ⵡⵉⴽⵉⴱⵉⴷⵢⴰ:ⵜⴰⵙⵏⴰ ⵏ ⵓⵙⵏⵓⴱⴳ/ⴰⵎⵏⵏⵉ ⴰⴼⴰⵍⴽⴰⵢ/5
ⵜⴰⵥⵕⵡⴰⵍⵜ (ⵙ ⵜⴰⵄⵔⴰⴱⵜ: تزروالت , ⵙ ⵜⴼⵕⴰⵏⵚⵉⵚⵜ: Tazeroualt) ⵜⴳⴰ ⵢⴰⵏ ⵓⴷⵖⴰⵔ ⴰⵎⵣⵔⴰⵢ ⵉⵍⵍⴰⵏ ⵖ ⵙⵓⵙ ⵖ ⵉⴼⴼⵓⵙ ⵏ ⵍⵎⵖⵔⵉⴱ, ⵍⵍⵉ ⵜⵜ ⵏⵏ ⵉⴽⴽⴰⵏ ⵖ ⵎⴰ ⴰⴷ ⵉⵣⵔⵉⵏ ⵜⴳⴰ ⵜⴰⵎⴰⵣⵉⵔⵜ ⵜⴰⵙⵉⵎⴰⵏⵜ ⵖ ⵜⴰⵙⵓⵜ ⵜⵉⵙ ⵙⴰ ⴷ ⵎⵔⴰⵡⵜ. ⵜⴻⵜⵜⵓⵢⵏⴱⴰⴹ ⵣⵖ ⵜⵎⴰⵥⵓⵏⵜ ⵏⵏⵙ ⵉⵍⵉⵖ ⵖ ⵉⴷⵔⴰⵔⵏ ⵏ ⵡⴰⵟⵍⴰⵚ ⵎⵥⵥⵉⵢⵏ. ⵖ ⵜⵉⵣⵉ ⵍⵍⵉ ⵖ ⴰⴽⴽⵯ ⵜⵎⵇⵇⵓⵔ ⵜⴳⵍⴷⵉⵜ ⵏ ⵜⵥⵕⵡⴰⵍⵜ, ⵜⵖⵯⵉ ⵣⵖ ⵓⴳⴰⵔⵓ ⴰⵟⵍⴰⵏⵜⵉ ⴰⵔ ⵜⴰⵙⴳⴰ ⵏ ⵜⵓⵡⴰⵜ ⵍⵍⵉ ⵉⵍⵍⴰⵏ ⵖⵉⵍⴰⴷ ⵖ ⵉⴳⴳⵉ ⵏ ⵡⴰⴽⴰⵍ ⴰⴷⵣⴰⵢⵔⵉ, ⵜⵏⴱⴹ ⵢⴰⵜ ⵜⵙⴳⴰ ⴱⴰⵀⵔⴰ ⵉⵎⵇⵇⵓⵔⵏ ⴳ ⵜⵏⵣⵔⵓⴼⵜ.
ⵉⴳⴰ ⵃⵎⴰⴷ ⵓ ⵎⵓⵙⴰ ⴰⵔⴳⴰⵣ ⵍⵍⵉ ⴷ ⴰⴽⴽⵯ ⵉⵣⵡⴰⵔⵏ ⵉⵙ ⵉⵙⵙⵏⵜⴰ ⴰⵥⵓⵕ ⵏⵖ ⵙⵙⵓⵍⴰⵍⴰ ⵏ ⵜⵥⵕⵡⴰⵍⵜ, ⵉⴽⴽⴰ ⵜⵜ ⵉⵏⵏ ⵉⴳⴰ ⵢⴰⵏ ⵓⴳⵯⵔⵔⴰⵎ ⵓ ⵜⵎⴰⵣⵉⵔⵜ ⵏ ⵙⵓⵙ ⵍⵍⵉ ⵉⵍⵓⵍⵏ ⴳ ⵜⵓⵥⵥⵓⵎⵜ ⵏ ⵜⴰⵙⵓⵜ ⵜⵉⵙ ⵙⵎⵎⵓⵙⵜ ⴷ ⵎⵔⴰⵡⵜ, ⵉⵙⴷⵖⵔ ⴷⴼⴼⵉⵔ ⵎⴰⵢⴰ ⴳ ⵜⵙⴳⴰ ⵏ ⵜⵥⵕⵡⴰⵍⵜ, ⵖⵉⵏⵏ ⴰ ⴳ ⴷ ⵉⵙⵏⵓⵍⴼⴰ ⵣⵣⴰⵡⵉⵜ ⵢⴰⵡⵉ ⴷ ⵜⵉⵎⴰⴹ ⵏ ⵉⵎⴹⴼⴰⵕⵏ, ⵏⵏⴰ ⴷ ⴷⴰⵔⵙ ⵉⵜⵜⴰⵛⴽⴰⵏ ⴰⴼⴰⴷ ⴰⴷ ⵍⵎⴷⵏ ⵜⵉⵖⴰⵡⵙⵉⵡⵉⵏ ⵉⵣⴷⵉⵏ ⴷ ⵓⵙⴳⴷ ⵏⵏⵙⵏ. ⵉⵟⵟⴼ ⵖ ⵡⴰⴽⵓⴷ ⴰⵏⵏ ⵃⵎⴰⴷ ⵓ ⵎⵓⵙⴰ ⵜⴰⵣⴷⴰⵢⵜ ⵉⴼⵓⵍⴽⵉⵏ ⴷ ⵉⵚⵓⵍⵟⴰⵏⵏ ⵉⵙⴰⵄⴷⵉⵢⵏ ⵍⵍⵉ ⵜⵜ ⵉⵏⵏ ⵉⴽⴽⴰⵏ ⵖ ⵜⵏⴱⴰⴹⵜ. ⴰⴷⵖⴰⵔ ⵏⵏⵙ ⴷ ⵡⴰⵜⵉⴳ ⵏⵏⵙ ⵖ ⵓⵙⴳⴷ ⵓⵊⵊⴰⵏ ⵜ ⴰⴷ ⵉⵖⴰⵎⴰ ⴳ ⵓⵙⵡⵉⵔ ⵏⵏⵙ. ⵍⵍⵉⵖ ⵉⵎⵎⵓⵜ, ⴰⴷⵖⴰⵔ ⵍⵍⵉ ⴳ ⵉⵜⵜⵓⵢⵎⴹⴰⵍ ⵓⵔⴳⴰⵣ ⴰⴷ ⵉⴳⴰ ⵣⵓⵏ ⴷ ⵍⵃⵊⵊ.