ⵜⵉⵙⵍⵉⵜ ⵏ ⵓⵏⵥⴰⵕ

ⵜⴰⵣⵣⴰⵏⵉⵏ ⵓⵙⵉⵏⵉⵏ ⵜⴰⵖⵏⵊⴰ.

ⵜⴳⴰ ⵜⵙⵍⵉⵜ ⵏ ⵓⵏⵥⴰⵕ ⵏⵖ ⵜⴰⵖⵏⵊⴰ ⵢⴰⵜ ⵜⵎⵢⵓⵔⵜ ⵍⵍⵉ ⵢⵓⵜⵏ ⵙ ⵉⵥⵓⵕⴰⵏ ⴳ ⵓⵎⵣⵔⵓⵢ, ⴷ ⵜⵓⵙⵙⵏⴰ ⵏ ⵉⵎⴰⵣⵉⵖⵏ ⵉⵙⴳⴳⵯⴰⵙⵏ ⴼ ⵉⵙⴳⴳⵯⴰⵙⵏ. ⵜⴳ ⵜⴰⵎⵢⵓⵔⵜ ⵍⵍⵉ ⵉⵜⵜⵉⴷⵔⴰⵙⵏ ⵉⵎⵉⴽⴽ ⵙ ⵉⵎⵉⴽⴽ, ⴰⵔ ⵜⴻⵜⵜⴰⴼⵓⴹ ⵙⴳ ⴳⵔ ⵜⵎⵢⵓⵔⵉⵏ ⵏ ⵓⵎⴰⵣⵉⵖ.

ⵜⴻⵜⵜⵢⴰⵡⵙⵙⴰⵏ ⵜⵎⵢⵓⵔⵜ ⵏ ⵜⵙⵍⵉⵜ ⵏ ⵓⵏⵥⴰⵕ (ⵜⴰⵖⵏⵊⴰ) ⴳ ⵡⴰⴽⴰⵍ ⵏ ⵜⵎⴰⵣⵖⴰ ⴰⴽⴽⵯ, ⵜⵖⴰⵎⴰ ⵜⴳⴰ ⵜⴰⵎⵢⵓⵔⵜ ⵏ ⵎⴷⴷⵏ ⵉⵎⴰⵣⵉⵖⵏ ⵉⵙⴰⵡⴰⵍⵏ ⵜⴰⵎⴰⵣⵉⵖⵜ, ⴰⵡⴷ ⵡⵉⴷ ⵜⵄⵕⵕⴱⵏⵉⵏ ⵉⵣⴷⵖⵏ ⴳ ⵜⵙⴳⴳⵉⵡⵉⵏ ⵏ ⵜⵎⴰⵣⵖⴰ ⵉⵙⴰⵡⴰⵍⵏ ⵜⴰⴷⴰⵔⵉⵊⵜ.

ⵜⴳⴰ ⵜⵎⵢⵓⵔⵜ ⵏ ⵜⵙⵍⵉⵜ ⵏ ⵓⵏⵥⴰⵕ ⵢⴰⵜ ⵜⵎⵢⵓⵔⵜ ⴱⴰⵀⵔⴰ ⵉⴳⴰⵏ ⵜⴰⵣⴰⵢⴽⵓⵜ ⵉⵣⴷⵉⵏ ⴷ ⵓⵙⴳⴷ ⴷ ⵜⵓⵜⵜⵔⴰ ⵏ ⵓⵏⵥⴰⵕ, ⴰⵔ ⵜⵜ ⵉⴷ ⴽⵜⵜⵉⵏ ⵉⵎⴰⵣⵉⵖⵏ ⵖ ⵜⵉⵣⵉ ⵖ ⵉⵣⵡⴰ ⵡⴰⴽⴰⵍ, ⴷⵔⵓⵙⵏ ⵡⴰⵎⴰⵏ, ⵉⵏⵖ ⵉⵔⵉⴼⵉ ⵜⴰⵢⵔⵣⴰ ⴰⵡⴷ ⵉⵙⵙⴽⵯⵍⴰ, ⴰⵡⴷ ⵉⵎⵓⴷⴰⵔ ⴷ ⵓⴼⴳⴰⵏ.

ⵎⵎⵔⵡⴰⵙⵏⵜ ⵜⵖⴰⵔⴰⵙⵉⵏ ⵍⵍⵉ ⵙⴰ ⵣⵣⵔⴰⵢⵏ ⵉⵎⴰⵣⵉⵖⵏ ⵜⴰⵎⵢⵓⵔⵜ ⵏ ⵜⵙⵍⵉⵜ ⵏ ⵓⵏⵥⴰⵕ (ⵜⴰⵖⵏⵊⴰ ) ⴳ ⵡⴰⴽⴰⵍ ⵏ ⵜⵎⴰⵣⵖⴰ ⴰⴽⴽⵯ, ⵉⴷⵔⵓⵙ ⵓⵥⵉⵍⴰⵍ ⴳⵔ ⵜⴰⵎⵢⵓⵔⵜ ⵏ ⴽⵔⴰ ⵏ ⵓⴷⵖⴰⵔ ⴷ ⵜⴰⵢⵢⴰⴹ ⵉⵍⵍⴰⵏ ⴳ ⵓⵙⴳⴰ ⵢⴰⴹⵏⵉⵏ.

ⵜⴰⵎⵢⵓⵔⵜ ⴰⴷ ⵣⵎⵎⵉⵎⵏ ⵜⵜ ⴽⵉⴳⴰⵏ ⵏ ⵉⴷⵍⵉⵙⵏ ⵏ ⵉⵎⴰⵔⴰⵜⵏ ⵏ ⵓⵎⵣⵔⵓⵢ, ⴷ ⵜⵙⵓⵙⵢⵓⵍⵓⵊⵜ, ⴷ ⵜⵓⵙⵙⵏⴰ, ⴷ ⵜⵙⴽⵍⴰ. ⴱⴷⵔⵏ ⵙ ⵓⵣⵓⵣⵣⵔ ⴰⵏⴰⵡⵏ ⵏ ⵜⴼⵓⴳⵍⵉⵡⵉⵏ, ⴷ ⵜⵖⴰⵔⴰⵙⵉⵏ ⵙⴰ ⵣⵣⵔⴰⵢⵏ ⵉⵎⴰⵣⵉⵖⵏ ⵜⴰⵎⵢⵓⵔⵜ ⴰⴷ, ⵥⵍⵉⵏ ⴳⵔ ⵜⵎⵢⵓⵔⵜ ⴷ ⵜⴰⵢⵢⴰⴹ ⴳ ⵜⵎⵏⴰⴹⵉⵏ ⵏ ⵜⵎⴰⵣⵖⴰ, ⴼⵙⵉⵏⵜ ⵜⵎⴰⵜⴰⵔⵉⵏ ⵏ (ⵎⵢⵜⵀ) ⵍⵍⵉ ⴷⵉⵙ ⵜⵓⵙⵉ ⵜⴰⵎⵢⵓⵔⵜ ⴰⴷ ⵏ ⵜⴰⵖⵏⵊⴰ.

ⴰⵏⴰⵎⴽ ⵏ ⵢⵉⵙⵎ

ⵜⴰⵙⵍⵉⵜ ⵏ ⵓⵏⵥⴰⵕ ⵉⴳⴰ ⵜⵜ ⵖ ⴷⴰⵔ ⵉⵎⴰⵣⵉⵖⵏ (ⵙ ⵜⵄⵕⴰⴱⵜ: قوس قزح ⵇⴰⵡⵙ ⵇⵓⵣⴰⵃ), ⵜⴰⴳⵓⵔⵉ ⵏ ⵜⵙⵍⵉⵜ ⵏ ⵓⵏⵥⴰⵕ ⵙ ⵜⵓⵜⵍⴰⵢⵜ ⵏ ⵜⵄⵕⴰⴱⵜ ⵉⴳⴰ ⵜⵜ (عروس المطر ⵄⴰⵕⵓⵙ ⵍⵎⴰⵟⴰⵕ).

ⵜⵉⵙⵍⵉⵜ ⵏ ⵓⵏⵥⴰⵕ ⴳ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵉⵙⵎ ⵏ ⵜⵡⵜⵎⵜ, ⵜⴳ ⵜⵙⵍⵉⵜ ⵖ ⵜⵎⵢⵓⵔⵜ ⴰⴷ ⴳ ⴷⴰⵔ ⵉⵎⴰⵣⵉⵖⵏ ⵜⴰⵎⴰⵜⴰⵔⵜ ⵏ ⵡⴰⴽⴰⵍ, ⵣⴷⵉⵏ ⵜⵜ ⴷ ⵓⵏⵥⴰⵕ.

ⴰⵏⵥⴰⵕ ⵉⴳⴰ ⴳ ⴷⴰⵔ ⵉⵎⴰⵣⵉⵖⵏ ⴷⴰⵜ ⵏ ⵜⵍⴰⵍⵉⵜ ⴰⴽⵓⵛ ⵏ ⵡⴰⵎⴰⵏ, ⴰⵔ ⵜⵜⵉⵏⵉⵏ ⵉⵎⴰⵣⵉⵖⵏ ⴰⵎⴰⵏ ⵏ ⵓⵏⵥⴰⵕ. ⵉⴳ ⵓⵏⵥⴰⵕ ⵖ ⵜⴰⵎⵢⵓⵔⵜ ⵏ ⵜⵖⵏⵊⴰ ⴰⵎⴰⵜⴰⵔ ⵏ ⵉⴳⵏⵏⴰ.

ⵜⴰⵖⵏⵊⴰ: ⴰⵖⵏⵊⴰ ⵏ ⵓⴽⵛⵛⵓⴹ ⵎⵇⵇⵓⵕⵏ, ⵖ ⵜⵎⵢⵓⵔⵜ ⵏ ⵜⵖⵏⵊⴰ ⵏ ⵓⵏⵥⴰⵕ (ⵜⴰⵙⵍⵉⵜ ⵏ ⵓⵏⵥⴰⵕ) ⴰⵔ ⵣⴷⴰⵢⵏ ⴰⵖⵏⵊⴰ ⴷ ⵓⵖⴰⵏⵉⵎ ⵉⵖⵣⵣⵉⴼⵏ ⵉⴹⵏⵉⵏ, ⵙⵙⵍⵙⵏ ⴰⵙ ⵜⵉⵎⵍⵙⵉⵜ ⵏ ⵜⵙⵍⵉⵜ ⵉⵍⴰⵏ ⴽⵉⴳⴰⵏ ⵏ ⵉⴽⵯⵍⴰⵏ, ⴰⴳⵯⵍⵏ ⴰⵙ ⵜⵉⵣⵕⵣⴰ ⵏ ⵏⵇⵇⵕⵜ.

ⵜⴰⵎⵢⵓⵔⵜ ⴰⴷ ⵏ ⵜⵙⵍⵉⵜ ⵏ ⵓⵏⵥⴰⵕ ⵜⴳⴰ ⴰⵙⵙⴽⵜⵉ/ⴰⴽⵜⵜⴰⵢ, ⵏ ⵜⵎⵖⵔⴰ ⵍⵍⵉ ⵜⴱⴷⵔ ⵜⵎⴰⵛⴰⵀⵓⵜ, ⵍⵍⵉⵖ ⵙⵜⴰⵀⵍⵏ ⵎⵉⴷⴷⵏ ⵢⴰⵜ ⵜⵔⴱⵉⵜ ⵜⴰⴼⴰⵍⴽⴰⵢⵜ ⵉ ⵓⵏⵥⴰⵕ, ⵙⵙⵍⵙⵏ ⵉ ⵜⵙⵍⵉⵜ ⴳ ⵡⴰⴽⵓⴷⴰⵏⵏ ⵜⵉⵎⵍⵙⴰ ⵉⵕⵛⵎⵏ ⵙ ⴽⵉⴳⴰⵏ ⵏ ⵉⴽⵯⵍⴰⵏ. ⵜⴳ ⵜⵎⵢⵓⵔⵜ ⴰⴷ ⵓⵍⴰ ⵜⵓⵜⵜⵔⴰ ⵏ ⵎⵉⴷⴷⵏ ⵉ ⵡⴰⴽⵓⵛ ⵏ ⵡⴰⵎⴰⵏ, ⵃⵎⴰ ⴰⴷ ⴷ ⵉⴽⵜⵉ ⴰⴽⴰⵍ ⵙ ⵉⵎⵉⴽⴽ ⵏ ⵓⵏⵥⴰⵕ.

ⴰⵏⵥⴰⵕ ⵉⴳⴰ ⴳ ⴷⴰⵔ ⵉⵎⴰⵣⵉⵖⵏ ⵓⵔⵜⴰ ⵜⵍⵍⵉ ⵜⵍⴰⵍⵉⵜ ⴰⴽⵓⵛ ⵏ ⵡⴰⵎⴰⵏ, ⴰⵔ ⵜⵜ ⵉⵏⵉⵏ ⵉⵎⴰⵣⵉⵖⵏ ⴰⵎⴰⵏ ⵏ ⵓⵏⵥⴰⵕ. ⵉⴳ ⵓⵏⵥⴰⵕ ⵖ ⵜⴰⵎⵢⵓⵔⵜ ⵏ ⵜⵖⵏⵊⴰ ⴰⵎⴰⵜⴰⵔ ⵏ ⵉⴳⵏⵏⴰ.

ⵜⴰⵖⵏⵊⴰ ⵢⴰⵏ ⵓⵖⵏⵊⴰ ⵏ ⵓⴽⵛⵛⵓⴹ ⵎⵇⵇⵓⵕⵏ, ⴳ ⵜⵎⵢⵓⵔⵜ ⵏ ⵜⵖⵏⵊⴰ ⵏ ⵓⵏⵥⴰⵕ (ⵜⴰⵙⵍⵉⵜ ⵏ ⵓⵏⵥⴰⵕ) ⴰⵔ ⵣⴷⴰⵢⵏ ⴰⵖⵏⵊⴰ ⴷ ⵓⵖⴰⵏⵉⵎ ⵉⵖⵣⵣⵉⴼⵏ ⵉⴹⵏⵉⵏ, ⵙⵙⵍⵙⵏ ⴰⵙ ⵜⵉⵎⵍⵙⵉⵜ ⵏ ⵜⵙⵍⵉⵜ ⵉⵍⴰⵏ ⴽⵉⴳⴰⵏ ⵏ ⵉⴽⵯⵍⴰⵏ, ⴰⴳⵍⵏ ⴰⵙ ⵜⵉⵣⵕⵣⴰ ⵏ ⵏⵏⵇⵕⵜ.

ⵜⴰⵎⵢⵓⵔⵜ ⴰⴷ ⵏ ⵜⵙⵍⵉⵜ ⵏ ⵓⵏⵥⴰⵕ ⵜⴳⴰ ⴰⵙⵙⴽⵜⵉ, ⵏ ⵜⵎⵖⵔⴰ ⵍⵍⵉ ⵜⴱⴷⵔ ⵜⵎⴰⵛⴰⵀⵓⵜ, ⵍⵍⵉⴳ ⵙⵜⴰⵀⵍⵏ ⵎⵉⴷⴷⵏ ⵢⴰⵜ ⵜⵔⴱⵉⵜ ⵜⴰⴼⴰⵍⴽⴰⵢⵜ ⵉ ⵓⵏⵥⴰⵕ, ⵙⵙⵍⵙⵏ ⵉ ⵜⵙⵍⵉⵜ ⴳ ⵡⴰⴽⵓⴷⴰⵏⵏ ⵜⵉⵎⵍⵙⴰ ⵉⵕⵛⵎⵏ ⵙ ⴽⵉⴳⴰⵏ ⵏ ⵉⴽⵯⵍⴰⵏ. ⵜⴳ ⵜⵎⵢⵓⵔⵜ ⴰⴷ ⵓⵍⴰ ⵜⵓⵜⵜⵔⴰ ⵏ ⵎⴷⴷⵏ ⵉ ⵡⴰⴽⵓⵛ ⵏ ⵡⴰⵎⴰⵏ, ⵃⵎⴰ ⴰⴷ ⴷ ⵉⴽⵜⵉ ⴰⴽⴰⵍ ⵙ ⵉⵎⵉⴽⴽ ⵏ ⵓⵏⵥⴰⵕ.

ⴰⵥⵓⵕ ⵏ ⵢⵉⵙⵎ

ⵏⵏⴰⵏ ⵉⵎⵔⵣⵓⵜⵏ ⵍⵍⵉ ⵉⵙⵉⴳⴳⵉⵍⵏ ⵙ ⵓⵥⵓⵕ ⵏ ⵜⵎⵢⵓⵔⵜ ⴰⴷ ⵏ ⵜⵙⵍⵉⵜ ⵏ ⵓⵏⵥⴰⵕ, ⵎⴰⵙ ⵜⵙⵙⴼⴰⵍ ⵙ ⵢⴰⵜ ⵜⵎⴰⵛⴰⵀⵓⵜ ⵉⵍⵓⵍⵏ ⵖ ⵉⴷⵓⵔⴰⵔ ⵏ ⵍⴰⵡⵔⴰⵙ (ⵖ ⴷⵣⴰⵢⵔ). ⵜⵉⵍⵉ ⵜⴷⴷⵔ ⵖ ⵉⵍⵙ ⵏ ⵓⵎⴰⵣⵉⵖ ⵙⴳ ⵜⵙⵓⵜⵉⵏ ⵏⵏ ⵢⴰⴳⴳⵓⴳⵏ ⴰⵔ ⵖⵉⵍⴰⴷ. ⴱⴷⵔⵏ ⵜⵜ ⵎⴷⴷⵏ ⴳ ⵜⵎⴰⵣⵖⴰ ⴰⴽⴽⵯ.

ⵜⵙⵙⴼⴰⵍ ⵜⵎⴰⵛⴰⵀⵓⵜ ⵙ ⵜⴰⵢⵔⵉ ⵏ ⵡⴰⴽⵓⵛ ⵏ ⵡⴰⵎⴰⵏ (ⴰⵏⵥⴰⵕ), ⵍⵍⵉⵖ ⵉⵥⵕⴰ ⵢⴰⵜ ⵜⵔⴱⵉⵜ ⵜⴰⴼⴰⵍⴽⴰⵢⵜ ⵉⵍⵍⵉⵙ ⵏ ⵉⴷⵓⵔⴰⵔ ⵏ ⵍⴰⵡⵔⴰⵙ, ⴰⵔ ⵜⵜⵓⵔⴰⵔ ⵖ ⵡⴰⵎⴰⵏ ⵏ ⵡⴰⵙⵉⴼ ⵜⵃⵎⵍ ⴱⴰⵀⵔⴰ ⴰⵎⴰⵏ, ⴰⵔ ⵜⵙⵙⵉⵔⵉⴷ ⵓⴷⵎ ⵏⵏⵙ, ⴷ ⵉⴼⴰⵙⵙⵏ ⵏⵏⵙ, ⴷ ⵉⴹⴰⵕⵏ ⵏⵏⵙ, ⵉⵥⵕ ⵜⵜ ⵉⵃⵎⵍ ⵜⵜ. ⵜⴰⵔⴱⵉⵜ ⵜⴳⴰ ⵙ ⵉⵙⵎ (ⵜⴰⵙⵍⵉⵜ). ⵢⵉⵔⵉ ⵓⵏⵥⴰⵕ ⵜⴰⴼⵔⵓⵅⵜ ⴰⴷ, ⵜⵊⴷⵔ ⵜⴰⵢⵔⵉ ⵏⵏⵙ ⵓⵍ ⵏⵏⵙ, ⵉⴳⴳⵯⵣ ⴷ ⵓⵏⵥⴰⵕ ⵣⵖ ⵉⴳⵏⵡⴰⵏ ⵙ ⵡⴰⴽⴰⵍ, ⵉⵙⵉⴳⴳⵍ ⵜⵜ ⵉ ⵍⵉⵜⵉⵀⴰⵍ, ⵎⴰⵛⵛ ⵜⴰⵙⵍⵉⵜ ⵜⵓⴳⵉⵜ, ⵜⴽⵙⵓⴹ ⴰⵢⵜ ⵜⵇⴱⵉⵍⵜ ⵏⵏⵙ, ⵡⴰⵅⵅⴰ ⵜ ⵓⴽⴰⵏ ⵜⵔⴰ ⴰⵡⴷ ⵏⵜⵜⴰⵜ.

ⵍⵍⵉⵖ ⵜⵓⴳⵉ ⵜⵉⵙⵍⵉⵜ ⴰⵏⵥⴰⵕ ⵙ ⵍⵉⵜⵉⵀⴰⵍ, ⵉⵖⴰⵎⴰ ⵓⵏⵥⴰⵕ ⴰⴽⵓⴷ ⴰⵏⵏ ⵉⴷⴷⵔ ⵖ ⵓⵏⴽⴽⵉⴷ, ⵜⵉⵍⵉ ⵜⵛⴰⴳⴰ ⵖ ⵓⵍ ⵏⵏⵙ, ⵉⵜⵜⵓ ⴰⴽⴰⵍ, ⵉⴱⴱⵉⵏ ⵓⵏⵥⴰⵕ ⴼ ⵜⵓⴷⵔⵜ ⵖ ⵉⴳⴳⵉ ⵡⴰⴽⴰⵍ. ⵉⵏⵖ ⵉⵔⵉⴼⵉ ⵎⵉⴷⴷⵏ, ⵉⵣⵓ ⵡⴰⴽⴰⵍ, ⴷⵔⵓⵙⵏ ⵡⴰⵎⴰⵏ, ⵉⵍⵉ ⴼⴰⴷ ⵉⴳⴳⵓⵜⵏ ⵖ ⵉⵙⵙⴽⵯⵍⴰ ⴷ ⵜⴰⵢⵔⵣⴰ ⴷ ⵉⵎⵓⴷⴰⵔ, ⵜⵖⵓⴼ ⵜⵓⴷⵔⵜ.

ⵜⴰⵙⵍⵉⵜ ⴰⵡⴷ ⵏⵜⵜⴰⵜ ⵎⵎⵕⵥⴳⵏ ⵓⵙⵙⴰⵏ ⵏⵏⵙ, ⵙⵙⵓⵜⵔⵏ ⵜⵜ ⵎⵉⴷⴷⵏ ⴰⴷ ⵜⴰⵀⵍ ⵙ ⵓⵏⵥⴰⵕ (ⴰⴽⵓⵛ ⵏ ⵡⴰⵎⴰⵏ), ⵜⵉⵔⵉ ⵎⴰⵢⴰⵏ ⵙ ⵜⵓⵎⵔⵜ ⴳⴳⵓⵜⵏ.

ⵍⵍⵉⵖ ⵉⵍⴽⵎ ⵡⴰⵙⵙ ⵏ ⵜⵎⵖⵔⴰ, ⵙⵙⵍⵙⴰⵏ ⵉ ⵜⵙⵍⵉⵜ ⵜⵉⵎⵍⵙⴰ ⵖ ⵍⵍⴰⵏ ⴽⵉⴳⴰⵏ ⵏ ⵉⴽⵯⵍⴰⵏ, ⴰⴳⵯⵍⵏ ⴰⵙ ⵉⵥⵕⵥⴰ ⵏ ⵏⵇⵇⵕⵜ ⴷ ⵜⵣⴱⴳⴰⵜⵉⵏ ⵏ ⵓⵔⵖ, ⵉⴳⴳⵯⵣ ⴷ ⵓⵏⵥⴰⵕ ⵣⵖ ⵉⴳⵏⵡⴰⵏ ⵉⵙⵙⵓⵙⵎⵜ ⵡⴰⵙⵙ ⴰⵏⵏ, ⵉⵜⴰⵀⵍ ⵜⵜ ⵢⴰⵡⵉ ⵜⵜ ⵖⵍⵉⵏ ⵙ ⵉⴳⵏⵡⴰⵏ, ⵜⵕⵥⵎ ⵜⴰⴳⵓⵜ ⵉ ⵡⴰⵎⴰⵏ ⵉⵍⵉ ⵓⵏⵥⴰⵕ ⵉⵙⵓ ⵡⴰⴽⴰⵍ, ⵜⴱⵓⵖⵍⵓ ⵜⵓⴷⵔⵜ.

ⵜⵜⵢⴰⵡⵙⵙⴰⵏ ⵜⵎⵢⵓⵔⵜ ⵏ ⵜⵙⵍⵉⵜ ⵏ ⵓⵏⵥⴰⵕ, ⵖ ⵜⵎⴰⵣⵖⴰ ⴰⴽⴽⵯ, ⵖ ⴽⵓ ⵜⴰⵎⵏⴰⴹⵜ, ⵉⵍⵍⴰ ⵎⴰ ⵖ ⵜⵜⵢⴰⵡⵙⵙⴰⵏ ⵙ ⵜⴰⵖⵏⵊⴰ, ⵉⵍⵉ ⵎⴰⵖ ⵜⵙⵙⵏ ⵎⵉⴷⴷⵏ ⵙ ⵜⴰⵖⵏⵊⴰ ⴰⵡⴷ ⵜⴰⵙⵍⵉⵜ ⵏ ⵓⵏⵥⴰⵕ, ⵜⴳⴰ ⵜⴰⵎⵢⵓⵔⵜ ⴰⴷ ⵜⵓⵜⵜⵔⴰ ⵏ ⵓⵏⵥⴰⵕ.

ⵖ ⴽⵔⴰ ⵉⴳⴰ ⵜⵜ ⴰⴷⵡⵡⴰⵕ ⵏⵉⵖ ⵜⴰⵇⴱⵉⵍⵜ ⴰⵔ ⵜⵜ ⵎⵓⵏ ⵢⴰⵜ ⵜⵔⴰⴱⴱⵓⵜ ⵏ ⵉⴼⵔⴰⵅ ⵎⵥⵥⵉⵏ ⴷ ⵜⵎⵖⴰⵔⵉⵏ ⴷ ⵜⵔⴱⴰⵜⵉⵏ, ⵣⴷⵉⵏ ⴰⵖⵏⵊⴰ ⵎⵇⵇⵓⵕⵏ ⴷ ⵓⵖⴰⵏⵉⵎ ⵉⵖⵣⵣⵉⴼⵏ ⵙⵙⵍⵙⵏ ⴰⵙ ⵜⵉⵎⵍⵙⵉⵜ ⵏ ⵜⵙⵍⵉⵜ ⴰⵙⵉⵏ ⵜⵜ ⴰⵔ ⵙⵉⵙ ⵜⴽⴽⴰⵏ ⴰⴷⵡⵡⴰⵕ ⵜⵉⴳⵯⵎⵎⴰ ⴷ ⵉⵙⵡⴰⴽ ⴰⵔ ⵜⵜ ⴰⵎⵥⵏ ⵜⴰⵡⴼⴽⵉⵡⵉⵏ ⵣⵖ ⴷⴰⵔ ⵎⵉⴷⴷⵏ, ⴰⵔ ⵜⵏ ⵜⵕⵓⵛⵛⵏ ⵎⵉⴷⴷⵏ ⵙ ⵡⴰⵎⴰⵏ, ⵉⵖ ⵙⵎⵓⵏⵏ ⵜⴰⵡⴼⴽⵉⵡⵉⵏ ⵣⵖ ⴷⴰⵔ ⵉⵎⵣⴷⴰⵖ ⴷⴷⵓⵏ ⵙⵙⵓⵜⵍⵏ ⵜⴰⵖⵏⵊⴰ ⵏ ⵓⵏⵥⴰⵕ ⵉ ⵉⴳⵯⵔⵔⴰⵎⵏ, ⴰⵔ ⵙⵎⵓⵔⵉⴳⵏ ⵉⵣⵍⴰⵏ ⵙ ⵜⵎⴰⵣⵉⵖⵜ ⵏⵉⵖ ⴷⴷ ⵙ ⴷⴷⴰⵔⵉⵊⴰ. ⴽⵔⴰ ⵉⴳⴰ ⵜⵜ ⵜⴰⵎⴰⵣⵉⵔⵜ ⵉⵥⵍⵉ ⵉⵣⵍⵉ ⵍⵍⵉ ⵜⵜⵉⵏⵉⵏⵜ ⵜⵎⵖⴰⵔⵉⵏ ⴰⵙⵙ ⴰⵏⵏ, ⵎⴰⵛⵛ ⵉⵣⵍⴰⵏ ⴰⴽⴽⵯ ⴳⴰⵏ ⵜⵓⵜⵜⵔⴰ ⵉ ⵕⴱⴱⵉ ⴰⴷ ⴰⵙⵏ ⴷ ⵉⴼⴽ ⴰⵏⵥⴰⵕ. ⴷⴷⵓⵏ ⵙ ⵉⴳⴳⵉ ⵏ ⴽⵔⴰ ⵏ ⵜⵡⵔⵉⵔⵜ ⵉⵍⵍⴰ ⵖ ⵜⴰⵎⴰ ⵏ ⴽⵔⴰ ⵏ ⵡⴰⵙⵉⴼ, ⵏⵉⵖ ⴽⵔⴰ ⵏ ⵜⵔⴳⴰ, ⵏⵉⵖ ⵜⴰⵎⴷⴰ ⵏ ⵡⴰⵎⴰⵏ ⵏⵉⵖ ⴷⴷ ⴽⵔⴰ ⵉⴼⵔⵉ, ⵙⵔⵙⵏ ⵉⵙⴳⴳⵯⵉ ⵏ ⵜⵡⴰⴼⴽⵉⵡⵉⵏ, ⵙⵙⵏⵓⵏ ⵜ ⵜⵎⵖⴰⵔⵉⵏ ⵜⴰⴳⵯⵍⵍⴰ ⵏ ⵓⵡⵔⵔⵏ ⵏ ⵓⵣⵏⴱⵓ ⵏⵉⵖ ⵉⴱⵔⵉⵏ ⵏ ⵓⵙⵏⴳⴰⵔ ⵏⵉⵖ ⵡⵉⵏ ⵜⵎⵥⵉⵏ, ⵏⵉⵖ ⵉⵖ ⵓⵎⵙⵏ ⵜ ⴰⴱⴰⵜⵜⴰⵍ. ⵛⵛⵏ ⵎⵉⴷⴷⵏ ⴷⵔⵓⵏ ⵜⵉⵔⵎⵜ ⵏ ⵜⵎⵢⵓⵔⵜ ⵏ ⵡⴰⵙⵙ ⴰⵏⵏ, ⵙⵙⵓⵜⵔⵏ ⵜ ⵜⵎⵖⴰⵔⵉⵏ ⴷ ⵜⴰⵣⵣⴰⵏⵉⵏ ⵣⵖ ⴱⴰⴱ ⵏ ⵉⴳⵏⵡⴰⵏ ⴷ ⵡⴰⴽⴰⵍ ⴰⴷ ⴰⵙⵏ ⴷ ⵉⴼⴽ ⴰⵏⵥⴰⵕ, ⵉⴱⵓⵖⵍⵓ ⵡⴰⴽⴰⵍ ⵜⵣⴷⴷⵉⴳ ⵜⵓⴷⵔⵜ.

ⴽⵔⴰ ⵉⴳⴰ ⵜⵜ ⵜⴰⵎⴰⵣⵉⵔⵜ ⵜⵥⵍⵉ ⵜⵖⴰⵔⴰⵙⵜ ⵏⵏⵙ ⵖ ⵜⵎⵍⵙⵉⵜ ⵍⵍⵉ ⵙⵙⵍⵙⴰⵏ ⵉ ⵜⵖⵏⵊⴰ, ⴷ ⵡⴰⵏⴰⵡⵏ ⵏ ⵜⵉⵔⴰⵎ ⵙⵙⵏⵡⴰⵏ, ⴷ ⵉⴷⵖⴰⵔⵏ ⵏ ⵜⵎⵢⵓⵔⵜ. ⵎⴰⵛⵛ ⵜⴰⵎⵢⵓⵔⵜ ⵜⴳⴰ ⵢⴰⵜ ⵖ ⴷⴰⵔ ⵉⵎⴰⵣⵉⵖⵏ ⴰⴽⴽⵯ ⵖ ⵡⴰⴽⴰⵍ ⵏ ⵜⵎⴰⵣⵖⴰ.

ⵉⵣⵍⴰⵏ ⵏ ⵜⵍⵖⵏⵊⴰ

ⴽⵔⴰ ⵏ ⵉⵣⵍⴰⵏ ⵜⵜ ⵉⵏⵉⵏ ⵜ ⵜⵎⵖⴰⵔⵉⵏ ⴷ ⵜⵔⴱⴰⵜⵉⵏ, ⵖ ⵡⴰⵙⵙ ⵏ ⵜⴰⵙⵍⵉⵜ ⵏ ⵓⵏⵥⴰⵕ ⵉⵖ ⵓⵙⵉⵏ ⵜ ⵜⴰⵖⵏⵊⴰ, ⵖ ⵜⵇⴱⵉⵍⵜ ⵏ ⵉⵍⴱⵏⵙⵉⵔⵏ:

ⵜⵍⵖⵏⵊⴰ ⵏ ⴰⵢⵜ ⵕⴱⴱⵉ

ⵡⴰⵍⵍⵉ ⵉⵣⵣⴳⴰⵏ ⵉⴼⴽ ⴰⵎⴰⵏ

ⵕⵥⵎ ⴷ ⴰ ⵜⴰⴳⵓⵜ ⵉ ⵡⴰⵎⴰⵏ

ⴳⴰⵏ ⵜ ⵜⵎⵥⵉⵏ ⴰⵙⴰⵖⵓⵔ

ⴰⵏⵥⴰⵕ ⴰ ⴱⴰⴱⴰ ⵕⴱⴱⵉ

ⴰⴷ ⵎⵖⵉⵏⵜ ⵜⵎⵥⵉⵏ

ⵍⴽⵎⵏⵜ ⴰⴷⵎⵔ ⵏ ⵡⴰⵢⵢⵉⵙ.

ⴽⵔⴰ ⵏ ⵉⵣⵍⴰⵏ ⵜⵜ ⵉⵏⵉⵏ ⵜ ⵜⵎⵖⴰⵔⵉⵏ ⴷ ⵜⵔⴱⴰⵜⵉⵏ, ⵖ ⵡⴰⵙⵙ ⵏ ⵜⴰⵙⵍⵉⵜ ⵏ ⵓⵏⵥⴰⵕ ⵉⵖ ⵓⵙⵉⵏ ⵜ ⵜⴰⵖⵏⵊⴰ, ⵖ ⵜⵇⴱⵉⵍⵜ ⵏ ⵜⵓⵏⴼⵉⵜ ⴳ ⵍⴰⵟⵍⴰⵚ:

ⴰⵢ ⴰⵏⵥⴰⵕ ⴰⵢ ⴰⵏⵥⴰⵕ

ⴰ ⵜⵜⵓⵜ ⴰ ⵢⴰⵎⵏⵜⴰ ⴳ ⵓⴷⵔⴰⵔ

ⴰⵎ ⵓⵙⴳⴳⵯⴰⵙ ⵉⵣⵔⵉⵏ

ⵣⵣⵉⵣⵣⵍ ⴰⵅ ⵉⵖⵣⵔⴰⵏ

ⴰⵢ ⴰⵏⵥⴰⵕ ⴰⵢ ⴰⵏⵥⴰⵕ

ⵀⴰⵏ ⵜⵎⵓⵔⵜ ⴰⵜⵜⴰ ⵀⴰ ⵜⵇⵇⵓⵕ

ⵀⴰⵜ ⵉⵣⵔⵉ ⵖⵉⴼⵙ ⵡⴰⵢⵢⵓⵔ

ⴰⵖⵉⵏⵏⴰ ⵉⴳⴰ ⵉⵏⴳⵔ ⵉⵖⵣⵔⴰⵏ

ⴰ ⵕⴱⴱⵉ ⵀⴰⵜ ⵉⵏⵖⴰⵅ ⴼⴰⴷ ⵏ ⵡⴰⵎⴰⵏ.

ⵜⵓⵍⵍⵉⵙⵜ ⵜⴰⵙⴽⵍⴰⵏⵜ

ⵢⴰⵜ ⵜⵓⵍⵍⵉⵙⵜ ⵉⵙⴰⵡⴰⵍⵏ ⴼ ⵜⵖⴰⵔⴰⵙⵜ ⵍⵍⵉ ⵙ ⴰⵔ ⵙⴼⵓⴳⵍⵓⵏ ⵎⵉⴷⴷⵏ ⵙ ⵜⵎⵢⵓⵔⵜ ⵏ ⵜⵙⵍⵉⵜ ⵏ ⵓⵏⵥⴰⵕ ⵖ ⵜⵇⴱⵉⵍⵜ ⵏ ⵉⵍⴱⵏⵙⵉⵔⵏ:

"ⴼⵜⴰⵏ ⵜ ⵙⵎⵎⵓⵙⵜ ⵜⵎⵖⴰⵔⵉⵏ ⵜⵉⵡⵙⵙⴰⵔⵉⵏ ⵙ ⵉⵡⴰⵍⴰ ⵢⴰⵏ ⵓⵚⵎⴹⵍ ⵏ ⵢⴰⵏ ⵓⴳⵯⵔⵔⴰⵎ ⵉⵍⵍⴰ ⵖ ⵜⵓⵥⵥⵓⵎⵜ ⵏ ⵜⴰⴳⴰⵏⵜ ⵏ ⵜⵙⴳⴰ ⵏ ⵓⴷⵡⵡⴰⵕ. ⴰⵔ ⵙⴰⵡⴰⵍⵏⵜ ⴳⵏⵜ ⴽⵓⵍⵍⵓ ⴰⵡⴰⵍ ⴼ ⵜⴳⵔⵙⵜ ⴷ ⵓⵏⵥⴰⵕ ⵍⵍⵉ ⵉⴼⵓⵍⴽⵉⵏ ⵉ ⵜⴰⴷⴷⴰⴳⵉⵏ ⵏ ⵍⵉⵜⵛⵉⵏ.

ⴰⵔ ⵉⴼⵜⵜⵓ ⵓⵙⵔⴷⵓⵏ ⴰⵔ ⵉⴽⴽⴰⵜ ⵙ ⵓⵛⵡⵡⴰⴹ ⵏⵏⵙ, ⵣⵓⵏⴷ ⵉⵖ ⵉⵔⴰ ⴰ ⵢⴰⵢⵍⵍ ⵣⵓⵏ ⴷ ⵉⴳⵉⴷⵔ ⵉⵜⵜⴽⴽⴰⵏ ⵉⴳⵏⵡⴰⵏ ⵉⵛⴰⵢⴼ ⴼ ⵉⴷⵓⵔⴰⵔ, ⵉⵟⴼⴰⵕⵜⵏ ⵜ ⵣⵖ ⵜⵖⵯⵔⴷⵉⵏ ⵏⵏⵙⵏ ⵜ, ⵢⵓⵙⵉ ⴽⵉⴳⴰⵏ ⵏ ⵉⴼⵛⴽⴰⵏ, ⴷ ⵜⵉⵇⵯⵍⵍⴰⵛ ⵏ ⵡⴰⵎⴰⵏ, ⵜⵉⵍⵉ ⵢⴰⵜ ⵜⵎⵖⴰⵔⵜ ⵜⵙⵙⵓⴷⴰ ⵉⴳⴳⵉ ⵏⵏⵙ, ⵉⵖ ⵢⴰⵥ ⵓⵙⵔⴷⵓⵏ ⴽⵔⴰ ⵏ ⵓⵙⴰⵡⵏ ⴰⴷ ⴷⵉⵙ ⵉⵖⵍⵉ ⵙ ⵜⵉⵣⵣⵍⴰ ⵜⴳⴳⵯⵉⵣ ⵜⵎⵖⴰⵔⵜ ⴰⵏⵏ ⵣⵖ ⵉⴳⴳⵉ ⵏⵏⵙ, ⵜⴽⵚⵓⴹ ⴼ ⵓⵙⵔⴷⵓⵏ ⴷ ⴼ ⵉⵅⴼ ⵏⵏⵙ ⴰⴷ ⵣⵖ ⴳⵉⵙ ⵓⵔ ⵜⴹⵕ.

ⵍⵍⵉⵖ ⵍⴽⵎⵏ ⵜ ⵖⵉⵏ ⵙⵔⵙⵏ ⵜ ⵉⴼⵛⴽⴰⵏ ⴷ ⵉⵇⵯⵍⵍⴰⵛ ⵏ ⵡⴰⵎⴰⵏ ⵙ ⵡⴰⴽⴰⵍ, ⵜⴼⵜⵓ ⵢⴰⵜ ⴳⵉⵙⵏ ⵜ ⴰⵔ ⵜⵙⴳⴰⴷⴷⴰ ⵉⵥⵕⴰⵏ ⴰⴷ ⴳⵉⵙⵏ ⵜⵙⴽⵔ ⵜⴰⴽⴰⵜ, ⴷ ⵢⴰⵜ ⵢⴰⴹⵏ ⴰⵔ ⵜⵙⵎⵓⵏⴰ ⵉⵔⵓⴽⵓⵜⵏ ⵖ ⵢⴰⵏ ⵓⵙⴳⴰ, ⴷ ⵓⴷⵖⴰⵔ ⴰⵏⵏ ⵉⵔⴽⴰ ⴱⴰⵀⵔⴰ, ⴰⵙⴳⴳⵯⴰⵙ ⴰⵢ ⴰⴷ ⵓⵔ ⵊⵊⵉⵏ ⵢⵓⵔⵙ, ⵍⵍⵓⵣⵣⴰⵏ ⴽⵓⵍⵍⵓ ⴳⵉⵙ ⵉⵥⵕⴰⵏ, ⵙⵎⵓⵏⵏ ⵜ ⵉⵥⵕⴰⵏ ⴰⵔⵙⵏ ⵜ ⴰⴽⴰⵍ.

ⴰⴷⵖⴰⵔ ⴰⵏⵏ ⵉⴳⴰ ⵢⴰⵏ ⵓⵙⴰⵢⵙ ⴰⵎⵥⵥⵢⴰⵏ ⵖ ⵎⵏⵉⴷ ⵏ ⵜⴳⴳⵓⵔⵜ ⵏ ⵓⴳⵯⵔⵔⴰⵎ ⵖ ⵉⴳⴳⵉ ⵏ ⵢⴰⵜ ⵜⵡⵔⵉⵔⵜ. ⵢⴰⵜ ⵜⵎⵚⵕⵉⵜ ⵜⵓⵎⵍⵉⵍⵜ ⵉⵖⵯⵔⴱⴰⵏ ⵏⵏⵙ ⵍⴰⵏ ⵍⵊⵉⵔ ⵣⵖ ⵓⴳⵯⵏⵙ ⴰⵡⴷ ⴱⵕⵕⴰ, ⵉⴳⵏ ⵖ ⵜⵓⵥⵥⵓⵎⵜ ⵏ ⵜⵎⵚⵕⵉⵜ ⴰⵏⵏ ⵢⴰⵏ ⵓⵚⵎⴹⵍ ⵏ ⵢⴰⵏ ⵓⵔⴳⴰⵣ. ⴰⵔ ⵜⵜ ⵉⵏⵉⵏ ⵎⴰⵙ ⵉⴳⴰ ⴰⴳⵯⵔⵔⴰⵎ, ⵉⴳ ⵣⵖ ⵉⴷ ⴱⴰⴱ ⵏ ⵕⴱⴱⵉ, ⵉⴼⴼⵖ ⵜⵎⴰⵣⵉⵔⵜ ⵏⵏⵙ ⵉⴼⵍ ⵜⵜ ⵉⵏⵏ ⵉⴼⵍ ⵏⵏ ⵜⴰⵔⵡⴰ ⵏⵏⵙ ⵉⵎⵇⵇⵓⵕⵏ ⵉⵜⴰⵀⵍⵏ, ⵉⴼⵍ ⵏⵏ ⴰⴽⴰⵍ ⵏⵏⵙ ⴷ ⵡⴰⵢⴷⴰ ⵏⵏⵙ, ⵉⵣⵓⴳ ⵖ ⵜⵓⴷⵔⵜ. ⵢⴰⵛⴽⵉⴷ ⵙ ⵓⴷⵖⴰⵔ ⴰⵏⵏ ⵉⴳⴳⴰⵡⵔ ⴳⵉⵙ ⵖ ⵜⵓⵥⵥⵓⵎⵜ ⵏ ⵜⴰⴳⴰⵏⵜ ⴰ ⵉⵍⵍⵉⵖ ⴳⵉⵙ ⵉⵎⵎⵓⵜ. ⴷ ⵍⵍⵉⵖ ⵉⴷⴷⵔ, ⵎⵏⵛⴽⴽ ⵏ ⵎⵉⴷⴷⵏ ⵣⵖ ⵓⴷⵡⵡⴰⵕ ⴰⵏⵏ ⵜ ⵢⴰⵥⵏ ⵖ ⵜⴰⴳⴰⵏⵜ ⴰⵏⵏ ⴰⵔ ⴰⵙ ⵜⵜⴰⵡⵉⵏ ⵜⵉⵔⴰⵎ ⴷ ⵜⵖⴰⵡⵙⵉⵡⵉⵏ ⴷ ⵜⵉⵔⵣⵣⵉⴼⵉⵏ ⵍⵍⵉⵖ ⴰⵙⵏ ⵢⴰⴳⵯⵉ ⴰⴷ ⵉⴷⴷⵔ ⴳⵔⴰⵜⵙⵏ ⵖ ⵓⴷⵡⵡⴰⵕ. ⵓⴷⵎ ⵏⵏⵙ ⵉⴼⴰⵡ ⵉⴽⵍⵍⵉ ⵏⵏⴰⵏ, ⴷⴰⵔⵙ ⴰⵜⵉⴳ ⴰⴽⵙⵡⴰⵜ ⵓⵔ ⵉⴳⵉ ⵡⴰⴷ ⵉⵡⴹⴹⵕⵏ ⴷ ⵓⵔ ⵉⴳⵉ ⴰⵏⴰⴼⴰⵍ, ⵉⵎⵉ ⵏⵏⵙ ⴰⵔ ⵉⵙⴰⵡⴰⵍ ⵙ ⵜⴼⵓⵥⴰⵕⵜ ⴷ ⵓⵎⴷⵢⴰⵣ ⴷ ⵡⴰⵡⴰⵍ ⵢⵓⵖⴷⵏ ⴷ ⴽⵉⴳⴰⵏ ⵏ ⵉⵏⵣⵉⵜⵏ ⵉⵖ ⵉⵙⴰⵡⵍ. ⵉⴳ ⴰⴼⴳⴰⵏ ⵉⵖⵓⵙⵏ ⴷ ⴷⴰⵔ ⵜⵍⵍⴰ ⵜⴰⵡⵙⵙⵏⴰ ⴳⴳⵓⵜⵏ. ⵢⴰⵏ ⵓⵔⴳⴰⵣ ⴰⵎⵕⵡⴰⵚⵓ ⴰⵡⵙⵙⴰⵔ ⴱⵓ ⵜⵎⴰⵔⵜ ⵜⴰⵛⵎⵔⴰⵔⵜ, ⵜⵉⵎⵍⵙⴰ ⵏⵏⵙ ⵖⵓⵙⵏ ⵜ, ⵜⴳ ⵜⵎⵚⵕⵉⵜ ⴰⵏⵏ ⵜⵉⴳⵎⵎⵉ ⵏⵏⵙ ⵓⵔ ⵜⴰ ⵉⵎⵎⵓⵜ ⵉ ⵜⵜⵓⵎⴹⴰⵍ ⴳ ⵓⴳⵏⵙ ⵏⵏⵙ.

ⴳⴳⵉⵡⵔⵏⵜ ⵎⴰⵕⵕⴰ ⵏⵏⵙⵏ ⵜ ⴰⵔ ⵜⵇⵇⵍⵏ ⵜ ⴰⴷⴷ ⵍⴽⵎⵏ ⵜ ⵜⵎⵖⴰⵔⵉⵏ ⵢⴰⴹⵏ ⴷ ⵢⵓⵛⴽⴰⵏ ⵙⴳ ⵓⴷⵡⵡⴰⵕ.

ⵢⴰⵏ ⵉⵎⵉⴽⴽ ⴰⵔ ⴷⵉ ⵜⵜⴰⴳⴳⵯⴰⵏ ⵜ ⴽⵔⴰ ⵏ ⵜⵔⵓⴱⴱⴰ ⵏ ⵜⵎⵖⴰⵔⵉⵏ ⴷ ⵜⴼⵔⵅⵉⵏ ⴹⴼⴰⵕⵏⵜⵏ ⵉⵛⵉⵔⵔⴰⵏ ⵉⵎⵥⵥⵢⴰⵏⵏ. ⴷ ⵜⴼⵔⵅⵉⵏ ⵓⵙⵉⵏ ⵜ ⵢⴰⵏ ⵓⵖⴰⵏⵉⵎ ⵉⵖⵣⵣⵉⴼⵏ ⵉⴹⵏⵉⵏ (ⵜⴰⵖⵏⵊⴰ), ⵙⵙⵍⵙⵏⵜ ⴰⵙ ⵍⵇⴹⵉⴱ ⴰⵣⴳⴳⵯⴰⵖ ⴷ ⴽⵔⴰ ⵏ ⵜⵎⵍⵙⴰ ⴷ ⵜⵣⴱⴳⴰ, ⴰⵔ ⵜⵜⵉⵏⵉⵏ ⵉⵣⵍⵉ ⵏ ⵡⴰⵙⵙ ⴰⵏⵏ: «ⵜⵍⵖⵏⵊⴰ ⵏ ⴰⵢⵜ ⵕⴱⴱⵉ ⵡⴰⵍⵍⵉ ⵉⵣⵣⴳⴰⵏ ⵉⴼⴽ ⴰⵎⴰⵏ...»

ⵍⵍⵉⵖ ⴷ ⵍⴽⵎⵏⵜ ⴳⴳⵉⵡⵔⵏⵜ ⵖ ⵓⵙⴰⵢⵙ, ⵙⵙⴼⴰⵍⵏ ⵜ ⴰⴷ ⵙⵙⵏⵓⵏⵜ ⵜⵉⵔⵎⵜ ⵏ ⵜⴳⵯⵍⵍⴰ ⵙⵎⵓⵏⵏ ⵜ ⵉⴽⵛⵛⵓⴹⵏ ⵙⵙⵔⵖⵏ ⵜ ⵜⴰⴽⴰⵜ, ⴰⵔ ⵔⵡⵡⵉⵏ ⵜ ⴰⴳⴳⵯⵔⵏ ⵙ ⵓⴼⴼⴰⵍ ⵏ ⵜⴳⵯⵍⵍⴰ.

ⴽⵔⴰ ⴳⵉⵜⵙⵏⵜ ⴰⵔ ⵙⵙⵏⵡⴰⵏⵜ ⵜⴰⴳⵯⵍⵍⴰ, ⴷ ⵜⵉⵢⵢⴰⴹ ⴼⵜⴰⵏ ⵜ ⴰⴷ ⴰⴳⵯⵎⵏ ⵜ ⴰⵎⴰⵏ ⵣⵖ ⵡⴰⵙⵉⴼ ⵍⵍⵉ ⴰⵙⵏ ⵜ ⵢⴰⵥⵏ, ⴷ ⵉⴼⵔⴰⵅ ⵉⵎⵥⵥⵢⴰⵏⵏ ⴰⵔ ⵜⵜ ⵓⵔⴰⵔⵏ ⴰⵔ ⴷⵉⵙⵏ ⵜⵜ ⵉⵏⵉⵏ ⵉⵣⵍⴰⵏ ⵏ ⵜⴼⴼⵓⴳⵍⴰ ⵏ ⵜⴰⵖⵏⵊⴰ, ⵜⵉⵍⵉ ⴳⵉⵜⵙⵏ ⵢⴰⵜ ⵜⵎⵖⴰⵔⵜ ⵜⴰⵡⵙⵙⴰⵔⵜ ⵜⴳⴳⵉⵡⵔ ⵜⴰⵎⴰ ⵏⵏⵙⵏ ⴰⵔ ⵜⵏ ⵜⵙⵎⴰⴳⵍ ⵜⴷⵔⵓ ⴷⵉⵙⵏ ⵜⴰⵡⵡⵓⵔⵉ ⵏⵏⵙⵏ, ⵜⵙⵔⵙ ⵜⴰⵎⴰ ⵏⵏⵙ ⵢⴰⵏ ⵓⵖⵏⵊⴰ ⴰⵎⵇⵇⵔⴰⵏ ⵏ ⵓⴽⵛⵛⵓⴹ ⴰⵣⴰⵢⴽⵓ, ⴰⵔ ⵜⵇⵇⵍ ⴰⴷ ⵜⴰⵛⴽ ⵜⵡⴰⵍⴰ ⵏⵏⵙ.

ⵍⵍⵉⵖ ⵏⵏ ⴳⴰⵏⵜ ⵜⵉⵔⵎⵜ ⴰⴷ ⵜⵏⵡⵡⴰ, ⴼⵍⵏ ⵜⵜ ⵖ ⵓⴷⵖⴰⵔ ⵏⵏⵙ ⵉⴳⴳⵉ ⵏ ⵜⴰⴽⴰⵜ ⴼⵜⵓⵏ ⵜ ⴳⴳⵯⵣⵏ ⵜ ⵙ ⵡⴰⵙⵉⴼ ⴷ ⵜⵎⵖⴰⵔⵜ ⵜⴰⵡⵙⵙⴰⵔⵜ ⵜⵣⵡⴰⵔ ⴰⵙⵏ ⵜ ⵜⵓⵙⵉ ⴷⵉⵙ ⴰⵖⵏⵊⴰ ⴰⵎⵇⵔⴰⵏ. ⵍⵍⵉⵖ ⵍⴽⵎⵏ ⵜ ⵜⴰⵎⴰ ⵏ ⵡⴰⵙⵉⴼ ⴱⴷⴷⵏ ⵜ, ⵙⵙⴼⴰⵍⵏ ⵜ ⵖ ⵜⵉⵡⴰⵜⵔⵉⵡⵉⵏ ⴷ ⵉⵙⵙⵓⵜⵓⵔⵏ ⵏ ⵓⴼⵓⵍⴽⵉ ⵣⵖ ⵕⴱⴱⵉ, ⵜⴱⴷⴷ ⵜⵡⵙⵙⴰⵔⵜ ⵉⴽⵯⵏⴰⵏ ⴰⵔ ⴰⴽⴰⵍ ⵜⵙⵡⴰⵍⴰ ⵏⵏ ⵜⵉⵎⵥⴰⴹⵉⵏ ⵏⵏⵙ ⵙ ⵉⵡⴰⵍⴰ ⴰⵙⵉⴼ ⵜⵙⵙⴰⴽⵯⵉ ⵏⵏ ⴰⵖⵏⵊⴰ ⵖ ⵡⴰⵎⴰⵏ ⵙ ⵜⵖⵯⵔⴷⵉⵏ ⵏⵏⵙ ⵖ ⵢⴰⵏ ⵓⵎⴷⴰ ⵖ ⴱⴷⴷⵏ ⵡⴰⵎⴰⵏ ⴰⵔ ⵣⵖ ⴳⵉⵙ ⵜⵜ ⴼⴼⵓⵖⵏ ⵙ ⵜⴱⵉⵥⵥⵉⵔⵜ, ⵉⴹⵕ ⵓⵖⵏⵊⴰ ⵖ ⵉⴳⴳⵉ ⵏ ⵓⵎⴷⴰ ⴰⵙⵉⵏ ⵜ ⵡⴰⵎⴰⵏ ⵢⴰⴳⵯⵎ ⴰⵎⴰⵏ, ⵜⵓⵔⴰⵔⵜ ⴰⴷ ⵜⴼⴽⴰ ⵓⴷⵎ ⵏ ⵓⴼⵓⵍⴽⵉ ⴷ ⵎⴰⵙ ⵉⴳⴰ ⵓⵙⴳⴳⵯⴰⵙ ⵡⴰⴷ ⵉⵖⵓⴷⴰⵏ, ⴷ ⵜⴰⵢⵔⵣⴰ ⴷ ⵓⵊⵊⵉⴳ ⵏ ⵍⵍⵓⵣ ⵔⴰⴷ ⴱⵓⵖⵍⵓⵏ. ⵎⵔⴰ ⴷⴷ ⵉⵙ ⵓⵔ ⵢⵓⴳⵎ ⵓⵖⵏⵊⴰ ⴰⵎⴰⵏ, ⵔⴰ ⵉⴳ ⵎⴰⵢⴰⵏ ⵜⴰⵎⴰⵜⴰⵔⵜ ⵓⵔ ⵉⴼⵓⵍⴽⵉⵏ ⵉⵎⵎⴰⵍⵏ ⵎⴰⵙ ⵔⴰ ⵉⵀⵔⵛ ⵓⵙⴳⴳⵯⴰⵙ.

ⵖⴰⵎⴰⵏⵜ ⵜⴼⵔⵅⵉⵏ ⴰⵔ ⵜⵜ ⵓⵔⴰⵔⵏⵜ ⵙ ⵓⵖⵏⵊⴰ ⴳ ⵡⴰⵎⴰⵏ ⵏ ⵓⵎⴷⴰ ⵡⴰⵙⵉⴼ, ⵉⵡⵔⵔⵉⵏ ⵜ ⵜⵎⵖⴰⵔⵉⵏ ⵙ ⵓⴳⵯⵔⵔⴰⵎ ⴳ ⴹⴰⵕⴰⵜ ⵎⴰⴷ ⵜⵏⵜ ⵉⵙⵙⵓⵙⵎ ⵎⴰⵢⴰⵏ ⴼⴽⵏ ⵜ ⵜⵉⵡⴰⵜⵔⵉⵡⵉⵏ ⵏⵏⵙⵏ ⵜ ⴷ ⵓⵙⵙⵓⵜⵔ ⵏⵏⵙⵏ ⵜ ⵉ ⵉⵎⴰⵍ. ⴳⴳⵉⵡⵔⵏ ⵜ ⴰⵔ ⵛⵜⵜⴰⵏ ⵜ ⵜⴰⴳⵯⵍⵍⴰ, ⵍⵍⵉⵖ ⵢⴰⴷ ⵥⵍⵉⵏ ⵜ ⵜⴰⵖⴰⵎⵉⵏ ⵏ ⵜⵎⵖⴰⵔⵉⵏ ⵍⵍⵉ ⵓⵔ ⵢⵓⴼⵉⵏ ⴰⴷ ⴷⵉⵙⵏ ⵜ ⵉⵍⵉⵏ ⵜ, ⴷ ⵜⵉⵡⵙⵙⴰⵔⵉⵏ ⵍⵍⵉ ⵢⵓⴹⵏⵏ ⵖ ⵜⴳⵎⵎⴰ ⵏⵏⵙⵏ ⵜ, ⴷ ⵜⵉⵢⵢⴰⴹ ⵍⵍⵉ ⵉⵔⴰⵏ ⴰⴷ ⴰⵡⵉⵏ ⵜ ⵉ ⵉⵔⴳⴰⵣⵏ ⵏⵏⵙⵏ ⵜ ⴽⵔⴰ ⵙⴳ ⵜⴳⵍⵍⴰ ⵏ ⵜⴰⵖⵏⵊⴰ.

ⵎⴰⵢⴰⴷ ⴰ ⵉⴳⴰⵏ ⵜⴰⵎⴰⵏⴷⴰⵏⵜ ⵏ ⵜⵎⵢⵓⵔⵜ ⵏ ⵜⴰⵖⵏⵊⴰ ⵏ ⵓⵏⵥⴰⵕ ⵍⵍⵉⵖ ⵜⵎⵎⵔⴽⴽⵙ ⵜⴰⵢⵔⵉ ⵏ ⵡⴰⴽⴰⵍ ⴷ ⵓⴼⴳⴰⵏ.

ⵥⵕ ⵓⴳⴳⴰⵔ

• ⵜⴰⵖⵏⵊⴰ