ⴰⵡⵡⵓⵔ:ⵜⴰⴷⵍⵙⴰ/ⴰⵎⴳⵔⴰⴷ ⵓⴼⵔⵉⵏ
ⵍⵄⴰⵎⵎⵜ ⵜⴳⴰ ⵢⴰⵏ ⵡⴰⵏⴰⵡ ⵏ ⵜⵥⵓⵕⵉ ⵜⴰⵎⴰⵣⵉⵖⵜ ⵉⵡⵜⵏ ⵙ ⵉⵥⵓⵕⴰⵏ ⴳ ⵓⵎⵣⵔⵓⵢ ⵏ ⵓⴼⴳⴰⵏ ⴰⵎⴰⵣⵉⵖ ⵜⴰⵙⵓⵜ ⴼ ⵜⴰⵙⵓⵜ, ⵜⴳⴰ ⵜⴰⵥⵓⵕⵉ ⵏ ⵓⵕⴽⴰⴹ ⵉⵎⵓⵏⵏ ⴷ ⵜⵎⴷⵢⴰⵣⵜ ⵏⵖ ⵏⵏⴹⵎ, ⵜⴳ ⵙ ⵢⴰⵜ ⵜⴳⵎⵉⴹⵉ ⵉⴳⴳⵓⵜⵏ ⵜⴰⵥⵓⵕⵉ ⵏ ⵉⵔⴳⴰⵣⵏ. ⵜⴰⵥⵓⵕⵉ ⴰⴷ ⵜⵍⵍⴰ ⴷⴰⵔ ⵜⵓⴳⵜⵜ ⵏ ⵜⵇⴱⵉⵍⵉⵏ ⴳ ⵍⵎⵖⵔⵉⴱ. ⵜⴻⵜⵜⵢⵓⵙⵙⴰⵏ ⴱⴰⵀⵔⴰ ⵍⵄⴰⵎⵎⵜ ⴳ ⵜⵇⴱⵉⵍⵜ ⵏ ⵉⵏⴼⴹⵡⴰⴽ ⵉⵡⴰⵍⴰⵏ ⵉ ⵜⴰⵎⵏⴰⴹⵜ ⵏ ⵓⵣⵉⵍⴰⵍ, ⵜⴰⵙⴳⴰ ⵏ ⴱⵏⵉ ⵎⵍⵍⴰⵍ-ⵅⵏⵉⴼⵕⴰ. ⵍⵄⴰⵎⵎⵜ ⵜⴳⴰ ⵜⴰⵥⵓⵕⵉ ⵉⵥⵍⵉⵏ ⵙ ⵜⵇⴱⵉⵍⵜ ⵏ ⵉⵏⴼⴹⵡⴰⴽ, ⵜⵍⵍⴰ ⵍⵄⴰⵎⵎⵜ ⵓⵍⴰ ⴳ ⵎⵏⵏⴰⵡⵜ ⵏ ⵜⵎⵏⴰⴹⵉⵏ ⵏ ⵜⵇⴱⵉⵍⵜ ⵏ ⵉⵖⵊⴷⴰⵎⵏ ⵉⵏⵎⴰⵍⴰⵏ ⴷ ⵜⵇⴱⵉⵍⵜ ⵏ ⵉⵏⴼⴹⵡⴰⴽ ⵙⴳ ⵜⵙⴳⴰ ⵏ ⵉⴼⴼⵓⵙ ⵓⵜⵔⵉⵎ. . ⵉⵙⵎ ⴰⴷ ⵏ ⵍⵄⴰⵎⵎⵜ ⵉⵍⵍⴰ ⴳ ⵜⵎⵉⵣⴰⵔ ⵢⴰⴹⵏⵉ ⵣⵓⵏ ⵥⴰⵢⵢⴰⵏ ⴷ ⵙⵓⵙ ⵎⴰⵛⵛ ⵉⴷⵔⵓⵙ, ⴰⵛⴽⵓ ⴷⴰⵔⵙⵏ ⴰⵏⴰⵡⵏ ⵢⴰⴹⵏⵉⵏ ⵏ ⵜⵥⵓⵕⵉ, ⵙⵓⵙ ⴳⵉⵙ ⴰⵃⵡⴰⵛ, ⵥⴰⵢⵢⴰⵏ ⵏⵓⵜⵏⵉ ⴰⵔ ⵜⵜⵓⵔⴰⵔⵏ ⵙ ⵓⵃⵉⴷⵓⵙ. ⵜⴻⵜⵜⵓⵢⵙⵙⴰⵏ ⵍⵄⴰⵎⵎⵜ ⵙ ⵉⵙⵎⴰⵡⵏ ⵢⴰⴹⵏⵉ ⵣⵓⵏ "ⵍⵄⵎⵎⵜ" ⴷ "ⵍⵄⴰⵎⵎⴰⵜ".
ⴰⵔ ⵜⴻⵜⵜⵢⴰⵡⵙⴽⴰⵔ ⵍⵄⴰⵎⵎⵜ ⴰⴽⵓⴷ ⵏⵏⴰ ⵉⵍⵍⴰ ⴽⵔⴰ ⵏ ⵓⵣⵎⵣⵣⵓ ⵉⵥⵍⵉⵏ ⵙ ⵜⵇⵇⴱⵉⵍⵜ ⵏⵖ ⵙ ⴽⵔⴰ ⵏ ⵓⵙⵓⵏ ⵏⵖ ⴰⴹⵡⵡⴰⵕ, ⵣⵓⵏ ⵉⴳ ⵜⵍⵍⴰ ⵜⵎⵖⵔⴰ ⴷⴰⵔ ⵓⵙⵍⵉ ⵏⵖ ⵜⴰⵙⵍⵉⵜ, ⵜⵜⵍⴳⵉⵜ (ⴰⵏⵎⵓⴳⴳⵓⵔ ⴷⴰ ⵙⴽⴰⵔⵏ ⵎⵉⴷⴷⵏ ⵉ ⵍⵄⴰⵎⵍ, ⵍⵇⵇⴰⵢⴷ ⵏⵖ ⴽⵔⴰ ⵏ ⵓⴱⵕⵍⴰⵎⴰⵏⵉ) ⵏ ⴽⵔⴰ ⵡⵓⴷⵎ ⵉⵎⵇⵇⵓⵔⵏ, ⴰⵙⴼⵓⴳⵍⵓ ⵙ ⴽⵔⴰ ⵏ ⵓⵣⵎⵣⵣⵓ ⵏ ⵜⵙⵔⵜⵉⵜ ⵣⵓⵏ ⵉⵙⵜⴰⵢⵏ ⵏⵖ ⴽⵔⴰ ⵏ ⵉⵎⵏⵖⵉ. ⴳ ⵉⵔⵉⵔ ⵏ ⵍⵄⴰⵎⵎⵜ ⴰⵔ ⵜⵜⴱⴷⴷⴰⴷⵏ ⵜⵓⴳⵜ ⵏ ⵉⵔⴳⴰⵣⵏ ⴰⵔ ⵙⴽⴰⵔⵏ ⴰⴷⵓⵔ, ⵍⵙⵏ ⵜⵉⵊⵍⵍⵓⴱⴰ ⵏⵖ ⵍⴼⵓⵇⵇⵉⵢⵢⴰⵜ ⵜⵓⵎⵍⵉⵍⵉⵏ ⵏⵖ ⵜⵉⵡⵔⴰⵖⵉⵏ (ⵉⴷⵔⵓⵙ ⵎⴰ ⴳ ⵜⵜⵉⵍⵉⵏⵜ ⴳ ⴽⵔⴰ ⵏ ⵓⴽⵯⵍⵓ ⵢⴰⴹⵏ), ⴷ ⵉⴷⵓⴽⴰⵏ ⴷ ⵜⵉⵜⵇⴰⵛⵔⵉⵏ (ⴰⵔ ⴰⵙⵏⵜ ⵜⵜⵉⵏⵉⵏ ⵜⵜⵇⵇⴰⵛⵕ) ⵓⵍⴰ ⵏⵜⵜⵏⵜⵉ ⴳ ⵎⴰ ⵉⴳⴳⵓⵜⵏ ⴰⵔ ⵜⵜⴳⴳⴰⵏⵜ ⵜⵓⵎⵍⵉⵍⵉⵏ ⵏⵖ ⵜⵉⵡⵔⴰⵖⵉⵏ, ⴳⵏ ⴼ ⵢⵉⵅⴼ ⵏⵏⵙⵏ ⴰⵛⴷⴷⴰⴷ ⵏⵖ ⵜⴰⵕⵥⵥⵉⵜ (ⴰⵔ ⴰⵙ ⵜⵜⵉⵏⵉⵏ ⵉⵏⴼⴹⵡⴰⴽ ⵕⵕⵥⵟ) ⵜⴰⵡⵕⴰⵖⵜ ⵏⵖ ⵜⵓⵎⵍⵉⵍⵜ ⵏⵖ ⴰⵔ ⵍⵙⵙⴰⵏ ⴼ ⵉⵅⴼⴰⵡⵏ ⵏⵏⵙⵏ ⵜⴰⵛⴰⵛⵉⵜ (ⵏⵖ ⵟⵟⴰⴳⵉⵢⵢⴰ) ⵓⵍⴰ ⵏⵜⵜⴰⵜ ⴳ ⵓⴽⵯⵍⵓ ⵓⵎⵍⵉⵍ ⵏⵖ ⴰⵡⵔⴰⵖ; ⴰⴳⵯⵍⵏ ⴳ ⵉⵖⴰⵔⵉⵡⵏ (ⵏⵖ ⵉⵖⵕⴰⴹ) ⵏⵏⵙⵏ ⵍⴽⵯⵎⵎⵉⵜ, ⴽⵓ ⴰⵔⴳⴰⵣ ⴰⵔ ⴷⵉⵙ ⵉⵙⴰⵜⵜⵉ ⴰⵍⵍⵓⵏ ⵏⵖ ⵜⴰⵍⵍⵓⵏⵜ ⵏⵏⵙ ⵏⵖ ⴰⵔ ⵉⵜⵜⵃⵓⵛ ⵖⴰⵔ ⵙ ⵉⴼⴰⵙⵙⵏ ⵏⵏⵙ, ⵢⵉⵍⵉ ⴷⵉⵜⵙⵏ ⵓⵍⴰ ⴱⴰⴱ ⵏ ⴳⴰⵏⴳⴰ, ⴰⵔ ⵙⵙⵏⵜⴰⵢⵏ (ⵏⵖ ⴰⵔ ⴱⴷⴷⵓⵏ) ⵉⵔⴳⴰⵣⵏ ⵍⵍⵖⴰ ⵏⵖ ⵜⴰⵏⴹⴹⴰⵎⵜ ⴰⵔ ⴽⴽⴰⵜⵏ ⴰⵍⵍⵓⵏ ⴰⵔ ⵉⴳ ⵉⵃⵎⴰ ⵉⵍⵎⵎⴰ ⴽⵛⵎⵏ ⴷ ⵜⴼⵔⵅⵉⵏ (ⴰⵔ ⴰⵙⵏⵜ ⵜⵜⵉⵏⵉⵏ ⵜⵉⵎⵃⵡⴰⵛⵉⵏ) ⵉⵍⵙⴰⵏ ⵍⵇⵇⵟⵉⴱ ⴷ ⵜⵎⵍⵙⴰ ⵜⵉⴱⵍⴷⴰⵢ ⵏ ⵜⵎⴰⵣⵉⵔⵜ ⵙⴽⵔⵏⵜ ⵓⵍⴰ ⵏⵜⵜⵏⵜⵉ ⴰⴷⵓⵔ ⵏⵏⵙⵏⵜ ⴷⴰⵜ ⴰⴷⵓⵔ ⵏ ⵉⵔⴳⴰⵣⵏ ⵎⴰⵛⵛ ⵓⵔ ⴰ ⴷⵉⵜⵙⵏ ⵜⵜⵅⵍⵍⴰⴹⵏ ⴰⵔ ⵉⴳ ⵙⵙⵔⵖⴰⵏ ⵍⵄⴰⵎⵎⵜ ⵉⵍⵎⵎⴰ ⴽⵓ ⴰⵔⴳⴰⵣ ⴰⵔ ⴷ ⵉⵍⴷⴷⵉ ⵢⴰⵜ ⵜⴼⵔⵓⵅⵜ ⴰⴷ ⴷⵉⵙ ⵉⵜⵜⵃⵓⵛ. ⵜⵉⴼⵔⵅⵉⵏ ⴰⵔ ⵜⵜⵃⵓⵛⵏⵜ ⵙ ⵉⴼⴰⵙⵙⵏ ⵎⴰⵛⵛ ⵉⵔⴳⴰⵣⵏ ⴰⵔ ⵜⵜⵃⵓⵛⵏ ⵙ ⵉⴼⴰⵙⵙⵏ ⵏⵖ ⵙ ⵜⴰⵍⵍⵓⵏⵜ.
ⴰⵥⵓⵕ ⵏ ⵢⵉⵙⵎ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⴰⵥⵓⵕ ⵏ ⵢⵉⵙⵎ ⵏ "ⵍⵄⴰⵎⵎⵜ" ⵓⵔ ⵉⵍⵍⵉ ⴽⵔⴰ ⵏ ⵓⵙⴰⵖⵓⵍ ⵉⵜⵜⵢⴰⵔⴰⵏ ⴼⵍⵍⴰⵙ ⵉⵙⴰⵡⵍⵏ, ⵎⴰⵛⵛ ⴰⵔ ⴼⵍⵍⴰⵙ ⵙⴰⵡⴰⵍⵏ ⵎⵉⴷⴷⵏ ⴳ ⵜⵓⴷⵔⵜ ⵏⵏⵙⵏ ⵜⴰⴽⵓⵢⴰⵙⵜ. ⴳ ⵍⵎⵖⵔⵉⴱ ⴰⵔ ⴰⵟⵟⴰⵏ ⵎⵉⴷⴷⵏ ⵉⵏⴳⵔ ⵢⴰⵏ ⵓⴼⴳⴰⵏ ⴷⴰ ⵉⵃⵚⴰⵏ ⵍⵇⵇⵕⴰⵏ ⴷ ⵡⵉⴷ ⴷⴰ ⵓⵔ ⵜ ⵉⵃⵚⵉⵏ, ⵎⵉⴷⴷⵏ ⴷⴰ ⵉⵃⵚⴰⵏ ⴰⵔ ⴰⵙⵏ ⵜⵜⵉⵏⵉⵏ "ⵟⵟⵍⴱⴰ" (ⴰⵎⵢⵓⵏ ⵏⵙ ⵟⵟⴰⵍⴱ) ⵏⵖ "ⵍⵎⵙⴰⴼⵔⵉⵏ" (ⴰⵎⵢⵓⵏ ⵏⵏⵙ ⵍⵎⵙⴰⴼⵔ, ⴰⵔ ⴰⵙⵏ ⴰⵇⵇⵔⴰⵏ ⵙ ⵉⵙⵎ ⴰⴷ ⴰⵛⴽⵓ ⴰⵔ ⵜⵜⵙⴰⴼⴰⵔⵏ ⴰⴼⴰⴷ ⴰⴷ ⵃⵚⵓⵏ ⵍⵇⵇⵕⴰⵏ); ⵎⵉⴷⴷⵏ ⴷⴰ ⵓⵔ ⵉⵃⵚⵉⵏ ⵍⵇⵇⵕⴰⵏ ⴰⵔ ⴰⵙⵏ ⴰⵇⵇⵔⴰⵏ ⵙ "ⵉⵄⴰⵎⵎⵉⵏ" (ⴰⵎⵢⵓⵏ ⵏⵏⵙ ⴰⵄⴰⵎⵎⵉ). ⵍⵍⴰⵏ ⴽⵔⴰ ⵏ ⵉⵡⵏⵏⴰⵏ ⵉⵜⵜⵉⵏⵉⵏ ⵎⴰⵙ ⵉⵙⵎ ⵏ ⵍⵄⴰⵎⵎⵜ ⵉⵜⵜⵢⴰⴼⴽⴰ ⵉ ⵜⵥⵓⵕⵉ ⴰⴷ ⴰⵛⴽⵓ ⴰⵔ ⵜⵜ ⵜⵜⵓⵔⴰⵔⵏ ⵖⴰⵕⵔ ⵎⵉⴷⴷⵏ ⴷⴰ ⵓⵔ ⵉⵃⵚⵉⵏ ⵍⵇⵇⵕⴰⵏ ⵏⵖ "ⵉⵄⴰⵎⵎⵉⵏ", ⵖⴰⵢⴰⵏⵏ ⴰⴼ ⵜⴳⴰ ⵍⵄⴰⵎⵎⵜ. ⵉⵍⵍⴰ ⴷⴰⵖ ⵢⴰⵏ ⵡⴰⵡⴰⵍ ⵢⴰⴹⵏ ⵉⵜⵜⵉⵏⵉⵏ ⵎⴰⵙ ⵜⴰⴳⵓⵔⵉ ⵏ "ⵍⵄⴰⵎⵎⵜ" ⴰⵔ ⵜⵜ ⵜⵜⵉⵏⵉⵏ ⵉ ⵜⵥⵓⵕⵉ ⴰⴷ ⴰⵛⴽⵓ ⴳ ⵎⴰⴷ ⵉⵣⵔⵉⵏ ⵍⵄⴰⵎⵎⵜ ⴰⵔ ⵜⵜ ⵜⵜⵓⵔⴰⵔⵏ ⵎⵉⴷⴷⵏ ⴰⴽⴽⵯ ⵏ ⵉⵇⵇⴱⵉⵍⵏ, ⴽⵓ ⴰⵇⵇⴱⵉⵍ ⵏⵖ ⴽⵓ ⵓⵙⵓⵏ ⴰⵔ ⵜⵜⵎⵓⵏⴰⵏ ⵉⵎⵣⴷⴰⵖⵏ ⵏⵏⵙ ⴰⴽⴽⵯ ⴰⴽⵓⴷ ⵏⵏⴰ ⵉⵍⵍⴰ ⴽⵔⴰ ⵏ ⵓⵙⴼⵓⴳⵍⵓ, ⵎⵉⴷⴷⵏ ⵏ ⵓⵙⵓⵏ ⴰⴽⴽⵯ ⴰⴷ ⵉⴳⴰⵏ ⵍⵄⴰⵎⵎⵜ, ⵓⵔ ⴰⵔ ⵜⵜⵉⵏⵉⵏ ⵎⴰⵙ ⵜⵍⵍⴰ ⵍⵄⴰⵎⵎⵜ ⴰⴱⵍⴰ ⵉⴳ ⴳⴳⵓⵜⵏ ⵎⵉⴷⴷⵏ.