ⵜⴰⴳⵯⵎⴰⵔⵜ ⵏ ⵉⵙⵎⴹⴰⵍ (ⵓⵏⴳⴰⵍ)
ⴰⴷⵍⵉⵙ ⴰⴷ, ⴷ ⵓⵏⴳⴰⵍ ⴰⵎⵣⵡⴰⵔⵓ ⵏ ⵜⵎⴰⵔⴰⵜ ⵄⴰⵣⵉⵣⴰ ⵏⴰⴼⵉⵄ, ⵉⴼⴼⵖ ⴷ ⴰⵙⴳⴳⵯⴰⵙ ⵏ 2021/2971 ⵙⴳ ⵜⵥⵕⵉⴳⵉⵏ ⵏ ⵜⵣⵍⵖⴰ ⵏ ⵜⵉⵔⵔⴰ ⵏ ⵉⵎⴰⵔⴰⵜⵏ ⵙ ⵜⵎⴰⵣⵉⵖⵜ.[1][2]
ⴳ ⵎⴰ ⴰⴷ ⵉⵜⵜⴳⴳⴰⵏ 103 ⵏ ⵜⵙⵏⴰ, ⵜⵕⵛⵎ ⴰⵖ ⵜⵎⴰⵔⴰⵜ ⵄⴰⵣⵉⵣⴰ ⵏⴰⴼⵉⵄ ⵙ ⵢⴰⵜ ⵜⵓⵜⵍⴰⵢⵜ ⵉⴼⵙⵙⵓⵙⵏ ⵉⵎⵎⵉⵎⵏ ⴷ ⵙ ⵢⴰⵜ ⵜⵖⴰⵔⴰⵙⵜ ⵜⴰⵙⴽⵍⴰⵏⵜ ⴱⴰⵀⵔⴰ ⵢⴰⵜⵜⵓⵢⵏ ⵜⴰⵡⵍⴰⴼⵜ ⴳ ⵔⴽⵙⵏ ⵓⵏⵓⵖⵏ ⴷ ⵡⵓⴽⵍⴰⵏ ⵏ ⵜⵓⴷⵔⵜ ⵏ ⵜⵍⴰⵢⵜⵎⴰⵙ. ⴰⵡⵔⵉⴽ ⴰⴷ (ⵜⵍⴰⵢⵜⵎⴰⵙ) ⵉⴳⴰ ⵙⴳ ⵡⴰⵏⴰⵡⵏ ⴰⵏⵏ ⵍⵍⵉ ⵎⵉ ⵜⴽⴽⵙ ⵜⵓⴷⵔⵜ ⵓⴳⴳⴰⵔ ⵏ ⵎⴰ ⴰⴷ ⴰⵙ ⵜⴼⴽⴰ, ⴳ ⵡⴰⵏⴰⵡ ⴰⵏⵏ ⵍⵍⵉ ⵙⵏⴼⵍⵏ ⵡⴰⴳⴳⴰⵙⵏ ⴷ ⵉⴱⵔⵔⴰⵢⵏ, ⵏⵖⵉⵏ ⴳⵉⵙ ⵜⵉⴼⴼⵓⴳⵏⴰ ⴷ ⵜⴰⵢⵔⵉ, ⴽⵔⵣⵏ ⵏⵏ ⴳⵉⵙ ⵉⴳⵔⴰⵏ ⵏ ⵡⵓⵥⵓⴹ ⴷ ⵜⵖⵓⵍⴰ ⵏ ⵓⴱⴽⴽⴰⴹ.
ⵜⵍⴰⵢⵜⵎⴰⵙ, ⵜⴳⴰ ⵉⵍⵍⵉⵙ ⵏ ⵡⵓⵙⵓⵏ ⴷ ⵜⴳⵎⵎⵉ ⴳ ⵏⵏ ⵓⵔ ⵜⴽⴽⵉⵙ ⵜⵎⵖⴰⵔⵜ ⴰⴷ ⵜⴳ « ⵖⴰⵙ ⵜⴰⵎⵖⴰⵔⵜ / ⵏⵉⵖ ⵜⴰⵎⵖⴰⵔⵜ ⴽⴰ ⴰⵏⵏ », ⴽⵔⴰ ⵏⵏ ⵓⵔ ⵉⴱⴱⵉⵏ ⴰⵎⵢⴰ, ⴽⵔⴰ ⵍⵍⵉ ⵏⵙⵏⴼⴰⵍ ⵣⵓⵏ ⴷ ⵓⴽⴰⵏ ⵉⵀⴷⵓⵎⵏ ⵏⵏⵖ, ⴽⵔⴰ ⴳ ⴰⵔ ⵏⵙⵜⴰⵢ ⴰⵢⵍⵍⵉ ⵏⵔⴰ ⴷ ⵓⵢⵍⵍⵉ ⵏⵓⴳⵉ (ⵜⵉⵎⵖⴰⵔⵉⵏ ⵏ ⵍⵃⴰⵊⵊ ⴱⵍⵄⵉⴷ ⵙ ⵓⵎⴷⵢⴰ). ⵜⵉⵎⵖⴰⵔⵉⵏ ⴳ ⵡⵓⵙⵓⵏ ⵏ « ⵜⵣⴰⵔⵓⵜ » ⵉⴳⵯⴷⵍ ⴼⵍⵍⴰⵙⵏⵜ ⵡⴰⵡⴰⵍ ⴷ ⵢⵉⵍⵍ ⴷ ⵜⴰⵖⴰⵔⵜ ⵏⵏⵙ, ⵜⴳⵯⴷⵍ ⴼⵍⵍⴰⵙⵏⵜ ⵜⵓⴷⵔⵜ ⴷ ⵜⴰⵢⵔⵉ ⴷ ⵜⴳⵔⴰⵡⵍⴰ, ⴳⵉⵏⵜ ⵉⵍⵎⵎⴰ ⵜⵉⵡⵉⵡⵉⵏ ⵏ ⵉⵔⴳⴰⵣⵏ ⵏⵏⵙⵏⵜ ⴷ ⴰⵢⵜⵎⴰⵜⵙⵏⵜ ⴷ ⵡⵉⵍⵍⵉ ⵜⵏⵜ ⵢⵓⵔⵓⵏ.
ⵜⴰⵚⴰⴹⵜ ⵏ ⵡⵓⵏⴳⴰⵍ ⴰⴷ, ⵉⴼⵍ ⵜⵜ ⵉⴷ ⵓⵣⵎⵣ ⵓⵔ ⵜⵉⵡⵍ, ⵙⵙⴰⵖⵏ ⴰⵙ ⵜⴰⵏⴱⵓⵔⵜ, ⵉⴼⵍ ⵜⵜ ⵉⴷ ⵢⵉⵎⵉⵔⵉ ⵏⵏⵙ ⴷⴰ ⵎⵉ ⵜⴼⴽⴰ ⴰⵢⵍⵍⵉ ⴰⴽⴽⵯ ⴷⴰⵔⵙ ⵉⵍⴰⵏ ⴰⵜⵉⴳ; ⵉⵍⵎ ⵏⵏⵙ ⴷ ⵡⵓⵍ ⵏⵏⵙ, ⵜⴳ ⴰⵄⵓⵕⵉⴹ ⵙ ⴷ ⵉⵇⵇⴰⵏ ⴰⴷ ⴰⵙ ⴰⴼⵉⵏ ⴰⴼⵙⵙⴰⵢ ⵓⵔ ⵜⴰ ⴷ ⵉⵡⵉⵏ ⵡⵉⵢⵢⴰⴹ ⵉⵏⵖⵎⵉⵙⵏ ⵏⵏⵙ, ⵉⴼⵍ ⵜⵜ ⵉⴷ ⵓⵔⴳⴰⵣ ⵏⵏⵙ ⵉⵣⵡⴰⵔⵏ (ⵍⵃⴰⵊⵊ ⴱⵍⵄⵉⴷ /ⴰⴳⵍⵡⴰⵥ), ⵜⴳ ⵉⵍⵎⵎⴰ ⵜⴰⴷⴳⴰⵍⵜ ⴰⵏⵏ ⵎⵉ ⴽⴽⴰⵏⵜ ⵅⴼ ⵢⵉⵍⵎ ⵏⵏⵙ ⴷ ⵉⵎⴰⵏ ⵏⵏⵙ ⴰⵢⵍⵍⵉⴳ ⵙⵓⵍ ⴳⵉⵙ ⵓⵔ ⵎⴰ ⴳ ⴰⵔ ⵜⵜⵔⵓⵙⵏⵜ, ⵉⴼⵍ ⵜⵜ ⵉⴷ ⵓⵔⴳⴰⵣ ⵏⵏⵙ ⵡⵉⵙ ⵙⵉⵏ (ⵃⵎⴰⵢⴷⴷⵓⵛ) ⴰⵙⵙ ⵏ ⵜⵎⵖⵔⴰ ⵏⵏⵙ, ⵜⴳ ⵉⵍⵎⵎⴰ ⵜⴰⴳⴰⵜ ⵏ ⵜⴰⴳⴰⵜⵉⵏ…
ⵜⵍⴰⵢⵜⵎⴰⵙ ⵜⴳⴰ ⵏⵉⵜ ⵊⵓⵙⵜⵉⵏ (ⵢⴰⵏ ⵡⵓⵏⴳⴰⵍ ⵏ Marquis de Sade) ⵢⴰⴹⵏ, ⵢⵓⵔⵓ ⵢⴰⵏ ⵡⴰⵎⵓⵏ ⵓⵔ ⵉⵥⵕⵕⴰⵏ ⴳ ⵜⵎⵖⴰⵔⵉⵏ ⵎⵉⵏ ⴰⵢⵍⵍⵉ ⴼⴼⵔⵏ ⴳⵔ ⵉⴹⴰⵕⵏ ⵏⵏⵙⵏⵜ, ⵎⵉⵏ ⵉⵎⵉⵙ ⵉⵜⵜⴰⵔⵓⵏ, ⵎⵉⵏ ⴰⵢⴷⴷⵉⴷ ⴰⵏⵏ ⵙ ⵙⵙⵡⴰⵏ ⵉⵔⴳⴰⵣⵏ ⵜⵉⵖⵓⵍⴰ ⵏⵏⵙⵏ ⵉⵖ ⵜⵏ ⵢⵓⴷⴰ ⵙⵙⴰⴽⵯⵉⵏ ⵜ ⴰⵔ ⴷⴰⵖ ⵙⵉⴳⴳⵉⵍⵏ ⵙ ⵡⴰⵢⵢⴰⴹ. ⵉⵙ ⴽⴰ ⵜⵍⴰⵢⵜⵎⴰⵙ, ⵍⵍⵉⵖ ⵜⵜ ⵙⵓⵍ ⵓⵔ ⵢⵓⴷⴰ ⴳ ⵢⵉⴼⵙⵙⵉ, ⵜⴽⴽⵙ ⴷ ⴰⵣⵔⴼ ⵏⵏⵙ ⵙ ⵓⴼⵓⵙ ⵏⵏⵙ, ⵙ ⵎⴰⵏⵉⴽ? ⵖⵔⴰⵜ ⵓⵏⴳⴰⵍ ⵉⴳ ⵜⵔⴰⵎ ⴰⴷ ⵜⴰⴽⵯⵣⵎ ⵓⴳⴳⴰⵔ ⵎⴰ ⵖⴼ ⵜⵉⵡⵔⵔⵉ ⵜⴳ ⵜⴰⴳⵯⵎⴰⵔⵜ ⵏ ⵉⵙⵎⴹⴰⵍ.
ⵢⴰⵏ ⵓⴳⵣⵣⵓⵎ ⴳ ⵡⵓⵏⴳⴰⵍ ⴰⴷ « ⵓⵔ ⵥⴹⴰⵕⵖ ⴰⴷ ⴰⵡⵏ ⵉⵏⵉⵖ ⵎⴰⵙ ⴷ ⴰⵢⵍⵍⵉ ⴰⴽⴽⵯ ⴼⵍⵍⴰ ⵉⵣⵔⵉⵏ ⵉⵙⵖⵔ ⴰⴳⵯⵏⵙ ⵉⵏⵓ, ⵎⴰⵛ ⵉⵎⵍⴰ ⵉⵢⵉ ⵎⴰⵏⵎⴽ ⴳⵉⵙ ⴼⴼⵔⵏⵖ ⵉⵙⵏⵏⴰⵏⵏ, ⴰⵊⵊⵖ ⵏⵏ ⴳⵉⵙ ⵡⵉⵍⵍⵉ ⵏⵏ ⴱⴰⵀⵔⴰ ⴷⵔⴰⵏⵉⵏ ⴳ ⵜⴰⵙⴰ ⵉⵏⵓ ⴰⴼⴰⴷ ⴰⴷ ⵉⵢⵉ ⵓⵔ ⵙⴰⵔ ⵜⵖⵏⴷⴼ ⵜⵎⴽⵜⵉⵜ ⵉⵏⵓ, ⴰⴷ ⴱⴷⴷⴰ ⵙⵉⵙⵏ ⵜⵙⵢⴰⴼⴰ, ⴰⵛⴽⵓ ⵉⵣⵎⵓⵍⵏ, ⵏⵜⵜⵏⵉ ⴰⴷ ⴳⵉⴳⵉ ⵉⵙⴽⵔⵏ ⵎⴽⴰⴷ ⴳⵉⵖ ⴰⵙⵙ ⴰⴷ ». ⵜⴰⵙⵏⴰ: 70.[3]
ⵥⵕ ⵓⴳⴳⴰⵔ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵉⵙⴰⵖⵓⵍⵏ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]- ^ ⵜⴰⵣⵍⵖⴰ ⵏ ⵉⵎⴰⵔⴰⵜⵏ ⵙ ⵜⵎⴰⵣⵉⵖⵜ ⴳ ⵓⵖⵎⵉⵙ ⵏ ⵓⵎⴰⴹⴰⵍ ⴰⵎⴰⵣⵉⵖ
- ^ ⴼⴰⴹⵎⴰ ⴼⴰⵕⴰⵚ, ⵜⴰⴳⵓⵔⵉ ⵉⵔⵓⴼⴰⵏ, ⴰⵎⴰⴳⵔⴰⴷ ⵖⴼ ⵓⵏⴳⴰⵍ(ⵙ ⵜⵎⴰⵣⵉⵖⵜ) , 09 ⵉⴱⵔⵉⵔ 2024, ⵉⵜⵜⵢⴰⵡⵥⵕⴰ ⴰⵙⵙ ⵏ 8 ⵏⵓⵡⴰⵏⴱⵉⵔ 2025.
- ^ ⵓⵏⴳⴰⵍ ⵏ ⵜⴳⵯⵎⴰⵔⵜ ⵏ ⵉⵙⵎⴹⴰⵍ; 2021.(ⵙ ⵜⵎⴰⵣⵉⵖⵜ)