ⵉⵍⴱⵏⵙⵉⵔⵏ
ⵜⴰⵇⴱⵉⵍⵜ ⵏ ⵉⵍⴱⵏⵙⵉⵔⵏ, ⵉⵍⵍⴰⵏ ⴳ ⵓⴷⵖⴰⵔ ⵉⴳⴰⵏ ⵓⵍ ⵏ ⵓⴷⵔⴰⵔ ⵏ ⵡⴰⵟⵍⴰⵙ ⵎⵇⵇⵓⵔⵏ ⵜⵙⴳⴰ ⵏ ⵜⴰⴳⵓⵜ, ⵉⵡⵓⵜⵜⴰ ⵏⵏⵙ ⴳⵍⵉⵏ ⵜⵜ ⵣⵖ ⵜⵜⵎⵉ ⵏ ⵉⵡⵓⵜⵜⴰ ⵏ ⵜⵇⴱⵉⵍⵜ ⵏ ⵉⴷⴰⵡ ⵥⵉⴽⵉ ⴷⴰⵔ ⵡⴰⵙⵉⴼ ⵏ ⵉⵙⵙⵏ ⵙ ⵉⴼⴼⵓⵙ ⴰⵔ ⵜⵉⵣⵉ ⵓⵎⴰⵄⵛⵓ ⵙ ⵉⵙⵉⵍ ⵏ ⵓⵙⵔⵔⴰⵜⵓ ⴰⵔ ⵉⵡⵓⵜⵜⴰ ⵏ ⵜⵇⴱⵉⵍⵜ ⵏ ⵡⴰⵏⴼⵉⴼⵏ ⵙ ⵉⵥⵥⵍⵎⴹ, ⴷ ⵣⵖ ⵉⵡⵓⵜⵜⴰ ⵏ ⵉⴷⴰⵡ ⵎⵃⵎⵓⴷ ⵙ ⵉⵎⵉⵏⴳ ⴰⵔ ⵉⵇⴱⵉⵍⵏ ⵏ ⵉⴷⴰ ⵓⴱⵓⵣⵢⴰ ⴷ ⴰⵢⵜ ⵅⵟⵟⴰⴱ ⴷ ⵉⵏⵜⵓⴳⴳⴰ ⵙ ⵜⴰⴳⵓⵜ. ⵉⵍⴱⵏⵙⵉⵔⵏ ⴳⴰⵏ ⴰⵙⵙⴰⵖ ⵏ ⵜⵇⴱⵍⵉⵜ ⵙ ⵜⵎⴰⵣⵉⵖⵜ, ⴷ ⵡⴰⵏⵏⴰ ⵣⵖ ⴳⵉⵙ ⵉⴳⴰⵏ ⴰⵔ ⵉⵜⵜ ⵉⵍⵉ ⵉⵙⵎ ⵏ ⵓⵍⴱⵏⵙⵉⵔ, ⵜⵜⴰⵡⵙⵙⴰⵏ ⵜⵎⴰⵣⵉⵔⵜ ⵏ ⵉⵍⴱⵏⵙⵉⵔⵏ ⵎⴰⵙ ⵜⴳⴰ ⴰⵖⴰⵔⴰⵙ ⵏ ⵉⴽⴰⴱⴰⵕⵏ ⵏ ⵜⵙⴱⴱⴰⴱⵜ ⵍⵍⵉ ⵉⵣⴷⵉⵏ ⵏⴳⵔ ⵙⵓⵙ ⴷ ⵍⵃⵓⵣ, ⵉⴳ ⵓⴷⵡⵡⴰⵕ ⵏ ⵓⴳⵍⴰⴳⴰⵍ ⵍⵍⵉ ⵉⴳⴰⵏ ⴰⴷⵖⴰⵔ ⴰⵣⴰⵢⴽⵓ ⵖ ⵓⵎⵣⵔⵓⵢ, ⵉⵍⵍⴰ ⵓⴷⵡⵡⴰⵕ ⴰⴷ ⴼ ⵉⵥⵥⵍⵎⴹ ⵏ ⵜⵎⵏⴰⴹⵜ ⵏ ⵡⴰⵙⵉⴼ ⵏ ⵉⵙⵙⵏ, ⵉⵎⵍⴰⵍⵏ ⵉ ⵜⴰⵙⴽⴰⵎⵜ ⵣⵖ ⵓⵖⴰⵔⴰⵙ ⵏ ⵜⵉⵣⵉ ⵓⵎⴰⵄⵛⵓ ⴳ ⵜⵇⴱⵉⵍⵜ ⵏ ⵉⵍⴱⵏⵙⵉⵔⵏ, ⵉⵍⵉ ⵓⵍⴰ ⵓⴳⴰⴷⵉⵔ ⵏ ⵡⵓⵔⵖ, ⵍⵍⵉ ⵉⴳⴰⵏ ⵉⵅⵯⵔⴱⴰⵏ ⵏ ⵓⴳⴰⴷⵉⵔ ⵏ ⵉⵖⵔⵎ ⵏ ⵓⵔⵖ ⵍⵍⵉ ⵉⵜⵔⵙⵏ ⴼ ⵢⴰⵜ ⵜⴰⵡⵔⵉⵔⵜ ⵉⵍⵍⴰⵏ ⵉⵥⵥⵍⵎⴹ ⵏ ⵉⵍⴱⵏⵙⵉⵔⵏ ⵣⵖ ⵜⵙⴳⴰ ⵏ ⵜⵉⵣⵉ ⵓⵎⴰⵄⵛⵓ.
ⵉⴷⵖⴰⵔⵏ ⴰⴷ ⵍⴰⵏ ⵜⴰⵣⴷⴰⵢⵜ ⴷ ⵓⵎⵣⵔⵓⵢ ⵏ ⵜⵎⴰⵣⵉⵔⵜ ⴰⴷ, ⵎⵙⴰⵔⵏ ⴳⵉⵙ ⴽⵉⴳⴰⵏ ⵏ ⵉⵎⵏⵖⴰⵏ ⵉⵣⵔⵉⵏ ⴳ ⵓⵎⵣⵔⵓⵢ ⵏⴳⵔ ⵉⵍⴱⵏⵙⵉⵔⵏ ⴷ ⵡⴰⵏⴼⵉⴼⵏ ⴷ ⴰⵢⵜ ⵓⵏⵥⵓⴹⵜ ⴷ ⵉⵙⴱⴰⵄⵉⵏ ⵖ ⴷⴷⵓ ⵏ ⵜⵏⴱⴰⴹⵜ ⵏ ⵓⴳⵍⵍⵉⴷ ⴱⵓ ⵄⴱⴷ ⵍⵍⴰⵀ ⵎⵓⵃⵎⵎⴰⴷ ⵍⵇⴰⵢⵎ ⴱ ⵍⵍⴰⵀ ⴰⵙⵄⴷⵉ, ⵣⵖ ⵢⴰⵜ ⵜⵙⴳⴰ, ⴷ ⵢⴰⵜ ⵜⵙⴳⴰ ⵢⴰⴹⵏ ⵏⴳⵔ ⴰⵙⵏ ⴷ ⴱⵔⵜⵇⵇⵉⵣ, ⵍⵍⵉ ⵉⵔⴰⵏ ⴰⴷ ⴽⴽⵓⵙⵓⵏ ⵍⵎⵕⵕⵓⴽ, ⵙⴽⵔⵏ ⴰⴱⵔⵉⴷ ⵏⵏⵙⵏ ⵣⵖ ⵓⴷⵔⴰⵔ ⵏ ⵡⴰⵟⵍⴰⵙ, ⵉⴳ ⵓⴷⵡⵡⴰⵕ ⵏ ⵓⴳⵍⴰⴳⴰⵍ ⴰⴼⵍⵍⴰ ⵏ ⵡⴰⵙⵉⴼ ⵏ ⵉⵙⵙⵏ ⴰⴷⵖⴰⵔ ⴳ ⵉⵙⵔⵙ ⵉⵎⵏⴰⵢⵏ ⵏⵏⵙ ⵏ ⵉⵎⵏⵖⴰⵏ, ⵉⵍⵉⵏ ⴷⵉⵙ ⵜⵉⵣⵉ ⴰⵏⵏ ⵉⴳⵯⵔⵔⴰⵎⵏ ⵉⵙⴱⴰⵄⵉⵏ ⵃⵎⴰ ⴰⴷ ⵎⵎⵓⵍⵉⵏ ⴱⵔⵜⵇⵇⵉⵣ ⵖ ⴳⵔ ⵉⴷⵔⴰⵔⵏ ⴰⵏⵏ ⴳ ⵓⵙⴳⴳⵯⴰⵙ ⵏ 1516 ⵜ, ⵖ ⴷⴷⵓ ⵜⵏⴱⴰⴹⵜ ⵏ ⵉⵙⵄⴷⵉⵏ, ⵉⴽⴽⴰ ⵉⵎⵏⵖⵉ ⵏⴳⵔ ⴰⵙⵏ ⴷ ⴱⵔⵜⵇⵇⵉⵣ ⴽⵉⴳⴰⵏ ⵏ ⵉⵙⴳⴳⵯⴰⵙⵏ ⴰⵔ 1526 ⵜ, ⵉⵎⵎⵜ ⵖ ⵓⴳⵍⴰⴳⴰⵍ ⴰⴽⵓⴷ ⴰⵏⵏ ⵄⴱⴷ ⵍⵎⴰⵍⴽ ⴰⵙⴱⴰⵄⵉ.
ⵜⵉⵎⴰⵜⴰⵔⵉⵏ ⵣⵖ ⵓⵎⵣⵔⵓⵢ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵟⵜⵜⴰⵡⴱⴷⴰⵔ ⵜⵇⴱⵉⵍⵜ ⵏ ⵉⵍⴱⵏⵙⵉⵔⵏ, ⴳ ⵓⴷⵍⵉⵙ ⵏ (وصف أفريقيا), ⵏ ⵓⵏⵎⵎⵓⴷⴷⵓ ⵉⵜⵜⴰⵡⵙⵙⴰⵏⵏ (ⵍⵃⴰⵙⴰⵏ ⵍⵡⵣⵣⴰⵏ), ⵍⵍⵉ ⵎⵉ ⴳⴰⵏ ⴰⵙⵙⴰⵖ ⵏ (ⵍⵢⵓⵏ ⵏ ⵜⴼⵔⵉⵇⵜ) ⵍⵍⵉⵖ ⵜⵜ ⵉⵏⵏ ⵉⴽⴽⴰ ⵖ ⵓⵙⴳⴳⵯⴰⵙ ⵏ 920 ⵀ / 1515 ⵜ, ⵉⵏⵏⴰ :
« ⵉⴳⴰ ⵓⴷⵔⴰⵔ ⴰⴷ ⴰⴳⵣⵣⵓⵎ ⵣⵖ ⵓⴷⵔⴰⵔ ⵏ ⵡⴰⵟⵍⴰⵙ, ⵍⵍⵉ ⴷ ⵉⵙⵙⴼⴰⵍⵏ ⵣⵖ ⵓⴷⵔⴰⵔ ⵏ (ⵉⴷⴰ ⵓⵄⴰⵇⵍ) ⵉⵖⵣⵣⵉⴼ ⵙ ⵉⵡⴰⵍⴰ ⵉⵎⵉⵏⴳ ⵉⴱⴱⵉ 50 ⵏ ⵎⵉⵍ ⴰⵔ ⴰⴷⵔⴰⵔ ⵏ ⵡⴰⵏⴼⵉⴼⵏ ⵜⵙⴳⴰ ⵏ ⵎⵕⵕⴰⴽⵛ, ⵉⴱⴹⵓ ⵏⴳⵔ ⵓⵙⴳⴰ ⵉⴳⴳⵓⵜⵏ ⵣⵖ ⵉⵃⴰⵃⴰⵏ ⴷ ⵙⵓⵙ. ⵖ ⵢⴰⵜ ⵜⵙⴳⴰ ⵏ ⵓⴷⵔⴰⵔ ⴰⴷ, ⵉⵍⵍⴰ ⵓⴱⵔⵉⴷ ⵜⵜ ⴽⴽⴰⵏ ⵎⵉⴷⴷⵏ ⵉⵖ ⵔⴰⵏ ⵙⵓⵙ ( ⵜⵍⵍⴰ ⵜⵎⴰⵣⵉⵔⵜ ⵏ ⵡⴰⵏⴼⵉⴼⵏ ⵖ ⵉⵍⴰⴷ ⵉⵥⵥⵍⵎⴹ ⵏ ⵉⵍⴱⵏⵙⵉⵔⵏ, ⵏⴳⵔ ⴰⵙⵉⴼ ⵏ ⵓⵎⵊⵏⵉⴼ ⵙ ⵜⴰⴳⵓⵜ ⴷ ⵡⴰⵙⵉⴼ ⵏ ⵉⵎⵉ ⵏ ⵜⴰⵏⵓⵜ ⵙ ⵉⵎⵉⵏⴳ.). ⴰⴷⵔⴰⵔ ⴰⴷ ⵢⵓⵎⴰ ⵙ ⵓⴼⴳⴰⵏ, ⵎⵉⴷⴷⵏ ⴷⵓⵙⵏⵉⵏ ⴷⴰⵔⵙⵏ ⴽⵉⴳⴰⵏ ⵏ ⵉⵙⴰⵏ ⴷ ⵜⵓⴳⵜⵜ ⵏ ⵉⵎⴰⵙⵙⵏ ⵙⴰ ⵜⵜⵎⴰⵖⵏ ⵏⴳⵔ ⴰⵙⵏ ⴷ ⵉⵎⵣⵣⴰ (الأعراب) ⵃⵎⴰ ⴰⴷ ⵜⵜ ⵓⵔ ⴰⵊⵊⵏ ⴰⴷ ⴽⵛⵎⵏ ⵙ ⵜⵎⴰⵣⵉⵔⵜ ⵏⵏⵙⵏ, ⵓⵔ ⴳⵉⵙ ⵍⵍⴰⵏⵜ ⵜⵖⵔⵎⴰⵡⵉⵏ ⴷ ⵉⵖⵔⵎⴰⵏ ⴷ ⵜⴳⵯⵎⵎⴰ ⵉⵥⵍⵉⵏ, ⵍⵍⴰⵏⵜ ⴳⵉⵙ ⴽⵉⴳⴰⵏ ⵏ ⵉⴷⵓⵕⴰⵏ, ⵉⵍⵉⵏ ⵏⴳⵔ ⵎⵉⴷⴷⵏ ⴰⴷ ⵉⴳⵯⵔⵔⴰⵎⵏ ⴳⴳⵓⵜⵏ, ⵙⵡⴰⵍⴰⵏ ⴰⵙⵏ ⵎⵉⴷⴷⵏ ⵜⴰⵏⴱⴰⴹⵜ. ⴷ ⵉⴽⴰⵍⵉⵡⵏ ⵏⵏⵙⵏ ⴼⵓⵍⴽⵉⵏ ⵉ ⵜⵎⵥⵉⵏ ⴷ ⵡⴰⴷⴷⴰⴳⵏ, ⵉⵍⵉⵏ ⴽⵉⴳⴰⵏ ⵏ ⵉⴼⵔⴰⵏ ⴷ ⵉⵖⴱⵓⵍⴰ ⵏ ⵡⴰⵎⴰⵏ ⴳⴰⵏ ⵉⵏⵏ ⵉⵙⴰⴼⴼⵏ ⵍⵍⵉ ⵏⵏ ⵉⴼⴼⵉⵏ ⵖ ⵡⴰⵙⵉⴼ ⵏ ⵛⵉⵛⴰⵡⴰ.
ⴰⵔ ⵍⵙⵙⴰⵏ ⵎⵉⴷⴷⵏ ⴰⴷ ⵜⵉⵎⵍⵙⴰ ⵖⵓⵙⵏⵉⵏ, ⴰⵔ ⴷ ⵙⵙⵓⴼⵓⵖⵏ ⵎⵉⴷⴷⵏ ⴰⴷ ⵣⵖ ⵡⴰⴽⴰⵍ ⵏⵏⵙⵏ, ⴽⵉⴳⴰⵏ ⵏ ⵓⵣⵣⴰⵍ, ⴰⵔ ⵜ ⵣⵣⵏⵣⴰⵏ ⵙⵎⵓⵏⵏ ⵏⵇⵇⵯⵕⵜ, ⵉⵍⵉⵏ ⴳⵔ ⵎⵉⴷⴷⵏ ⴰⴷ ⴽⵉⴳⴰⵏ ⵏ ⵓⴷⴰⵢⵏ ⵉⵜⵜⵙⵓⴷⵓⵏ ⵉⵙⴰⵏ ⵏⵏⵙⵏ, ⴰⵙⵉⵏ ⵜⵓⵣⵣⴰⵍⵜ ⵉⴼⵔⵙⵏ, ⵃⴰⵎⴰⵏ ⴼ ⵎⵉⴷⴷⵏ ⵏⵏⵙⵏ ⴰⵢⵜ ⵓⴷⵔⴰⵔ, ⵓⴷⴰⵢⵏ ⴰⴷ ⴳⴰⵏⵜⵏ ⴽⵓⵍⵍⵓ ⵓⴷⴰⵢⵏ ⵢⴰⴹⵏ ⵏ ⵜⴼⵔⵉⵇⵜ, ⴷ ⵓⴷⴰⵢⵏ ⵍⵍⵉ ⵎⵉ ⵉⴼⵔⵖ ⵓⵙⴳⴷ ⵏⵏⵙⵏ, ⴳⴰⵏ ⴰⵙⵏ ⵙ ⵡⴰⵙⵙⴰⵖ (ⴽⵕⴰⵢⵎ).
ⵉⵎⵖⵉ ⵖ ⵓⴷⵔⴰⵔ ⴰⴷ ⵡⴰⴷⴷⴰⴳ ⵏ ⵜⴰⵙⴰⴼⵜ ⴷ ⵡⴰⵣⴰⵔ ⴷ ⵉⴽⵉⴹⵓ ⴷ ⵡⴰⴷⴷⴰⴳⵏ ⵏ ⵡⴰⵇⵇⴰⵢⵏ ⵜⵜⵙⵡⵉⴽ, ⴰⵢⵜ ⵜⵎⴰⵣⵉⵔⵜ ⴰⴷ ⴰⵔ ⵙⵎⵎⵔⵡⴰⵢⵏ ⵍⵍⵓⵣ ⴷ ⵍⵀⵕⵊⴰⵏ ⵏ ⵓⵣⵎⵎⵓⵔ, ⵙⴼⴼⴰⵖⵏ ⴷ ⵣⵖ ⴳⵉⵙ ⵣⵣⵉⵜ ⴰⵔ ⵜⵜ ⵛⵜⵜⴰⵏ ⴷ ⴰⵔ ⵙⵉⵙ ⵜⵜ ⵙⵓⴼⵓⵏ.
ⵥⵔⵉⵖ ⵖ ⵓⵖⴰⵔⴰⵙ ⵏ ⵓⴷⵔⴰⵔ ⴰⴷ ⵍⵍⵉⵖ ⴷ ⵉⵡⵔⵔⵉⵖ ⵣⵖ ⵙⵓⵙ, ⴳⵏ ⵉⵢⵉ ⵎⵉⴷⴷⵏ ⴷ ⵓⵏⴱⴳⵉ ⵎⵇⵇⵓⵕⵏ ⴱⵔⵔⴽⵏ ⵙⵉⵜⵉ, ⵍⵍⵉⵖ ⴷⵉⵜⵉ ⵓⵙⵉⵖ ⵜⴰⴱⵔⴰⵜ ⵣⵖ ⴷⴰⵔ ⵓⴳⵍⵍⵉⴷ ⴰⵙⵄⴷⵉ, ⵖ ⵓⵙⴳⴳⵯⴰⵙ ⵏ 920 ⵀ».
ⵓⴷⵎⵡⴰⵏ ⵜⵜⴰⵡⵙⵙⴰⵏⵏ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵍⵍⴰⵏ ⵓⴷⵎⴰⵡⵏ ⵜⵜⴰⵡⵙⵙⴰⵏⵏ ⵍⵍⵉ ⵉⴳⴰⵏ ⵣⵖ ⵉⵍⴱⵏⵙⵉⵔⵏ, ⵍⵍⵉ ⵜⵜⴰⵡⵙⵙⴰⵏⵏ ⴳ ⵜⵉⵔⵔⴰ ⵏ ⵜⵙⴽⵍⴰ ⴷ ⵓⵥⴰⵡⴰⵏ ⴰⵎⴰⵣⵉⵖ.
ⵕⵕⴰⵢⵙ ⵍⵃⴰⵊⵊ ⵎⵓⵃⵎⵎⴰⴷ ⴰⵍⴱⵏⵙⵉⵔ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵉⴳⴰ ⵎⵓⵃⵎⵎⴰⴷ ⵉⵡⵉⵙ ⵏ ⵍⵃⵙⵏ ⴰⵍⴱⵏⵙⵉⵔ. ⵍⵍⵉ ⵉⵍⵓⵍⵏ ⴰⵙⴳⴳⵯⴰⵙ ⵏ 1937 ⵜ ⵖ ⵓⴷⵡⵡⴰⵕ ⵏ ⵜⵎⵙⵓⵍⵜ ⵖ ⵜⵇⴱⵉⵍⵜ ⵏ ⵉⵍⴱⵏⵙⵉⵔⵏ, ⵉⴼⴼⵓⵙ ⵏ ⵜⵖⵔⵎⵜⵜ ⵏ ⵉⵎⵉ ⵏ ⵜⴰⵏⵓⵜ ⵖ ⵜⵙⴳⴰ ⵏ ⵛⵉⵛⴰⵡⴰ ⵜⴰⵖⵉⵡⴰⵏⵜ ⵏ ⵜⵎⵣⴳⴰⴷⵉⵡⵉⵏ, ⵉⵖⵔⴰ ⵖ ⵜⵎⵣⴳⵉⴷⴰ ⵍⵇⵯⵕⴰⵏ, ⵜⴳ ⵜⵖⵔⵉ ⵏⵏⵙ ⵜⴰⵙⴳⴷⴰⵏⵜ, ⵍⴰⵏⵜ ⵜⵎⴷⵢⴰⵣⵉⵏ ⵏⵏⵙ ⴽⵔⴰ ⵏ ⵜⵎⴰⵜⴰⵔⵉⵏ ⵏ ⵎⴰⵢⴰⵏ.
ⴳ ⵓⵙⴳⴳⵯⴰⵙ ⵏ 1961 ⵜ ⵉⵎⵎⵓⴷⴷⴰ ⵓⵍⴱⵏⵙⵉⵔ ⵙ ⵓⵍⵉⵎⴰⵏ, ⵖ ⵓⵍⵉⵎⴰⵏ ⴰⵖ ⵜⵙⵙⴼⴰⵍ ⵜⵓⴷⵔⵜ ⵏⵏⵙ ⵜⴰⵏⴰⵥⵓⵕⵜ, ⴰⵔ ⵉⵙⵎⵓⵔⵉⴳ ⵖ ⵉⴼⴼⵓⴳⵍⵓⵜⵏ ⴷ ⵉⵡⵉⵣ ⵏ ⵉⵎⵙⵡⵡⵓⵔⴰ ⵉⵎⵕⵕⵓⴽⵉⵏ ⵉⴳⴰⵏ ⵣⵖ ⵉⴼⴼⵓⵙ ⵏ ⵍⵎⵕⵕⵓⴽ ⵍⵍⵉ ⵉⵍⵍⴰⵏ ⵖ ⵓⵍⵉⵎⴰⵏ.
ⵉⵡⵔⵔⵉⴷ ⵙ ⵍⵎⵕⵕⵓⴽ ⵖ ⵓⵙⴳⴳⵯⴰⵙ ⵏ 1964, ⵉⴳ ⴱⴰⴱ ⵏ ⵓⵎⴰⵔⴳ ⵉⴳ ⴰⵏⴰⵥⵓⵕ, ⴳ 1969 ⵜ ⵉⵕⵥⴰ ⵍⵃⴰⵊⵊ ⵎⵓⵃⵎⵎⴰⴷ ⴰⵍⴱⵏⵙⵉⵔ ⵣⵖ ⵜⵎⵥⴰⴹⵉⵏ ⵏⵏⵙ, ⵖ ⵢⴰⵜ ⵜⵎⵙⴰⵔⵜ ⴱⴰⵀⵔⴰ ⵓⵔ ⵉⴼⵓⵍⴽⵉⵏ ⵖ ⵓⵖⴰⵔⴰⵙ, ⵉⴳ ⵣⵖ ⴰⴽⵓⴷ ⴰⵏⵏ ⴰⴽⵓⵛⴰⵎ ⵣⵖ ⵉⴹⴰⵕⵏ ⵏⵏⵙ, ⵜⵉⵣⵉ ⴰⵏⵏ ⵉⵙⵙⴼⴰⵍ ⵓⵏⴰⵥⵓⵕ ⴰⵍⴱⵏⵙⵉⵔ ⴰⵔ ⵉⵙⵎⵓⵔⵉⴳ ⵡⴰⵅⵅⴰ ⵙ ⵉⴳⵉⵡⵔ, ⵓⵔ ⴰⵙ ⵉⵎⴷⵉ ⵓⴽⵓⵛⵎ ⴼ ⵜⵥⵓⵕⵉ ⵏ ⵓⵥⴰⵡⴰⵏ. ⵢⵓⵔⴰ ⵜⵉⵎⴷⵢⴰⵣⵉⵏ ⴱⴰⵀⵔⴰ ⵉⵍⴰⵏ ⴰⵜⵉⴳ ⵙⵓⵍ ⵉⴷⴷⵔⵏ, ⵉⵙⴰⵡⵍ ⵓⵎⴰⵔⴳ ⵏⵏⵙ ⴼ ⴽⵉⴳⴰⵏ ⵏ ⵉⵙⴽⴽⵉⵏⵏ ⴷ ⵉⵡⴰⵍⵉⵡⵏ ⵉⴳⵍⵉⵏ ⴰⵙⴽⴽⵉⵍ ⴼ ⵜⵎⵖⵏⴰⵙⵜ ⴷ ⵜⵙⵔⵜⵉⵜ ⴷ ⵓⵙⴳⴷ ⴷ ⵜⵓⴷⵔⵜ ⵏ ⵓⵎⴰⵣⵉⵖ ⴰⴽⴽⵯ ⴷ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴰⵡⴷ ⴷ ⵉⵎⵓⴽⵔⵉⵙⵏ ⵏ ⵜⴷⵎⵙⴰ ⴷ ⵜⴰⵢⵔⵉ… ⵜⴳ ⵜⵎⴰⴳⵉⵜ ⴷ ⵜⵓⵜⵍⴰⵢⵜ ⵜⵉⵎⴰⵣⵉⵖⵉⵏ, ⴰⵡⵜⵜⴰⵙ ⵏⵏⵙ ⵎⵇⵇⵓⵕⵏ ⵖ ⵎⴰⵢⴰⵏ ⴰⴽⴽⵯ.
ⵉⵎⵎⵓⵜ ⵓⵏⴰⵥⵓⵕ ⵎⵓⵃⵎⵎⴰⴷ ⴰⵍⴱⵏⵙⵉⵔ ⴳ ⵡⴰⵙⵙ 11 ⵖ ⵡⴰⵢⵢⵓⵔ ⵏ ⵏⵓⵡⴰⵏⴱⵉⵔ 1989. ⵉⴼⵍ ⴷ ⴰⵎⴷⵢⴰⵣ ⵉⴳⴳⵓⵜⵏ ⴷ ⵜⴰⵍⵖⴰⵜⵉⵏ ⵏ ⵓⵎⴰⵔⴳ ⵉⵍⴰⵏ ⴰⵜⵉⴳ ⴰⴽⵙⵡⴰⵜ.
ⵉⴳ ⵣⵖ ⵉⵎⵖⵏⴰⵙⵏ ⵉⵣⵡⴰⵔⵏ ⵍⵍⵉ ⵢⵓⵙⵉⵏ ⴰⵏⵣⴳⵓⵎ ⵏ ⵜⵎⴰⵣⵉⵖⵜ ⴷ ⵜⵓⵙⵙⵏⴰ ⵏⵏⵙ ⴷ ⵓⴼⴳⴰⵏ ⵏⵏⵙ ⴷ ⵡⴰⴽⴰⵍ ⵏⵏⵙ ⴰⴽⴽⵯ.
ⵉⴳⴰ ⵓⵏⴰⵥⵓⵕ ⵎⵓⵃⵎⵎⴰⴷ ⴰⵍⴱⵏⵙⵉⵔ ⵜⵉⵏⵎⵍ ⵏ ⵉⵎⵖⵏⴰⵙⵏ ⵉⵎⴰⵣⵉⵖⵏ.
ⵜⴰⵕⵕⴰⵢⵙⵜ ⵔⵇⵉⵢⵢⴰ ⵜⴰⵍⴱⵏⵙⵉⵔⵜ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵜⴳⴰ ⵔⵇⵢⵢⴰ ⵜⴰⵍⴱⵏⵙⵉⵔⵜ, ⵢⴰⵜ ⵜⵏⴰⵥⵓⵕⵜ ⵍⵍⵉ ⵉⴳⴰⵏ ⵜⵉⵜⵔⵉⵜ ⵖ ⴳⵔ ⵜⴰⵕⵕⴰⵢⵙⵉⵏ ⵏ ⵓⵥⴰⵡⴰⵏ ⴰⵎⴰⵣⵉⵖ, ⵉⵍⵍⴰ ⴷⴰⵔⵙ ⵓⴳⴳⴰⵔ ⵏ 800 ⵏ ⵜⴰⵍⵖⴰⵜ. ⵜⴰⵍⵖⴰⵜ ⵍⵍⵉ ⴷⴰⵔⵙ ⵉⵣⵡⴰⵔⵏ ⵜⵍⴰ ⴰⵣⵡⵍ ⵏ (ⵜⵜⴰⴽⵙⵉ).
ⵜⴳⴰ ⵉⵍⵍⵉⵙ ⵏ ⵉⵍⴱⵏⵙⵉⵔⵏ, ⵜⴳⴰ ⵜⵉⴳⵉⴳⵉⵍⵜ ⵎⵎⵉ ⵜⵎⵎⵓⵜ ⵉⵎⵎⵉⵙ, ⵉⵜⴰⵀⵍ ⴱⴰⴱⴰⵙ ⵜⴳ ⵜⵜ ⵜⵎⵖⴰⵔⵜ ⵏ ⴱⴰⴱⴰⵙ ⵖ ⵜⵎⵎⴰⵔⴰ ⴷ ⵜⴽⵔⵔⴰⵢⵜ ⴷ ⵜⴳⵓⴹⵉ, ⵉⵔⵉ ⴱⴰⴱⴰⵙ ⴰⴷ ⵙ ⵜⵜ ⵉⵙⵜⴰⵀⵍ ⵜⴳ ⵙⵓⵍ ⵜⴰⵣⵣⴰⵏⵜ, ⵜⵔⵡⵍ ⴰⵙ, ⵉⴳ ⵓⵡⵜⴰⵢ ⵏⵏⵙ ⴰⴽⵓⴷ ⴰⵏⵏ 14 ⵏ ⵓⵙⴳⴳⵯⴰⵙ.
ⵜⴰⵎⵎⴰⵔⴰ ⴰⴷ ⴰⴷ ⵣⵖ ⵜⵍⵓⵍ ⵜⵏⴰⵥⵓⵕⵜ ⵔⵇⵢⵢⴰ ⵜⴰⵍⴱⵏⵙⵉⵔⵜ, ⵜⵓⵍⵍⵉⵙⵜ ⵏ ⵜⵓⴷⵔⵜ ⵏⵏⵙ ⴰⴽⴽⵯ, ⵜⵓⵔⴰ ⵜⵜ ⵖ ⵢⴰⵏ ⵓⴷⵍⵉⵙ ⵏ ⵓⵎⴷⵢⴰⵣ, ⵜⵙⵎⴰⵏ ⴳⵉⵙ ⵜⵉⵎⴷⵢⴰⵣⵉⵏ ⵏⵏⵙ ⵍⵍⵉ ⵖ ⵜⵙⴰⵡⵍ ⴼ ⵜⵓⴷⵔⵜ ⵏⵏⵙ, ⵉⵍⴰⵏ ⴰⵣⵡⵍ : (ⴰⴷⵍⵉⵙ ⵏ ⵜⵓⴷⵔⵜ ⵉⵏⵓ).
ⵜⴳⴰ ⵔⵇⵢⵢⴰ ⵜⴰⵍⴱⵏⵙⵉⵔⵜ ⵜⴰⵏⴰⵥⵓⵕⵜ ⵣⵖ ⵓⵙⴳⴳⵯⴰⵙ ⵏ 1970 ⵜ, ⵜⵍⵎⴷ ⴰⵎⴰⵔⴳ ⵏ ⵜⵉⵔⵔⵓⵢⵙⴰ ⵣⵖ : ⵎⵓⵃⵎⵎⴰⴷ ⴱⵓⵏⵚⵉⵕ, ⵄⴱⴷ ⵍⵍⴰⵀ ⴱⵏ ⴷⵔⵉⵙ, ⵙⵄⵉⴷ ⴰⵛⵜⵓⴽ…
ⴰⵎⴰⵔⴰ ⴷ ⵓⵎⴷⵢⴰⵣ ⵍⵎⵙⵄⵓⴷⵉ ⵎⵓⵃⵎⵎⴰⴷ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵍⵎⵙⵄⵓⴷⵉ ⵎⵓⵃⵎⵎⴰⴷ ⴰⵎⴰⵔⴰ ⴷ ⵓⵎⴷⵢⴰⵣ ⴰⵎⵕⵕⵓⴽⵉ, ⵉⵍⵓⵍ ⴳ ⵓⵙⴳⴳⵯⴰⵙ ⵏ 1991 ⵖ ⵓⴷⵡⵡⴰⵕ ⵏ ⵓⵎⴷⵉⵖⵔدوار أمديغر ⴳ ⵜⵙⴳⴰ ⵏ ⵜⵖⵉⵡⴰⵏⵜ ⵏ ⵜⵎⵣⴳⴰⴷⵉⵡⵉⵏتمزكدوين , ⵣⵖ ⵜⵇⴱⵉⵍⵜ ⵏ ⵉⵍⴱⵏⵙⵉⵔⵏ ⵜⴰⵙⴳⴰ ⵏ ⵉⵎⵉⵏⵜⴰⵏⵓⵜامنتانوت ⵛⵉⵛⴰⵡⴰ شيشاوة.
ⵉⴳ ⴰⵙⴷⴰⵡⵉ ⵖ ⵜⵎⴰⵙⵙⴰⵏⵉⵏ ⵜⴰⵙⵓⵙⵢⵓⵍⵓⵊⵉⵢⵉⵏ ⴳ ⵜⵙⴷⴰⵡⵉⵜ ⵏ ⵉⴱⵏ ⵣⵓⵀⵔ ⴳ ⵓⴳⴰⴷⵉⵔ.
ⵢⵓⵔⴰ ⵙⵎⵎⵓⵙ ⵉⴷⵍⵉⵙⵏ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵢⵓⵎⵥ ⴽⵉⴳⴰⵏ ⵏ ⵜⵙⵎⵖⵓⵔⵉⵏ ⵜⵉⵏⴰⵎⵓⵔⵉⵏ.
ⵢⵓⵎⵥ ⵜⴰⵙⵎⵖⵓⵔⵜ ⵏ ⵜⴱⴰⴷⵓⵜ 2ⵎ ⵜⴹ ⵖ ⵓⵙⴳⴳⵯⴰⵙ ⵏ 2012, ⵖ ⵜⵙⴽⵍⴰ ⵏ ⵉⵄⵔⵔⵉⵎⵏ.
ⵢⵓⵎⵥ ⵜⴰⵙⵎⵖⵓⵔⵜ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴰⵙⴳⴳⵯⴰⵙ ⵏ 2020 .
ⵉⴷⵍⵉⵙⵏ ⵍⵍⵉ ⵢⵓⵔⴰ ⵓⵎⴰⵔⴰ ⴰⵎⴰⵣⵉⵖ « ⵍⵎⵙⵄⵓⴷⵉ ⵎⵓⵃⵎⵎⴰⴷ » :
ⴰⴷⵍⵉⵙ ⵏ ⵜⵎⵣⴳⵓⵏⵜ - ⵜⴰⵢⴷⵔⵜ ⵏ ⵓⵙⵡⵉⵏⴳⵎ - ⵍⵍⵉ ⵢⵓⵎⵥⵏ ⵜⴰⵙⵎⵖⵓⵔⵜ ⵏ ⵜⵙⴽⵍⴰ ⵜⴰⵎⴰⵣⵉⵖⵜ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵖ ⵓⵙⴳⴳⵯⴰⵙ ⵏ 2020, ⵖ ⴰⵏⴰⵡ ⵏ ⵜⵙⴽⵍⴰ ⵏ ⵓⵎⵥⵢⴰⵏ.
ⴰⴷⵍⵉⵙ ⵏ ⵜⵓⵍⵍⵉⵙⵉⵏ ⵜⵉⵎⴰⵣⵉⵖⵉⵏ ⵉⴳⵣⵣⵓⵍⵏ - ⵉⵅⴼ ⵏ ⵓⵏⴳⵉ - ⴷ ⵉⴼⴼⵖ ⵏⵏ ⵖ ⵓⵙⴳⴳⵯⴰⵙ ⵏ 2021, ⵉⵙⵙⵓⴼⵖ ⵜ ⵉⴷ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵉⵙⵎⴰⵏ 18 ⵏ ⵜⵓⵍⵍⵉⵙⵜ ⵜⴰⵎⴰⵣⵉⵖⵜ ⴱⴹⴰⵏ ⵜ ⴰⵡⴰⵍ ⴼ ⴽⵉⴳⴰⵏ ⵏ ⵓⵏⵜⵉⵎⵏ ⵉⵎⴰⵢⵏⵓⵜⵏ.
ⴰⴷⵍⵉⵙ ⵏ ⵜⵎⴷⵢⴰⵣⵉⵏ - ⴰⵎⵡⴰⵏ ⵏ ⵡⴰⵡⴰⵍ - ⵉⴼⴼⵖ ⴷ ⵖ ⵓⵙⴳⴳⵯⴰⵙ ⵏ 2013, ⵢⵓⵎⵥ ⵜⴰⵙⵎⵖⵓⵔⵜ ⵏ ⵜⴱⴰⴷⵓⵜ ⵜⵉⵙ ⵙⵏⴰⵜ ⵏ ⵓⵙⵏⴼⵍⵓⵍ ⵏ ⵜⵙⴽⵍⴰ ⵏ ⵉⵄⵔⵔⵉⵎⵏ. ⵉⵙⵎⴰⵏ ⴽⵉⴳⴰⵏ ⵏ ⵜⵎⴷⵢⴰⵣⵉⵏ ⵉⵙⴰⵡⴰⵍⵏ ⴼ ⴽⵕⴰⴹ ⵡⴰⵏⵜⵉⵎⵏ : ⵜⴰⵎⴰⴳⵉⵜ - ⵜⵓⴷⵔⵜ - ⵜⴰⵢⵔⵉ.
ⴰⴷⵍⵉⵙ ⵏ ⵓⵎⴷⵢⴰⵣ - ⵜⵓⵏⵜⵓⵍⵉⵏ ⵏ ⵡⴰⵢⵢⵓⵔ - ⵉⵙⵎⴰⵏ ⵓⴷⵍⵉⵙ ⴰⴷ ⵜⵉⵎⴷⵢⴰⵣⵉⵏ ⵙⵙⵓⵜⵍⵏ ⵉⵏⵏ ⴰⵡⴰⵍ ⴼ ⴽⵉⴳⴰⵏ ⵏ ⵉⵙⴽⴽⵉⵏⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵜⵎⴰⴳⵉⵜ ⵏⵏⵙ ⴷ ⵜⵓⵙⵙⵏⴰ.
ⴰⴷⵍⵉⵙ ⵏ ⵜⵓⵍⵍⵉⵙⵉⵏ - ⵜⵉⵖⵣⵉ ⴷ ⵜⵓⵔⵔⵓⵜ - ⵉⵙⵎⴰⵏ ⵓⴷⵍⵉⵙ ⴰⴷ ⴽⵉⴳⴰⵏ ⵏ ⵜⵓⵍⵍⵉⵙⵉⵏ ⵜⵉⵎⴰⵣⵉⵖⵉⵏ, ⵉⵙⴰⵡⵍⵏ ⴼ ⵉⵙⴽⴽⵉⵏⵏ ⵏ ⵜⵓⴷⵔⵜ ⵏ ⵓⴼⴳⴰⵏ ⴰⵎⴰⵣⵉⵖ, ⵜⵣⴷⴰⵢⵜ ⵏⵏⵙ ⴷ ⵓⵙⴳⴷ ⴷ ⵜⵙⵔⵜⵉⵜ ⴷ ⵜⴰⵢⵔⵉ …
ⵉⵙⴰⵖⵓⵍⵏ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]- - مقال ل محمد زلماض مزالي 2009
- - محمد المستاوي , الحاج محمد الدمسيري , شهادات وقصائد مختارة من اغانيه
- - https://web.archive.org/web/20080913160418/http://www.2m.tv/arabe/culture/article.asp?cat=944 روبورطاج باللغة الأمازيغية
ⵥⵕ ⵓⴳⴳⴰⵔ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]- ⵜⵉⵇⴱⵉⵍⵉⵏ ⵏ ⵍⵎⵖⵔⵉⴱ
- ⴰⵙⴳⵣⴰⵡⴰⵍ ⵏ ⴰⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ(ⵙ.ⴳ.ⵙ.ⵎ) : ⵎⵙⵎⵓⵏ ⴰⵡⴰⵍ ⴰⵎⴰⵜⴰⵢ ⴰⵙⵏⵎⴰⵍⴰⵢ ⵏ ⵜⵎⴰⵣⵉⵖⵜ (ⵎ.ⵎ.ⵙ.ⵎ)
- ⴰⵙⴳⵣⴰⵡⴰⵍ ⵏ ⴰⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ(ⵙ.ⴳ.ⵙ.ⵎ) : ⵎⵙⵎⵓⵏ ⴰⵡⴰⵍ ⴰⵎⴰⵜⴰⵢ ⴰⵙⵏⵎⴰⵍⴰⵢ ⵏ ⵜⵎⴰⵣⵉⵖⵜ (ⵎ.ⵎ.ⵙ.ⵎ)