ⵉⵃⴰⵃⴰⵏ

ⵉⵃⴰⵃⴰⵏ
ⵜⴰⴳⴳⴰⵢⵜ ⵜⴰⵏⵡⵙⵉⵜ
ⵓⴷⵎ ⵉⵜⵜⵢⴰⵡⵙⵙⴰⵏⵏ	ⵚⴰⵍⵃ ⵍⴱⴰⵛⴰ, ⵎⴱⴰⵕⴽ ⴰⵢⵙⴰⵔ, ⴰⵃⵎⴰⴷ ⵏⵜⴰⵎⴰ, ⵃⵎⴰⴷ ⴱⵉⵣⵎⴰⵡⵏ
ⵜⵓⵜⵍⴰⵢⵜ ⵜⴰⵢⵎⵎⴰⵜ	ⵜⵓⵜⵍⴰⵢⵜ ⵜⴰⵎⴰⵣⵉⵖⵜ
ⵜⵓⵜⵍⴰⵢⵉⵏ ⵉⵙⵙⵎⵔⴰⵙ	ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵜⴰⵄⵕⴰⴱⵜ ⵜⴰⵎⵖⵔⵉⴱⵉⵜ, ⵜⴰⵎⴰⵣⵉⵖⵜ ⵏ ⵢⵉⴼⴼⵓⵙ, ⵜⵓⵜⵍⴰⵢⵜ ⵜⴰⵄⵕⴰⴱⵜ
ⴰⵙⵎⵖⵔⴼ	ⵉⵃⵉⵃⵉ, ⵜⵉⵃⵉⵃⵉⵜ
ⵜⴰⵎⴰⵣⵉⵔⵜ	ⵍⵎⵖⵔⵉⴱ
ⵉⵙⵎⵍⴰⵏ ⵉⵊⵖⵔⴰⴼⵉⵢⵏ	31°20′48″N 9°37′7″W
	ⵙⵏⴼⵍ ⴰⵙⴰⴳⵎ - ⵙⵏⴼⵍ - ⵡⵉⴽⵉⴷⴰⵜⴰ

ⵉⵃⴰⵃⴰⵏ (ⵙ ⵜⵄⵔⴰⴱⵜ: حاحا أو إحاحان) ⴳⴰⵏ ⵜⴰⵇⴱⵉⵍⵜ ⵉⵎⵇⵓⵔⵏ ⵏ ⵉⵎⴰⵣⵉⵖⵏ. ⴳⴰⵏ ⵉⵛⵍⵃⵉⵢⵏ, ⴰⵔ ⵙⴰⵡⴰⵍⵏ ⵜⴰⵛⵍⵃⵉⵜ. ⴽⵛⵎⵏ ⴳ ⵎⴰ ⵎⵓ ⵏⵜⵜⵉⵏⵉ ⵙⵓⵙ ⴰⵎⵇⵇⵔⴰⵏ,^[1] ⵉⵍⵍⴰ ⵡⴰⴽⴰⵍ ⵏ ⵉⵃⴰⵃⴰⵏ ⴳ ⵉⴷⵔⴰⵔⵏ ⵏ ⵡⴰⵟⵍⴰⵙ ⴰⵎⵇⵇⵔⴰⵏ ⵓⵜⵔⵉⵎ ⴳⵔ ⵎⵓⴳⴰⴷⵓⵔ ⴷ ⵓⴳⴰⴷⵉⵔ.^[1]

ⵜⴰⵙⵏⴰⵥⵖⵓⵕⵜ

ⵉⵖ ⵔⴰⴷ ⵏⵙⴰⵡⵍ ⵅⴼ ⵓⵥⵓⵕ ⵏ ⵉⵃⴰⵃⴰⵏ ⴷ ⵎⴰⵅ ⴰⵢⵍⵍⵉⵖ ⴰⵙⵏ ⵜⵜⵉⵏⵉⵏ ⴰⵙⵙⴰⵖ ⴰⴷ, ⵉⵇⵇⴰⵏ ⴷ ⴰⴷ ⵏⵓⵔⵔⵉ ⵜⵉⵖⵔⴷⵉⵏ ⴰⴷ ⵏⵙⵏⵓⴱⴱⵛ ⴳ ⵓⵎⵣⵔⵓⵢ ⵏ ⵍⵎⵖⵔⵉⴱ. ⴰⵔ ⵜⵜⵉⵏⵉⵏ ⵉⴷ ⴱⵓⵡⵎⵣⵔⵓⵢ ⵎⴰⵙ ⵉⵖ ⵏⵓⵔⵔⵉ ⵎⴰ ⵉⵜⵜⴰⵥⵏ ⵉ ⴽⵕⴰⴹ ⵉⴼⴹⵏ ⵏ ⵓⵙⴳⴳⵯⴰⵙ ⵜⵉⵖⵔⴷⵉⵏ, ⴰⴽⴰⵍ ⵏ ⵍⵎⵖⵔⵉⴱ ⴳ ⵡⴰⴽⵓⴷ ⴰⵏⵏ ⴽⴽⴰⵏ ⵜ ⵏⵏ ⴳⵉⵙ ⵜⵓⴳⵜ ⵏ ⵜⵔⵓⴱⴱⴰ ⵏ ⵜⵇⵇⴱⵉⵍⵉⵏ ⵜⵉⵎⴰⵣⵉⵖⵉⵏ, ⴳ ⵜⵙⴳⴰ ⵏ ⵉⴼⴼⵓⵙ ⴳⵉⵙ ⵜⵉⵔⵓⴱⴱⴰ ⵏ ⵜⵇⵇⴱⵉⵍⵉⵏ ⴳⴰⵏⵉⵏ ⵙ ⵡⴰⵙⵙⴰⵖ ⵚⵏⵀⴰⵊⴰ, ⴳ ⵜⵙⴳⴰ ⵏ ⵉⵥⵥⵍⵎⴹ ⴳⵉⵙ ⵜⵉⵔⵓⴱⴱⴰ ⵏ ⵜⵇⴱⵉⵍⵉⵏ ⵏⵏⴰ ⵎⵓ ⵜⵜⵉⵏⵉⵏ ⵣⵏⴰⵜⴰ, ⵉⵖ ⴷ ⵏⵓⵛⴽⴰ ⵙ ⵜⵙⴳⴰ ⵏ ⵜⵓⵥⵥⵓⵎⵜ ⴰⵔ ⴳⵉⵙ ⵏⵜⵜⴰⴼⴰ ⵜⵉⵔⵓⴱⴱⴰ ⵏ ⵜⵉⵇⵇⴱⵉⵍⵉⵏ ⵏ ⵎⴰⵚⵎⵓⴹⴰ. ⵉⵃⴰⵃⴰⵏ ⴳⴰⵏ ⵣⵖ ⵜⵔⵓⴱⴱⴰ ⴰⴷ ⵏ ⵜⵇⵇⴱⵉⵍⵉⵏ ⵏⵏⴰ ⵎⵓ ⵜⵜⵉⵏⵉⵏ ⵉⵎⵚⵎⵓⴹⵏ, ⴰⵙⵙⴰⵖ ⴰⴷ ⵏ ⵎⴰⵚⵎⵓⴹⴰ ⵏⵖ ⴷ ⵉⵎⵚⵎⵓⴹⵏ, ⵎⵣⴰⵔⴰⵢⵏ ⴳⵉⵙ ⵉⴷ ⴱⵓⵡⵎⵣⵔⵓⵢ ⴳ ⵓⵏⴰⵎⴽ ⵏⵏⵙ, ⵣⵓⵏ ⴷ ⵉⴱⵏ ⵅⴰⵍⴷⵓⵏ ⴰⵔ ⵉⵜⵜⵉⵏⵉ ⵎⴰⵙ ⴷ ⴳⴰⵏ ⵙⴳ ⵜⴰⵔⵡⴰ ⵏ ⵎⴰⵚⵎⵓⴹ ⵓ ⵢⵓⵏⵙ ⵓ ⴱⴰⵕⴱⴰⵕ. ⵎⴰⵛⴰ ⴰⵙⵍⵎⴰⴷ ⵄⵍⵉ ⵚⵉⴹⵇⵉ ⴰⵣⴰⵢⴽⵓ ⵏⵜⵜⴰⵏ ⴰⵔ ⵉⵜⵜⵉⵏⵉ ⵎⴰⵙ ⴷ ⵜⴰⴳⵓⵔⵉ ⴰⴷ ⵏ ⵎⴰⵚⵎⵓⴹⴰ ⵉⴳⴰ ⵓⵥⵓⵕ ⵏⵏⵙ ⵜⵓⵜⵍⴰⵢⵜ ⵜⴰⵛⵍⵃⵉⵜ ⴷ ⴰⵔ ⵜⵜ ⵉⵙⵙⴼⵔⵓ ⴰⵔ ⵉⵜⵜⵉⵏⵉ ⵎⴰⵙ ⴷ ⵜⴳⴰ ⴽⵕⴰⴹⵜ ⵜⴳⵓⵔⵉⵡⵉⵏ ⴰⵎⵥ ⴷ ⵥⵥⵓ ⴷ ⴰⵎⵓⴷ, ⵉⴳ ⵏⵙⵎⵓⵏ ⵜⵉⴳⵓⵔⵉⵡⵉⵏ ⴰⴷ ⴳ ⵢⴰⵜ ⵜⵡⵉⵏⵙⵜ ⴰⵔ ⵜⵜⴳⴳⴰⵏⵜ ⴰⵎⵥ ⵥⵥⵓ ⴰⵎⵓⴷ, ⵎⴰⵢⴰⴷ ⴰⵔ ⵉⵎⵎⴰⵍ ⵓⵍⴰ ⵎⴰⵙ ⵜⵍⵍⴰ ⵢⴰⵜ ⵜⴰⵣⴷⴰⵢⵜ ⵎⵇⵇⵓⵔⵏ ⴳⵔ ⵎⵉⴷⴷⵏ ⵏ ⵜⵇⵇⴱⵉⵍⵉⵏ ⴰⴷ ⴷ ⵜⵉⵢⵔⵣⴰ ⴷ ⵡⴰⴽⴰⵍ, ⴰⵔ ⵜⵣⵣⵉⴳⵉⵣ ⵜⴳⵓⵔⵉ ⴰⴷ ⵣⵖ ⵉⵎⴰⵣⵉⵖⵏ ⴰⵢⵍⵍⵉⵖ ⵜⵍⴽⵎ ⵉⵄⵕⴰⴱⵏ ⵏⵏⴰ ⴰⵙ ⵉⵙⵎⵎⵙⴽⵍⵏ ⴰⵙⴽⴽⵉⵍ ⵏ ⵢⴰⵥ ⴳⵏ ⴳⵉⵙ ⵢⴰⵚ. ⵣⵓⵏ ⴷ ⵖⵉⴽⵍⵍⵉ ⴰⴽⴽⵯ ⵉⵍⵍⴰ ⵓⵏⵓⵃⵢⵓ ⴳⵔ ⵚⵚⴰⵍⴰⵜ ⵏⵏⴰ ⵉⴳⴰⵏ ⵜⴰⵥⴰⵍⵍⵉⵜ ⴷ ⵚⵚⴰⵡⵎ ⵏⵏⴰ ⵉⴳⴰⵏ ⵓⵥⵓⵎ.

ⴰⵥⵓⵕ ⵏ ⵜⴳⵓⵔⵉ ⵏ ⵉⵃⴰⵃⴰⵏ ⵉⵖ ⴷ ⵏⵓⵛⴽⴰ ⴰⴷ ⵏⵏ ⵙⵉⵙ ⵏⴰⴳⴳⵯ ⴳ ⵜⵙⴳⴰ ⵏ ⵖⴰⵢⵍⵍⵉ ⴰⵙ ⵜⵜⵉⵏⵉⵏ ⵎⵉⴷⴷⵏ ⵏⵖ ⴷ ⵉⵡⵏⵏⴰⵏ ⵉⵎⵙⵍⵍⵉⵏ, ⴰⵔ ⵏⵏ ⵏⵜⵜⴰⴼⴰ ⵎⴰⵙ ⴷ ⴽⵔⴰⵢⴳⴰⵜ ⵢⴰⵏ ⴷ ⵎⴰⵙ ⴰⵔ ⵉⵜⵜⵉⵏⵉ ⵉⴳⴰ ⵓⵥⵓⵕ ⵏⵏⵙ, ⵉⵍⵍⴰ ⵎⴰⴷ ⵉⵜⵜⵉⵏⵉⵏ ⵎⴰⵙ ⴰⵙⵙⴰⵖ ⴰⴷ ⵓⵔ ⴷ ⵉⵎⵣⴷⴰⵖ ⵏ ⵜⵇⵇⴱⵉⵍⵉⵏ ⴰⴷ ⴰ ⵎⵓ ⵜ ⵜⵜⵉⵏⵉⵏ, ⴰⵔ ⵜ ⵜⵜⵉⵏⵉⵏ ⵉ ⵡⴰⴽⴰⵍ ⵏⵏⴰ ⴳ ⵣⴷⴰⵖⵏ ⴷ ⵡⴰⴷ ⵉⵍⵍⴰⵏ ⴳ ⵓⵣⴰⵖⴰⵔ ⵏⵏⴰ ⴷ ⵉⵡⴰⵍⴰⵏ ⵉ ⵜⵙⴳⴰ ⵏ ⵉⴳⴳⵉ ⵏ ⵢⵉⵍⵍ, ⵢⵉⵍⵉ ⵎⴰⴷ ⵉⵜⵜⵉⵏⵉⵏ ⵎⴰⵙ ⵙⵎⵎⴰⵏ ⴰⵙⵏ ⴰⵙⵙⴰⵖ ⴰⴷ ⴰⵛⴽⵓ ⵎⵎⴰⵖⵏ ⴱⴷⴷⴰ ⵜⵇⵇⴱⵉⵍⵉⵏ ⴰⴷ ⵏⴳⵔ ⴰⵜⵜ ⵙⵏⵜ, ⵎⵉⴷⴷⵏ ⵢⴰⴹⵏⵉⵏ ⴰⵔ ⵜⵜⵉⵏⵉⵏ ⵎⴰⵙ ⵉⴽⴽⴰ ⴷ ⵡⴰⵙⵙⴰⵖ ⴰⴷ ⴰⵃⵡⴰⵛ ⵏⵏⵙⵏ ⵏⵏⴰ ⴳ ⴳⵉⵙ ⴳⴳⵓⵜⵏ ⵉⵚⵄⵢⵉⴹⵏ, ⵢⵉⵍⵉ ⵓⵍⴰ ⵎⴰⴷ ⵉⵜⵜⵉⵏⵉⵏ ⵎⴰⵙ ⵉⵃⴰⵃⴰⵏ ⴽⴽⴰⵏ ⵜ ⵏⵏ ⵣⵉⴽⴽ ⵓⵎⵥⵏ ⴰⵔ ⴰⵙⵉⴼ ⵏ ⴷⵕⵄⴰ, ⵉⴽⵛⵎ ⴳⵉⵙⵏ ⵓⵍⴰ ⵙⵓⵙ ⴷ ⴰⵔ ⵙⴰⵡⴰⵍⵏ ⵙ ⵓⵙⴽⴽⵉⵍ ⵏ ⵢⴰⵃ ⵣⵓⵏ ⴷ ⵙ ⵓⵎⴷⵢⴰ ⵏⵏⵉⵃ, ⵙⴽⵔⵃ, ⵎⴰⵢⴰⴷ ⴰⴽⴽⵯ ⵏⵏⴰ ⵏⴱⴷⵔ ⵉⴳⴰ ⵖⴰⵙ ⴰⵢⵍⵍⵉ ⵉⵍⵍⴰⵏ ⴳ ⵉⵡⵏⵏⴰⵏ ⵉⵎⵉⵡⴰⵏⵏ ⵏⵏⴰ ⵜⵜⵉⵏⵉⵏ ⵎⵉⴷⴷⵏ ⵉⵇⴱⵓⵔⵏ. ⵎⴰⵛ ⵉⵖ ⴷ ⵏⵓⴹⴰ ⴰⴷ ⵏⵥⵕ ⵖⴰⵢⵍⵍⵉ ⵣⵎⵎⵉⵎⵏ ⵉⴷ ⴱⵓⵡⵎⵣⵔⵓⵢ ⵣⵓⵏ ⴷ ⵓⵙⵍⵎⴰⴷ ⵎⵇⵇⵓⵔⵏ ⵎⵃⵏⵏⴷ ⴰⵢⵜ ⵍⵃⴰⵊⵊ ⵎⴰ ⵉⵏⵏⴰ ⴷ ⵎⴰ ⵢⵓⵔⴰ ⵅⴼ ⵎⴰⵢⴰⴷ, ⴰⵔ ⵏⵏ ⵏⵜⵜⴰⴼⴰ ⵎⴰⵙ ⵜⴰⵎⴰⵣⵉⵔⵜ ⴰⴷ ⵏⵏⴰ ⵉⵍⵍⴰⵏ ⵣⵖ ⵓⵙⴼⵉ ⴰⵔ ⵓⴳⴰⴷⵉⵔ ⵢⴰⵏ ⵓⵣⵎⵣ ⴳ ⵉⵣⵎⴰⵣ ⵉⴽⴽⴰ ⵜ ⵏⵏ ⵖⵉⵏⵏ ⵉⴳⴰ ⵖⴰⵙ ⴰⵣⴰⵖⴰⵔ ⵓⵔ ⴳⵉⵙ ⵉⵣⴷⴰⵖ ⵓⴼⴳⴰⵏ, ⴳⵉⵙ ⵖⴰⵙ ⴰⵔⴳⴰⵏ ⴷ ⵓⵣⵎⵎⵓⵔ ⴷ ⵓⵛⵛⴼⵓⴷ, ⴰⵔ ⴷ ⵉⵜⵜⴼⴼⵓⵖ ⵓⴽⴰⴱⴰⵔ ⵣⵖ ⵓⵙⴼⵉ ⴰⵔ ⵓⴳⴰⴷⵉⵔ ⵏⵖ ⴷ ⵣⵖ ⵓⴳⴰⴷⵉⵔ ⵙ ⵓⵙⴼⵉ ⴰⵔ ⴰⵙⵏ ⵎⴷⴷⵉⵏ ⵉⵎⴰⴽⵔⵏ ⴳ ⵜⴰⴳⴰⵏⵉⵏ ⴰⴷ, ⵎⴰⵢⴰⵏ ⴰⴷ ⵢⵓⵊⵊⴰⵏ ⵎⵉⴷⴷⵏ ⴰⴷ ⴰⴷ ⴷ ⵜⵜⴰⵛⴽⴰⵏ, ⵍⵍⵉⵖ ⵍⴽⵎⵏ ⵉⵏⵖⵎⵉⵙⵏ ⵢⴰⵏ ⵓⴳⵍⵍⵉⴷ ⵏ ⵡⴰⴽⵓⴷ ⴰⵏⵏ ⵏⵏⴰ ⵉⵍⵍⴰⵏ ⴳ ⵎⵕⵕⴰⴽⵛ, ⵉⴳⴳⵯⵉⵣ ⴷ ⵉⵍⵎⵎⴰ ⵙ ⵓⴳⴰⵢⵢⵓ ⵏⵏⵙ ⴰⵢⵍⵍⵉⵖ ⵉⵥⵕⴰ ⵎⴰⵢⴰⵏ, ⵉⵣⵔⵉ ⵙ ⵙⵓⵙ ⵢⴰⵡⵉ ⴷ ⵢⴰⵏ ⵓⵟⵟⵓⵏ ⵏ ⵉⵄⵣⵔⵉⵏ, ⵉⵏⵏⴰ ⴰⵙⵏ ⴰⵛⴽⴰⴷ ⴰⴷ ⴰⵡⵏ ⵉⵏⵉⵖ ⵎⴰ ⵜⵙⴽⴰⵔⵎ ⴰⵔ ⴰⵡⵏ ⴰⴽⴽⴰⵖ ⵜⵉⵖⵔⴰⴹ ⵏⵏⵓⵏ, ⵢⵉⵡⵉ ⵜⵏ ⴷ ⵉⵍⵎⵎⴰ ⵉⴱⴹⵓ ⵜⵏ ⴰⴽⴽⵯ ⵅⴼ ⵎⵔⴰⵡ, ⵉⵙⵔⵙ ⵜⵏ ⴳ ⵢⴰⵏ ⵓⴳⴳⵓⵣ, ⵉⵙⵔⵙ ⵎⵔⴰⵡ ⴳ ⴰⵢⵜ ⴰⵎⵔ, ⵎⵔⴰⵡ ⴳ ⵉⴷⴰ ⵓⵜⵖⵓⵎⵎⴰ, ⵎⵔⴰⵡ ⴳ ⴰⵢⵜ ⵄⵉⵙⵉ ⵖⵉⴽⴽⴰⵏ ⴰⵢⵍⵍⵉⵖ ⵜⵏ ⴰⴽⴽⵯ ⵉⴱⴹⴰ ⵅⴼ ⵜⵎⴰⵣⵉⵔⵜ ⴰⴷ, ⵉⵏⵏⴰ ⴰⵙⵏ ⵉⵍⵎⵎⴰ ⴰⵔ ⵜⵜⴹⵓⴼⵎ ⵅⴼ ⵉⵖⴰⵔⴰⵙⵏ ⴷ ⴰⵔ ⵜⵜⴹⵓⴼⵎ ⵉⵏⴳⵔⴰⵜⵓⵏ, ⴽⵔⴰⵢⴳⴰⵜ ⴰⵢⵢⵓⵔ ⴰⵔ ⵏⵏ ⵜⴰⵇⵇⵍⴰⵢⵎ ⵙ ⵎⵔⵔⴰⴽⵛ ⴰⵔ ⴷ ⵜⵜⴰⵡⵉⵎ ⴰⵎⵜⵛⵓ ⵏⵏⵓⵏ, ⵉⵣⵔⵉ ⵎⴰⴷ ⵉⵣⵔⵉⵏ, ⵉⵖⵍⵉ ⴷⴰⵖ ⵓⴳⵍⵍⵉⴷ ⴰⴷ ⵙ ⵙⵓⵙ ⵢⴰⵡⵉⴷ ⴳⵉⵙ ⵢⴰⵏ ⵓⵎⴹⴰⵏ ⵏⵏⴰ ⵉⴳⴰⵏ ⵜⴼⵔⴰⴹⵉⵏ ⵙ ⵙⵎⵎⵓⵙ ⵜⴰⴷ ⵏ ⵜⴼⵓⵏⴰⵙⵜ ⴷ ⵜⵖⵢⵓⵍⵜ ⵉ ⵢⴰⵏ, ⵢⴰⵛⴽⵉⴷ ⴰⵔ ⴰⵙⵏ ⵢⴰⵟⵟⵓ ⵎⴰⵢⴰⵏ ⵉⵏⵏⴰ ⴰⵙⵏ "ⵀⴰⵏ ⵜⵉⵎⵖⴰⵔⵉⵏ ⵏⵏⵓⵏ, ⵀⴰ ⵉⵎⵓⴷⴰⵔ ⵏⵏⵓⵏ, ⴰⵔ ⵜⴳⴳⴰⵎ ⵜⴰⵡⴰⵍⴰ ⵉ ⵜⵉⴹⴰⴼ, ⴰⵔ ⵜⴼⴼⵕⴹⵎ ⴰⵔ ⵜⴽⴽⵔⵣⵎ ⵜⵙⴰⵍⴰⵎ ⵉⴳⵓⵢⵢⴰ ⵏⵏⵓⵏ, ⴰⵔ ⵜⵃⵉⵢⵢⴰⵃⵎ ⴰⵔ ⵜⵎⴰⵜⴰⵔⵎ ⵉⵖⴰⵔⴰⵙⵏ" ⵖⵉⵏⵏ ⵉⵍⵎⵎⴰ ⴰⴷ ⵉⴽⴽⴰ ⵓⵥⵓⵕ ⵏ ⵉⵃⴰⵃⴰⵏ ⴷ ⵓⵥⵓⵕ ⵏ ⵢⵉⵙⵎ ⴰⴷ, ⴰⵔ ⵣⵣⵉⴳⵉⵣⵏ ⵉⵍⵎⵎⴰ ⵜⵓⵙⵓⵜⵉⵏ ⴼ ⵜⵓⵙⵓⵜⵉⵏ, ⴰⵔ ⴷ ⵜⵜⵉⵎⵖⵓⵔ ⵜⵎⴰⵣⵉⵔⵜ ⴰⴷ ⵉⵎⵉⴽⴽ ⵙ ⵉⵎⵉⴽⴽ ⴰⵢⵍⵍⵉⵖ ⵜⵍⴽⵎ ⵖⵉⵍⵍⵉ ⵜⵍⴽⵎ ⵖⵉⵍ ⴰⴷ.

ⵜⵉⵏⵎⴰⵍ ⵜⵉⵇⴱⵓⵔⵉⵏ

ⵜⵜⵓⵙⵙⴰⵏⵜ ⵜⵇⴱⵉⵍⵉⵏ ⵏ ⵉⵃⴰⵃⴰⵏ ⵙ ⵜⵓⴳⴷⵜ ⵏ ⵜⵖⴰⵡⵙⵉⵡⵉⵏ ⵣⵓⵏ ⴷ ⵜⴰⵥⵓⵕⵉ ⵏ ⵜⵕⵕⵓⵢⵙⴰ ⴷ ⵓⵃⵡⴰⵛ, ⴷ ⵜⵎⴰⵙⵙⴰⵏⵜ ⴷ ⵓⵙⴳⴷ ⵙⴳ ⵓⵣⵎⵣ ⵏ ⵉⵎⵕⴰⴱⵟⵏ, ⵉⴳ ⵔⴰⴷ ⵏⵙⴰⵡⵍ ⴰⵙⵙ ⴰⴷ ⵖⴼ ⵜⵉⵏⵎⴰⵍ ⵜⵉⵇⵇⴱⵓⵔⵉⵏ ⴳ ⵉⵃⴰⵃⴰⵏ, ⵉⵇⵇⴰⵏ ⴷ ⴰⴷ ⵏⴱⴷⵔ ⵖⴰⵙ ⵢⴰⵏ ⵎⵏⵏⴰⵡⵜ ⵏⵏⴰ ⴱⴰⵀⵔⴰ ⵉⵎⵇⵇⵓⵔⵏ, ⴰⵛⴽⵓ ⴰⵔ ⵏⵜⵜⴰⴼⴰ ⴳ ⴽⵓ ⵜⵇⵇⴱⵉⵍⵜ ⵙⴳ ⵜⵇⵇⴱⵉⵍⵉⵏ ⵏ ⵉⵃⴰⵃⴰⵏ ⴳⵉⵙ ⴽⴽⵓⵥⵜ ⴰⵔ ⵙⵎⵎⵓⵙⵜ ⴳ ⴰⴷ ⵉⵜⵜⵓⵖⵔⴰ ⵍⵇⵯⵔⴰⵏ ⵍⴽⴰⵔⵉⵎ ⴷ ⵜⵎⴰⵙⵙⴰⵏⵉⵏ ⵜⵉⵙⴳⴷⴰⵏⵉⵏ ⵣⵓⵏ ⴷ ⵜⴰⵙⴽⵍⴰ ⴷ ⵓⵙⵉⴹⵏ, ⵖⵎⴽ ⵏⵏⴰ ⵉⵍⵍⴰⵏ ⴳ ⵜⵇⴱⵉⵍⵉⵏ ⴰⴷ ⵎⴰ ⵉⵜⵜⴳⴳⴰⵏ ⵓⴳⴳⴰⵔ ⵏ ⵙⵉⵏ ⵉⴷ ⵉⴳⵏⴰⵔⵏ ⴷ ⵎⵔⴰⵡ ⵏ ⵜⵏⵎⵍ ⵜⴰⵇⵇⴱⵓⵔⵜ ⴷ ⵓⴳⴳⴰⵔ ⵏ ⵉⴼⴹ ⵏ ⵜⵎⵣⴳⵉⴷ, ⵎⴰⵢⴰⴷ ⴰⴽⴽⵯ ⴰⴷ ⵉⴼⴽⴰⵏ ⵜⵉⵡⵉⵙⵉ ⵉ ⵜⵇⴱⵉⵍⵉⵏ ⵏ ⵉⵃⴰⵃⴰⵏ ⴰⴼⴰⴷ ⴰⴷ ⴳⵉⵙⵏ ⴷ ⵓⵎⴰⵏ ⵜⵓⴳⴷⵜ ⵏ ⵉⵎⴰⵙⵙⴰⵏⵏ ⵉⵙⴳⴷⴰⵏⵏ ⴳ ⵜⵎⴰⵣⵉⵔⵜ ⴰⴷ, ⵔⴰⴷ ⵏⴱⴷⵔ ⴳ ⵎⴰ ⵉⵥⵍⵉⵏ ⵙ ⵉⵎⵓⴷⴷⵓⵜⵏ ⵣⵓⵏ ⴷ ⵎⵓⵃⵎⵎⴰⴷ ⵍⵄⴰⴱⴷⴰⵔⵉ ⵍⵃⴰⵃⵉ ⵏⵖ ⴷ ⵙⵉⴷⵉ ⴱⵓ ⵍⴱⴰⵔⴰⴽⴰⵜ ⵍⵄⴰⴱⴷⴰⵔⵉ ⵏⵏⴰ ⵉⵍⵍⴰⵏ ⴳ ⵉⴷⴰ ⵡⵉⵙⴰⵔⵏ, ⵖⵡⴰ ⵏⵏⴰ ⵉⵙⴽⵔⵏ ⴰⴷⵍⵉⵙ ⵏⵏⴰ ⵉⴳⴰⵏ ⵙ ⵡⴰⵙⵙⴰⵖ ⵔⵉⵃⵍⴰⵜ ⵍⵄⴰⴱⴷⴰⵔⵉ ⵏⵖ ⴷ ⴰⵔⵔⵉⵃⵍⴰ ⴰⵍ ⵎⴰⵖⵔⵉⴱⵉⵢⴰ ⴷⴰ ⵉⵜⵜⵓⵙⵉⴳⴳⵉⵣⵏ ⴳ ⵕⵕⴱⴰⵟ ⴳ ⵓⵙⴳⴳⵯⴰⵙ ⵏ 1988 ⴷⴰⵜ ⵜⵍⴰⵍⵉⵜ ⴳ ⴷⴷⵓ ⵓⴼⵓⵙ ⵏ ⵓⵙⵍⵎⴰⴷ ⴰⵎⵇⵇⵔⴰⵏ ⵎⵓⵃⵎⵎⴰⴷ ⵍⴼⴰⵙⵉ, ⵉⵖ ⵔⴰⴷ ⵏⵙⴰⵡⵍ ⵅⴼ ⵙⵉⴷⵉ ⴱⵓ ⵍⴱⴰⵔⴰⴽⴰⵜ ⵓⵔ ⴰⵖ ⵢⵓⴷⴰ ⵉⵎⵉⴽⴽ ⵅⴼ ⵜⵎⴰⵜⴰⵔⵜ ⴰⴷ ⵎⵇⵇⵓⵔⵏ ⴷⴰ ⵉⴼⴽⴰⵏ ⵢⴰⵜ ⵜⵖⵍⴰⵖⴰⵍⵜ ⵓⵔ ⵢⵓⵎⴰ ⵡⴰⴽⴰⵍ ⵓⵍⴰ ⵉⴳⵏⵡⴰⵏ ⴳ ⵓⵎⴰⴹⴰⵍ ⴰⴽⴽⵯ ⵓⵔ ⴷ ⵖⴰⵙ ⵉⵃⴰⵃⴰⵏ, ⵉⵜⵜⵓⵎⴹⴰⵍ ⵖⵉⵏⵏ ⴳ ⴰⵔ ⵉⵜⵜⵓⵙⴽⴰⵔ ⵖⵉⵍ ⴰⴷ ⵓⵏⵎⵓⴳⴳⴰⵔ ⵏ ⵙⵉⴷⵉ ⴱⵓ ⵍⴱⴰⵔⴰⴽⴰⵜ ⴳ ⵜⵇⵇⴱⵉⵍⵜ ⵏ ⵉⴷⴰ ⵡⵉⵙⴰⵔⵏ, ⴰⵎⵣⵔⵓⵢ ⴷⴰ ⴳ ⵉⵎⵎⵓⵜ ⵎⵓⵃⵎⵎⴰⴷ ⵍⵄⴰⴱⴷⴰⵔⵉ ⵍⵃⴰⵃⵉ ⵓⵔ ⵉⵜⵜⵓⵙⵙⴰⵏ ⵖⵎⴽ ⵏⵏⴰ ⵙ ⵓⵔ ⵉⵜⵜⵓⵙⵙⴰⵏ ⴰⵡⴷ ⵎⴰⵏⵉ ⴳ ⵉⵍⵓⵍ, ⵉⵙ ⴰⵔ ⵜ ⴽⴰ ⵜⵜⵏⵥⵥⴰⵕⵏ ⵉⴷ ⴱⵓⵡⵎⵣⵔⵓⵢ, ⵖⴰⵢⴷⴰ ⴼⵍⵍⴰⵙ ⵙⵙⵏⵏ ⵉⴳⴰ ⵜ ⵓⵎⵓⴷⴷⵓ ⴰⴷ ⵏⵏⵙ ⵏⵏⴰ ⵉⵣⵎⵎⴻⵎ ⴳ ⵓⴷⵍⵉⵙ ⵏⵏⴰ ⵉⴳⴰⵏ ⵙ ⵡⴰⵙⵙⴰⵖ ⵔⵉⵃⵍⴰⵜ ⵍⵄⴰⴱⴷⴰⵔⵉ, ⴷⴰⴳ ⴳⵉⵙ ⵉⵙⴰⵡⵍ ⵅⴼ ⵜⵓⴳⵜ ⵏ ⵜⵖⴰⵡⵙⵉⵡⵉⵏ ⴷⴰ ⵉⵥⵕⴰ ⴳ ⵓⵖⴰⵔⴰⵙ ⴷ ⵜⵓⴳⵜ ⵏ ⵜⵎⵢⵓⵔⵉⵏ ⵏ ⵎⵉⴷⴷⵏ ⴷ ⴰⴽⴽⵯ ⵎⴰⴷ ⵖⵉⴼⵙ ⵉⴽⴽⴰⵏ ⴳ ⵓⵎⵓⴷⴷⵓ ⴰⴷ. ⵔⴰⴷ ⵏⴱⴷⵔ ⵓⵍⴰ ⴳ ⵎⴰ ⵉⵥⵍⵉⵏ ⵙ ⵉⵎⴰⵙⵙⴰⵏⵏ ⵣⵓⵏ ⴷ ⴰⴱⵓ ⵣⴰⴽⴰⵔⵉⵢⴰ ⵍⵃⴰⵃⵉ ⴷⴰ ⵉⵜⵜⵓⵎⴹⴰⵍⵏ ⴳ ⵜⵎⵏⴰⴹⵜ ⵏ ⵙⵎⵉⵎⵓ ⵢⵉⵍⵉ ⵓⵍⴰ ⴱⵓⵙⵄⵉⴷ ⵍⵎⵜⵔⴰⵣⵉ ⴱⴰⴱ ⵏ ⵓⴷⵍⵉⵙ ⴷⴰ ⵉⴳⴰⵏ ⵙ ⵡⴰⵙⵙⴰⵖ ⵎⴰⵏⴰⵔ ⴰⵍⵄⵉⵍⵎ ⴷ ⴰⴱⵓ ⵄⵓⵜⵎⴰⵏ ⵙⴰⵄⵉⴷ ⴱⵏⵓ ⵄⴰⴱⴷ ⵏⵏⴰⵄⵉⵎ ⵍⵎⵏⵏⴰⵏⵉ ⴷⴰ ⵉⵙⴽⵔⵏ ⴰⴷⵍⵉⵙ ⵏⵏⴰ ⵉⴳⴰⵏ ⵙ ⵡⴰⵙⵙⴰⵖ ⵄⴰⵇⴰⵉⴷ ⵡⴰ ⵜⵜⴰⵡⵃⵉⴷ ⴷ ⵉⵡⵉⵙ ⵄⴰⴱⴷⵓⵍⵍⴰⵀ ⴱⵏ ⵙⵄⵉⴷ ⴷⴰ ⵉⵙⴽⵔⵏ ⵜⵓⴳⵜ ⵏ ⵜⴱⵔⴰⵜⵉⵏ ⴳ ⵜⵓⴳⴷⵜ ⵏ ⵉⴳⵔⴰⵏ, ⵢⵉⵍⵉ ⵓⵍⴰ ⵎⵓⵍⴰⵢ ⵎⵓⵃⵎⵎⴰⴷ ⵍⴱⵓⵙⵄⵉⴷⵉ ⵍⵄⵉⵙⵙⵉ ⴷ ⵙⵉⴷⵉ ⵎⵓⵃⵎⵎⴰⴷ ⴱⵏ ⵙⵍⵉⵎⴰⵏ ⵍⵊⴰⵣⵓⵍⵉ ⴷⴰ ⵉⵙⴽⵔⵏ ⴰⴷⵍⵉⵙ ⵏⵏⴰ ⵉⴳⴰⵏ ⵙ ⵡⴰⵙⵙⴰⵖ ⴷⴰⵍⴰⵉⵍⵓ ⴰⵍⵅⴰⵢⵔⴰⵜ, ⴰⴷ ⵓⵔ ⵏⵜⵜⵓ ⴰⴱⵓ ⵄⴰⵍⵉ ⵍⵃⵓⵙⵙⴰⵢⵏ ⴱⵏ ⵄⵍⵉ ⵔⵔⴳⵔⴰⴳⵉ ⴷⴰ ⵉⵙⴽⵔⵏ ⵓⵍⴰ ⵏⵜⵜⴰⵏ ⴰⴷⵍⵉⵙ ⵏⵏⴰ ⵉⴳⴰⵏ ⵙ ⵡⴰⵙⵙⴰⵖ ⵍⴼⴰⵡⴰⵉⴷ ⴰⵍⵊⴰⵎⵉⵍⴰ ⵄⴰⵍⴰ ⵍⴰⵢⴰⵜ ⵍⵊⴰⵍⵉⵍⴰ. ⵎⴰⵢⴰⴷ ⴰⴽⴽⵯ ⵏⵏⴰ ⴷ ⵏⴱⴷⵔ ⴰⵔ ⴰⵖ ⵉⵎⵎⴰⵍ ⵎⴰⵙ ⵜⵉⵇⵇⴱⵉⵍⵉⵏ ⵏ ⵉⵃⴰⵃⴰⵏ ⴷⴰⵔⵙⵏⵜ ⵢⴰⵜ ⵜⵉⵍⴰⵍⵜ ⵎⵇⵇⵓⵔⵏ ⴳ ⵓⵙⵙⴼⵙⵔ ⵏ ⵜⵓⵙⵙⵏⴰ ⴷ ⵓⵙⵎⵓⵜⵜⴳ ⵏ ⵉⵎⴰⵙⵙⴰⵏⵏ ⴳ ⵍⵎⵖⵔⵉⴱ.

ⵔⴰⴷ ⵏⴱⴷⵔ ⵢⴰⵏ ⵎⵏⵏⴰⵡⵜ ⵜⵉⵏⵎⴰⵍ ⵜⵉⵇⵇⴱⵓⵔⵉⵏ ⵏⵏⴰ ⵍⵍⴰⵏⵉⵏ ⴳ ⵉⵃⴰⵃⴰⵏ, ⵔⴰⴷ ⵏⵙⵙⵏⵜⵉ ⵙ ⵜⵇⴱⵉⵍⵜ ⵏ ⴰⵢⵜ ⵣⵍⵟⵏ ⴷⴰ ⴳ ⵜⵍⵍⴰ ⵜⵏⵎⵍ ⵏ ⵙⵉⴷⵉ ⵖⴰⵏⴱ ⴷ ⵜⵉⵏⵎⵍ ⵏ ⵜⴰⵙⵉⵍⴰ ⵓⴳⴰⴷⵉⵔ ⴷ ⵙⵉⴷⵉ ⵄⴽⵢⴰⵛ, ⴰⴷ ⵏⵎⴰⵜⵜⵉ ⵙ ⵜⵇⴱⵉⵍⵜ ⵏ ⵉⴷⴰ ⵓ ⴱⵓⵣⵢⴰ ⴷⴰ ⴳ ⵜⵍⵍⴰ ⵜⵉⵏⵎⵍ ⵏ ⵏⴰⵄⵉⵎⵢⴰ ⴷ ⵜⵏⵎⵍ ⵏ ⵙⵉⴷⵉ ⵃⵙⴰⵢⵏ ⵣⵣⵎⵎⵓⵔⵉ ⴷ ⵜⵉⵏⵎⵍ ⵏ ⵜⵉⴽⵙⵉⵡⵉⵏ, ⵜⵉⵍⵉ ⵓⵍⴰ ⵜⵉⵏⵎⵍ ⵏ ⵉⴳⴳⵉ ⵎⵀⵏⴷ ⴳ ⵜⵇⴱⵉⵍⵜ ⵏ ⴰⵢⵜ ⵄⵉⵙⵉ, ⵏⵎⴰⵜⵜⵉ ⴷ ⵙ ⵉⵏⴽⵏⴰⴼⵏ ⴰⵔ ⴷ ⴳⵉⵙ ⵏⵜⵜⴰⴼⴰ ⵜⵉⵏⵎⵍ ⵏ ⵍⵎⵃⵙⵔ ⵍⵊⴰⵣⵓⵍⵢⴰ ⴷ ⵙⵉⴷⵉ ⵄⴱⴷ ⵍⵡⴰⵙⵄ, ⴷ ⵜⵏⵎⵍ ⵏ ⵉⴼⵔⴰⴹ ⵓ ⵟⴰⵀⴰ ⵏⵏⴰ ⵉⴳⴰⵏ ⵜⴰⵇⴱⵓⵔⵜ ⴳ ⵉⵃⴰⵃⴰⵏ, ⵜⵍⵍⴰ ⴳ ⵜⵇⴱⵉⵍⵜ ⵏ ⵉⵎⴳⵔⴰⴷ, ⵜⵉⵍⵉ ⵓⵍⴰ ⵜⵉⵏⵎⵍ ⵏ ⵙⵉⴷⵉ ⵃⵎⴰⴷ ⵓ ⵎⴱⴰⵔⴽ ⴳ ⵜⵇⴱⵉⵍⵜ ⵏ ⵉⴷⴰ ⵓ ⵜⵖⵓⵎⵎⴰ, ⴷ ⵙⵉⴷⵉ ⵎⵓⵃⵎⵎⴰⴷ ⴰⴱⵓ ⵣⴰⵢⴷ ⴳ ⵜⵇⴱⵉⵍⵜ ⵏ ⵉⴷⴰ ⵓ ⴽⴰⵣⵣⵓ, ⴷ ⵜⵇⴱⵉⵍⵜ ⵏ ⵉⴷⴰ ⵓ ⴳⵕⴹ ⵔⴰⴷ ⴳⵉⵙ ⵏⴱⴷⵔ ⵜⵉⵏⵎⵍ ⵏ ⵙⵉⴷⵉ ⵎⵓⵃⵎⵎⴰⴷ ⴱⵏ ⵄⴱⴷⵍⵍⴰⵀ ⴷ ⵙⵉⴷⵉ ⴱⵓⵄⵜⵎⴰⵏ, ⵉⵍⵉⵏⵜ ⵓⵍⴰ ⵜⵉⵏⵎⴰⵍ ⵏ ⵙⵉⴷⵉ ⴱⵓⵣⴰⴽⴰⵔⵢⴰ ⵢⴰⵃⵢⴰ ⴷ ⵙⵉⴷⵉ ⴱⵓⵍⴱⴰⵔⴰⴽⴰⵜ ⴳ ⵉⴷⴰ ⵓ ⵉⵙⴰⵔⵏ, ⴰⴷ ⵓⵔ ⵏⵜⵜⵓ ⵜⴰⵇⴱⵉⵍⵜ ⵏ ⵉⴷⴰ ⵓ ⴳⵉⵍⵍⵓⵍ ⴷⴰ ⴳ ⵍⵍⴰⵏⵜ ⵜⵉⵏⵎⴰⵍ ⵏ ⵙⵉⴷⵉ ⵃⵙⵙⴰ ⵓ ⵃⵙⵉⵏ ⴷ ⵔⵎⴰ ⴷ ⵡⴰⴷⵓⵣ ⵏ ⵙⵉⴷⵉ ⵎⵏⵚⵓⵔ, ⴷ ⵜⵇⴱⵉⵍⵜ ⵏ ⴰⵢⵜ ⴰⵎⵔ ⵔⴰⴷ ⴳⵉⵙ ⵏⴱⴷⵔ ⴰⵡⴷ ⵏⵜⵜⴰⵜ ⵜⵉⵏⵎⵍ ⵏ ⵍⵊⵉⴷⵉ ⴷ ⵙⵉⴷⵉ ⵃⴰⵎⴷ ⵓⵛⵛⵏ ⴷ ⵜⵉⵏⵎⵍ ⵏ ⵉⵎⵉ ⵡⴰⵙⵉⴼ ⵏ ⴰⵢⵜ ⴰⵎⵔ.

ⴰⵢⴰⴷ ⴰⴽⴽⵯ ⵏⵏⴰ ⵙ ⵏⴻⵏⵏⴰ ⴰⵔ ⴰⵖ ⵉⵎⵎⴰⵍ ⵎⴰⵙ ⴷ ⵜⵉⵇⴱⵉⵍⵉⵏ ⵏ ⵉⵃⴰⵃⴰⵏ ⴷⴰⵔⵙⵏⵜ ⵢⴰⵜ ⵜⵣⴷⴰⵢⵜ ⵎⵇⵇⵓⵔⵏ ⴷ ⵓⵙⴳⴷ ⴷ ⵜⵓⵙⵙⵏⴰ.

ⵜⵉⴳⵔⴰⵡⵉⵏ

ⵜⵉⵇⴱⵉⵍⵉⵏ

ⵉⵇⴱⵉⵍⵏ ⵏ ⵉⵃⴰⵃⴰⵏ ⴳⴰⵏ 12,^[2] ⵙⴳ ⴳⵉⵙⵏ:

ⵍⵉⵙⵎⵎ	ⵜⴰⵡⵊⵉⵡⵉⵏ (2014)^[3]	ⵉⵎⵣⴷⴰⵖⵏ (2014)^[3]
ⵉⴷⴰ ⵓ ⴳⵕⴹ	10000
ⵉⵏⴽⵏⴰⴼⵏ
ⴰⵢⵜ ⵣⵍⵟⵏ
ⵉⴷⴰ ⵓ ⵣⵎⵣⵏ
ⵉⵎⴳⵔⴰⴷ	6,486	1,257
ⵉⴷⴰ ⵓ ⴳⵍⵍⵓⵍ	6,650	1,053
ⵉⴷⴰ ⵓ ⴱⵓⵣⵢⴰ
ⴰⵢⵜ ⵄⵉⵙⵉ	4,143	836
ⵉⴷⴰ ⵓ ⴽⴰⵣⵣⵓ	5,182	1,026
ⵉⴷⴰ ⵓ ⵜⵖⵎⴰ
ⴰⵢⵜ ⴰⵎⵔ-

ⵜⵉⴳⵔⴰⵡⵉⵏ ⵜⵉⵖⵔⵎⵉⵡⵉⵏ

ⵍⵉⵙⵎⵎ	ⵜⴰⵡⵊⵉⵡⵉⵏ (2014)^[3]	ⵉⵎⵣⴷⴰⵖⵏ (2014)^[3]
ⵜⴰⵎⴰⵏⴰⵔ	9,984	2,373
ⵙⵎⵉⵎⵓ	8,026	1,750

ⵜⴰⵎⵢⵉⴳⵔⵜ

ⵜⴰⵎⵢⵉⴳⵔⵜ ⵜⴳⴰ ⴰⵖⴱⴰⵍⵓ ⵏ ⵜⵓⴷⵔⵜ ⵏ ⴽⵉⴳⴰⵏ ⵏ ⵉⵎⵣⴷⴰⵖⵏ ⵏ ⵜⵇⴱⵉⵍⵜ ⵏ ⵉⵃⴰⵃⴰⵏ, ⴰⵔ ⴼⵍⵍⴰⵙ ⵜⴱⵉⴷⴷⴰⴷⵏ ⴱⴰⵀⵔⴰ ⴰⴼⴰⴷ ⴰⴷ ⵟⵟⴰⴼ ⵉⵙⵓⴳⴰⵎ ⵉⴷⵔⵉⵎⵏ , ⴷ ⵜⴼⵍⵍⴰⵃⵜ ⴳ ⵜⵙⴳⴰ ⴰⴷ ⵉⴽⵛⵎ ⴳⵉⵙ :ⵜⴰⴽⵔⵣⴰ ⵏ ⴰⵏⴰⵡⵏ ⵏ ⵜⵓⵎⵥⵉⵏ, ⴷ ⵉⵛⴰⴽⴰⵏ ⴷ ⴰⵏⴽⵯⵡⵏ ⵏ ⵜⴷⴷⴰⴳⵉⵏ ⴰⵎ ⵍⵓⵣ ⴷ ⵓⵔⴳⴰⵏ ⴷ ⵜⵉⴽⵉⴹⴰ ⴰⵔ ⵜⵉⴳⵉⵔⴰ.

ⴰⵙⴳⵎⵉ ⵏ ⵓⵛⵜⴰⵍⵏ ⴰⵡⴷ ⵏⵜⵜⴰ ⵉⴳⴰ ⵢⴰⵏ ⴰⴼⵔⴷⵉⵙ ⴰⴷⵙⵍⴰⵏ ⴷⴰⵔ ⵉⵃⴰⵃⴰⵏ, ⵍⵍⵉⴳ ⴳⴳⵓⵜⵏ ⴳⵉⵙ ⵉⴷⵔⴰⵔⵏ ⵉⵣⵓⴳⵣⴰⵏ ⴷ ⵉⴳⵔⴰⵏ ⵏⵏⴰ ⴽⴰ ⵜⵔⵉⵜ, ⵎⴰⵛⴰ ⴳ ⵉⵙⴳⴳⵯⴰⵙⵏ ⴰⴷ ⵍⵍⵉ ⴷ ⵉⴳⴳⵓⵔⴰⵏ ⴰⵎ ⵜⵎⵏⴰⴹⵜ ⵏ ⵉⴼⴼⵓⵙ ⵜⵙⵙⵏ ⵉⵃⴰⵃⴰⵏ ⵡⴰⴼⴰ ⴷ ⵇⵓⵕⵏ ⵜⵓⴳⴷⵜ ⵏ ⵉⵖⴱⵓⵍⴰ ⵏ ⵡⴰⵎⴰⵏ ⵉⴷⵔⵓⵙ ⵓⵏⵥⴰⵕ, ⵎⵇⵇⴰⵔ ⵉⵍⵍⴰ ⵡⵓⴳⴳⵓⴳⵏ ⵏ ⵡⴰⵎⴰⵏ ⴰⵎ ⵡⴰⵍⵍⵉ ⵉⵍⵍⴰⵏ ⴳ ⵉⵏⴽⵏⴰⴼⵏ ⵎⴰⵛⴰ ⴱⴰⵖⵔⴰⵔ ⵏ ⵉⵔⵉⴼⵉ ⵉⵍⵍⴰ ⵙⵓⵍ.

ⵜⴰⴷⵍⵙⴰ ⴳ ⵜⵇⴱⵉⵍⵜ ⵏ ⵉⵃⴰⵃⴰⵏ

ⴰⵃⵡⴰⵛ ⵏ ⵉⵃⴰⵃⴰⵏ ⵏ ⵜⵎⴰⵏⴰⵔ

ⴰⵃⵡⴰⵛ ⵏ ⵉⵃⴰⵃⴰⵏ ⵏ ⵜⴰⵎⴰⵏⴰⵔ ⵉⴳⴰ ⵢⴰⵜ ⵜⵥⵓⵕⵉ ⵏ ⵓⴼⵕⵕⵊ ⵏⵖ ⵜⴰⵥⵓⵕⵉ ⵜⴰⵏⵙⴷⵔⵓⵔⵎⵜ ⵜⴰⴳⵔⴰⵡⴰⵏⵜ ⵜⴰⵎⵖⵔⵉⴱⵉⵜ ⵜⴰⵎⴰⵣⵉⵖⵜ, ⵜⴻⵜⵜⵢⵓⵙⵙⴰⵏ ⴱⴰⵀⵔⴰ ⵜⵥⵓⵕⵉ ⴰⴷ ⴳ ⵜⵇⴱⵉⵍⵉⵏ ⵏ ⵉⵃⴰⵃⴰⵏ. ⴰⵔ ⵜⵙⵎⵓⵏⴰ ⵜⵥⵓⵕⵉ ⴰⴷ ⴳⵔ ⵓⴷⵔⴰⵣ ⵉⵜⵜⵡⴰⵙⵓⴷⵙⵏ, ⴷ ⵡⴰⵏⵢⴰ ⴰⵎⵥⴰⵡⴰⵏ, ⴷ ⵜⵎⵍⵙⴰ ⵜⵉⵎⵙⵢⵉⵡⵏⵉⵏ, ⴷ ⴰⵔ ⵜⵎⵎⴰⵍ ⵜⵥⵓⵕⵉ ⴰⴷ ⵜⴰⵢⵙⵉ ⵜⴰⴷⵍⵙⴰⵏⵜ ⴷ ⵜⵎⵣⵔⴰⵢⵜ ⵏ ⵜⵇⴱⵉⵍⵉⵏ ⵏ ⵉⵃⴰⵃⴰⵏ ⴷ ⵓⵎⵢⴰⵡⴰⵙ ⴳⵔⴰⵜⵙⵏⵜ. ⵉⴳ ⵓⵃⵡⴰⵛ ⵏ ⵜⵎⴰⵏⴰⵔ ⵙⴳ ⵡⴰⵏⴰⵡⵏ ⵏⵏⵙ ⵏⵏⴰ ⴱⴰⵀⵔⴰ ⵉⵜⵜⵢⵓⵙⵙⴰⵏⵏ ⴷ ⵡⵉⴷ ⵍⵍⵉ ⴱⴰⵀⵔⴰ ⵉⴼⵓⵍⴽⵉⵏⵉⵏ ⵙ ⵓⵙⵏⵎⴰⵍⴰ ⵏⵏⵙ ⵓⵏⵖⵉⴷ.^[4]ⴷ ⵓⵃⵡⴰⵛ ⴰⴷ ⵉⵍⴰ ⵢⴰⵏ ⵡⴰⴷⴷⵓⵔ ⴱⴰⵀⵔⴰ ⵉⵅⴰⵜⵔⵏ ⴳ ⵜⵇⴱⵉⵍⵜ ⵏ ⵉⵃⴰⵃⴰⵏ ⴰⵛⴽⵓ ⵢⵓⵎⵥ ⵓⴽⴰⵏ ⵙⵓⵔ ⴳ ⵓⵃⵡⴰⵛ ⴰⵥⵖⵓⵕⴰⵏ ⵏ ⵜⵇⴱⵉⵍⵉⵏ ⵏ ⵢⵉⵃⴰⵃⴰⵏ. ⴷ ⵡⴰⴷⴷⵓⵔ ⴰⴷ ⵍⵍⵉ ⵉⵍⵍⴰⵏ ⴷⴰⵔ ⵓⵃⵡⴰⵛ ⵏ ⵜⵎⴰⵏⴰⵔ ⵉⴽⴽⴰ ⴷ ⵜⴰⴱⵔⵉⴷⵜ ⵏ ⵜⵎⵙⴽⵔⵜ ⵏⵏⵙⵏ. ⴷ ⵎⴽⵍⵍⵉ ⵙ ⵉⵜⵜⵢⵓⵙⵙⴰⵏ ⴳ ⵜⵎⴰⵏⴰⵔ ⵎⴰⵙ ⴷ ⴽⴽⴰⵏⵜ ⵜⵎⵙⴽⵉⵔⵉⵏ ⴰⴷ ⵜⴰⵎⵓⵣⴰⵢⵜ ⴷ ⵓⴼⵓⴽⵙ ⵏ ⵕⵕⴰⵢⵙ ⴷ ⵓⵙⵏⵎⴰⵍⴰ ⴷ ⵓⵙⵡⵓⴷⴷⵓ ⵏⵏⵙ ⵉⵥⵉⵍⵏ ⵉ ⵜⵔⴰⴱⴱⵓⵜ. ⴷ ⵜⵔⴰⴱⴱⵓⵜ ⴰⴷ ⵜⵍⵍⴰ ⴳⵉⵙ ⵜⵓⴳⴷⵜ ⵏ ⵜⴳⵔⵓⵎⵎⴰ, ⴽⵓ ⵢⴰⵜ ⵜⵍⵍⴰ ⵖⵓⵔⵙ ⵜⵡⵓⵔⵉ ⵏⵏⵙ:

ⵜⴰⵔⴰⴱⴱⵓⵜ ⵏ ⵡⵓⴳⴳⵓⴳ

ⵜⴰⵔⴰⴱⴱⵓⵜ ⴰⴷ ⴰⵔ ⴳⵉⵙ ⵜⴻⵜⵜⵉⵍⵉⵏ ⵉⵎⵃⵓⵡⵛⵏ ⵍⵍⵉ ⵉⵙⴽⴰⵔⵏ ⵢⴰⵏ ⵡⴰⴷⵓⵔ ⵉⴳⴰⴷⴷⴰⵏ, ⴷ ⴰⵔ ⴳⵉⵙ ⵜⴻⵜⵜⵉⵍⵉⵏ ⵓⴳⴳⴰⵔ ⵏ ⵙⵉⵎⵔⴰⵡ ⵏ ⵓⵎⵃⵓⵡⵛ. ⵜⴻⵜⵜⵡⴰⵙⵙⴰⵏ ⵜⵔⴰⴱⴱⵓⵜ ⴰⴷ ⵙ ⵓⵎⵙⴰⵙⴰ ⵏ ⵉⵎⵓⵙⵙⵓⵜⵏ ⵏⵏⵙ. ⴷ ⴰⵔ ⵉⵜⵜⵉⵏⵉ ⵓⵙⵍⵎⴰⴷ ⵎⵓⵃⵎⵎⴰⴷ ⴼⴰⵔⵉⵙ ⵎⴰⵙ ⴷ ⴰⵎⵓⵙⵙⵓ ⵏ ⵉⴹⴰⵕⵏ ⵉⵔⵡⴰⵙ ⴰⵎⵓⵙⵙⵓ ⵏ ⵉⵙⴰⵏ ⵍⵍⵉ ⵉⴳⴰⵏ ⴰⵎⵔⵉⴳ ⵏ ⵉⵎⵏⴰⵢⵏ ⴳ ⵓⵎⵏⵖⵉ. ⴳ ⵢⴰⵜ ⵜⵓⴳⴳⴰ ⵏ ⵕⵕⴰⵢⵙ ⵏ ⵜⵔⴰⴱⴱⵓⵜ ⵏ ⵓⵃⵡⴰⵛ ⵜⵎⴰⵏⴰⵔ, ⵉⵙⴰⵡⵍ ⴳⵉⵙ ⵖⴼ ⵉⵎⵓⵙⵙⵓⵜⵏ ⴰⴷ ⵍⵍⵉ ⵎⵉ ⵉⵜⵜⵉⵏⵉ ⵉ ⴽⵔⴰ ⴳⵉⵜⵙⵏ "ⵉⵄⴰⵡⴷⵏ", ⴷ ⵍⵍⵉ ⵉⴳⴰⵏ ⵜⵉⴷⵓⴳⴰⵎⵉ (ⵉⵙⵎⴰⵍⵏ ⵙ ⵉⴹⵓⴹⴰⵏ) ⵏ ⵕⵕⴰⵢⵙ. ⴷ ⴰⵔ ⵜⵜⵢⵓⴱⴹⴰⵏ ⵉⵄⴰⵡⴷⵏ ⴰⴷ ⵖⴼ ⴽⵕⴰⴹ ⵉⴳⵣⵎⴰⵏ; ⵄⴰⵡⴷ ⵏ 6, ( ⵍⵍⵉ ⵉⵜⵜⵢⵓⵙⵙⴰⵏⵏ ⵙ ⴽⵕⴰⴹ ⵉⵎⵓⵙⵙⵓⵜⵏ: ⴰⵎⵣⵡⴰⵔⵓ ⵉⴳⴰ ⵜ 6 ⵏ ⵜⵉⵢⵢⴰⵜ ⵏ ⵓⴹⴰⵕ ⵙ ⵢⴰⵜ ⵜⴽⴽⵍⵜ; ⵜⵉⵙ ⵙⵏⴰⵜ 6 ⵏ ⵉⵄⵡⴰⴷⵏ, ⴰⴳⵏⵙⵓ "ⵜⵙⵏⵓⵎⴽ 6 ⵏ ⵜⵉⵢⵢⴰⵜ ⵏ ⵓⴹⴰⵕ ⵙ ⵜⵖⵔⴷⵉⵏ"/ⴱⵕⵕⴰ "ⵜⵙⵏⵓⵎⴽ 6 ⵏ ⵜⵢⵜⵉ ⵏ ⵓⴹⴰⵕ ⵙ ⴷⴰⵜ"; ⵜⵉⵙ ⴽⵕⴰⴹⵜ 6 ⵏ ⵉⵄⵡⴰⴷⵏ ⴷ ⵓⴷⵔⴰⵣ). ⵉⵍⵎⵎⴰ ⵄⴰⵡⴷ ⵏ 9, ⴷ ⴳ ⵜⴳⵉⵔⴰ 12 ⵏ ⵉⵄⵡⴰⴷⵏ ⵙ ⵜⵢⵜⵉ ⵏ ⵓⴹⴰⵕ. ⴷ ⴰⵡⴷ ⴰⵔ ⵏⵜⵜⴰⴼⴰ ⵎⴰⵙ ⵉⵍⵍⴰ ⵓⵎⵓⵙⵙⵓ ⵏ "ⴰⵊⵖⴰⵢⵎⵉ", ⵉⵜⵜⵡⴰⵙⵙⴰⵏ ⵙ ⵡⴰⵏⵢⴰ ⵏⵏⵙ ⵉⵔⵡⵉⵏ (Compliqué), ⴷ ⴰⵔ ⵉⵙⵙⵏⵜⵉ ⵙ ⴽⵕⴰⴹⵜ ⵜⵉⵢⵢⴰⵜ ⵜⵉⵎⵢⴰⴹⴼⴰⵕⵉⵏ ⵙ ⵓⴹⴰⵕ ⴰⴼⴰⵙⵉ ⴷ ⵉⴹⴼⵕ ⵜⵏⵜ ⴷ ⵙⵏⴰⵜ ⵜⵉⵢⵢⴰⵜ ⵙ ⵓⴹⴰⵕ ⴰⵥⵍⵎⴰⴹ, ⵉⵍⵎⵎⴰ ⵜⴹⴼⵕ ⵜⵏⵜ ⴷ ⵙⵏⴰⵜ ⵜⵉⵢⵢⴰⵜ ⵜⵉⴼⴰⵙⵉⵢⵉⵏ (ⵙ ⵓⴼⴰⵙⵉ) ⴷ ⵙ ⵓⴹⴰⵕ ⴰⵥⵍⵎⴰⴹ ⵙⵏⴰⵜ ⵜⵉⵢⵢⴰⵜ ⴷ ⴰⵔ ⵉⵜⵜⴳⵓⵔⵓ ⵓⵎⵓⵙⵙⵓ ⴰⴷ ⵙ ⵙⵏⴰⵜ ⵜⵉⵢⵢⴰⵜ ⵜⵉⴼⴰⵙⵉⵢⵉⵏ, ⴹⴰⵕⵜ ⵏⵏⵙⵏⵜ ⴰⵔ ⴷ ⵉⵜⵜⵙⴼⴼⴰⵖ ⵓⵎⴷⵔⴰⵣ ⴰⴹⴰⵕ ⵏⵏⵙ ⴰⴼⴰⵙⵉ ⵙ ⴷⴰⵜ, ⴷ ⵢⵓⵡⵜ ⵙⵔⵙ ⵙⵏⴰⵜ ⵜⵡⴰⵍ ⴷ ⴰⵔ ⵜ ⵉⵙⵙⵓⵔⵔⵉⵢ ⵙ ⵜⵖⵔⴷⵉⵏ ⵙ ⵙⵏⴰⵜ ⵜⵉⵢⵢⴰⵜ ⵉⵎⵢⴰⴹⴼⴰⵕⵏ, ⴷ ⴰⵔ ⵉⵜⵜⵎⵓⵜⵜⵉ ⵉⵍⵎⵎⴰ ⵙ ⴰⴷ ⵉⵙⴼⴼⴰⵖ ⴰⴹⴰⵕ ⵏⵏⵙ ⴰⵥⵍⵎⴰⴹ ⵙ ⴷⴰⵜ, ⴷ ⴰⵔ ⵙⵉⵙ ⵉⴽⴽⴰⵜ ⵙⵏⴰⵜ ⵜⵡⴰⵍ ⴷ ⴰⵔ ⵜ ⵉⴷ ⵉⵙⴼⴼⴰⵖ ⵙ ⴷⴰⵜ, ⴷ ⴰⵔ ⵙⵉⵙ ⵉⴽⴽⴰⵜ ⵙⵏⴰⵜ ⵜⵉⵢⵢⴰⵜ, ⵉⵍⵎⵎⴰ ⴰⵔ ⵉⵜⵜⵓⵔⵔⵉ ⵙ ⴷⴼⴼⵉⵔ, ⴷ ⴰⵔ ⵉⴽⴽⴰⵜ ⵙ ⵓⴹⴰⵕ ⵏⵏⵙ ⵙⵏⴰⵜ ⵜⵉⵢⵢⴰⵜ... ⴷ ⴰⵔ ⵉⵜⵜⵉⵍⵉ ⵡⴰⵍⴰⵙ ⵏ ⵡⴰⵏⵢⴰ ⴰⴷ ⵙ ⵜⴼⵙⵙⵉ, ⴰⴽⴷ ⵓⵎⵙⴰⵙⴰ ⴷ ⵓⵡⵇⵇⵔ ⵏ ⵡⴰⴷⵓⵔ ⴳ ⵜⵉⴳⴳⵉ ⵏ ⵓⵎⵓⵙⵙⵓ.

ⴰⵢⵍⵍⵉ ⵉⵥⵍⵉⵏ ⴰⵎⵓⵙⵙⵓ ⴰⴷ ⵏ ⵓⵊⵖⴰⵢⵎⵉ ⵉⴳⴰ ⵜ ⵡⴰⵏⵢⴰ ⵏⵏⵙ ⵉⵎⵓⵏⵏ ⴷ ⵉⵜⵜⵙⵓⴷⵙⵏ, ⴷ ⵓⵎⵉⵙⵉ/ⵜⵎⵏⴽⵏⵉⵜ ⴳⵔ ⵜⴰⴳⴳⴰⵍⵜ ⵏ ⵜⴼⴽⴽⴰ ⴷ ⵓⵏⵖⴰⴷ ⵏ ⵓⵙⵏⴼⵍⵓⵍ. ⴷ ⴰⵔ ⵉⵜⵜⵉⵔⵉ ⵓⵎⵓⵙⵙⵓ ⵢⴰⵏ ⵓⵙⵏⵜⵓ ⵢⴰⵜⵜⵓⵢⵏ ⴷ ⵓⴼⵔⴰⵢ ⴰⵎⵥⴰⵡⴰⵏ ⴰⵎⵣⵡⴰⵔⵓ/ⴰⵎⵣⵡⵔ, ⴷ ⴱⵍⴰ ⵏⵜⵜⵓ ⴰⵎⵙⴰⵙⴰ ⵏ ⵉⴳⵎⴰⵎⵏ ⵏ ⵜⵔⴰⴱⴱⵓⵜ (ⵉⵎⵃⵓⵡⵛⵏ). ⴷ ⴰⵔ ⵉⵜⵜⵙⵓⵎⵓⵏ ⴰⴼⵓⴽⵙ ⵏ ⵓⵎⴷⵔⴰⵣ (ⵕⵕⴰⵢⵙ) ⴷ ⵓⵏⵛⴽ ⵍⵍⵉ ⵉⴽⴽⴰ ⴳ ⵜⵥⵓⵕⵉ ⴰⴷ ⴷ ⵜⵎⵓⵣⴰⵢⵜ ⵏⵏⵙ ⴳⵉⵙ ⴷ ⵜⵣⵎⵔⵜ ⵏⵏⵙ ⵖⴼ ⴰⴷ ⵉⵎⵙⴰⵙⴰ ⴷ ⵜⵔⴰⴱⴱⵓⵜ ⵏⵖ ⴷ ⴷ ⵓⵎⵙⴰⵙⴰ ⴰⵎⴳⵔⵓ, ⴷ ⵓⵙⴽⴽⵉⵔ/ⵜⵉⴳⴳⵉ ⵏ ⵉⵎⵓⵙⵙⵓⵜⵏ ⵙ ⵜⴱⵔⵉⴷⵜ ⵜⴰⵎⴳⵔⵓⵜ. ⴷ ⵓⵔ ⵉⵍⵍⵉ ⵓⵔⴷⵓ, ⵎⴰⵙ ⴷ ⴰⵎⵓⵙⵙⵓ ⵏ ⵓⵊⵖⴰⵢⵎⵉ ⵉⴳⴰ ⵢⴰⵏ ⵙⴳ ⵉⵎⵓⵙⵙⵓⵜⵏ ⵉⵥⵍⵉⵏ ⵏ ⵓⵃⵡⴰⵛ ⵏ ⵜⵎⴰⵏⴰⵔ, ⵍⵍⵉ ⵜ ⵉⵜⵜⴰⴷⵊⴰⵏ ⴰⴷ ⵉⴳ ⵢⴰⵏ ⵡⴰⵏⴰⵡ ⵉⵥⵍⵉⵏ ⵙ ⵢⵉⵖⴼ ⵏⵏⵙ ⵖⴼ ⵡⴰⵏⴰⵡⵏ ⴰⵏⵏ ⵢⴰⴹⵏⵉⵏ ⵏ ⵓⵃⵡⴰⵛ ⵍⵍⵉ ⴳ ⵉⵃⴰⵃⴰⵏ.

ⴷ ⴰⵔ ⵉⵜⵜⵉⵏⵉ ⵓⵎⵔⵣⵓ ⵓⵙⴰⵎⴰ ⵍⵀⴷⴷⴰⵊ ⵢⴰⵏ ⵙⴳ ⵉⵎⵔⵣⵓⵜⵏ ⴳ ⵢⵉⴳⵔ ⴰⴷ ⵎⴰⵙ ⴷ "ⴰⵎⵓⵙⵙⵓ ⵏ "ⴰⵙⴱⵉⴹⵕ" ⵉⴳⴰ ⴰⵎⵓⵙⵙⵓ ⴰⴼⵓⵀⵔⵉ (ⵏ ⵓⵙⵓⵡⴼ) ⵉ ⵓⴼⵏⴰ ⵏⵖ ⴷ ⵉ ⵓⵙⵏⴳⵓ ⴹⴰⵕⵜ ⵏ ⵜⵕⵥⵉ/ⵜⵔⵉⵔⵉⵜ ⴳ ⵓⵎⵜⵡⵉ". ⴷ ⴽⵓⴷⵏⵏⴰ ⴰⵙⵏ ⵢⴰⴽⴽⴰ ⵕⵕⴰⵢⵙ ⵜⴰⵎⵓⵍⵉ/ⵜⴰⴷⵓⴳⴰⵎⵜ ⴰⴼⴰⴷ ⴰⴷ ⵜⵜ ⵙⴽⵔⵏ, ⴰⵔ ⵉⵜⵜⵍⵀⵓ ⵡⴰⴷⵓⵔ ⵙ ⵜⴽⵏⵉ ⵙ ⵓⵣⴷⴷⴰⵔ, ⵣⵓⵏ ⴷ ⵉⴳ ⵜ ⵛⵛⴰⵏ ⴳ ⵉⴹⴰⵕⵏ ⵏⵏⵙⵏ. ⴷ ⵉⵍⵍⴰ ⵓⵍⴰ ⴰⵎⵓⵙⵙⵓ ⵏ ("ⴹⴹⵕⴱ ⵏ ⵢⵉⴳⵉⵡⵔ, ⴰⴱⵔⴷⴰⴽⴽ ⵏ ⵜⵉⵣⵣⴰ) ⵍⵍⵉ ⵙⴽⴰⵔⵏ ⵙⵉⵏ ⵉⵎⵃⵓⵡⵛⵏ, ⴷ ⴰⵔ ⴷ ⵜⵜⴼⴼⴰⵖⵏ ⵓⴳⴳⵓⴳ ⴷ ⴰⵔ ⵉⵜⵜⴰⵙⵉ ⴽⵓ ⵢⴰⵏ ⵙⴳⵉⵙⵏ ⵙⵏⴰⵜ ⵜⵉⵣⵣⴰ, ⴷ ⵓⵎⵓⵙⵙⵓ ⴰⴷ ⴰⴷ ⵙ ⴰⵔ ⵜⵜⵇⵇⵍⵏ ⵡⵉⵍⵍⵉ ⴰⴽⴽⵯ ⵜⵜⴼⵕⵕⴰⵊⵏⵉⵏ ⵙ ⵓⵚⵚⴰⴱ ⴷ ⵓⵏⵏⵖⵣⵍ.

ⴰⵎⵓⵙⵙⵓ ⵏ ⵓⴱⵔⴷⴰⴽⴽ ⵏ ⵜⵉⵣⵣⴰ ⴷ ⵏⵜⵜⴰ ⴰ ⵖⴼ ⴱⴰⵀⵔⴰ ⵉⴳⴳⵓⵜ ⵡⴰⵡⴰⵍ ⴳ ⵎⴰⴷ ⵉⵥⵍⵉⵏ ⵙ ⵓⵏⴰⵎⴽ ⴷ ⵓⴼⵓⵖ/ⵓⵏⴼⵍⵓⵍⵓ ⵏⵏⵙ, ⵉⵍⵍⴰ ⵎⴰ ⵉⵜⵜⵉⵏⵉⵏ ⵎⴰⵙ ⵉⴳⴰ ⴰⵇⴱⵓⵔ, ⴷ ⴰⵔ ⵉⵎⵎⴰⵍ ⵜⵉⴼⵔⴰⵜ ⴳⵔ ⵜⵇⴱⵉⵍⵉⵏ, ⴰⵛⴽⵓ ⵙⵉⵏ ⵉⵎⵃⵓⵡⵛⵏ ⵍⵍⵉ ⵏⴻⵏⵏⴰ ⴳⴰⵎⵍⵍⵉ ⴰⵔ ⵜⵜⵉⵍⵉⵏ ⴳ ⵙⵏⴰⵜ ⵜⵇⴱⵉⵍⵉⵏ ⵎⵣⴰⵔⴰⵢⵏⵉⵏ ⴷ ⵎⵎⴰⵖⵏⵉⵏ ⴳⵔⴰⵜⵙⵏⵜ ⴰⴷⵍⵍⵉ. ⴷ ⴰⴷ ⵀⵍⵍⵉ ⵙⴽⵔⵏ ⴰⵎⵓⵙⵙⵓ ⴰⵏⵏ ⴰⵔ ⵜⴻⵜⵜⵉⵍⵉ ⵜⵉⴼⴰⵔⵜ ⴳⵔ ⵜⵇⴱⵉⵍⵉⵏ ⴰⵏⵏ. ⴳ ⵢⴰⵜ ⵜⵓⴳⴳⴰ ⵢⴰⴹⵏ, ⵉⵏⵏⴰ ⵜⵜ ⵢⴰⵏ ⵙⴳ ⵉⵎⵃⵓⵡⵛⵏ ⵉⵎⵣⵡⵓⵔⴰ ⵏ ⵉⵃⴰⵃⴰⵏ, ⵉⵏⵏⴰ ⵎⴰⵙ ⴷ ⴹⴹⵕⴱ ⵏ ⵢⵉⴳⵉⵡⵔ ⵉⴳⴰ ⵢⴰⵏ ⵓⵎⵓⵙⵙⵓ ⴰⵎⴰⵢⵏⵓ, ⴷ ⵜⵓⵍⵍⵉⵙⵜ ⵏⵏⵙ ⵉⴳⴰ ⵜⵜ ⵎⴰⵙ ⵜ ⵉⵏⵏ ⵉⴽⴽⴰ ⵎⵃⵏⴷ ⵍⵄⵊⵊⵉⴹ (ⵜⴰⵎⵍⵍⴰ ⵏ ⵕⴱⴱⵉ ⴼⵍⵍⴰⵙ) ⵍⵍⵉ ⵉⴳⴰⵏ ⵢⴰⵏ ⵙⴳ ⵉⵎⵃⵓⵡⵛⵏ ⵏ ⵉⵃⴰⵃⴰⵏ, ⴰⵔ ⵉⵜⵜⵉⵏⵉ ⵉ ⵉⵎⴷⴷⵓⴽⴽⴰⵍ ⵏⵏⵙ ⵎⴰⵙ ⴷ ⵏⵜⵜⴰ ⴰⴷ ⵜ ⵉⴷ ⵢⵓⵡⵉⵏ ⵜⵉⵣⵉ ⵍⵍⵉ ⵉⵙⴽⴰⵔ ⵜⴰⵡⵓⵔⵉ ⵏⵏⵙ (ⴰⵎⴰⵣⵓ) ⴳ ⵓⴳⵓⵔⵏⴰ (ⵍⵎⴳⵣⵣⵔⵜ/ⴰⵙⵖⵔⵙ), ⵢⴰⵙⵉ ⴷ ⵙⵏⴰⵜ ⵜⵉⵣⵣⴰ ⵎⴰⵢⴰⴷ ⵉⵙⵍⵍⴰ ⵉ ⵜⵎⵊⴰ (ⵍⵄⵡⵡⴰⴷ) ⵉⵍⵀⵓ ⵏⵉⵜ ⴰⵔ ⵙⵉⵙⵏ ⵉⵜⵜⵓⵔⴰⵔ ⴰⵢⵍⵍⵉⴳ ⵜ ⵉⵙⵙⵓⵙⵎ ⵓⵎⵓⵙⵙⵓ ⴰⵏⵏ ⵍⵍⵉ ⵉⵙⴽⴰⵔ, ⴷ ⵉⵙⵙⵓⵙⵎ ⵓⵍⴰ ⵡⵉⵍⵍⵉ ⵖⵉⵏⵏ ⵉⵍⵍⴰⵏ. ⴷ ⵙⴳ ⵖⵉⵏⵏ ⴰ ⴳ ⵜ ⵢⵓⵙⵉ ⴰⵔ ⵙⵉⵙ ⴱⴷⴷⴰ ⵉⵜⵜⵓⵔⴰⵔ ⴰⵢⵍⵍⵉⴳ ⵜⵎⵙⴰⵙⴰ ⴷ ⵜⵥⵓⵕⵉ ⵏ ⵓⵃⵡⴰⵛ, ⴷ ⴰⵔ ⵜ ⴱⴷⴷⴰ ⵉⵙⵙⵎⵔⴰⵙ ⴳ ⴽⵓ ⵜⴰⵎⵖⵔⴰ ⴷ ⵓⵣⵎⵣⵣⵓ ⵏⵜⵜⴰ ⴷ ⵓⵎⴷⴷⴰⴽⴽⵯⵍ ⵏⵏⵙ ⵍⵃⵓⵙⴰⵢⵏ ⵡⴰⵔⵅⴰ ⵍⵍⵉ ⵉⵣⴷⴰⵖⵏ ⴳ ⵓⴹⵡⵡⴰⵕ ⵏ ⵉⵎⵔⴰⵢⵏ.

ⴳ ⵢⴰⵜ ⵜⵓⴳⴳⴰ ⵢⴰⴹⵏ, ⵉⵏⵏⴰ ⵢⴰⵏ ⵙⴳ ⵉⵎⵔⵣⵓⵜⵏ ⴳ ⵜⵥⵓⵕⵉ ⵏ ⵓⵃⵡⴰⵛ ⵎⴰⵙ ⴷ ⴰⵢⵍⵍⵉ ⵉⵏⵏⴰ ⴷⴷⴰ ⴱⵉⵀⵉ ⵉⵣⵎⵔ ⵉⵙ ⵉⵥⵍⵉ ⵖⴰⵙ ⴷ ⵓⵣⵎⵣ ⵏⵏⵙ. ⵙ ⵓⵢⴰ, ⵉⵡⴰ ⵀⴰⵜ ⴰⴱⵔⴷⴰⴽⴽ ⴰⴷ ⵏ ⵜⵉⵣⵣⴰ ⵉⴽⴽⴰ ⵜ ⵉⵏⵏ ⴰⴷⵍⵍⵉ ⴳ ⵖⴰⴷ ⵉⵣⵔⵉⵏ ⴷ ⵉⴳⴰ ⴰⵇⴱⵓⵔ ⵓⵔ ⴷ ⴰⵎⴰⵢⵏⵓ, ⵃⴰⵇⵇⴰⵏ ⴳ ⵜⵉⵣⵉ ⴰⵏⵏ ⵉⵛⵇⵇⴰ ⴷ ⵉⵡⵄⵕ ⴷ ⵉⴷⵔⵓⵙ ⵎⴰⴷ ⴰⵙ ⵉⵙⵙⵏⵏ, ⴷ ⵉⵣⵎⵔ ⵉⵙ ⵉⵡⴰⴷⵙ ⴷⴷⴰ ⴱⵉⵀⵉ ⵎⴰⵙ ⵉⴳⴰ ⵓⵏⴰⵔⴰⴳ ⵏⵏⵙ ⴰⵎⵣⵡⴰⵔⵓ ⵍⵍⵉ ⵉⵥⴹⴰⵕⵏ ⴰⴷ ⵉⵙⴽⵔ ⵏⵖ ⴰⴷ ⵉⵙⵖⵓⴷⵓ ⴰⵎⵓⵙⵙⵓ ⵏ ⵜⵉⵣⵣⴰ, ⴷ ⵉⵙⵏⴼⵍⵓⵍ ⴷ ⵉⵔⵏⴰ ⴷ ⴳⵉⵙ ⵉⵎⵓⵙⵙⵓⵜⵏ ⵢⴰⴹⵏⵉⵏ. ⵎⴰⵛⴰ, ⴼⵍⵏ ⵜ ⵉⵇⴱⵓⵔⵏ ⴳ ⵢⴰⵜ ⵜⵉⵣⵉ. ⴷ ⵡⵓⴳⴳⵓⴳ ⴰⴷ ⵏⵖ ⴷ ⴰⴷⵓⵔ ⴰⴷ, ⵉⵍⵍⴰ ⴷⴰⵔⵙ ⵉⵍⵓⴳⵏⵏ ⵏⵏⵙ ⵏⵏⴰ ⵓⵔ ⵉⵅⵚⵚⵉ ⴰⴷ ⵜⵏ ⵉⵣⵔⵉ ⵓⵎⵃⵓⵡⵛ, ⴷ ⵡⴰⵏⵏⴰ ⵜⵏ ⵉⵣⵔⵉⵏ ⴰⵔ ⵜ ⵙⵙⵓⴼⵓⵖⵏ ⵙⴳ ⵡⴰⴷⵓⵔ. ⴰⵎⴷⵢⴰ, ⴰⵙⵍⴳⵏ ⵏ ⵜⵎⵍⵙⵉⵜ ⵍⵍⵉ ⵙ ⵉⵅⵚⵚⴰ ⴰⴷ ⵜⵉⵍⵉ ⵢⴰⵜ ⵜⵎⵍⵙⵉⵜ ⴷⴰⵔ ⵉⵎⵃⵓⵡⵛⵏ ⴽⵓⵍⵍⵓ ⵜⵏ ⵙⴳ ⵓⴳⴰⵢⵢⵓ ⴰⵔ ⴰⴹⴰⵕ. ⴷ ⵓⵢⵍⵍⵉ ⵉⵥⵍⵉⵏ ⵙ ⴽⵔⴰ ⵏ ⵉⵍⴳⴰⵎⵏ ⵢⴰⴹⵏ ⵣⵓⵏ ⴷ:

ⴰⵙⵓⵖⵏ ⵏ ⵓⵙⵢⵉⵡⵏ ⵏ ⵓⴽⵍⵓ.
ⵉⵅⵚⵚⴰ ⴰⴷ ⵉⴳ ⵕⵕⴰⵢⵙ ⵏ ⵜⵔⴰⴱⴱⵓⵜ ⴰⵎⵓⵣⴰⵢ ⴳ ⵜⵥⵓⵕⵉ ⴰⴷ.
ⴰⵡⵇⵇⵔ ⵏ ⵜⴱⵔⵉⴷⵜ ⵏ ⵓⵙⵍⵙⵉ ⴷ ⵉⵍⴳⴰⵎⵏ ⵏⵏⵙ.
ⴰⴷ ⵉⵣⵎⵔ ⵓⵎⴷⵔⴰⵣ ⴰⴷ ⵉⴹⴼⵕ ⴰⵏⴳⵔⴰⵡ ⵏ ⵉⵎⵓⵙⵙⵓⵜⵏ ⴱⵍⴰ ⴰⵙⵏⴱⵓⵜⵜⵍ ⵏⵖ ⵜⴰⵣⵣⴰⵣⵜ.
ⴰⴷ ⵓⵔ ⵍⵙⵉⵏ ⴽⵔⴰ ⵏ ⵜⵎⵙⵔⴰⴳⵜ (ⵍⵎⴰⴳⴰⵏⴰ) ⵏⵖ ⵎⴰⴷ ⵜⵜ ⵉⵔⵡⴰⵙⵏ.
ⴰⴷ ⵓⵔ ⵍⵙⵉⵏ ⵜⵜⵇⴰⵛⵔ(ⵜⴰⵔⵖⵉⵡⵉⵏ).
ⴰⴷ ⴹⴼⵕⵏ ⵉⵎⵓⵙⵙⵓⵜⵏ ⵏ ⵕⵕⴰⵢⵙ ⴷ ⵜⴷⵓⴳⴰⵎⵉⵏ ⵏⵏⵙ.

ⴰⵏⵢⴰ

ⵜⴰⵍⵍⵓⵏⵜ :

ⴳ ⵢⴰⵏ ⵓⵎⵙⴰⵡⴰⵍ ⵏ ⵓⵎⵣⵔⴰⵡ ⵢⴰⵙⵉⵏ ⴰⵣⵡⴰⵖ ⴷ ⵜⵓⴳⴷⵜ ⵏ ⵕⵕⵡⴰⵢⵙ ⵏ ⵉⵃⴰⵃⴰⵏ ⵣⵓⵏ ⴷ ⵕⵕⴰⵢⵙ ⵙⵄⵉⴷ ⴱⵓⵜⴼⵓⵙⵜ, ⵢⴰⵏ ⵙⴳ ⵉⵎⵣⵡⴰⵔⵏ ⵏ ⵜⵥⵓⵕⵉ ⵏ ⵓⵃⵡⴰⵛ ⵏ ⵉⵃⴰⵃⴰⵏ ⵏ ⵜⵎⴰⵏⴰⵔ, ⵉⵙⵙⵍⴽⵏ ⴰⵙ ⵎⴰⵙ ⴷ ⴰⵏⵢⴰ ⴳ ⵜⵥⵓⵕⵉ ⴰⴷ ⵓⵔ ⵉⴳⵉ ⴰⵎⵙⴰⵎⵎⴰ/ⴰⴳⴰⵛⵓⵔⴰⵏ, ⵎⴰⵛⴰ ⴰⵔ ⴼⵍⵍⴰⵙ ⵜⵜⵉⵍⵉⵏ ⴽⵔⴰ ⵏ ⵉⴱⵟⵟⵓⵜⵏ. ⴰⴷ ⵏⵙⵙⵏⵜⵉ ⵙⴳ (ⴰⵙⵉⵢⵙ ⵏⵖ ⴰⵙⵓⵊⴷ ⵏⵖ "ⴰⵣⵣⵓⵔⵔⵓ", ⵉⵡⴰⵍⴰ ⵜ ⵉⴷ ⵡⵓⵍ ⵏ ⵡⴰⵏⵢⴰ (ⵏⵏⵇⵔ) ⵉⵍⵎⵎⴰ ⵙ (ⴰⵙⵏⵅⵍⴼ). ⴷ ⴳ ⵢⴰⵜ ⵜⵓⴳⴳⴰ ⵢⴰⴹⵏ ⵏ ⵕⵕⴰⵢⵙ ⴰⵇⴱⵓⵔ ⵍⵃⵓⵙⴰⵢⵏ ⵡⴰⵛⵔⴰⵔ, ⵍⵍⵉ ⵉⴳⴰⵏ ⴰⵎⵥⵍⴰⵢ ⴳ ⵢⵉⵎⵉⵙ ⵏ ⵜⴰⵍⵍⵓⵏⵜ ⴷ ⵡⴰⵏⵢⴰ ⵏⵏⵙ, ⵉⵙⴰⵡⵍ ⴰⵙ ⵖⴼ ⵜⵓⴷⵔⵜ ⵏⵏⵙ ⵜⴰⵥⵓⵕⴰⵏⵜ, ⴷ ⵉⵏⵏⴰ ⵎⴰⵙ ⵉⵍⵎⴷ ⴰⴼⵓⴽⵙ ⴰⴷ ⵙ ⵜⴷⵔⴰⵡⵜ ⵏⵏⵙ ⴳ ⵜⵎⵖⵔⵉⵡⵉⵏ ⴷ ⵜⴼⵓⴳⵍⵉⵡⵉⵏ, ⴷ ⵉⴽⴽⵓⵙⴰ ⵜⴰⵥⵓⵕⵉ ⴰⴷ ⵙⴳ ⴷⴰⵔ ⴱⴰⴱⴰⵙ (ⵏⵏⴰ ⵉⴳⴰⵏ ⴰⵙⵖⵢⴰⴷ ⵏ ⵡⴰⵏⵢⴰ ⵏ ⵜⵎⵊⴰ) ⴷ ⵡⴰⵏⵜⵜⴰⵢ ⵏⵏⵙ/ⵄⵎⵎⵉⵙ (ⵍⵍⵉ ⵉⴳⴰⵏ ⴰⵙⵖⵢⴰⴷ ⵏ ⵡⴰⵏⵢⴰ ⵏ ⵜⴰⵍⵍⵓⵏⵜ) ⴳ ⵓⵙⴳⴳⵯⴰⵙ ⵏ 1971. ⴷ ⵉⴽⴽⴰ ⵜ ⵉⵏⵏ ⵙⴳ ⵉⴳⵎⴰⵎⵏ ⵍⵍⵉ ⵉⵎⵎⵓⴷⴷⴰⵏ ⵖⵔ ⴼⵕⴰⵏⵚⴰ. ⴷ ⴳ ⵜⵓⴳⴳⴰ ⴰⵏⵏ ⵏⵉⵜ, ⵉⵏⵏⴰ ⵎⴰⵙ ⴷ ⵜⴰⵎⴳⵓⵔⵉ ⵏ ⵜⴰⵍⵍⵓⵏⵜ ⴰⵔ ⵜⴻⵜⵜⵉⵣⵡⵉⵔ ⵙ ⴰⴷ ⵣⵡⴰⵔ ⴰⵡⵉⵏ ⵉⵍⵎ ⵏ ⵡⴰⵖⴰⴹ ⵙⴳ ⵓⴳⵓⵔⵏⴰ/ⵓⵙⵖⵔⵙ ⵏⵖ ⵙⴳ ⵓⴳⴰⴷⴰⵣ, ⴷ ⴰⵔ ⵜ ⵙⵙⵉⵔⵉⴷⵏ ⵙ ⵡⴰⵎⴰⵏ ⵔⵖⴰⵏⵉⵏ ⴷ ⵜⵉⵙⵏⵜ, ⵉⵍⵎⵎⴰ, ⴰⵔ ⵉⵜⵜⵓⵙⵔⴰⵙ ⵖⴼ ⵢⴰⵏ ⵓⴽⵛⵛⵓⴹ ⴰⵡⵔⴻⵔⵔⴰⵢ, ⴷ ⴳ ⵢⵉⵎⵉⵙ ⴰⴷ ⴰⵔ ⵉⵜⵜⵓⵙⵎⵔⴰⵙ ⵓⴽⵛⵛⵓⴹ ⵏ ⵡⴰⵥⵉ/ⵓⵥⵓⴽⴰ, ⵉⵍⵎⵎⴰ ⵙ ⵜⵎⵀⵍⵜ ⵏ ⵜⴳⵏⵉ, ⴷ ⴳ ⵜⴳⵉⵔⴰ ⴰⵔ ⵉⵜⵜⵓⵙⵔⴰⵙ ⵢⵉⵎⵉⵙ ⴰⵏⵏ ⴳ ⵜⴰⴼⵓⴽⵜ ⴰⵔ ⴽⵉⵖ ⵏⵉⵜ ⴱⴰⵀⵔⴰ ⵉⵣⵡⴰ. ⴷ ⵉⵙⵙⵍⴽⵏ ⴰⵙ ⴷⴷⴰ ⵍⵃⵓⵙⴰⵢⵏ ⵙ ⵓⵙⵓⵖⵏ ⵏ ⵓⵙⵏⵓⵃⵢⵓ ⵏⴳⵔ ⵜⴰⵍⵍⵓⵏⵜ ⵉⵜⵜⵡⴰⵙⴽⴰⵔⵏ ⵙ ⵢⵉⵍⵎ ⴷ ⵜⴰⵍⵍⵉ ⵉⵜⵜⵡⴰⵙⴽⴰⵔⵏ ⵙ ⵓⴱⵍⴰⵙⵜⵉⴽ. ⴰⵛⴽⵓ ⵜⴰⵎⵣⵡⴰⵔⵓⵜ ⴰⵔ ⵜⴰⴽⴽⴰ ⵢⴰⵏ ⵢⵉⵎⵙⵍⵉ ⵉⴷⵓⵙⵏ ⴷ ⵉⵏⵖⴱⴰⵏ ⴷ ⵉⴼⵓⵍⴽⵉⵏ ⵓⴳⴳⴰⵔ ⵏ ⵜⵉⵏⵏ ⵏ ⵓⴱⵍⴰⵙⵜⵉⴽ. ⴷ ⵜⴰⵍⵍⵓⵏⵜ ⴰⴷ ⴰⵔ ⵜⵜ ⵙⵙⵎⵔⴰⵙⵏ ⴽⵕⴰⴹ ⵏⵖ ⴷ ⴽⴽⵓⵥ ⵎⴷⴷⵏ ⴳ ⵓⵃⵡⴰⵛ ⴷ ⴰⵔ ⵖⵉⴼⵙⵏ ⵜⵜⵓⴱⴹⴰⵏ ⵉⴱⵟⵟⵓⵜⵏ ⵍⵍⵉ ⵏⴱⴷⵔ ⴳⴰⵎⵍⵍⵉ. ⵙⴳ ⵉⵏⵙⵎⵔⴰⵙⵏ ⵉⵎⵇⵔⴰⵏⵏ ⵏ ⵡⴰⵏⵢⴰ ⴰⴷ: ⵃⵎⴰⴷ ⵓⵄⴱⴷⵓ, ⴱⵉⵀⵉ ⵍⴼⵙⵢⴰⵏ ⴷ ⵢⵉⵡⵉⵙ ⵍⵃⵓⵙⴰⵢⵏ ⵍⴼⵙⵢⴰⵏ, ⵜⴰⵔⵡⴰ ⵏ ⴱⵓⵜⴼⵓⵙⵜ, ⴱⵉⵀⵉ ⵉⴽⵔⵛ... .

ⵏⵏⴰⵇⵓⵙ

ⵉⵎⵉⵙ ⴰⴷ ⵉⴳⴰ ⵢⴰⵏ ⵙⴳ ⵉⵅⴰⵜⴰⵔⵏ ⵏ ⵉⵎⴰⵙⵙⵏ ⵍⵍⵉ ⵉⵄⵣⵣⴰⵏ ⴷⴰⵔ ⵎⴷⴷⵏ ⴰⴷ ⵙⵙⴼⵍⴷⵏ ⵉ ⵜⵏⴰⵏⴰ/ⵓⵙⵔⵙⵔ ⵏⵏⵙ, ⴷ ⵏⵏⴰⵇⵓⵙ ⴰⴷ ⴰⴷ ⵉⵙⵏⵓⵍⴼⵓⵏ ⴰⵎⵢⴰⵙ ⴷ ⵓⵎⵙⴰⵙⴰ ⴳⵔ ⵉⵎⴰⵙⵙⵏ. ⴳ ⵓⵎⴰⵡⴰⵍ ⴰⴼⵕⴰⵏⵚⵉⵚ, ⴰⵔ ⴰⵙ ⵜⵜⵉⵏⵉⵏ "le Tambour de frein" (ⵜⵓⴷⵉⵎⵜ ⵏ ⵓⵎⴰⵡⴰⵖ).^[5]

ⵍⵄⵡⵡⴰⴷ/ⵜⴰⵎⵊⴰ

ⵜⴰⵥⵓⵕⵉ ⵏ ⵓⵃⵡⴰⵛ ⵓⵔ ⵜⵣⵎⵉⵔ ⴰⴷ ⵜⵎⴷ ⴱⵍⴰ ⴰⵏⵢⴰ ⵏ ⵜⵎⵊⴰ. ⴰⵛⴽⵓ ⵉⵍⴰ ⵢⴰⵏ ⵡⴰⵣⴰⵍ ⴰⵎⵇⵔⴰⵏ, ⴷ ⵉⵍⵍⴰ ⵎⴰ ⵉⵜⵜⵉⵏⵉⵏ ⵉ ⵓⵃⵡⴰⵛ ⵍⵄⵡⵡⴰⴷ, ⴷ ⴰⵔ ⵜⵜⵉⵏⵉⵏ ⵙ ⵓⵎⴷⵢⴰ "ⵢⴰⵍⵍⴰⵀ ⴷⴰⵔ ⵍⵄⵡⵡⴰⴷ". ⵓⵟⵟⵓⵏ ⵏ ⵉⵏⵙⵎⵔⴰⵙⵏ ⵏ ⵢⵉⵎⵉⵙ ⴰⴷ ⴰⵔ ⵜⵜⴳⴳⴰⵏ ⴽⵕⴰⴹ ⵏⵖ ⴷ ⴽⴽⵓⵥ ⵏ ⵎⴷⴷⵏ.

ⴳ ⵢⴰⵏ ⵓⵎⵙⴰⵡⴰⵍ ⵏ ⵓⵎⵔⵣⵓ ⵢⴰⵙⵉⵏ ⴰⵣⵡⴰⵖ ⴷ ⵕⵕⴰⵢⵙ ⴱⵕⴰⵀⵉⵎ ⵉⵇⵇⵊⴷⵔ, ⵢⴰⵏ ⵙⴳ ⵉⵏⵙⵎⵔⴰⵙⵏ ⵏ ⵍⵄⵡⵡⴰⴷ ⵙⴳ ⵜⵙⴰⵎⵔⴰⵡⵉⵏ ⵏ ⵜⵊⵕⵎⴰ ⵍⵍⵉ ⵉⵣⵔⵉⵏ, ⵉⵍⵎⴷ ⵜⴰⵥⵓⵕⵉ ⴰⴷ ⵙⴳ ⵖⵓⵔ ⵉⴷ ⴷⴰⴷⴷⴰⵙ/ⵄⵎⵎⵉⵙ. ⴷ ⵉⵙⴰⵡⵍ ⴰⵙ ⵖⴼ ⵜⴼⵔⴽⵉⵡⵉⵏ ⵏ ⵜⵎⴳⵓⵔⵉ ⵏ ⵢⵉⵎⵉⵙ ⴰⴷ ⵏ ⵍⵄⵡⵡⴰⴷ. ⵙ ⵉⵣⵡⴰⵔ ⴰⵔ ⵙⵜⴰⵢⵏ ⴽⵔⴰ ⵏ ⵓⵖⴰⵏⵉⵎ ⵉⴼⵓⵍⴽⵉⵏ ⵏⵖ ⴷ ⵜⴰⵡⵜⵎⵜ ⵏ ⵓⵖⴰⵏⵉⵎ ⵍⵍⵉ ⵙⵓⵔ ⵓⵔ ⵉⵍⵍⵉⵏ ⵖⵉⵍⴰⴷ ⵙ ⵓⵙⵔⴰⴳ ⵏ ⵜⵓⵇⵇⵓⵔⵜ. ⵉⵍⵎⵎⴰ, ⴰⵔ ⴷ ⵜⴻⵜⵜⴰⵛⴽⴰ ⵜⴼⵔⴽⵜ ⵏ ⵓⵙⵖⵓⵙ ⵏ ⵜⵖⴰⵏⵉⵎⵜ ⴳ ⵓⴳⵏⵙⵓ ⴷ ⴰⵔ ⴳⵉⵙ ⵙⴽⴰⵔⵏ ⵚⴹⵉⵚⵜ ⵜⵛⵏⴱⴰ (ⵉⴳⴱⴱⴰⵢⵏ) ⴳ ⵓⴼⵍⵍⴰ, ⴷ ⵢⴰⵏ ⴳ ⵓⵣⴷⴷⴰⵔ ⵏⵏⵙ. ⴷ ⵖⵉⴷ ⵉⵅⵚⵚⴰ ⴰⴷ ⴳⵉⵙ ⵏⵡⵇⵇⵔ ⵜⵉⵎⵙⵖⴰⵍⵉⵏ ⵏ ⵜⵛⵏⴱⴰ ⴷ ⵓⵎⵢⴰⴳⴳⵓⴳ/ⵓⵎⵣⴰⵔⴰⵢ ⴳⵔⴰⵙⵏ ⴰⴼⴰⴷ ⴰⴷ ⵏⵙⵍⵍⴰ ⵉ ⵢⴰⵏ ⵢⵉⵎⵙⵍⵉ ⵏⵖ ⵉ ⵢⴰⵏ ⵡⴰⵏⵢⴰ ⵉⴼⵓⵍⴽⵉⵏ. ⴳ ⵢⴰⵜ ⵜⵓⴳⴳⴰ ⵢⴰⴹⵏ, ⵉⵏⵏⴰ ⴳⵉⵙ ⵃⴰⵙⴰⵏ ⵓⵍⵢⵉⵎⴰⵎ ⵎⴰⵙ ⵍⵍⴰⵏ ⵙⵉⵏ ⵡⴰⵏⴰⵡⵏ ⵏ ⵍⵄⵡⵡⴰⴷ: ⵢⴰⵏ ⵉⵜⵜⵡⴰⵙⴽⴰⵔ ⵙ ⵓⵖⴰⵏⵉⵎ, ⴷ ⵢⴰⵏ ⵉⵜⵜⵡⴰⵙⴽⴰⵔ ⵙ ⵓⵣⴰⵖⵓⵔ ⵍⵍⵉ ⵎⵉ ⵜⵜⵉⵏⵉ ⵍⵄⵡⵡⴰⴷ ⵏ ⵡⴰⵏⴰⵙ. ⵙⵉⵏ ⵉⵜⵙⵏ ⵜⵜⵡⴰⵙⵙⵏⵏ ⵙ ⵜⵓⵏⵖⵉⵍⵜ ⵍⵍⵉ ⵎⵉ ⵜⵜⵉⵏⵉⵏ "ⵜⴰⴽⵎⵓⵎⵜ ⵉⵙⴷⵉⴷⵏ" ⵍⵍⵉ ⵉⴳⴰⵏ ⵜⵓⵙⴷⴰⴷⵜ ⵏ ⵜⵓⵣⵔⵜ (épaisseur) ⴷ ⵢⵉⵎⵙⵍⵉ, ⴷ ⴰⵡⴷ ⵜⵍⵍⴰ ⵜⴽⵎⵓⵎⵜ ⵉⴹⵏⵉⵏ ⴳ ⵜⵓⵣⵔⵜ ⴷ ⵢⵉⵎⵙⵍⵉ.

ⵉⵙⵏⴰⵃⵢⴰ ⵕⵕⴰⵢⵙ ⵄⴱⴷⵍⵍⴰⵀ ⴰⵅⵔⵙⵙⵓⵎ ⴳⵔ ⴽⵕⴰⴹ ⵉⵙⵔⵜⴰⵏ ⵉⴷⵙⵍⴰⵏⵏ ⵏ ⵡⴰⵏⵢⴰ ⵏ ⵜⵎⵊⴰ, ⵍⵍⵉ ⵉⵍⵎⴷ ⵙⴳ ⴷⴰⵔ ⴱⴰⴱⴰⵙ ⵎⵓⵃⵎⵎⴰⴷ ⵓ ⵃⵎⴰⴷ ⴰⵅⵔⵙⵙⵓⵎ ⵍⵍⵉ ⵉⵎⵎⵓⵜⵏ ⴳ 1991. ⴷ ⵉⵍⵎⴷ ⵜⵏ ⵜⵉⵣⵉ ⵍⵍⵉ ⵉⴽⵙⵙⴰ, ⴷ ⴳⴰⵏ ⵉⵙⵔⵜⴰⵏ ⴰⴷ: ⵜⴰⵢⵜⵉ ⵏ ⵓⵙⵜⴰⵔⴰ, ⵜⴰⵢⵜⵉ ⵉⵥⵥⴰⵢⵏ, ⴷ ⵜⵢⵜⵉ ⵏ ⵢⵉⴳⵉⵡⵔ ⵍⵍⵉ ⵉⵜⵜⵢⵓⵙⵙⴰⵏⵏ ⵙ ⵓⴱⵔⴷⴰⴽⴽ ⵏ ⵜⵉⵣⵣⴰ/ⴹⴹⵕⴱ ⵏ ⵢⵉⴳⵉⵡⵔ.

ⵙⴳ ⵉⵏⵙⵎⵔⴰⵙⵏ ⵉⵎⵇⵔⴰⵏⵏ ⵏ ⵡⴰⵏⵢⴰ ⴰⴷ: ⵎⵓⵃⵎⵎⴰⴷ ⵓ ⵄⵍⵉ ⴰⵜⴰⵏⴰⵏ ⵏⵏⴰ ⵉⵜⵜⵡⴰⵙⵙⵏⵏ ⵙ ⴷⴷⴰⵅⵉⵚ, ⵍⵃⵙⵏ ⵓ ⵄⴱⴷⵍⵎⴰⵍⴽ, ⵍⵃⵙⵏ ⴱⵓⵃⵔⵉⵛ, ⵎⵙⵄⵓⴷ ⵙⵜⵜⵉⵏ...^[6]

ⴰⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵏ ⵓⵃⵡⴰⵛ ⵏⵖ ⴷ ⴰⵎⵕⵉⵢⵙ

ⴰⵎⵕⵉⵢⵚ ⴰⴷ ⴰⴷ ⵉⵜⵜⴰⵙⵉⵏ ⵜⴰⵎⵙⵜⴳⴳⴰⵔⵜ ⵏ ⵓⵙⵡⵓⴷⴷⵓ ⵏ ⵓⵃⵡⴰⵛ ⴷ ⵓⵙⵏⵎⴰⵍⴰ ⵏⵏⵙ, ⴷ ⴰⴷ ⵉⴳ ⴰⵎⵓⵣⴰⵢ ⴳ ⵢⵉⴳⵔ ⴰⴷ, ⴷ ⵏⵜⵜⴰ ⴰⴷ ⵢⴰⴽⴽⴰⵏ ⵜⵉⵎⵓⵍⴰ/ⵜⵉⴷⵓⴳⴰⵎⵉⵏ ⵍⵍⵉ ⵙ ⵉⵅⵚⵚⴰ ⴰⴷ ⵜⵏ ⵙⴽⵔⵏ ⵜⵉⵣⵉ ⵍⵍⵉ ⵔⴰⴷ ⵎⵎⴰⵜⵜⵉⵏ ⵙⴳ ⵜⴼⵉⵔⵜ ⴰⵔ ⵜⴰⵢⵢⴰⴹ, ⵏⵖ ⴷ ⵜⵉⵣⵉ ⵏ ⵓⵙⵏⴼⵍ ⵏ ⵓⵎⵓⵙⵙⵓ ⴷ ⵡⴰⵏⵢⴰ, ⴷ ⵙⴳ ⵜⴳⵓⵔⵉⵡⵉⵏ ⵍⵍⵉ ⴱⴰⵀⵔⴰ ⵉⵜⵜⵢⵓⵙⵙⴰⵏⵏ ⴷ ⵍⵍⵉ ⵉⵙⵙⵎⵔⴰⵙ ⵓⵎⵕⵉⵢⵙ: "ⴰⵀ ⴰⵀⴰ" ⵏⵖ "ⴰ ⵢⵢⵉⵢ" ⴷ "ⴰⵙⵜⴰⵡ ⴰⵀⵢⴰⵡ!" ⵏⵖ "ⴰⵀⵢⴰⵡ ⵡⵙⵜⴰ ⵀⵢⴰⵡ !". ⴰⵔ ⵉⵜⵜⵉⵏⵉ ⵕⵕⴰⵢⵙ ⵄⵓⵎⴰⵕ ⴱⵓⵄⵊⵉⵏ ⵉⵡⵉⵙ ⵏ ⵓⵅⴰⵜⴰⵔ ⵏ ⵓⵃⵡⴰⵛ ⵏ ⵉⵃⴰⵃⴰⵏ ⴱⵉⵀⵉ ⴱⵓⵄⵊⵉⵏ ⴷ ⵓⵎⵕⵉⵢⵙ ⵏ ⵜⵔⴰⴱⴱⵓⵜ ⵏ ⵓⵃⵡⴰⵛ ⵏ ⵜⵎⴰⵏⴰⵔ, ⵎⴰⵙ ⵉⵃⵎⵍ ⵜⴰⵥⵓⵕⵉ ⴰⴷ ⵙⴳ ⵎⴰⴷ ⵉⵎⵥⵥⵉ. ⴷ ⴰⵔ ⵉⵙⴽⴰⵔ ⵜⴰⵔⴰⴱⴱⵓⵜ ⵏⵏⵙ ⵉⵎⵥⵥⵉⵢⵏ ⴷ ⵉⵎⴷⴷⵓⴽⴽⴰⵍ ⵏⵏⵙ ⴰⴼⴰⴷ ⴰⴷ ⵃⵓⵡⵛⵏ, ⴷ ⴰⵔ ⵉⵍⵙⵙⴰ ⵜⵉⵎⵍⵙⴰ ⵏ ⴱⴰⴱⴰⵙ ⵍⵍⵉ ⵉⵍⵙⵙⴰ ⵙ ⵓⵃⵡⴰⵛ. ⴷ ⴰⵔ ⴱⴷⴷⴰ ⵉⵙⵙⵓⵙⵓⵎ ⵉⵙⵍⵎⴰⴷⵏ ⵏⵏⵙ ⴷ ⵉⴽⴽⴰ ⵜ ⵉⵏⵏ ⵉⴳⴰ ⵢⴰⵏ ⵓⵄⵔⵔⵉⵎ ⵍⵍⵉ ⴱⴰⵀⵔⴰ ⵉⵜⵜⵙⴷⵉⴽⵏ ⴽⵓⴷⵏⵏⴰ ⵉⵥⵕⵕⴰ ⴰⵃⵡⴰⵛ ⴳ ⴽⵔⴰⵢⴳⴰⵜⵜ ⴰⵣⵎⵣⵣⵓ ⵏⵖ ⵜⴰⵎⵖⵔⴰ. ⴷ ⵉⵍⵀⴰ ⴰⵔ ⵉⵜⵜⵍⵎⴰⴷ ⵉⵎⵓⵙⵙⵓⵜⵏ ⴰⵏⵏ ⴰⵢⵍⵍⵉⴳ ⴰⵙⵏ ⵉⵙⵙⵏ, ⴷ ⵉⵍⵎⴷ ⴽⵉⴳⴰⵏ ⴷⴰⵔ ⵕⵕⴰⵢⵙ ⵓⵜⵙⵓⴽⴰ, ⵍⵍⵉ ⵜ ⵉⵏⵏ ⵉⴽⴽⴰⵏ ⵉⴳⴰ ⵛⵛⵉⵅ ⵏⵏⵙ ⴳ ⵜⵥⵓⵕⵉ ⴰⴷ. ⴷ ⵉⴳ ⵖⵉⵍⴰⴷ ⵄⵓⵎⴰⵕ ⴱⵓⵄⵊⵉⵏ ⵢⴰⵏ ⵙⴳ ⵉⵙⵍⵎⴰⴷⵏ ⵉⵎⵇⵇⵔⴰⵏⵏ ⵏ ⵜⵥⵓⵕⵉ ⴰⴷ, ⴷ ⵢⵉⵡⵣ ⵖⴼ ⵓⴹⴰⴽⴰⵍ ⵏ ⵓⵣⴷⴷⵓⵢ ⵏⵏⵙ ⴱⵍⴰ ⴽⵔⴰ ⵏ ⵓⵙⴼⵙⴰ ⴷ ⵓⵔⵊⴰⵏ ⵏⵏⵙ. ⴷ ⵉⵙⵙⵍⴽⵏ ⴰⵙ ⴰⵡⴷ ⵖⴼ ⵜⵓⴳⴷⵜ ⵏ ⵉⴼⵔⵉⵙⵏ ⵍⵍⵉ ⵉⵅⵚⵚⴰⵏ ⴰⴷ ⵉⵍⵉⵏ ⴳ ⵓⵎⵕⵉⵢⵙ:

ⴰⴳⵍⵍⴰ ⴷ ⵜⵓⵎⵎⵍⴰ ⵜⴰⵣⴷⴷⴰⴳⵜ. ⵜⵉⵏⵏⵓⵥⴰ ⴷ ⵜⵉⵏⵥⴻⵥⵜ. ⴰⵖⵓⴷⵓ ⵏ ⵓⵎⵓⴳⴳⵓ/ⵓⵎⵙⵓⵔⵓⴼ ⴷ ⵉⴳⵎⴰⵎⵏ ⵏ ⵜⵔⴰⴱⴱⵓⵜ ⴷ ⵓⴳⴷⵓⴷ. ⴰⴹⴰⴽⴰⵍ ⵏ ⵓⵣⴷⴷⵓⵢ ⵏ ⵜⵥⵓⵕⵉ ⴰⴷ ⴱⵍⴰ ⴽⵔⴰ ⵏ ⵓⵙⴼⵙⴰ ⴷ ⵓⵔⵊⴰⵏ. ⵜⴰⵣⵎⵔⵜ ⵖⴼ ⵓⵥⵉⴹⵕ ⵏ ⵜⵎⵙⵜⴳⴳⴰⵔⵜ ⵜⴰⵏⵎⴷⵓⵜ ⵜⵉⵣⵉ ⵏ ⵍⵍⵉ ⵉⵜⵜⵕⵉⵢⵙ ⵜⴰⵔⴰⴱⴱⵓⵜ. ⴰⴷ ⴷⴰⵔⵙ ⵢⵉⵍⵉ ⵢⵉⵎⴰⵏ ⵏ ⵜⵥⵓⵕⵉ ⵎⵇⵇⴰⵔ ⵓⵔ ⵍⵍⵉⵏ ⵜⵖⵔⴰⴷ.

ⵜⴰⵡⵓⵔⵉ ⵏ ⵓⵎⵕⵉⵢⵙ, ⵉⵙⵏⴼⵍⵓⵍ ⴳⵉⵙ ⵜⵓⴳⴷⵜ ⵏ ⵕⵕⵡⴰⵢⵙ ⵉⵅⴰⵜⴰⵔⵏ ⵏ ⵓⵃⵡⴰⵛ ⵏ ⵉⵃⴰⵃⴰⵏ ⵣⵓⵏ ⴷ (ⴰⵄⵕⴰⴱ ⵣⵔⴱⴰⵏ, ⵓⵜⵙⵓⴽⴰ, ⵉⴷⴰⵎⵎⵏ, ⵙⴰⵄⵉⴷ ⵓⵃⵓⴷⴰ, ⵃⴰⵙⴰⵏ ⵓⵎⵓⵍⵉⴷ, ⵎⵓⵃⵎⵎⴰⴷ ⵣⵔⴱⴰⵏ, ⴰⵄⵕⴰⴱ ⴱⵓⵄⵊⵉⵏ, ⵄⴱⴷⵕⵕⵃⵎⴰⵏ ⵓⵊⴷⴷⵉ...).^[7]^[8]

ⵜⵉⵎⵍⵙⵉⵜ

ⵉⵎⵎⴰ ⴰⵢⵍⵍⵉ ⵉⵥⵍⵉⵏ ⵙ ⵜⵎⵍⵙⴰ, ⴷ ⴰⵎ ⵓⵢⵍⵍⵉ ⵙ ⵏⴻⵏⵏⴰ ⴳⴰⵎⵍⵍⵉ, ⵎⴰⵙ ⴰⵔ ⵜⴻⵜⵜⵉⵍⵉ ⵢⴰⵜ ⵜⵎⵍⵙⵉⵜ ⵉⵎⵎⵔⵡⴰⵙⵏ ⴷⴰⵔⵙⵏ ⴽⵓⵍⵍⵓ ⵜⵏ, ⵜⵉⵎⵍⵙⵉⵜ ⴰⴷ ⴰⵔ ⴳⵉⵙ ⵜⴻⵜⵜⵉⵍⵉ ⵕⵥⵥⴰ ⵜⵓⵎⵍⵉⵍⵜ ⴷ ⵜⴼⴰⵕⴰⵊⵉⵢⵜ ⵏⵖ ⵍⴼⴰⵕⴰⵊⵉⵢⴰ ⵎⵎⵓ ⵓⴽⵍⵓ ⵓⵎⵍⵉⵍ. ⴷ ⴰⵔ ⵉⵜⵜⵉⵏⵉ ⵓⵎⵔⵣⵓ ⵓⵙⴰⵎⴰ ⵍⵀⴷⴷⴰⵊ ⵎⴰⵙ ⴷ ⴰⴽⵍⵓ ⴰⵎⵍⵍⴰⵍ ⵉⴳⴰ ⵜⵉⵎⵍⵙⵉⵜ ⵏ ⵢⵉⵎⵏⵖⵉ ⴷⴰⵔ ⵉⵃⴰⵃⴰⵏ. ⴷ ⵜⵜⵛⴰⵎⵉⵔ ⵍⵍⵉ ⵉⵍⴰⵏ ⵢⴰⵏ ⵓⵎⴳⴳⵕⴹ ⵉⵟⵟⴰⴼⵏ ⴽⵔⴰ ⵏ ⵜⵊⵔⵔⴰⵢ ⴳ ⵜⵙⴳⴰ ⵜⴰⵥⵍⵎⴰⴹⵜ ⴷ ⴰⵔ ⵜⴻⵜⵜⵢⵓⵍⵙⵙⴰ ⴷⴷⵓ ⵏ ⵜⴼⴰⵕⴰⵊⵉⵢⵜ. ⴷ ⴰⵡⴷ ⵍⴽⵎⵎⵉⵢⵜ ⵍⵍⵉ ⵉⵜⵜⵢⴰⴳⴰⵍⵏ ⵖⴼ ⵜⵙⴳⴰ ⵜⴰⵥⵍⵎⴰⴹⵜ ⵏ ⵓⵎⵃⵓⵡⵛ, ⴷ ⵜⵖⴰⵡⵙⴰ ⵜⵉⵙ ⴽⴽⵓⵥⵜ ⵉⴳⴰ ⵜⵜ ⴰⴷⵓⴽⵓ ⵍⵍⵉ ⵉⵜⵜⵢⵓⵙⴽⴰⵔⵏ ⴳ ⵢⵉⵍⵎ ⴷ ⴰⴷ ⵉⴳ ⵓⴽⵍⵓ ⵏⵏⵙ ⵓⵎⵍⵉⵍ.

ⵉⵍⵍⴰ ⵉⵎⵉⴽⴽ ⵏ ⵓⵎⵣⴰⵔⴰⵢ ⵏⴳⵔ ⵜⵎⵍⵙⵉⵜ ⵏ ⵜⵔⴰⴱⴱⵓⵜ ⵏ ⵡⵓⴳⴳⵓⴳ ⴷ ⵜⵉⵏⵏ ⵏ ⵓⵎⵕⵉⵢⵙ. ⴰⵎⴳⴳⴰⵔⵓ ⴰⴷ ⴰⵔ ⴷ ⵉⵔⵏⵏⵓ ⵉ ⵜⵎⵍⵙⵉⵜ ⵍⵍⵉ ⵏⴱⴷⵔ "ⴰⵊⵊⴱⵉⵔ" ⵏⵖ "ⴰⵇⵔⴰⴱ", ⵍⵍⵉ ⵉⵥⵍⵉⵏ ⵖⴰⵙ ⵙ ⵓⵏⵙⵙⵉⵅⴼ ⵏ ⵜⵔⴰⴱⴱⵓⵜ.

ⴰⵃⵡⴰⵛ ⵏ ⵜⵎⵖⴰⵔⵉⵏ ⴳ ⵉⵃⴰⵃⴰⵏ

ⴰⵃⵡⴰⵛ ⵏ ⵜⵎⵖⴰⵔⵉⵏ ⵏⵖ ⴷ ⵍⵀⴹⵕⵜ ⵏ ⵜⵎⵖⴰⵔⵉⵏ. ⵉⴳⴰ ⵢⴰⵏ ⵡⴰⵏⴰⵡ ⵉⵥⵍⵉⵏ, ⴷ ⵓⵃⵡⴰⵛ ⴰⴷ ⴰⵔ ⴳⵉⵙ ⵜⵜⵓⵙⴽⴰⵔⵏ ⵜⵓⴳⴷⵜ ⵏ ⵉⵎⵓⵙⵙⵓⵜⵏ ⴷ ⵉⴷⵔⴰⵣⵏ, ⴷ ⴰⵔ ⵜⵜⵎⵓⵏⴰⵏⵜ ⴳ ⵉⴷⵖⴰⵔⵏ ⵉⵥⵍⵉⵏ ⵙⵉⵙⵏⵜ ⴳ ⵓⴳⵏⵙⵓ ⵏ ⵜⴳⵎⵎⴰ ⴷ ⵓⵔ ⴰⵔ ⴷⵉⴷⵙ ⵜⵜⵉⵍⵉⵏ ⵉⵔⴳⴰⵣⵏ. ⴷ ⵉⴷ ⵃⵉⵏⴰ ⴰⵔ ⵜⵜⴳⴳⴰⵏ ⵉⵔⴳⴰⵣⵏ ⵏ ⵓⴹⵡⵡⴰⵕ ⴰⵏⵏ ⵖⴰⵙ ⵉⵎⵙⴼⵍⵉⴷⵏ ⵏⵖ ⵉⴳⴷⵓⴷⵏ, ⴷ ⵓⵔ ⴰⵙ ⵢⵓⴼⵉ ⵓⴱⵕⵕⴰⵏⵉ ⴰⴷ ⵢⵉⵍⵉ ⴳⵔ ⵉⵔⴳⴰⵣⵏ ⴰⵏⵏ.

ⴳ ⵓⵃⵡⴰⵛ ⵏ ⵜⵎⵖⴰⵔⵉⵏ ⴳ ⵉⵃⴰⵃⴰⵏ, ⴰⵔ ⵜⵜⵓⵙⵎⵔⴰⵙⵏ ⵉⵎⴰⵙⵙⵏ ⵥⵍⵉⵏⵉⵏ ⴰⵎ ⵏⵏⴰⵇⵓⵙ ⴷ ⵓⴽⴱⴰⵍ ⴷ ⵜⴳⵏⵣⴰ. ⴷ ⴰⵔ ⴽⵓⵍⵍⵓ ⴷⵔⵔⵓⵏⵜ ⵜⵎⵖⴰⵔⵉⵏ ⵙ ⵓⵃⵡⴰⵛ ⴷ ⵓⵎⴰⵔⴳ ⴰⵎⴳⵔⵓ ⴷ ⴰⵔ ⵜⵜⵙⵎⵙⴽⴰⵍⵏⵜ ⵉⵣⵍⴰⵏ ⴷ ⵡⴰⵏⵢⴰⵜⵏ ⴷ ⵜⴳⵓⵔⵉⵡⵉⵏ, ⴷ ⴰⵡⴷ ⵜⵉⵖⵔⵉⵜⵉⵏ ⵍⵍⵉ ⴱⴰⵀⵔⴰ ⵉⵙⵜⴰⵡⵀⵎⵎⴰⵏ ⴳ ⵓⵃⵡⴰⵛ ⵏⵏⵙⵏⵜ. ⴰⵔ ⵜⵜⵎⵔⴰⵔⴰⵏⵜ ⴰⴷⵔⴰⵣ ⵢⴰⵜ ⵙ ⵢⴰⵜ, ⴷ ⴰⵔ ⵜⴻⵜⵜⵓⵙⵔⴰⵙ ⵛⵛⴼⵏⴰ ⵏ ⵓⴱⵔⴷⵉⴽⴽ ⴳ ⵜⵓⵥⵥⵓⵎⵜ ⵏⵏⵙⵏⵜ ⵎⴳⴰⵍ ⵏ ⵓⵃⵡⴰⵛ ⵏ ⵉⵔⴳⴰⵣⵏ, ⵍⵍⵉⴳ ⵓⵔ ⴰⵔ ⴳⵉⵙ ⴰⴽⴽⵯ ⴷⵔⵔⵓⵏⵜ ⵜⵎⵖⴰⵔⵉⵏ; ⵎⴰⵛⴰ ⴳ ⴽⵔⴰ ⵏ ⵜⴽⴽⴰⵍ ⴰⵔ ⵜⴷⵔⵔⵓ ⵜⵎⵖⴰⵔⵜ ⵜⴰⵎⵛⵛⴰⵢⴱⵓⵜ ⴰⵎ ⵜⵎⴷⵢⴰⵣⵜ ⵎⴰⵛⴰ ⵉⵅⵚⵚⴰ ⴰⴷ ⵏⵏ ⵜⵉⵍⵉ ⴳ ⵢⴰⵜ ⵜⵃⴰⵏⵓⵜ ⵉⵥⵍⵉⵏ ⵏⵖ ⴷ ⴰⴷ ⵜⵃⴱⵓ ⵓⴷⵎ ⵏⵏⵙ ⵙ ⴽⵔⴰ ⵏ ⵓⵎⵍⵃⴰⴼ ⵏⵖ ⴽⵔⴰ ⵢⴰⴹⵏ ⴰⴼⴰⴷ ⴰⴷ ⵓⵔ ⵢⵓⵎⴰⵏ ⵎⴰⴷ ⵜⴳⴰ, ⴷ ⵜⵖⴰⵡⵙⴰ ⴰⴷ ⵓⵔ ⴰⵔ ⵜⵜ ⵙⵓⵔ ⵙⴽⴰⵔⵏ ⵜⵇⴱⵉⵍⵉⵏ ⵏ ⵉⵃⴰⵃⴰⵏ ⴷ ⵓⵔ ⵙⵓⵔ ⵜⵍⵍⵉ ⴳ ⵓⴱⴰⵔⴰⵣ ⵏ ⵓⵃⵡⴰⵛ ⴳ ⵓⵣⵎⵣ ⴰⴷ.^[9]

ⵜⴰⵥⵓⵕⵉ ⵏ ⵉⵙⵎⴳⴰⵏ ⵏ ⵉⵃⴰⵃⴰⵏ

ⵜⴰⵥⵓⵕⵉ ⵏ ⵉⵙⵎⴳⴰⵏ ⵏ ⵉⵃⴰⵃⴰⵏ ⴷ ⵢⴰⵜ ⵜⵥⵓⵕⵉ ⵏ ⵓⴼⵕⵕⵊ ⴷ ⵢⴰⵜ ⵜⴰⵢⵙⵉ ⵉⴱⵖⵔⵏ, ⵍⵍⵉⴳ ⴷⴰ ⵜⵙⵎⵓⵏⴰ ⴳⵔ ⵓⵃⵡⴰⵛ ⴰⵎⴳⵔⵓ ⴷ ⵡⴰⵏⵢⴰ ⴰⵎⵥⴰⵡⴰⵏ ⴷ ⵜⵎⵢⵓⵔⵉⵏ ⵜⵉⴼⵓⴳⵍⴰⵏⵉⵏ. ⴽⴽⴰⵏ ⴷ ⵉⵥⵓⵕⴰⵏ ⵏⵏⵙ ⵉⴷⵍⵙⴰⵏⵏ ⵜⴰⴼⵔⵉⵇⵜ ⵙⵍⴰⵡⴰⵏ ⴰⴽⴽⵯ ⵉⴼⴼⵓⵙ ⵏ ⵜⵏⵣⵔⵓⴼⵜ, ⵜⵣⴷⵖ ⴳ ⵎⵏⵏⴰⵡⵜ ⵜⵎⵏⴰⴹⵉⵏ ⵜⵉⵎⵖⵔⴰⴱⵉⵢⵉⵏ,^[10] ⵙⵍⴰⵡⴰⵏ ⴰⴽⴽⵯ ⵜⵇⴱⵉⵍⵜ ⵏ ⵉⵃⴰⵃⴰⵏ ⵍⵍⵉ ⴳ ⵜⵜ ⵉⵏⵏ ⵜⴽⴽⴰ ⵎⵓⴳⴰⴷⵓⵔ ⴰⵔ ⵜⵙⴽⴰⵔ ⴽⵔⴰ ⵏ ⵜⵓⵇⵇⵏⵉⵡⵉⵏ ⵜⵉⵙⵖⵏⵣⵉⵜⵉⵏ ⴰⴽⴷ ⵜⵇⴱⵉⵍⵉⵏ ⵏ ⵉⴼⴼⵓⵙ ⵏ ⵜⵏⵣⵔⵓⴼⵜ ⵏ ⵜⴼⵔⵉⵇⵜ ⵙⴳ ⵎⴰⴷ ⵉⵜⵜⵓⵙⵙⵔⵙⵍ ⵓⴼⵜⴰⵙ (ⵎⵕⵚⴰ) ⴳ ⵓⵣⵎⵣ ⵏ ⵓⴳⵍⵍⵉⴷ ⵎⵓⵍⴰⵢ ⵎⵓⵃⵎⵎⴰⴷ ⴱⵏ ⵄⴱⴷⵉⵍⵍⴰⵀ ⴳ ⵓⵙⴳⴳⵯⵙ ⵏ 1965, ⴷ ⴽⴽⴰⵏ ⵜⵜ ⵉⵏⵏ ⵙⴳ ⵜⵢⴰⴼⵓⵜⵉⵏ ⵏ ⵓⵢⴰⴷ ⴰⵎⵢⴰⴳⴳⴰ ⵏ ⵉⵃⴰⵃⴰⵏ ⴷ ⵉⵙⵎⴳⴰⵏ ⴰⵢⵍⵍⵉ ⴰⵖ ⵉⴼⴽⴰⵏ ⴰⴷⵔⴰⵣ ⵏ ⵉⵙⵎⴳⴰⵏ ⴰⵎⴰⵣⵉⵖ ⵏⵏⴰ ⴷⴰⵔ ⵍⵍⴰⵏ ⵉⵥⵓⵕⴰⵏ ⵉⴼⵔⵉⵇⵉⵢⵏ. ⴷ ⵙⴳ ⵜⵇⴱⵉⵍⵉⵏ ⵏⵏⴰ ⴱⴰⵀⵔⴰ ⵉⵜⵜⵢⵓⵙⵙⴰⵏⵏ ⵙ ⵜⵥⵓⵕⵉ ⴰⴷ ⵉⴳⴰ ⵜⵏ ⵜⵉⴳⵎⵎⵉ ⵏ ⵍⵓⴹⴰ ⴳ ⵉⴷⴰ ⵡⵉⵙⴰⵔⵏ ⴷ ⵓⴹⵓⵡⵡⴰⵕ ⵏ ⵍⵄⴱⵉⴷ ⵏⵖ ⴷ ⵜⵎⴰⵏⴰⵔ ⴷ ⵙⵎⵉⵎⵓ ⴳ ⵉⴷⴰ ⵓ ⴳⵍⵍⵓⵍ.^[11]

ⴰⵥⵓⵕ ⵏ ⵓⵙⵎⵎⵉ ⴷ ⵉⵥⵓⵕⴰⵏ ⵉⵎⵣⵔⵓⵢⴰⵏⵏ

ⴷⴰ ⵜⵎⵎⴰⵍ ⵜⴳⵓⵔⵉ ⵏ "ⵉⵙⵎⴳⴰⵏ" ⴳ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵉⴼⴳⴰⵏⵏ ⵍⵍⵉ ⴳⴰⵏⵉⵏ ⵉⵙⵓⵇⵇⵉⵢⵏ. ⵜⵣⴷⵉ ⵜⵥⵓⵕⵉ ⴰⴷ ⴳ ⵓⵎⵣⵔⵓⵢ ⴷ ⵜⵓⵎⴰⵏⵜ ⵏ ⵓⴽⴽⵍⵓ^[12] ⵜⴰⵣⴰⵢⴽⵓⵜ, ⵍⵍⵉⴳ ⵜ ⵉⵏⵏ ⵉⴽⴽⴰⵏ ⵉⴽⵍⵉⵢⵏ ⴷⴰ ⵙⴽⴰⵔⵏ ⵜⵉⵎⵢⵓⵔⵉⵏ ⴰⴷ ⴰⵎ ⵢⴰⵏ ⵢⵉⵎⵉⵙ ⵏ ⵓⵙⵏⵥⵉ ⵏ ⵢⵉⵖⴼ ⴷ ⵓⵃⵟⵟⵓ ⵏ ⵉⵙⵖⵓⵏⵏ ⵉⴷⵍⵙⴰⵏⵏ ⴰⴽⴷ ⵉⵥⵓⵕⴰⵏ ⵏⵏⵙⵏ ⵉⴼⵔⵉⵇⵉⵢⵏ. ⵙ ⵓⵣⵔⴰⵢ/ⵢⵉⵙⵉⴽⴽⵉ ⵏ ⵡⴰⴽⵓⴷ, ⵉⵏⴼⵍ ⵡⴰⵢⴷⴰ ⴰⴷ ⵙⴳ ⵜⵖⵓⵢⵢⵉⵜ ⵏ ⵜⵎⴰⵔⴰ ⵖⵔ ⵢⴰⵜ ⵜⵥⵓⵕⵉ ⵜⴰⴼⵓⴳⵍⴰⵏⵜ ⵍⵍⵉ ⵉⵎⵎⴰⵍⵏ ⴰⵙⵉⴷⴼ ⵓⵎⵎⵉⴷ ⴳ ⵡⴰⵎⵓⵏ ⴰⵎⴰⵢⵏⵓ ⴰⴽⴷ ⵓⵃⵟⵟⵓ ⵏ ⵜⵡⴳⴳⴹⵜ ⵏ ⵉⵎⵣⵡⵓⵔⴰ. ⴷ ⵜⴽⴽⴰ ⵜⵜ ⵉⵏⵏ ⵉⵃⴰⵃⴰⵏ ⵜⵙⵙⵏ ⵢⴰⵏ ⵓⵔⴳⴳⵉⴳ ⵏ ⵉⵙⵎⴳⴰⵏ ⴳ ⵜⵇⴱⵉⵍⵜ ⴰⴷ ⵙⴳ ⵉⵣⵎⴰⵣ ⵣⵔⵉⵏⵉⵏ ⴷ ⵙⵡⵓⵔⵉⵏ ⴳ ⵜⵖⵔⵎⵉⵏ ⵏ ⵜⵎⵙⵓⵍⵜⵉⵡⵉⵏ ⵏ ⵜⵎⵓⵣⵔⵉⵏ ⵜⵉⴷⵖⵔⴰⵏⵉⵏ, ⴷ ⴼⴼⴰⵖⵏ ⴷ ⴽⵔⴰ ⵏ ⵉⵙⵓⵏⵏ ⵏⵏⴰ ⵉⴳⴰⵏ ⵙ ⵡⴰⵙⵙⴰⵖ ⵉⴹⵓⵡⵡⴰⵕⵏ ⵏ ⵍⵄⴱⵉⴷ ⴰⵢⵍⵍⵉ ⵢⵓⵡⵙⵏ ⴳ ⵓⵎⵢⵉⴷⵉⵔ ⵏ ⵜⴷⵍⵙⴰ ⵏⵏⵙⵏ ⴷ ⵜⴷⵍⵙⴰ ⵜⴰⵎⴰⵣⵉⵖⵜ ⴰⵢⵍⵍⵉ ⵢⵓⵡⵙ ⴳ ⵓⵙⵓⴼⵖ ⵏ ⵜⵥⵓⵕⵉ ⴰⴷ ⵏ ⵉⵙⵎⴳⴰⵏ ⴳ ⵉⵃⴰⵃⴰⵏ.

ⵜⵉⵎⵥⵍⴰⵢ ⵜⵉⵏⴰⵥⵓⵕⵉⵏ ⴷ ⵜⵎⵢⵓⵔⵉⵏ

ⵜⴻⵜⵜⵓⵥⵍⴰⵢ ⵜⵥⵓⵕⵉ ⵏ ⵉⵙⵎⴳⴰⵏ ⵙ ⵎⴰⵙ ⵜⴳⴰ ⵢⴰⵜ ⵜⵎⵢⵓⵔⵜ ⵏ ⵉⵡⵜⵎⴰⵏ (ⵏ ⵉⵔⴳⴰⵣⵏ) ⵙ ⵜⵉⵎⵎⴰⴷ ⵍⵍⵉ ⵉⵣⴷⵉⵏ ⴷ ⵉⵎⴰⵔⵔⵏ ⵉⵎⵢⵉⴳⵔⴰⵏⵏ ⴷ ⵉⵏⴰⵎⵓⵏⵏ ⵉⵜⵜⵓⵙⵡⵓⵜⵜⴰⵏ/ⵉⵜⵜⵓⵥⵍⴰⵢⵏ, ⵍⵍⵉⴳ ⴷⴰ ⵜⴻⵜⵜⵓⵙⴽⴰⵔ ⵙ ⵜⵎⵢⵓⵔⵜ ⴳ ⵓⵏⴱⴷⵓ ⴰⵎ ⵢⴰⵜ ⵜⴼⵓⴳⵍⴰ ⵙ ⵜⴳⵉⵔⴰ ⵏ ⵜⵡⵓⵔⵉⵡⵉⵏ ⵜⵉⵎⵢⵉⴳⵔⴰⵏⵏ. ⴷⴰ ⵉⵜⵜⵉⵍⵉ ⵓⴼⵕⵕⵊ ⴳ ⵉⵙⵓⵢⴰⵙ ⵉⵎⵉⵔⵉⵡⵏ ⵏⵏⴰ ⵉⵜⵜⵡⴰⵙⵙⴰⵏⵏ ⵙ "ⴰⵙⴰⵢⵙ", ⵉⴳ ⵢⴰ ⵜⵎⵢⵓⵔⵜ ⵏ ⵢⵉⴹ ⵍⵍⵉ ⵖⴼ ⵢⴰⵜⵜⵓⵢ/ⵉⴽⴽⴰ ⵓⴷⵔⵉⵣ ⴰⵙⴱⵏⴱⴽⴰⵏ ⴷ ⵓⵙⵔⴳⵣ ⴰⵎⵙⴹⵚⵉ ⵍⵍⵉ ⵉⵡⴰⵜⵙⵏ ⴰⵙⵓⵔⴰⵔ ⴷ ⵓⵣⵣⵔⴰⵢ ⵏ ⴽⵔⴰ ⵏ ⵜⴱⵔⴰⵜⵉⵏ ⵜⵉⵎⴰⵜⵔⴰⵏⵉⵏ ⴷⵔⴰⵏⵉⵏ ⵉ ⵓⴳⴷⵓⴷ. ⴷ ⴰⵔ ⴷ ⵉⵜⵜⴰⵙⵉ ⵓⴷⵔⴰⵣ ⴰⴷ ⵜⵉⵎⵥⵍⴰⵢ ⵏⵏⵙ ⵙⴳ ⵜⵎⴰⵔⴰ ⵏ ⵉⵙⵎⴳⴰⵏ ⴳ ⵡⴰⵎⵓⵏ ⴷ ⵡⴰⵡⴰⵔ ⵏⵏⵙⵏ ⵉ ⵜⵎⵓⵔⵜ ⵏⵏⵙⵏ ⵜⴰⵥⵖⵓⵕⴰⵏⵜ, ⴷ ⵉⵙⵎⴷⵢⴰ ⵓⵍⴰ ⵓⴷⵔⴰⵣ ⴰⴷ ⵜⵉⵎⴽⵜⵉⵜ ⵜⴰⵎⴰⴷⴷⴰⵔⵜ ⵏ ⵓⵙⵎⵉⵍ ⵏ ⵉⵙⵎⴳⴰⵏ ⴷ ⵓⵙⵏⴼⴰⵍⵉ ⵏⵏⵙⵏ ⵖⴼ ⵜⵎⴰⴳⵉⵜ ⵏⵏⵙⵏ ⴷ ⵉⵔⴼⵓⴼⵓⵏⵏ ⵏⵏⵙⵏ, ⴷ ⵓⵙⵉⴷⴼ ⵏⵏⵙⵏ ⴰⵏⴰⵎⵓⵏ ⴳ ⵓⴳⵏⵙⵓ ⵏ ⵜⴷⵍⵙⴰ ⵜⴰⵎⴰⵣⵉⵖⵜ.

ⵉⴼⵔⴷⵉⵙⵏ ⵉⵏⴼⴳⴰⵏⵏ ⴷ ⵜⵉⵍⴰⵍ

ⵜⴻⵜⵜⵓⵙⵉⵍⵖ ⵜⵔⴰⴱⴱⵓⵜ ⵙⴳ ⵎⵏⵏⴰⵡ ⵉⴼⵔⴷⵉⵙⵏ, ⴽⵓ ⵢⴰⵏ ⴷⴰⵔⵙ ⵜⵉⵍⴰⵍⵜ ⵉⵜⵜⵓⵙⵡⵓⵜⵜⴰⵏ ⴰⴼⴰⴷ ⴰⴷ ⵢⵉⵍⵉ ⵓⵎⵢⴰⵙ ⵏ ⵓⴼⵕⵕⵊ, ⴳ ⵜⵣⵡⵉⵔⵉ ⵏⵏⵙⵏ "ⵉⵎⵀⴹⵕⵏ" ⵍⵍⵉ ⵉⴳⴰⵏ ⵉⵎⵃⵓⵡⵛⵏ ⵏⵏⴰ ⵉⵣⵔⴰⵢ ⵡⵓⵟⵟⵓⵏ ⵏⵏⵙⵏ ⵚⴹⵉⵚ ⵏ ⵡⵓⴳⴳⵉⴷⵏ ⴷ ⴷⴰ ⵍⵙⵙⴰⵏ ⵜⵉⵊⵍⵍⵓⴱⴰ ⵜⵓⵎⵍⵉⵍⵉⵏ ⵜⵉⴱⵍⴷⴰⵢ. ⴷ ⴷⴰ ⴰⵙⵏ ⵉⵜⵜⵉⵍⵉ ⵢⴰⵏ ⵓⵏⴹⴹⴰⵎ ⵏⵖ ⵕⵕⴰⵢⵙ ⴳ ⵜⵓⵥⵥⵓⵎⵜ ⵏⵏⵙⵏ, ⵍⵍⵉ ⵉⴳⴰⵏ ⴰⵏⵙⵙⵉⵅⴼ ⵏ ⵜⵔⴰⴱⴱⵓⵜ ⴷ ⵓⵎⵙⵜⴳⴳⴰⵔ ⵖⴼ ⵓⵙⵏⴰⵎ ⵏ ⵡⴰⵏⵢⴰ ⴷ ⵓⴳⴷⴷⵓⵍ ⵏ ⵜⵎⵜⵔⵓⵢⵜ, ⵍⵍⵉⴳ ⴷⴰ ⵢⴰⴽⴽⴰ ⵜⵉⵎⵓⵍⴰ ⵏ ⵓⵙⵏⵜⵉ ⴷ ⵓⴱⴷⴷⵉ ⴷ ⵓⵙⵏⵎⴰⵍⴰ ⵏ ⵓⵎⵓⵙⵙⵓ ⵏ ⵉⵎⴷⵔⴰⵣⵏ ⴷ ⵓⵎⵢⴰⴳⴳⴰ ⵏ ⵓⴳⴷⵓⴷ ⵙ ⵜⵎⴰⵜⴰⵔⵉⵏ ⵉⵏⵖⴷⵏ ⴷ ⵉⵜⵜⵓⵣⵔⴰⵡⵏ.

ⵉⵎⴰⵙⵙⵏ ⵉⵎⵥⴰⵡⴰⵏⵏ ⴷ ⵡⴰⵏⵢⴰ

ⵉⴱⴷⴷ ⵡⴰⵏⵢⴰ ⴳ ⵜⵥⵓⵕⵉ ⵏ ⵉⵙⵎⴳⴰⵏ ⵖⴼ ⵉⵎⴰⵙⵙⵏ ⵉⴱⵍⴷⴰⵢⵏ ⵉⴼⵔⴰⵔⵏ ⵎⴰⵛⴰ ⴷⵓⵙⵏ ⴳ ⵢⵉⴹⵉⵚ, ⴳⵉⵙⵏ "ⵜⵉⵇⵔⵇⴰⵡⵉⵏ/ⵜⵉⵇⵔⵇⴰⵛⵉⵏ" ⵍⵍⵉ ⵉⴳⴰⵏ ⵉⴳⵣⵎⴰⵏ ⵏ ⵡⵓⵣⵣⴰⵍ ⴷⴰ ⴷ ⵙⵙⵓⴼⵓⵖⵏ ⵉⵎⵙⵍⵉⵜⵏ ⵉⵎⵖⵓⵣⵏ ⵉⵎⵙⴰⴷⵏ ⵉⵎⵙⴰⵙⴰⵏ ⴷ ⵡⴰⵏⵢⴰ. ⵎⴽⵍⵍⵉ ⴷⴰ ⵉⵜⵜⵓⵎⴰⵏ ⴳⴰⵏⴳⴰ ⴰⵡⴷ ⵏⵜⵜⴰ ⴰⵎ ⵢⴰⵏ ⵓⴼⵔⴷⵉⵙ ⴰⴷⵙⵍⴰⵏ, ⵉⴳ ⵢⴰⵏ ⵢⵉⵎⵉⵙ ⴰⵎⵏⵢⴰ ⴰⴽⵙⵡⴰⵜ ⵉⵜⵜⵓⵙⴽⴰⵔⵏ ⵙⴳ ⵢⵉⵍⵎ ⴷⴰ ⵉⵜⵜⵓⴽⴽⴰⵜ ⵙ ⵙⵉⵏ ⵉⴽⵓⵕⴰⵢⵏ ⴳⴰⵏⵉⵏ ⵣⵓⵏ ⴷ ⵜⵉⵇⵓⴱⴰ ⵉ ⵓⵙⵙⵉⵎⵖⵔ ⵏ ⵢⵉⵎⵙⵍⵉ ⴷ ⵓⵙⵡⴰⵍⴰ ⵏ ⵓⵎⵓⵙⵙⵓ ⵏ ⵉⵎⴷⵔⴰⵣⵏ ⴳ ⵓⵙⴰⵢⵙ.

ⵜⵉⴽⵍⵉⵡⵉⵏ ⵏ ⵓⴼⵕⵕⵊ/ⵓⵙⴽⴰⵏ ⴰⵏⴰⵥⵓⵕ

ⴷⴰ ⵜⵣⵣⵔⴰⵢ ⵜⴷⵔⴰⵣⵜ ⴳ ⵢⴰⵏ ⵓⵎⵢⴰⴹⴼⴰⵕ ⴰⵏⴰⵥⵓⵕ ⵉⵜⵜⵓⵙⵏⵎⴰⵍⴰⵏ ⵉⵙⵙⵏⵜⴰⵢⵏ ⵙ ⵓⴽⵛⵛⵓⵎ ⵏ ⵉⵙⵎⴳⴰⵏ ⵖⵔ ⵓⵙⴰⵢⵙ ⵙ ⵢⴰⵏ ⵓⵙⵎⵙⴰⵙⴰ ⴰⵖⵙⵙⴰⵏ ⴷ ⵓⵏⵢⵉⵎⴰⵏ ⵢⴰⵜⵜⵓⵢⵏ, ⵜⴹⴼⵕ ⵜ ⵜⴽⵍⵉ ⵏ ⵓⵖⵓⵔⵉ ⵍⵍⵉⴳ ⴷⴰ ⵉⵜⵜⵉⵏⵉ ⵓⵏⴹⴹⴰⵎ ⴽⵔⴰ ⵏ ⵉⴼⵢⵉⵔⵏ ⵍⵍⵉ ⴳ ⴷⴰ ⵜⴻⵜⵜⵉⵍⵉ ⵜⵙⵜⵏⴰ "ⵡⴰ ⵍⴰⵍⵍⴰ ⵡⴰⵀ ⵢⴰ ⵍⴰⵍⵍⴰ ⵏⵖ ⵉ... ⵡⴰ ⵢⵍⴰⵍⵍⴰ ⵍⴰⵍⴰⴷⵉ" ⵍⵍⵉ ⵎⵉ ⵜⵜⴰⵍⵙⵏ ⴰⴽⴽⵯ ⵎⴰⴷ ⵖⵉⵏⵏ ⵉⵍⵍⴰⵏ. ⴷⴰ ⵉⵜⵜⵎⵓⵜⵜⵉ ⵓⴼⵕⵕⵊ ⴹⴰⵕⵜ ⵏ ⵓⵢⴰ ⵖⵔ ⵉⴷⵔⴰⵣⵏ ⵉⵎⴳⵔⴰ ⵉⵎⴰⵙⵙⵉⵜⵏ ⵏⵏⴰ ⵉⵎⵙⴰⵙⴰⵏ ⴷ ⵜⵉⵢⵢⴰⵜ ⵏ ⵉⵎⴰⵙⵙⵏ, ⴷ ⴰⵔ ⴳⵉⵙⵏ ⵜⵜⵉⵍⵉⵏ ⵉⴳⵟⵟⵓⵎⵏ ⵉⵥⵍⵉⵏ ⵉ ⵜⵓⵍⵖⴰ ⵏ ⵉⵎⵙⴼⵍⵉⴷⵏ ⴷ ⵜⵉⴽⴽⵉ ⵏ ⵜⵓⵜⵜⵔⴰ ⴷ ⵙ ⵓⵙⵓⵜⵔ ⵏ ⵜⵡⵙⵉⵡⵉⵏ ⴷ ⵜⵉⴽⴽⵉⵡⵉⵏ ⴳ ⵓⵢⵍⵍⵉ ⵉⵜⵜⵢⴰⵡⵙⵙⴰⵏⵏ ⵙ "ⵍⵎⵄⵕⵓⴼ", ⴷ ⴷⴰ ⵜⴻⵜⵜⵙⴰⵍⴰ ⵜⵢⴼⴼⴰⵔⵜ ⵙ ⵜⵖⵜⴰⵙⵜ ⵙⴳ ⴷⴰⵔ ⵓⵎⵙⵙⵓⴳⵓⵔ, ⴷ ⵉⵣⵎⵔ ⴰⴷ ⵖⵣⵣⵉⴼⵏⵜ ⵜⴼⵓⴳⵍⵉⵡⵉⵏ ⴰⴷ ⵉ ⵎⵏⵏⴰⵡ ⵉⵎⴰⵍⴰⵙⵙⵏ ⵏⵏⴰ ⴳ ⴷⴰ ⴳⵉⵙⵏ ⵜⴻⵜⵜⵎⵓⵜⵜⵉ ⵜⵔⴰⴱⴱⵓⵜ ⴳⵔ ⵉⴹⵡⵡⴰⵕⵏ.

ⴰⴷⴷⴰⴷ ⴰⵎⵉⵔⴰⵏ ⴷ ⵜⵏⵥⴰⵕ

ⴷⴰ ⵜⴻⵜⵜⵎⵔⵔⴰⵜ ⵜⵥⵓⵕⵉ ⵏ ⵉⵙⵎⴳⴰⵏ ⴳ ⵜⵎⵏⴰⴹⵜ ⵏ ⵉⵃⴰⵃⴰⵏ ⵙⴳ ⵢⴰⵏ ⵓⵙⵎⴰⵡⵏ ⵉⴼⴰⵡⵏ ⵏⵏⴰ ⵉⵙⴷⵉⴷⴷⵉⵏ ⵜⴰⵙⵓⵍⵜ ⵏⵏⵙ, ⴰⵢⴰ ⴷⴰ ⵉⵜⵜⵓⵎⴰⵏ ⴳ ⵜⵎⴷⴼⴼⵔⵜ ⵏ ⵜⵎⵙⴽⵉⵔⵉⵏ ⵏ ⵉⵎⵓⵙⵙⵓⵜⵏ ⵉⵣⴰⵢⴽⵓⵜ ⴷ ⵜⴰⵔⵎⵔⵉⵙⵜ ⵙ ⵜⵎⵍⵙⵉⵜ ⵜⴰⵥⵖⵓⵕⴰⵏⵜ ⵙⴳ ⴷⴰⵔ ⵜⵙⵓⵜⵉⵏ ⴰⴷ ⵏⵏⴰ ⴷ ⵉⵖⵍⵉⵏ. ⵎⴽⵍⵍⵉ ⴷⴰ ⵜⵜⵎⵏⴰⵍⴰ ⵜⵥⵓⵕⵉ ⴰⴷ ⴷ ⵜⵏⵥⵕⵜ ⵏ ⵜⵓⵔⵙⵉⵍⵜ, ⵍⵍⵉⴳ ⴰⵔ ⴳⵉⵙ ⵙⵎⵓⵇⵇⵓⵍⵏ ⴽⵔⴰ ⵏ ⵎⴷⴷⵏ ⴰⵎ ⵢⴰⵜ ⵜⵥⵓⵕⵉ ⵏ ⵜⴰⴹⵚⴰ ⴷ ⵓⵙⵓⵔⴰⵔ ⵀⵍⵍⵉ, ⴰⵢⵍⵍⵉ ⵉⵙⵙⵉⴷⵔⵓⵙⵏ ⵙⴳ ⵜⵙⴽⵜⵉⵡⵉⵏ ⵏⵏⵙ ⵜⵉⵎⴰⵜⵔⴰⵏⵉⵏ ⴷ ⵓⵎⵣⵔⵓⵢ ⵏⵏⵙ ⴰⵇⴱⵓⵔ ⴰⵎ ⵢⴰⵏ ⵓⴳⵣⵣⵓⵎ ⵓⵔ ⵉⴱⴹⵉⵏ ⵙⴳ ⵜⴰⵢⵙⵉ ⵜⴰⵔⴽⵎⴰⵎⵜ ⵜⴰⵎⵖⵔⵉⴱⵉⵜ ⵍⵍⵉ ⵉⵙⵙⵓⵜⵔⵏ ⴰⴼⵔⴰⴳ ⴷ ⵜⵍⵙⴰⵔⵉⵜ.