ⴼⴰⵙⵉⵍⵉⵙⴰ ⵜⴰⴼⴰⵍⴽⴰⵢⵜ

ⴰⵎⴰⴳⵔⴰⴷ ⴰⴷ ⵉⴳⴰ ⵙⵓⵍ ⴰⴳⵓⵊⵉⵍ. ⵎⴽ ⵜⵓⴼⵉⴷ, ⵔⵏⵓ ⴰⵙⵖⵓⵏ ⵏⵏⵙ ⴳ ⴽⵕⴰⴹⵜ ⵜⴰⵙⵏⵉⵡⵉⵏ ⵢⴰⴹⵏⵉⵏ.

ⴼⴰⵙⵉⵍⵉⵙⵢⴰ ⵜⴰⴼⴰⵍⴽⴰⵢⵜ
Russian folktale
Language of work or name	ⵜⵓⵜⵍⴰⵢⵜ ⵜⴰⵔⵓⵙⵉⵜ
ⵙⵏⴼⵍ ⴰⵙⴰⴳⵎ - ⵙⵏⴼⵍ - ⵡⵉⴽⵉⴷⴰⵜⴰ

ⴼⴰⵙⵉⵍⵉⵙⴰ ⵜⴰⴼⴰⵍⴽⴰⵢⵜ (ⵙ ⵜⵔⵓⵙⵉⵜ: василиса прекрасная,Vassilissa Prekrasnaïa ) ⵜⴳⴰ ⵢⴰⵜ ⵜⵏⴼⵓⵙⵜ ⵜⴰⵔⵓⵙⵉⵜ ⵉⴼⵓⵍⴽⵉⵏ, ⴷ ⵍⵍⵉ ⴱⴰⵀⵔⴰ ⵉⵜⵜⵢⵓⵙⵙⴰⵏⵏ. ⵢⵓⵔⴰ ⵜⵜ ⴰⵍⵉⴽⵙⴰⵏⴷⵔ ⴰⴼⴰⵏⴰⵙⵉⴼ ⴳ ⵓⴷⵍⵉⵙ ⵏⵏⵙ ⵜⵉⵏⴼⵓⵙⵉⵏ ⵜⵉⵎⴰⴷⵏⴰⵏⵉⵏⵏ ⵜⵉⵔⵓⵙⵉⵢⵉⵏ, ⴷⴷⵓ ⵡⵓⵟⵟⵓⵏ ⵡⵉⵙ 59. ⵉⵙⵓⵖⵍ ⵜⵜ ⵓⵎⴰⵔⴰ ⵎⵇⵇⵓⵔⵏ ⵎⵓⵃⵎⵎⴰⴷ ⴰⴽⵓⵏⴰⴹ ⵙ ⵜⵛⵍⵃⵉⵜ.

ⴰⵙⵓⵖⵍ ⵏ ⵜⵏⴼⵓⵙⵜ

ⵣⵉⴽⴽ ⵍⵍⵉ ⵏⵏ ⴱⴰⵀⵔⴰ ⵢⴰⴳⴳⵓⴳⵏ, ⴰⴷ ⵜⵜ ⵉⵏⵏ ⵉⴽⴽⴰ ⵉⴷⴷⵔ ⵢⴰⵏ ⵓⵔⴳⴰⵣ ⵉⴳⴰⵏ ⴰⵡⵙⵙⴰⵔ, ⵏⵜⵜⴰⵏ ⴷ ⵜⵎⵖⴰⵔⵜ ⴷ ⵉⵍⵍⵉ ⵜⵙⵙⵏ ⵍⵍⵉ ⵎⵓ ⵙⵙⴰⵖⵏ ⴼⴰⵙⵉⵍⵉⵙⴰ ⵜⴰⴼⴰⵍⴽⴰⵢⵜ.

ⵜⵓⵎⵔⵜ ⴷ ⵜⴰⴷⴰⵡⵉⵜ ⴰⵙ ⴷⴷⵔⵏ ⴳ ⵢⴰⵜ ⵜⴳⵎⵎⵉ ⵎⵥⵥⵉⵢⵏ ⵏ ⵓⴽⵛⵛⵓⴹ ⵍⵍⵉ ⵉⵟⵟⴼⵏ, ⵎⴰⵛⴰ ⵜⴼⵜⴰ ⴰⵙⵏ ⵜⵓⴷⵔⵜⴰⵏ ⵉⵎⵎⵉⵎⵏ ⴰⵙⵙ ⵍⵍⵉ ⴷ ⵉⴹⵕ ⵢⴰⵏ ⵡⴰⵟⵟⴰⵏ ⵢⴰⵎⵥ ⵜⴰⵎⵖⴰⵔⵜ ⵍⵍⵉ. ⴰⵙⵙ ⵍⵍⵉ ⵜⵙⵙⵏ ⵉⵙ ⵔⴰⴷ ⵙⵓⵍ ⵓⵔ ⵜⵏⴽⵔ ⴳ ⵡⴰⵟⵟⴰⵏ ⴰⵏⵏ, ⵜⵙⵙⵏ ⵉⵙ ⵜⵜ ⵜⴰⵥ ⵜⵎⵜⵜⴰⵏⵜ ⵏⵏⵙ, ⵜⵖⵔⴰ ⴷ ⵉ ⵢⵉⵍⵍⵉⵙ ⵜⴼⴽ ⴰⵙ ⵢⴰⵜ ⵜⵙⵍⵉⵜ ⵉⵜⵜⵓⵙⴽⴰⵔⵏ ⴳ ⵓⴽⵛⵛⵓⴹ, ⵜⵉⵏⵉ ⴰⵙ: "ⵃⴹⵓ ⴷⴰⵔⵎ ⴰ ⵉⵍⵍⵉ ⵜⵉⵙⵍⵉⵜ ⴰⴷ ⴷ ⴰⴷ ⵜⵜ ⵓⵔ ⵜⵎⵍⴷ ⵉ ⵎⵇⵇⴰⵔ ⴷ ⵢⴰⵏ. ⴰⴽⵓⴷ ⵏⵏⴰ ⵜⵍⵍⵉⴷ ⴳ ⴽⵔⴰ ⵏ ⵜⴰⵙⵙⴰⵙⵜ. ⴼⴽ ⴰⵙ ⴰⵔ ⴷ ⵜⵛⵛ ⵜⵙⵓⵜⵔⵜ ⵜⵜ ⴰⴷ ⴰⵎ ⵜⴰⵡⵙ ⴰⵔ ⴷ ⴳⵉⵙ ⵜⴼⴼⴰⵖⴷ. ⵀⴰ ⵏⵏ ⵔⴰⴷ ⴰⵎ ⵜⴰⵡⵙ.) ⵜⴰⵎⵥ ⵉⵍⵎⵎⴰ ⵜⵎⵖⴰⵔⵜ ⵍⵍⵉ ⵉⵍⵍⵉⵙ ⵜⵙⵙⵓⴷⵎ ⵜⵜ, ⵓⵔ ⵜⴽⴽⵉ ⴰⵎⵢⴰ ⵜⵎⵎⵜ.

ⵢⴰⵍⵍⴰ ⵓⵡⵙⵙⴰⵔ ⵍⵍⵉ ⴼ ⵜⵎⵖⴰⵔⵜ ⵏⵏⵙ ⴰⵢⵍⵍⵉⴳ ⴼⵜⴰⵏⵜ ⴰⴷ ⴱⵓⴽⴹⵏⵜ ⵡⴰⵍⵍⵏ ⵏⵏⵙ. ⵎⴰⵛⴰ ⴳ ⵜⴳⵉⵔⴰ ⵢⵉⵡⵍ ⵢⴰⵜ ⵜⵎⵟⵟⵓⴹⵜ ⵢⴰⴹⵏⵉⵏ. ⵉⵖⴰⵍ ⵉⴳⵍⵍⵉⵏ ⵉⵙ ⵔⴰⴷ ⵜⴳ ⵉ ⵢⵉⵍⵍⵉⵙ ⵣⵓⵏ ⴷ ⵉⵏⵏⴰⵙ ⵍⵍⵉ ⵉⵎⵎⵓⵜⵏ.

ⴰⴷⵍⵉⵙ ⴼⴰⵙⵉⵍⵉⵙⴰ

ⵎⴰⵛⴰ ⵓⵀⵓⵢ! ⵓⵔ ⵜⴳⵉ ⵜⴰⴷ ⴰⵎⵔ ⵢⴰⵜ ⵜⵓⵇⵊⵉⵔⵜ ⴷ ⵜⵅⵛⵛⴰⵏⵜ ⵏ ⵜⵎⵖⴰⵔⵉⵏ. ⵜⴰⵎⵟⵟⵓⴹⵜ ⵜⵓⵡⵉ ⴷ ⴷⵉⴷⵙ ⵙⵏⴰⵜ ⵜⴼⵔⵅⵉⵏ ⵍⵍⵉ ⵎⵓ ⴳⴳⵓⵜⵏ ⵉⴱⵊⴳⴳⵉⵜⵏ ⵎⴰⵛⴰ ⵏⵜⵜⴰⵜ ⴳⴰⵏⵜ ⴷⴰⵔⵙ ⵣⵓⵏ ⴷ ⴰⵍⵍⵏ ⵏⵏⵙ. ⴳ ⵜⵖⵣⵉ ⵏ ⵡⴰⵙⵙ ⴰⵔ ⵜⵏⵜ ⵀⵍⵍⵉ ⵜⴻⵜⵜⵃⵍⵍⵉⵍ. ⵎⴰⵛⴰ ⵜⵕⵥⴰⴳ ⵜⵓⴷⵔⵜ ⵉ ⴼⴰⵙⵉⵍⵉⵙⴰ ⵜⴳⵍⵍⵉⵏⵜ. ⵙ ⴽⵕⴰⴹⵜ ⵉⵜⵙⵏⵜ ⴰⵔ ⵜⵜⵥⵉⵏⵜ ⵖⴼⵠⴼⴰⵙⵉⵍⵉⵙⴰ. ⴰⵔ ⵜⵜ ⴽⴽⴰⵜⵏⵜ. ⵙⵙⵕⵎⵉⵏⵜ ⵜⵜ ⵙ ⵜⵡⵓⵔⵉⵡⵉⵏ. ⵔⴰⵏ ⵜⵜ ⴰⴷ ⵜⵎⴷⵓ ⴷ ⵡⴰⴷ ⴰⵙ ⵜⵊⴷⵔ ⵜⴰⴼⵓⴽⵜ ⴷ ⵡⴰⴹⵓ ⴰⴼⴰⵍⴽⴰⵢ ⵍⵍⵉ ⴷⴰⵔⵙ ⵉⵍⵍⴰⵏ. ⴳ ⵜⵖⵣⵉ ⵏ ⵓⵣⴰⵍ, ⵓⵔ ⴰⵔ ⵜⵙⵙⴼⵍⵉⴷ ⴳ ⵜⴳⵎⵎⵉ ⴰⵎⵔ ⵉ ⵎⴽⴰⴷ: ⵠⴼⴰⵙⵉⵍⵉⵙⴰ , ⴰⵣⵣⵍ ⴰⴷ ⵜⵙⴽⵔⵜ ⵜⵉⵔⵎⵜ! ⴼⴰⵙⵉⵍⵉⵙⴰ ⴰⵣⵣⵍ ⵙⵖⵓⵙ ⵜⵉⴳⵎⵎⵉ! ⴷⴷⵓ ⴰⵡⵉ ⴷ ⵉⴽⵛⵛⵓⴹⵏ ⵙⴳ ⵜⴰⴳⴰⵏⵜ, ⵥⵥⵉⴳ ⵜⵉⵙⵉⵜⴰⵏ. ⴰⵣⵣⵍ ⵓⴳⴳⴰⵔ ⵏ ⵎⴽⴰⴷ ⵍⵍⵉ ⵙ ⴰⵔ ⵜⵜⴰⵣⵣⴰⵍⵜ.

ⴼⴰⵙⵉⵍⵉⵙⴰ ⴰⵔ ⴰⴽⴽⵯ ⵜⵙⴽⴰⵔ ⵜⵉⵡⵓⵔⵉⵡⵉⵏ. ⴰⵔ ⵜⴻⵜⵜⵎⴰⵖ ⴰⴷ ⵜⵙⴽⵔ ⵙ ⵡⴰⵡⴰⵍ ⵏ ⴽⵔⴰⵢⴳⴰⵜ ⵢⴰⵜ ⴳⵉⵙⵏⵜ. ⴰⵔ ⴱⴷⴷⴰ ⵜⵙⵎⴷⵓ ⵜⴰⵡⵓⵔⵉ ⵏⵏⵙ.

ⵜⵎⵇⵇⵓⵔ ⴷ ⵠⴼⴰⵙⵉⵍⵉⵙⴰ ⵉⴼⴽ ⴰⵙ ⵕⴱⴱⵉ ⵢⴰⵏ ⵡⴰⴼⵓⵍⴽⵉ ⵉⴳⴳⵓⵜⵏ. ⵢⴰⵏ ⵡⴰⴼⵓⵍⴽⵉ ⵓⵔ ⵉⵍⵉⵏ ⴰⵏⴰⵡ. ⵓⵔ ⵉⵥⴹⵉⵕ ⵎⵇⵇⴰⵔ ⴷ ⵢⴰⵏ ⴰⴷ ⴼⵍⵍⴰⵙ ⵉⵙⴰⵡⵍ ⵓⵍⴰ ⴰⴷ ⵜⵜ ⵢⴰⵔⴰ.

ⵜⵉⵙⵍⵉⵜ ⵍⵍⵉ ⴰⵙ ⴷ ⵜⴼⵍ ⵉⵏⵏⴰⵙ. ⵓⵔ ⴰⵔ ⵜⵜ ⵜⴻⵜⵜⴰⴷⵊⴰ ⵉ ⵜⵎⵎⴰⵔⴰ, ⴰⵔ ⴰⵙ ⵜⴻⵜⵜⴰⵡⵙ. ⴰⵔ ⴷ ⵜⵏⴽⴽⵔ ⵠⴼⴰⵙⵉⵍⵉⵙⴰ ⵣⵉⴽ, ⵓⵔ ⵜⴰ ⴷ ⵜⵓⴳⴳⵉ ⵜⴰⴼⵓⴽⵜ ⵜⴼⵜⵓ ⵜⵥⵥⵉⴳ ⵜⵉⵙⵉⵜⴰⵏ, ⵜⴰⵙⵉ ⵉⵎⵉⴽⴽ ⵏ ⵓⴽⵯⴼⴰⵢ, ⵜⴽⵛⵎ ⵙ ⵢⴰⵜ ⵜⴰⵍⵖⵓⵏⵙⵜ, ⵜⴼⴽ ⴰⴽⵯⴼⴰⵢ ⵍⵍⵉ ⵉ ⵜⵙⵍⵉⵜ ⵏⵏⵙ ⵜⵉⵏⵉ ⴰⵙ: ⵜⵉⵙⵍⵉⵜ ⵉⵏⵓ, ⵜⵉⵙⵍⵉⵜ ⵉⵏⵓ ⵙⵙⴼⵍⴷ ⵉⵢⵉ ⴰⴷ ⴰⵎ ⵉⵏⵉⵖ ⵎⴰⴷ ⵉⴳⴰⵏ ⵜⴰⵎⵓⴽⵔⵉⵙⵜ ⵉⵏⵓ. ⵜⵉⵙⵍⵉⵜ ⵍⵍⵉ ⵏ ⵓⴽⵛⵛⵓⴹ ⴰⵔ ⵜⵙⵙⴰ ⴰⴽⵯⴼⴰⵢ ⵜⴽⴽⵙ ⴼⴰⵙⵉⵍⵉⵙⴰ ⴳ ⵜⵎⵎⴰⵔⴰ ⵍⵍⵉⴳ ⵜⵍⵍⴰ. ⴰⵔ ⴰⵙ ⵜⵙⴽⴰⵔ ⵜⵉⵡⵓⵔⵉⵡⵉⵏ ⴰⴽⴽⵯ.

ⵎⴰⴷ ⵉⵍⵎⵎⴰ ⵜⵙⴽⴰⵔ ⵠⴼⴰⵙⵉⵍⵉⵙⴰ ? ⴰⵔ ⵜⴻⵜⵜⴳⴰⵡⴰⵔ ⴳ ⵜⴰⴼⵓⴽⵜ ⵏ ⵜⵢⵍⴳⵉ, ⵜⴰⵡⵉ ⵜⵜ ⴰⵔ ⵜⵙⵎⵓⵏⴰ ⴽⵔⴰ ⵏ ⵉⵊⴷⴷⵉⴳⵏ, ⴰⵔ ⴳⵉⵙⵏ ⵜⵙⴽⴰⵔ ⵜⴰⵡⵛⴽⵉⵏⵜ. ⴳ ⵜⵉⵣⵉ ⴰⵏⵏ ⵏⵉⵜ ⵜⵉⵙⵍⵉⵜ ⵏⵜⵜⴰⵜ ⵜⵙⵓⵙⵉ ⵜⵓⵔⵜⵉⵜ, ⵜⵓⴳⵎ ⴷ ⴰⵎⴰⵏ, ⵜⵙⵙⵔⵖⴰ ⵜⴰⴽⴰⵜ, ⵜⵙⵙⵡⴰ ⴰⵛⵓⴼⵍⵓⵔ. ⵜⵉⵙⵍⵉⵜ, ⵓⵔ ⴷ ⵉⵙ ⵀⵍⵍⵉ ⵜⵓⵡⵙ ⵉ ⵠⴼⴰⵙⵉⵍⵉⵙⴰ ⴳ ⵜⵡⵓⵔⵉⵡⵉⵏ ⵏⵏⵙ, ⵉⵙ ⴰⵙ ⴰⴽⴽⵯ ⵜⵎⵍⴰ ⵢⴰⵜ ⵜⵎⵖⵉⵜ ⵍⵍⵉ ⵔⴰⴷ ⴰⵙ ⵢⴰⴷⵊ ⴰⴼⵓⵍⴽⵉ ⵏⵏⵙ ⴰⵔ ⵀⵍⵍⵉ ⵉⵜⵜⴱⵓⵖⵍⵓ. ⵓⵢⴰⵏⵏ ⴰⴷ ⵉⵙⵔⴳⵏ ⵉ ⴼⴰⵙⵉⵍⵉⵙⴰ ⴽⵔⴰ ⵙ ⴰⴷ ⵜⴻⵜⵜⵉⵎⵖⵓⵔ ⴰⵔ ⴰⵙ ⵉⵜⵜⵉⴳⵓⵜ ⵡⴰⴼⵓⵍⴽⵉ. ⵢⴰⵏ ⵡⴰⵙⵙ, ⴰⵔⴳⴰⵣ ⵍⵍⵉ ⵉⴷⴷⴰ ⵙ ⵢⴰⵏ ⵓⵎⵓⴷⴷⵓ ⴱⴰⵀⵔⴰ ⵉⵖⵣⵣⵉⴼⵏ. ⵜⴰⵎⵖⴰⵔⵜ ⴷ ⵉⵙⵜⵉⵙ ⵓⵎⵥⵏⵜ ⵖⵉⵍⵍⵉ ⵉⵔⵖⴰⵏ ⴳ ⵜⴳⵎⵎⵉ. ⴱⵕⵕⴰ ⵉⴷⵍ ⵙ ⵜⵉⵍⵍⴰⵙ, ⴰⵏⵥⴰⵕ ⴰⵔ ⴷ ⵉⵟⵟⴰⵕ, ⵉⵢⴷⴰⵏ ⴰⵔ ⵟⵟⴰⵖⵏ.

ⵓⵙⵙⴰⵏ ⵉⵎⴳⴳⵓⵔⴰ ⴳ ⵓⵎⵡⴰⵏ ⴰⵏⵏ. ⵜⵉⴳⵎⵎⵉ ⵍⵍⵉ ⵜⵙⵙⵓⵜⵍ ⴰⵙ ⴷ ⵢⴰⵜ ⵜⴰⴳⴰⵏⵜ. ⴳ ⵡⴰⵙⴰ ⵏ ⵜⴰⴳⴰⵏⵜ ⴰⵏⵏ ⵜⵣⴷⵖ ⵢⴰⵜ ⵜⵖⵯⵥⵏⵜ ⵍⵍⵉ ⵎⵉ ⵙⵙⴰⵖⵏ « ⴱⴰⴱⴰ ⵢⴰⴳⴰ », ⵉⴳⴰ ⴷⴰⵔⵙ ⵓⴼⴳⴰⵏ ⵉⴳ ⵔⴰⴷ ⵜⵛⵛ ⵣⵓⵏ ⴷ ⵉⴳ ⵔⴰⴷ ⵜⵛⵛ ⴽⵔⴰ ⵏ ⵓⴼⵓⵍⵍⵓⵙ.

ⵜⴰⵎⵖⴰⵔⵜ ⵜⴱⴹⴰ ⵜⴰⵡⵓⵔⵉ ⵖⴼ ⵉⵙⵜⵉⵙ: ⵢⴰⵜ ⵙⴳⵉⵙⵏⵜ ⴰⴷ ⵜⴳⴳⵯⴰ ⵜⴰⴹⵔⵙⴰ ⵉ ⵢⴰⵜ ⵜⵎⵍⵙⵉⵜ. ⵜⵉⵙ ⵙⵏⴰⵜ ⴰⴷ ⵜⴳⵏⵓ. ⵜⵏⵏⴰ ⵉ ⴼⴰⵙⵉⵍⵉⵙⴰ ⴰⵔ ⵜⵚⵟⵟⴰⵜ ⴽⵎⵎ. ⵜⵙⵙⵏⵙ ⴰⵙⵉⴷⴷ ⴳ ⵜⴳⵎⵎⵉ. ⵓⵔ ⵜⴼⵉⵍ ⵢⴰⵏ ⵓⴳⵣⵣⵓⵎ ⵏ ⵡⴰⵙⵉⴷⴷ ⵍⵍⵉ ⵉⵙⵙⵏⵜⴰⵏ ⴰⵔ ⵉⵜⵜⴱⵔⴰⵇⴰⵢ ⵉⵎⵉⴽⴽ ⵉⵏⵙ ⵉⵍⵎⵎⴰ.

ⵎⴰ ⵔⴰⴷ ⵉⵜⵜⵓⵙⴽⴰⵔ? ⵉⵏⵉⵏⵜ ⵜⴼⵔⵅⵉⵏ ⵏ ⵜⵎⵖⴰⵔⵜ ⵏ ⴱⴰⴱⴰⵙ ⵏⵠⴼⴰⵙⵉⵍⵉⵙⴰ . ⵓⵔ ⵜⵍⵍⵉ ⵜⴰⴽⴰⵜ ⴳ ⵓⵏⵡⴰⵍ, ⵓⵔ ⵜⵣⴹⵉⵕ ⵎⵇⵇⴰⵔ ⴷ ⵢⴰⵜ ⴰⴷ ⵜⵉⵍⵉ ⵜⴰⵡⵓⵔⵉ, ⵉⵇⵇⴰⵏ ⵎⴰⴷ ⵉⴼⵜⵜⵓⵏ ⴰⴷ ⴷ ⵢⴰⵡⵉ ⵜⴰⴽⴰⵜ ⵙⴳ ⵜⴳⵎⵎⵉ ⵏ ⵜⵖⵯⵥⵏⵜ «ⴱⴰⴱⴰ ⵢⴰⴳⴰ». ⵜⵙⴰⵡⵍ ⴷ ⵜⵅⴼⴷⵉⵜ ⵏ ⵜⴼⵔⵅⵉⵏ ⵍⵍⵉ ⵜⵏⵏⴰ (ⵏⴽⴽ ⵓⵔ ⴰⴷ ⴼⵜⵓⵖ, ⵉⵎⵚⵎⴰⵕⵏ ⵏ ⵜⴷⵔⵙⴰ ⵓⴷⴰⵏ ⵉⵢⵉ, ⵙⴼⴰⵡⵖ ⵙⵉⵙⵏ).

(ⵎⴽⴰⵏⵏ ⴷ ⵏⴽⴽ ⵓⵔ ⴰⴷ ⴼⵜⵓⵖ ⵓⴷⴰⵏⵜ ⵉⵢⵉ ⵜⵙⵎⵉⵡⵉⵏ ⵉⵏⵓ ⵙⴼⴰⵡⵖ ⵙⵉⵙⵏⵜ) ⵉⵜⵏ ⵜⵉⵙ ⵙⵏⴰⵜ ⵏ ⵜⴼⵔⵅⵉⵏ. ⵙ ⵢⴰⵜ ⵜⴽⵍⵉⵜ ⵙⴰⵡⵍⵏⵜ ⴷ ⵜⴼⵔⵅⵉⵏ ⵍⵍⵉ ⵙ ⵙⵏⴰⵜ ⵉⵜⵙⵏⵜ ⵏⵏⴰⵏⵜ : (ⴼⴰⵙⵉⵍⵉⵙⴰ ⴰⵔ ⴰⴷ ⴰⵖ ⴷ ⵢⴰⵡⵉ ⵜⴰⴽⴰⵜ ⴷⴰⵔ «ⴱⴰⴱⴰ ⵢⴰⴳⴰ» ⵜⴰⵖⵯⵥⵏⵜ). ⵓⵔ ⵜⴰ ⴼⵍⵍⴰⵙⵏⵜ ⵜⵔⵓⵔ ⵠⴼⴰⵙⵉⵍⵉⵙⴰ ⴰⵡⴰⵍ ⵍⵍⵉⴳ ⵜⵜ ⵓⵙⵉⵏⵜ ⵍⵓⵃⵏ ⵜⵜ ⵉⴷ ⴱⵕⵕⴰ ⵏ ⵜⴼⵍⵓⵜ.

ⵜⴳⴰ ⵜⵉⵣⵉ ⵉⴹ ⵉⵇⵇⵏⵏ. ⴳ ⵜⵓⵥⵥⵓⵎⵜ ⵏ ⵜⴰⴳⴰⵏⵜ ⵉⴹⴰⴳⴳⵯⵏ ⴰⵔ ⴽⴰ ⵙⵀⵓⴼⴼⵓⵜⵏ. ⴼⴰⵙⵉⵍⵉⵙⴰ ⵜⴽⵚⵓⴹ. ⵜⵙⵙⵏⵜⵉ ⴰⵔ ⵜⴰⵍⵍⴰ ⵉⵎⵉⵍ ⵙ ⵉⴳ ⴷ ⵜⴽⵯⵜⵉ ⵜⵉⵙⵍⵉⵜ ⵍⵍⵉ ⵏⵏ ⵜⵃⴹⴰ ⴳ ⵡⴰⴽⴽⵙ ⵏⵏⵙ ⵜⵉⵏⵉ ⴰⵙ : (ⵜⵉⵙⵍⵉⵜ ⵉⵏⵓ, ⵜⵉⵙⵍⵉⵜ ⵉⵏⵓ ; ⵀⴰ ⵏⵏ ⵜⴰⵎⵖⴰⵔⵜ ⵏ ⴱⴰⴱⴰ ⴷ ⵉⵙⵜⵉⵙ ⵓⵣⵏⵏⵜ ⵉⵢⵉ ⴰⴷ ⴰⵙⵏⵜ ⴷ ⴰⵡⵉⵖ ⵜⴰⴽⴰⵜ ⴷⴰⵔ « ⴱⴰⴱⴰ ⵢⴰⴳⴰ » ⵜⴰⵖⵯⵥⵏⵜ ⵍⵍⵉ ⵉⵛⵛⵜⴰⵏ ⴰⴼⴳⴰⵏ (ⴰⴷ ⵓⵔ ⵜⵉⴽⵚⴰⴹⵜ, ⵉⵜⵏ ⴰⵙ ⵜⵙⵍⵉⵜ, ⵙⴽⵓⴷ ⵍⵍⵉⴳ ⴷⵉⵎ ⵓⵔ ⵜⴽⵚⵓⴹⵜ ⴰⵎⵢⴰ). (ⵜⴰⵏⵎⵎⵉⵔⵜ ⵏⵏⵎ ⴰ ⵜⵉⵙⵍⵉⵜ. ⵜⵔⵓⵔⴷ ⵉⵢⵉ ⴷ ⵜⴰⴷⵓⵙⵉ) ⵉⵜⵏ ⴰⵙ ⴼⴰⵙⵉⵍⵉⵙⴰ  ⵜⴷⴷⵎ ⵏⵉⵜ ⵜⴰⵎⵥ ⴰⴱⵔⵉⴷ ⵏ ⵜⴳⵎⵎⵉ ⵏ «ⴱⴰⴱⴰ ⵢⴰⴳⴰ». ⵜⴰⴳⴰⵏⵜ ⵜⵇⵇⵏ ⵙ ⵡⴰⴷⴷⴰⴳⵏ, ⵎⵇⵇⴰⵔ ⴷ ⵢⴰⵏ ⵉⵜⵔⵉ ⵓⵔ ⴰⴷ ⵉⵜⵜⴰⴳⴳⴰ ⴳ ⵉⴳⵏⵏⴰ, ⴰⵢⵢⵓⵔ ⵉⴳⴹ ⴳ ⵉⵎⴷⵍⴰ.

ⴰⵔ ⵜⴼⵜⵜⵓ ⵠⴼⴰⵙⵉⵍⵉⵙⴰ  ⴰⵔ ⵜⴻⵜⵜⵔⴳⵉⴳⵉⵢ, ⵜⵃⵏⵏⵥ ⵏⵏ ⵜⵉⵙⵍⵉⵜ ⵍⵍⵉ ⴷ ⵏⵉⴳ ⵓⵍ ⵏⵏⵙ, ⵉⵎⵉⴽⴽ ⵉⵍⴽⵎ ⴷ ⵢⴰⵏ ⵓⵎⵏⴰⵢ ⵙ ⵜⴰⵣⵣⵍⴰ, ⵢⴰⵏ ⵓⵎⵏⴰⵢ ⵉⴳⴰ ⴰⴽⴽⵯ ⵓⵎⵍⵉⵍ. ⵜⴰⵔⵉⴽⵜ ⵜⵓⵎⵍⵉⵍⵜ, ⵉⵣⵔⵉ ⵓⴽⴰⵏ ⵓⵔ ⵉⴽⴽⵉ ⵉⵜⵔⵉ ⵏ ⵡⴰⵙⵙ ⴰⵎⵢⴰ ⵉⴱⴱⴰⵇⵇⵉ ⴷ.ⵠⴼⴰⵙⵉⵍⵉⵙⴰ  ⵜⴷⴷⴰ ⵙ ⴷⴰⵜ ⵏⵏⵙ, ⵜⵉⵎⵇⵇⴰ ⵏ ⵓⴷⴼⵍ ⴰⵔ ⴷ ⵟⵟⴰⵕⵏⵜ ⴼ ⵜⴰⵡⵏⵓⴷⵜ ⵏⵏⵙ, ⵜⵉⴼⴰⵙⵙⵉⵏ ⵏⵏⵙ ⴽⵔⵎⵏⵜ ⵙ ⵓⵚⵎⵎⵉⴹ.

ⵓⵔ ⵜⴽⴽⵉ ⴰⵎⵢⴰ ⵙ ⵉⴳ ⴷ ⵏⵉⵜ ⴷⴰⵖ ⵉⵍⴽⵎ ⵢⴰⵏ ⵓⵎⵏⴰⵢ ⵢⴰⴹⵏ. ⵡⴰⴷ ⵉⴳⴰ ⴰⴽⴽⵯ ⴰⵣⴳⴳⵯⴰⵖ. ⴰⵢⵢⵉⵙ ⵏⵏⵙ ⴰⵣⴳⴳⵯⴰⵖ. ⵜⴰⵔⵉⴽⵜ ⵜⴰⵣⴳⴳⵯⴰⵖⵜ. ⵉⵎⵓⵏ ⴷ ⵏⵉⵜ ⴷ ⵜⴰⴼⵓⴽⵜ ⵍⵍⵉ ⵉⵙⴽⵔⵏ ⵜⵉⴳⵍⴳⴰⴹ ⵉⵠⴼⴰⵙⵉⵍⵉⵙⴰ  ⵉⴼⴽ ⴰⵙ ⵉⵎⵉⴽⴽ ⵏ ⵜⵔⵖⵉ ⵜⵣⵣⵓ ⴰⵙ ⵜⵉⵎⵇⵇⴰ ⵏ ⵓⴷⴼⵍ ⵍⵍⵉ ⵉⵍⵍⴰⵏ ⴼ ⵜⴰⵡⵏⵓⴷⵜ ⵏⵏⵙ. ⴰⵙⵙ ⵙ ⵜⵉⵎⵎⴰⴷ ⵏⵏⵙ ⴰⵔ ⵜⴼⵜⵜⵓ ⵠⴼⴰⵙⵉⵍⵉⵙⴰ , ⵍⵍⵉⵖ ⵜⴰⵥ ⵜⴰⴷⴳⴳⵯⴰⵜ ⵜⵍⴽⵎ-ⵏⵏ ⵢⴰⵜ ⵜⵎⴰⵎⴰⵜ ⵍⵍⵉ ⵖ ⵜⵍⵍⴰ ⵢⴰⵜ ⵜⴳⵎⵎⵉ ⵏ ⵓⴽⵛⵛⵓⴹ ⵉⵙⵙⵓⵜⵍ ⴰⵙ ⴷ ⵢⴰⵏ ⵓⴹⵔⵔⴰⵙ ⵉⵜⵜⵓⵙⴽⴰⵔ ⵖⴰⵙ ⵣⵖ ⵢⵉⵅⵙⴰⵏ ⵏ ⵓⴼⴳⴰⵏ. ⵖ ⵓⴼⵍⵍⴰ, ⵜⵜⵔⵙⵏ ⵉⵇⵍⵇⵓⵍⵏ ⵏ ⵓⴼⴳⴰⵏ. ⵜⵉⴼⵍⵓⵜ ⵜⴻⵜⵜⵓⵙⴽⴰⵔ ⵙⴳ ⵉⵅⵙⴰⵏ ⵏ ⵜⵖⵎⵉⵡⵉⵏ. ⵉⵙⵔⴳⵍⵏ ⵏⵏⵙ ⴳ ⵡⵉⵏ ⵉⴹⵓⴹⴰⵏ ⴷ ⵜⴼⴷⵏⵉⵏ, ⵉⵥⴽⵕⵓⵏⵏ ⴳ ⵡⴰⴳⵊⵉⵡⵏ ⵙ ⵡⵓⵅⵙⴰⵏ ⵏⵏⵙⵏ ⵉⴼⵔⵙⵏ. ⵍⵍⵉⴳ ⵜⵥⵕⴰ ⵠⴼⴰⵙⵉⵍⵉⵙⴰ  ⴰⵢⵍⵍⵉ, ⵜⴳⴳⵯⴷ, ⵜⴽⵔⵎ, ⵜⴳⴳⵓⵎⵎⵉ ⵙⵓⵍ ⴰⴷ ⵜⵎⵓⵙⵙⵓ, ⵣⵓⵏ ⴷ ⵉⴳ ⵜⵣⴷⵉ ⴷ ⵡⴰⴽⴰⵍ. ⴰⴽⵓⴷⴰⵏⵏ ⵏⵉⵜ ⴰⴷ ⴷⴰⵖ ⵉⵍⴽⵎ ⵢⴰⵏ ⵓⵎⵏⴰⵢ ⵢⴰⴹⵏⵉⵏ ⵉⴹⵍⴰⵏ, ⴰⵢⵢⵉⵙ ⵏⵏⵙ ⵉⴹⵍⴰ, ⵜⴰⵔⵉⴳⵜ ⵜⴹⵍⴰ, ⵢⵓⴽⵉ ⴰⴹⵕⵕⴰⵙ ⵍⵍⵉ ⵉⵍⵍⴰⵏ ⴳ ⴷⴰⵜ ⵏⵏⵙ ⵍⴰⵃ ⵜ. ⵉⵇⵇⵏ ⵏⵉⵜ ⵉⵍⵎⵎⴰ ⵉⴹ ⵙ ⵜⵉⵍⵍⴰⵙ ⵏⵏⵙ. ⴰⴽⵓⴷⴰⵏⵏ ⵏⵉⵜ ⵙⵙⵏⵜⵉⵏⵜ ⵜⵉⵇⴱⵓⵛⵉⵏ ⵏ ⵉⵇⵍⵇⴰⵍ ⵍⵍⵉ ⵍⵍⴰⵏⵉⵏ ⴼ ⵉⴳⴳⵉ ⵏ ⵓⴹⵕⵕⴰⵙ ⴰⵔ ⵙⵙⵎⵔⵖⴰⵏⵜ ⴰⵢⵍⵍⵉⴳ ⵙⴽⵔⵏⵜ ⴳ ⵢⵉⴹ ⵣⵓⵏ ⴷ ⴰⵣⴰⵍ.ⵠⴼⴰⵙⵉⵍⵉⵙⴰ  ⵜⵓⵎⵥ ⵜⵜ ⵜⵡⴷⴰ. ⵜⴷⴷⵎ ⴰⵔ ⵜⴻⵜⵜⵔⴳⵉⴳⵉⵢ. ⵉⴼⴰⴷⴷⵏ ⵏⵏⵙ ⵓⵔ ⵜⵜ ⵙⵓⵍ ⵓⵙⵉⵏ. ⵓⵔ ⵙⵓⵍ ⵜⵣⵎⵔ ⵎⵇⵇⴰⵔ ⴷ ⴰⴷ ⵜⵔⵡⵍ ⵙⴳ ⵡⴰⵏⵙⴰ ⴰⵏⵏ ⵍⵍⵉⴳ ⵜⵖⴰⵎⴰ. ⵙ ⵜⵥⵡⴰⵢⵜ ⵉⴷⴷⵎ ⵡⴰⴽⴰⵍ ⴰⵔ ⵉⵜⵜⵎⴷⵓⴷⵉ. ⵉⵎⵉⴽⴽ, ⵀⴰ ⵏⵏ ⵜⴰⵖⵯⵥⵏⵜ «ⴱⴰⴱⴰ ⵢⴰⴳⴰ» ⵍⵍⵉ ⵢⴰⵢⵍⵏ ⵙ ⵓⴼⵔⴷⵓ ⵏⵏⵙ. ⴰⴼⴰⴷ ⴰⴷ ⵜⵙⵔⴱⵉ ⵜⵉⴼⵙⵓⵙ, ⴰⵔ ⵜⵙⵎⴷⵓⴷⵉ ⴰⵙⴽⵯⵎ. ⴰⴼⴰⴷ ⴰⴷ ⵜⵙⴼⴹ ⵜⵉⴽⴽⴰⵍ ⵏⵏⵙ ⵜⵓⵙⵉ ⵜⴰⵙⵙⵎⵜ, ⵜⴱⵉⴷⴷ ⴳ ⴷⴰⵜ ⵏ ⵜⵉⴼⵍⵓⵜ ⵜⴳ ⵜⴰⵖⵓⵢⵢⵉⵜ: (ⵙⵏⵉⴼ, ⵙⵏⵉⴼ! ⴰⴹⵓ ⵏ ⵓⴽⵙⵓⵎ ⵉⵍⵥⴰⵏ ⴰⵢⴰ ⵎⵉ ⴽⵟⵟⴰⵖ. ⵎⴰⴷ ⵖⵉⴷ ⵉⵍⵍⴰⵏ?...) ⵜⴰⵥ ⵏⵏ ⵙⵉⵙ ⵠⴼⴰⵙⵉⵍⵉⵙⴰ ⵙ ⵢⴰⵜ ⵜⵡⴷⴰ ⵉⴳⴳⵓⵜⵏ, ⵜⵣⵣⵓⵍ ⴼⵍⵍⴰⵙ, ⵜⵉⵏⵉ ⴰⵙ: (ⵜⴰⴱⵜⵜⵉ ⵉⵏⵓ, ⵀⴰ ⵏⵏ ⵏⴽⴽⵉⵏ ⴰⵢⴰⴷ. ⵀⴰ ⵏⵏ ⵉⵙⵜⵉⵙ ⵏ ⵜⵎⵖⴰⵔⵜ ⵏ ⴱⴰⴱⴰ ⵓⵣⵏⵏⵜ ⵉⵢⵉ ⴷ ⴰⴷ ⴰⵙⵏⵜ ⵏⵏ ⴰⵡⵉⵖ ⵉⵎⵉⴽⴽ ⵏ ⵜⴰⴽⴰⵜ, ⵙⴳ ⵜⴳⵎⵎⵉ ⵏⵏⵎ) (ⵉⵛⵡⴰ, ⵉⵛⵡⴰ, ⵜⴰⵎⵖⴰⵔⵜ ⵏ ⴱⴰⴱⴰⵎ ⵜⴳⴰ ⵉⵢⵉ ⵏⵉⵜ ⴽⵔⴰ. ⵖⴰⵎⴰ ⴷⴰⵔⵉ ⵉⵎⵉⴽⴽ ⵏ ⵜⵉⵣⵉ, ⵀⴰ ⵏⵏ ⵔⵉⵖ ⴰⴷ ⵉⵢⵉ ⵜⴰⵡⵙⴷ ⴳ ⵜⵡⵓⵔⵉ, ⵓⴽⴰⵏ ⴰⵜⵉ ⵔⴰⴷ ⵥⵕⵖ). ⵉⵜⵏ ⴰⵙ «ⴱⴰⴱⴰ ⵢⴰⴳⴰ».

ⵜⴼⴼⵉ ⴷⴰⵖ ⵜⵖⵯⵥⵏⵜ «ⴱⴰⴱⴰ ⵢⴰⴳⴰ» ⵢⴰⵜ ⵜⵖⵓⵢⵢⵉⵜ ⵣⵓⵏ ⴷ ⵉⴳ ⵢⵓⵜ ⵉⴳⴳⵉⴳ, ⵜⵏⵏⴰ: (ⵉⵙⵔⴳⵍⵏ ⵉⵏⵓ ⴷⵓⵙⵏⵉⵏ, ⵕⵥⵎⴰⵜ, ⵜⴰⴳⴳⵓⵔⵜ ⵉⵏⵓ ⵉⵎⵇⵇⵓⵔⵏ ⵙⴽⵔ ⵉⵢⵉ ⴰⴷ ⵣⵔⵉⵖ, ⴽⵎⵎⵉⵏ). ⵉⵙⵔⴳⵍⵏ ⵕⵥⵎⵏ, ⵜⴰⴳⴳⵓⵔⵜ ⵜⵉⵜⵜⵉ ⵏⵏ ⵜⵙⴽⵔ ⵉ «ⴱⴰⴱⴰ ⵢⴰⴳⴰ» ⴰⴷ ⵜⴽⵛⵎ. ⵜⴹⴼⵓⵕ ⵜⵜ ⵉⵏⵏ ⵠⴼⴰⵙⵉⵍⵉⵙⴰ . ⵜⴰⵎⴰ ⵏⵉⵜ ⵏ ⵜⴰⴳⴳⵓⵔⵜ ⴰⴷ ⴳ ⵜⵎⵖⵉ ⵢⴰⵜ ⵜⴳⵏⴹⴰⴼⵜ ⵍⵍⵉ ⵉⵔⴰⵏ ⴰⴷ ⵜⵓⵜ «ⴼⴰⵙⵉⵍⵉⵙⴰ» ⵙ ⵜⴼⴰⵜⵜⵡⵉⵏ ⵏⵏⵙ. ⵎⴰⵛⴰ ⵜⵙⴰⵡⵍ ⴷ ⵜⵖⵯⵥⵏⵜ ⵜⵏⵏⴰ ⴰⵙ: (ⵓⵀⵓⵢ, ⵓⵀⵓⵢ, ⴰ ⵜⴰⴳⵏⴹⴰⴼⵜ ⵉⵏⵓ, ⴰⴷ ⵓⵔ ⵜⴳⴳⵔⴷ ⵉ ⵠⴼⴰⵙⵉⵍⵉⵙⴰ  ⵀⴰ ⵏⵏ ⵏⴽⴽ ⴰⴷ ⴷⵉⴷⵙ ⵉⵎⵓⵏⵏ.) ⵉⴳⴳⵉ ⵏ ⵓⵎⵏⴰⵔ ⵏ ⵜⴰⴳⴳⵓⵔⵜ, ⵉⴳⵏ ⵓⴽⴰⵏ ⴳⵉⵙ ⵢⴰⵏ ⵡⴰⵢⴷⵉ, ⵖⴰⵔ ⵉⵥⵔⴰ «ⴼⴰⵙⵉⵍⵉⵙⴰ» ⵢⴰⵣⵣⵍ ⴷ ⵢⵉⵔⵉ ⴰⴷ ⴳⵉⵙ ⵉⴱⴱⵉ, ⵜⵏⵏⴰ ⴰⵙ «ⴱⴰⴱⴰ ⵢⴰⴳⴰ»: (ⵓⵀⵓⵢ, ⴰⴷ ⴳⵉⵙ ⵓⵔ ⵜⴱⴱⵉⵜ ⴰ ⵢⴰⵢⴷⵉ ⵉⵏⵓ, ⵏⴽⴽ ⴰⴷ ⴷⵉⴷⵙ ⵉⵎⵓⵏⵏ) ⴽⵛⵎⵏⵜ ⵓⴽⴰⵏ ⵙ ⵓⴳⵏⵙ, ⵀⴰⵏ ⵢⴰⵏ ⵓⵎⵓⵛⵛ ⵉⵥⵥⴰⵢⵜ «ⴱⴰⴱⴰ ⵢⴰⴳⴰ» ⵢⵉⵔⵉ ⴰⴷ ⵉⵅⵎⵊ ⵜⵓⴷⵎⵜ ⵏⵠⴼⴰⵙⵉⵍⵉⵙⴰ , «ⴱⴰⴱⴰ ⵢⴰⴳⴰ» ⵜⵏⵏⴰ ⴰⵙ: (ⴰⵎⵓⵛⵛ ⵉⵏⵓ ⴰⴷ ⵜⵜ ⵓⵔ ⵜⵅⵎⵉⵊⵜ ⵀⴰⵜ ⵏⴽⴽ ⴰⴷ ⴷⵉⴷⵙ ⵉⵎⵓⵏⵏ.) ⵜⴳⵔⴰⵡⵍ ⵏⵏ ⵜⵖⵥⵏⵜ ⵙ ⴷⴰⵔ ⴼⴰⵙⵉⵍⵉⵙⴰ  ⵜⵏⵏⴰ ⴰⵙ: (ⵉⵙ ⵜⵥⵕⵉⵜ?! ⵀⴰ ⵏⵏ ⴰⴷ ⵓⵔ ⵜⵉⵔⵉⴷ ⴰⴷ ⵜⵔⵡⵍⴷ ⵙⴳ ⵜⴳⵎⵎⵉ ⵉⵏⵓ, ⴰⵎⵓⵛⵛ ⵉⵏⵓ ⵔⴰⴷ ⴰⵎ ⵉⵅⵎⵊ ⵜⵓⴷⵎⵜ ⵏⵏⵎ, ⴰⵢⴷⵉ ⵉⵏⵓ ⵔⴰⴷ ⴽⵎ ⵉⴱⴱⵉ, ⵜⴰⴳⵏⴹⴰⴼⵜ ⵉⵏⵓ ⵔⴰⴷ ⴽⵎ ⵜⵓⵜ ⵙ ⵜⴼⴼⴰⵜⵡⵉⵏ ⵏⵏⵙ. ⵜⴰⴳⴳⵓⵔⵜ ⵉⵏⵓ ⵔⴰⴷ ⵜⵇⵇⵏ; ⵓⵔ ⴰⴷ ⴽⵎ ⵜⴰⴷⵊ ⴰⴷ ⵜⴼⴼⴰⵖⴷ).

ⵜⴽⵛⵎ ⵏⵏ ⵓⴽⴰⵏ «ⴱⴰⴱⴰ ⵢⴰⴳⴰ» ⵙ ⵓⴳⵓⵏⵙ ⵏ ⵜⴳⵎⵎⵉ, ⵜⵥⵥⵍ ⴼ ⵉⴳⴳⵉ ⵏ ⵢⴰⵏ ⵉⴼⵍⵓ ⵜⵙⴰⵡⵍ ⴷ ⵜⵏⵏⴰ: (ⵜⴰⵙⵎⴰⵅⵅⵓⵜ! ⵜⴰⵙⵎⴰⵅⵅⵓⵜ! ⴰⵡⵉ ⵉⵢⵉ ⴷ ⵎⴰⴷ ⵛⵜⵜⴰⵖ). ⵜⵏⵜⴳ ⵜⵙⵎⴰⵅⵅⵓⵜ ⵍⵍⵉ ⵜⵙⵔⵙ ⴷ ⵉ «ⴱⴰⴱⴰ ⵢⴰⴳⴰ» ⵢⴰⵏ ⵉⴽⵉⵏ/ⵜⴽⵉⵏⵜ ⵏ ⵓⵙⴽⴽⵉⴼ. ⵢⴰⵏ ⵡⴰⴳⴰ ⵏ ⵓⴽⵯⴼⴰⵢ, ⵙⵉⵎⵔⴰⵡ ⵏ ⵓⴼⵓⵍⵍⵓⵙ, ⴽⵓⵎⵔⴰⵡ ⵏ ⵓⴽⵢⵢⴰⵡ, ⴰⵣⴳⵏ ⵏ ⵓⵣⴳⵔ, ⵙⵉⵏ ⵉⵡⵍⵍⴰⵢ ⴷ ⵜⴰⵎⵎⵏⵜ, ⴷ ⵜⵎⵙⵙⵓⵢⵉⵏ ⴳⴳⵓⵜⵏⵉⵏ ⵍⵍⵉ ⵏⴰⵃⵢⴰ. «ⴱⴰⴱⴰ ⵢⴰⴳⴰ» ⵜⵍⵎⵥ ⴰⴽⴽⵯ ⵜⵉⵔⴰⵎ ⴰⵏⵏ, ⵓⵔ ⵜⴼⴽⵉ ⵉ «ⴼⴰⵙⵉⵍⵉⵙⴰ» ⴰⵎⵔ ⵢⴰⵜ ⵜⵉⵍⵎⵛⵜ ⵏ ⵓⵖⵔⵓⵎ. ⵜⵙⴰⵡⵍ ⴷ ⵏⵉⵜ ⵜⵏⵏⴰ ⴰⵙ: («ⴼⴰⵙⵉⵍⵉⵙⴰ», ⴰⵙⵉ ⴰⵙⴳⵔⵙ ⴰⵏⵏ ⵏ ⵓⵙⵏⴳⴰⵔ ⵓⵎⵍⵉⵍ ⵜⴼⴼⵔⵏⵜ, ⵀⴰ ⵏⵏ ⵉⴳ ⵓⵔ ⵜⵙⴽⵉⵔⴷ ⴰⵢⴰⴷ ⵍⵍⵉ ⵙ ⴰⵎ ⵏⵏⵉⵖ ⵔⴰⴷ ⴽⵎ ⵛⵛⴰⵖ!). ⵜⵏⵏⴰ ⴰⵙ ⵓⴽⴰⵏ ⵎⴽⴰⵏⵏ ⵜⵥⵥⵍ ⵏⵉⵜ ⴷⴰⵖ ⵖⴼ ⵉⴳⴳⵉ ⵏ ⵉⴼⵍⵓ ⵍⵍⵉ ⵜⴷⴷⵎ ⴰⵔ ⵜⵙⵅⵓⵔⵔⵉⵢ.

ⵜⵓⵙⵉⵠⴼⴰⵙⵉⵍⵉⵙⴰ  ⵜⵉⵍⵎⵛⵜ ⵍⵍⵉ ⵏ ⵓⵖⵔⵓⵎ ⵜⵙⵔⵙ ⵜ ⵉⵏⵏ ⵉ ⵜⵉⵙⵍⵉⵜ ⵏⵏⵙ ⵜⵉⵏⵉ ⴰⵙ: (ⵜⵉⵙⵍⵉⵜ ⵉⵏⵓ ⵎⵥⵥⵉⵢⵏ! ⵉⵛⵛ ⵜⵉⵍⵎⵛⵜ ⴰⵏⵏ ⵜⵙⴼⵍⴷⴷ ⵉ ⵜⴽⴽⵕⵥⵉ ⵉⵏⵓ. ⵀⴰ ⵏⵏ « ⴱⴰⴱⴰ ⵢⴰⴳⴰ » ⵜⵥⵥⵓⵥⵉ ⵉⵢⵉ ⵙ ⵢⴰⵜ ⵜⵡⵓⵔⵉ ⴱⴰⵀⵔⴰ ⵉⵎⵔⴰⵏ, ⵜⵙⴽⵔ ⴼ ⵡⴰⴷ ⵉⵢⵉ ⵜⵛⵛ, ⵉⴳ ⵜⵜ ⵓⵔ ⵙⴽⵉⵔⵖ, ⵜⵙⴰⵡⵍ ⴷ ⵜⵙⵍⵉⵜ ⵜⵏⵏⴰ ⴰⵙ: (ⴰⴷ ⵓⵔ ⵜⴰⵍⵍⴰⴷ, ⴰⴷ ⵓⵔ ⵜⵖⵉⵍⴼⴷ, ⵢⵓⴼ ⴰⵎ ⴰⴷ ⵜⴷⴷⵓⵜ ⴰⴷ ⵜⴳⵏⴷ, ⵉⴹ ⵔⴰⴷ ⴷⵉⴷⵙ ⵢⴰⵡⵉ ⴰⴼⵙⵙⴰⵢ ⵉ ⵜⵎⵓⴽⵔⵉⵙⵜ ⵏⵏⵎ.) ⵜⵉⵣⵉ ⵍⵍⵉ ⴳ ⵜⵟⵟⴰⵙ «ⴼⴰⵙⵉⵍⵉⵙⴰ», ⵜⵙⵙⵏⵜⵉ ⵜⵙⵍⵉⵜ ⴰⵔ ⵜⴱⵔⵔⴰⵃ : (ⵡⴰ ⵜⵉⵎⴽⵔⴰⵔⴰⵙⵉⵏ ! ⵡⴰ ⵜⵉⵎⴰⵍⵍⵉⵡⵉⵏ, ⵡⴰ ⵉⵥⴰⴽⴽⵉⵡⵏ; ⴰⵢⵍⵍⴰⵎⵜ ⴷ ⴷⴰⵔⵉ. ⴼⴰⵔⵔⵉⵢⴰⵎⵜ ⴷ ⴰⴷ ⵜⵔⴰⵔⵎⵜ ⵜⴰⴳⴰⵜ ⴼ «ⴼⴰⵙⵉⵍⵉⵙⴰ».) ⴰⴽⵓⴷⴰⵏⵏ ⵏⵉⵜ ⴰⴷ ⵉⵍⴽⵎⵏ ⵢⴰⵏ ⵓⵀⵉⵜⵜⵓⵍ ⵏ ⵉⴳⴹⴰⴹ ⵙ ⵜⵓⴳⴳⵜ ⵏ ⵉⵙⴽⵉⵊⵊⵉⵜⵏ ⴷⴷⵎⵏ ⴰⴽⴽⵯ ⴰⵔ ⴼⴼⵔⵏⵏ ⴰⵙⵏⴳⴰⵔ ⴰⵎⵍⵍⴰⵍ. ⴰⵔ ⵜⵜⵍⵡⴰⵃⵏ ⵉⵎⵏⴷⵉ ⵙ ⵢⴰⵜ, ⴰⴼⵔⴰⵏ ⵙ ⵢⴰⵜ. ⵓⵔ ⴽⴽⵉⵏ ⴰⵎⵢⴰ, ⵙⵖⵓⵙⵏ ⴰⵙⴳⵔⵙ ⵍⵍⵉ ⵖ ⵓⴼⵔⴰⵏ. ⵜⵉⵣⵉ ⴰⵏⵏ ⵏⵉⵜ ⴰⴷ ⵉⵍⴽⵎ ⵓⵎⵏⴰⵢ ⵓⵎⵍⵉⵍ ⴼ ⵉⴳⴳⵉ ⵏ ⵡⴰⵢⵢⵉⵙ ⵏⵏⵙ ⵓⵎⵍⵉⵍ ⵙ ⵜⴰⵔⵉⴽⵜ ⵜⵓⵎⵍⵉⵍⵜ, ⵜⴱⴱⴰⵇⵇⵉ ⴷ ⵏⵉⵜ ⵜⵉⴼⴰⵡⵜ ⵏ ⵡⴰⵙⵙ. ⵃⵔⴰ ⴷ ⵓⴽⴰⵏ ⵜⵏⴽⵔ «ⴱⴰⴱⴰ ⵢⴰⴳⴰ» ⵙⴳ ⵢⵉⴹⵙ, ⵜⵖⵔ ⵏⵉⵜ ⵉ «ⴼⴰⵙⵉⵍⵉⵙⴰ»: («ⴼⴰⵙⵉⵍⵉⵙⴰ» ⵉⵙ ⵜⵀⵢⵢⵉⵜ ⵜⴰⵡⵡⵓⵔⵉ ⵏⵏⵎ?), ⵜⵔⴰⵔ ⴼⵍⵍⴰⵙ «ⴼⴰⵙⵉⵍⵉⵙⴰ» ⵜⵏⵏⴰ ⴰⵙ : (ⵢⵢⵉⵀ ⴰ ⵜⴰⴱⵜⵜⵉ ⵉⵏⵓ, ⵙⴽⵔⵖ ⵜⵜ ⴰⴽⴽⵯ), ⵜⴼⴰⵢⵍ «ⴱⴰⴱⴰ ⵢⴰⴳⴰ» ⵎⴰⵛⴰ ⵓⵔ ⵜⵣⵎⵉⵔ ⴰⴷ ⵜⵉⵏⵉ ⴰⵎⵢⴰ. ⵜⵉⴳⵉⵔⴰ ⵜⵙⴰⵡⵍ ⴷ, ⵜⵉⵏⵉ ⴰⵙ: (ⵀⴰⵢⵢⵉ ⵔⴰⴷ ⴷⴷⵓⵖ ⴰⴷ ⵙⵉⴳⴳⵉⵍⵖ ⵎⴰⴷ ⵛⵜⵜⴰⵖ, ⴰⵙⵉ ⴽⵎⵎⵉⵏ ⴰⵙⴳⵔⵙ ⴰⵏⵏ ⵢⴰⴹⵏ ⵉⴽⵜⴰⵔⵏ ⵙ ⵉⴽⵉⴽⵔ ⴷ ⵜⴰⵇⵇⴰⵢⵉⵏ ⵏ ⵉⴼⵍⵉⵍⵓ, ⵉⵇⵇⴰⵏ ⴷ ⴰⴷ ⵉⵜⵜⵓⴼⵔⴰⵏ ⴰⵡⴷ ⵏⵜⵜⴰ, ⵜⵙⴽⵔⵜ ⴳⵉⵙ ⵙⵉⵏ ⵉⴳⵓⴷⵉⵢⵢⵏ, ⵉⵖ ⵓⵔ ⵜⵙⴽⵔⵜ ⵎⴰⵢⴰⵏⵏ ⵀⴰ ⵏⵏ ⵔⴰⴷ ⴽⵎ ⵛⵛⴰⵖ). ⵜⴼⴼⵓⵖ ⴷ «ⴱⴰⴱⴰ ⵢⴰⴳⴰ» ⵙ ⵓⵙⴰⵔⴰⴳ ⵜⵙⵉⵏⵚⴳ, ⵉⵍⴽⵎ ⵜⵜ ⵉⴷ ⵓⴼⵔⴷⵓ ⵏⵏⵙ. ⴰⴽⵓⴷⴰⵏⵏ ⵏⵉⵜ ⴰⴷ ⴷⴰⵖ ⵉⵣⵔⵉ ⵡⴰⵢⵢⵉⵙ ⴰⵣⴳⴳⵯⴰⵖ ⵙ ⵜⴰⵣⵣⵍⴰ, ⵜⴹⴼⵓⵕ ⵜ ⵉⴷ ⵏⵉⵜ ⵜⴰⴼⵓⴽⵜ ⵜⴰⴳⴳⵉ ⴷ. ⵜⵙⴽⵓⵙ ⵏⵏ «ⴱⴰⴱⴰ ⵢⴰⴳⴰ» ⴳ ⵓⴳⵏⵙ ⵏ ⵓⴼⵔⴷⵓ ⵏⵏⵙ. ⴼⴰⴷ ⴰⴷ ⵜⴼⵙⵙⵓⵙ ⴰⵔ ⵜⵙⵎⴷⵓⴷⵉ ⴰⵙⴰⴽⵎ. ⴼⴰⴷ ⴰⴷ ⵜⵙⴼⴹ ⵜⵉⴽⴽⴰⵍ ⵏⵏⵙ ⵜⵓⵙⵉ ⵜⴰⵙⵙⵎⵜ. «ⴼⴰⵙⵉⵍⵉⵙⴰ» ⵜⵓⵙⵉ ⵢⴰⵜ ⵜⵉⵍⵎⵛⵜ ⵏ ⵓⵖⵔⵓⵎ ⵜⴼⴽ ⵜⵜ ⵉ ⵜⵙⵍⵉⵜ ⵏⵏⵙ ⵜⵏⵏⴰ ⴰⵙ: (ⵜⵉⵙⵍⵉⵜ ⵉⵏⵓ, ⵜⵉⵙⵍⵉⵜ ⵉⵏⵓ, ⵙⵎⵓⵍⵍⵓ ⴼⵍⵍⴰ ⵜⴰⵡⵙⴷ ⵉⵢⵢⵉ). ⵜⵉⵙⵍⵉⵜ, ⵜⵙⵙⵏⵜⵉ ⴰⵔ ⵜⵇⵇⴰⵔ ⵙ ⵎⴽⴰⴷ: (ⵡⴰ ⵉⵖⵔⴷⴰⵢⵏ ⵏ ⵉⵖⵔⵎ, ⵡⴰ ⵉⵖⵔⴷⴰⵢⵏ ⵏ ⵡⵓⵔⵜⴰⵏ, ⴰⵣⵣⵍⴰⵜ ⴷ, ⵍⴽⵎⴰⵜ ⵉⴷ ⵖⵉⵍ ⴰⴷ). ⵓⵔ ⵜⴰ ⵜⵣⵔⵉ ⵎⵇⵇⴰⵔ ⴷ ⵢⴰⵜ ⵜⵉⵣⵉ ⵉⴷⵔⵓⵙⵏ ⵍⵍⵉⵖ ⴷ ⵍⴽⵎⵏ ⵉⵖⵔⴷⴰⵢⵏ ⵍⵍⵉ ⴳ ⴽⵔⴰⵢⴳⴰⵜⵜ ⴰⵏⴰⵡ, ⵙⴽⵔⵏ ⵜⴰⵡⵓⵔⵉ ⵍⵍⵉ ⵖⵎⴽⵍⵍⵉ ⵜⵜ ⵜⵔⴰ «ⴱⴰⴱⴰ ⵢⴰⴳⴰ». ⵓⵎⵏⵉⴷ ⵏ ⵜⴰⴷⴳⴳⵯⴰ, ⵜⵙⵔⵙ ⵏⵏ ⵜⵙⵎⴰⵅⵅⵓⵜ ⵜⴰⴷⴰⴱⵓⵜ ⵍⵍⵉ ⵖ ⵜⵍⵍⴰ ⵜⵉⵔⵎⵜ ⵏ «ⴱⴰⴱⴰ ⵢⴰⴳⴰ», ⵜⴳⴳⴰⵡⵔ ⴰⵔ ⵙⵉⵙ ⵜⴻⵜⵜⵇⵇⵍ.

ⴰⵎⵏⴰⵢ ⵉⴹⵍⴰⵏ ⵉⵣⵔⵉ ⴷⴰⵖ ⴳ ⴷⴰⵜ ⵏ ⵜⴰⴳⴳⵓⵔⵜ ⵏ ⵜⴳⵎⵎⵉ, ⵉⴹⴼⵓⵔ ⵜ ⵉⴷ ⵏⵉⵜ ⵉⴹ. ⵜⵉⵇⴰⴱⴱⵓⵛⵉⵏ ⵏ ⵉⵇⵍⵇⵓⵍⵏ ⵙⵙⵏⵜⵉⵏⵜ ⴷⴰⵖ ⴰⵔ ⵙⵎⵔⵖⴰⵏⵜ, ⵉⴹⴰⴳⴳⵯⵏ ⴰⵔ ⵜⵇⴰⵛⵛⴰⵢⵏ. «ⴱⴰⴱⴰ ⵢⴰⴳⴰ» ⵜⵍⴽⵎ ⴷ ⵙ ⵓⴹⴰⵕ ⵏⵏⵙ ⴰⵅⵛⵛⴰⵏ. ⵜⵖⵔ ⵉ ⴼⴰⵙⵉⵍⵉⵙⴰ , ⵜⵏⵏⴰ ⴰⵙ : ⴼⴰⵙⵉⵍⵉⵙⴰ, ⵉⵙ ⵜⵙⵎⴷⵉⵜ ⵜⴰⵡⵓⵔⵉ ⵏⵏⵎ?)

ⵜⵔⴰⵔ ⴼⵍⵍⴰⵙ ⴼⴰⵙⵉⵍⵉⵙⴰ: (ⵢⵢⵉⵀ ⴰ ⵜⴰⴱⵜⵉ ⵉⵏⵓ ⵙⵎⴷⵉⵖ ⴰⴽⴽⵯ ⵜⴰⵡⵓⵔⵉ ⵉⵏⵓ), ⵜⴻⵜⵜⴼⴰⵢⵍ ⴷⴰⵖ ⴱⴰⵀⵔⴰ ⵜⴰⵖⵯⵥⵏⵜ . ⵎⴰⵛⴰ ⵓⵔ ⵜⵓⴼⵉ ⵎⴰⴷ ⵜⵜⵉⵏⵉ, ⵜⵙⴰⵡⵍ ⴷ, ⵜⵉⵏⵉ ⵉ ⴼⴰⵙⵉⵍⵉⵙⴰ: (ⴷⴷⵓ ⴽⵎⵎ ⴰⴷ ⵜⴳⵏⵜ, ⵀⴰ ⵏⵏ ⴰⵡⴷ ⵏⴽⴽⵉ ⵔⴰⴷ ⴷⴷⵓⵖ ⴰⴷ ⴳⵏⵖ). ⵜⵣⵔⵉ «ⴼⴰⵙⵉⵍⵉⵙⴰ» ⴳ ⵜⵖⵔⴷⵉⵏ ⵏ ⵉⵏⴽⴰⵏ ⵜⵙⵙⴼⵍⴷ ⵉ «ⴱⴰⴱⴰ ⵢⴰⴳⴰ» ⵍⵍⵉⴳ ⵜⵏⵏⴰ ⵉ ⵜⵙⵎⴰⵅⵅⵓⵜ: (ⵙⵙⵔⵖ ⵜⴰⴽⴰⵜ ⴰⴷ ⴱⴰⵀⵔⴰ ⵜⵏⵏⵓⵛⴳ, ⴰⴷ ⵓⴽⴰⵏ ⵏⴽⵔⵖ ⵔⴰⴷ ⴽⵏⴼⵖ ⴼⴰⵙⵉⵍⵉⵙⴰ). ⴰⴽⵓⴷⴰⵏⵏ ⵉⵍⵎⵎⴰ ⴰⴷ ⵏⵉⵜ ⵜⵡⴰⵜⵙ «ⴱⴰⴱⴰ ⵢⴰⴳⴰ» ⵉⴳⴳⵉ ⵏ ⵢⴰⵏ ⵉⴼⵍⵓ ⵜⴳⵏ ⴼⵍⵍⴰⵙ. ⵜⵥⵥⵍ ⵏⵏ ⵉⵏⵛⵓⵔⵏ ⵏⵏⵙ ⴼ ⵉⴳⴳⵉ ⵏ ⵢⴰⵜ ⵜⵙⴽⴼⵍⵜ ⵜⵎⵓⵏ ⵣⵓⵏ ⴷ ⴽⵔⴰ ⵏ ⵡⴰⵢⴷⵉ ⵏ ⵜⴳⵎⵔⵜ. ⵜⵙⵙⵏⵜⵉ ⵉⵍⵎⵎⴰ ⴰⵔ ⵜⵙⵅⵓⵔⵔⵉ ⴰⵢⵍⵍⵉⵖ ⵜⵊⵊⴰⵡⵏ ⵉⵎⵟⵟⴰⵡⵏ ⵜⴽⵜⵉ ⴷ ⴷⴰⵖ ⵜⵉⵙⵍⵉⵜ ⵏⵏⵙ ⵎⵥⵥⵉⵢⵏ. ⵜⴼⴽ ⴰⵙ ⴷⴰⵖ ⵢⴰⵏ ⵉⵍⵎⵛ ⵏ ⵓⵖⵔⵓⵎ ⵜⵙⴼⵍⴷ ⵜⵜ ⵉⵢⵉ ⴰⴷ ⴰⵎ ⴰⵍⵙⵖ ⴰⵏⵣⴳⵓⵎ ⵉⵏⵓ. ⵀⴰ ⵏⵏ ⵜⴰⵖⵯⵥⵏⵜ ⵜⵔⴰ ⴰⴷ ⵉⵢⵉ ⵜⴽⵏⴼ ⵜⵛⵛ ⵉⵢⵉ. ⵜⵉⵙⵍⵉⵜ ⵍⵍⵉ ⵜⵎⵍⴰ ⴰⵙ ⴷⴰⵖ ⵎⴰⵙ ⵜⵜ ⵉⴷ ⵉⵇⵇⴰⵏⵏ ⴰⴷ ⵜⵙⴽⵔ ⴼⴰⴷ ⵜⵏⵊⵎ ⴰⴷ ⵓⵔ ⵜⴻⵜⵜⵡⵜⵛⴰ.

ⴱⵓ ⵡⴰⵢⵢⵉⵙ ⴰⵙⴳⴳⴰⵏ

ⵜⵡⴰⴷⵙ ⴼⴰⵙⵉⵍⵉⵙⴰ  ⴷⴰⵔ ⵜⵙⵎⴰⵅⵅⵓⵜ ⵜⴹⵕ ⵏⵏ ⴼ ⵉⴹⴰⵕⵕⵏ ⵏⵏⵙ ⴰⵔ ⵜⵏ ⵜⵙⵙⵓⴷⵓⵎ ⵜⵉⵏⵉ ⴰⵙ : (ⵙⵎⵓⵍⵍⵓ ⴼⵍⵍⴰ ⴰ ⵜⴰⵙⵎⴰⵅⵅⵓⵜ, ⵜⴰⵡⵙⵜ ⵉⵢⵉ. ⴼⴼⵉⵏ ⴰⵎⴰⵏ ⴼ ⵉⴽⵛⵛⵓⴹⵏ ⴰⴷ ⵓⵔ ⵜⵙⵓⵏⵛⴳⵜ ⵜⴰⴽⴰⵜ. ⵀⴰ ⵜⵉ ⵔⴰⴷ ⴰⵎ ⴼⴽⵖ ⵜⴰⵏⵙⵔⵉⴼⵜ ⵉⵏⵓ ⵍⵍⵉ ⵉⵜⵜⵓⵥⴹⴰⵏ ⴳ ⵓⵎⵟⵟⴰⵍⵙⵓ. ⵜⵔⴰⵔ ⴼⵍⵍⴰⵙ ⵜⵙⵎⴰⵅⵅⵓⵜ ⵜⵉⵏⵉ ⴰⵙ : (ⵔⴰⴷ ⴰⵎ ⴰⵡⵙⵖ ⴰ ⴼⴰⵙⵉⵍⵉⵙⴰ, ⵀⴰ ⵏⵏ ⵔⴰⴷ ⵊⵍⵓⵖ ⴽⵉⴳⴰⵏ ⵏ ⵜⵉⵣⵉ ⵉⴳ ⵔⴰⴷ ⵙⵙⵔⵖⵖ ⵜⴰⴽⴰⵜ ⴷ ⵔⴰⴷ ⵙⵎⵍⵉⵍⵉⵖ ⵉⴹⴰⵕⵏ ⵏ ⴱⴰⴱⴰ ⵢⴰⴳⴰ ⴼⴰⴷ ⴰⴷ ⵉⴳⴳⵣ ⵢⵉⴹⵙ ⵏⵏⵙ, ⴰⴽⵓⴷⴰⵏⵏ ⵔⵡⵍ ⴽⵎⵎⵉⵏ). ⴼⴰⵙⵉⵍⵉⵙⴰ ⵜⵔⵓⵔ ⴰⵙ ⴰⵡⴰⵍ ⵜⵉⵏⵉ ⴰⵙ: (ⵎⴰⵛⴰ ⵀⴰⵜ ⴽⵚⵓⴹⵖ ⴰⴷ ⵉⵢⵉ ⴰⵎⵥⵏ ⵉⵎⵏⴰⵢⵏ ⵔⴰⵔⵏ ⵉⵢⵉ ⴷ ⵙ ⴷⴰⵔⵙ.) (ⵓⵀⵓⵢ) ⵜⵉⵏⵉ ⴰⵙ ⵜⵙⵎⴰⵅⵅⵓⵜ: (ⴰⵎⵏⴰⵢ ⵓⵎⵍⵉⵍ ⵀⴰⵜ ⴰⵣⴰⵍ ⴰⵢⴰⵏⵏ, ⴰⵎⵏⴰⵢ ⴰⵣⴳⴳⵯⴰⵖ ⵀⴰ ⵏⵏ ⵜⴰⴼⵓⴽⵜ  ⴰⵢⴰⵏⵏ, ⴰⵎⵏⴰⵢ ⴰⵙⴳⴳⴰⵏ ⵀⴰ ⵏⵏ ⵉⴹ ⵉⵊⵓⵊⵊⴳ ⵏⵏ ⵙ ⵉⵜⵔⴰⵏ ⴰⵢⴰⵏⵏ, ⵓⵔ ⴳⵉⵙⵏ ⵜⴽⵚⵓⴹⴷ ⴰⵎⵢⴰ) ⵜⵓⵣⵣⵍ ⵠⴼⴰⵙⵉⵍⵉⵙⴰ  ⵙ ⴷⴰⵔ ⵜⴰⴳⴳⵓⵔⵜ ⵉⵡⴰⴷⵙ ⵜⵜ ⵉⴷ ⵓⵎⵓⵛⵛ ⵉⵔⴰ ⴰⴷ ⵜⵜ ⵉⵅⵎⵊ, ⵎⴰⵛⴰ ⵜⴼⴽⴰ ⴰⵙ ⵢⴰⵜ ⵜⵓⴱⴱⵉⵛⵜ ⵏ ⵓⵖⵔⵓⵎ ⵢⴰⴷⵊ ⵜⵜ ⵏⵉⵜ ⴰⴷ  ⵜⴼⴼⵖ.

ⵠⴼⴰⵙⵉⵍⵉⵙⴰ  ⵜⴻⵜⵜⵔⵎⴷ ⵉ ⵉⵙⴽⴼⴰⵍ, ⴰⵢⴷⵉ ⵢⵓⴽⵉ ⵏⵏ ⴼⵍⵍⴰⵙ ⵉⵔⴰ ⴰⴷ ⵜⵜ ⵉⴱⴱⵉ ⵜⵍⵓⵃ ⴰⵙ ⴷ ⴰⵡⴷ ⵏⵜⵜⴰ ⵢⴰⵜ ⵜⴳⵣⵣⵓⵎⵜ ⵏ ⵓⵖⵔⵓⵎ ⵢⴰⵊⵊ ⵜⵜ ⵉⵍⵎⵎⴰ ⴰⴷ ⵜⵣⵔⵉ. ⴼⴰⵙⵉⵍⵉⵙⴰ ⵜⵔⴰ ⴰⴷ ⵏⵏ ⵜⴼⴼⵓⵖ ⵙⴳ ⵓⵙⴰⵔⴰⴳ, ⵜⴰⴳⵏⴹⴰⴼⵜ ⵜⵙⵎⵓⵏ ⵉⵖⴰⵡⵙⵏ ⵏⵏⵙ ⴰⴷ ⴰⵙ ⵜⵙⴷⵉⵇⵇⵙ ⴰⵍⵍⵏ ⵏⵏⵙ. ⵎⴰⵛⴰ ⵜⴰⴼⵔⵓⵅⵜ ⵜⵓⵙⵉ ⴷ ⵢⴰⵏ ⵓⵙⴰⴷⴰⴷ ⵜⴰⵙⵙ ⴰⵙ ⵜ ⵉⵏⵏ ⴷ ⵜⵉⴼⴰⵜⵜⵡⵉⵏ ⵏⵏⵙ ⵜⴰⵊⵊ ⵜⵜ ⵜⵣⵔⵉ, ⵜⵍⴽⵎ ⵏⵏ ⵓⴽⴰⵏ «ⴼⴰⵙⵉⵍⵉⵙⴰ» ⵜⴰⴳⴳⵓⵔⵜ ⵜⵉⵔⵉ ⴰⴷ ⵜⵇⵇⵏ, ⵜⴰⵙⵉ ⴷ ⵉⵎⵉⴽⴽ ⵏ ⵜⴰⴷⵓⵏⵜ ⵜⴳ ⵜⵜ ⵉⵏⵏ ⵉ ⵡⴰⵡⵔⵣ ⵏ ⵜⴰⴳⴳⵓⵔⵜ ⵜⴰⵊⵊ ⵜⵜ ⵏⵉⵜ ⵉⵍⵎⵎⴰ ⵜⵣⵔⵉ. ⵜⴼⴼⵓⵖ «ⴼⴰⵙⵉⵍⵉⵙⴰ» ⵙⴳ ⵜⴳⵎⵎⵉ ⵜⴼⴽ ⵉ ⵜⴰⴳⴰⵏⵜ. ⵜⵉⵣⵉ ⴰⵏⵏ ⵏⵉⵜ ⴰⴷ ⵉⵣⵔⵉ ⵓⵎⵏⴰⵢ ⴰⵙⴳⴳⴰⵏ, ⵜⴰⵖⵓⵍ ⵜⴰⴳⴰⵏⵜ ⵜⴳ ⴰⴽⴽⵯ ⵜⵉⵍⵍⴰⵙ.

ⵎⴰⵎⵏⴽ ⵔⴰⴷ ⵜⵙⴽⵔ ⴰⴷ ⵜⵓⵔⵔⵉ ⵙ ⴷⴰⵔ ⵜⵎⵟⵟⵓⴹⵜ ⵏ ⴱⴰⴱⴰⵙ ⵓⵔ ⵏⵏ ⵜⵉⵡⵉ ⵜⴰⴽⴰⵜ? ⵜⵙⵙⵏ ⵉⵙ ⴷ ⵜⴰⵎⵖⴰⵔⵜ ⵏ ⴱⴰⴱⴰⵙ ⵓⵔ ⴰⴷ ⵜⵜ ⵜⴰⵊⵊ ⵙ ⵎⴽⴰⵏⵏ.

ⴱⵓ ⵡⴰⵢⵢⵉⵙ ⴰⵣⴳⴳⵯⴰⵖ

ⴰⴽⵓⴷⴰⵏⵏ ⵜⵎⵍⴰ ⴷⴰⵖ ⵜⵜⵙⵍⵉⵜ ⵍⵍⵉ ⵉⵠⴼⴰⵙⵉⵍⵉⵙⴰ ⵎⴰⵙ ⴷ ⵉⵇⵇⴰⵏ ⴰⴷ ⵜ ⵜⵙⴽⵔ, ⵜⵓⵙⵉ ⵠⴼⴰⵙⵉⵍⵉⵙⴰ ⵢⴰⵏ ⵓⵇⵍⵇⵓⵍ ⵙⴳ ⵡⵉⵍⵍⵉ ⵙⵙⵓⵜⵍⵏⵉⵏ ⵉ ⵜⴳⵎⵎⵉ. ⵜⵙⵙⴽⵛⵎ ⴳⵉⵙ ⵢⴰⵜ ⵜⴽⵓⵕⴰⵢⵜ ⵜⴱⴱⵉ ⵉⵍⵎⵎⴰ ⵜⴰⴳⴰⵏⵜ. ⵜⵉⵇⴰⴱⴱⵓⵛⵉⵏ ⵏ ⵓⵇⵍⵇⵓⵍ ⴰⵔ ⵙⵎⵔⵖⴰⵏⵜ ⴰⵢⵍⵍⵉⴳ ⵢⵓⵔⵔⵉ ⵢⵉⴹ ⵉⴳ ⵣⵓⵏ ⴷ ⴰⵣⴰⵍ.

ⵓⵔ ⵜⴽⴽⵉ « ⴱⴰⴱⴰ ⵢⴰⴳⴰ » ⴰⵎⵢⴰ ⵜⵏⴽⵔ ⴷ ⵜⵎⵎⵉⵥⴳ ⵜⵖⵔ ⵉ « ⵠⴼⴰⵙⵉⵍⵉⵙⴰ » ⵎⴰⵛⴰ ⵍⴰⵃ ⴰⵙ ⵜⵜ. ⵙ ⵓⵎⵏⵉⴷ ⵏ ⵜⴰⴳⴳⵓⵔⵜ ⵜⵓⵣⵣⵍ. ⵜⵙⴰⵡⵍ ⵙ ⵓⵎⵓⵛⵛ : (ⴰⵎⵓⵛⵛ. ⴰⵎⵓⵛⵛ ⵉⵏⵓ ⴱⵓ ⵉⵙⵃⴰⵔⵔⴰⵢⵏ, ⵍⵍⵉⴳ ⴼⵍⵍⴰⴽ ⵜⵣⵔⵉ « ⵠⴼⴰⵙⵉⵍⵉⵙⴰ » ⵉⵙ ⵜⵜ ⵜⵅⵎⵊⵜ ?) ⴰⵎⵓⵛⵛ ⵉⵔⵓⵔ ⴼⵍⵍⴰⵙ ⵉⵏⵏⴰ ⴰⵙ : (ⵎⵔⴰⵡ ⵉⵙⴳⴳⵯⴰⵙⵏ ⴰⵢⴰ ⴰⴷ ⴷⴰⵔⵎ ⵍⵍⵉⵖ ⴳ ⵜⵡⵓⵔⵉ ⵓⵔ ⵉⵢⵉ ⵊⵊⵓ ⵜⵙⵙⵜⵛⵉⵜ, ⵎⵇⵇⴰⵔ ⴷ ⵜⵓⴱⴱⵉⵜ ⵏ ⵓⵖⵔⵓⵎ ⵓⵔ ⵉⵢⵉ ⵜⵜ ⵊⵊⵓ ⵜⵍⵓⵃⵜ, « ⵠⴼⴰⵙⵉⵍⵉⵙⴰ » ⵏⵜⵜⴰⵜ ⵜⴼⴽⴰ ⵉⵢⵉ ⵉⵎⵉⴽⴽ ⵏ ⵎⴰⴷ ⵛⵜⵜⴰⵖ ⴰⵊⵊⵉⵖ ⵜⵜ ⵜⵣⵔⵉ.) ⵜⴼⵍⵜ «ⴱⴰⴱⴰ ⵢⴰⴳⴰ» ⵜⴰⵣⵣⵍ ⵙ ⵓⵙⴰⵔⴰⴳ ⵜⵖⵔ ⵉ ⵡⴰⵢⴷⵉ : (ⴰⵢⴷⵉ ⵉⵏⵓ, ⴰⵢⴷⵉ ⵉⵏⵓ, ⵉⵙ ⵓⵔ ⵜⴱⴱⵉⵜ ⴳ ⴼⴰⵙⵉⵍⵉⵙⴰ ⵍⵍⵉⴳ ⴼⵍⵍⴰⴽ ⵜⵣⵔⵉ?).

ⵉⵔⵓⵔ ⴼⵍⵍⴰⵙ ⵡⴰⵢⴷⵉ ⵉⵏⵏⴰ ⴰⵙ: (ⵎⴰⵅⵅ ⵎⵏⵏⴰⵡ ⵉⵙⴳⴳⵯⴰⵙⵏ ⴰⵢⴰ ⴰⴷ ⴷⴰⵔⵎ ⵍⵉⵖ ⵜⴰⵡⵓⵔⵉ ⵓⵔ ⵉⵢⵉ ⵊⵊⵓ ⵜⴼⴽⵉⵜ ⵎⴰⴷ ⵛⵜⵜⴰⵖ, ⵏⵜⵜⴰⵜ ⵜⴼⴽⴰ ⵉⵢⵉ ⵉⵎⵉⴽⴽ ⵏ ⵓⵖⵔⵓⵎ ⴰⵊⵊⵉⵖ ⵜⵜ ⵜⵣⵔⵉ.) ⴰⴽⵓⴷⴰⵏⵏ ⵜⴻⵜⵜⴼⴰⵢⵍ «ⴱⴰⴱⴰ ⵢⴰⴳⴰ» ⵜⴳ ⵢⴰⵜ ⵜⵖⵓⵢⵢⵉⵜ ⵉⵙⵇⵇⴰⵇⵏ ⵜⵖⵔ ⵉ ⵜⴳⵏⴹⴰⴼⵜ ⵜⵉⵏⵉ ⴰⵙ: (ⵍⵍⵉⴳ ⴼⵍⵍⴰⵎ ⵜⵣⵔⵉ «ⴼⴰⵙⵉⵍⵉⵙⴰ» ⵉⵙ ⴰⵙ ⴷ ⵓⵔ ⵜⵉⵡⵡⴽⵜ ⴰⵍⵍⵏ? ⵜⴰⴳⵏⴹⴰⴼⵜ ⵜⵏⵏⴰ ⴰⵙ : (ⵜⴳⴰ ⵉ ⵜⴼⴰⵜⵜⵡⵉⵏ ⵉⵏⵓ ⵢⴰⵏ ⵓⵙⴰⴷⴰⴷ ⴰⵊⵊⵉⵖ ⵜⵜ ⴰⴷ ⵜⵣⵔⵉ. ⵎⴰⵛⴰ ⴽⵎⵎ ⵓⵔ ⵊⵊⵓ ⵜⵜ ⴳⵉⴳⵉ ⵜⵉⵡⵉⴷ. « ⴱⴰⴱⴰ ⵢⴰⴳⴰ » ⵓⵔ ⴰⵙ ⵙⵓⵍ ⵜⵖⴰⵎⴰ ⴰⵎⵔ ⵜⴰⴳⴳⵓⵔⵜ, ⵜⴰⵣⵣⵍ ⴷⴰⵔⵙ ⵜⵏⵏⴰ ⴰⵙ: (ⵍⵍⵉⴳ ⵜⵔⴰ «ⴼⴰⵙⵉⵍⵉⵙⴰ» ⴰⴷ ⵜⴼⴼⵓⵖ ⵉⵙ ⴰⵙ ⵓⵔ ⵜⵇⵇⵏⵜ ⴰⵖⴰⵔⴰⵙ ? ⵢⴰⴽ ⵓⵔ ⵜⵜ ⵜⵓⵊⵊⵉⵜ ⴰⴷ ⵜⴼⴼⵓⵖ?) ⵜⵏⵏⴰ ⴰⵙ ⵜⴰⴳⴳⵓⵔⵜ : (ⵓⵔ ⵜⵜ ⵓⵊⵊⵉⵖ ⴰⵢⵍⵍⵉⴳ ⵣⵡⴰⵔ ⵜⴳⴰ ⵉⵎⵉⴽⴽ ⵏ ⵜⴰⴷⵓⵏⵜ ⵉ ⵉⵡⵔⵣⴰⵏ ⵉⵏⵓ.) ⵜⵔⴼⴰ «ⴱⴰⴱⴰ ⵢⴰⴳⴰ» ⴰⵢⵍⵍⵉⴳ ⵜⵔⴰ ⴰⴷ ⵜⴼⴼⵓⵖ ⵉⵖⴼ ⵏⵏⵙ, ⵜⴰⵣⵣⵍ ⴰⵔ ⵜⴽⴽⴰⵜ ⴰⵢⴷⵉ, ⴰⵔ ⵜⴻⵜⵜⵚⵍⴰⴱ ⴰⵎⵓⵛⵛ, ⵜⴰⵙⵉ ⴷ ⴰⴳⵍⵣⵉⵎ ⴰⴷ ⵜⴱⴱⵉ ⵜⴰⴳⵏⴹⴰⴼⵜ, ⵜⵙⵙⴼⵔⵙⵉ ⵜⴰⴳⴳⵓⵔⵜ.

ⵜⵕⵎⵉ « ⴱⴰⴱⴰ ⵢⴰⴳⴰ » ⵉⵥⴹⴰⵢ ⴼⵍⵍⴰⵙ ⵢⵉⵖⴼ ⵏⵏⵙ, ⵓⵔ ⵙⵓⵍ ⵜⵣⵎⵔ ⴰⴷ ⵜⴹⴼⵓⵕ «ⴼⴰⵙⵉⵍⵉⵙⴰ». ⵜⵍⴽⵎ ⵏⵏ «ⴼⴰⵙⵉⵍⵉⵙⴰ» ⵜⵉⴳⵎⵎⵉ ⵏ ⴱⴰⴱⴰⵙ. ⵓⵔ ⵏⵏ ⴳⵉⵙ ⵜⵓⴼⵉ ⵎⵇⵇⴰⵔ ⴷ ⴰⴹⵓ ⵏ ⵜⴰⴽⴰⵜ. ⵜⴰⵎⵟⵟⵓⴹⵜ ⵏ ⴱⴰⴱⴰⵙ ⴷ ⵉⵙⵜⵉⵙ ⵓⵣⵣⵍⵏ ⴷ ⴰⴽⴽⵯ ⴰⵔ ⴷ ⴷⵉⵙ ⵜⵥⵥⵉⵏⵜ ⴰⵔ ⵜⵜ ⵜⵜⵔⴳⴰⵎⵏⵜ ⴰⵔ ⵜⵜ ⵙⵙⵉⴳⵏⵉⵜⵏⵜ ⵏⵏⴰⵏ ⵜⵜ ⴰⵙ: (ⵎⴰⵏⵉ ⴷ ⵜⴽⴽⵉⴷ ⵓⵏⵛⴽ ⴰⴷ, ⵉⵙ ⴷ ⵜⵉⵡⵉⵜ ⵜⴰⴽⴰⵜ ? ⵀⴰ ⵏⵏ ⵏⴽⴽⵯⵏⵜⵉ ⵏⵎⵎⴰⵖ ⴷⵉⵙ ⵜⴰⴳⵉ ⴰⴷ ⵜⴰⵎⵥ, ⵜⴰⵍⵍⵉ ⴷ ⵏⵉⵡⵉ ⴷⴰⵔ ⵉⵏⴰⵔⴰⴳⵏ ⵓⵔ ⵏⵏ ⵜⴱⴱⵉ ⴰⵎⵢⴰ, ⵓⵔ ⵜⴽⴽⵉ ⴰⵎⵢⴰ ⵜⵏⵙ, ⵎⴰⴷ ⵉⵙⵙⵏ ⵉⴽⵓⵜ ⵜⵉⵏⵏⵎ ⴽⵎⵎ ⵔⴰⴷ ⵜⴰⵎⵥ?) « ⵠⴼⴰⵙⵉⵍⵉⵙⴰ » ⵜⵙⵙⴽⵛⵎ ⴷ ⵙ ⵜⵎⵚⵕⵉⵢⵜ ⵍⵍⵉⴳ ⵎⵓⵏⵏⵏⵜ ⴰⵇⵍⵇⵓⵍ ⵍⵍⵉ ⴷ ⵜⵉⵡⵉ. ⵖⴰⵔ ⵜⵙⵔⵙⵜ ⵉⵙⴳⵔⴰⵡⵍ ⵏⵉⵜ ⵜⵉⵇⴰⴱⴱⵓⵛⵉⵏ ⵏⵏⵙ ⵙ ⵓⵎⵏⵉⴷ ⵏ ⵜⵎⵖⴰⵔⵜ ⴷ ⵉⵙⵜⵉⵙ ⴳⵏ ⵉⵥⵏⵥⴰⵕⵏ ⵏⵏⵙ ⵣⵓⵏ ⴷ ⵜⴰⵎⵥⵍⴰ, ⵉⵏⵏⴰ ⵍⴽⵎⵏ ⵊⴷⵔⵏⵜ ⵜⴰⵎⵖⴰⵔⵜ ⴷ ⵉⵙⵜⵉⵙ, ⵓⵣⵣⵍⵏⵜ ⴰⴷ ⵔⵡⵍⵏⵜ, ⵜⴰⵎⵥⵍⴰ ⵜⴹⴼⴰⵕ ⵜⵏⵜ ⵉⵏⵏⴰ ⵙ ⴷⴷⴰⵏⵜ ⴰⵢⵍⵍⵉⴳ ⵜⵏⵜ ⵜⵊⴷⵔ. ⵜⴰⵙⴽⴽⴰⵜ ⴰⵏⵏ ⴳⴰⵏⵜ ⵣⵓⵏ ⴷ ⵜⵉⵔⴳⵉⵏ ⵏⵙⴰⵏⵉⵏ. « ⵠⴼⴰⵙⵉⵍⵉⵙⴰ » ⵜⵓⵙⵉ ⴰⵇⵍⵇⵓⵍ ⵍⵍⵉ ⵜⵎⴹⵍⵜ ⵉⵏⵏ ⴳ ⵢⴰⵏ ⵡⴰⵏⵙⴰ, ⴰⵏⵙⴰ ⴰⵏⵏ, ⵓⵔ ⴼⵍⵍⴰⵙ ⵉⵣⵔⵉ ⵓⵎⵢⴰ ⵉⵎⵖⵉ ⴷ ⴳⵉⵙ ⵢⴰⵏ ⵓⵊⴷⴷⵉⴳ ⴱⴰⵀⵔⴰ ⵉⵣⴳⴳⵯⴰⵖⵏ.

ⵙⴳ ⴰⴽⵓⴷⴰⵏⵏ ⵓⵔ ⵙⵓⵍ ⵜⵣⵎⵔ «ⴼⴰⵙⵉⵍⵉⵙⴰ» ⴰⴷ ⵜⵖⴰⵎⴰ ⴳ ⵜⴳⵎⵎⵉ ⵍⵍⵉ. ⵜⴼⵍ ⴷⴰⵔⵙⵏ ⵜⴷⴷⵓ ⵙ ⵢⴰⵏ ⵉⵖⵔⵎ, ⵓⵔ ⵜⵓⴼⵉ ⴰⵎⵔ ⵢⴰⵜ ⵜⵡⵙⵙⴰⵔⵜ ⵏ ⵜⵎⵖⴰⵔⵉⵏ ⵜⵉⵍⵉ ⴳ ⵜⴳⵎⵎⵉ ⴷⴰⵔⵙ. ⵢⴰⵏ ⵡⴰⵙⵙ ⵜⵏⵏⴰ «ⴼⴰⵙⵉⵍⵉⵙⴰ» ⵉ ⵜⵡⵙⵙⴰⵔⵜ ⵍⵍⵉ: (ⵀⴰⵜ ⵏⴽⴽ ⴰ ⵍⴰⵍⵍⴰ ⵕⵎⵉⵖ ⵉⴳⵉⵡⵔ! ⵉⵇⵇⴰⵏ ⴷ ⴰⴷ ⵉⵢⵉ ⴷ ⵜⴰⵡⵉⴷ ⴽⵔⴰ ⵏ ⵜⵍⵎⵉ ⴷ ⵉⴷⴷ ⵏⵏⵙ ⵀⴰⵜ ⵙⵙⵏⵖ ⵉ ⵓⵥⵟⵟⴰ)

ⵜⵉⵡⵉ ⴰⵙ ⴷ ⵜⵡⵙⵙⴰⵔⵜ ⴰⵢⵍⵍⵉ ⵜⵔⴰ. ⵜⵙⵙⵏⵜⵉ ⵉⵍⵎⵎⴰ ⴼⴰⵙⵉⵍⵉⵙⴰ ⵜⴰⵡⵓⵔⵉ ⵙ ⵢⴰⵜ ⵜⵏⴼⵓⵙⵜ ⵎⵇⵇⵓⵔⵏ. ⵜⵥⴹⴰ ⵉⵍⵎⵎⴰ « ⵠⴼⴰⵙⵉⵍⵉⵙⴰ » ⵢⴰⵜ ⵜⴼⴰⵡⵡⵓⵜ ⴱⴰⵀⵔⴰ ⵉⵙⴷⵉⴷⵏ ⴰⵢⵍⵍⵉⴳ ⵜⵥⴹⴰⵕⵜ ⴰⴷ ⵜⵜ ⵜⵣⵣⵔⵉⵜ ⴳ ⵜⵉⵟⵟ ⵏ ⵜⴰⵙⵙⵎⵉ. ⵜⵙⵓⴽⴰ ⴼⴰⵙⵉⵍⵉⵙⴰ ⵜⴰⴼⴰⵡⵡⵓⵜ ⴰⵏⵏ ⵉ ⵡⴰⵎⴰⵏ ⵜⴰⵖⵓⵍ ⵜⵎⵍⵍⵓⵍ ⵣⵓⵏ ⴷ ⴰⴷⴼⵍ.

ⴰⴽⵓⴷⴰⵏⵏ ⴰⴷ ⵜⵙⴰⵡⵍ «ⴼⴰⵙⵉⵍⵉⵙⴰ» ⵜⵏⵏⴰ ⵉ ⵜⵡⵙⵙⴰⵔⵜ ⵍⵍⵉ (ⴷⴷⵓ, ⵣⵣⵏⵣ ⵏⵏ ⵜⴰⴼⴰⵡⵡⵓⵜ ⴰⴷ ⵜⴰⵎⵥⴷ ⴷⴰⵔⵎ ⵉⴷⵔⵉⵎⵏ)

ⵜⵥⵕⴰ ⵓⴽⴰⵏ ⵜⵡⵙⵙⴰⵔⵜ ⵍⵍⵉ ⵜⴰⴼⴰⵡⵡⵓⵜ, ⵜⴷⵀⵛⵕ, ⵜⵙⴰⵡⵍ ⴷ ⵜⵏⵏⴰ ⴰⵙ: (ⵓⵀⵓⵢ, ⴰ ⵉⵍⵍⵉ, ⵣⵓⵏ ⴷ ⵜⴰⴼⴰⵡⵡⵓⵜ ⴰⴷ ⵓⵔ ⵜⴳⵉ ⵜⵉⵏ ⵜⵎⵏⵣⵉⵡⵜ, ⵓⵔ ⵜⴳⵉ ⴰⵎⵔ ⴰⴷ ⴳⵉⵙ ⵉⵙⴽⵔ ⵉⵡⵉⵙ ⵏ ⵓⴳⵍⵍⵉⴷ ⵜⵉⵎⵍⵙⵉⵜ ⵏⵏⵙ, ⵔⴰⴷ ⵜⵜ ⴰⵡⵉⵖ ⵙ ⵜⴳⵎⵎⵉ ⵏ ⵓⴳⵍⵍⵉⴷ) ⵜⵉⵣⵉ ⵍⵍⵉⴳ ⵉⵥⵕⴰ ⵉⵡⵉⵙ ⵏ ⵓⴳⵍⵍⵉⴷ ⵜⴰⴼⴰⵡⵡⵓⵜ ⵍⵍⵉ ⵉⵙⵙⵖⵥⴰⵏ ⵉⵥⵕⵉ ⵏⵏⵙ ⵉⵙⴰⵡⵍ ⴷ ⵉⵏⵏⴰ ⵉ ⵜⵡⵙⵙⴰⵔⵜ ⵍⵍⵉ : (ⵎⵏⵛⴽ ⴰⴷ ⵉⴳⴰⵏ ⴰⵜⵉⴳ ⵏⵏⵙ?) ⵜⵏⵏⴰ ⴰⵙ ⵜⵡⵙⵙⴰⵔⵜ ⵍⵍⵉ: (ⵜⴰⴷ ⵓⵔ ⵜⵍⵉ ⴰⵜⵉⴳ, ⵓⵔ ⵜⴳⵉ ⴰⵎⵔ ⵜⴰⵔⵔⴰⴳⵜ ⵉⵡⵉⵖ ⴰⴽ ⵜⵜ ⵉⴷ) ⵉⵙⵏⵉⵎⵎⵔ ⴱⴰⵀⵔⴰ ⵉⵡⵉⵙ ⵓⴳⵍⵍⵉⴷ ⵜⴰⵡⵙⵙⴰⵔⵜ ⵍⵍⵉ, ⵍⵍⵉⵖ ⵔⴰⴷ ⵜⴷⴷⵓ ⵉⴼⴽ ⴰⵙ ⵜⵓⴳⴷⵜ ⵏ ⵜⴰⵔⵔⴰⴳⵉⵏ ⵍⵍⵉ ⵎⵉ ⵉⵖⵍⵉ ⵡⴰⵜⵉⴳ ⵏⵏⵙⵏⵜ.

ⵍⵍⵉⴳ ⵔⴰⵏ ⴰⵢⵜ ⵜⴳⵎⵎⵉ ⵏ ⵓⴳⵍⵍⵉⴷ ⴰⴷ ⵙⴽⵔⵏ ⵜⵉⵎⵍⵙⴰ ⴳ ⵜⴼⴰⵡⵡⵓⵜ ⵍⵍⵉ ⵓⵔ ⵉⵣⵎⵉⵔ ⵎⵇⵇⴰⵔ ⴷ ⵢⴰⵏ ⵉ ⵜⵡⵓⵔⵉ ⴰⵏⵏ, ⵉⵇⵇⴰⵏ ⴷ ⵢⴰⵏ ⵓⵎⵥⴹⴰⵡ ⴱⴰⵀⵔⴰ ⵉⵙⵙⵏⵏ, ⵉⴳⴰⵏ ⴰⵏⴰⵥⵓⵕ. ⵓⵔ ⵓⴼⵉⵏ ⴰⵢⵜ ⵜⴳⵎⵎⵉ ⵏ ⵓⴳⵍⵍⵉⴷ ⴰⵎⵔ ⴰⴷ ⴰⵣⵏ ⵉ ⵜⵡⵙⵙⴰⵔⵜ. ⵍⵍⵉⴳ ⵏⵏ ⵜⵍⴽⵎ ⵉⵏⵏⴰ ⴰⵙ ⵉⵡⵉⵙ ⵏ ⵓⴳⵍⵍⵉⴷ : (ⴽⵎⵎ ⵍⵍⵉ ⵉⵥⴹⴰⵏ ⵜⴰⴼⴰⵡⵡⵓⵜ ⴰⴷ ⴰⴷ ⵉⵥⴹⴰⵕⵏ ⴰⴷ ⵜⵜ ⵜⴳⵏⵓⵜ). ⵜⵙⴰⵡⵍ ⴷ ⵜⵡⵙⵙⴰⵔⵜ ⵜⵏⵏⴰ ⵉ ⵉⵡⵉⵙ ⵏ ⵓⴳⵍⵍⵉⴷ : (ⵓⵔ ⴷ ⵏⴽⴽⵉ ⴰⴷ ⵉⵍⵍⵎⵏ ⵜⴰⴼⴰⵡⵡⵓⵜ ⴰⴷ, ⵓⵔ ⴷ ⵏⴽⴽ ⴰⴷ ⵜⵜ ⵉⵥⴹⴰⵏ, « ⵠⴼⴰⵙⵉⵍⵉⵙⴰ » ⵜⴰⴼⴰⵍⴽⴰⵢⵜ ⴰⴷ ⵜⵜ ⵉⵍⵍⵎⵏ ⵏⵜⵜⴰⵜ ⴰⴷ ⵜⵜ ⵉⵥⴹⴰⵏ).

ⴰⴽⵓⴷⴰⵏⵏ ⵉⵍⵎⵎⴰ ⴰⴷ ⴰⵙ ⵉⵏⵏⴰ ⵉⵡⵉⵙ ⵏ ⵓⴳⵍⵍⵉⴷ : (ⵏⵜⵜⴰⵜ ⵉⵍⵎⵎⴰ ⴰⵔ ⴰⴷ ⵉⵢⵉ ⴳⵉⵙ ⵉⴳⵏⵓ ⵜⵉⵎⵍⵙⴰ ⵉⵏⵓ). ⵜⴰⵡⵙⵙⴰⵔⵜ ⵜⴰⵖⵓⵍ ⴷ ⵙ ⴷⴰⵔ « ⵠⴼⴰⵙⵉⵍⵉⵙⴰ » ⵜⴰⵍⵙ ⴰⵙ ⴰⴽⴽⵯ ⴰⵢⵍⵍⵉ ⴰⵙ ⵉⵏⵏⴰ ⵢⵉⵡⵉⵙ ⵏ ⵓⴳⵍⵍⵉⴷ. ⵜⵉⵡⵉ « ⴼⴰⵙⵉⵍⵉⵙⴰ » ⵜⴰⴼⴰⵡⵡⵓⵜ ⵍⵍⵉ ⵜⵙⴽⵔ ⴳⵉⵙ ⵜⵉⵎⵍⵙⴰ ⵥⵉⵍⵏⵉⵏ, ⵜⴽⵍⵓ ⵜⵏⵜ ⵙ ⵉⴼⴰⵍⴰⵏ ⵏ ⵓⵎⵟⴰⵍⵙⵓ, ⵜⵙⵓⵏⵖ ⵜⵏⵜ ⵙ ⵜⵎⵓⵣⵓⵏⵉⵏ.

ⵜⵓⵙⵉ ⵜⵡⵙⵙⴰⵔⵜ ⵜⵉⵎⵍⵙⴰ ⵍⵍⵉ ⵜⴰⵡⵉ ⵜⵏⵜ ⵙ ⵜⴳⵎⵎⵉ ⵏ ⵓⴳⵍⵍⵉⴷ, ⵜⴼⵍ «ⴼⴰⵙⵉⵍⵉⵙⴰ» ⴰⵔ ⵜⵍⵍⵎ ⵖ ⵜⴰⵎⴰ ⵏ ⵢⴰⵏ ⵓⵙⴽⵙⵍ ⵍⵍⵉ ⵉⵛⴰⵢⴼⵏ ⴱⴰⵀⵔⴰ. ⴰⴽⵓⴷⴰⵏⵏ ⵏⵉⵜ ⴰⴷ ⵉⵍⴽⵎ ⵓⵔⵇⵇⴰⵙ ⵏ ⵓⴳⵍⵍⵉⴷ ⵉⵏⵏⴰ ⴰⵙ: (ⵉⵡⵉⵙ ⵏ ⵓⴳⵍⵍⵉⴷ ⵉⵖⵔⴰ ⴰⵎ ⵙ ⵜⴳⵎⵎⵉ ⵏⵏⵙ). ⵜⵍⴽⵎ ⵏⵏ «ⴼⴰⵙⵉⵍⵉⵙⴰ» ⵜⵉⴳⵎⵎⵉ ⵏ ⵓⴳⵍⵍⵉⴷ ⵓⵔ ⵏⵏ ⴼⵍⵍⴰⵙ ⴹⵉⵕⵏⵜ ⵡⴰⵍⵍⵏ ⵏⵏⵙ ⴰⵢⵍⵍⵉⴳ ⵉⵥⵎⴰ, ⵉⴷⵀⵛⵕ, ⵙ ⵓⴼⵓⵍⴽⵉ ⵍⵍⵉ ⵜⵓⵙⵉ, ⵉⵙⴰⵡⵍ ⴷ ⵉⵏⵏⴰ ⴰⵙ: (ⵉⴳ ⵉⵍⵍⴰ ⵎⴰⴷ ⵉⵏⵏⴰⵏ ⵔⴰⴷ ⴷ ⴷⵉⴷⵎ ⵏⴳⵉⵔⵉⵏⵜ ⵡⴰⵍⵍⵏ ⵉⵏⵓ ⵀⴰ ⵏⵏ ⵔⴰⴷ ⴷ ⴷⵉⵎ ⵏⴳⵉⵔⵉⵖ ⵏⴽⴽ, ⵉⵇⵇⴰⵏ ⴰⴷ ⵜⴳⴷ ⵜⴰⵎⵟⵟⵓⴹⵜ ⵉⵏⵓ.) ⵉⴱⴷⴷ ⵢⴰⵎⵥ ⴰⵙ ⴰⴼⵓⵙ ⵉⵙⴳⴳⴰⵡⵔ ⵜⵜ ⵉⵏⵏ ⴳ ⵜⴰⵎⴰ ⵏⵏⵙ.

ⵓⵔ ⵉⵣⵔⵉ ⵓⵎⵢⴰ ⵉⵙⴽⵔ ⵓⴳⵍⵍⵉⴷ ⵢⴰⵜ ⵜⵎⵖⵔⴰ ⵉⵎⵇⵇⵓⵔⵏ ⵢⵉⵡⵍ ⴳⵉⵙ ⵉⵡⵉⵙ «ⴼⴰⵙⵉⵍⵉⵙⴰ ⵜⴰⴼⴰⵍⴽⴰⵢⵜ». ⵍⵍⵉⴳ ⴷ ⵢⵓⵔⵔⵉ ⴱⴰⴱⴰⵙ ⵏ «ⴼⴰⵙⵉⵍⵉⵙⴰ» ⴳ ⵓⵎⵓⴷⴷⵓ ⵏⵏⵙ ⵜⵉⵡⵉ ⵜⵜ ⵉⵏⵏ ⵉⵍⵍⵉⵙ, ⵉⴷⴷⵔ ⴷⵉⴷⵙ ⴳ ⵜⴳⵎⵎⵉ ⵏ ⵓⴳⵍⵍⵉⴷ. ⵎⴽⵍⵍⵉ ⴷⴰⵔⵙ ⵜⵓⵎⵥ «ⴼⴰⵙⵉⵍⵉⵙⴰ» ⵜⴰⵡⵙⵙⴰⵔⵜ ⵍⵍⵉ ⴰⵙ ⵢⵓⵡⵙⵏ ⵍⵍⵉⴳ ⵜⵍⵍⴰ ⴳ ⵜⵎⵎⴰⵔⴰ. ⵜⵉⵙⵍⵉⵜ ⵏⵏⵙ ⵏⵜⵜⴰⵜ ⵓⵔ ⵊⵊⵉⵏ ⵏⵏ ⵜⴼⴼⵓⵖ ⴰⴽⵓⴹⵉⵍ ⵏⵏⵙ. ⴷⴷⵓ ⵓⵎⴰⵍⵓ ⵏ ⵜⵓⵎⵔⵜ ⴷ ⵜⵏⵓⴼⵍⴰⵢⵜ ⴰⴷ ⴳ ⴷⴷⵔⵏ , ⵏⴽⴽⵯⵏⵉ ⴷ ⵉⵡⵏ ⵔⴰⴷ ⵙⵓⵍ ⵏⴳ ⵉⵏⴱⴳⵉⵡⵏ ⵏⵏⵙⵏ.