴰⵙ ‘’ⵄⴷⵕⵃⵎ ⵓ ⵚⴰⵍⵃ’’ ⵎⴰⵅⵅ ⵓⵔ ⵉⵢⵉ ⵜⵙⴰⵇⵙⴰⵜ ⵉⵙ ⵛⵛⵉⵖ? ⵉⴽⴽⴰ ⵜⵜ ⵉⵏⵏ ⵜⴰⵎⵍⵍⴰ ⵏ ⵕⴱⴱⵉ ⴼⵍⵍⴰⵙ ⵉⵎⵎⴰⵖ ⴰⴷ ⵉⴽⴽⵙ ⵉⵙⴽⴽⵉⵔⵏ, ⴷ ⴳⴰⵔ ⵜⵉⵎⵢⵓⵔⵉⵏ, ⵉⴳ ⴰⵎⵙⵙⴷⵓⵢ ⴷ ⵓⵎⴰⵏⴰⵔ, ⵉⵣⵎⵔ ⴳ ⵜⵉⵣⵉ ⵉⴳⵣⵣⵓⵍⵏ ⴹⴰⵕⵜ ⵎⴰⴷ ⵉⵡⴰⵍⴰ ⵜⴰⵏⴰⵔⴰ ⵉⵙⵙⵏⵖⵓⴱⴰ ⵜⵉⵙⴼⵍⵖⵜ (ⴰⵢⵍⵍⵉ ⴷ ⵉⴼⵍ ⵓⵎⴷⴷⵓⵔⵔⵓⵢ) ⵎⴽⵍⵍⵉ ⵉⵙⵙⴳⴷⵍ ⴰⵙⴰⴹⵕⵏ ⴷ ⵍⴽⵉⴼ, ⵉⴳ ⴰⴳⵓⴼⵙⵓ ⴷ ⴰⴱⴽⴽⵉⴹ ⵖ ⵓⵔ ⵉⵍⵍⵉ ⵓⵙⵓⵔⴼ.

ⵉⵔⵣⴼ ⵜ ⵉⴷ ⵢⴰⵏ ⵡⴰⵙⵙ ⵢⴰⵏ ⵓⵙⴱⴱⴰⴱ ⴳ ⵓⵙⵉⵔⴰ ⵏⵏⵙ, ⵃⵎⴰ ⴰⴷ ⴷⵉⵙ ⵉⵎⵢⴰⵙⵙⴰⵏ (ⴰⵙⵓⵔⴼ ⴱⵍⴰ ⵏⴱⴷⵔ ⵉⵙⵎⴰⵡⵏ) ⴹⴰⵕⵜ ⵏ ⵡⴰⵡⴰⵍ ⵉⴳⴳⵓⵜⵏ, ⵉⵔⴰ ⵓⵏⵔⵣⴰⴼ ⴰⴷ ⵉⴼⵜⵓ, ⵢⴰⵡⵉ ⴷ ⴳ ⵜⵀⵉⵔⵉⵜ ⵏⵏⵙ ⵎⴰⴷ ⴰⴽⴽⵯ ⵉⴼⵓⵍⴽⵉⵏ ⴳ ⵡⴰⵜⴰⵢ ⴰⵎ ⵜⴰⵔⵔⴰⴳⵜ ⵉ ⵓⵎⴰⵡⴰⵢ, ⵉⵙⴰⵇⵙⴰ ⵜ ⵍⵃⴰⵊⵊ ⵃⵎⴰⴷ ⵓⴳⴷⵓⵔⵜ ⵜⴰⵎⵍⵍⴰ ⵏ ⵕⴱⴱⵉ ⴼⵍⵍⴰⵙ, ⵎⴰ ⵎⵉ ⴷ ⵜⵉⵡⵉⵜ ⴰⵜⴰⵢ ⴰⴷ ⵉⴼⵓⵍⴽⵉⵏ? ⵉⵔⴰⵔ ⴰⵙ ⵓⵙⴱⴱⴰⴱ ⵎⴰⵙ ⵜⴳⴰ ⵜⴰⵔⵔⴰⴳⵜ ⵢⵉⵡⵉ ⴰⵙ ⵜⵜ ⵉⴷ, ⵉⵊⵊⵓⴱⵍ ⵢⵉⵏⵉ ⴰⵙ: ⵜⵉⴽⴽⵍⵉⵜ ⵢⴰⴹⵏ ⵉⵖ ⵜⵔⵉⵜ ⴰⴷ ⵉⵢⵉ ⵜⴼⴽⵜ ⵜⴰⵔⵔⴰⴳⵜ, ⵉⵖ ⴷⵉⵜⵉ ⵓⵔ ⵜⵎⵛⴰⵡⴰⵕⵜ ⴰⵡⵉ ⵜⵜ ⵙ ⵜⵎⵙⵙⵓⴳⵓⵔⵜ ⵏ ⵜⵡⵍⵍⵓⵖⵜ, ⵔⴰⴷ ⵓⵎⵎⵔⵖ, ⴷ ⵉⵖ ⵉⵢⵉ ⴷ ⵉⵍⴽⵎ ⵎⴰⵙ ⴷ ⴼⵍⴰⵏ ⵉⴱⴱⴷ ⵉⵎⵉ ⵏ ⵜⵡⵍⵍⵓⵖⵜ ⵉⵙⵙⴰⴽⵉ ⴷ ⴳ ⵓⴼⵏⵉⵇ ⵏ ⵜⵀⵉⵔⵉⵜ ⵏⵏⵙ ⵜⴰⵔⵔⴰⴳⵜ ⵉ ⵉⴳⵉⴳⵉⵍⵏ ⴷ ⵉⵎⴼⵓⵜⵜⴰ, ⵢⵉⵏⵉ ⴰⵙ ⵎⴰⵙ ⴷ ⵜⵉⵖⵔⴰⴷ ⵏⵏⵙ ⴷⴰ ⵉⵜⵜⴰⵎⵥ ⵙⴳ ⴷⴰⵔ ⵓⵡⴰⵏⴽ ⴳⵓⵎⵏ ⵜⵜ ⴷ ⵉⵙⵓⴳⴰⵎ ⵢⴰⴹⵏ ⴰⵔ ⴰⵙ ⴷ ⵜⵜⴽⴽⴰⵏ ⵜⴰⵙⴱⴱⴰⴱⵜ ⵏⵏⵙ.

ⵉⵎⵙⴰⵔ ⴰⴷ ⵣⵓⵏ ⴷ ⵓⵢⴰ ⴰⴽⴷ ⵢⴰⵏ ⵓⵙⴱⴱⴰⴱ ⵢⴰⴹⵏ, ⵉⵖⵔⴰ ⴰⵙ ⵙ ⵉⵎⴽⵍⵉ ⵏⵜⵜⴰ ⴷ ⵉⵎⴰⵡⴰⵙⵏ ⵏⵏⵙ ⵉⵎⵙⵖⴰⵏⵏ ⴷ ⵉⵎⴰⵔⴰⵜⵏ, ⵍⵍⵉⵖ ⵉⵍⴽⵎ ⵉⵎⵕⵥⵉ ⵏ ⵡⴰⵙⵙ, ⵉⵜⵜⵔ ⵍⵃⴰⵊⵊ ⵃⵎⴰⴷ ⵙⴳ ⵓⵎⵃⵔⴰⵢ ⵏⵏⵙ ⴰⴷ ⵢⴰⵡⵉ ⵢⴰⵜ ⵜⵎⴽⴽⴰⵍⵓⵜ ⵎⵓⵏⵏ ⵙ ⵓⵙⴰⵡⵔ ⵏ ⵜⵡⵓⵔⵉⵡⵉⵏ, ⵢⴰⴼ ⵉⵏⵏ ⴳⵉⵙ ⵉⵎⵙⵡⵓⵔⵉⵜⵏ ⴰⵔ ⵜⵇⵇⵍⵏ ⵙ ⵉⵎⴽⵍⵉ, ⵉⵜⵜⵔ ⴳⵉⵙⵏ ⴰⴽⴽⵯ ⴰⴷ ⵖⵍⵉⵏ ⵙ ⵜⵎⴽⴽⴰⵍⵓⵜ, ⵢⴰⵡⵉ ⵜⵏ ⵖⵔ ⵜⴳⵎⵎⵉ ⵏ ⵓⵙⴱⴱⴰⴱ ⵏⵏⴰ ⴰⵙ ⵉⵙⴽⵔⵏ ⵉⵎⴽⵍⵉ, ⵉⵎⵙⴰⴳⴰⵔ ⴷⵉⵙ ⵓⵙⴱⴱⴰⴱ ⵉⵙⴱⵔⵔⴽ ⵜ ⵢⵉⵏⵉ ⴰⵙ ⵎⴰⵏⵉ ⴽⴽⴰⵏ ⵉⵎⵙⵖⴰⵏⵏ? ⵉⵔⴰⵔ ⴰⵙ ⵍⵃⴰⵊⵊ ⵃⵎⴰⴷ: ⵉⵎⵍⵍⴰⵥⵓⵜⵏ ⴰⴷ ⴰⴷ ⵢⵓⴽⵍⴰⵍⵏ ⵜⵉⵔⵎⵜ, ⵓⴼⵉⵖ ⵜⵏ ⵉⵏⵏ ⴳ ⵓⵙⴰⵡⵔ ⴰⴳⴷⵓⴷⴰⵏ ⵓⵔ ⴰⵔ ⵛⵜⵜⴰⵏ ⵖⴰⵙ ⴰⵖⵔⵓⵎ ⴷ ⵡⴰⵜⴰⵢ, ⵏⴽⴽⵉ ⴷ ⵉⵎⴰⵡⴰⵙⵏ ⵏ ⵓⵙⵉⵔⴰ ⴷ ⵉⵎⵙⵖⴰⵏⵏ ⵜⵉⵔⵎⵜ ⵏⵏⵖ ⵜⴻⵜⵜⵓⵃⵢⵢⴰⵍ ⵙⴳ ⵜⵉⴼⴰⵡⵜ, ⵎⴰ ⵔⴰⴷ ⵜⵜ ⵉⵛⵛ?

ⵙⴳ ⵜⵙⴽⵔⴰⵡⵉⵏ ⵏⵏⵙ ⴰⴷ ⵜ ⵉⵕⵃⵎ ⵕⴱⴱⵉ, ⵉⵙⵙⴰⴳⴳⵓⴳ ⵜⵓⴳⵜ ⵏ ⵉⵖⴰⵔⴰⵙⵏ, ⵢⴰⵍⵙ ⵉ ⵜⵓⵚⴽⴰ ⵏ ‘’ ⵍⵎⴹⵕⵚⵜ’’ ⵉⵙⴽⵔ ⵜⴰⵎⵙⵙⵓⵔⵜ ⵏ ⵜⵎⵜⵜⴰⵡⵉⵏ ⵏ ⵜⵓⵚⴽⴰ, ⵉⵙⵙⵓⵜⵍ ⵉⵖⵔⴱⴰⵏ ⵉ ⵉⵙⵎⴹⴰⵍ, ⵉⵙⴳⴰⴷⴷⴰ ⵓⵏⴰ ⵉⵙⵙⵓⵜ ⴰⵙⵏ, ⵉⵙⵎⴰⵜⵜⵉ ⵜⴰⵎⵖⵔⴰⵙⵜ ⵙ ⵡⴰⵎⵎⴰⵙ ⵏ ⵓⴳⴰⴷⴰⵣ, ⵉⵥⵥⵓ ⵉⴼⴹⵏ ⵏ ⵜⴰⴷⴷⴰⴳⵉⵏ ⵏ ⵍⴽⴰⵍⵉⴱⵜⵓⵙ ⵜⴰⵙⴳⵉⵡⵉⵏ ⵏ ⵉⵖⴰⵔⴰⵙⵏ, ⵉⵙⴽⵔ ⵉⵇⵣⵔⴰⴱⵏ ⵏ ⵡⴰⵎⴰⵏ ⴳ ⵜⵣⵏⵉⵜ, ⵜⴳ ⵜⵡⴰⵔⴳⵉⵜ ⵏⵏⵙ ⴰⴷ ⵉⵙⴽⵔ ⵓⴳⴳⵓⴳ ⵎⵇⵇⵓⵔⵏ ⴳ ⵜⵣⵏⵉⵜ, ⵎⴰⵛⴰ ⵜⵉⵥⵓⴹⴰⵕ ⵜⵉⴽⵎⴰⵎⵉⵏ ⵓⵔ ⵜⵜⵢⴰⵡⴼⴽⴰⵏⵜ, ⴷ ⴰⵔ ⴱⴰⵀⵔⴰ ⵉⵜⵜⵍⵍⵉ ⵙ ⵡⴰⵎⴰⵏ ⵉⵖⵣ ⵜⵓⴳⵜ ⵏⵉⴷⵖⴰⵔⵏ ⴳ ⵜⵙⴳⴰ ⴷ ⵉⵙⴽⵔ ⵉⵊⵎⵉⵔⵏ ⵉⴳⴷⵓⴷⴰⵏⵏ ⴳ ⵜⴼⵔⴰⵡⵜ.

ⵉⴽⴽⴰ ⵜⵜ ⵉⵏⵏ ⵍⵃⴰⵊⵊ ⵃⵎⴰⴷ ⵓⴳⴷⵓⵔⵜ ⵓⵔ ⵉⵃⵎⵉⵍ ⴰⵄⴳⵣ, ⵉⴷⵖⴰⵔⵏ ⵓⵔ ⴳⴰⵏⵉⵏⵉ ⵉ ⵉⴳⵉⵡⵔ ⵉⵙⵙⴳⴷⵍ ⵜⵏ, ⵙⵍⴰⵡⴰⵏ ⴰⴽⴽⵯ ⴳ ⵜⵉⵣⵉ ⵏ ⵜⵡⵓⵔⵉ, ⴰⵔ ⴱⴰⵀⵔⴰ ⵉⵙⵎⵉⴳⵉⵍ ⵎⵉⴷⴷⵏ ⵙ ⵜⵡⵓⵔⵉ ⵜⴰⵏⴼⵍⴰⵃⵜ, ⴷ ⵜⴽⵙⵙⴰⴱⵜ ⴷ ⵓⵥⵥⵓ ⵏ ⵡⴰⴷⴷⴰⴳⵏ, ⴰⵙⵉⵔⴰ ⵉⵏⵏⵓⵕⵥⵎ ⵉ ⴽⵓ ⵢⴰⵏ.

ⵉⴽⵛⵎ ⵢⴰⵏ ⵡⴰⵙⵙ ⵙ ⵢⴰⵏ ⵓⵙⵓⵏ, ⵜⴳ ⵜⴰⵙⵔⴰⴳⵜ ⴳⵔ 10h ⴷ 11h, ⵢⴰⴼ ⵉⵏⵏ ⵢⴰⵜ ⵜⵔⴰⴱⴱⵓⵜ ⵏ ⵉⵡⴷⴰⵏ ⴳⴰⵡⵔⵏ ⴷ ⴽⵔⴰ ⵉⵥⵥⵍ ⴳ ⵡⴰⴽⴰⵍ, ⵉⴳⵉⵡⵔ ⵏⴳⵔⴰⵜⵙⵏ ⵢⵉⵏⵉ ⴰⵙⵏ: ⵀⴰⵢⵢⴰⵖ ⵏⴳⵉⵡⵔ, ⴰⴷ ⵏⵇⵇⵍ ⵙ ⵓ ⵜⵣⵏⵉⵜ ⴰⴷ ⴰⵖ ⴷ ⵢⴰⵡⵉ ⵍⵉⵇⵇⴰⵎⵜ, ⴷ ⵓⵀⵡⵡⴰⵔⵉ ⴰⴷ ⴰⵖ ⴷ ⵢⴰⵡⵉ ⴰⵅⵙⴰⵢ, ⴷ ⵓⴷⴽⴽⴰⵍ ⴰⴷ ⴷ ⵢⴰⵡⵉ ⵉⴼⵉⴼⵍ ⴷ ⵜⵔⴽⵎⵉⵏ (ⴰⵢⵡⴰ ⴰ ⵉⵎⵜⵜⵓⵔⵙⵏ, ⵎⴰⵢⴰ ⴷ ⴰⴷ ⴰⵙⵏ ⵉⵏⵏⴰ ⴷⴰⵜ ⴰⴷ ⵉⴳⴰⵡⵔ ⵏⴳⵔⴰⵙⵜⵏ), ⵓⵔ ⵉⴼⵜⵉ ⴰⵢⵍⵍⵉⵖ ⵜⵏ ⵉⵙⵎⴰⴳⵍ ⵙ ⵜⵡⵓⵔⵉ, ⴼⵜⵓⵏ ⵙ ⵓⵔⵜⴰⵏ ⵏⵏⵙ ⴰⴷ ⴳⵉⵙⵏ ⵥⵥⵓⵏ, ⴰⵡⵉⵏ ⵜⵜ ⴳ ⵜⴼⵍⵍⴰⵃⵜ, ⵙⵓⵍⵏ ⵓⴽⴰⵏ ⵙⵓⵍ ⴰⵢⵜ ⵓⵙⵓⵏ ⴰⵔ ⴷ ⴽⵯⵜⵜⵉⵏ ⵜⴰⴳⵓⵔⵉ ⴰⴷ ⵏ: ‘’ⴰⵢⵡⴰ ⴰ ⵉⵎⵜⵜⵓⵔⵏ’’ ⵕⵃⵎⵏ ⴼⵍⵍⴰⵙ.

ⴳ ⵜⵙⴳⴰ ⵏ ⵜⵓⵏⵏⵓⵏⵜ, ⵉⵙⴽⵔ ⵜⴰⴽⵏⵏⴰⵡⵜ ⵏ ⵓⴱⴰⵔⴰⵣ ⵏ ⵜⵡⵊⵊⴰ ⵏ ⵓⴹⴰⵕ, ⵉⵙⵖⵓⴷⵓ ⵜ, ⵓⵍⴰ ⵡⴰⴷ ⵉⵥⵍⵉⵏ ⵙ ⵜⵡⵊⵊⴰ ⵏ ⵜⵙⴽⵏⵉⵜ, ⴷ ⵡⴰⵏⴰⵡⵏ ⵢⴰⴹⵏ ⵏ ⵜⵓⵏⵏⵓⵏⵉⵏ, ⵉⴼⴽⴰ ⴰⵜⵉⴳ ⵉⵥⵍⵉⵏ ⵉ ⵜⵉⵍⴰⵍ ⵜⵉⵎⴰⵏⵓⵏⵉⵏ ⴷ ⵜⵡⵉⵙⵉ ⵏ ⵜⵔⵓⴱⴱⴰ ⵉⵍⵍⴰⵏ ⴳ ⵓⴱⴰⵔⴰⵣ ⵜⵉⵣⵉ ⴰⵏⵏ.

ⵉⴽⴽⴰ ⵜⵜ ⵉⵏⵏ ⵍⵃⴰⵊⵊ ⵃⵎⴰⴷ ⵓⴳⴷⵓⵔⵜ ⵢⵉⵡⵉ ⵜⵜ ⴱⴰⵀⵔⴰ ⴳ ⵜⵙⴳⴰ ⵜⴰⴷⵓⵙⴰⵏⵜ, ⵉⴳⴰ ⴱⵏⴰⴷⵎ ⴱⴰⵀⵔⴰ ⵉⵙⵙⴰⴳⴳⵯⴰⵏ, ⴷⴰ ⵉⵜⵜⵔⵣⴰⴼ ⴰⵙⴳⵏⴰⴼ ⴽⵓ ⵜⵉⴼⴰⵡⵜ, ⵉⴱⴷⴷ ⵙ ⵢⵉⵅⴼ ⵅⴼ ⵓⴱⵟⵟⵓ ⵏ ⵉⵙⴰⴼⴰⵔⵏ ⵙⴳ ⴷⴰⵔ ⵉⵏⵙⵎⴰⴳⴰⵍⵏ ⵣⵓⵏ ⴷ ⵎⴰⵙⵙ ⵙⴰⵄⵉⴷ ⴷ ⵎⵓⵍⴰⵢ ⵄⴱⴷⵍⵍⴰⵀ ⴷ ⴱⵏ ⵛⵛⵉⵅ ⵕⵕⴰⵎⵉ ⴰⴷ ⵜⵏ ⴰⴽⴽⵯ ⵉⵕⵃⵎ ⵕⴱⴱⵉ.

ⵉⵎⵎⴰⴳⴳⴰⵔ ⵢⴰⵏ ⵙ ⵓⵙⴰⵎⴰ ⴷ ⵜⵎⵍⵙⵉⵜ ⵏⵏⵙ ⵉⵔⴽⴰⵏ, ⵢⴰⵙⵉ ⴳ ⵓⴼⵓⵙ ⵏⵏⵙ ⵜⴰⴽⴽⴰⵙⵉⵏ ⵏ ⵙⵙⴽⴰⵔ, ⵉⵙⴱⴷ ⵜ ⵍⵃⴰⵊⵊ ⵢⵉⵏⵉ ⴰⵙ ⵎⴰⵏⵉ ⵜⵔⵉⵜ? ⵉⵔⴰⵔ ⴰⵙ ⵓⵔⴳⴰⵣ: ⵙⵖⵉⵖ ⵙⵙⴽⴰⵔ, ⵡⴰⵜⵙⵖ ⵜⴰⵎⴰⵣⵉⵔⵜ ⵉⵏⵓ, ⵢⵉⵏⵉ ⴰⵙ ⵍⵃⴰⵊⵊ ⵃⵎⴰⴷ: ⵡⵉⵔⵔⵉ ⴷⴰⵔ ⵓⴱⵚⵓⵚ ⴰⴷ ⴰⴽ ⵉⵙⵏⴼⵍ ⵜⴰⴽⴽⴰⵙⵜ ⵏ ⵙⵙⴽⴰⵔ ⵙ ⵚⵚⴰⴱⵓⵏ ⵎⴰⵙ ⴰⵔ ⵜⵙⵙⵉⵔⵉⴷⵜ ⵜⵉⵎⵍⵙⴰ ⵏⵏⴽ ⵀⴰ ⵏⵏ ⵜⴳⵓⵎ ⴽ ⵢⴰⵜ ⵜⴰⴽⴽⴰⵙⵜⵏ ⵎⴰⴷ ⵜⵙⵙⴰⵜ.

ⴳ ⵢⴰⵜ ⵜⵏⴼⵓⵙⵜ ⵢⴰⴹⵏ ⵉⵜⵜⵢⴰⵡⴱⴷⴰⵔⵏ ⵅⴼ ⵍⵃⴰⵊⵊ ⵃⵎⴰⴷ ⵓⴳⴷⵓⵔⵜ: ‘’ ⵎⴰⵙ ⵜⵜ ⵉⵏⵏ ⵉⴽⴽⴰ ⵓⵣⴰⵜⵉⵎ ⴷⴰ ⵉⵏⵣⵣⴰ ⴳ ⵓⴷⵖⴰⵔ ⵢⴰⵥⵏ ⵉ ⵕⵕⵃⴱⵜ (ⴰⴷⵖⴰⵔ ⴳ ⴰⵔ ⵉⵏⵣⵣⴰ ⵡⴰⵎⵓⴷ) ⵜⵉⵣⵉ ⴰⵏⵏ ⵎⵉⴷⵏⵏ ⵓⵔ ⵎⵢⴰⵔⵏ ⵖⴰⵙ ⴰⵣⴰⵜⵉⵎ ⵏ ⵜⵎⴰⵣⵉⵔⵜ ⵏⵏⴰ ⴷ ⵉⵜⵜⴰⵛⴽⴰⵏ ⴳ ⵡⴰⵎⵎⵍⵏ, ⴰⵔ ⵜ ⵜⵜⴳⴳⴰⵏ ⴳ ⵜⵉⴽⵉⵏⵜ, ⵉⴳ ⵜⴰⵎⵢⵓⵔⵜ ⴰⴷ ⵉⵎⴹⵉ ⵓⵎⵙⵙⴰⵖ ⴰⵣⴰⵜⵉⵎ ⴷⴰⵜ ⴰⴷ ⵜ ⵉⵣⵖ, ⵢⴰⵏ ⵡⴰⵙⵙ ⵉⵣⵔⵉ ⵍⵃⴰⵊⵊ ⵃⵎⴰⴷ ⵎⵏⵉⴷ ⵏ ⵡⵉⴷ ⵣⵣⵏⵣⴰⵏⵉⵏ ⴰⵣⴰⵜⵉⵎ, ⵢⴰⵏⵉ ⵏⵏ ⴳ ⵜⵓⴳⴳⵓⴳⵜ ⵢⴰⵏ ⵜⵔⴽⴰ ⴰⵙ ⵜⵎⵍⵙⵉⵜ ⵏⵏⵙ ⵉⴳ ⵉⵏⵏ ⴰⴼⵓⵙ ⵏⵏⵙ ⴰⵔ ⵉⵎⵟⵟⵉ ⴰⵣⴰⵜⵉⵎ, ⵉⴱⴷⴷ ⵏⵏ ⴷⴰⵔⵙ ⵢⵉⵏⵉ ⴰⵙ ⵎⵍⵉ ⵉⵢⵉ ⴰⴼⵓⵙ ⵏⵏⴽ? ⵉⵎⵍ ⴰⵙ ⵜ ⵢⴰⴼ ⵜ ⵉⵏⵏ ⵉⵔⴽⴰ, ⵉⵇⵣⵣⵔ ⵜ, ⵢⵉⵏⵉ ⵉ ⵓⵎⵣⵣⵏⵣⵉ ⴰⴷ ⵓⵔ ⵢⴰⵊⵊ ⵎⵉⴷⴷⵏ ⴰⴷ ⵙⵙⵏⴽⴰⴹⵏ ⴳ ⵓⵣⴰⵜⵉⵎ ⴰⵔ ⵜ ⵉⴽⴽⴰⵜ ⵡⴰⴹⵓ.

ⴳ ⵓⵙⴳⴳⵯⴰⵙ ⵏ 1959 ⵉⵙⴽⵔ ⴰⵙ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⴰⵔⵣⴰⴼ ⴰⵎⵣⵔⴰⵢ ⴳ ⵜⴼⵔⴰⵡⵜ, ⵉⵃⵢⵢⵍ ⵍⵃⴰⵊⵊ ⵃⵎⴰⴷ ⵓⴳⴷⵓⵔⵜ ⵉ ⵓⵔⵣⴰⴼ ⴰⴷ ⵙ ⵜⵡⵉⵙⵉ ⵏ ⵉⵡⵔⵉⴽⵏ ⴷ ⵉⵙⴱⴱⴰⴱⵏ ⵏ ⵜⵙⴳⴰ, ⵃⴰⴹⵕⵏ ⵉ ⵜⵎⵙⴰⵔⵜ ⴰⴷ ⵜⴰⵎⵣⵔⴰⵢⵜ ⵢⴰⵜ ⵜⴳⵔⵓⵎⵎⴰ ⵙⴳ ⵉⴳⵎⴰⵎⵏ ⵏ ⵜⵎⵙⵎⵓⵏⵜ ⵏ ⵉⵎⵓⵙⵏⴰⵡⵏ ⵏ ⵙⵓⵙ, ⴷ ⴰⵢⵜ ⵜⵏⵣⴱⴰⵢⵜ ⴷ ⵜⵙⴷⵔⴰⵙⵜ ⵏ ⵓⵙⴷⵔⴼⵉ, ⴷ ⵉⵡⵔⵉⴽⵏ ⵖⵓⵔ ⴰⵜⵉⴳ ⴳ ⵓⵙⵡⵉⵔ ⴰⵏⴰⵎⵓⵔ ⵣⵓⵏ ⴷ ⵍⵃⴰⵊⵊ ⵄⴰⴱⴷ ⴰⵙⵓⵙⵉ, ⴷ ⵓⵅⵏⵏⵓⵛ ⵃⵎⴰⴷ ⵓ ⵍⵃⴰⵊⵊ, ⴷ ⵕⵕⴰⵊⵉ ⵍⵃⴰⵊⵊ ⵍⵃⵓⵙⴰⵢⵏ, ⴷ ⴱⵍⴼⵇⵇⵉⵀ ⵍⵃⴰⵊⵊ ⵃⵎⴰⴷ, ⴷ ⴼⴰⴹⵍ ⵛⵛⵀⵎⴰⵜ, ⴷ ⵍⵖⵓⵍⴰⵎ ⵎⵓⵃⵎⵎⴰⴷ, ⴷ ⵚⵚⵍⵃⵉ ⵎⵓⵃⵎⵎⴰⴷ, ⴷ ⵄⴱⴷⵍⵍⴰⵀ ⴱⴰⵍⴼⵣ, ⴷ ⵎⴰⵙⵙ ⵄⴱⴷⵍⵍⴰⵀ ⵅⵔⴱⵓⵛ, ⴷ ⵓⵍⴰ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵜⴰⵎⵖⵔⵉⴱⵉⵜ ⵉⴳⵍⵍⵉⵏ ⵏ ⵄⴱⴷⵍⵍⴰⵀ ⵉⴱⵕⵀⵉⵎ (ⵜⴰⵙⴰⵖⵓⵍⵜ: ⵜⴰⵡⵍⴰⴼⵜ ⵜⴰⴼⵓⵜⵓⴳⵕⴰⴼⵉⵜ).

ⵉⵙⴱⵔⵔⴽ ⵍⵃⴰⵊⵊ ⵃⵎⴰⴷ ⵓⴳⴷⵓⵔⵜ ⴳ ⵜⴼⵔⴰⵡⵜ, ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵙⵎⵎⵓⵙ, ⴳ ⵢⴰⵏ ⵓⵙⴱⵔⵔⴽ ⵉⴳⴰⵏ ⵡⴰⵥ, ⵉⵙⵎⵎⵖⵔ ⵜ ⴱⴰⴱ ⵏ ⵡⴰⴷⴷⵓⵔ ⵢⴰⵍⵖ ⵜ ⵅⴼ ⵜⵖⵏⵙⴰ ⵏⵏⵙ ⴼ ⵓⵙⴷⵔⴼⵉ, ⵏⵉⵖ ⴼ ⵜⵡⵓⵔⵉ ⴳ ⵜⵓⵚⴽⴰ ⵏ ⵢⴰⵏ ⵍⵎⵖⵔⵉⴱ ⴰⵎⴰⵢⵏⵓ, ⴷ ⵔⴰⴷ ⴷ ⵉⴽⵯⵜⵜⵉ ⵢⴰⵏ ⵍⵃⴰⵊⵊ ⵃⵎⴰⴷ ⵓⴳⴷⵓⵔⵜ ⵜⵉⵣⵉ ⵏⵏⴰ ⵉⵙⵙⴼⵍⴷ ⵉ ⵉⴳⵣⵎⴰⵏ ⵉⵎⵖⵍⴰⵍⵏ ⵏⵏⴰ ⵉⵙⵉⴷⵔⵏ ⵜⴰⵎⵙⴰⵔⵜ ⴰⵏⵏ ⵜⴰⵎⵣⵔⴰⵢⵜ ⴳ ⵓⵃⵡⴰⵛ; ‘’ ⵡⴰⵀⵍⵉ ⵡⴰⵀⵍⵉ ⵡⴰ ⵙⵉⴷⵉ ⵃⵎⴰⴷ ⵓ ⵢⵓⵙⴼ ⵉ’’ ⵙⵎⵓⵔⴳⵏ ⵜⵜ ⵉⵙⵜ ⵉⵎⵉ ⵏ ⵜⵉⵣⵖⵜ, ⵉⵜⵜⵓⵙⴽⴰⵔ ⵓⵙⴼⵓⴳⵍⵓ ⴳ ⵢⵉⵎⵉ ⵏ ⵓⵙⵉⵔⴰ ⴰⵏⴰⵎⵎⴰⵙ ⵏ ⵜⴼⵔⴰⵡⵜ.

ⵉⴳ ⵏⵡⵉⵔⵔⵉ ⵙ ⵓⵎⵣⵔⵓⵢ ⵉⵇⵇⴰⵏ ⴷ ⴰⴷ ⵏⵏ ⵏⴰⴼ ⴳ ⵜⵙⵏⵉⵡⵉⵏ ⵏⵏⵙ ⵓⵏⵥⵉⵥⵏ ⴷ ⵉⵡⵔⵉⴽⵏ ⴷ ⴰⵢⵜ ⵓⵎⵓⴽⵏ ⴷ ⵉⵎⵉⵖⵉⵙⵏ ⵓⵔ ⵜⵜ ⵉⵏⵏ ⵊⵊⵓ ⵔⵎⵙⵏ ⵎⵉⴷⴷⵏ ⵉⵡⵜⵜⴰⵙⵏ ⵏⵏⵙ ⴳ ⵓⵎⵓⴽⵏ, ⴰⵔ ⴷ ⵜⵣⵔⵉ ⵜⵉⵣⵉ, ⴳ ⵡⴰⵏⴰⵡ ⴰⴷ ⴷⵉⴳⵙⵏ ⵍⵃⴰⵊⵊ ⵃⵎⴰⴷ ⵓⴳⴷⵓⵔⵜ ⴰⵎⴰⵡⴰⵢ ⵉⵎⵉⵖⵉⵙ ... ⵍⵍⵉⴳ ⵜ ⵙⵙⵕⵎⵉⵏ, ⵉⵏⵏⴰ ⴰⵙⵏ: ⵓⵔ ⴳⵉⵖ ⴰⵎⵓⵣⵔ ... ⵎⴰⵛⴰ ⵔⴰⴷ ⴷ ⵢⴰⵛⴽ ⵓⵎⵓⵣⵔ ⵏⵏⴰ ⵔⴰⴷ ⴽⵯⵏ ⵉⵙⵙⵓⵙⵎ.

ⵢⴰⵏ ⵡⴰⵙⵙ ⴳ ⵡⵓⵙⵙⴰⵏ ⵉⵡⴰⵜⵙ ⵢⴰⵏ ⵙⴳ ⵓⵙⵓⵏⵏ, ⵓⵔ ⵉⵏⵏ ⴳⵉⵙ ⵢⵓⴼⴰ ⵖⴰⵙ ⵢⴰⵏ ⵓⴼⴳⴰⵏ, ⵉⵙⴰⵇⵙⴰ ⵜ ⵅⴼ ⴰⵢⵜ ⵜⵎⴰⵣⵉⵔⵜ, ⵢⵉⵏⵉ ⴰⵙ ⵀⴰⵜⵉ ⵓⵔ ⵜⴰ ⴷ ⵊⵊⵓ ⴼⴼⵖⵏ ⵙⴳ ⵜⴳⵯⵎⵎⴰ ⵏⵏⵙⵏ, ⵉⵖⵔ ⴰⵙⵏ ⴰⴽⴽⵯ, ⵍⵍⵉⵖ ⴷ ⵃⴰⴹⵕⵏ, ⵉⵏⵏⴰ ⴰⵙⵏ: ‘’ ⵎⴰⵅⵅ ⵓⵔ ⵜⴼⵜⵉⵎ ⵙ ⵜⴼⵔⴰⵡⵜ ⴰⴷ ⵜⵙⵉⴳⴳⵍⵎ ⵉⵣⵔⴼⴰⵏ ⵏⵏⵓⵏ, ⵉⵔⴰⵔ ⴰⵙ ⴷ ⵢⴰⵏ, ⵡⵉⵍⵍⵉ ⴰⵖ ⴷ ⵉⵣⵡⴰⵔⵏ ⴼⵜⴰⵏ ⵙ ⵜⴼⵔⴰⵡⵜ ⴰ ⵙⵉⴷⵉ ⵓⵔ ⴷ ⵉⵡⵉⵏ ⴰⵎⵢⴰ, ⵙ ⵓⵔⴼⴰⵏ ⵉⵏⵏⴰ ⴰⵙⵏ ⵍⵃⴰⵊⵊ ⵃⵎⴰⴷ ⴰⴷ ⵜ ⵉⵕⵃⵎ ⵕⴱⴱⵉ: ⵜⵜⵔⴰⵜ ⵕⴱⴱⵉ ⴰⴷ ⵉⵢⵉ ⵏⵏ ⴼⵍⵍⴰⵡⵏ ⵢⴰⵙⵉ, ⴰⵎⵎⴰ ⴰⵎⵓⵣⵔ ⵓⵔ ⵜ ⴳⵉⵖ’’.

ⵉⵎⵎⵓⴷⴷⵓ ⵍⵃⴰⵊⵊ ⵃⵎⴰⴷ ⵙ ⴷⴰⵔ ⵕⴱⴱⵉ ⵏⵏⵙ, ⵎⴰⵛⴰ ⵓⵔ ⵎⵎⵓⴷⴷⴰⵏⵜ ⵜⵡⵓⵔⵉⵡⵉⵏ ⵏⵏⵙ ⴷ ⵜⵉⵏⴷⵉⵜⵉⵏ ⴷ ⵉⵎⵏⵣⴰⵢⵏ ⵏⵏⵙ, ⵔⴰⴷ ⴱⴷⴷⴰ ⵖⴰⵎⴰⵏⵜ ⴳ ⵡⴰⵏⵍⵍⵉⵜⵏ ⵏ ⵡⵉⵍⵍⵉ ⵜ ⴷⴷⵔⵏⵉⵏ, ⴰⵡⵉⵏ ⴷ ⴷⴰⵔⵙ ⵜⵉⵡⵏⴳⵉⵎⵉⵏ ⵉⵙⵓⴼⵓⵏ, ⴷ ⵉⴳ ⴰⵎⴷⵢⴰ ⵏ ⵜⵎⴽⵔⵔⴰ ⴷ ⵜⵥⵉⴹⵕⴰ ⵉ ⵜⵏⴰⴼⵓⵜ ⵜⴰⵎⴰⵜⴰⵢⵜ, ⵉⴽⴽ ⵜⵜ ⵉⵏⵏ ⵉⴳⵍⵍⵉⵏ ⴷ ⴰⵔⴳⴰⵣ ⴰⵅⴰⵜⴰⵔ ⵢⵓⵙⵉⵏ ⵜⴰⵎⴰⵙⴰⵢⵜ ⵙ ⵓⵖⵓⴷⵓ, ⵓⵔ ⵜ ⵊⵊⵓ ⵜⵉⵡⵉ ⴷⴷⵓⵏⵉⵜ ⵓⵍⴰ ⴰⴷⴷⵓⵔ ⵏ ⵜⵏⴱⴰⴹⵜ, ⵎⴰⵛⴰ ⵉⴽⴽⴰ ⵜⵜ ⵉⵏⵏ ⵉⵔⴰ ⴰⴼⵓⵍⴽⵉ ⵉ ⴽⵓ ⵢⴰⵏ.