ⵡⵉⴽⵉⴱⵉⴷⵢⴰ:ⴰⵎⵏⵏⵉ ⵓⴼⵔⵉⵏ/32
ⵉⵍⴰ ⵡⴰⵟⵍⴰⵚ ⴰⵎⵥⵢⴰⵏ ⵢⴰⵜ ⵜⵎⵍⵉⵍⵜ ⵉⵙⵓⴳⵔⵏ, ⵙ ⵓⵙⵔⴰⴳ ⵏ ⵡⴰⵏⵙⴰ ⵏⵏⵙ ⴰⵙⵜⵔⴰⵜⵉⵊⵉ ⵍⵍⵉ ⵖ ⵉⵍⵍⴰ ⴳ ⵜⵓⵥⵥⵓⵎⵜ ⵏ ⵜⵎⴰⵣⵉⵔⵜ ⵏ ⵍⵎⵖⵔⵉⴱ. ⴳⵏ ⵉⴷⵔⴰⵔⵏ ⵏⵏⵙ ⵓⵍⴰ ⵏⵜⵜⵏⵉ ⵢⴰⵏ ⵖ ⵉⵇⴱⵓⵔⵏ ⵍⵍⵉ ⵍⵍⴰⵏⵉⵏ ⵖ ⵉⵙⴳⴳⵯⴰⵙⵏ ⵣⵔⵉⵏⵉⵏ, ⵍⵍⵉⵖ ⵜⴰ ⵓⵔ ⵉⵍⵍⵉ ⵓⴼⴳⴰⵏ ⵖ ⵜⵓⴷⵔⵜ ⴰⴷ. ⵉⵜⵜⴰⵡⵙⵙⴰⵏ ⵡⴰⵟⵍⴰⵚ ⴰⵎⵥⵢⴰⵏ ⵙ ⵓⴱⵓⵖⵍⵓ ⵏ ⵉⵙⵓⴳⴰⵎ ⵏⵏⵙ ⵉⴳⴰⵎⴰⵏⵏ, ⴰⵢⵍⵍⵉ ⵜ ⵉⵜⵜⴰⵊⵊⴰⵏ ⴰⴷ ⵢⵉⵍⵉ ⵅⴼ ⵉⵙⵓⴳⴰⵔ ⵉⴽⵎⴰⵎⵏ ⴷ ⴼⵍⵏⵜ ⵜⴳⵔⴰⵡⵉⵏ ⵜⵉⵏⴼⴳⴰⵏⵉⵏ ⵉⵙⵢⴰⴼⵓⵏ ⴳ ⵉⴳⵔⴰⵏ ⵏⵏⵙ, ⵉⴳ ⵡⴰⵙⵉⴼ ⵏ ⴷⵔⴰ ⴷ ⵡⴰⵙⵉⴼ ⵏ ⵙⵓⵙ ⴷ ⵡⴰⵙⵉⴼ ⵏ ⵡⴰⵍⵖⴰⵙ ⵢⴰⵏ ⵖ ⵉⵙⴰⴼⴼⵏ ⵖⵣⵣⵉⴼⵏⵉⵏ ⵖ ⵓⴷⵖⴰⵔ ⴰⴷ ⴳⵏ ⵎⴰ ⵢⵓⵙⵉⵏ ⵜⵓⴷⵔⵜ ⵏ ⵉⵎⵣⴷⴰⵖⵏ ⵉⵙⴳⴰⴷⴷⴰ ⴰⵙⵏ ⵜⴰⵖⴰⵔⴰⵙⵜ ⵏ ⵜⵉⵔⵎⵜ ⵏⵏⵙⵏ ⴷ ⵓⵙⵔⵜⵓ ⵏ ⵜⵓⴷⵔⵜ ⵍⵍⵉ ⵖ ⴰⴷ ⵉⵍⵉⵏ, ⵉⵍⵉⵏⵜ ⴳⵉⵙ ⵜⵓⴳⵜ ⵏ ⵜⵔⴳⴳⵯⵉⵏ ⵍⵍⴰⵏⵉⵏ ⵖ ⵉⴳⴳⵉ ⵏ ⵉⵙⴰⴼⴼⵏ ⵍⵍⵉ ⵉⵙⵙⵓⵜⵍⵏ ⵉ ⵡⴰⵟⵍⴰⵚ ⴰⴷ ⴰⵎⵥⵢⴰⵏ, ⴰⵔ ⴷ ⴳⵉⵙ ⵜⵜⴰⵎⵥⵏ ⴰⵎⴰⵏ ⵏ ⵜⵉⵙⵙⵉ ⴷ ⵡⴰⵎⴰⵏ ⵏ ⵜⴽⵔⵣⴰ, ⴳⵏ ⵉⵙⴰⴼⴼⵏ ⴰⴷ ⴷ ⵡⵉⵢⵢⴰⴹ ⵢⴰⵜ ⵖ ⵜⵎⵏⵜⴰⵍ ⵍⵍⵉ ⵢⵓⵊⵊⴰⵏ ⴰⴼⴳⴰⵏ ⴰⴷ ⵢⵓⵜ ⵙ ⵉⵥⵓⵕⴰⵏ ⵏⵏⵙ ⵉⵙⵜⵉ ⴰⴷ ⵉⵙⴽⴽⵓⵙ ⵖ ⵓⴷⵔⴰⵔ ⴰⴷ, ⵉⵙⵙⵏⵜⵉ ⴳⵉⵙ ⵜⵓⴷⵔⵜ ⵏⵏⵙ ⴷ ⵉⴽⵍⵓ ⴳⵉⵙ ⵜⴰⵖⵔⵎⴰ ⵏⵏⵙ ⴷ ⵜⵎⵢⵓⵔⵉⵏ ⵏⵏⵙ.
ⴳ ⵓⵎⵣⵡⴰⵔⵓ ⵏ ⵉⵙⵓⴳⴰⵔ ⴰⴷ ⵉⴽⵎⴰⵎⵏ ⴰⵔ ⵏⵜⵜⴰⴼⴰ ⴰⵏⵙⵉⵡⵏ ⵏ ⵜⵥⵓⵕⵉ ⵅⴼ ⵓⵥⵕⵓ ⵙ ⵡⴰⵏⴰⵡⵏ ⵏⵏⵙ ⵖ ⵡⴰⵟⵍⴰⵚ ⴰⵎⵥⵢⴰⵏ ⵙ ⵉⵙⵏⵜⴰⵍ ⴷ ⵉⵎⴰⵎⴽⵏ ⴳⵉⵙ ⵉⵍⵍⴰⵏ, ⵉⵙⵎⵎⵥⵍⵉⵏ ⵉⴷⵔⴰⵔⵏ ⵏ ⵓⴷⵖⴰⵔ ⴰⴷ ⵅⴼ ⵡⴰⵏⵙⵉⵡⵏ ⵢⴰⴹⵏⵉⵏ ⵏ ⵜⵥⵓⵕⵉ ⴳ ⵜⵎⴰⵣⵉⵔⵜ ⵏⵏⵖ, ⵢⵉⵍⵉ ⴳ ⵡⴰⵟⵍⴰⵚ ⴰⵎⵥⵢⴰⵏ ⵜⵓⴳⵜ ⵏ ⵡⴰⵢⴷⴰ ⵍⵍⵉ ⴷ ⴼⵍⵏⵜ ⵜⵓⴳⵜ ⵏ ⵜⵖⵔⵎⵉⵡⵉⵏ ⵍⵍⵉ ⵣⵔⵉⵏⵉⵏ ⴳ ⵓⵎⵣⵔⵓⵢ ⵏ ⵓⴷⵖⴰⵔ ⴰⴷ ⵍⵍⵉ ⵖ ⴷ ⴼⵍⵏⵜ ⵜⵓⴳⵜ ⵏ ⵜⵎⵢⵓⵔⵉⵏ ⴷ ⵜⵓⵙⵏⴰ ⵖ ⵜⵓⴳⵜ ⵏ ⵉⴳⵔⴰⵏ, ⴷ ⴰⵢⵍⵍⵉ ⴷ ⵉⴼⵍ ⵡⴰⵎⵓⵏ ⵏ ⵓⴼⴳⴰⵏ ⵏ ⵉⵙⵏⴼⵍⵓⵍⵏ ⴷ ⵜⵓⵙⵙⵏⵉⵡⵉⵏ ⴷ ⵜⵉⵏⵏⴰⵡⵉⵏ ⴷ ⵡⴰⴹⴰⴷⵏ ⴷ ⵜⵎⵢⴰⵔ ⴷ ⵉⵙⴽⴽⵉⵔⵏ ⴷ ⵡⴰⵏⴰⵡⵏ ⵏ ⵜⵓⴷⵔⵜ ⴷ ⵉⵎⴰⵙⵙⵏ ⵏ ⵓⵏⵢⴰⵍⴽⴰⵎ, ⵙ ⵡⴰⵏⵍⵍⵉ ⴷ ⵡⵓⵍ ⵏⵏⵙ ⴷ ⵡⵉⵏ ⵉⴳⵔⴰⵡⵏ ⵏⵏⵙ ⵅ ⴷⴷⴰⵡⴰ ⵏ ⵓⴷⵔⵉⵣ ⵏ ⵓⵎⵔⴰⵙ ⵍⵍⵉ ⴳ ⵉⵍⵍⴰ ⵓⴼⴳⴰⵏ ⴰⴷ.
ⵜⴳⴰ ⴰⵢⵜ ⴱⴰⵀⴰ ⵏ ⵓⴷⵔⴰⵔ ⵢⴰⵜ ⵜⵖⵔⵎⵜ ⵍⵍⵉ ⵉⵍⵍⴰⵏ ⵖ ⵡⴰⵟⵍⴰⵚ ⴰⵎⵥⵢⴰⵏ ⵖ ⵜⵙⴳⴰ ⵜⴰⵥⵍⵎⴰⴹⵜ ⵏⵏⵙ, ⵍⵍⵉ ⵉⵜⵜⴰⵡⵙⵙⴰⵏⵏ ⵙ ⵉⴷⵔⴰⵔⵏ ⵍⵍⵉ ⵢⵓⵙⵉⵏ ⵜⵓⴳⵜ ⵏ ⵜⵎⵢⵓⵔⵉⵏ ⴷ ⵜⴰⵢⵙⵉ ⵜⴰⵎⴰⵣⵉⵖⵜ ⵉⵙⴳⴳⵯⴰⵙⵏ ⵅⴼ ⵡⵉⵢⵢⴰⴹ ⵣⵓⵏ ⴷ ⵜⵉⵎⵍⵙⴰ ⵍⵍⵉ ⵙⵉⵙ ⵉⵥⵍⵉⵏ ⴷ ⵓⵊⵎⴰⴽ ⴷ ⵜⵎⴷⵢⴰⵣⵉⵏ ⴷ ⵜⵓⵍⵍⵉⵙⵉⵏ ⵍⵍⵉ ⵜⵜⴰⵍⵙⵏ ⵉⵎⵇⵔⴰⵏⵏ ⵉ ⵉⵎⵥⵢⴰⵏⵏ ⵖ ⴽⵔⴰⵢⴳⴰⵜ ⵉⴹ, ⴰⵢⵜ ⴱⴰⵀⴰ ⵏ ⵓⴷⵔⴰⵔ ⵜⴻⵜⵜⴰⵡⵙⵙⴰⵏ ⵙ ⵉⵎⴷⵢⴰⵣⵏ ⵏⵏⵙ ⴷ ⵓⵔⴰⵔⵏ ⵍⵍⵉ ⵉⵜⵜⵎⵓⵏⴰⵏ ⴷ ⵜⵡⵓⵔⵉ ⵏⵏⵙⵏ ⵖ ⵜⵢⵢⵉⵔⵣⴰ ⵏⵖ ⵉⵖ ⴰⵔ ⵎⴳⴳⵔⵏ …, ⵓⵔⴰⵔⵏ ⵉⵙ ⴰⴽⴽⵯ ⴳⵉⵙⵏ ⵉⵏⴳⴹ ⵓⴼⴳⴰⵏ ⵖ ⵜⵙⴳⴰ ⴰⴷ ⴰⵛⴽⵓ ⵖⵉⵏⵏ ⴰⵖ ⴰⵔ ⵉⵙⵙⴰ ⵉⵎⴰⵏ ⵏⵏⵙ ⵢⴰⵍⵍ ⴳⵉⵙ ⵜⵓⴷⵔⵜ ⵏⵏⵙ, ⵉⴳ ⵓⵔⴰⵔ ⵢⴰⵜ ⵖ ⵜⵎⵢⵓⵔⵉⵏ ⵍⵍⵉ ⴷ ⵉⴼⵍ ⵓⴼⴳⴰⵏ ⴰⵇⴱⵓⵔ ⵉ ⵜⴰⵔⵡⴰ ⵏⵏⵙ.