ⵚⵚⵇⵕ
ⵚⵚⵇⵕ ⵏⵖ ⵥⵥⵇⵕ[1] ⵏⵖ ⵜⴰⵇⵇⵔⴼⵉⵜ[2] ⵢⴰⵜ ⵜⵎⵢⵓⵔⵜ ⵍⵍⵉ ⵉⵜⵜⵢⵓⵙⵙⴰⵏ ⵖ ⴽⵔⴰ ⵏ ⵜⵙⴳⴳⵉⵡⵉⵏ ⵏ ⵙⵓⵙ ⵣⵓⵏ ⴷ ⵉⵖⵔⵎ ⵏ ⵉⴷ ⵓⴽⵏⵙⵓⵙ ⴷ ⵜⴼⵔⴰⵡⵜ ⴷ ⵉⴷⵖⴰⵔⵏ ⵢⴰⴹⵏⵉⵏ ⵜⵍⵍⴰ ⴰⵡⴷ ⴳ ⵜⵙⴳⴳⵉⵡⵉⵏ ⵏ ⵓⵙⴰⵎⵎⵔ ⵙ ⵡⴰⵙⵙⴰⵖ ⵏ ⵜⴰⵇⵇⵔⴼⵉⵜ.
ⵜⴳⴰ ⵜⵎⵢⵓⵔⵜ ⴰⴷ ⵖⴰⴷ ⵉⵣⵔⵉⵏ ⵢⴰⵏ ⵡⴰⵎⵎⴰⴽ ⵏ ⵓⵎⵢⴰⵙⵙⴰⵏ ⴰⵔ ⵉⵜⵜⴰⵡⵙ ⵉ ⵉⵄⵔⵔⵉⵎⵏ ⴰⴼⴰⴷ ⴰⴷ ⵙⵙⵏⵏ ⴷ ⴰⴷ ⵎⵚⴰⵡⴰⴹⵏ ⴷ ⵉⵏⴳⵔⴰⵜⵙⵏ , ⵏⵥⴹⴰⵕ ⴰⴷ ⵏⵉⵏⵉ ⵎⴰⵙ ⴷ ⵜⴰⵖⴰⵔⴰⵙⵜ ⴰⴷ ⴰⴷ ⵉⴳⴰⵏ ⵉⵎⵉⵙⵙ ⵏ ⵓⵎⵢⴰⵡⴰⴹ ⵏ ⵜⴰⵙⵓⵜ ⴰⵏⵏ.
ⵜⵉⵣⵉ ⴷ ⵓⴷⵖⴰⵔ ⵏ ⵚⵚⵇⵕ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⴰⵔ ⵏⵏ ⵏⵜⵜⴰⴼⴰ ⵙⵙⵇⵕ ⵉⵍⵍⴰ ⵖ ⵎⵏⵏⴰⵡ ⵉⴷⵖⴰⵔⵏ , ⵉⵥⴹⴰⵕ ⴰⴷ ⵜ ⵉⵏⵏ ⵏⴰⴼ ⵖ ⵜⴰⵎⴰ ⵏ ⵡⴰⵏⵓ ⵉⵖ ⵣⵔⵉⵏⵜ ⵜⴰⴽⵯⵥⵉⵏ ⴰⵔ ⵜⴷⴷⴰⵏⵜ ⵜⵄⵢⵢⴰⵍⵉⵏ ⴰⴷ ⴷ ⴰⴳⵯⵎⵏⵜ ⴰⵎⴰⵏ ⵏ ⵜⵉⵙⵙⵉ ⴰⵔ ⴷⴰⵔⵙⵏⵜ ⵜⴷⴷⴰⵏ ⵉⵄⵢⵢⴰⵍⵏ ⴰⵔ ⴰⵙⵏⵜ ⵜⵜⴰⵡⵙⵏ ⴰⵔ ⵙⴰⵡⴰⵍⵏ ⴷ ⵉⵏⴳⵔⴰⵜⵙⵏ.
ⴰⵔ ⵜ ⵉⵏⵏ ⵏⵜⵜⴰⴼⴰ ⵓⵍⴰ ⵖ ⵉⴳⵔⴰⵏ ⵖ ⵜⵉⵣⵉ ⵏ ⵍⵃⵉⵡⵍ ⵉⵖ ⴰⵔ ⵜⵜⵃⴰⵡⴰⵍⵏⵜ ⴰⵔ ⵙⵍⵍⵖⴰⵏⵜ ⴰⵔ ⴷⴰⵔⵙⵏⵜ ⵜⵜⴷⴷⴰⵏ ⴰⵔ ⴷⵉⵙⵏⵜ ⵙⵍⵍⵖⴰⵏ ⴰⵔ ⴷⵉⵙⵏⵜ ⵜⵜⵊⵎⵎⴰⵄⵏ ⴰⵔ ⴷ ⴽⵎⵎⵍⵏⵜ ⵜⴰⵡⵡⵓⵔⵉ ⵏⵏⵙⵏⵜ.
ⵉⵥⴹⴰⵕ ⴰⴷ ⵢⵉⵍⵉ ⴰⵡⴷ ⵖ ⵖⵢⵢⵉⴹ ⵜⵉⵣⵉ ⵏⵏⴰ ⵛⵛⴰⵏ ⵎⴷⴷⵏ ⵉⵎⵏⵙⵉ ⴰⵔ ⵜⵜⴼⴼⵓⵖⵏⵜ ⵜⵄⵢⵢⴰⵍⵉⵏ ⵙ ⵜⴰⵎⴰ ⵏ ⵓⵙⴰⵢⵙ ⴰⵔ ⴷⵉⵙⵏⵜ ⵜⵜⴰⵡⵉⵏⵜ ⵉⴽⵛⵛⵓⴹⵏ ⴷ ⵜⵙⵟⴰⵜⵜⵉⵏ ⴰⵔ ⴷⴰⵔⵙⵏⵜ ⵜⴷⴷⴰⵏ ⵉⵄⵢⵢⴰⵍⵏ ⴰⵔ ⵜⵜⵙⵓⵜⵓⵍⵏ ⵉ ⵜⴰⴽⴰⵜ , ⵍⵍⴰⵏⵜ ⴽⵔⴰ ⵏ ⵜⵉⴽⴽⴰⵍ ⵉⵅ ⴰⵔ ⵙⴰⵡⴰⵍⵏ ⴰⵔ ⴽⴽⴰⵜⵏ ⵉⵏⴳⵔⴰⵜⵙⵏ ⵙ ⵉⵡⴰⵍⵉⵡⵏ ⵏ ⵏⵏⴹⵎ ⴰⵔ ⴽⵉⵅ ⴰⴽⴽⵯ ⵏⴽⵔⵏ ⴰⴷ ⵙⴽⵔⵏ ⴰⴳⵡⴰⵍ ⴰⵔ ⵜⵜⵃⵓⵛⵏⵜ ⵜⵄⵢⵢⴰⵍⵉⵏ ⵉⵍⵉⵏ ⴰⵙⵏⵜ ⵉⵄⵢⵢⴰⵍⵏ ⵅ ⵜⵓⵥⵥⵓⵎⵜ ⴰⵎⵥⵏ ⴰⵙⵏⵜ ⵉⵎⴰⵙⵙⵏ (ⵜⵉⵍⵍⵓⵏⴰ ⴷ ⴳⴰⵏⴳⴰ).
ⵢⴰⵏ ⵓⵎⴷⵢⴰ ⵏ ⵜⵏⴹⴹⴰⵎⵜ ⵍⵍⵉ ⵉⵏⵏⴰ ⵢⴰⵏ ⵓⵄⵢⵢⴰⵍ ⵉ ⵢⴰⵜ ⵜⵄⵢⵢⴰⵍⵜ ⵅ ⵜⵎⴰⵣⵉⵔⵜ ⵏ ⵉⴳⴰⴼⴰⵢⵏ ⵍⵍⵉ ⵉⵡⴰⵍⴰⵏ ⵉ ⵉⵖⵔⵎ ⵉⴷ ⵓⴽⵏⵙⵓⵙ :
ⴰ ⵜⴰⴼⴼⴰ ⵏ ⵎⵉⵜ ⴰⵢⴰⴷ ⴰⴽⴽⵯ ⵓⵔ ⵉⵔⵔⵓⵜⵏ
ⴰⵏⵏⵉⵅ ⵉⵎⵖⵉ ⵏ ⵍⵊⴷⵉⴷ ⵉⵍⵍⴰ ⵅ ⵜⴰⵎⴰ ⵏⵏⵙ
ⵉⵏⵏⴰ ⵜ ⵉ ⵙⵏⴰⵜ ⵜⴰⵢⵜⵎⴰⵜⵉⵏ ⵢⴰⵜ ⵜⵎⵇⵇⵓⵔ ⵉⵙⵙⵔⵡⴰⵙ ⵜⵜ ⵙ ⵜⴰⴼⴼⴰ ⵢⴰⵜ ⵍⵍⵉ ⵎⵥⵥⵉⵢⵏ ⵜⴼⵓⵍⴽⵉ ⴱⴰⵀⵔⴰ ⴰⵢⵍⵍⵉⵖ ⵜⵙⵙⵓⵙⵎ ⴰⵄⵢⵢⴰⵍ ⴰⵏⵏ ⵉⵙⵙⵔⵡⴰⵙ ⵜⵜ ⵙ ⵉⵎⵖⵉ ⴰⵎⴰⵢⵏⵓ.
ⵜⴳⴰ ⵓⵍⴰ ⵜⴰⵎⵢⵓⵔⵜ ⵏ ⵍⵃⵏⵏⴰ ⵏ ⵜⵙⵍⵉⵜ ⵢⴰⵏ ⵓⴷⵖⴰⵔ ⴷ ⵢⴰⵜ ⵜⵉⵣⵉ ⵍⵍⵉ ⵖ ⴰⵔ tⵜⵏⵎⵓⴳⴳⵓⵔⵏ ⵉⵎⵙⵇⵇⵔⵏ ⴰⵔ ⵜⵜⵉⵍⵉⵏⵜ ⵜⵄⵢⵢⴰⵍⵉⵏ ⴷⴰⵔ ⵜⵙⵍⵉⵜ ⴰⵔ ⴳⵉⵙ ⵖⵎⵎⴰⵏⵜ ⵍⵃⵏⵏⴰ ⴰⵔ ⴷⴰⵔⵙⵏⵜ ⴽⵛⵛⵎⵏ ⵉⵄⵢⵢⴰⵍⵏ ⴽⵓ ⴷ ⵢⴰⵏ ⴰⵔ ⵉⵜⵜⴷⴷⴰ ⴷⴰⵔ ⴽⵔⴰ ⵏ ⵜⵄⵢⵢⴰⵍⵜ ⴰⵔ ⴰⵙ ⵉⵜⵜⴻⵜⵜⵔ ⴰⴷ ⴰⵙ ⵏⵏ ⵜⴳ ⵉⵎⵉⴽⴽ ⵏ ⵍⵃⵏⵏⴰ ⵖ ⵜⴷⵉⴽⵍⵜ ⵏ ⵓⴼⵓⵙ ⵏⵏⵙ ⴰⵔ ⵏⵉⵜ ⴳⵉⵙ ⵉⵜⵜⴰⴼⴰ ⴰⵣⵎⵣ ⵎⴰ ⵖ ⴷⵉⵙ ⵉⵙⴰⵡⴰⵍ .
ⵜⵉⵍⵉ ⴰⵡⴷ ⵜⵎⵢⵓⵔⵜ ⵏ ⵓⵣⴷⵎ ⵉ ⵓⵙⵍⵉ ⴰⵔ ⵜⵜⵎⵓⵏⵏ ⵉⵄⵢⵢⴰⵍⵏ ⴷ ⵜⵄⵢⵢⴰⵍⵉⵏ ⵙ ⵜⴰⴳⴰⵏⵜ ⴰⴷ ⴷ ⵣⴷⵎⵏ ⵉⴽⵛⵛⵓⴹⵏ ⵉ ⴽⵔⴰ ⵏ ⵓⵙⵍⵉ ⴰⵔ ⵜⵜⴰⵡⵉⵏ ⵜⵉⵢⵢⵏⵉ ⴷ ⵜⵎⵉⵎⵉⵏ ⴰⵔ ⵜⵜⴰⵙⵉⵏ ⵜⵉⵣⵔⵔⴰⵔⵉⵏ ⴷ ⵏⵏⴹⵎ ⴳⵔⴰⵜⵙⵏ ⴰⵔ ⴷ ⵍⴽⵎⵏ ⵣⴷⵎⵏ ⴷ ⴰⵢⵍⵍⵉ ⵎⵉ ⵥⴹⴰⵕⵏ ⵏ ⵉⴽⵛⵛⵓⴹⵏ ⴳⴳⴰⵡⵔⵏ ⴰⴷ ⴷⵔⵓⵏ ⴰⵢⵍⵍⵉ ⴷⵉⵙⵏ ⵉⵡⵉⵏ.
ⵉⵍⵉ ⵢⴰⵏ ⵓⴷⵖⴰⵔ ⴰⴽⴽⵯ ⴱⴰⵀⵔⴰ ⵉⵜⵜⵢⴰⵡⵙⵙⴰⵏⵏ ⵖ ⵜⵎⴰⵣⵉⵔⵜ ⵏ ⵉⵖⵔⵎ ⵉⴷ ⵓⴽⵏⵙⵓⵙ ⵙ ⵚⵚⵇⵕ ⴰⵙⵓⴽ ⵍⵍⵉ ⵉⴳⴰⵏ ⵙ ⵡⴰⵙⵙⴰⵖ ⵜⴰⵍⴰⵎⵉⵏ. ⵉⵖ ⵓⴷⴷⵏⵏⵜ ⵜⴰⴽⵯⵥⵉⵏ ⴰⵔ ⵜⵜⵃⵢⵢⴰⵍⵏⵜ ⵜⵄⵢⵢⴰⵍⵉⵏ ⴰⴷ ⴼⴼⴰⵖⵏⵜ ⴰⵔ ⵜⵜⴳⴰⵡⴰⵔⵏⵜ, ⴰⵔ ⴷⴰⵔⵙⵏⵜ ⵜⵜⴷⴷⴰⵏ ⵉⵄⵢⵢⴰⵍⵏ ⴰⵔ ⵙⴰⵡⴰⵍⵏ ⴰⵔ ⴹⵚⵚⴰⵏ ⴳⵔⴰⵜⵙⵏ ⵉⵅ ⵜⵙⵙⵓⵙⵎ ⴽⵔⴰ ⵏ ⵢⴰⵜ ⴽⵔⴰ ⵏ ⵢⴰⵏ ⵉⵙⵙⵓⵙⵎ ⵜⵜ ⴰⵡⴷ ⵏⵜⵜⴰⵜ ⴰⵔ ⵜⵜⵎⵓⵏⵏ ⵙ ⵙⵉⵏ ⵊⵎⵎⴰⵄⵏ ⵡⴰⵃⴷⵓⵜⵏ.
ⵓⵔ ⵔⴰⴷ ⵉⴽⴽ ⴽⵔⴰ ⵏ ⵉⵎⵣⴷⵉ ⵉⵖⵔⵎ ⵉⵖ ⴷ ⵓⵔ ⵉⴽⴽⵉ ⴰⵖⴰⵔⴰⵙ ⵏ ⵜⴰⵢⵔⵉ cariε lḥub ⵖⵉⴽⵍⵍⵉ ⴰⵙ ⵜⵜⵉⵏⵉⵏ ⵉⵎⵣⴷⴰⵏ.
ⵜⴰⵖⴰⵔⴰⵙⵜ ⵏ ⵚⵚⵇⵕ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵖ ⵜⵎⴰⵣⵉⵔⵜ ⵏ ⵉⴷ ⵓⴽⵏⵙⵓⵙ ⵍⵍⴰⵏⵜ ⴽⵉⴳⴰⵏ ⵏ ⵜⵎⴰⵜⴰⵔⵉⵏ ⵍⵍⵉ ⵙ ⵏⵥⴹⴰⵕ ⴰⴷ ⵏⵥⵍⵉ ⴳⵔ ⵜⵄⵢⵢⴰⵍⵜ ⴷ ⵜⵎⵖⴰⵔⵜ ⵉⵜⴰⵀⵍⵏ ⵣⵓⵏ ⴷ:
- ⵜⴰⵎⴰⵜⴰⵔⵜ ⵉⵣⵡⴰⵔⵏ ⵉⴳⴰ ⵜⵜ ⴰⴹⵖⴰⵕ ⴷ ⵜⴽⵍⵎⴰ ⴷ ⵓⵎⵍⵓⵍ ⵖⵡⵉⴷ ⵥⵍⵉⵏ ⵙ ⵜⵎⵖⴰⵔⵜ ⵓⵔ ⴰⵔ ⵜⵏ ⵜⵍⵙⵙⴰ ⵜⵄⵢⵢⴰⵍⵜ ⴰⴱⵍⴰ ⴰⵙⵙ ⵏⵏⴰ ⵜⵍⴽⵎ ⵜⵉⴳⵎⵎⵉ ⵏ ⵓⵔⴳⴰⵣ ⵏⵏⵙ.
- ⵜⴰⵎⴰⵜⴰⵔⵜ ⵜⵉⵙⵙ ⵙⵏⴰⵜ ⵉⴳⴰ ⵜⵜ ⵜⴰⵥⵓⵍⵜ ⴷ ⵜⵜⵙⵡⵉⴽ ⵍⵍⵉ ⵉⴳⴰⵏ ⵖⴰⵔ ⵡⵉⵏ ⵜⵎⵖⴰⵔⵜ ⵉⵜⴰⵀⵍⵏ ⵓⵔ ⴰⵔ ⵜⵜ ⵜⵜⴳⴳⴰⵏⵜ ⵜⵄⵢⵢⴰⵍⵉⵏ.
- ⵜⴰⵎⴰⵜⴰⵔⵜ ⵜⵉⵙⵙ ⴽⵕⴰⴹⵜ ⵜⴳⴰ ⵜⵜ ⵍⵃⵏⵏⴰ ⵏ ⵉⴹⴰⵕⵕⵏ ⴰⵔ ⵉⵜⵜⴳⴳⴰ ⵡⵉⵏ ⵜⵎⵖⴰⵔⵉⵏ ⵜⴰⵀⵍⵏⵉⵏ, ⵜⵉⵄⵢⵢⴰⵍⵉⵏ ⵓⵔ ⴰⵔ ⵙⵙⴰⴽⵎⵓⵔⵏⵜ ⵍⵃⵏⵏⴰ ⵉ ⵉⴹⴰⵕⵕⵏ ⵏⵏⵙⵏⵜ ⴰⴱⵍⴰ ⴰⵙⵙ ⵏ ⵍⵃⵏⵏⴰ ⵏ ⵜⵎⵖⵔⴰ ⵏⵏⵙⵏⵜ.
ⵜⵉⵎⴰⵜⴰⵔⵉⵏ ⴰⴷ ⴰⵔ ⵜⵜⴰⵡⵙⵏⵜ ⵉ ⵓⵄⵢⵢⴰⵍ ⴰⴷ ⵉⵥⵍⵉ ⴳⵔ ⵜⵎⵖⴰⵔⵜ ⴷ ⵜⵄⵢⵢⴰⵍⵜ ⴷ ⴰⴷ ⵉⵙⵙⵏ ⵜⴰⴼⵔⵓⵅⵜ ⴰⵏⵏ ⵍⵍⵉ ⵉⵥⵕⴰ ⵢⴰⴽ ⵓⵔ ⵜⵜⴰⵀⵍ ⴱⴰⵛ ⴰⴷ ⵢⴰⴼ ⴰⴷ ⵙⵔⵙ ⵉⵙⴰⵡⵍ.
ⵉⵡⵜⵜⴰ ⵏ ⵚⵚⵇⵕ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⴰⵔ ⵉⵜⵜⵉⵍⵉ ⵚⵚⵇⵕ ⵖ ⵉⴷⵖⴰⵔⵏ ⴼⴰⵡⵏⵉⵏ ⵍⵍⵉ ⵜⵜⴰⵏⵏⴰⵢⵏ ⵎⴷⴷⵏ ⴰⴽⴽⵯ ⴷ ⵉⴳⴰ ⵢⴰⵜ ⵜⵖⴰⵡⵙⴰ ⵖ ⵉⵍⵍⴰ ⴽⵉⴳⴰⵏ ⵏ ⵍⵓⵇⵇⵕ ⴷ ⵓⴽⵔⵓⴽⴹ ⴰⵔ ⵉⵜⵜⴳⴳⵔⵓ ⵙ ⵍⵉⵜⵉⵀⴰⵍ ⴳⵔ ⵜⵄⵢⵢⴰⵍⵜ ⴷ ⵓⵄⵢⵢⴰⵍ.
ⵉⵎⵓⴽⵔⵉⵙⵏ ⵏ ⵚⵚⵇⵕ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵖ ⵜⴳⵉⵔⴰ ⴰⴷ ⴽⵛⵎⵏⵜ ⴷ ⴼⵍⵍⴰⵙ ⵎⵏⵏⴰⵡⵜ ⵜⵓⵎⴰⵏⵉⵏ ⵣⵓⵏ ⴷ ⵜⴰⵡⵀⵀⴰⴱⵉⵜ ⴷ ⵜⴰⵜⵉⴽⵏⵓⵍⵓⵊⵉⵜ ⵍⵍⵉ ⵢⵉⵡⵙⵏ ⴽⵉⴳⴰⵏ ⵖ ⵜⵓⴽⴽⵙⴰ ⵏ ⵍⵓⵇⵇⵔ ⵍⵍⵉ ⵜⵜ ⵉⵏⵏ ⵢⴰⴷⵍⵍⵉ ⵉⴽⴽⴰⵏ ,ⴷ ⵎⵎⴰⵖⵏ ⴰⴷ ⵙⵍⵍⵓⵅⵛⵓⵏ ⵜⴰⵡⵍⴰⴼⵜ ⵏⵏⵙ.
ⵥⵕ ⵓⴳⴳⴰⵔ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵉⵙⴰⵖⵓⵍⵏ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]- ⴰⵎⵏⵏⵉ ⵏ ⵙⴰⵏⴰ ⵃⵍⵍⴰⴱ