Jump to content

ⵍⵄⴰⵎⵎⵜ

ⵙⵏⴼⵍ ⵉⵙⵖⵡⴰⵏ
ⴰⵎⵏⵏⵉ ⴰⴷ ⵉⴳⴰ ⴰⵎⵏⵏⵉ ⴰⴼⴰⵍⴽⴰⵢ, ⵥⵕ ⵉⵎⵏⵏⵉⵜⵏ ⵉⴼⴰⵍⴽⴰⵢⵏ ⵏ ⵡⵉⴽⵉⴱⵉⴷⵢⴰ.
ⵙⴳ ⵡⵉⴽⵉⴱⵉⴷⵢⴰ
ⵍⵄⴰⵎⵎⵜ ⵏ ⵉⵃⵓⴷⴷⵊⵉⵏ, ⵉⵎⴼⴹⵡⴰⴽ, 2015

ⵍⵄⴰⵎⵎⵜ[1][2]ⵜⴳⴰ ⵢⴰⵏ ⵡⴰⵏⴰⵡ ⵏ ⵜⵥⵓⵕⵉ ⵜⴰⵎⴰⵣⵉⵖⵜ ⵉⵡⵜⵏ ⵙ ⵉⵥⵓⵕⴰⵏ ⴳ ⵓⵎⵣⵔⵓⵢ ⵏ ⵓⴼⴳⴰⵏ ⴰⵎⴰⵣⵉⵖ ⵜⴰⵙⵓⵜ ⴼ ⵜⴰⵙⵓⵜ, ⵜⴳⴰ ⵜⴰⵥⵓⵕⵉ ⵏ ⵓⵕⴽⴰⴹ[3][4] ⵉⵎⵓⵏⵏ ⴷ ⵏⵏⴹⵎ, ⵜⴳ ⵙ ⵢⴰⵜ ⵜⴳⵎⵉⴹⵉ ⵉⴳⴳⵓⵜⵏ ⵜⴰⵥⵓⵕⵉ ⵏ ⵉⵔⴳⴰⵣⵏ. ⵜⴰⵥⵓⵕⵉ ⴰⴷ ⵜⵍⵍⴰ ⴷⴰⵔ ⵜⵓⴳⵜ ⵏ ⵜⵇⵇⴱⵉⵍⵉⵏ ⴳ ⵍⵎⵖⵔⵉⴱ. ⵜⴻⵜⵜⵢⵓⵙⵙⴰⵏ ⴱⴰⵀⵔⴰ ⵍⵄⴰⵎⵎⵜ ⴳ ⵜⵇⵇⴱⵉⵍⵜ ⵏ ⵉⵏⴼⴹⵡⴰⴽ[5] ⵉⵡⴰⵍⴰⵏ ⵉ ⵜⴰⵎⵏⴰⴹⵜ ⵏ ⵓⵣⵉⵍⴰⵍ, ⵜⴰⵙⴳⴰ ⵏ ⴱⵏⵉ ⵎⵍⵍⴰⵍ-ⵅⵏⵉⴼⵕⴰ. ⵍⵄⴰⵎⵎⵜ ⵜⴳⴰ ⵜⴰⵥⵓⵕⵉ ⵉⵥⵍⵉⵏ ⵙ ⵜⵇⵇⴱⵉⵍⵜ ⵏ ⵉⵏⴼⴹⵡⴰⴽ, ⵜⵍⵍⴰ ⵍⵄⴰⵎⵎⵜ ⵓⵍⴰ ⴳ ⵎⵏⵏⴰⵡⵜ ⵏ ⵜⵎⵏⴰⴹⵉⵏ ⵏ ⵜⵇⵇⴱⵉⵍⵜ ⵏ ⵉⵖⵊⴷⴰⵎⵏ ⵉⵏⵎⴰⵍⴰⵏ ⴷ ⵜⵇⵇⴱⵉⵍⵜ ⵏ ⵉⵏⴼⴹⵡⴰⴽ ⵙⴳ ⵜⵙⴳⴰ ⵏ ⵉⴼⴼⵓⵙ ⵓⵜⵔⵉⵎ. . ⵉⵙⵎ ⴰⴷ ⵏ ⵍⵄⴰⵎⵎⵜ ⵉⵍⵍⴰ ⴳ ⵜⵎⵉⵣⴰⵔ ⵢⴰⴹⵏⵉ ⵣⵓⵏ ⵥⴰⵢⵢⴰⵏ ⴷ ⵙⵓⵙ ⵎⴰⵛⵛ ⵉⴷⵔⵓⵙ, ⴰⵛⴽⵓ ⴷⴰⵔⵙⵏ ⴰⵏⴰⵡⵏ ⵢⴰⴹⵏⵉⵏ ⵏ ⵜⵥⵓⵕⵉ, ⵙⵓⵙ ⴳⵉⵙ ⴰⵃⵡⴰⵛ, ⵥⴰⵢⵢⴰⵏ ⵏⵓⵜⵏⵉ ⴰⵔ ⵜⵜⵓⵔⴰⵔⵏ ⵙ ⵓⵃⵉⴷⵓⵙ. ⵜⴻⵜⵜⵓⵢⵙⵙⴰⵏ ⵍⵄⴰⵎⵎⵜ ⵙ ⵉⵙⵎⴰⵡⵏ ⵢⴰⴹⵏⵉ ⵣⵓⵏ "ⵍⵄⵎⵎⵜ" ⴷ "ⵍⵄⴰⵎⵎⴰⵜ".

ⴰⵔ ⵜⴻⵜⵜⵢⴰⵡⵙⴽⴰⵔ ⵍⵄⴰⵎⵎⵜ ⴰⴽⵓⴷ ⵏⵏⴰ ⵉⵍⵍⴰ ⴽⵔⴰ ⵏ ⵓⵣⵎⵣⵣⵓ ⵉⵥⵍⵉⵏ ⵙ ⵜⵇⵇⴱⵉⵍⵜ ⵏⵖ ⵙ ⴽⵔⴰ ⵏ ⵓⵙⵓⵏ ⵏⵖ ⴰⴹⵡⵡⴰⵕ, ⵣⵓⵏ ⵉⴳ ⵜⵍⵍⴰ ⵜⵎⵖⵔⴰ ⴷⴰⵔ ⵓⵙⵍⵉ ⵏⵖ ⵜⴰⵙⵍⵉⵜ, ⵜⵜⵍⴳⵉⵜ (ⴰⵏⵎⵓⴳⴳⵓⵔ ⴷⴰ ⵙⴽⴰⵔⵏ ⵎⵉⴷⴷⵏ ⵉ ⵍⵄⴰⵎⵍ, ⵍⵇⵇⴰⵢⴷ ⵏⵖ ⴽⵔⴰ ⵏ ⵓⴱⵕⵍⴰⵎⴰⵏⵉ) ⵏ ⴽⵔⴰ ⵡⵓⴷⵎ ⵉⵎⵇⵇⵓⵔⵏ, ⴰⵙⴼⵓⴳⵍⵓ ⵙ ⴽⵔⴰ ⵏ ⵓⵣⵎⵣⵣⵓ ⵏ ⵜⵙⵔⵜⵉⵜ ⵣⵓⵏ ⵉⵙⵜⴰⵢⵏ ⵏⵖ ⴽⵔⴰ ⵏ ⵉⵎⵏⵖⵉ. ⴳ ⵉⵔⵉⵔ ⵏ ⵍⵄⴰⵎⵎⵜ ⴰⵔ ⵜⵜⴱⴷⴷⴰⴷⵏ ⵜⵓⴳⵜ ⵏ ⵉⵔⴳⴰⵣⵏ ⴰⵔ ⵙⴽⴰⵔⵏ ⴰⴷⵓⵔ[3], ⵍⵙⵏ ⵜⵉⵊⵍⵍⵓⴱⴰ ⵏⵖ ⵍⴼⵓⵇⵇⵉⵢⵢⴰⵜ ⵜⵓⵎⵍⵉⵍⵉⵏ ⵏⵖ ⵜⵉⵡⵔⴰⵖⵉⵏ (ⵉⴷⵔⵓⵙ ⵎⴰ ⴳ ⵜⵜⵉⵍⵉⵏⵜ ⴳ ⴽⵔⴰ ⵏ ⵓⴽⵯⵍⵓ ⵢⴰⴹⵏ), ⴷ ⵉⴷⵓⴽⴰⵏ ⴷ ⵜⵉⵜⵇⴰⵛⵔⵉⵏ [3] (ⴰⵔ ⴰⵙⵏⵜ ⵜⵜⵉⵏⵉⵏ ⵜⵜⵇⵇⴰⵛⵕ) ⵓⵍⴰ ⵏⵜⵜⵏⵜⵉ ⴳ ⵎⴰ ⵉⴳⴳⵓⵜⵏ ⴰⵔ ⵜⵜⴳⴳⴰⵏⵜ ⵜⵓⵎⵍⵉⵍⵉⵏ ⵏⵖ ⵜⵉⵡⵔⴰⵖⵉⵏ, ⴳⵏ ⴼ ⵢⵉⵅⴼ ⵏⵏⵙⵏ ⴰⵛⴷⴷⴰⴷ ⵏⵖ ⵜⴰⵕⵥⵥⵉⵜ (ⴰⵔ ⴰⵙ ⵜⵜⵉⵏⵉⵏ ⵉⵏⴼⴹⵡⴰⴽ ⵕⵕⵥⵟ) ⵜⴰⵡⵕⴰⵖⵜ ⵏⵖ ⵜⵓⵎⵍⵉⵍⵜ ⵏⵖ ⴰⵔ ⵍⵙⵙⴰⵏ ⴼ ⵉⵅⴼⴰⵡⵏ ⵏⵏⵙⵏ ⵜⴰⵛⴰⵛⵉⵜ (ⵏⵖ ⵟⵟⴰⴳⵉⵢⵢⴰ) ⵓⵍⴰ ⵏⵜⵜⴰⵜ ⴳ ⵓⴽⵯⵍⵓ ⵓⵎⵍⵉⵍ ⵏⵖ ⴰⵡⵔⴰⵖ; ⴰⴳⵯⵍⵏ ⴳ ⵉⵖⴰⵔⵉⵡⵏ (ⵏⵖ ⵉⵖⵕⴰⴹ) ⵏⵏⵙⵏ ⵍⴽⵯⵎⵎⵉⵜ, ⴽⵓ ⴰⵔⴳⴰⵣ ⴰⵔ ⴷⵉⵙ ⵉⵙⴰⵜⵜⵉ ⴰⵍⵍⵓⵏ ⵏⵖ ⵜⴰⵍⵍⵓⵏⵜ ⵏⵏⵙ ⵏⵖ ⴰⵔ ⵉⵜⵜⵃⵓⵛ ⵖⴰⵔ ⵙ ⵉⴼⴰⵙⵙⵏ ⵏⵏⵙ, ⵢⵉⵍⵉ ⴷⵉⵜⵙⵏ ⵓⵍⴰ ⴱⴰⴱ ⵏ ⴳⴰⵏⴳⴰ, ⴰⵔ ⵙⵙⵏⵜⴰⵢⵏ (ⵏⵖ ⴰⵔ ⴱⴷⴷⵓⵏ) ⵉⵔⴳⴰⵣⵏ ⵍⵍⵖⴰ ⵏⵖ ⵜⴰⵏⴹⴹⴰⵎⵜ ⴰⵔ ⴽⴽⴰⵜⵏ ⴰⵍⵍⵓⵏ ⴰⵔ ⵉⴳ ⵉⵃⵎⴰ ⵉⵍⵎⵎⴰ ⴽⵛⵎⵏ ⴷ ⵜⴼⵔⵅⵉⵏ (ⴰⵔ ⴰⵙⵏⵜ ⵜⵜⵉⵏⵉⵏ ⵜⵉⵎⵃⵡⴰⵛⵉⵏ) ⵉⵍⵙⴰⵏ ⵍⵇⵇⵟⵉⴱ ⴷ ⵜⵎⵍⵙⴰ ⵜⵉⴱⵍⴷⴰⵢ ⵏ ⵜⵎⴰⵣⵉⵔⵜ ⵙⴽⵔⵏⵜ ⵓⵍⴰ ⵏⵜⵜⵏⵜⵉ ⴰⴷⵓⵔ ⵏⵏⵙⵏⵜ ⴷⴰⵜ ⴰⴷⵓⵔ ⵏ ⵉⵔⴳⴰⵣⵏ ⵎⴰⵛⵛ ⵓⵔ ⴰ ⴷⵉⵜⵙⵏ ⵜⵜⵅⵍⵍⴰⴹⵏ ⴰⵔ ⵉⴳ ⵙⵙⵔⵖⴰⵏ ⵍⵄⴰⵎⵎⵜ ⵉⵍⵎⵎⴰ ⴽⵓ ⴰⵔⴳⴰⵣ ⴰⵔ ⴷ ⵉⵍⴷⴷⵉ ⵢⴰⵜ ⵜⴼⵔⵓⵅⵜ ⴰⴷ ⴷⵉⵙ ⵉⵜⵜⵃⵓⵛ. ⵜⵉⴼⵔⵅⵉⵏ ⴰⵔ ⵜⵜⵃⵓⵛⵏⵜ ⵙ ⵉⴼⴰⵙⵙⵏ ⵎⴰⵛⵛ ⵉⵔⴳⴰⵣⵏ ⴰⵔ ⵜⵜⵃⵓⵛⵏ ⵙ ⵉⴼⴰⵙⵙⵏ ⵏⵖ ⵙ ⵜⴰⵍⵍⵓⵏⵜ.

ⴰⵥⵓⵕ ⵏ ⵉⵙⵎ

[ⵙⵏⴼⵍ | ⵙⵏⴼⵍ ⴰⵙⴰⴳⵎ]

ⴰⵥⵓⵕ ⵏ ⵢⵉⵙⵎ ⵏ "ⵍⵄⴰⵎⵎⵜ" ⵓⵔ ⵉⵍⵍⵉ ⴽⵔⴰ ⵏ ⵓⵙⴰⵖⵓⵍ ⵉⵜⵜⵢⴰⵔⴰⵏ ⴼⵍⵍⴰⵙ ⵉⵙⴰⵡⵍⵏ, ⵎⴰⵛⵛ ⴰⵔ ⴼⵍⵍⴰⵙ ⵙⴰⵡⴰⵍⵏ ⵎⵉⴷⴷⵏ ⴳ ⵜⵓⴷⵔⵜ ⵏⵏⵙⵏ ⵜⴰⴽⵓⵢⴰⵙⵜ. ⴳ ⵍⵎⵖⵔⵉⴱ ⴰⵔ ⴰⵟⵟⴰⵏ ⵎⵉⴷⴷⵏ ⵉⵏⴳⵔ ⵢⴰⵏ ⵓⴼⴳⴰⵏ ⴷⴰ ⵉⵃⵚⴰⵏ ⵍⵇⵇⵕⴰⵏ ⴷ ⵡⵉⴷ ⴷⴰ ⵓⵔ ⵜ ⵉⵃⵚⵉⵏ, ⵎⵉⴷⴷⵏ ⴷⴰ ⵉⵃⵚⴰⵏ ⴰⵔ ⴰⵙⵏ ⵜⵜⵉⵏⵉⵏ "ⵟⵟⵍⴱⴰ" (ⴰⵎⵢⵓⵏ ⵏⵙ ⵟⵟⴰⵍⴱ) ⵏⵖ "ⵍⵎⵙⴰⴼⵔⵉⵏ" (ⴰⵎⵢⵓⵏ ⵏⵏⵙ ⵍⵎⵙⴰⴼⵔ, ⴰⵔ ⴰⵙⵏ ⴰⵇⵇⵔⴰⵏ ⵙ ⵉⵙⵎ ⴰⴷ ⴰⵛⴽⵓ ⴰⵔ ⵜⵜⵙⴰⴼⴰⵔⵏ ⴰⴼⴰⴷ ⴰⴷ ⵃⵚⵓⵏ ⵍⵇⵇⵕⴰⵏ); ⵎⵉⴷⴷⵏ ⴷⴰ ⵓⵔ ⵉⵃⵚⵉⵏ ⵍⵇⵇⵕⴰⵏ ⴰⵔ ⴰⵙⵏ ⴰⵇⵇⵔⴰⵏ ⵙ "ⵉⵄⴰⵎⵎⵉⵏ" (ⴰⵎⵢⵓⵏ ⵏⵏⵙ ⴰⵄⴰⵎⵎⵉ). ⵍⵍⴰⵏ ⴽⵔⴰ ⵏ ⵉⵡⵏⵏⴰⵏ ⵉⵜⵜⵉⵏⵉⵏ ⵎⴰⵙ ⵉⵙⵎ ⵏ ⵍⵄⴰⵎⵎⵜ ⵉⵜⵜⵢⴰⴼⴽⴰ ⵉ ⵜⵥⵓⵕⵉ ⴰⴷ ⴰⵛⴽⵓ ⴰⵔ ⵜⵜ ⵜⵜⵓⵔⴰⵔⵏ ⵖⴰⵕⵔ ⵎⵉⴷⴷⵏ ⴷⴰ ⵓⵔ ⵉⵃⵚⵉⵏ ⵍⵇⵇⵕⴰⵏ ⵏⵖ "ⵉⵄⴰⵎⵎⵉⵏ", ⵖⴰⵢⴰⵏⵏ ⴰⴼ ⵜⴳⴰ ⵍⵄⴰⵎⵎⵜ. ⵉⵍⵍⴰ ⴷⴰⵖ ⵢⴰⵏ ⵡⴰⵡⴰⵍ ⵢⴰⴹⵏ ⵉⵜⵜⵉⵏⵉⵏ ⵎⴰⵙ ⵜⴰⴳⵓⵔⵉ ⵏ "ⵍⵄⴰⵎⵎⵜ" ⴰⵔ ⵜⵜ ⵜⵜⵉⵏⵉⵏ ⵉ ⵜⵥⵓⵕⵉ ⴰⴷ ⴰⵛⴽⵓ ⴳ ⵎⴰⴷ ⵉⵣⵔⵉⵏ ⵍⵄⴰⵎⵎⵜ ⴰⵔ ⵜⵜ ⵜⵜⵓⵔⴰⵔⵏ ⵎⵉⴷⴷⵏ ⴰⴽⴽⵯ ⵏ ⵉⵇⵇⴱⵉⵍⵏ, ⴽⵓ ⴰⵇⵇⴱⵉⵍ ⵏⵖ ⴽⵓ ⵓⵙⵓⵏ ⴰⵔ ⵜⵜⵎⵓⵏⴰⵏ ⵉⵎⵣⴷⴰⵖⵏ ⵏⵏⵙ ⴰⴽⴽⵯ ⴰⴽⵓⴷ ⵏⵏⴰ ⵉⵍⵍⴰ ⴽⵔⴰ ⵏ ⵓⵙⴼⵓⴳⵍⵓ, ⵎⵉⴷⴷⵏ ⵏ ⵓⵙⵓⵏ ⴰⴽⴽⵯ ⴰⴷ ⵉⴳⴰⵏ ⵍⵄⴰⵎⵎⵜ[6][7], ⵓⵔ ⴰⵔ ⵜⵜⵉⵏⵉⵏ ⵎⴰⵙ ⵜⵍⵍⴰ ⵍⵄⴰⵎⵎⵜ ⴰⴱⵍⴰ ⵉⴳ ⴳⴳⵓⵜⵏ ⵎⵉⴷⴷⵏ.

ⵄⴱⴷⵍⵍⴰⵀ ⵣⵉⴷⴰⵏ ⴰⵔ ⵉⵙⴰⵡⵡⴰⵍ ⴼ ⵍⵄⴰⵎⵎⵜ ⴳ ⵜⴰⵏⴰⵔⴰ ⵏ ⴼⵟⵡⴰⴽⴰ (©ⴰⵠⵉⴷⵢⵓ ⵉⵜⵜⵢⴰⴼⵙⴰⵔ ⴹⴰⵕⵜ ⵜⵓⵔⴰⴳⵜ ⵏ ⵎⴰⵙⵙ ⵄⴱⴷⵍⵍⴰⵀ ⵣⵉⴷⴰⵏ)

ⴰⵔ ⴷⴰⵖ ⵜⵜⵉⵏⵉⵏ ⵎⵉⴷⴷⵏ ⵎⴰⵙ ⵍⵄⴰⵎⵎⵜ ⵜⵓⵙⵉ ⵉⵙⵎ ⴰⴷ ⴰⵛⴽⵓ ⴰⵔ ⵙⴽⴰⵔⵏ ⵎⵉⴷⴷⵏ ⵏ ⵜⵇⵇⴱⵉⵍⵜ ⵍⵄⴰⵎⵎⵜ ⴰⴽⵓⴷ ⵏⵏⴰ ⴷⴰⵔⵙⵏ ⴷ ⵢⵓⵛⴽⴰ ⴽⵔⴰ ⵏ ⵡⵓⴷⵎ ⵉⵎⵇⵇⵓⵔⵏ ⵣⵓⵏ ⴷ ⵍⵄⴰⵎⵍ, ⴰⵎⴰⵡⴰⵙ, ⴰⴳⵍⵍⵉⴷ ⵏⵖ ⴽⵔⴰ ⵏ ⵡⵓⴷⵎ ⵏ ⵜⵙⵔⵜⵉⵜ; ⴳ ⵓⵏⵎⵓⴳⴳⴰⵔ ⴰⴷ ⴰⵔ ⴳⵉⵙ ⵜⵜⵉⵍⵉⵏ ⵉⵏⴱⴳⵉⵡⵏ (ⵓⴷⵎⴰⵡⵏ ⵉⵎⵇⵇⵓⵔⵏ) ⴷ ⵎⵉⴷⴷⵏ ⵏ ⵜⵇⵇⴱⵉⵍⵜ (ⵍⵄⴰⵎⵎⵜ), ⵎⵉⴷⴷⵏ ⴷⴰ ⵉⵜⵜⵃⵓⵛⵏ ⴳⴰⵏ ⵙⴳ ⵍⵄⴰⵎⵎⵜ, ⵎⴰⵢⴰⴷ ⴰⴼ ⵜⵓⵙⵉ ⵜⵥⵓⵕⵉ ⴰⴷ ⵉⵙⵎ ⵏ "ⵍⵄⴰⵎⵎⵜ" ⴰⵛⴽⵓ ⴰⵔ ⵜⵜ ⵜⵜⵓⵔⴰⵔⵏ ⵍⵄⴰⵎⵎⵜ ⵏ ⵎⵉⴷⴷⵏ[6][7].

ⴳ ⵎⴰⵢⴰⴷ ⵉⵣⵔⵉⵏ ⴽⵓ ⴰⵇⵇⴱⵉⵍ ⴰⵔ ⴳⵉⵙ ⵜⵜⵉⵍⵉⵏⵜ ⵜⵓⴳⵜ ⵏ ⵜⵔⵓⴱⴱⴰ ⵏ ⵓⵃⵡⴰⵛ, ⴰⴽⵓⴷ ⵏⵏⴰ ⵉⵍⵍⴰ ⴽⵔⴰ ⵏ ⵓⵙⴼⵓⴳⵍⵓ ⵉⵎⵇⵇⵓⵔⵏ ⴰⵔ ⵜⵜⵎⵓⵏⴰⵏⵜ ⵜⵉⵔⵓⴱⴱⴰ ⴰⴷ ⴳ ⵢⴰⵜ ⵜⵔⴰⴱⴱⵓⵜ ⵉⵎⵇⵇⵓⵔⵏ ⴰⵔ ⴰⵇⵇⵔⴰⵏ ⵙ ⵢⵉⵙⵎ ⵏ ⵍⵄⴰⵎⵎⵜ[8].

ⴰⵙⵏⵎⵍ ⵏ ⵍⵄⴰⵎⵎⵜ

[ⵙⵏⴼⵍ | ⵙⵏⴼⵍ ⴰⵙⴰⴳⵎ]
ⵜⵉⴳⵎⵉⴹⵉ ⵏ ⵉⵔⴳⴰⵣⵏ ⴷ ⵜⵎⵖⴰⵔⵉⵏ ⴳ ⵍⵄⴰⵎⵎⵜ (ⵜⵉⵎⵖⴰⵔⵉⵏ ⴰⵔ ⵜⵜⵉⴷⵔⵓⵙⵏ ⴳ ⵍⵄⴰⵎⵎⵜ ⴰⵔ ⵜⵜⴳⴳⴰⵏⵜ ⵙⴳ ⵢⴰⵜ ⴰⵔ ⴰⵡⴽⴽ ⴽⵕⴰⴹⵜ, ⵎⴰⵛⵛ ⵉⵔⴳⴰⵣⵏ ⵥⵥⴹⴰⵕⵏ ⴰⴷ ⴳⵏ ⴳ ⵍⵄⴰⵎⵎⵜ ⵓⴳⴳⴰⵔ ⵏ ⵙⵉⵏ ⵏ ⵡⴰⴳⵏⴰⵔⵏ (40) ⵏ ⵓⵔⴳⴰⵣ).

ⵜⴰⵥⵓⵕⵉ ⵏ ⵉⵎⴰⵣⵉⵖⵏ ⵜⵓⵜ ⵙ ⵉⵥⵓⵕⴰⵏ ⴳ ⵓⵎⵣⵔⵓⵢ ⵖⵉⴽⵍⵍⵉ ⵙⵉⵙⵏ ⵢⵓⵜ ⵓⴼⴳⴰⵏ ⴰⵎⴰⵣⵉⵖ ⴳ ⵜⵎⴰⵣⵉⵔⵜ ⵏⵏⵙ. ⵓⵔ ⵜⴳⵉ ⵜⵥⵓⵕⵉ ⵜⴰⵎⴰⵣⵉⵖⵜ ⴽⵔⴰ ⵏ ⵉⵎⵔⵙⵉ ⵢⵓⵀⵏⴻⵏ ⴰⴽⵓⴷ ⵏⵏⴰ ⴼⵍⵍⴰⵙ ⵏⵙⴰⵡⴰⵍ ⵏⵖ ⵏⵔⴰ ⴰ ⴼⵍⵍⴰⵙ ⵏⵖⵔ, ⵏⵍⵎⴷ ⵎⴰⴷ ⵉⴳⴰ ⴷ ⵎⴰⴷ ⴳⴰⵏ ⵉⵥⵓⵕⴰⵏ ⵏⵏⵙ. ⴰⴽⵓⴷ ⵏⵏⴰ ⵉⵙⴰⵡⴰⵍ ⵢⴰⵏ ⴼ ⵜⵥⵓⵕⵉ ⵜⴰⵎⴰⵣⵉⵖⵜ ⴰⵔ ⵉⵙⴰⵇⵇⵓⵍ ⵜⴰⵔⴰⴱⴱⵓⵜ ⵏ ⵎⵉⴷⴷⵏ ⴰⵔ ⵜⵜⵀⴹⴰⵕⵏ, ⵎⴰⵛⵛ ⴰⴽⵓⴷ ⵏⵏⴰ ⵏⴳⴳⵉⵡⵔ ⵙ ⴰⴽⴰⵍ ⵏⵙⵔⵙ ⵜⵉⵔⵙⴰⵍ ⵏⴰⵔⴰ ⵉⵙⴽⴽⵉⵍⵏ ⵏⵃⵚⵓ ⵜⵏ, ⵏⴳⵔ ⵉⵥⵕⵉ ⵏⵏⵖ ⴼ ⴽⵓ ⵜⴰⵇⵇⴱⵉⵍⵜ ⴷ ⵜⵥⵓⵕⵉ ⵏⵏⵙ, ⵏⵙⵉⴳⴳⵍ ⴰⵎⵣⴰⵔⴰⵢ ⴰⵔ ⵉⵜⵜⵎⵎⵔⴽⴰⵙ ⵡⴰⵡⴰⵍ ⵢⴰⴹⵕ ⵜⴰⵏⵏⴰⵢⵜ ⵏⵏⵖ ⵜⴰⵎⵣⵡⴰⵔⵓⵜ ⴼ ⵜⵥⵓⵕⵉ ⵜⴰⵎⴰⵣⵉⵖⵜ.

ⵍⵄⴰⵎⵎⵜ ⵓⵍⴰ ⵏⵜⵜⴰⵜ ⵜⴹⴼⴰⵕ ⵜⴰⵥⵓⵕⵉ ⵜⴰⵎⴰⵣⵉⵖⵜ ⴳ ⵓⵎⵎⵔⴽⵙ, ⵉⵛⵇⵇⴰ ⴰⴷ ⵏⵉⵏⵉ ⴳ ⵢⴰⵏ ⵡⴰⵡⴰⵍ ⵓⵍⴰ ⴳ ⵎⵔⴰⵡ ⵏ ⵉⵡⴰⵍⵉⵡⵏ ⵎⴰⴷ ⵉⴳⴰⵏ ⵍⵄⴰⵎⵎⵜ, ⵖⴰⵢⴰⵏⵏ ⴰⴼ ⵔⴰⴷ ⴽⴰ ⵏⵥⵥⴹⴰⵕ ⴰⴷ ⵏⵙⵔⵙ ⵜⵉⴼⵔⵉⵙⵉⵏ ⵏ ⵜⵥⵓⵕⵉ ⴰⴷ ⴱⴰⵛ ⴰⴷ ⵏⵥⵥⴹⴰⵕ ⴰⴷ ⵏⵙⵎⵣⴰⵔⴰⵢ ⵉⵏⴳⵔⴰⵙ ⴷ ⵜⵥⵓⵕⵉⵡⵉⵏ ⵢⴰⴹⵏⵉⵏ:

  • ⴰⵔ ⵉⵜⵜⵉⵍⵉ ⴳ ⵍⵄⴰⵎⵎⵜ ⵡⴰⵍⵍⵓⵏ (ⵟⵟⴰⵕⴰⵜ) ⴷ ⴳⴰⵏⴳⴰ, ⵏⵖ ⵜⵥⵥⴹⴰⵕ ⴰⴷ ⵜⵉⵍⵉ ⵍⵄⴰⵎⵎⵜ ⵖⴰⵔ ⵙ ⵡⴰⵍⵍⵓⵏ[9].
  • ⵍⵄⴰⵎⵎⵜ ⵜⴳⴰ ⵉⵔⵉⵔ ⵏ ⵟⵟⴰⵕⵜ, ⵓⵔ ⵜⵍⵍⵉ ⵍⵄⴰⵎⵎⵜ ⴱⵍⴰ ⵟⵟⴰⵕⵜ, ⴳ ⵜⵓⴷⴷⵎⴰ ⴰⵔ ⵙⵙⵔⵖⴰⵏ ⵉⵔⴳⴰⵣⵏ ⵟⵟⴰⵕⵜ ⵏⵏⵙⵏ ⴱⴰⵛ ⴰⴷ ⵜⴼⴽ ⵟⵟⴰⵕⵜ ⴰⵡⴰⵍ. ⴰⵔ ⵜⵜⵉⵏⵉⵏ ⵉⵏⴼⴹⵡⴰⴽ ⵎⴰⵙ ⵍⵄⴰⵎⵎⵜ ⵜⴳⴰ ⵉⵔⵉⵔ ⵏ ⵟⵟⴰⵕⵜ, ⴰⵃⵡⴰⵛ ⵉⴳⴰ ⵉⵔⵉⵔ ⵏ ⵓⴼⵓⵙ.[9]
  • ⵍⵄⴰⵎⵎⵜ ⵜⴳⴰ ⵉⵔⵉⵔ ⵏ ⵉⵔⴳⴰⵣⵏ, ⵉⴷⵔⵓⵙ ⵎⴰ ⴳ ⵜⵜⵉⵍⵉⵏⵜ ⵜⵎⵖⴰⵔⵉⵏ ⴳ ⵍⵄⴰⵎⵎⵜ, ⴰⵔ ⵉⵜⵜⵉⵍⵉ ⵡⴰⴷⵓⵔ ⵏ ⵜⵎⵖⴰⵔⵉⵏ ⴳ ⵍⵄⴰⵎⵎⵜ ⵉⴳ ⵓⵔ ⵉⵍⵍⵉ ⵓⴱⵕⵕⴰⵏⵉ ⴼ ⵓⵙⵓⵏ, ⵎⴰⵛⵛ ⵜⵉⵎⵖⴰⵕⵉⵏ ⵓⵔ ⴰⵔ ⵜⵜⵓⵔⴰⵔⵏⵜ ⴰⴱⵍⴰ ⵙ ⵓⴼⵓⵙ, ⵓⵔ ⴰⵔ ⵙⴰⵜⵜⵉⵏⵜ ⴰⵎⵢⴰ. ⴰⵔ ⵜⵜⵉⵏⵉⵏ ⵉⵏⴼⴹⵡⴰⴽ ⵎⴰⵙ ⴰⵔ ⵉⴱⴷⴷⵓ ⵓⵙⴼⵓⴳⵍⵓ ⵙ ⵍⵄⴰⵎⵎⵜ ⵉⴳⴳⵔⴰ ⵙ ⵓⵃⵡⴰⵛ ⴰⵛⴽⵓ ⴰⵔ ⵜⵜⵓⵔⴰⵔⵏ ⵉⵔⴳⴰⵣⵏ ⵍⵄⴰⵎⵎⵜ ⴳ ⵜⵓⴷⴷⵎⴰ, ⵖⴰⵔ ⴷⴰ ⵜⵕⵇⵇⴰ ⵍⵄⴰⵎⵎⵜ ⴽⵛⵎⵏ ⴷ ⵜⵎⵖⴰⵔⵉⵏ ⵉⵍⵎⵎⴰ ⵜⵣⵔⵉ ⵍⵄⴰⵎⵎⵜ ⵜⴰⵖⵓⵍ ⵜⴳ ⴰⵃⵡⴰⵛ.[9]
  • ⴳ ⵍⵄⴰⵎⵎⵜ ⵓⵔ ⴳⵉⵙ ⴰⵙⵎⵓⵙⵙ ⵉⴳⴳⵓⵜⵏ, ⴰⵔ ⵙⵎⵓⵙⵙⵓⵏ ⵉⵔⴳⴰⵣⵏ ⵉⵖⵕⴰⴹ ⵏⵏⵙⵏ, ⴰⵔ ⴽⴽⴰⵜⵏ ⵟⵟⴰⵕⵜ ⴰⵔ ⵜⵜⵓⵔⴰⵔⵏ ⵙ ⵉⴹⴰⵕⵏ ⴷ ⵉⴼⴰⵙⵙⵏ ⵎⴰⵛⵛ ⵓⵔ ⵉⵍⵍⵉ ⵓⵙⵎⵓⵙⵙ ⵉⴳⴳⵓⵜⵏ, ⴰⵔ ⵉⵜⵜⵉⵍⵉ ⵓⵎⵎⵓⵙ ⵉⴷⵔⵓⵙⵏ.[9]
  • ⴳ ⵍⵄⴰⵎⵎⵜ ⴰⵕⴽⴰⴹ ⴰⵔ ⵉⵜⵜⴳⴳⴰ ⴰⵎⴳⵔⵓ, ⵓⵔ ⴰⵔ ⵉⵜⵜⵓⵔⴰⵔ ⴽⵓ ⵢⴰⵏ ⵡⴰⵃⴷⵓ ⵜ, ⴰⵔ ⵉⵙⴽⴰⵔ ⵡⴰⴷⵓⵔ ⵏ ⵉⵔⴳⴰⵣⵏ ⴽⵓⵍⵍⵓ ⵜ ⵢⴰⵏ ⵓⵎⵓⵙⵙⵓ, ⴰⵔ ⵙⵎⵓⵙⵙⵓⵏ ⵉⴹⴰⵕⵏ ⴳ ⵢⴰⵏ ⵓⵣⵎⵣ ⵓⵍⴰ ⵉⴼⴰⵙⵙⵏ ⴰⵔ ⵜⵏ ⵙⵎⵓⵙⵙⵓⵏ ⴳ ⵢⴰⵏ ⵓⵣⵎⵣ.[9]
  • ⵍⵄⴰⵎⵎⵜ ⵜⴳⴰ ⵜⴰⵥⵓⵕⵉ ⵏ ⵜⵎⵎⵓⵖⵔⴰ ⴷ ⵓⵙⵙⵎⵖⵔ ⵓⵔ ⵜⴳⵉ ⵉⵔⵉⵔ ⵏ ⵜⴼⵓⴳⵍⵉⵡⵉⵏ ⵎⵥⵥⵉⵏⵉⵏ.
  • ⵍⵄⴰⵎⵎⵜ ⴰⵔ ⴳⵉⵙ ⵜⵜⵉⵍⵉⵏ ⵉⵔⴳⴰⵣⵏ ⵉⵎⵇⵇⵓⵔⵏ ⵉⵡⵙⵙⵉⵔⵏ, ⴰⵔ ⵉⵜⵜⵉⴷⵔⵓⵙ ⵎⴰ ⵖ ⴳⵉⵙ ⵜⵜⵉⵍⵉⵏ ⵉⵎⵥⵥⵢⴰⵏⵏ.
  • ⵓⵔ ⵜⵍⵍⵉ ⵍⵄⴰⵎⵎⵜ ⵙ ⵉⵎⵉⵇⵇ ⵏ ⵉⵔⴳⴰⵣⵏ, ⴳ ⵍⵄⴰⵎⵎⵜ ⵉⵇⵇⴰⵏ ⴷ ⴰⴷ ⵉⴳⴳⵓⵜⵏ ⵉⵔⴳⴰⵣⵏ, ⴰⵔ ⵜⵜⴳⴳⴰⵏ 40 ⴷ ⵓⴳⴳⴰⵔ ⵏ ⵓⵔⴳⴰⵣ.
  • ⵍⵄⴰⵎⵎⵜ ⵜⴳⴰ ⵜⴰⵥⵓⵕⵉ ⵉⵜⵜⵎⵓⵏⵓⵏ ⴷ ⵍⵀⵉⴱⵜ ⴷ ⵍⵓⵇⵇⵕ ⴰⵛⴽⵓ ⴰⵔ ⵜⵜⵉⵍⵉ ⵖⴰⵔ ⴳ ⵉⵙⴼⵓⴳⵍⵓⵜⵏ ⴷⴰ ⵉⵙⵜⴰⵡⵀⵎⵎⴰⵏ, ⴷ ⵉⵙⴼⵓⴳⵍⵓⵜⵏ ⴷⴰ ⴳ ⴰⵔ ⵜⵜⵉⵔⵉⵏ ⵉⵇⵇⴱⵉⵍⵏ ⴰⴷ ⵙⴱⴰⵏⵏ ⵜⵉⵔⵔⵓⴳⵣⴰ ⵏⵏⵙⵏ ⴳ ⵡⴰⵎⵎⴰⵙ ⵏ ⵉⵇⵇⴱⵉⵍⵏ ⵢⴰⴹⵏⵉⵏ.
  • ⴳ ⵍⵄⴰⵎⵎⵜ ⵉⵔⴳⴰⵣⵏ ⴰⵔ ⵜⵜⵓⵔⴰⵔⵏ ⵙ ⵜⴼⴳⴳⴰ ⵏⵏⵙⵏ, ⵙ ⵉⴹⴰⵕⵏ, ⵉⴼⴰⵙⵙⵏ ⴷ ⵉⵖⵕⴰⴹ, ⴰⵔ ⵜⵜⵉⵔⵉⵔⵏ ⵏⵖ ⴰⵔ ⵜⵜⵏⴹⴰⵎⵏ ⴽⵔⴰ ⵏ ⵜⴰⵍⵍⵖⴰⵜⵉⵏ ⵉⴼⵙⵙⵓⵙⵏ ⵉⴳⴰⵏ ⵜⵉⵏ ⵜⵎⴰⵣⵉⵔⵜ ⵏⵏⵙⵏ. ⵉⵔⵉⵔ ⴳ ⵍⵄⴰⵎⵎⵜ ⴰⵔ ⵉⵜⵜⵉⴼⵙⵓⵙ ⵓⵔ ⴰⵔ ⵉⵜⵜⴳⴳⴰ ⵣⵓⵏ ⵡⵉⵏ ⵓⵃⵡⴰⵛ.
  • ⵍⵎⵉⵣⴰⵏ ⵏ ⵍⵄⴰⵎⵎⵜ ⵉⵥⵥⴰⵢ ⵓⵔ ⵉⴳⵉ ⵣⵓⵏ ⵡⵉⵏ ⵓⵃⵡⴰⵛ, ⵉⵔⵉⵔ ⵉⴼⵙⵙⵓⵙ ⴷ ⵓⵔⴰⵔ ⵓⵍⴰ ⵏⵜⵜⴰ ⵉⴼⵙⵙⵓⵙ.

ⴳⵔ ⵜⴰⵎⴰⵡⵜ 1

[ⵙⵏⴼⵍ | ⵙⵏⴼⵍ ⴰⵙⴰⴳⵎ]

ⵜⴰⵔⴰⴱⴱⵓⵜ ⵏ ⵍⵄⴰⵎⵎⵜ ⵜⵥⴹⴰⵕ ⴰⴷ ⵜⵙⴽⵔ ⵓⵍⴰ ⴰⵃⵡⴰⵛ, ⵎⴰⵛⵛ ⴰⵙⵏⵜⵉ ⴰⵔ ⵉⵜⵜⵉⵍⵉ ⵙ ⵍⵄⴰⵎⵎⵜ ⴰⵔ ⵉⵜⵜⴳⴳⵔⵓ ⵙ ⵓⵃⵡⴰⵛ ⵓⵔ ⵜⵥⵥⴹⴰⵕ ⵜⵔⴰⴱⴱⵓⵜ ⴰⴷ ⵜⵙⵏⵜⵉ ⵏ ⵓⵃⵡⴰⵛ ⵜⴳⴳⵯⵔⴰ ⵙ ⵍⵄⴰⵎⵎⵜ. ⴳ ⵓⵣⵔⴰⵢ ⵙⴳ ⵍⵄⴰⵎⵎⵜ ⵙ ⵓⵃⵡⴰⵛ ⴰⴳ ⴰⴷ ⵜⵜⴱⴰⴷⴰⵍ ⵜⴰⵍⵖⴰ ⵏ ⵉⵔⵉⵔ ⵏⴳⵔ ⵍⵄⴰⵎⵎⵜ ⴷⴰ ⵉⵥⵥⴰⵢⵏ ⴷ ⵓⵃⵡⴰⵛ ⴷⴰ ⵉⴼⵙⵓⵙⵏ ⴳ ⵉⵔⵉⵔ ⵏⵙ.

ⴳⵔ ⵜⴰⵎⴰⵡⵜ 2

[ⵙⵏⴼⵍ | ⵙⵏⴼⵍ ⴰⵙⴰⴳⵎ]

ⴰⵔ ⵙⵙⵎⵔⴰⵙⵏ ⵎⴷⴷⵏ ⵉⵙⵎ ⵏ ⵍⵄⴰⵎⵎⵜ ⵓⵍⴰ ⵉ ⵜⵔⴰⴱⴱⵓⵜ ⴷⴰ ⵉⵜⵜⵓⵔⴰⵔⵏ ⵍⵄⴰⵎⵎⵜ, ⴰⵔ ⵜⵜⵉⵏⵉⵏ ⵜⵓⵛⴽⴰⴷ ⵍⵄⴰⵎⵎⵜ ⵏ ⵏⵖ ⵜⵍⵍⴰ ⵍⵄⴰⵎⵎⵜ ⵙ ⵓⵏⴰⵎⴽ ⵎⴰⵙ ⴷ ⵜⵓⵛⴽⴰ ⵜⵔⴰⴱⴱⵓⵜ ⵏⵏⴰ ⵉⵙⴽⴰⵔⵏ ⵍⵄⴰⵎⵜ. ⵍⵄⴰⵎⵎⵜ ⵜⴳⴰ ⴰⵏⴰⵡ ⵏ ⵜⵥⵓⵕⵉ ⵜⴳ ⵓⵍⴰ ⵉⵙⵎ ⵏ ⵜⵔⴰⴱⴱⵓⵜ ⴷⴰ ⵉⵜⵜⵓⵔⴰⵔⵏ ⴰⵏⴰⵡ ⴰⴷ ⵏ ⵜⵥⵓⵕⵉ.

ⴰⵎⵣⴰⵔⴰⵢ ⴳⵔ ⵍⵄⴰⵎⵎⵜ ⴷ ⵓⵃⵡⴰⵛ

[ⵙⵏⴼⵍ | ⵙⵏⴼⵍ ⴰⵙⴰⴳⵎ]

ⵍⵄⴰⵎⵎⵜ ⵓⵍⴰ ⴰⵃⵡⴰⵛ ⴳⴰⵏⵜ ⵜⵉⵥⵓⵕⵉⵡⵉⵏ ⵉⵖⵓⵙⵏ, ⵇⵇⴱⵓⵕⵏⵜ ⵖⵉⴽⵍⵍⵉ ⵉⵇⵇⴱⵓⵕ ⵓⴼⴳⴰⵏ ⴰⵎⴰⵣⵉⵖ, ⴳⴰⵏⵜ ⵙ ⵙⵉⵏ ⵜⵉⵥⵓⵕⵉⵡⵉⵏ ⵜⵜⵓⵔⴰⵔ ⵜⵔⴰⴱⴱⵓⵜ ⵏ ⵎⵉⴷⴷⵏ, ⴳⵏⵜ ⵙⴳ ⵜⵖⴰⵔⴰⵙⵉⵏ ⵏ ⵓⵙⴼⵓⴳⵍⵓ ⴷⴰⵔ ⵉⵎⴰⵣⵉⵖⵏ. ⴰⵎⵣⴰⵔⴰⵢ ⵏ ⵉⵙⵎ ⵉⵃⴱⴰ ⴰⵎⵣⴰⵔⴰⵢ ⵏ ⵓⵏⴰⵎⴽ ⴷ ⵜⴰⵍⵖⴰ ⵉⵏⴳⵔ ⵓⵃⵡⴰⵛ ⴷ ⵍⵄⴰⵎⵎⵜ, ⵉⵃⴱⴰ ⴰⵎⵣⴰⵔⴰⵢ ⴳ ⵓⵣⵎⵣ ⵏ ⵓⵙⴼⵓⴳⵍⵓ ⵉⵃⴱⵓ ⴰⵎⵣⴰⵔⴰⵢ ⴳ ⵎⴰⴷ ⵉⵥⴹⴰⵕⵏ ⴰⴷ ⵉⵙⴼⵓⴳⵍⵓ ⵉⴷⵔⵓ ⴳ ⵓⵣⵏⵎⵣⵣⵓ. ⵍⵄⴰⵎⵎⵜ ⵜⴳⴰ ⵜⴰⵥⵓⵕⵉ ⵏ ⵉⵔⴳⴰⵣⵏ ⵙ ⵜⴳⵎⵉⴹⵉ ⵉⴳⴳⵓⵜⵏ, ⴰⵃⵡⴰⵛ ⵉⴳⴰ ⵜⴰⵥⵓⵕⵉ ⵏ ⴳ ⵜⵜⵎⵎⵔⴽⴰⵙⵏ ⵎⵉⴷⴷⵏ ⴰⵔ ⴳⵉⵙ ⵉⵜⵜⵉⵍⵉ ⵡⴰⴷⵓⵔ ⵏ ⵉⵔⴳⴰⵣⵏ ⴷ ⵡⴰⴷⵓⵔ ⵏ ⵜⵎⵖⴰⵔⵉⵏ. ⵍⵄⴰⵎⵎⵜ ⵜⴳⴰ ⵉⵔⵉⵔ ⵏ ⵓⴼⵓⵙ (ⵕⵕⵛⵛ) ⵎⴰⵛⵛ ⵍⵄⴰⵎⵎⵜ ⵜⴳⴰ ⵉⵔⵉⵔ ⵏ ⵟⵟⴰⵕⴰⵜ (ⵜⴰⵍⵍⵓⵏⵜ). ⴳ ⵍⵄⴰⵎⵎⵜ ⴰⵔ ⵙⴽⴰⵔⵏ ⵉⵔⴳⴰⵣⵏ ⵢⴰⵏ ⵡⴰⴷⵓⵔ ⵓⵔ ⵥⴹⴰⵕⵏ ⴰⴷ ⵎⵓⵏⵏ ⵏⵖ ⴰⴷ ⵙⴽⵔⵏ ⵜⴰⵥⴰⵕⵜ. ⴰⵎⵣⴰⵔⴰⵢ ⵢⴰⴹⵏⵉ ⵉⵍⵍⴰ ⴳ ⵍⵎⵉⵣⴰⵏ ⵏⵖ ⵜⴰⵣⵣⵍⴰ ⵏ ⵉⵔⵉⵔ ⴷ ⵓⵕⴽⴰⴹ, ⵉⵎⵃⵡⴰⵛⵏ ⴰⵔ ⵜⵜⵉⵔⵉⵔⵏ ⵙ ⵜⵣⵣⵍⴰ ⵎⴰⵛⵛ ⴰⵢⵜ ⵍⵄⴰⵎⵎⵜ ⴰⵔ ⵜⵜⵉⵔⵉⵔⵏ ⴰⵔ ⵜⵕⴽⴰⴹⵏ ⵙ ⵍⵃⵉⵍⴰⵜ.[10]

ⵉⵏⴼⴹⵡⴰⴽ

[ⵙⵏⴼⵍ | ⵙⵏⴼⵍ ⴰⵙⴰⴳⵎ]

ⵉⴳ ⵏⴹⴼⴰⵕ ⴽⵉⴳⴰⵏ ⵏ ⵉⵎⵔⵣⵓⵜⵏ ⵉⵙⴰⵡⵍⵏ ⴼ ⵉⵥⵓⵕⴰⵏ ⴷ ⵉⵇⵇⴱⵉⵍⵏ ⵉⵎⴰⵣⵉⵖⵏ, ⵣⵓⵏ ⵉⴱⵏ ⵅⴰⵍⴷⵓⵏ, ⵉⴱⵏ ⵃⴰⵣⵎ ⴷ ⴰⴱⵓ ⴱⴰⴽⵕ ⵚⵚⵏⵀⴰⵊⵉ ⵉⵇⵇⴰⵏ ⴷ ⴰ ⵏⵉⵏⵉ ⵎⴰⵙ ⵉⵏⴼⴹⵡⴰⴽ ⵓⵔ ⴳⵉⵏ ⴰⵇⵇⴱⵉⵍ, ⵎⴰⵛⵛ ⴳⴰⵏ ⵉⵖⵙⵙ ⵏⵖ ⴰⵣⵖⵔ (ⵙ ⵜⵄⵕⴰⴱⵜ : بطن) ⵙⴳ ⵉⵖⵙⴰⵏ ⴷⴰ ⵉⴹⴼⴰⵕⵏ ⵉ ⵓⵇⵇⴱⵉⵍ ⵏ ⵉⵙⴽⵓⵔⵏ (ⵙ ⵜⵄⵕⴰⴱⵜ : هسكورة), ⵉⵏⵏⴰ ⵉⴱⵏ ⵅⴰⵍⴷⵓⵏ ⵎⴰⵙ ⵉⵙⴽⵓⵔⵏ ⴳⴰⵏ ⴰⵢⵜⵎⴰⵜⵏ ⵏ ⵉⵥⵏⴰⴳⵏ (ⵉⵚⵏⵀⴰⵊⵏ) ⵙⴳ ⵉⵎⵎⴰⵜⵙⵏ, ⵣⴷⵖⵏ ⴳ ⵓⴷⵔⴰⵔ ⵏ ⴷⵔⵏ[11], ⵢⵉⵏⵉ ⵎⴰⵙ ⵉⵏⴼⴹⵡⴰⴽ ⴳⴰⵏ ⵉⵖⵙⵙ ⴰⵎⵇⵇⵕⴰⵏ ⴳ ⵉⵙⴽⵓⵔⵏ, ⴰⵔ ⴳⵉⵙ ⵉⵜⵜⵏⴱⴰⴹⵏ ⵏⵓⵜⵏⵉ.[11].

ⵉⵏⴼⴹⵡⴰⴽ ⴳ ⵡⴰⵎⵎⴰⵙ ⵏ ⵉⵇⵇⴱⵉⵍⵏ ⵉⵎⴰⵣⵉⵖⵏ

ⴰⵥⵓⵕ ⵏ ⵉⵙⵎ

[ⵙⵏⴼⵍ | ⵙⵏⴼⵍ ⴰⵙⴰⴳⵎ]

ⵉⵙⵎ ⴰⴷ ⵓⵔ ⴼⵍⵍⴰⵙ ⵉⵍⵍⵉ ⴽⵔⴰ ⵏ ⵓⵙⴰⵖⵓⵍ ⵉⵜⵜⵢⴰⵔⴰⵏ ⵙ ⵜⵎⴰⵣⵉⵖⵜ, ⵎⵇⵇⴰⵔ ⴼⵍⵍⴰⵙ ⵙⴰⵡⵍ ⴽⵉⴳⴰⵏ ⵏ ⵉⵎⵔⵣⵓⵜⵏ ⵙ ⵜⵄⵕⴰⴱⵜ ⴷ ⵜⴼⵕⴰⵏⵚⵉⵚⵜ. ⴰⵃⵎⴰⴷ ⵜⴰⵡⴼⵉⵇ ⵉⵙⴰⵡⵍ ⴼ ⵉⵙⵎ ⵏ "ⴼⵟⵡⴰⴽ"[12] ⵎⴰⵙ ⵉⴳⴰ ⴱⴰⴱⴰⵜⵙⵏ ⴰⵎⵣⵡⴰⵔⵓ ⵏ ⵉⵏⴼⴹⵡⴰⴽ ⴷ ⵏⵜⵜⴰ ⴰⴼ ⵜⵜⵢⴰⵙⵎⵎⴰⵏ ⵉⵏⴼⴹⵡⴰⴽ, ⵉⵙⴰⵡⵍ ⵓⵍⴰ ⴼ ⵉⵙⵎ ⵏ "ⴼⵟⵡⴰⴽⴰ" ⵙ ⵜⵄⵕⴰⴱⵜ. ⵉⴱⵏ ⵅⴰⵍⴷⵓⵏ, ⵉⴱⵏ ⵃⴰⵣⵎ ⴷ ⴰⴱⵓ ⴱⴰⴽⵕ ⵚⵚⵏⵀⴰⵊⵉ ⵙⴰⵡⵍⵏ ⴼ ⵉⵙⵎ ⵏ "ⴼⵟⵡⴰⴽⴰ". ⵎⴰⵢⴰⴷ ⴰ ⵢⵓⴷⴷⵊⴰⵏ ⵉⵙⵎⴰⵡⵏ ⴰⴷ ⴳⴳⵓⴷⵉⵏ ⵙ ⵜⵎⴰⵣⵉⵖⵜ, ⵉⵍⵍⴰ ⵎⴰ ⵉⵜⵜⵉⵏⵉⵏ "ⵉⵏⴼⵟⵡⴰⴽ"[13], ⵉⵍⵉ ⵎⴰ ⵉⵜⵜⵉⵏⵉⵏ "ⵉⵏⴼⴹⵡⴰⴽ". ⵓⵍⴰ ⵎⵉⴷⴷⵏ ⴳ ⵜⵎⴰⵣⵉⵔⵜ ⵏ ⵉⵏⴼⴹⵡⴰⴽ ⴰⵔ ⵜⵜⵅⵍⵍⴰⴹⵏ ⵉⵙⵎⴰⵡⵏ ⴰⴷ.

ⵉⵙⴽⵓⵔⵏ

[ⵙⵏⴼⵍ | ⵙⵏⴼⵍ ⴰⵙⴰⴳⵎ]

ⵉⵙⴽⵓⵔⵏ[14] (ⵙ ⵜⵄⵕⴰⴱⵜ : هسكورة) ⴳⴰⵏ ⴰⵇⵇⴱⵉⵍ ⵏⵖ ⵜⴰⵎⵙⵎⵓⵏⵜ ⵏ ⵉⵇⵇⴱⵉⵍⵏ (ⵙ ⵜⵄⵕⴰⴱⵜ : اتحادية قبلية) ⵜⵓⵣⴷⵓⵖⵜ ⵏ ⵉⵙⴽⵓⵔⵏ ⵜⴳⴰ ⵜⴰⵎⴰⵣⵉⵔⵜ ⴱⴰⵀⵔⴰ ⵉⵎⵇⵇⵓⵔⵏ. ⵉⴱⵏ ⵅⴰⵍⴷⵓⵏ ⵉⵏⵏⴰ ⵎⴰⵙ ⵜⴳⴰ ⵜⵓⵣⴷⵓⵖⵜ ⵏ ⵉⵙⴽⵓⵔⵏ ⵙⴳ ⵉⴼⴼⵓⵙ ⵏ ⵡⴰⵙⵉⴼ ⵏ ⴹⵕⵄⴰ ⵜⵣⵔⵉⵜ ⵙⴳ ⵓⴷⵔⴰⵔ ⵏ ⴷⵔⵏ ⴰⵔ ⵓⵣⴰⵖⴰⵔ ⵏ ⵜⴰⴷⵍⴰ [11]. Ḥasan Lwazzan ntta ar ittini mas tamazirt n Iskurn tbda sg tukarin n Dduakal (Dkkala) s umnid n taggut ar wasif n Tansift g dar udrar n Adimi[15]

ⵉⵏⴼⴹⵡⴰⴽ ⵏ ⵡⴰⵙⵙⴰⴷ

[ⵙⵏⴼⵍ | ⵙⵏⴼⵍ ⴰⵙⴰⴳⵎ]

ⵜⴰⵎⴰⵣⵉⵔⵜ ⵏ ⵉⵏⴼⴹⵡⴰⴽ ⵖⴰⵙⵙⴰⴷ ⵜⴱⴹⴰ ⴼ ⵙⵏⴰⵜ ⵜⵉⵏⴰⵔⵉⵡⵉⵏ (ⵏⵖ ⵍⵇⵇⵉⵢⵢⴰⴷⴰⵜ): ⵜⴰⵏⴰⵔⴰ ⵏ ⴼⵟⵡⴰⴽⴰ ⴷ ⵜⴰⵏⴰⵔⴰ ⵏ ⴰⵢⵜ ⵜⴰⵎⵍⵍⵉⵍ.

ⵜⴰⵏⴰⵔⴰ ⵏ ⴼⵟⵡⴰⴽⴰ ⴳⵉⵙ ⴽⵕⴰⴹⵜ ⵏ ⵜⴳⵔⴰⵡⵉⵏ (ⵏⵖ ⵍⵊⴰⵎⴰⵄⴰⵜ): ⵜⴰⴳⵔⴰⵡⵜ ⵏ ⵜⵉⴷⵉⵍⵉ ⴼⵟⵡⴰⴽⴰ, ⵜⴰⴳⵔⴰⵡⵜ ⵏ ⵙⵉⴷⵉ ⵢⴰⵄⵇⵓⴱ ⴷ ⵜⴳⵔⴰⵡⵜ ⵏ ⴰⵏⵣⵓ. ⵜⴰⴳⵔⴰⵡⵜ ⵏ ⵜⵉⴷⵉⵍⵉ ⴼⵟⵡⴰⴽⴰ ⴳⵉⵙ ⴽⵕⴰⴹ ⵉⵎⵖⴰⵕⵏ: ⴰⵎⵖⴰⵕ ⵏ ⵜⴷⵉⵍⵉ, ⴰⵎⵖⴰⵕ ⵏ ⵉⵃⵓⴷⴷⵊⵉⵏ ⴷ ⵓⵎⵖⴰⵕ ⵏ ⵉⵖⵉⵍ ⵏ ⵜⵉⴽⵉⴹ. ⵜⴰⴳⵔⴰⵡⵜ ⵏ ⵙⵉⴷⵉ ⵢⴰⵄⵇⵓⴱ ⴳⵉⵙ ⴽⵕⴰⴹ ⵉⵎⵖⴰⵕⵏ : ⴰⵎⵖⴰⵕ ⵏ ⴰⵢⵜ ⵎⵄⵍⵍⴰ, ⴰⵎⵖⴰⵕ ⵏ ⴰⵢⵜ ⴼⵍⴰⵍⴰⴹ ⴷ ⵓⵎⵖⴰⵕ ⵏ ⵙⵓⵔⵏⵏ. ⵜⴰⴳⵔⴰⵡⵜ ⵏ ⵓⵏⵣⵓ ⴳⵉⵙ ⵓⵍⴰ ⵏⵜⵜⴰⵜ ⴽⵕⴰⴹ ⵉⵎⵖⴰⵕⵏ: ⴰⵎⵖⴰⵕ ⵏ ⴰⵢⵜ ⵎⵃⵎⵎⴷ, ⴰⵎⵖⴰⵕ ⵏ ⵜⴰⵙⴰⵡⵜ ⴷ ⵓⵎⵖⴰⵕ ⵏ ⵜⴳⵍⴰⵡⵡⵓⵜ.

ⵜⴰⵏⴰⵔⴰ ⵏ ⴰⵢⵜ ⵜⴰⵎⵍⵍⵉⵍ ⴳⵉⵙ ⵙⵏⴰⵜ ⵜⴳⵔⴰⵡⵉⵏ: ⵜⴰⴳⵔⴰⵡⵜ ⵏ ⴰⵢⵜ ⵜⴰⵎⵍⵍⵉⵍ ⴷ ⵜⴳⵔⴰⵡⵜ ⵏ ⴰⵢⵜ ⵓⵎⴷⵉⵙ. ⵜⴰⴳⵔⴰⵡⵜ ⵏ ⴰⵢⵜ ⵜⴰⵎⵍⵍⵉⵍ ⴳⵉⵙ ⴽⵕⴰⴹ ⵉⵎⵖⴰⵕⵏ: ⴰⵎⵖⴰⵕ ⵏ ⴰⵢⵜ ⵜⴰⵎⵍⵍⵉⵍ, ⴰⵎⵖⴰⵕ ⵏ ⴰⵢⵜ ⵎⴷⵉⵡⴰⵍ ⴷ ⵓⵎⵖⴰⵕ ⵏ ⴰⵢⵜ ⵎⴳⵓⵏ ⵏ ⵉⴼⴼⵓⵙ. ⵜⴰⴳⵔⴰⵡⵜ ⵏ ⴰⵢⵜ ⵓⵎⴷⵉⵙ ⴳⵉⵙ ⴽⴽⵓⵥ ⵏ ⵉⵎⵖⴰⵕⵏ: ⴰⵎⵖⴰⵕ ⵏ ⴰⵢⵜ ⵓⵎⴷⵉⵙ ⵏ ⵓⴳⴰⴼⴰⵢ, ⴰⵎⵖⴰⵕ ⵏ ⴰⵢⵜ ⵓⵎⴷⵉⵙ ⵏ ⵉⴼⴼⵓⵙ, ⴰⵎⵖⴰⵕ ⵏ ⴰⵢⵜ ⵃⵎⵉⴷ ⴷ ⵓⵎⵖⴰⵕ ⵏ ⵜⴰⵛⴰⴽⵯⵛⵜ.

ⵏⵥⵥⴹⴰⵕ ⴰ ⵏⵙⵏⵎⵉⵍⵉ ⵉⵏⴼⴹⵡⴰⴽ ⵙ ⵜⵖⴰⵔⴰⵙⵜ ⴰⴷ ⵏ ⵉⵣⴷⴷⴰⵔ:

  1. ⵜⴰⵏⴰⵔⴰ ⵏ ⴼⵟⵡⴰⴽⴰ:
    1. ⵜⴰⴳⵔⴰⵡⵜ ⵏ ⵜⵉⴷⵉⵍⵉ ⴼⵟⵡⴰⴽⴰ:
      1. ⴰⵎⵖⴰⵕ ⵏ ⵜⴷⵉⵍⵉ
      2. ⴰⵎⵖⴰⵕ ⵏ ⵉⵃⵓⴷⴷⵊⵉⵏ
      3. ⴰⵎⵖⴰⵕ ⵏ ⵉⵖⵉⵍ ⵏ ⵜⵉⴽⵉⴹ
    2. ⵜⴰⴳⵔⴰⵡⵜ ⵏ ⵙⵉⴷⵉ ⵢⴰⵄⵇⵓⴱ:
      1. ⴰⵎⵖⴰⵕ ⵏ ⴰⵢⵜ ⵎⵄⵍⵍⴰ
      2. ⴰⵎⵖⴰⵕ ⵏ ⴰⵢⵜ ⴼⵍⴰⵍⴰⴹ
      3. ⴰⵎⵖⴰⵕ ⵏ ⵙⵓⵔⵏⵏ
    3. ⵜⴰⴳⵔⴰⵡⵜ ⵏ ⵓⵏⵣⵓ:
      1. ⴰⵎⵖⴰⵕ ⵏ ⴰⵢⵜ ⵎⵃⵎⵎⴷ
      2. ⴰⵎⵖⴰⵕ ⵏ ⵜⴰⵙⴰⵡⵜ
      3. ⴰⵎⵖⴰⵕ ⵏ ⵜⴳⵍⴰⵡⵡⵓⵜ
  2. ⵜⴰⵏⴰⵔⴰ ⵏ ⴰⵢⵜ ⵜⴰⵎⵍⵍⵉⵍ:
    1. ⵜⴰⴳⵔⴰⵡⵜ ⵏ ⴰⵢⵜ ⵜⴰⵎⵍⵍⵉⵍ:
      1. ⴰⵎⵖⴰⵕ ⵏ ⴰⵢⵜ ⵜⴰⵎⵍⵍⵉⵍ
      2. ⴰⵎⵖⴰⵕ ⵏ ⴰⵢⵜ ⵎⴷⵉⵡⴰⵍ
      3. ⴰⵎⵖⴰⵕ ⵏ ⴰⵢⵜ ⵎⴳⵓⵏ ⵏ ⵉⴼⴼⵓⵙ
    2. ⵜⴰⴳⵔⴰⵡⵜ ⵏ ⴰⵢⵜ ⵓⵎⴷⵉⵙ:
      1. ⴰⵎⵖⴰⵕ ⵏ ⴰⵢⵜ ⵓⵎⴷⵉⵙ ⵏ ⵓⴳⴰⴼⴰⵢ
      2. ⴰⵎⵖⴰⵕ ⵏ ⴰⵢⵜ ⵓⵎⴷⵉⵙ ⵏ ⵉⴼⴼⵓⵙ
      3. ⴰⵎⵖⴰⵕ ⵏ ⴰⵢⵜ ⵃⵎⵉⴷ
      4. ⴰⵎⵖⴰⵕ ⵏ ⵜⴰⵛⴰⴽⵯⵛⵜ

ⵓⴷⵎⴰⵡⵏ ⵉⵜⵜⵢⴰⵡⵙⵙⴰⵏⵏ ⵏ ⵉⵏⴼⴹⵡⴰⴽ

[ⵙⵏⴼⵍ | ⵙⵏⴼⵍ ⴰⵙⴰⴳⵎ]

ⵉⵏⴼⴹⵡⴰⴽ ⵓⵜⵏ ⵙ ⵉⵥⵓⵕⴰⵏ ⴳ ⵓⵎⵣⵔⵓⵢ, ⵎⴰⵢⴰⴷ ⴰⴼ ⵙⴳⵉⵙⵏⴷ ⴼⴼⵓⵖⵏ ⴽⵉⴳⴰⵏ ⵏ ⵓⴷⵎⴰⵡⵏ ⵉⵜⵜⵡⴰⵙⵙⵏ, ⵣⵓⵏ:

  • ⵃⵎⵎⴰⵏ ⵓⵎⴼⴹⵡⴰⴽ ⵏⵖ ⵃⵎⵎⴰⵏ ⵍⴼⵟⵡⴰⴽⵉ : ⵉⴳⴰ ⵢⴰⵏ ⵙⴳ ⵉⵏⵣⴱⴰⵢⵏ ⵉⵎⵇⵇⵕⴰⵏ ⴳ ⵍⵎⵖⵔⵉⴱ ⵉⴳ ⵢⴰⵏ ⵙⴳ ⵡⵉⴷⴰ ⵉⵙⵔⵙⵏ ⵜⵉⵔⵙⴰⵍ ⵏ "ⵍⵃⴰⵕⴰⴽⴰ ⵍⵡⴰⵟⴰⵏⵉⵢⵢⴰ".
  • ⵎⵔⵉⵔⴷⴰ ⵏ ⴰⵢⵜ ⵄⵜⵉⵇ ⵏⵖ ⵎⵔⵉⵔⴷⴰ ⵏ ⴰⵢⵜ ⵓⵄⵜⵉⵇⵇ ⵏⵖ ⵎⵔⵉⵔⴷⴰ ⵜⴰⵏⴹⴹⴰⵎⵜ[16] : ⵜⴳⴰ ⵜⴰⵏⴹⴹⴰⵎⵜ ⵉⵍⵍⵉⵙ ⵏ ⵓⵙⵓⵏ ⵏ ⵎⴳⴷⴰⵣ ⵉⴳⴰⵏ ⵢⴰⵏ ⵙⴳ ⵉⴹⵓⵕⴰⵏ ⵏ ⵉⵏⴼⴹⵡⴰⴽ. ⵜⵜⵡⴰⵙⵙⵏ ⵎⵔⵉⵔⴷⴰ ⴷⴷⴰⵓ ⴰⴼⵓⵙ ⵏ ⵓⵙⵍⵎⴰⴷ ⴰⴼⵕⴰⵏⵚⵉⵚ ⵕⵓⵏⵉ ⵓⵍⵓⵊ, ⴰⵛⴽⵓ ⵉⵙⵙⵓⵖⵖⵍ ⵏⵏⴹⵎ ⵏⵙ ⵙ ⵜⵓⵜⵍⴰⵢⵜ ⵜⴰⴼⵕⴰⵏⵚⵉⵚⵜ ⴳ ⵓⴷⵍⵉⵙ ⵏⵙ "ⵍⴻⵙ ⵛⵀⴰⵏⵜⵙ ⴷⴻ ⵍⴰ ⵜⴰⵙⵙⴰoⵓⵜ"[17]. ⵕⵓⵏⵉ ⵓⵍⵓⵊ ⵏⵜⵜⴰⵏ ⵉⴳⴰ ⴰⵙⵍⵎⴰⴷ ⴳ ⴷⵎⵏⴰⵜ ⴳ ⵓⵓⵙⴳⴳⴰⵙ ⵏ 1927, ⵉⵎⵏⴰⴳⴳⴰⵔ ⴷ ⵎⵔⵉⵔⴷⴰ ⴳ ⵜⵎⴷⵉⵏⵜ ⵏ ⵓⵣⵉⵍⴰⵍ, ⵎⵔⵉⵔⴷⴰ ⴰⵔ ⴳⵉⵙ ⵜⵙⴽⴰⵔ ⵜⴰⵏⴹⴹⴰⵎⵜ ⴳ ⵉⴳⴰⴷⴰⵣⵏ ⴰⵛⴽⵓ ⵜⵣⴷⵖ ⵜⵅⴷⵎ ⴳⵉⵙ, ⵓⵍⵓⵊ ⴷ ⵏⵜⵜⴰⵏ ⴰⵔ ⵉⵙⵉⴳⴳⵉⵍ ⴼ ⴰⵢⵜ ⵏⵏⴹⵎ ⴰⵛⴽⵓ ⵉⴳⴰ ⵢⴰⵏ ⵙⴳ ⵉⴼⵕⴰⵏⵚⴰⵡⵉⵏ ⵉⵛⵏⵓⴱⴱⵓⵛⵏ ⴼ ⵜⴷⵍⵙⴰ ⴷ ⵜⵏⴹⴹⴰⵎⵜ ⵜⴰⵎⵖⵔⵉⴱⵉⵜ[16].

ⴽⵔⴰ ⵏ ⵜⴳⵓⵔⵉⵡⵉⵏ ⵙⴳ ⵜⵏⴹⴹⴰⵎⵜ ⵏ ⵎⵔⵉⵔⴷⴰ ⵏ ⴰⵢⵜ ⵄⵜⵉⵇⵇ :

ⴰ ⵀⴰ ⵏⵏ ⵜⵓⴽⵔⵜ ⵉⵢⵉ ⵓⴽⵔⵖ ⴽ ⴷⴰ ⵉⵅⵍⵍⵓ ⵜⴰⴽⴰⵜⵉⵏ
ⴰ ⵢⴰⵏ ⵉⵔⴰⵏ ⴰⴷ ⵉⴳ ⵜⴰⴳⵎⴰⵜ ⵢⴰⴳⴳⵯ ⵏⵏ ⵙ ⴰⵏⵓⴹ
ⵉⵥⴰⵕ ⵓⵣⵣⴰⵍ ⵎⴰⵎⵏⴽ ⵙ ⴰⴷ ⵉⵙⴱⵔⵔⴰⴷ ⵡⵉⵢⵢⴰⴹ
ⵉⴳ ⵓⵛⵛⵏ ⴰⵃⴷⴷⴰⴷ ⵉⵍⵉ ⵓⵚⴽⴰⵢ ⴼ ⵍⴽⵉⵔ

— ⵕⵓⵏⵉ ⵓⵍⵓⵊ, ⵍⴻⵙ ⵛⵀⴰⵏⵜⵙ ⴷⴻ ⵍⴰ ⵜⴰⵙⵙⴰoⵓⵜ

ⵉⵖⵊⴷⴰⵎⵏ

[ⵙⵏⴼⵍ | ⵙⵏⴼⵍ ⴰⵙⴰⴳⵎ]

ⵉⵖⵊⴷⴰⵎⵏ ⵓⵍⴰ ⵏⵜⵜⵏⵉ ⴳⴰⵏ ⵢⴰⵏ ⵙⴳ ⵉⵖⵙⴰⵏ ⵏ ⵉⵙⴽⵓⵔⵏ ⵏ ⵓⵎⴰⵍⵓ ⵣⵓⵏ ⵉⵏⴼⴹⵡⴰⴽ, ⵓⵎⵥⵏ ⵉⵖⵊⴷⴰⵎⵏ ⴼ ⵜⵎⴰⵣⵉⵔⵜ ⵏ ⵉⵏⴼⴹⵡⴰⴽ ⵙⴳ ⵜⵙⴳⴰ ⵏ ⵉⴼⴼⵓⵙ, ⵉⵏⴼⴹⵡⴰⴽ ⵓⵍⴰ ⵉⵖⵊⴷⴰⵎⵏ ⵍⵍⴰⵏ ⴳ ⵉⴷⵔⴰⵔⵏ ⵏ ⵡⴰⵟⵍⴰⵚ ⵎⵇⵇⵓⵕⵏ. [18] ⵉⵙⴰⵡⵍ ⴰⵃⵎⴰⴷ ⵜⵜⴰⵡⴼⵉⵇ ⴼ ⵉⵖⵊⴷⴰⵎⵏ, ⵉⵏⵏⴰ ⵎⴰⵙ ⴱⴰⴱⴰⵜⵙⵏ ⵉⵙⵎⵏⵜ "ⵖⵊⴷⴰⵎ", ⴳⴰⵏ ⵓⵍⴰ ⵏⵜⵜⵏⵉ ⵙⴳ ⵉⵙⴽⵓⵔⵏ ⵣⵓⵏ ⵉⵏⴼⴹⵡⴰⴽ[12]. ⵉⵙⴰⵡⵍ ⵃⴰⵙⴰⵏ ⵍⵡⴰⵣⵣⴰⵏ ⴼ ⵉⵖⵊⴷⴰⵎⵏ ⴳ ⵓⴷⵍⵉⵙ ⵏⵙ "ⵡⴰⵚⴼ ⵉⴼⵔⵉⵇⵢⴰ"[19], ⵉⵏⵏⴰ ⵎⴰⵙ ⵏⵏ ⵉⴽⴽⴰ ⵜⴰⵎⴰⵣⵉⵔⵜ ⵏ ⵉⵖⵊⴷⴰⵎⵏ ⴳ ⵓⵙⴳⴳⴰⵙ ⵏ 1514 ⴹ.ⵜ, ⵉⵏⵏⴰ ⵎⴰⵙ ⵖⵊⴷⴰⵎⵏ ⵣⴷⵖⵏ ⴳ ⵢⴰⵏ ⵓⵎⴰⴷⵍ ⵉⵅⵡⴰⵏ, ⴰⵛⴽⵓ ⵏⵖⴰⵏⵜⵏ ⵉⵎⵡⴰⵃⴷⵉⵏ ⴳ ⵜⵉⴳⵉⵔⴰ ⵏ ⵉⵎⵕⴰⴱⵟⵏ ⴰⵛⴽⵓ ⵓⵔⵎⵏ ⴰⴷ ⴰⵡⵙⵏ ⵉ ⵓⴳⵍⵍⵉⴷ ⴰⵎⴳⴳⴰⵔⵓ ⵏ ⵉⵎⵕⴰⴱⵟⵏ ⴰⵜ ⵉⴳⴰⵏ ⴷ ⴱⵕⴰⵀⵉⵎ ⵉⵡⵉⵙ ⵜⴰⵛⴼⵉⵏ ⵉⵡⵉⵙ ⵏ ⵄⵍⵉ ⵉⵡⵉⵙ ⵏ ⵢⵓⵙⴼ ⵉⵡⵉⵙ ⵏ ⵜⴰⵛⴼⵉⵏ.[19][20]

ⵉⵥⵓⵕⴰⵏ ⵏ ⵉⵖⵊⴷⴰⵎⵏ ⴳ ⵡⴰⵎⵎⴰⵙ ⵏ ⵉⵎⴰⵣⵉⵖⵏ

ⴰⵥⵓⵕ ⵏ ⵉⵙⵎ

[ⵙⵏⴼⵍ | ⵙⵏⴼⵍ ⴰⵙⴰⴳⵎ]

ⴰⵃⵎⴰⴷ ⵜⵜⴰⵡⴼⵉⵇ ⴳ ⵓⴷⵍⵉⵙ ⵏ ⵉⵏⵏⵓⵍⵜⴰⵏⵏ ⵉⵏⵏⴰ ⵎⴰⵙ ⵉⵙⵎ ⵏ "ⵉⵖⵊⴷⴰⵎⵏ" ⵉⴽⴽⴰⴷ ⵉⵙⵎ ⵏ ⴱⴰⴱⴰⵜⵙⵏ ⴷⴰ ⵉⵙⵎⵏⵏ "ⵖⵊⴷⴰⵎ". ⵉⵍⵉ ⵢⴰⵏ ⵡⴰⵡⵡⴰⵍ ⵢⴰⴹⵏⵉ ⵜⵜⵉⵏⵉⵏ ⵎⵉⴷⴷⵏ ⴼ ⵡⴰⵥⵓⵕ ⵏ ⵉⵙⵎ ⴰⴷ, ⴰⵜ ⵉⴳⴰⵏ ⵎⴰⵙ ⵎⵉⴷⴷⵏ ⵏ ⵡⴰⵟⵍⴰⵚ ⴰⵔ ⵜⵜⵉⵏⵉⵏ ⴳ ⵜⵓⵜⵍⴰⵢⵜ ⵏⵏⵙⵏ ⵜⴰⵎⴰⵣⵉⵖⵜ "ⵖⵊⴷⵎ" ⵙ ⵓⵏⴰⵎⴽ ⵏ "ⴳⴳⵯⴰⵡⵔ", ⴰⵔ ⵜⵜⵉⵏⵉⵏ "ⵓⵜ ⴰⵖⵊⴷⵉⵎ" ⵣⵄⵎⴰ "ⴳⴳⵯⴰⵡⵔ", ⵉⵥⵥⴹⴰⵕ ⵡⴰⴷⴷ ⴰ ⵉⴳ ⴰⵥⵓⵕ ⵏ ⵉⵙⵎ ⵏ ⵉⵖⵊⴷⴰⵎⵏ[21].

ⵉⵖⵊⴷⴰⵎⵏ ⵏ ⵡⴰⵙⵙⴰⴷ

[ⵙⵏⴼⵍ | ⵙⵏⴼⵍ ⴰⵙⴰⴳⵎ]

ⵉⵖⵊⴷⴰⵎⵏ ⵖⴰⵙⵙⴰⴷ ⴹⴼⵓⵕⵏ ⵉ ⵜⵎⵏⴰⴹⵜ ⵏ ⵍⵃⴰⵡⵣ, ⵜⴰⵙⴳⴰ ⵏ ⵎⵔⵔⴰⴽⵛ-ⴰⵙⴼⵉ, ⴱⴹⴰⵏ ⴼ ⴽⵕⴰⴹⵜ ⵜⴳⵔⴰⵡⵉⵏ: ⵜⴰⴳⵔⴰⵡⵜ ⵏ ⴰⵢⵜ ⵄⴰⴷⵍ, ⵜⴰⴳⵔⴰⵡⵜ ⵏ ⵓⴱⴰⴷⵓ ⴷ ⵜⴰⴳⵔⴰⵡⵜ ⵏ ⵃⴽⵉⵎ :

  1. ⵜⴰⴳⵔⴰⵡⵜ ⵏ ⴰⵢⵜ ⵄⴰⴷⵍ
  2. ⵜⴰⴳⵔⴰⵡⵜ ⵏ ⵓⴱⴰⴷⵓ
  3. ⵜⴰⴳⵔⴰⵡⵜ ⵏ ⵃⴽⵉⵎ

ⵍⵄⴰⵎⵎⵜ ⵏ ⵉⵖⵊⴷⴰⵎⵏ

[ⵙⵏⴼⵍ | ⵙⵏⴼⵍ ⴰⵙⴰⴳⵎ]

ⵉⵖⵊⴷⴰⵎⵏ ⵏⵓⵜⵏⵉ ⵓⵔ ⴰ ⵜⵜⵓⵔⴰⵔⵏ ⴰⴽⴽⵯ ⵍⵄⴰⵎⵎⵜ ⴰⵛⴽⵓ ⴷⴰⵔⵙⵏ ⴰⵏⴰⵡⵏ ⵢⴰⴹⵏⵉ ⵏ ⵜⵥⵓⵕⵉ ⴷⴰ ⵙ ⵜⵜⵢⴰⵡⵙⵙⴰⵏ, ⴰⵔ ⵜⵜⵓⵔⴰⵔⵏ ⵏⵓⵜⵏⵉ ⵙ ⴰⵢⵜ ⵍⵀⴹⵕⵜ (ⴳⴰⵏ ⵣⵓⵏ ⵍⵄⴰⵎⵎⵜ), ⵎⴰⵛⵛ ⵉⵖⵊⴷⴰⵎⵏ ⵏ ⵓⴳⴰⴼⴰ ⴷⴰ ⵉⵎⵣⴰⴷⴰⵢⵏ ⴷ ⵉⵏⴼⴹⵡⴰⴽ ⴰⵔ ⵜⵜⵓⵔⴰⵔⵏ ⵍⵄⴰⵎⵎⵜ, ⴰⵔ ⴰⵙ ⵜⵜⵉⵏⵉⵏ ⵏⵓⵜⵏⵉ "ⵍⵄⵎⵎⵜ"[22] ⴰⵔ ⵜⵜⴽⴽⵙⵏ ⴰⵙⴽⴽⵉⵍ "ⵢⴰ" ⵙⴳ ⵡⴰⵎⵎⴰⵙ ⵏ "ⵢⴰⵍ" ⴷ "ⵢⴰⵎ".

ⵍⵄⴰⵎⵎⵜ ⴳ ⵜⵎⵉⵣⴰⵔ ⵢⴰⴹⵏⵉ

[ⵙⵏⴼⵍ | ⵙⵏⴼⵍ ⴰⵙⴰⴳⵎ]

ⵍⵄⴰⵎⵎⵜ ⵜⴳⴰ ⵜⴰⵥⵓⵕⵉ ⵉⵥⵍⵉⵏ ⵙ ⵉⵏⴼⴹⵡⴰⴽ, ⵎⴰⵛⵛ ⴰⵔ ⵜⵜ ⵜⵜⵓⵔⴰⵔⵏ ⵉⵇⵇⴱⵉⵍⵏ ⵢⴰⴹⵏⵉ ⵣⵓⵏ ⵉⵖⵊⴷⴰⵎⵏ, ⵙⵓⵙ ⴷ ⴰⵢⵜ ⵣⴰⵢⵢⴰⵏ. ⵉⵖⵊⴷⴰⵎⵏ ⴷ ⴰⵢⵜ ⵙⵓⵙ ⴰⵔ ⴰⵙ ⵜⵜⵉⵏⵉⵏ "ⵍⵄⵎⵎⵜ", ⴰⵢⵜ ⵥⴰⵢⵢⴰⵏ ⴰⵔ ⴰⵙ ⵜⵜⵉⵏⵉⵏ "ⵍⵄⴰⵎⵎⴰⵜ". ⵎⵇⵇⴰⵕ ⵜⵍⵍⴰ ⵍⵄⴰⵎⵎⵜ ⴷⴰⵔ ⵉⵇⵇⴱⵉⵍⵏ ⴰⴷ ⵢⴰⴹⵏⵉ ⵎⴰⵛⵛ ⵓⵔ ⵙⵔⵙ ⵜⵜⵢⴰⵡⵙⵙⴰⵏ ⴷ ⵓⵔ ⴷⴰⵔⵙⵏ ⵜⴳⵉ ⵜⴰⵥⵓⵕⵉ ⵜⴰⴷⵙⵍⴰⵏⵜ ⵣⵓⵏ ⵎⴽⵍⵍⵉ ⵜⴳⴰ ⴷⴰⵔ ⵉⵏⴼⴹⵡⴰⴽ. ⴰⵢⵜ ⵙⵓⵙ ⵜⵜⵢⵓⵙⵙⴰⵏ ⵙ ⵓⵃⵡⴰⵛ, ⴰⵢⵜ ⵥⴰⵢⵢⴰⵏ ⵜⵜⵢⵓⵙⵙⴰⵏ ⵙ ⵓⵃⵉⴷⵓⵙ.

ⵜⵉⵎⵍⵙⴰ ⵏ ⵉⵔⴳⴰⵣⵏ

[ⵙⵏⴼⵍ | ⵙⵏⴼⵍ ⴰⵙⴰⴳⵎ]
ⵜⵉⵎⵍⵙⴰ ⵏ ⵉⴼⵅ ⵏ ⴰⵢⵜ ⵍⵄⴰⵎⵎⵜ ⵏ ⵉⵃⵓⴷⴷⵊⵉⵏ, ⵉⵏⴼⴹⵡⴰⴽ,2015. ⴽⵔⴰ ⴳⵉⵙⵏ ⵉⵍⵙⴰ ⵜⴰⵕⵥⵥⵉⵜ (ⵣⵓⵏ ⵡⵉⵙⵙ ⴽⵕⴰⴹ ⵙⴳ ⵓⵥⵍⵎⴰⴹ) ⴽⵔⴰ ⵢⴰⴹⵏⵉ ⵉⵍⵙⴰ ⵜⵜⴰⴳⵉⵢⵢⴰ (ⵣⵓⵏ ⵡⵉⵙⵙ ⵙⵉⵏ ⵙⴳ ⵓⴼⴰⵙⵉ)

ⵍⵄⴰⵎⵎⵜ ⵜⴳⴰ ⵜⴰⵥⵓⵕⵉ ⵉⵇⵇⴱⵓⵕⵏ ⴳ ⵜⵎⵉⵣⴰⵔ ⵏ ⵉⵏⴼⴹⵡⴰⴽ ⴷ ⵉⵖⵊⴷⴰⵎⵏ ⵖⵉⴽⵍⵍⵉ ⵜⵇⵇⴱⵓⵕ ⵜⵓⵣⴷⵓⵖⵜ ⵏ ⵎⵉⴷⴷⵏ ⴰⴷ ⴳ ⵉⴷⵔⴰⵔⵏ ⵏ ⵡⴰⵟⵍⴰⵚ ⵎⵇⵇⵓⵕⵏ ⴷ ⵓⵣⴰⵖⴰⵕ ⵏ ⵜⴰⵙⴰⵡⵜ, ⵓⵍⴰ ⵜⵉⵎⵍⵙⴰ ⵏ ⵍⵄⴰⵎⵎⵜ ⵇⵇⴱⵓⵕⵏⵜ, ⵜⵉⵎⵍⵙⴰ ⴷⴰ ⵉⵣⴷⵉⵏ ⵙ ⵓⴼⴳⴰⵏ ⴷ ⵜⵓⴷⵔⵜ ⵏⵙ ⵜⴰⴽⵓⵢⴰⵙⵙⵜ ⵣⴷⵉⵏⵜ ⵓⵍⴰ ⵙ ⵜⴷⵍⵙⴰ ⴷ ⵓⵙⴳⴷ ⴷ ⵓⵙⵡⵉⵔ ⵏ ⵜⵓⴷⵔⵜ ⵏ ⵓⴼⴳⴰⵏ ⴳ ⵜⵎⴰⵣⵉⵔⵜ ⵏⵙ. ⵜⴰⵎⵟⵟⵉ ⵜⴰⵎⴰⵣⵉⵖⵜ ⵜⵎⵣⴰⴷⴰⵢ ⴱⴷⴷⴰ ⵙ ⵓⵙⴳⴷ ⵜⵓⵙⵓⵜⵉⵏ ⴼ ⵜⵓⵙⵓⵜⵉⵏ ⵖⴰⴷ ⴰ ⵢⵓⴷⴷⵊⴰⵏ ⵜⴰⵎⴰⵜⴰⵔⵜ ⴼ ⵜⵖⴰⵔⴰⵙⵜ ⵏ ⵉⵎⴰⵣⵉⵖⵏ ⴳ ⵜⵎⵍⵙⴰ, ⵍⵄⴰⵎⵎⵜ ⵓⵔ ⵜⴳⵉ ⵜⴰⵥⵓⵕⵉ ⵏ ⵓⵙⵓⵔⴰⵔ ⴷ ⵓⵣⵣⵔⴰⵢ ⵏ ⵓⵣⵎⴰⵣ, ⵎⴰⵛⵛ ⵜⴳⴰ ⵢⴰⵜ ⵜⵥⵓⵕⵉ ⵜⴰⵎⴰⴷⴷⵓⴷⵜ ⵏ ⵓⵙⴼⵓⴳⵍⵓ, ⵖⴰⴷ ⴰ ⵢⴰⴷⴷⵊⴰⵏ ⵜⵉⵎⵍⵙⴰ ⵏ ⵉⵔⴳⴰⵣⵏ ⵓⵍⴰ ⵏⵜⵜⵏⵜⵉ ⴰⴷ ⴳⵏⵜ ⵙⴳ ⵢⴰⵏ ⵡⴰⵏⴰⵡ ⴷ ⵜⴰⵍⵖⴰ ⴷ ⵉⵎⵛⴰⵛⴽⴰⵏ ⴷ ⵓⵙⴼⵓⴳⵍⵓ ⴰⵎⴰⴷⴷⵓⴷ ⵏ ⵉⵎⴰⵣⵉⵖⵏ.

ⵜⵉⵎⵍⵙⴰ ⵏ ⵓⵔⴳⴰⵣ ⴰⵎⴰⵣⵉⵖ ⴰⵔ ⵜⵜⴳⴳⴰⵏⵜ ⵢⴰⵜ ⵙⴳ ⵙⵏⴰⵜ, ⴰ ⵉⵍⵙ ⵜⴰⵊⵍⵍⴰⴱⵉⵜ ⵖ ⵡⴰⴽⵓⴷ ⵏ ⵓⵚⵎⵎⵉⴹ ⵏⵖ ⴰ ⵉⵍⵙ ⵍⴼⵓⵇⵇⵉⵢⵢⴰ ⴳ ⵡⴰⴽⵓⴷ ⵏ ⵜⵉⵕⵖⵉ, ⵉⴳ ⵉⴳⴰ ⵙⴳ ⵉⵏⵎⵖⵓⵕⵏ ⵏ ⵜⵎⴰⵣⵉⵔⵜ ⵏⵙ ⴰⵔ ⵉⵍⵙⵙⴰ ⴰⵙⵍⵀⴰⵎ. ⴳ ⵉⵣⵎⴰⵣ ⴷⴰ ⵉⵣⵔⵉⵏ, ⵉⵣⵎⴰⵣ ⵏ ⵍⵀⵉⴼ ⴷ ⵜⴰⵙⵙⴰⵙⵜ ⵉⴽⴽⴰⵜⵜⵉⵏ ⵓⵔⴳⴰⵣ ⴰⵔ ⵉⵍⵙⵙⴰ ⴰⵄⴱⴰⵏ ⵏⵖ ⵜⵜⵛⴰⵎⵉⵔ, ⴰⵄⴱⴰⵏ ⵉⴳⴰ ⵜⵉⵎⵍⵙⵉⵜ ⵉⵜⵜⵢⴰⵄⴷⴰⵍⵏ ⴳ ⵜⴳⵎⵎⵉ ⵓⵔ ⴷ ⵉⴽⴽⵉⵏ ⴰⴳⴰⴷⴰⵣ, ⴰⵛⴽⵓ ⵎⵉⴷⴷⵏ ⵓⵔ ⴰ ⴷⴰⵔⵙⵏ ⵜⵜⵉⵍⵉⵏ ⵉⵇⵇⴰⵕⵉⴹⵏ ⵏ ⵓⵅⵢⵢⴰⵟ.

ⵜⵉⵎⵍⵙⴰ ⵏ ⵓⵔⴳⴰⵣ ⴳ ⵓⵃⵡⴰⵛ ⵓⵔ ⴳⵉⵏⵜ ⵉⴼⵜⵉⵍⵏ ⵉⴷⵍⵏ ⵜⵉⴼⵢⵢⵉ, ⵓⵔ ⴳⵉⵏⵜ ⵉⵊⵄⵜⴰⵏ ⵉⴱⴱⵉⵏ ⵓⵔ ⴳⵉⵏⵜ ⵜⴰⵡⵡⵔⵉ ⵉⵥⵥⴹⴰⵕ ⴰ ⵉⵙⴽⵔ ⴽⵔⴰⵢⴳⴰⵜ ⵢⴰⵏ ⴷ ⵉⵡⵉⵏ ⵉⵖⴰⵔⴰⵙⵏ, ⵎⴰⵛⵛ ⴳⴰⵏⵜ ⵜⴰⵎⴰⵜⴰⵔⵜ ⴳ ⵜⴰⵍⵖⴰ ⵏⵏⵙⵏⵜ ⴷ ⵓⴽⵯⵍⵓ ⵏⵏⵙⵏⵜ, ⴳⴰⵏⵜ ⵜⵉⵎⵍⵙⴰ ⵢⴰⴽⴽⴰⵏ ⵜⴰⵏⵏⴰⵢⵜ ⵉⵇⵇⵓⵣⵣⵔⵏ ⴼ ⵜⵓⴷⵔⵜ ⵏ ⵓⴼⴳⴰⵏ ⴷ ⵓⵙⵡⵉⵔ ⵏⵙ, ⴳⴰⵏⵜ ⵜⵉⵎⵍⵙⴰ ⵉⵡⵙⵉⵏ ⵜⴰⴷⵍⵙⴰ ⵏ ⵓⴼⴳⴰⵏ, ⴳⴰⵏⵜ ⵜⵉⵎⵢⵓⵔⵉⵏ ⵉⵡⵜⵏ ⵙ ⵉⵥⵓⵕⴰⵏ ⴳ ⵓⵎⵣⵔⵓⵢ ⵏ ⵓⴼⴳⴰⵏ, ⴳⴰⵏⵜ ⵜⴰⵎⴰⵜⴰⵔⵜ ⵉⵙⴰⵡⵡⴰⵍⵏ ⴼ ⵓⵙⴳⴷ ⴷ ⵜⵙⵔⵜⵉⵜ, ⴳⴰⵏⵜ ⵜⵎⵍⵙⴰ ⵏ ⵓⵔⴳⴰⵣ ⴳ ⵍⵄⴰⵎⵎⵜ ⴰⵎⵣⵔⵓⵢ ⴷⴰ ⴷ ⴼⵍⵏ ⵉⵇⵇⴱⵓⵕⵏ ⵉ ⵡⴰⵔⵔⴰⵡ ⵏ ⵖⴰⵙⵙ, ⴳⴰⵏⵜ ⴰⵏⵓⴼⵍⴰⵢ ⵏ ⵓⵔⴳⴰⵣ ⴰⵎⴰⵣⵉⵖ.

ⴰⵔ ⵍⵙⵙⴰⵏ ⵉⵔⴳⴰⵣⵏ ⴳ ⵍⵄⴰⵎⵎⵜ ⵜⵉⵎⵍⵙⴰ ⵙⴳ ⵉⴹⴰⵕⵏ ⴰⵔ ⵉⵅⴼ, ⴽⵓ ⵜⵉⵎⵍⵙⵉⵜ ⵜⵎⵙⴰⵛⴽⴰ ⴷ ⴷ ⵜⴰⵢⵢⴰⴹ, ⴰⵔ ⵍⵙⵙⴰⵏ :

  1. ⵉⴷⵓⴽⴰⵏ : ⴰⴷⵓⴽⵓ ⴰⵎⴰⵣⵉⵖ ⵉⵜⵜⵢⴰⵡⵙⵙⴰⵏ ⵙ ⵓⴽⵯⵍⵓ ⵏⵏⵙ ⴰⵡⵕⴰⵖ, ⵖⴰⵢⴰⵏⵏ ⴰⴼ ⵉⵔⴳⴰⵣⵏ ⴰⵔ ⵍⵙⵙⴰⵏ ⴳ ⵍⵄⴰⵎⵎⵜ ⴰⴷⵓⴽⵓ ⴰⵡⵕⴰⵖ. ⵉⴷⵔⵓⵙ ⵉⴳ ⵜⵍⵍⴰ ⴽⵔⴰ ⵏ ⵜⵔⴰⴱⴱⵓⵜ ⵏ ⵍⵄⴰⵎⵎⵜ ⴳ ⵍⵙⴰⵏ ⵉⵔⴳⴰⵣⵏ ⴰⴷⵓⴽⵓ ⵓⵎⵍⵉⵍ ⵏⵖ ⴰⴷⵓⴽⵓ ⴷⴰ ⵉⵣⵡⵡⵇⵏ.
  2. ⵜⵜⵇⵇⴰⵛⵕ: ⴳ ⵓⵣⵎⵣ ⴰⵇⵇⴱⵓⵕ ⵓⵔ ⵉⵙⵙⵉⵏ ⵢⴰⵏ ⵉⵙ ⴰⵔ ⵍⵙⵙⴰⵏ ⵉⵎⴰⵣⵉⵖⵏ ⵜⵜⵇⵇⴰⵛⵕ ⵏⵖ ⵓⵀⵓ ⴰⵛⴽⵓ ⵓⵔ ⵉⵍⵍⵉ ⴽⵔⴰ ⵏ ⵓⵙⴰⵖⵓⵍ ⵉⵜⵜⵢⴰⵔⴰⵏ ⴼⵍⵍⴰⵙⵏⵜ ⵉⵙⴰⵡⵡⴰⵍⵏ ⵎⴰⵛⵛ ⵖⴰⵚⵚⴰ ⵓⵔ ⵜⵍⵍⵉ ⴽⵔⴰ ⵏ ⵍⵄⴰⵎⵜ ⴳ ⵓⵔ ⵍⵙⵉⵏ ⵉⵔⴳⴰⵣⵏ ⵜⵜⵇⵇⴰⵛⵕ ⴷ ⵉⴷⵓⴽⴰⵏ, ⴰⵔ ⵍⵙⵙⴰⵏ ⵜⵜⵇⵇⴰⵛⵕ ⵜⵓⵎⵍⵉⵍⵉⵏ, ⵉⴷⵔⵓⵙ ⵉⴳ ⵍⵙⴰⵏ ⵜⵜⵇⵇⴰⵛⵕ ⴳ ⴽⵔⴰ ⵏ ⵓⴽⵯⵍⵓ ⵢⴰⴹⵏⵉ.
  3. ⵜⴰⵊⵍⵍⴰⴱⵉⵜ: ⵜⴰⵊⵍⵍⴰⴱⵉⵜ ⵜⴳⴰ ⵙⴳ ⵜⵉⵎⵢⵓⵔⵉⵏ ⵜⵉⵇⵇⴱⵓⵕⵉⵏ ⵏ ⵉⵎⴰⵣⵉⵖⵏ, ⵓⵔ ⵉⵍⵍⵉ ⵓⴼⴳⴰⵏ ⴰⵎⴰⵣⵉⵖ ⵡⴰⵔ ⵜⴰⵊⵍⵍⴰⴱⵉⵜ ⵙⵍⴰⵡⴰⵏ ⴳ ⵜⵎⵉⵣⴰⵔ ⵏ ⵓⴷⵔⴰⵔ, ⴰⵛⴽⵓ ⵜⴳⴰ ⵜⵉⵎⵍⵙⵉⵜ ⵏ ⵓⵚⵎⵎⵉⴹ. ⴰⵔ ⵙⴳⵉⴷⴷⵉⵏ ⵉⵎⴰⵣⵉⵖⵏ ⵜⴰⵊⵍⵍⴰⴱⵉⵜ ⵙⴳ ⵜⴰⴹⵓⴹ ⴰⴼⴰⴷ ⴰ ⵜⵕⵖ ⴷ ⴰⴼⴰⴷ ⴰ ⴼⵍⵍⴰⵙⵏ ⵜⴰⵙⵉ ⴰⵚⵎⵎⵉⴹ. ⵍⵄⴰⵎⵎⵜ ⴷ ⵏⵜⵜⴰⵜ ⵓⵔ ⵜⵙⴽⵉⵔ ⴽⵔⴰ ⵏ ⵓⵣⵎⵣ, ⵜⵥⵥⴹⴰⵕ ⴰ ⵜⵉⵍⵉ ⴳ ⵜⴳⵔⵙⵜ ⵏⵖ ⴳ ⵓⵏⴱⴷⵓ ⴰⵣⵎⵣ ⵏ ⵜⵉⵕⵖⵉ, ⵖⴰⵢⴰⴷ ⴰⴼ ⴰⴷ ⵍⵙⵙⴰⵏ ⵉⵔⴳⴰⵣⵏ ⵜⵉⵊⵍⵍⵓⴱⴰ ⴳ ⵍⵄⴰⵎⵎⵜ ⴰⴽⵓⴷ ⵏⵏⴰ ⵉⵍⵍⴰ ⵓⵚⵎⵎⵉⴹ.
  4. ⵍⴼⵓⵇⵇⵉⵢⵢⴰ: ⴰⵔ ⵜⵜⵉⵍⵉ ⵍⵄⴰⵎⵎⵜ ⴳ ⵓⵏⴱⴷⵓ, ⴰⵣⵎⵣ ⵏ ⵜⵉⵕⵖⵉ, ⵎⴰⵢⴰⴷ ⴰ ⵉⵜⵜⴰⵊⵊⴰⵏ ⵉⵔⴳⴰⵣⵏ ⴳ ⵍⵄⴰⵎⵎⵜ ⴰⴷ ⵍⵙⵏ ⵍⴼⵓⵇⵇⵉⵢⵢⴰ ⵉⴼⵙⵙⵓⵙⵏ ⴳ ⵓⴽⵍⵓ ⵓⵎⵍⵉⵍ ⵏⵖ ⴰⵡⵕⴰⵖ.
  5. ⵙⵙⵔⵡⴰⵍ (ⵏⵖ ⴰⴽⴰⵔⴱⴰⵢ[23]) ⴰⵇⵇⵏⴹⵕⵉⵚⵉ: ⵉⵔⴳⴰⵣⵏ ⵓⵔ ⴰⴷ ⵍⵙⵙⴰⵏ ⵜⴰⵊⵍⵍⴰⴱⵉⵜ ⴷ ⵍⴼⵓⵇⵇⵉⵢⵢⴰ ⵡⴰⵃⴷⵓⵜⵏⵜ, ⴰⵔ ⴰⵙⵏⵜ ⵍⵙⵙⴰⵏ ⵙⴳ ⵉⵣⴷⴰⵔ ⵙⵙⵔⵡⴰⵍ ⵉⵍⴰⵏ ⴰⴽⵯⵍⵓ ⵏ ⵜⵊⵍⵍⴰⴱⵉⵜ ⵏⵖ ⵏ ⵍⴼⵓⵇⵇⵉⵢⵢⴰ, ⴳ ⵎⴰ ⵉⴳⴳⵓⵜⵏ ⴰⵔ ⵉⵜⵜⴳⴳⴰ ⵙⵙⵔⵡⴰⵍ ⴰⵇⵇⵏⴹⵕⵉⵚⵉ.
  6. ⵜⴰⵕⵥⵥⵉⵜ ⵏⵖ ⴰⵛⴷⴷⴰⴷ: ⵉⵅⴼ ⴷ ⵏⵜⵜⴰⵏ ⵓⵔ ⴰⵜ ⵉⴼⴼⴰⵍ ⵓⵔⴳⴰⵣ ⵉⵄⵔⵔⴰ ⴳ ⵍⵄⴰⵎⵎⵜ, ⴰⵔ ⴰⵙ ⵍⵙⵙⴰⵏ ⵜⴰⵕⵥⵥⵉⵜ ⴳ ⵓⴽⵯⵍⵓ ⵏ ⵜⵊⵍⵍⴰⴱⵉⵜ. ⴰⵔ ⴰⵙ ⵜⵜⵉⵏⵉⵏ ⵉⵏⴼⴹⵡⴰⴽ ⵜⴰⵕⵥⵥⵉⵜ ⵏⵖ ⴰⵛⴷⴷⴰⴷ.
  7. ⵜⵜⴰⴳⵉⵢⵢⴰ: ⵙⴳ ⵜⵎⵍⵙⴰ ⵏ ⵉⵅⴼ, ⴰⵔ ⵍⵙⵙⴰⵏ ⵉⵔⴳⴰⵣⵏ ⵓⵍⴰ ⵜⵜⴰⴳⵉⵢⵢⴰ ⴳ ⵓⴽⵯⵍⵓ ⴷ ⵉⵎⵛⴰⵛⴽⴰⵏ ⴷ ⵜⵎⵍⵙⴰ ⵢⴰⴹⵏⵉ.
  8. ⴰⵙⵍⵀⴰⵎ: ⵜⵥⵥⴹⴰⵕ ⵍⵄⴰⵎⵎⵜ ⴰⵜⵜ ⵙⴽⵔⵏ ⵉⵔⴳⴰⵣⵏ ⵓⵍⴰ ⵙ ⵓⵙⵍⵀⴰⵎ ⴰⵔ ⵜ ⵍⵙⵙⴰⵏ ⵙⴳ ⵓⴼⵍⵍⴰ ⵏ ⵜⵊⴰⵍⵍⴰⴱⵉⵜ ⴷ ⵍⴼⵓⵇⵇⵉⵢⵢⴰ.
  9. ⵍⴽⵯⵎⵎⵉⵜ: ⵍⵯⵎⵎⵉⵜ ⵜⴳⴰ ⵙⴳ ⵜⵉⵎⵢⵓⵔⵉⵏ ⵏ ⵉⵎⴰⵣⵉⵖⵏ ⴰⵔ ⵜⵜ ⵙⴰⵜⵜⵉⵏ ⵉⵔⴳⴰⵣⵏ ⴷⵉⵜⵙⵏ ⴳ ⵉⵣⵎⴰⵣ ⵏ ⵉⵎⵏⵖⵉ ⵓⵍⴰ ⴳ ⵓⵣⵎⵣ ⵏ ⵓⴼⵔⴰ ⴰⵍⵍⵉⴳ ⵜⴳⴰ ⵙⴳ ⵜⵎⵢⵓⵔⵉⵏ ⵏ ⵜⵎⵍⵙⴰ ⵏ ⵓⴼⴳⴰⵏ ⴰⵎⴰⵖ. ⵍⴽⵯⵎⵎⵉⵜ ⴷⴰⵔ ⵉⵎⴰⵣⵉⵖⵏ ⵓⵔ ⵙⵓⵍ ⵜⴳⵉ ⴽⴰ ⵜⵉⵎⵍⵙⵉⵜ ⵏⵖ ⵙⵙⵍⴰⵃ, ⵎⴰⵛⵛ ⵜⵓⵔⵔⵉ ⵜⴳⴰ ⵜⴰⵎⴰⵜⴰⵔⵜ ⵏ ⵜⴰⵎⵖⵕⵜ ⴷ ⵜⴰⵜⵜⵓⵢⵜ ⵏ ⵡⴰⴷⴷⴰⴷ ⵏ ⵓⵔⴳⴰⵣ ⴳ ⵡⴰⵎⵎⴰⵙ ⵏ ⵜⵇⵇⴱⵉⵍⵜ ⵏⵙ, ⴰⵢⴰⴷ ⴰ ⵢⵓⵊⵊⴰⵏ ⵍⴽⵯⵎⵎⵉⵜ ⴰⴷ ⵜⴳ ⵢⴰⵜ ⵙⴳ ⵜⵎⵍⵙⴰ ⵏ ⵍⵄⴰⵎⵎⵜ, ⴰⵛⴽⵓ ⵍⵄⴰⵎⵎⵜ ⵜⴳⴰ ⴰⵣⵎⵣ ⵍⵍⵉ ⴳ ⴰⴷ ⵉⵎⵎⴰⵍⴰ ⵓⵔⴳⴰⵣ ⵉⴼⵅ ⵏⵙ ⵉ ⵜⵇⵇⴱⵉⵍⵜ.
  10. ⴰⵣⵔⵓⵔ: ⵉⴳⴰ ⵙⴳ ⵜⵎⵍⵙⴰ ⵏ ⵉⵔⴳⴰⵣⵏ ⴰⵔ ⵉⵜⵜⵢⴰⵍⵙⴰ ⴼ ⵉⵖⵉⵕ ⵎⴰⵛⵛ ⴰⵔ ⵉⵜⵜⴰⴳⴳⵯⵣ ⴰⵔ ⵍⵃⵣⴰⵎ, ⴰⴽⵯⵍⵓ ⵏⵙ ⴰⵔ ⵉⵜⵜⵉⵍⵉ ⴳ ⵓⵣⴳⴳⵯⴰⵖ ⵡⴰⵃⴷⵓⵜ ⵏⵖ ⴰⵔ ⴳⵉⵙ ⵜⵜⵉⵍⵉⵏ ⵜⵓⴳⵜ ⵏ ⵉⴽⵯⵍⴰⵏ ⵣⵓⵏ ⴰⵥⵕⵡⴰⵍ, ⴰⵣⴳⵣⴰⵡ ⴷ ⵓⵖⵎⵉ. ⴰⵔ ⵉⵜⵜⵢⴰⵅⴷⴰⵎ ⵓⵣⵔⵓⵔ ⵙⴳ ⵜⴰⴹⵓⵟⵜ ⴷ ⵜⵓⴳⵜ ⵏ ⵜⵇⵇⴰⵕⵉⴹⵉⵏ ⵎⵥⵥⵉⵏⵉⵏ, ⴽⵓ ⵉⴼⵉⵍⵓ ⵏ ⵜⴰⴹⴰⴹⵜ ⴰⵔ ⴷⵉⵙ ⵜⵜⵢⴰⵣⴷⴰⵢ ⵢⴰⵜ ⵜⵇⵇⴰⵕⵉⴹⵜ ⴱⴰⵛ ⴰⴽⵓⴷ ⵏⵏⴰ ⵉⵜⵜⵎⵓⵙⵙⵓ ⴰ ⵉⵙⴰⵡⵡⴰⵍ ( ⴰ ⵉⵙⴽⴰⵔ ⵉⵎⵙⵍⵉ, ⵉⵎⵙⵍⵉ ⵏ ⵜⵇⵇⴰⵕⵉⴹⵉⵏ).

ⵜⵉⵎⵍⵙⴰ ⵏ ⵜⵎⵖⴰⵔⵉⵏ

[ⵙⵏⴼⵍ | ⵙⵏⴼⵍ ⴰⵙⴰⴳⵎ]

ⵜⵉⵎⵍⵙⴰ ⵏ ⵜⵎⵖⴰⵕⵜ ⵜⴰⵎⴰⵣⵉⵖⵜ ⵜⵜⵢⴰⵡⵙⵙⴰⵏⵜ ⵎⴰⵙ ⴳⴰⵏⵜ ⵜⵉⵎⵢⵓⵔⵉⵏ ⵉⵡⵜⵏ ⵙ ⵉⵥⵓⵕⴰⵏ ⴳ ⵓⵎⵣⵔⵓⵢ, ⴽⵓ ⵜⴰⵎⴰⵣⵉⵔⵜ ⴰⵔ ⴳⵉⵙ ⵜⵜⵎⵎⵥⵍⴰⵢⵏⵜ ⵜⵎⵍⵙⴰ ⵏ ⵜⵎⵖⴰⵕⵜ ⴳ ⵉⴽⵯⵍⴰⵏ ⴷ ⵜⴰⵍⵖⴰ. ⵜⴰⵎⵖⴰⵕⵜ ⵜⴰⵎⴰⵣⵉⵖⵜ ⴳ ⵉⵏⵎⵓⴳⴳⴰⵔⵏ ⵉⵏⴰⵎⵓⵏⵏ ⴰⵔ ⵜⵍⵙⵙⴰ ⵜⵎⵖⴰⵕⵜ ⵜⵉⵎⵍⵙⴰ ⴷⴰ ⴷⴰⵔⵙ ⵉⴼⵓⵍⴽⵉⵏ, ⵜⵉⴷⴰ ⴷ ⵉⵎⵛⴰⵛⴽⴰⵏ ⴷ ⵓⵙⴼⵓⴳⵍⵓ ⴷⴰ ⵉⵍⵍⴰⵏ, ⵣⵓⵏ ⵜⴰⵎⵖⵕⴰ ⴷⴰⵔⵙ ⵜⵉⵎⵍⵙⴰ ⵏⵙ, ⵍⵉⵙⵍⴰⵎ, ⴰⵙⴱⵔⵔⴽ ⵏⵖ ⴽⵔⴰ ⵏ ⵓⵙⴼⵓⴳⵍⵓ ⵉⵣⴷⵉⵏ ⵙ ⵜⵎⵢⵓⵔⵉⵏ.

ⵍⵄⴰⵎⵎⵜ ⵜⴳⴰ ⵢⴰⵜ ⵜⵥⵓⵕⵉ ⵉⵣⴷⵉⵏ ⴱⴰⵀⵔⴰ ⵙ ⵓⵔⴳⴰⵣ, ⵉⵍⵍⴰ ⵎⴰ ⵉⵜⵜⵉⵏⵉⵏ ⵎⴰⵙ ⵍⵄⴰⵎⵎⵜ ⵜⴳⴰ ⵖⴰⵔ ⵜⴰⵥⵓⵕⵉ ⵏ ⵉⵔⴳⴰⵣⵏ ⵏⵖ "ⴰⵃⵡⴰⵛ ⵏ ⵉⵔⴳⴰⵣⵏ", ⵖⴰⵢⴰⵏ ⴰⴼ ⴰ ⵉⵜⵜⵉⴷⵔⵓⵙ ⵉⴳ ⵜⴽⵛⵎ ⵜⵎⵖⴰⵕⵜ ⵍⵄⴰⵎⵎⵜ, ⵉⴳ ⴰⵡⴽⴽ ⴽⵛⵎⵏⵜ ⵜⵎⵖⴰⵔⵉⵏ ⵍⵄⴰⵎⵎⵜ ⴰⵔ ⵜⵜⵉⵍⵉ ⵢⴰⵜ ⵏⵖ ⵙⵏⴰⵜ ⵜⵎⵖⴰⵔⵉⵏ ⵓⵔ ⴰ ⵜⵜⴳⴳⵯⵓⵜⵏ, ⴰⵔ ⵍⵙⵙⴰⵏⵜ ⵜⵉⵎⵍⵙⴰ ⵓⵔ ⴰⵙⵏⵜ ⵢⴰⴽⴽⴰⵏ ⵜⵉⵟⵟ ⴳ ⵡⴰⵎⵎⴰⵙ ⵏ ⵍⵄⴰⵎⵎⵜ. ⴳ ⴷⴰⵔ ⵉⵏⴼⴹⵡⴰⴽ ⴰⵔ ⴽⵛⵛⵎⵏⵜ ⵜⵎⵖⴰⵔⵉⵏ ⵍⵄⴰⵎⵎⵜ ⵉⴳ ⵓⵔ ⵉⵍⵍⵉ ⵓⴱⵕⵕⴰⵏⵉ[24], ⴰⴽⵓⴷ ⵏⵏⴰ ⵉⵍⵍⴰ ⵓⴱⵕⵕⴰⵏⵉ ⵓⵔ ⴰ ⴽⵛⵛⵎⵏⵜ ⵜⵎⵖⴰⵔⵉⵏ ⵍⵄⴰⵎⵎⵜ ⴰⵔ ⵜⵜⵓⵔⴰⵔⵏ ⵉⵔⴳⴰⵣⵏ ⵡⴰⵃⴷⵓⵜⵏ. ⵉⴳ ⴽⵛⵎⵏⵜ ⵜⵎⵖⴰⵔⵉⵏ ⵍⵄⴰⵎⵎⵜ ⴰⵔ ⵍⵙⵙⴰⵏⵜ ⴰⵔ ⵍⵙⵙⴰⵏⵜ :

  • ⵜⴰⵡⵏⵣⴰ ⵏⵖ ⵜⴰⵥⵕⵥⵉⵜ : ⵜⴰⵡⵏⵣⴰ ⵜⴳⴰ ⵙⴳ ⵜⵎⵍⵙⴰ ⵏ ⵉⵅⴼ ⴰⵔ ⵜⵜⵉⵍⵉ ⴼ ⵜⴰⵎⵓⵍⵜ ⵏ ⵜⵎⵖⴰⵕⵜ ⴰⵔ ⵜⵜ ⵜⵍⵙⵙⴰ ⵙⴳ ⵏⵏⵉⴳ ⵍⵇⵇⵟⵉⴱ ⵏⵖ ⵏⵏⵉⴳ ⵜⵎⵍⵃⴰⴼⵜ, ⵜⴰⵡⵏⵣⴰ ⵓⵔ ⵜⴳⵉ ⵜⵜⵓⴱ ⵎⴰⵛⵛ ⵜⴳⴰ ⴰⵏⴰⵙ ⵏⵖ ⴰⵔ ⵜⵜⵢⴰⵄⴷⴰⵍ ⵙⴳ ⵏⵏⵇⵇⵕⵜ ⴷ ⴽⵔⴰ ⵏ ⵓⵎⵖⵓⵣ ⵢⴰⴹⵏⵉ ⵉⵍⴰⵏ ⴰⵜⵉⴳ, ⴰⵔ ⵉⵜⵜⴳⴳⴰ ⵓⴽⵯⵍⵓ ⵏⵙ ⴰⵎⵖⵉⵖⴷ ⵉⴷⴷⴰⵏ ⵙ ⵓⵎⵍⵉⵍ. ⵜⴰⵡⵏⵣⴰ ⴰⵔ ⴰⵙ ⴰⵇⵇⵔⴰⵏ ⴳ ⴽⵔⴰ ⵏ ⵜⵎⵉⵣⴰⵔ ⵙ ⵜⵥⵕⵥⵉⵜ ⵣⵓⵏ ⴷⴰⵔ ⵉⵏⴼⴹⵡⴰⴽ ⴷ ⵉⵖⵊⴷⴰⵎⵏ.
  • ⵜⴰⵎⵍⵃⴰⴼⵜ: ⵜⴳⴰ ⵢⴰⵜ ⵜⴳⵣⵣⵓⵎⵜ ⵏ ⵜⵜⵓⴱ ⵉⵜⵜⵢⴰⵍⵙⴰⵏ ⴼ ⵉⵅⴼ ⵜⴳⴳⵯⵣ ⴰⵔ ⵍⵣⴰⵎ, ⴰⵔ ⵉⵜⵜⴳⴳⴰ ⵓⴽⵯⵍⵓ ⵏⵙ ⵓⵎⵍⵉⵍ, ⴰⵔ ⵜⵜⵢⴰⵍⵙⴰ ⵙⴳ ⵏⵏⵉⴳ ⵍⵇⵇⵟⵉⴱ, ⴰⵔ ⴼⵍⵍⴰⵙ ⵜⵜⵢⴰⵍⵙⴰ ⵜⵡⵏⵣⴰ.
  • ⵍⵇⵇⵎⵉⵚ: ⵉⴳⴰ ⵜⵉⵎⵍⵙⵉⵜ ⵏ ⵜⴼⴳⴳⴰ ⵏ ⵜⵎⵖⴰⵕⵜ, ⴰⵔ ⵜⵜ ⵉⵙⵙⵏⵜⴰⵍ ⵙⴳ ⵓⵎⴳⴳⵯⵕⴹ ⴰⵔ ⵉⴹⴰⵕⵏ ⴰⵔ ⵉⵟⵟⵕⴰⵃⴰ ⴰⴽⴰⵍ, ⴰⵔ ⵙⴳⵉⵙ ⴷ ⵜⵜⴱⴰⵏⴰⵏ ⵖⵉⵔ ⵉⴷⵓⴽⴰⵏ ⵙ ⵉⵎⵉⵇⵇ. ⴰⴽⵯⵍⵓ ⵏ ⵍⵇⵇⵎⵉⵚ ⴰⵔ ⵉⵜⵜⴳⴳⴰ ⵢⴰⵏ ⵏⵖ ⴰⵔ ⴳⵉⵙ ⵜⵜⵉⵍⵉⵏ ⵜⵓⴳⵜ ⵏ ⵉⴽⵯⵍⴰⵏ, ⴰⵣⴳⴳⵯⴰⵖ, ⴰⵡⵕⴰⵖ, ⴰⵣⴳⵣⴰⵡ ⵏⵖ ⴰⵡⴽⴽ ⴰⵥⵕⵡⴰⵍ. ⴰⵔ ⵉⵙⴽⴰⵔ ⵍⵇⵇⵎⵉⵙ ⵍⵃⵣⴰⵎ ⵉⴹⵏⵉⵏ ⵙ ⵉⵎⵉⵇⵇ.
  • ⵍⵇⵇⵟⵉⴱ: ⵉⵜⵜⵡⴰⵙⵙⵏ ⴷⴰⵔ ⵜⵎⵖⴰⵕⵜ ⵜⴰⵎⴰⵣⵉⵖⵜ ⵙ ⵓⴽⵯⵍⵓ ⵏⵙ ⴰⵣⴳⴳⴰⵖ ⵉⵎⵎⵔⴽⵙⵏ ⵙ ⴽⵔⴰ ⵏ ⵉⴽⵯⵍⴰⵏ ⵢⴰⴹⵏⵉ ⵉⵎⴰⴷⵔⴰⵙⵏ ⵣⵓⵏ ⴰⵣⴳⵣⴰⵡ ⴷ ⵓⵡⵕⴰⵖ. ⵉⴳⴰ ⵍⵇⵇⵟⵉⴱ ⵙⴳ ⵜⵎⵍⵙⴰ ⵏ ⵉⵅⴼ ⵎⴰⵛⵛ ⴰⵔ ⵉⵜⵜⴰⴳⴳⵯⵣ ⴷ ⵓⴷⵎ ⴰⵔ ⵉⴷⵎⴰⵔⵏ, ⵢⴰⴳⴳⵯⵣ ⴷⴰⵖ ⵙⴳ ⴹⴰⵕⵜ ⴰⵔ ⵉⵖⵕⴰⴹ ⵉⵜⵜⵔⵙ ⴼ ⵍⵇⵇⵎⵉⵚ. ⵉⴳⴰ ⵍⵇⵇⵟⵉⴱ ⵢⴰⵜ ⵙⴳ ⵜⵎⴰⵜⴰⵔⵉⵏ ⵏ ⵜⵎⵍⵙⵉⵜ ⵜⴰⵎⴰⵣⵉⵖⵜ.
  • ⵉⴷⵓⴽⴰⵏ: ⴰⵔ ⴰⵙⵏ ⵜⵜⵉⵏⵉⵏⵜ ⵜⵎⵖⴰⵔⵉⵏ ⵏ ⵉⵏⴼⴹⵡⴰⴽ "ⵍⴱⵍⵖⵜ", ⵍⴱⵍⵖⵜ ⵙ ⵡⴰⵡⵡⴰⵍ ⵏ ⵉⵏⴼⴹⵡⴰⴽ ⵜⴳⴰ ⵜⴰⵢⵢⵓⴳⴰ ⵉ ⵉⴷⵓⴽⴰⵏ, ⵙⵉⵏ ⵉⴷⵓⴽⴰⵏ.
  • ⵜⵉⵎⵍⵙⴰ ⵏ ⵜⵎⵖⴰⵔⵉⵏ

ⵉⵎⴰⵙⵙⵏ ⵏ ⵍⵄⴰⵎⵎⵜ

[ⵙⵏⴼⵍ | ⵙⵏⴼⵍ ⴰⵙⴰⴳⵎ]

ⵓⵔⴰⵔ ⵓⵔ ⴰ ⵉⵜⵜⴳⴳⴰ ⵜⴰⵥⵓⵕⵉ ⴰⴱⵍⴰ ⵉⴳ ⴼⵍⵍⴰⵙ ⵉⴽⵛⵎ ⵓⵎⵎⵔⴽⵙ, ⴰⵎⵎⵔⴽⵙ ⵏ ⵡⴰⵡⵡⴰⵍ ⵣⵓⵏ ⵏⵏⴹⵎ ⵏⵖ ⵉⵔⵉⵔ, ⴰⵎⵎⵔⴽⵙ ⵏ ⵓⵔⴰⵔ ⵙ ⵉⵅⴼ ⵏⵙ ⴷ ⵓⵎⵎⵔⴽⵙ ⵏ ⵉⵎⴰⵙⵙⵏ ⴷ ⵉⴼⴰⵙⵙⵏ. ⵉⵎⴰⵙⵙⵏ ⵏⵓⵜⵏⵉ ⴰⵔ ⵜⵜⵔⵏⵓⵏ ⵜⵉⴼⵉⵔⴰⵙ ⵏ ⵜⵥⵓⵕⵉ ⵉ ⴽⵔⴰⵢⴳⴰⵜ ⵜⴰⵡⵡⵔⵉ ⵣⵓⵏ ⵉⴳ ⵏⴻⵏⵏⴰ ⵜⵉⵕⵕⵓⵢⵚⴰ, ⴰⵜ ⵓⵔ ⵜⵍⵍⵉ ⵜⵉⵕⵕⵓⵢⵚⴰ ⴱⵍⴰ ⵔⵔⵉⴱⴰⴱ, ⵉⴳ ⵏⴻⵏⵏⴰ ⵜⴰⵥⵏⵥⴰⵕⵜ, ⴰⵜ ⵓⵔ ⵜⵍⵍⵉ ⴽⵔⴰ ⵏ ⵜⵥⵏⵥⴰⵕⵜ ⴱⵍⴰ ⵍⴱⴰⵏⵊⵓ, ⵉⴳ ⵏⴻⵏⵏⴰ ⴰⵃⵉⴷⵓⵙ ⴰⵜ ⵓⵔ ⵉⵍⵍⵉ ⴽⵔⴰ ⵏ ⵓⵃⵉⴷⵓⵙ ⴱⵍⴰ ⵜⴰⵍⵍⵓⵏⵜ. ⵖⵎⴽⵍⵍⵉ ⴳⴰⵏⵜ ⴰⴽⴽⵯ ⵜⵥⵓⵕⵉⵡⵉⵏ ⴰⴷ, ⴰⴷ ⵜⴳⴰ ⵓⵍⴰ ⵍⵄⴰⵎⵎⵜ, ⴷⴰⵔⵙ ⵉⵎⴰⵙⵙⵏ ⵏⵙ ⵙⵔⵙ ⵉⵥⵍⵉⵏ, ⴷ ⵓⵔ ⵜⵥⴹⴰⵕ ⴰⴷ ⵜⵉⵍⵉ ⴰⴱⵍⴰ ⵉⴳ ⵍⵍⴰⵏ. ⵉⵎⴰⵙⵙⵏ ⵏ ⵍⵄⴰⵎⵎⵜ ⵓⵔ ⵔⴰⴷ ⴳⵏⵜ ⴽⵔⴰ ⵏ ⵉⵎⴰⵙⵙⵏ ⴷ ⵉⴽⴽⴰⵏ ⴱⵕⵕⴰ ⵉ ⵜⵎⴰⵣⵉⵔⵜ ⵏ ⵉⵎⴰⵣⵉⵖⵏ, ⴰⵛⴽⵓ ⴽⵓ ⵜⴰⵥⵓⵕⵉ ⴰⵔ ⵜⵜ ⵙⴽⴰⵔⵏ ⵉⴷ ⵎⵓⵍⴰⵙ ⵙ ⵖⴰⵢⵍⵍⵉ ⴷⴰⵔⵙⵏ ⴳ ⵜⵎⵓⵣⴰⵔ ⵏⵏⵙⵏ, ⵓⵔ ⵜⵍⵍⵉ ⴽⵔⴰ ⵏ ⵜⵥⵓⵕⵉ ⴳ ⵡⴰⵟⵍⴰⵚ ⵉⵙⵙⵎⵔⴰⵙⵏ ⵉⵎⴰⵙⵙⵏ ⵏ ⵓⵕⵓppⴰ ⵏⵖ ⵏ ⵎⴰⵔⵉⴽⴰⵏ, ⵜⴰⵥⵓⵕⵉ ⵏ ⵜⵎⴰⵣⵉⵔⵜ ⵜⵍⵍⴰ ⵙ ⵉⵎⴰⵙⵙⵏ ⵏ ⵜⵎⴰⵣⵉⵔⵜ. ⵉⵎⴰⵙⵙⵏ ⵏ ⵍⵄⴰⵎⵎⵜ ⴳⴰⵏ ⵜⴰⵡⵡⵔⵉ ⵏ ⵉⴼⴰⵙⵙⵏ ⵏ ⵉⵎⴰⵣⵉⵖⵏ ⴰⵔ ⵜⵏ ⵜⵜⵀⵢⵢⴰⵏ ⵙⴳ ⵉⵍⵎⴰⵡⵏ ⵏ ⵉⵎⵓⴷⴰⵔ ⵏ ⴷⴰⵔⵙⵏ, ⵡⵉⵍⵍⵉ ⴷⴰⵔⵙⵏ ⵉⵍⵍⴰⵏ ⴳ ⵜⵎⴰⵣⵉⵔⵜ, ⵣⵓⵏ ⵉⵍⵎ ⵏ ⵡⴰⵖⵖⴰⴹ, ⵉⵍⵎ ⵏ ⵓⵎⵓⴳⴰⵢ ⵏⵖ ⴰⴼⵓⵏⴰⵙ, ⵉⵍⵎ ⵓⵍⵍⵉ, ⵓⵔ ⴰ ⵉⴽⵛⵛⵎ ⴳ ⵓⵙⵀⵢⵢⵓ ⵏ ⵉⵎⴰⵙⵙⵏ ⴰⴷ ⴰⴱⵍⴰ ⵜⵉⵡⵡⵓⵔⵉⵡⵉⵏ ⵏ ⵜⵎⴰⵣⵉⵔⵜ. ⵎⴰⵢⴰⴷ ⴰⵉⴳⴰ ⵜⴰⵎⴰⵜⴰⵔⵜ ⵎⴰⵙ ⵜⴰⵥⵓⵕⵉ ⴰⴷ ⵜⴳⴰ ⵜⴰⵥⵓⵕⵉ ⵏ ⵜⵎⴰⵣⵉⵔⵜ ⵓⵔ ⴷ ⵜⴽⴽⵉ ⴽⵔⴰ ⵏ ⵎⴰⵏⵉ ⵢⴰⴹⵏⵉ ⴰⵛⴽⵓ ⵙⴳ ⵉⵎⴰⵙⵙⵏ ⵏⵙ ⵓⵔ ⵍⵍⵉⵏ ⴳ ⴽⵔⴰ ⵏ ⵜⵎⴰⵣⵉⵔⵜ ⵢⴰⴹⵏⵉ ⴰⴱⵍⴰ ⵜⴰⵎⴰⵣⵉⵔⵜ ⵏ ⵍⵄⴰⵎⵎⵜ.

  • ⵜⴰⵍⵍⵓⵏⵜ (ⵏⵖ ⵟⵟⴰⵕⵜ): ⵜⴰⵍⵍⵓⵏⵜ ⵜⴳⴰ ⵙⴳ ⵉⵎⴰⵙⵙⵏ ⴷⴰ ⵉⵍⵍⴰⵏ ⴳ ⵜⵓⴳⵜ ⵏ ⵜⵥⵓⵕⵉⵡⵉⵏ ⵜⵉⵎⴰⵣⵉⵖⵉⵏ, ⵜⵍⵍⴰ ⴳ ⵍⵄⴰⵎⵎⵜ, ⴰⵃⵉⴷⵓⵙ, ⵜⴰⵃⵉⴷⵓⵙⵜ, ⴰⵃⵡⴰⵛ ⴷ ⵜⵓⴳⵜ ⵏ ⵜⵥⵓⵕⵉⵡⵉⵏ ⵢⴰⴹⵏⵉ. ⵉⵎⵉⵙⵙ ⵉⴳⴰ ⵢⴰⵏ ⵎⴰⵛⵛ ⴰⵙⵙⵎⵔⵙ ⵉⵎⵣⴰⵔⴰⵢ, ⵉⵎⵣⴰⵔⴰⵢ ⵡⴰⵡⵡⴰⵍ ⵏ ⵜⴰⵍⵍⵓⵏⵜ ⴳ ⵓⵃⵡⴰⵛ ⴼ ⵡⴰⵡⵡⴰⵍ ⵏⵙ ⴳ ⵓⵃⵉⴷⵓⵙ ⴷ ⵍⵄⴰⵎⵎⵜ. ⵜⴰⵍⵍⵓⵏⵜ ⵓⵔⴷ ⵜⴽⴽⵉ ⴱⵕⵕⴰ ⵉ ⵜⵎⴰⵣⵉⵔⵜ ⵎⴰⵛⵛ ⵜⴳⴰ ⵉⵍⵍⵉⵙ ⵏ ⵡⴰⴽⴰⵍ ⵏⵙ ⵣⵓⵏ ⵉⴷ ⴱⴰⴱ ⵏⵙ, ⴰⵛⴽⵓ ⵜⵍⵍⴰ ⴱⴷⴷⴰ ⴳ ⴽⵔⴰⵢⴳⴰⵜ ⴰⵙⴼⵓⴳⵍⵓ ⵉⴳⵉⵜ ⵡⵉⵏ ⵓⵙⵍⵉ, ⵜⴰⵙⵍⵉⵜ ⵏⵖ ⵡⵉⵏ ⵜⴰⵣⵣⴰⵏⵜ ⵎⵥⵥⵉⵏ. ⵜⴰⵍⵍⵓⵏⵜ ⴷⴰⵔⵙ ⵜⵓⴳⵜ ⵏ ⵉⵙⵎⴰⵡⵏ, ⴰⵔ ⴰⵙ ⴰⵇⵇⵔⴰⵏ ⵎⵉⴷⴷⵏ ⵙ "ⵜⴰⵍⵍⵓⵏⵜ", "ⴰⵍⵍⵓⵏ" "ⵟⵟⴰⵕⵜ"/ "ⵟⵟⴰⵕⵟ" ⵏⵖ ⴰⵡⴽⴽ "ⵍⴱⵏⴷⵉⵔ" ⴳ ⴽⵔⴰ ⵏ ⵜⴰⵙⴳⵉⵡⵉⵏ. ⵜⴰⵎⴳⵓⵔⵉ[25] ⵏ ⵜⴰⵍⵍⵓⵏⵜ ⵓⵔ ⴰ ⵜⵜⴹⴰⵍⴰⴱ ⵎⴰ ⵉⴳⴳⵓⵜⵏ, ⴰⵔ ⴳⵉⵙ ⴽⵛⵛⵎⵏⵜ ⵎⵏⵏⴰⵡ ⵏ ⵜⵖⴰⵡⵙⵉⵡⵉⵏ ⵏⵥⵥⴹⴰⵕ ⴰ ⵏⴰⴼ ⴳ ⴽⵔⴰⵢⴳⴰⵜ ⵓⵙⵓⵏ, ⵜⵙⵖⴰⵡⵙⴰ ⵙ ⴽⵕⴰⴹⵜ ⵜⵖⴰⵡⵙⵉⵡⵉⵏ : ⵉⵍⵎ, ⴰⴽⵛⵛⵓⴹ ⴷ ⵎⵏⵏⴰⵡ ⵏ ⵜⵇⵇⴰⵕⵉⴹⵉⵏ ⵏ ⵓⵣⵣⴰⵍ. ⵉⵍⵎ ⴰⵔ ⵉⵜⵜⴳⴳⴰ ⵡⵉⵏ ⵡⴰⵖⵖⴰⴹ ⵏⵖ ⵡⵉⵏ ⵓⵍⵍⵉ/ⵜⵉⵅⵙⵉ ⵏⵖⴷⴷ ⴰⵡⴽⴽ ⵡⵉⵏ ⵜⴼⵓⵏⴰⵙⵜ, ⴰⵔ ⴰⵙ ⵜⵜⴽⴽⵙⵏ ⴰⵣⵣⴰⵔ ⵅⴷⵎⵏⵜ ⴱⴰⵀⵔⴰ ⴳ ⴷⴰⵔ ⵓⴷⴱⴱⴰⵖ ⵏⵖ ⴰⵔ ⵉⵜⵜⵢⴰⵅⴷⴰⵎ ⴳ ⵜⴳⵎⵎⵉ ⴰⵔ ⵜ ⵜⵜⵅⴷⴰⵎⵏⵜ ⵜⵎⵖⴰⵔⵉⵏ; ⴰⴽⵛⵛⵓⴹ ⴰⵔ ⵉⵜⵜⴳⴳⴰ ⵡⵉⵏ ⵓⵣⵎⵎⵓⵔ ⴰⵛⴽⵓ ⴰⴽⵛⵛⵓⴹ ⵏ ⵓⵣⵎⵎⵓⵔ ⵉⵚⵃⴰ ⵓⵔ ⴰ ⵉⵜⵜⵕⵕⵥⴰ; ⵜⵉⵇⵇⴰⵕⵉⴹⵉⵏ ⴷ ⵏⵜⵜⵏⵜⵉ ⴰⵔ ⵜⵜⵢⴰⵅⴷⴰⵎⵏⵜ ⴷⴰⵔ ⵓⵎⵣⵉⵍ ⵏ ⵓⵙⵓⵏ, ⴰⵔ ⵜⵏⵜ ⵉⵜⵜⵅⴷⴰⵎ ⵖⵉⴽⵍⵍⵉ ⵉⵜⵜⵅⴷⴰⵎ ⵜⴰⵙⵉⵍⴰ, ⵜⵉⵎⴳⵔⵜ, ⵉⵎⴳⵔ, ⵜⴰⵍⴽⴽⴰⵡⵙⵓⵜ ⴷ ⴰⴽⴽⵯ ⵉⵙⵎⵎⵡⴰⴷ ⵏ ⵜⴼⵍⵍⴰⵃⵜ ⵏ ⴰⵢⵜ ⵜⵎⴰⵣⵉⵔⵜ. ⴰⵙⵙⵎⵔⵙ[26] ⵏ ⵜⴰⵍⵍⵓⵏⵜ ⵓⵍⴰ ⵏⵜⵜⴰⵏ ⵉⵥⵍⵉ, ⵓⵔ ⴰⵜⵜ ⵉⴽⴽⴰⵜ ⴱⴰⴱ ⵏ ⵍⵄⴰⵎⵎⵜ ⴰⴽⵓⴷ ⵏⵏⴰ ⵉⵔⴰ, ⵎⴰⵛⵛ ⵉⵇⵇⴰⵏⴷ ⴰⴷ ⵣⵡⴰⵔ ⵜⵕⵖ, ⴰⵢⵜ ⵍⵄⴰⵎⵎⵜ ⴰⵔ ⵙⵙⵔⵖⴰⵏ ⵣⵡⴰⵔ ⵍⵄⴼⵉⵜ ⵓⵔⵜⴰ ⵜⴱⴷⵉ ⵍⵄⴰⵎⵎⵜ ⴰⴼⴰⴷ ⵣⵡⴰⵔ ⴰⴷ ⵙⵙⵔⵖⵏ ⵜⴰⵍⵍⵓⵏⵜ, ⴰⵔ ⵙⵔⴰⵙⵏ ⵜⴰⵍⵍⵓⵏⵜ ⵜⴰⵎⴰ ⵏ ⵍⵄⴼⵉⵜ ⴰⵔⵉⴳ ⵜⵃⵎⴰ ⵉⵍⵎⴰ ⴷⴷⵓⵏ ⵙⵔⵙ ⴷⴰⵔ ⵍⵄⴰⵎⵎⵜ, ⵏⵖ ⵉⴳ ⵜⵍⵍⴰ ⵜⴰⴼⵓⴽⵜ, ⴰⵔ ⵙⵔⴰⵙⵏ ⵜⴰⵍⵍⵓⵏⵜ ⴳ ⵜⴰⴼⵓⴽⵜ ⴰⵔⵉⴳ ⵜⵃⵎⴰ ⵉⵍⵎⴰ ⴰⵔ ⵙⵔⵙ ⵜⵜⵓⵔⴰⵔⵏ. ⵜⴰⵍⵍⵓⵏⵜ ⴰⵔ ⵣⵡⴰⵔ ⵜⵕⵇⵇⴰ ⴰⴼⴰⴷ ⴰ ⵙⵔⵙ ⵓⵔⴰⵔⵏ ⵍⵄⴰⵎⵎⵜ ⴰⵛⴽⵓ ⴰⵎⵓⴽⵔⵉⵙ ⴰⴷ ⵉⴽⴽⴰⴷ ⵉⵍⵎ ⴷⴰ ⵙⴳ ⵜⵜⵢⴰⵄⴷⴰⵍ, ⴰⴽⵓⴷ ⵏⵏⴰ ⵉⴽⵔⵎ ⵍⵃⴰⵍ ⴰⵔ ⵉⵜⵜⵎⵓⵏⵓ ⵓⵔ ⵙⵓⵍ ⴰ ⵢⴰⴽⴽⴰ ⵉⵎⵙⵍⵉ ⵉⴼⵓⵍⴽⵉⵏ, ⵖⴰⵢⴰⴷ ⴰⴼ ⵉⵇⵇⴰⵏⴷ ⴰ ⵣⵡⴰⵔ ⵉⵕⵖ ⴳ ⵜⵓⴷⴷⵎⴰ ⵏ ⵓⵔⴰⵔ ⵏ ⵍⵄⴰⵎⵎⵜ. ⴰⵎⵓⴽⵔⵉⵙ ⴰⴷ ⵏ ⵉⵍⵎ ⴰ ⵢⵓⴷⴷⵊⴰⵏ ⴽⵔⴰ ⵏ ⵜⵔⵓⴱⴱⴰ ⴰⴷ ⵙⵙⵎⵔⴰⵙⵏ ⵜⴰⵍⵍⵓⵏⵜ ⵜⴰⵜⵔⴰⵔⵜ ⵎⵇⵇⴰⵔ ⵓⵔ ⴰ ⵜⵙⴽⴰⵔ ⵣⵓⵏ ⵜⴰⵡⵡⵔⵉ ⵏ ⵜⴰⵍⵍⵓⵏⵜ ⵜⴰⵇⵇⴱⵓⵕⵜ.
  • ⴳⴰⵏⴳⴰ : ⴰⵔ ⵉⵜⵜⴳⴳⴰ ⵢⴰⵏ ⴳ ⵍⵄⴰⵎⵎⵜ ⴰⵛⴽⵓ ⴰⵔ ⵢⴰⴽⴽⴰ ⵉⵎⵙⵍⵉ ⵉⵛⴷⴷⴰⵏ ⵎⵍⵉⵃ. ⵜⵥⵥⴹⴰⵕ ⴰⴷ ⵜⵉⵍⵉ ⵍⵄⴰⵎⵎⵜ ⴱⵍⴰ ⵏ ⴰⵢⵍⵉ ⴳⴰⵏⴳⴰ ⵓⵍⴰ ⴱⴰⴱ ⵏ ⴳⴰⵏⴳⴰ. ⵜⴰⴳⵎⴳⵓⵔⵉ ⵏ ⴳⴰⵏⴳⴰ ⵓⵔ ⵜⵛⵇⵇⵉ, ⴰⵔ ⵜⵜⵉⵍⵉ ⵙ ⵜⵖⴰⵔⴰⵙⵜ ⵏ ⵜⴰⵍⵍⵓⵏⵜ, ⴰⵔ ⴳⵉⵙ ⵉⵜⵜⵢⴰⵙⵙⵎⵔⴰⵙ ⵉⵍⵎ ⵏ ⵉⵎⵓⴷⴰⵔ ⴷ ⵓⴽⵛⵛⵓⴹ ⵏ ⵓⵣⵎⵎⵓⵔ, ⵎⴰⵛⵛ ⴳ ⵎⴰ ⵉⴳⴳⵓⵜⵏ ⴰⵔ ⵉⵜⵜⴳⴳⴰ ⵉⵍⵎ ⵡⵉⵏ ⵜⴼⵓⵏⴰⵙⵜ ⵏⵖ ⵉⴳⵉⵣ, ⴰⵛⴽⵓ ⵉⵍⵎ ⵏ ⵡⴰⵖⵖⴰⴹ ⴷ ⵡⵉⵏ ⵓⵍⵍⵉ ⵉⵎⵥⵥⵉ ⴼ ⴳⴰⵏⴳⴰ.
  • imassn n Lɛammt
  • Ganga n lɛammt n usun n ixrrazn, Surn, infḍwak, aṭlaṣ mqquṛn, 2023
    Ganga n lɛammt n usun n ixrrazn, Surn, infḍwak, aṭlaṣ mqquṛn, 2023
  • Tallunt n lɛammt sg datt, ttrs g tafukt a bac a tṛɣ. lɛammt n usun n ixrrazn, Surn, infḍwak, 2023
    Tallunt n lɛammt sg datt, ttrs g tafukt a bac a tṛɣ. lɛammt n usun n ixrrazn, Surn, infḍwak, 2023
  • Udm n tallunt n lɛammt. Lɛammt n usun n ixrrazn, Surn, infḍwak, 2023
    Udm n tallunt n lɛammt. Lɛammt n usun n ixrrazn, Surn, infḍwak, 2023
  • Tallunt ittyaṛcamn, ittyara gis Buḥsin, Buḥsin iga yan sg igmamn n lɛammt n usun n ixrrazn, Surn, infḍwak, 2023
    Tallunt ittyaṛcamn, ittyara gis Buḥsin, Buḥsin iga yan sg igmamn n lɛammt n usun n ixrrazn, Surn, infḍwak, 2023
  • Lɛammt s tallunt tatrart (wiss sin sg ufasi), Ixrrazn, Surn, infḍwak, 2023
    Lɛammt s tallunt tatrart (wiss sin sg ufasi), Ixrrazn, Surn, infḍwak, 2023

ⴰⵙⵓⴷⵙ ⴷ ⵓⵙⵏⵎⴰⵍⴰ ⵏ ⵉⵔⴳⴰⵣⵏ ⴷ ⵜⵎⵖⴰⵔⵉⵏ ⴳ ⵍⵄⴰⵎⵎⵜ

[ⵙⵏⴼⵍ | ⵙⵏⴼⵍ ⴰⵙⴰⴳⵎ]
Asuds d usnmala n irgazn d tmɣarin g Lɛammt

ⵍⵄⴰⵎⵎⵜ ⵜⴳⴰ ⴰⵙⴼⵓⴳⵍⵓ ⵉⵙⵎⵓⵏⴰⵏ ⵜⵓⴳⵜ ⵏ ⵎⵉⴷⴷⵏ, ⵉⵔⴳⴰⵣⵏ ⴷ ⵜⵎⵖⴰⵔⵉⵏ. ⴰⴽⵓⴷ ⵏⵏⴰ ⵜⵍⵍⴰ ⵍⵄⴰⵎⵎⵜ ⴽⵓ ⵢⴰⵏ ⴰⵔ ⵉⵟⵟⴰⵎⵥ ⴰⴹⵖⴰⵕ ⵏⵙ, ⵓⵔ ⵜⵍⵍⵉ ⵜⴱⴷⴷⴰ ⵏ ⵎⵅⴰⵎⵎⴰ ⴳ ⵡⴰⵎⵎⴰⵙ ⵏ ⵜⵥⵓⵕⵉ ⴰⴷ ⵉⴳⴰⵏ ⵜⴰⵇⵇⴱⵓⵕⵜ, ⵉⴳⴰⵏ ⵜⴰⵥⵓⵕⵉ ⴷⴰ ⵙ ⴰⴷ ⵜⵎⵎⴰⵍⴰ ⴽⵓ ⵜⴰⵇⵇⴱⵉⵍⵜ ⵜⴰⴽⴱⵕⴰⵏⵉⵜ ⵏⵙ ⴷ ⵜⴰⵜⵜⵓⵢⵜ ⵏ ⵡⴰⴷⴷⵓⵔ ⵏⵙ. ⴳ ⵍⵄⴰⵎⵎⵜ ⴰⵔ ⵜⵜⴱⴷⴷⴰⴷⵏ ⵉⵔⴳⴰⵣⵏ ⵢⴰⵏ ⵜⴰⵎⴰ ⵏ ⵢⴰⵏ, ⴰⵔ ⵙⴽⴰⵔⵏ ⴰⴷⵓⵔ ⵉⵖⵣⵣⵉⴼⵏ, ⴽⵔⴰ ⵙ ⴰ ⵉⵜⵜⵖⵣⵣⵉⴼⵉ ⵡⴰⴷⵓⵔ ⴰⴷ ⴽⵔⴰ ⵙ ⴰⵜⵜⵀⵢⵢⴰⴱ ⵍⵄⴰⵎⵎⵜ, ⵓⵔ ⴰ ⵉⵜⵜⵉⵍⵉ ⵡⴰⴷⵓⵔ ⴷⴰⵜ ⵡⴰⵢⵢⴰⴹ, ⴰⵔ ⵉⵜⵜⵉⵍⵉ ⵢⴰⵏ ⵡⴰⴷⵓⵔ ⵎⵇⵇⴰⵔ ⵉⵖⵣⵣⵉⴼ ⴰ ⴳⵉⵙ ⵜⵉⵍⵉ ⴽⴽⵓⵥ ⵉⴷ ⵎⵔⴰⵡ ⵏⵖ ⵓⴳⴳⴰⵔ ⵏ ⵓⵔⴳⴰⵣ. ⴷⴰⵜ ⴰⴷⵓⵔ ⴰⴷ ⵏ ⵉⵔⴳⴰⵣⵏ ⴰⵔ ⴳⵉⵙ ⵉⵜⵜⴱⴷⴷⴰⴷ ⵢⴰⵏ ⵓⵔⴳⴰⵣ ⴷⴰ ⵉⵚⵡⴰⴳⵯⵏ ⵍⵄⴰⵎⵎⵜ ⴰⵔ ⴰⵙ ⵜⵜⵉⵏⵉⵏ "ⴰⵄⵍⵍⴰⵎ" ⵏⵖ "ⵍⴰⵎⵉⵏ" ⵏ ⵍⵄⴰⵎⵎⵜ ⴰⵔ ⵉⵜⵜⴳⴳⴰ ⴽⵔⴰ ⵏ ⵓⵔⴳⴰⵣ ⵉⵎⵇⵇⵓⵔⵏ ⴷⴰ ⵉⵙⵙⵏ ⵉⵜⵜⵛⵢⵢⵅ ⴳ ⵍⵄⴰⵎⵎⵜ, ⴷⴰⵔⵙ ⴷⵉⴷⴰⵙ ⴰⵎⵣⵔⵓⵢ ⵉⴳⴳⵯⵓⵜⵏ. ⴳ ⵜⴰⵎⴰ ⵏ ⵓⵎⵖⴰⵕ ⵏ ⵍⵄⴰⵎⵎⵜ ⴰⵔ ⵉⵜⵜⵉⵍⵉ ⴱⵓⴳⴰⵏⴳⴰ, ⴰⵔ ⵢⴰⴽⴽⴰ ⵙ ⵜⴰⵢⵏⵏⵉⵜ ⵉ ⵓⵎⵖⴰⵕ ⵎⴰⵛⵛ ⴰⵔ ⴳⵉⵙ ⵉⵙⴰⵇⵇⵓⵍ ⴱⴰⵛ ⴰⵜ ⵉⴹⴼⴰⵕ, ⴰⵔ ⵢⴰⴽⴽⴰ ⴱⵓⴳⴰⵏⴳⴰ ⵙ ⵓⴷⵎ ⵏⵙ ⵉ ⵡⴰⴷⵓⵔ ⵏ ⵍⵄⴰⵎⵎⵜ, ⴰⴷⵓⵔ ⵏ ⵉⵔⴳⴰⵣⵏ.

ⵍⵄⴰⵎⵎⵜ ⵜⴳⴰ ⴳ ⵎⴰ ⵉⴳⴳⵓⵜⵏ ⵜⴰⵥⵓⵕⵉ ⵏ ⵉⵔⴳⴰⵣⵏ, ⴰⵔ ⵉⵜⵜⵉⴷⵔⵓⵙ ⵉⴳ ⵜⵜ ⴽⵛⵎⵏⵜ ⵜⵎⵖⴰⵔⵉⵏ, ⴰⵔ ⵜⵜ ⴽⵛⵛⵎⵏⵜ ⵙ ⵓⵟⵟⵓⵏ ⵉⵎⵥⵥⵉⵏ: ⵢⴰⵜ ⵏⵖ ⵙⵏⴰⵜ ⵉⴳ ⴳⴳⵯⵓⵜⵏⵜ. ⵜⵉⵎⵖⴰⵕⵉⵏ ⴷⴰ ⵉⴽⵛⵛⵎⵏ ⵍⵄⴰⵎⵎⵜ ⴰⵔ ⴰⵙⵏⵜ ⵉⵜⵜⵉⵍⵉ ⵓⴹⵖⴰⵕ ⴷⴰ ⵜⵏⵜ ⵉⴷ ⵉⵇⵇⴰⵏⵏⴷ, ⵓⵔ ⵥⵥⴹⴰⵕⵏⵜ ⴰⴷ ⴱⴷⴷⴰⵏⵜ ⴳ ⴷⵉⵏⵏⴰ ⵓⴽⴰⵏ ⵔⴰⵏⵜ. ⴰⵔ ⵜⵜⴱⴷⴷⴰⴷⵏⵜ ⴷⴰⵜ ⵏⵖ ⵎⴳⴰⵍ ⴰⴷⵓⵔ ⵏ ⵉⵔⴳⴰⵣⵏ, ⴽⵓ ⵢⴰⵜ ⴰⵔ ⵜⵜⴱⴷⴷⴰⴷ ⵙ ⵉⵅⴼ ⵏⵙ ⵓⵔ ⴰⴷ ⵜⵜⵏⵎⴰⵍⴰⵏⵜ ⴳ ⵜⴱⴷⴷⴰ, ⴽⵓ ⵢⴰⵜ ⴰⵔ ⵜⵜⵉⵍⵉ ⴳ ⵢⴰⵜ ⵜⵙⴳⴰ; ⵢⴰⵜ ⵜⵎⵖⴰⵕⵜ ⴰⵔ ⵜⵜⵉⴱⴷⴰⴷ ⴼ ⵓⴼⴰⵙⵉ ⵏ ⵍⴰⵎⵉⵏ ⵢⴰⵜ ⴼ ⵓⵥⵍⵎⴰⴹ ⵏⵙ. ⵏⵖ ⴰⵔ ⵉⵜⵜⵉⵍⵉ ⵉⴳ ⵜⵍⵍⴰ ⵢⴰⵜ ⵜⵎⵖⴰⵕⵜ ⴳ ⵍⵄⴰⵎⵎⵜ ⴰⵔ ⵜⵜⴱⴷⴷⴰⴷ ⵡⴰⵃⴷⵓⵜⵜ ⴷ ⵉⵅⴼ ⵏⵙ.

ⵜⴰⵏⴹⴹⴰⵎⵜ ⴳ ⵓⴳⵯⵏⵙ ⵏ ⵍⵄⴰⵎⵎⵜ

[ⵙⵏⴼⵍ | ⵙⵏⴼⵍ ⴰⵙⴰⴳⵎ]

ⴰⴼⴳⴰⵏ ⴰⵎⴰⵣⵉⵖ ⵉⵎⵣⴰⴷⴰⵢ ⴱⴷⴷⴰ ⴳ ⵜⵎⵢⵓⵔⵉⵏ ⴷ ⵜⵡⵔⴳⵍⵉⵏ ⵏⵙ ⵙ ⵏⵏⴹⵎ ⴷ ⵜⴷⵢⴰⵣⵜ, ⵓⵔ ⴰⴷ ⴷⴰⵔⵙ ⵉⵣⵔⵔⵉ ⴽⵔⴰ ⵏ ⵓⵣⵏⵎⵣⵣⵓ ⵡⴰⵔ ⵜⵏⴹⴹⴰⵎⵜ, ⵏⵏⴹⵎ ⵉⴳⴰ ⴷⴰⵔⵙ ⵜⴰⵢⵙⵉ ⵉⵍⴰⵏ ⴰⵜⵉⴳ, ⵜⴰⵢⵙⵉ ⵉⵙⴰⵜⵜⵉⵏ ⵙ ⵡⴰⴷⴷⵓⵔ ⵏ ⵜⵓⴷⵔⵜ ⵜⴰⴷⵍⵙⴰⵏⵜ ⵏⵙ. ⵜⴰⵏⴹⴹⴰⵎⵜ ⵓⵔ ⵜⴳⵉ ⴰⵡⴰⵍ ⵉⵀⵡⵏⵏ, ⵓⵔ ⵉⵥⴹⴰⵕ ⴽⵔⴰⵢⴳⴰⵜ ⵢⴰⵏ ⴰⴷ ⵉⵏⴹⵎ. ⵜⴰⵏⴹⴹⴰⵎⵜ ⴳ ⵍⵄⴰⵎⵎⵜ ⴰⵔ ⵜⵜⵎⵣⴰⴷⴰⵢ ⴷ ⵡⴰⵏⴰⵡ ⵏ ⵓⵣⵏⵎⵣⵣⵓ, ⵉⵙ ⵉⴳⴰ ⴰⵙⵔⵜⴰⵏ, ⴰⵎⵓⵏⴰⵏ (ⵣⵓⵏ ⵍⵉⵜⵉⵀⴰⵍ) ⵏⵖ ⵡⵉⵏ ⴽⵔⴰ ⵏ ⵡⴰⵏⵏⴰⵣ. ⴰⵔ ⵉⵜⵜⵏⴹⴰⵎ ⵍⴰⵎⵉⵏ ⵏ ⵍⵄⴰⵎⵎⵜ ⵉ ⵓⵣⵏⵎⵣⵣⵓ ⴷ ⵉ ⵎⴷⴷⵏ ⵃⴰⴹⵕⵏⵉⵏ.

ⴰⵎⴷⵢⴰ ⵏ ⵜⵏⴹⴹⴰⵎⵜ:

ⴰⵀ ⴰⵡⴰ, ⴰⵜ ⵏⵛⵛⴰ ⴽⴰⴷⴰ ⴷ ⴰⵢⵜ ⵍⵅⵉⵔ
ⵏⵛⵛⴰ ⴽⴰⴷⴰ
ⵀⴰ ⵡⴰⵢⵢⴰⴹ ⴰⵡⴰ ⴷⴷⴰ ⵢⵅⵍⴼⵉ

— ⵍⵄⴰⵎⵎⵜ ⵏ ⵉⵏⴼⴹⵡⴰⴽ

ⵜⴰⵏⴹⴹⴰⵎⵜ ⴰⴷ ⵜⵣⴷⵉ ⵙ ⴱⴰⴱ ⵏ ⵓⵣⵏⵎⵣⵣⵓ ⴷⴰ ⵉⵙⵏⵓⴱⴱⴳⵏ ⵜⵔⴰⴱⴱⵓⵜ ⴳ ⴷⴰⵔⵙ, ⵏⵥⵥⴹⴰⵕ ⴰⴷ ⵏⵉⵏⵉ ⵎⴰⵙ ⵉⵡⴰⵍⵉⵡⵏ ⴰⴷ ⴳⴰⵏ ⵉⵡⴰⵍⵉⵡⵏ ⵏⵖ ⵜⴰⴳⵓⵔⵉ ⵏ ⵓⵙⵏⵉⵎⵎⵔ ⵉ ⴱⴰⴱ ⵏ ⵜⴳⵎⵎⵉ.

ⴰⵢⵜ ⵍⵄⴰⵎⵎⵜ

[ⵙⵏⴼⵍ | ⵙⵏⴼⵍ ⴰⵙⴰⴳⵎ]
imsli n unḍḍam Bṛahim Ctuta, yan sg ayt lɛammt, iwis n usun n "iniccl", Ayt mḥmmd, tagrawt n Unzu, tamnaḍt n Uzilal. Ar dis isawwal Lḥusayn AIT TAYFST, 2023 (argaz ad ur issujad bac a inḍm, lɛammt ur dars tgi tawwri)

ⵓⵔⴰⵔ ⵏ ⵍⵄⴰⵎⵎⵜ ⵓⵔ ⵉⵙⵖⴰⵡⵙⴰ ⵙ ⵓⵙⵎⵓⵜⵜⴳ ⵏⵖ ⵙ ⵜⵖⵔⵉ, ⵍⵄⴰⵎⵎⵜ ⵜⴳⴰ ⴷⴰⵔⵙⵏ ⵢⴰⵜ ⵙⴳ ⵜⵡⵡⵓⵔⵉⵡⵉⵏ ⵜⵉⴽⵓⵢⴰⵙⵙⵉⵏ ⴳ ⵜⵓⴷⵔⵜ ⵏⵏⵙⵏ, ⴽⵓ ⴰⴹⵡⵡⴰⵕ ⵏⵖ ⴽⵓ ⵎⵏⵏⴰⵡⵜ ⵏ ⵉⴹⵓⵕⴰⵏ ⴰⵔ ⵙⵎⵓⵏⴰⵏ ⵢⴰⵜ ⵜⵔⴰⴱⴱⵓⵜ ⵏ ⵍⵄⴰⵎⵎⵜ, ⴰⵔ ⴳⵉⵙ ⵜⵜⵉⵍⵉⵏ ⵉⵎⵥⵥⴰⵢⵏ ⴷ ⵉⵎⵇⵇⵕⴰⵏ ⵓⵔ ⵉⵍⵍⵉ ⴽⵔⴰ ⵏ ⵓⵡⵜⴰⵢ ⵉⴳⴰⵏ ⵡⵉⵏ ⵓⴽⵛⵛⵓⵎ ⵙ ⵍⵄⴰⵎⵎⵜ.

ⵎⴰⵙⵙ ⴱⵕⴰⵀⵉⵎ ⵛⵜⵓⵜⴰ ⵉⴳⴰ ⴰⵎⴷⵢⴰ ⵏ ⵎⴷⴷⵏ ⴷⴰ ⵉⵜⵜⵓⵔⴰⵔⵏ ⵍⵄⴰⵎⵎⵜ.

ⵍⵄⴰⵎⵎⵜ: ⵜⴰⵥⵓⵕⵉ ⵜⴰⵏⴰⵎⵎⴰⵙⵜ ⴳⵔ ⵓⵃⵉⴷⵓⵙ ⴷ ⵓⵃⵡⴰⵛ

[ⵙⵏⴼⵍ | ⵙⵏⴼⵍ ⴰⵙⴰⴳⵎ]

ⵉⵎⴰⵣⵉⵖⵏ ⵙ ⵓⵎⴰⵜⴰ ⵣⴷⵉⵏ ⵙ ⵜⵥⵓⵕⵉ, ⴽⵓ ⴰⵇⵇⴱⵉⵍ ⵉⵍⴰ ⵢⴰⵜ ⵜⴰⵍⵖⴰ ⵙⵔⵙ ⵉⵥⵍⵉⵏ, ⴰⵔ ⵏⵜⵜⴰⴼⴰ ⴰⵃⵉⴷⵓⵙ ⴷⴰⵔ ⵉⵇⵇⴱⵉⵍⵏ ⵏ ⵥⴰⵢⵢⴰⵏ, ⴰⵃⵡⴰⵛ ⴷⴰⵔ ⵉⵇⵇⴱⵉⵍⵏ ⵏ ⵙⵓⵙ. ⴳ ⵡⴰⵎⵎⴰⵙ ⵏ ⵓⵇⵇⴱⵉⵍ ⴰⵔ ⵜⵜⵎⵣⴰⵔⴰⵢ ⵜⵥⵓⵕⵉ ⵙⴳ ⵓⵙⵓⵏ ⵙ ⵡⴰⵢⵢⴰⴹ ⵎⴰⵛⵛ ⴰⵔ ⵜⵖⴰⵎⴰⵏⵜ ⵜⵉⴼⵔⴰⵙ ⵎⴰⵙ ⴰⴷ ⵜⵜⵉⵙⵉⵏⵜ ⵎⴰⵙ ⵜⴰⵥⵓⵕⵉ ⴰⴷ ⵜⴳⴰ ⵙⴳ ⵜⴰⵍⵖⴰ ⴰⴷ ⵏⵖ ⵜⴰⵢⵢⴰⴹ. ⴰⵃⵡⴰⵛ ⵏ ⵥⴰⵢⵢⴰⵏ ⵉⵜⵜⵢⴰⵡⵙⵙⴰⵏ ⵙ ⵟⵟⴰⵕⴰⵜ, ⴰⵙⵍⵀⴰⵎ ⴷ ⵡⴰⴷⵓⵔ ⵏ ⵜⵎⵖⴰⵔⵉⵏ ⴷ ⵉⵔⴳⴰⵣⵏ, ⵉⵜⵜⵢⴰⵡⵙⵙⴰⵏ ⵓⵍⴰ ⵙ ⵜⴰⵥⴰⵢⵜ ⵏⵙ; ⴰⵃⵡⴰⵛ ⵉⵜⵜⵢⴰⵡⵙⵙⴰⵏ ⵙ ⵉⵔⵉⵔ ⵏ ⵓⴼⵓⵙ, ⵜⴰⵣⵣⵍⴰ ⵏⵙ ⴷ ⵜⴰⵍⵖⴰ ⵏ ⵉⵎⵃⵡⴰⵛⵏ ⴷⴰ ⵉⵜⵜⴳⴳⴰⵏ ⴳ ⵎⴰ ⵉⴳⴳⵓⵜⵏ ⵜⴰⵥⴰⵢⵕⵜ ⴷ ⴰⵔ ⴳⵉⵙ ⵜⵜⵎⵎⵔⴽⴰⵙⵏ ⵉⵔⴳⴰⵣⵏ ⵙ ⵜⵎⵖⴰⵔⵉⵏ; ⵍⵄⴰⵎⵎⵜ ⵜⴽⴽⴰ ⵉⵏⴳⵔⴰⵜⵙⵏ, ⵜⵜⵢⴰⵡⵙⵙⴰⵏ ⵙ ⵡⴰⴷⵓⵔ ⵏ ⵉⵔⴳⴰⵣⵏ, ⵟⵟⴰⵕⴰⵜ ⴷ ⵜⴰⵥⴰⵢⵜ ⵣⵓⵏ ⴰⵃⵉⴷⵓⵙ, ⵜⵜⵢⴰⵡⵙⵙⴰⵏ ⵓⵍⴰ ⵙ ⵜⵎⵍⵙⴰ, ⵏⵏⴹⵎ ⴷ ⴳⴰⵏⴳⴰ ⵣⵓⵏ ⴰⵃⵡⴰⵛ. ⵏⵥⴹⴰⵕ ⴰⴷ ⵏⵉⵏⵉ ⵎⴰⵙ ⴰⵃⵉⴷⵓⵙ ⵉⴳⴰ ⵜⴰⵥⵓⵕⵉ ⵏ ⵥⴰⵢⵢⴰⵏ ⵏⵖ ⵏ ⵡⴰⵟⵍⴰⵚ ⵎⵥⵥⵉⵏ, ⴰⵃⵡⴰⵛ ⵉⴳⴰ ⵜⴰⵥⵓⵕⵉ ⵏ ⵙⵓⵙ, ⵍⵄⴰⵎⵎⵜ ⵜⴳⴰ ⵜⴰⵥⵓⵕⵉ ⵏ ⵉⵏⴼⴹⵡⴰⴽ, ⴰⵟⵍⴰⵚ ⵎⵇⵇⵓⵕⵏ.[10][27] [28]

  • Kṛaḍt talɣiwin n tẓuṛi : Aḥidus, Lɛammt d uḥwac
  • Aḥidus (Taẓuṛi n tallunt, ar gis ttmmrkasn irgazn s tmɣarin)
    Aḥidus (Taẓuṛi n tallunt, ar gis ttmmrkasn irgazn s tmɣarin)
  • Lɛammt (Taẓuṛi g ittmmrkas ufus d tallunt d Ganga, timɣarin ur ad ttmmrkasnt d irgazn d ar ttggant ɣar yat ar kṛaḍt)
    Lɛammt (Taẓuṛi g ittmmrkas ufus d tallunt d Ganga, timɣarin ur ad ttmmrkasnt d irgazn d ar ttggant ɣar yat ar kṛaḍt)
  • Aḥwac (Taẓuṛi n ufus, Ganga)
    Aḥwac (Taẓuṛi n ufus, Ganga)

ⵉⵙⴰⵖⵓⵍⵏ

[ⵙⵏⴼⵍ | ⵙⵏⴼⵍ ⴰⵙⴰⴳⵎ]
  • ⵜⴰⵎⵙⵎⵓⵏⵜ ⵏ "ⵜⵉⵣⵉ ⵏ ⵍⵅⵉⵔ", ⴰⴹⵡⵡⴰⵕ ⵏ ⵉⵅⵔⵔⴰⵣⵏ, ⵙⵓⵔⵏ, ⵜⴰⵏⴰⵔⴰ ⵏ ⴼⵟⵡⴰⴽⴰ
  • ⵜⴰⵎⵙⵎⵓⵏⵜ ⵏ "ⴰⵃⵡⴰⵛ ⵉⵃⵓⴷⴷⵊⵉⵏ", ⵜⴰⴳⵔⴰⵡⵜ ⵏ ⵜⵉⴷⵉⵍⵉ-ⴼⵟⵡⴰⴽⴰ, ⵜⴰⵏⴰⵔⴰ ⵏ ⴼⵟⵡⴰⴽⴰ
  • ⵜⴰⵎⵙⵎⵓⵏⵜ ⵏ "ⵉⴳⵯⵏⴰⵏ ⴷⵎⵏⴰⵜ",ⴷⵎⵏⴰⵜ
  1. ^ ⵜⴰⴳⵓⵔⵉ ⵉⵜⵜⵢⴰⵡⵙⵙⵎⵔⴰⵙⵏ ⴳ ⵜⵇⵇⴱⵉⵍⵜ ⵏ ⵉⵏⴼⴹⵡⴰⴽ ⵣⵓⵏ ⴷ ⵉⵙⵎ ⵏ ⵢⴰⵏ ⵡⴰⵏⴰⵡ ⵏ ⵜⵥⵓⵕⵉ
  2. ^ (ⵎⵣⵖ) برنامج أنثروبولوجيا: قبيلة فطواكة، سعيد باجي وعبد الهادي زيدان
  3. ^ a b c ⵙⴳ ⵎⵙⵎⵓⵏ ⴰⵡⴰⵍ ⴰⵎⴰⵜⴰⵢ ⴰⵙⵏⵎⴰⵍⴰⵢ ⵏ ⵜⵎⴰⵣⵉⵖⵜ (ⵎⵡⵎⵙⵎ) ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ (ⵙⴳⵙⵎ) :https://web.archive.org/web/20210103122850/https://tal.ircam.ma/dglai/lexieam.php
  4. ^ https://web.archive.org/web/20230117214217/https://amawal.net/a%E1%B9%9Bka%E1%B8%8D
  5. ^ ⵉⵙⵎ ⴰⴷ ⴰⵔ ⵜ ⵉⵙⵙⵎⵔⴰⵙ ⵓⵎⵔⵣⵓ ⵏⵖ ⴰⵎⵉⵏⴰⴳ ⵄⴱⴷⵍⵀⴰⴷⵉ ⵣⵉⴷⴰⵏ (ⵉⴳⴰ ⵉⵡⵉⵙ ⵏ ⵜⵇⵇⴱⵉⵍⵜ ⵏ ⵉⵏⴼⴹⵡⴰⴽ)
  6. ^ a b ⵜⵓⴳⴳⴰ ⵏ ⵎⵉⴷⴷⵏ ⵏ ⵜⴳⵔⴰⵡⵜ ⵏ ⵓⴱⴰⴷⵓ, ⴰⴹⵡⵡⴰⵕ ⵏ ⵉⵎⵣⵉⵍⵏ.
  7. ^ a b ⵜⵓⴳⴳⴰ ⵏ ⵎⵉⴷⴷⵏ ⴷⴰ ⵉⵜⵜⵓⵔⴰⵔⵏ ⵍⵄⴰⵎⵎⵜ ⴳ ⵜⴳⵔⴰⵡⵜ ⵏ ⴰⵢⵜ ⵎⵃⵎⵎⴷ ⴷ ⵙⵉⴷⵉ ⵢⴰⵄⵇⵓⴱ, ⵉⵏⴼⴹⵡⴰⴽ.
  8. ^ ⵜⵓⴳⴳⴰ ⵏ ⵉⵔⴳⴰⵣⵏ ⵉⵎⵇⵇⵓⵕⵏ ⵙⴳ ⵜⵎⴰⵣⵉⵔⵜ ⵏ ⴰⵢⵜ ⴼⵍⴰⵍⴰⴹ, ⵜⴰⵇⵇⴱⵉⵍⵜ ⵏ ⵉⵏⴼⴹⵡⴰⴽ, 2023
  9. ^ a b c d e ⵜⵓⴳⴳⴰ ⵏ ⵍⵄⴰⵎⵎⵜ ⵏ ⵓⵙⵓⵏ ⵏ ⵉⵅⵔⵔⴰⵏ, ⵙⵓⵔⵏ, ⴰⵢⵜ ⴼⵍⴰⵍⴰⴹ, ⵉⵏⴼⴹⵡⴰⴽ, ⴰⵟⵍⴰⵚ ⵎⵇⵇⵓⵕⵏ.
  10. ^ a b أحواش:الرقص والغناء الجماعي بسوس،عادات وتقاليد، أحمد بوزيد الكنساني، 1996
  11. ^ a b c Adlis n tarix Ibn Xaldun (ابن خلدون, كتاب تاريخ ابن خلدون, الجزء 6، صفحة 354)
  12. ^ a b المجتمع المغربي في القرن 19 ( اينولتان 1850-1912 ), أحمد التوفيق, منشورات كلية الآداب والعلوم الانسانية بالرباط, رسائل و أطروحات رقم 63, الطبعة : الثالثة - سنة 2011م, صفحة رقم : 58 ↑
  13. ^ موسوعة قبائل المغرب : قبيلة فطواكة http://tribus-maroc.blogspot.com/2011/10/blog-post_1426.html
  14. ^ المجتمع المغربي في القرن 19 ( اينولتان 1850-1912 ), أحمد التوفيق, منشورات كلية الآداب والعلوم الانسانية بالرباط, رسائل و أطروحات رقم 63, الطبعة : الثالثة - سنة 2011م, صفحة رقم : 54
  15. ^ Ḥasan Lwazzan, adlis : وصف افريقيا
  16. ^ a b (ar) http://www.azilal-online.com/?p=28830
  17. ^ (fr) Les chants de la Tassaout (poèmes et chants de Mririda n'Ait Attik, traduit du Tachelhit par René Euloge), René Euloge
  18. ^ (ar) http://tribus-maroc.blogspot.com/2014/11/blog-post.html
  19. ^ a b (ar) كتاب وصف افريقيا، الجزء الأول، الحسن الوزان، ترجمة محمد حجي و محمد الأخضر، الطبعة الثانية 1983
  20. ^ Mutations sociales dans la Haut Atlas. Les Ghoujdama, Ali Amahan, 2017
  21. ^ Tugga n middn sg tqqbilt n iɣjdamn
  22. ^ Tugga n Muḥmmad Amzil, iga argaz imqquṛn, ig iwis n tqqbilt n iɣjdamn, aḍwwaṛ n imziln.
  23. ^ (mzɣ) https://web.archive.org/web/20230113185446/https://amawal.net/akarbay
  24. ^ ⵜⵓⴳⴳⴰ ⵏ ⵍⴰⵎⵉⵏ ⵏ ⵜⵔⴰⴱⴱⵓⵜ ⵏ ⵉⵅⵔⵔⴰⵣⵏ, ⵙⵓⵔⵏ, ⴰⵢⵜ ⴼⵍⴰⵍⴰⴹ, ⵉⵏⴼⴹⵡⴰⴽ, 2023
  25. ^ https://web.archive.org/web/20230120222122/https://amawal.net/tamguri
  26. ^ https://web.archive.org/web/20230120222123/https://amawal.net/ssemres
  27. ^ رقصة أحيدوس: بين المحلية ودينامية التحول، فاطمة بوخريص، منشورات المعهد الملكي للثقافة الأمازيغية، 2010
  28. ^ إماريرن: مشاهير شعراء احواش في القرن العشرين، أحمد عصيد، منشورات المعهد الملكي للثقافة الأمازيغية، 2011
ⵜⴰⵥⵓⵕⵉ ⵜⴰⵎⴰⵣⵉⵖⵜ ⴳ ⵍⵎⵖⵔⵉⴱ
ⴰⵥⴰⵡⴰⵏ ⴷ ⵓⵎⴰⵔⴳ ⵜⴰⵕⵕⵡⴰⵢⵙⵉⵜ ⵍⵃⴰⵊⵊ ⴱⵍⵄⵉⴷ ♦ ⴱⵓⴱⴽⵔ ⴰⵏⵛⵛⴰⴷ ♦ ⵎⵓⵃⵎⵎⴰⴷ ⴱⵓⴷⵔⴰⵄ ♦ ⵄⵓⵎⴰⵕ ⵡⴰⵀⵔⵓⵛ ♦ ⵎⵓⵃⵎⵎⴰⴷ ⴰⵍⴱⵏⵙⵉⵔ ♦ ⵎⵓⵃⵎⵎⴰⴷ ⴰⴱⴰⵄⵎⵕⴰⵏ ♦ ⵃⴰⵙⴰⵏ ⴰⵔⵙⵎⵓⴽ ♦ ⵃⵎⴰⴷ ⴰⵎⵏⵜⴰⴳ ♦ ⵙⴰⵄⵉⴷ ⴰⵛⵜⵓⴽ
ⵜⴰⵎⴰⵡⴰⵢⵜ ⵃⴰⴷⴷⴰ ⵓ ⵄⴽⴽⵉ ♦ ⵉⵟⵟⵓ ⵜⴰⵎⵀⴰⵡⵛⵜ ♦ ⵏⵣⵀⴰ ⴰⵟⵍⴰⵙ ♦ ⵃⴰⵎⴰⵎⴰ ⴰⵟⵍⴰⵙ ♦ ⵙⴰⵄⵉⴷⴰ ⵜⵉⵜⵔⵉⵜ ♦ ⴼⴰⵟⵉⵎⴰ ⵜⴰⵍⴳⴰⴷⵉⵜ ♦ ⴰⵔⵉⵏⴰⵙ ⴰⵟⵍⴰⵙ
ⵜⴰⵥⵏⵥⴰⵕⵜ ⵉⵥⵏⵥⴰⵕⵏ ♦ ⵉⵥⵏⵥⴰⵕⵏ ⵄⴱⴷ ⵍⵀⴰⴷⵉ ⵛⵛⴰⵎⵅ
ⴰⵕⵓⴽ ⵢⵓⴱⴰ ⵏ ⵜⵓⵊⵊⴰ
ⴰⴼⵉⵣⵢⵓⵏ ⵄⵍⵉ ⴼⴰⵢⵇ ♦ ⴼⵓⵍⴰⵏ ⴱⵓⵃⵙⵉⵏ
ⴰⵥⴰⵡⴰⵏ ⴰⵎⵙⵖⵓⵏ ⵎⴱⴰⵕⴽ ⵓ ⵍⵄⵔⴱⵉ ♦ ⵄⵎⵎⵓⵔⵉ ⵎⴱⴰⵕⴽ ♦ ⵅⴰⵍⵉⴷ ⵉⵣⵔⵉ ♦ ⵡⴰⵍⵉⴷ ⵎⵉⵎⵓⵏ
ⵜⴰⴳⵔⵓⴱⴱⵉⵜ ⴰⵊⵢⴰⵍ ⵙⵓⵙ ♦ ⴰⵢⵜ ⵍⴰⵎⴰⵏ
ⵉⵎⴰⵙⵙⵏ ⵔⵔⵉⴱⴰⴱ ♦ ⵍⵓⵟⴰⵕ ♦ ⴰⴱⴰⵏⵊⵓ ♦ ⴳⴰⵏⴳⴰ ♦ ⴰⵍⵍⵓⵏ ♦ ⴰⴷⵊⵓⵏ ♦ ⴰⵥⵎⵎⴰⵕ ⴱⵓⵡⴰⵛⵛⴰⵏ ♦ ⴰⵍⵍⵓⵏ ♦ ⵜⴰⵎⵊⴰ
ⵉⵙⴰⴼⴼⵏ ⵏ ⵓⵎⴰⵔⴳ ⴰⵃⵓⵣⵉ ♦ ⴱⵓⵙⴰⵍⵎ ♦ ⵜⴰⵛⵜⵓⴽⵜ
ⵙⵙⵉⵏⵉⵎⴰ ⵜⴰⵎⴰⵣⵉⵖⵜ ⵉⵎⵙⵙⵓⴼⴰⵖ ⵃⵎⴰⴷ ⴱⴰⴷⴷⵓⵊ ♦ ⵄⴱⴷ ⵍⵄⵣⵉⵣ ⵓ ⵙⵙⴰⵢⵃ
ⵉⵏⵎⵓⴳⴳⴰⵔⵏ ⵉⵙⵏⵉ ⵏ ⵡⵓⵔⵖ (ⴰⴳⴰⴷⵉⵔ) ♦ ⴰⵏⵎⵓⴳⴳⴰⵔ ⴰⵏⴰⵎⵓⵔ ⵏ ⵓⴼⵉⵍⵎ ⴰⵎⴰⵣⵉⵖ (ⵡⴰⵔⵣⴰⵣⴰⵜ) ♦ ⴰⵏⵎⵓⴳⴳⴰⵔ ⵏ ⵍⵃⵓⵙⵉⵎⴰ (ⵍⵃⵓⵙⵉⵎⴰ) ♦ ⴰⵏⵎⵓⴳⴳⴰⵔ ⴰⴳⵔⴰⴽⴰⵍ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ (ⵜⵉⵏ ⵉⴳⴳⵉ) ♦ ⴰⵏⵎⵓⴳⴳⴰⵔ ⵏ ⵓⵎⵣⵢⴰⵏ ⵏ ⵓⵎⵣⴳⵓⵏ ⴰⵎⴰⵣⵉⵖ (ⵏⵏⴰⴹⵓⵕ)
ⵉⵙⵎⴷⴰⵢⵏ ⵍⵃⵓⵙⴰⵢⵏ ⴱⵔⴷⴰⵡⵣ ♦ ⵄⴱⴷ ⵍⵍⵟⵉⴼ ⵄⴰⵟⵉⴼ ♦ ⵎⵓⵃⵎⵎⴰⴷ ⴰⴱⴰⵄⵎⵕⴰⵏ ♦ ⵣⵣⴰⵀⵢⴰ ⵣⵣⴰⵀⵉⵔⵉ
ⴷⵔⴰⵎⴰ ...
ⵉⵎⵙⴷⴷⵉⵜⵏ ⴱⴰⴱⴰ ⵄⵍⵉ ♦ ⴰⴳⵍⵎⴰⵎ
ⴰⴷⵔⴰⵣ ⴰⵃⵉⴷⵓⵙ ⵜⴰⵃⵉⴷⵓⵙⵜ
ⵍⵄⴰⵎⵎⵜ ⵍⵄⴰⵎⵎⵜ ⵏ ⵉⵖⵊⴷⴰⵎⵏ ♦ ⵍⵄⴰⵎⵎⵜ ⵏ ⵉⵎⴼⴹⵡⴰⴽ
ⴰⵃⵡⴰⵛ ⴰⵃⵡⴰⵛ ⵏ ⵜⴰⵙⴽⵉⵡⵉⵏ
ⴰⴼⵕⵕⵊ ⴱⵓⵢⵍⵎⴰⵡⵏ ♦ ⵉⵎⵄⵛⴰⵕ ♦ ⵀⵔⵔⵎⴰ ♦ ⵜⴰⴳⵔⴰⵔⵜ ♦ ⴰⵢⵜ ⵙⵉⴷⵉ ⵃⵎⴰⴷ ⵓ ⵎⵓⵙⴰ ♦ ⵜⴰⵇⵛⵛⴰⵛⵜ ♦ ⵉⵎⴹⵉⵛⵏ
ⵜⴰⵎⴷⵢⴰⵣⵜ ⴰⵙⴰⵢⵙ ⵄⴰⴱⴷ ⵓ ⵟⴰⵟⴰ ♦ ⵍⵃⴰⵊⵊ ⵍⵃⵙⵏ ⴰⵊⵎⵎⴰⵄ ♦ ⴰⵥⵓⵍⵉⴹ
ⵉⵣⵍⴰⵏ ...
ⴰⵏⵄⵉⴱⴰⵕ ...
ⵜⴰⵥⵓⵕⵉ       ⵜⴰⴷⵍⵙⴰ       ⵉⵎⴰⵣⵉⵖⵏ      

ⵜⴻⵜⵜⵢⴰⵙⴰⵢ ⴷ ⵙⴳ https://zgh.wikipedia.org/w/index.php?title=ⵍⵄⴰⵎⵎⵜ&oldid=101750