ⴰⵙⵡⵓⴷⴷⵓ ⴰⵣⴰⵢⴽⵓ ⵏ ⵡⴰⵎⴰⵏ ⴳ ⵍⵎⵖⵔⵉⴱ

ⴰⵎⴰⴳⵔⴰⴷ ⴰⴷ ⵉⴳⴰ ⵙⵓⵍ ⴰⴳⵓⵊⵉⵍ. ⵎⴽ ⵜⵓⴼⵉⴷ, ⵔⵏⵓ ⴰⵙⵖⵓⵏ ⵏⵏⵙ ⴳ ⴽⵕⴰⴹⵜ ⵜⴰⵙⵏⵉⵡⵉⵏ ⵢⴰⴹⵏⵉⵏ.

ⴰⵙⵡⵓⴷⴷⵓ ⴰⵣⴰⵢⴽⵓ ⵏ ⵡⴰⵎⴰⵏ ⴳ ⵍⵎⵖⵔⵉⴱ ⵉⵙⵎⵓⵏ ⴽⵔⴰⵢⴳⴰⵜ ⵜⵙⵔⵜⴰⵢ, ⵜⵉⵙⵜⵔⴰⵜⵉⵊⵉⵢⵢⵉⵏ ⴷ ⵉⵎⵓⵙⵙⵓⵜⵏ ⵉⵣⴷⵉⵏ ⵙ ⵓⵙⵡⵓⴷⴷⵓ ⴷ ⵜⴱⴹⵉⵜ ⵏ ⵉⵙⵓⴳⴰⵎ ⵏ ⵡⴰⵎⴰⵏ ⴳ ⵍⵎⵖⵔⵉⴱ, ⴰⴼⴰⴷ ⴰⴷ ⵉⴷⴷⵔ ⵓⴼⴳⴰⵏ ⴷⴷⵔⵏ ⵉⵎⵓⴷⴰⵔ ⵏⵙ ⴷⴷⵔⵏ ⵓⵍⴰ ⵉⴳⵔⴰⵏ ⵏⵙ. ⵜⵉⵖⴰⵔⴰⵙⵉⵏ ⵏ ⵓⵙⵡⵓⴷⴷⵓ ⵏ ⵡⴰⵎⴰⵏ ⴳ ⵍⵎⵖⵔⵉⴱ ⵓⵔ ⵍⵓⵍⵏⵜ ⴰⵙⵙ ⴰⴷ ⵓⵍⴰ ⵉⴹⴳⴰⵎ ⵓⵍⴰ ⴰⵙⴳⴳⵯⴰⵙ ⴰⴷ ⵓⵍⴰ ⵡⴰⵍⵍⵉ ⵉⵣⵔⵉⵏ, ⵜⵉⵖⴰⵔⴰⵙⵉⵏ ⴰⴷ ⴳⴰⵏⵜ ⵜⵉⵇⵇⴱⵓⵕⵉⵏ ⵎⴽⵍⵍⵉ ⵉⵇⵇⴱⵓⵕ ⵓⴼⴳⴰⵏ ⴳ ⵡⴰⴽⴰⵍ ⵏ ⵍⵎⵖⵔⵉⴱ, ⴰⵔ ⵣⵣⵉⴳⵉⵣⵏⵜ ⵎⴽⵍⵍⵉ ⵉⵣⵣⵉⴳⵉⵣ ⵓⴼⴳⴰⵏ ⴳ ⵜⵎⴰⵣⵉⵔⵜ ⵏⵙ. ⴰⵏⴳⵔⴰⵡ ⵏ ⵓⵙⵡⵓⴷⴷⵓ ⴰⵣⴰⵢⴽⵓ ⵙⵓⵍ ⵓⴽⴰⵏ ⵉⴷⴷⵔ ⴳ ⴽⵉⴳⴰⵏ ⵏ ⵜⵙⴳⵉⵡⵉⵏ ⴳ ⵍⵎⵖⵔⵉⴱ ⵉⵍⵉⵏⵜ ⵜⵎⴰⵜⴰⵔⵉⵏ ⴼ ⵜⵖⴰⵔⴰⵙⵉⵏ ⴷⴰ ⵉⵏⵖⵓⴱⴰⵏ.

ⴰⵏⵣⵡⵉ ⵏ ⵍⵎⵖⵔⵉⴱ ⵉⴳⴰ ⵉⵊⵊⵏ ⵓⵏⵣⵡⵉ ⵉⵣⵡⴰⵏ ⴳ ⵡⴰⵎⵎⴰⵙ ⴷ ⵉⴼⴼⵓⵙ, ⵉⴳ ⴰⵏⴰⴳⴰⵎ ⵏⵖ ⴰⵏⴱⵣⴰⴳ ⴳ ⵓⴳⴰⴼⴰ. ⵙ ⵓⵎⴰⵜⴰ, ⵉⵇⵇⴰⵏⴷ ⴰⴷ ⵏⵉⵏⵉ ⵎⴰⵙ ⴰⵏⵣⵡⵉ ⵏ ⵍⵎⵖⵔⵉⴱ ⵉⵣⵡⴰ ⴷⵔⵓⵙⵏ ⴳⵉⵙ ⵡⴰⵎⴰⵏ, ⵎⴰⵢⴰⴷ ⴰ ⵢⵓⴷⴷⵊⴰⵏ ⴰⴼⴳⴰⵏ ⴰⵎⵖⵔⵉⴱ ⴰⵇⵇⴱⵓⵕ ⴰⴷ ⵉⵙⵉⴳⴳⵍ ⵜⵓⵙⵓⵜⵉⵏ ⴼ ⵜⵓⵙⵓⵜⵉⵏ ⵙ ⵜⵖⴰⵔⴰⵙⵉⵏ ⴷⴰ ⵉⵔⴰ ⴰⵜ ⵢⴰⵡⵙ ⴳ ⵓⵙⵙⴷⵎⵙ (ⵜⴰⴷⵎⵙⴰ ⵏ ⵡⴰⵎⴰⵏ) ⵏ ⵡⴰⵎⴰⵏ. ⴰⵔ ⵜⵜⵉⵏⵉⵏ ⵎⴰⵙ ⴰⵙⵖⴰⵡⵙⴰ ⴰⴷ ⵉⴳⴰⵏ ⵉⵎⵎⴰⵙ ⵏⵖ ⵉⵏⵏⴰⵙ ⵏ ⵓⵙⵏⵓⵍⴼⵓ, ⵎⵇⵇⴰⵕ ⴰⵡⴰⵍ ⴰⴷ ⵏⵏⴰⵏⵜ ⵉⴳⴷⵓⴷⵏ ⵢⴰⴹⵏⵉ ⵎⴰⵛⵛ, ⴰⵜⵉ ⴰⵡⴰⵍ ⴰⴷ ⵉⵖⵥⴰ ⵓⵍⴰ ⴳ ⵍⵎⵖⵔⵉⴱ, ⴰⵛⴽⵓ ⵜⴰⵔⵙⵉ ⵏ ⵡⴰⵎⴰⵏ ⴰⴷ ⵉⴳⴰⵏ ⵉⵏⵏⴰⵙ ⵏ ⵜⵖⴰⵔⴰⵙⵉⵏ ⵎⴰⵕⵕⴰ ⵏ ⵓⵙⵡⵓⴷⴷⵓ ⵏ ⵡⴰⵎⴰⵏ ⴳ ⵍⵎⵖⵔⵉⴱ, ⵜⵉⵖⴰⵔⴰⵙⵉⵏ ⴰⴷ ⵏⵜⵜⴰⴼⴰ ⴳ ⵜⴰⵙⴳⵉⵡⵉⵏ ⴳ ⴷⵔⵓⵙⵏ ⵡⴰⵎⴰⵏ ⵣⵓⵏ ⵉⴼⴼⵓⵙ ⴷ ⵍⵇⵇⴱⵍⵜ ⵏ ⵍⵎⵖⵔⵉⴱ.^[1]^[2]^[3]

ⴰⵙⵡⵓⴷⴷⵓ ⵏ ⵡⴰⵎⴰⵏ ⵉⵙⵎⵓⵏ ⴽⵕⴰⴹⵜ ⵜⴽⵍⵉⵡⵉⵏ:

ⵜⵉⴽⵍⵉ ⵏ ⵓⵍⴷⴰⵢ ⴷ ⵓⵙⵎⵓⵏ ⵏ ⵡⴰⵎⴰⵏ
ⵜⵉⴽⵍⵉ ⵏ ⵜⴱⴹⵉⵜ ⵏⵖ ⵜⵉⵟⵟⵉ ⵏ ⵡⴰⵎⴰⵏ
ⵜⵉⴽⵍⵉ ⵏ ⵓⵙⵎⵔⵙ ⴷ ⵜⵙⵎⵓⵔⵜ ⵏ ⵡⴰⵎⴰⵏ

ⴰⵍⴷⴰⵢ ⴷ ⵓⵙⵎⵓⵏ ⵏ ⵡⴰⵎⴰⵏ

ⵜⴰⵙⵓⵍⵜ^[4] ⵏ ⵜⵓⴷⵔⵜ ⵜⵣⴷⵉ ⵙ ⵉⵍⵉ ⵏ ⵡⴰⵎⴰⵏ ⴳ ⴽⵔⴰⵢⴳⴰⵜ ⵜⵎⴰⵣⵉⵔⵜ, ⵎⴰⵢⴰⴷ ⴰ ⵢⵜⵜⴰⴷⵊⴰⵏ ⴰⴼⴳⴰⵏ ⴰⴷ ⵉⵙⵙⵎⵔⵙ ⴽⵔⴰⵢⴳⴰⵜ ⴰⵥⵎⵎⴰⵥⵥⵍ ⴳ ⵉⵥⵎⵎⴰⵥⵥⵍⵏ ⵏⵙ ⴰⴼⴰⴷ ⴰⴷ ⵉⴹⵎⵏ ⵜⴰⵙⵓⵍⵜ ⵏ ⵉⵙⵓⴳⴰⵎ ⵏⵙ ⵙⴳ ⵡⴰⵎⴰⵏ.

ⵉⵙⵓⴳⴰⵎ ⵏ ⵡⴰⵎⴰⵏ

ⵍⵎⵖⵔⵉⴱ ⵓⵔ ⴳⵉⵙ ⵉⵙⴰⴼⴼⵏ ⵉⵎⵇⵇⵓⵕⵏ, ⵉⵍⵍⵏ ⵏⵖ ⵉⴳⵍⵎⴰⵎⵏ ⵉⵥⴹⴰⵕⵏ ⴰⴷ ⴳⵏ ⵉⵙⵓⴳⴰⵎ ⵏ ⵡⴰⵎⴰⵏ ⵉ ⵓⴼⴳⴰⵏ, ⵎⴰⵢⴰⴷ ⴰⴼ ⴰⴷⴷ ⵉⵜⵜⵖⴰⵎⴰ ⵓⵏⵥⴰⵕ ⴰⴷ ⵉⴳ ⴰⵙⴰⴳⵎ ⴰⴳⵊⴷⴰⵏ ⵏ ⵡⴰⵎⴰⵏ. ⵜⵓⴷⵔⵜ ⵏ ⵓⴼⴳⴰⵏ ⴰⵇⵇⴷⵉⵎ ⴳ ⵍⵎⵖⵔⵉⴱ ⵜⵣⴷⵉ ⵙ ⵓⵏⵥⴰⵕ, ⵉⴳ ⵉⴱⴱⵉ ⴰⵔ ⵜⵜⴱⴱⵉ ⵓⵍⴰ ⵏⵜⵜⴰⵜ. ⴰⵏⵥⴰⵕ ⵣⴷⵉⵏ ⵙⵔⵙ ⵉⵙⴰⴼⴼⵏ, ⵉⵖⴱⵓⵍⴰ ⴷ ⵓⵏⴰ ⵉⴳ ⵓⵔ ⵉⵍⵍⵉ ⵓⵏⵥⴰⵕ ⴰⵔ ⵜⵜⵇⵇⴰⵕⴰⵏ ⵓⵍⴰ ⵏⵜⵜⵏⵉ, ⴽⵉⴳⴰⵏ ⵏ ⵉⵣⵎⴰⵣ ⵏ ⵜⴰⵖⴰⵔⵜ ⴰⴷ ⵉⵣⵔⵉⵏ ⴼ ⵍⵎⵖⵔⵉⴱ, ⵉⴱⴱⵉ ⴳⵉⵙⵏ ⵓⵏⵥⴰⵕ ⴱⴱⵉⵏ ⵉⵙⴰⴼⴼⵏ ⵇⵇⴰⵔⵏⵜ ⵜⵔⴳⴳⵯⴰ ⴷ ⵓⵏⴰ, ⵎⵎⵜⵏ ⵉⵎⴰⴷⴷⴰⵔⵏ ⵙ ⴼⴰⴷ ⵎⵎⵜⵏ ⵓⵍⴰ ⵉⴳⵔⴰⵏ.

ⵉⵎⵣⴷⴰⵖ ⵉⵎⵣⵡⵡⵔⴰ ⴳ ⵍⵎⵖⵔⵉⴱ ⵎⵓⵏⴻⵏ ⴷ ⵉⵖⴱⵓⵍⴰ ⵏ ⵡⴰⵎⴰⵏ, ⴰⵔ ⵜⵜⵣⴷⴰⵖⵏ ⴳ ⵜⵎⴰⵣⵉⵔⵜ ⵏⵏⴰ ⴳ ⵍⵍⴰⵏ ⵉⵖⴱⵓⵍⴰ ⵏ ⵡⴰⵎⴰⵏ, ⵎⴰⵛⵛ ⵎⵇⵇⴰⵕ ⵍⵍⴰⵏ ⵉⵖⴱⵓⵍⴰ ⴳ ⵍⵍⴰⵏ ⵡⴰⵎⴰⵏ ⵙ ⵓⵎⴰⵜⴰ ⴰⵜ ⵣⴷⵉⵏ ⵙ ⵓⵏⵥⴰⵕ, ⴰⴽⵓⴷ ⵏⵏⴰ ⴳ ⵉⴱⴱⵉ ⵓⵏⵥⴰⵕ ⴰⵔ ⴳⵉⵙⵏ ⵜⵜⴱⴱⵉⵏ ⵡⴰⵎⴰⵏ. ⵉⵖⴱⵓⵍⴰ ⵏ ⵡⴰⵎⴰⵏ ⴳⴰⵏ ⴰⵙⴰⴳⵎ ⵏ ⵡⴰⵎⴰⵏ ⴰⴷⵙⵍⴰⵏ ^[4] ⵏ ⵎⵙⵡⵉ ⴰⵛⴽⵓ ⴰⵎⴰⵏ ⵏⵙⵏ ⴰⵔ ⵜⵜⴳⴳⴰⵏ ⴰⵎⴰⵏ ⵉⴷⵓⵙⵏ ⴳ ⵓⵙⴳⴳⵯⴰⵙ ⴰⴽⴽⵯ.

ⴳ ⵜⴰⵙⴳⵉⵡⵉⵏ ⵏ ⵍⵎⵖⵔⵉⴱ ⵍⵍⴰⵏ ⵜⵓⴳⵜ ⵏ ⵉⵖⴱⵓⵍⴰ, ⵣⵓⵏ ⵓⴽⴰⵏ:

ⴰⵖⴱⴰⵍⵓ ⵏ ⵡⴰⵙⵉⴼ ⵏ ⵡⴰⵏⵙⵉⴼⵏ: ⵉⵍⵍⴰ ⴳ ⵜⵙⴳⴰ ⵏ ⵜⵖⵔⵎⵜ ⵏ ⵅⵏⵉⴼⵕⴰ.
ⴰⵖⴱⴰⵍⵓ ⵏ ⵓⴱⴰⵢⵏⵓ
ⴰⵖⴱⴰⵍⵓ ⵏ ⵙⵉⴷⵉ ⵃⵕⴰⵥⵎ
ⴰⵖⴱⴰⵍⵓ ⵏ ⵡⴰⵍⵎⴰⵙ
ⵙ ⵡⵉⵢⵢⴰⴹ

ⵉⴳⵍⵎⴰⵎⵏ

ⵍⵎⵖⵔⵉⴱ ⵓⵔ ⵉⵜⵜⵢⴰⵡⵙⵙⴰⵏ ⵙ ⵉⴳⵍⵎⴰⵎⵏ, ⴰⵛⴽⵓ ⴰⵏⵣⵡⵉ ⵏⵙ ⵓⵔ ⵉⴳⵉ ⴰⵏⵣⵡⵉ ⵉⵙⵙⴱⵖⴰⵙⵏ ⵉⵍⵉ ⵏ ⵉⴳⵍⵎⴰⵎⵏ. ⵉⴳⵍⵎⴰⵎⵏ ⴳⴰⵏ ⴰⵖⴱⴰⵍⵓ ⵏ ⵡⴰⵎⴰⵏ ⴳⵏ ⵓⵍⴰ ⵢⴰⵜ ⵜⵡⵏⵏⴰⴹⵜ ⵉⵙⵙⴱⵖⴰⵙⵏ ⵜⵓⴷⵔⵜ ⵜⴰⴳⴰⵎⴰⵏⵜ ⵣⵓⵏ ⵉⴳⴹⴰⴹ ⴷ ⵉⵎⵓⴷⴰⵔ ⵉⵔⴰⵎⵢⴰⵔⵏ. ⵍⵍⴰⵏ ⴳ ⵍⵎⵖⵔⵉⴱ ⵜⵓⴳⵜ ⵏ ⵉⴳⵍⵎⴰⵎⵏ ⵣⵓⵏ:

ⴰⴳⵍⵎⴰⵎ ⴰⵣⴳⵣⴰ
ⴰⴳⵍⵎⴰⵎ ⵏ ⵜⵉⴼⵓⵏⴰⵙⵉⵏ
ⴰⴳⵍⵎⴰⵎ ⴰⴱⵅⵅⴰⵏ
ⴰⴳⵍⵎⴰⵎ ⵏ ⵉⴼⵏⵉ
ⴰⴳⵍⵎⴰⵎ ⵏ ⴰⵅⵏⵉⴼⵉⵙ
ⴰⴳⵍⵎⴰⵎ ⵜⵙⵍⵉⵜ
ⴰⴳⵍⵎⴰⵎ ⵏ ⵜⴳⵍⵎⴰⵎⵉⵏ
ⴰⴳⵍⵎⴰⵎ ⵏ ⵉⴼⵕⴰⵃ
ⴰⴳⵍⵎⴰⵎ ⵏ ⵉⴼⵔ
ⴰⴳⵍⵎⴰⵎ ⵏ ⵃⵛⵍⴰⴼ
ⴰⴳⵍⵎⴰⵎ ⵏ ⵎⴰⵕⵜⵛⵉⴽⴰ

ⵉⵙⴰⴼⴼⵏ

ⵓⵔ ⵉⵜⵜⵢⵓⵙⵙⴰⵏ ⵍⵎⵖⵔⵉⴱ ⵙ ⵉⵙⴰⴼⴼⵏ, ⵎⴰⵛⵛ ⴳⵉⵙ ⵉⵙⴰⴼⴼⵏ ⴼ ⵏⵥⵥⴹⴰⵕ ⴰⴷ ⵏⵉⵏⵉ ⵎⴰⵙ ⵎⵇⵇⵓⵕⵏ. ⵓⵔ ⵍⵍⵉⵏ ⴳ ⵍⵎⵖⵔⵉⴱ ⵉⵙⴰⴼⴼⵏ ⵉⴷⵔⴰ ⴷ ⵜⵎⵓⵔⴰ ⵢⴰⴹⵏⵉ, ⵉⵙⴰⴼⴼⵏ ⴰⴽⴽⵯ ⵉⵍⵍⴰⵏ ⴳ ⵍⵎⵖⵔⵉⴱ ⵓⵔ ⵜ ⴼⴼⵉⵖⵏ ⵓⵔ ⵙⵉⵙ ⴷ ⴽⵛⵉⵎⵏ ⵙⴳ ⵎⴰⵏⵉ ⵢⴰⴹⵏⵉ, ⵍⵍⴰⵏ ⴰⴽⴽⵯ ⴳ ⵓⴳⵏⵙⵓ ⵏ ⵜⵎⴰⵣⵉⵔⵜ. ⵙⴳ ⵓⵣⵎⵣ ⴰⵇⵇⴱⵓⵕ ⴳⴰⵏ ⵉⵙⴰⴼⴼⵏ ⵢⴰⵏ ⵓⵙⴰⴳⵎ ⵏ ⵡⴰⵎⴰⵏ ⵉ ⵉⵎⵣⵣⴰⵖ ⵏ ⵍⵎⵖⵔⵉⴱ, ⵎⴰⵢⴰⴷ ⴰⴷ ⵉⵡⴷⴷⵊⴰⵏ ⵜⵓⵣⴷⵓⵖⵜ ⴳ ⵍⵎⵖⵔⵉⴱ ⴰⴷ ⵜⵜⵎⵓⵏⴰ ⴷ ⵉⵙⴰⴼⴼⵏ, ⴰⵔ ⵏⵜⵜⴰⴼⴰ ⵉⴹⵓⵕⴰⵏ ⴷ ⵜⵇⵇⴱⵉⵍⵉⵏ ⵣⴷⵖⵏ ⴼ ⵉⵙⴰⴼⴼⵏ ⵙⴳ ⵓⵣⵎⵣ ⴰⵇⵇⴱⵓⵕ, ⴰⵛⴽⵓ ⴰⵙⵉⴼ ⴰⵔ ⴰⵙⵏ ⵉⵜⵜⴳⴳⴰ ⴰⵖⴱⴰⵍⵓ ⵏ ⵡⴰⵎⴰⵏ ⴷⴰ ⵉⴳⴰⵏ ⴰⵖⴱⴰⵍⵓ ⵏ ⵜⵓⴷⵔⵜ.

ⵉⵙⴰⴼⴼⵏ ⵉⵎⵇⵇⵕⴰⵏⵏ ⴳ ⵍⵎⵖⵔⵉⴱ:

ⴰⵙⵉⴼ ⵏ ⵡⴰⵏⵙⵉⴼⵏ
ⴰⵙⵉⴼ ⵏ ⵙⴱⵓ
ⴰⵙⵉⴼ ⵏ ⴷⵔⵄⴰ
ⴰⵙⵉⴼ ⵏ ⵍⵓⴽⵓⵙ
ⴰⵙⵉⴼ ⵏ ⵎⵍⵡⵉⵢⵢⴰ
ⴰⵙⵉⴼ ⵏ ⴳⵉⵔ
ⴰⵙⵉⴼ ⵏ ⵍⵎⴰⵍ
ⴰⵙⵉⴼ ⵏ ⴱⵓⵔⴳⵔⴰⴳ
ⴰⵙⵉⴼ ⵏ ⴷⴰⴷⵙ
ⴰⵙⵉⴼ ⵏ ⵍⵄⴱⵉⴷ
ⴰⵙⵉⴼ ⵏ ⵎⴰⵙⵙⵜ
ⴰⵙⵉⴼ ⵏ ⵙⵓⵙ
ⴰⵙⵉⴼ ⵏ ⵜⴰⵏⵙⵉⴼⵜ
ⴰⵙⵉⴼ ⵏ ⵣⵉⵣ

ⵓⵏⴰ

ⵙⴳ ⵓⵣⵎⵣ ⴰⵇⵇⴱⵓⵕ ⴰⴷ ⵉⵖⴰⵣ ⵓⴼⴳⴰⵏ ⴰⵎⵖⵔⵉⴱⵉ ⵓⵏⴰ (ⴰⵎⵢⵉⵡⵏ: ⴰⵏⵓ) ⴳ ⵜⵎⴰⵣⵉⵔⵜ ⵏⵙ, ⴰⵛⴽⵓ ⴳⴰⵏ ⵢⴰⵏ ⵓⵖⴱⴰⵍⵓ ⵏ ⵡⴰⵎⴰⵏ ⵙⵍⴰⵡⴰⵏ ⴳ ⵜⵎⵉⵣⴰⵔ ⴳ ⵉⵍⵍⴰ ⵓⵏⵣⵡⵉ ⵉⵣⵡⴰⵏ. ⴰⵎⴰⵏ ⵏ ⵡⴰⵏⵓ ⵜⵜⵢⵓⵙⵙⴰⵏⵏ ⵎⴰⵙ ⴳⴰⵏ ⴰⵎⴰⵏ ⵉⴷⵓⵙⵏ ⵉⵣⴷⴷⴰⴳⵏ ⴰⵛⴽⵓ ⴰⵔ ⵣⵔⵔⵉⵏ ⵙⴳ ⴽⵉⴳⴰⵏ ⵏ ⵜⵓⵙⵓⵜⵉⵏ ⵏ ⵡⴰⴽⴰⵍ ⴽⵓ ⵜⴰⵙⵓⵜ ⴰⵔ ⵙⴳⵉⵙⵏ ⵜⵜⴽⴽⵙ ⵢⴰⵏ ⵡⴰⵏⴰⵡ ⵏ ⵉⵔⴽⴰⵏ. ⴳ ⵉⵣⵎⴰⵣ ⵉⵣⵔⵉⵏ, ⵜⴰⵖⵓⵣⵉ ⵏ ⵡⴰⵏⵓ ⵓⵔ ⵜⴳⵉ ⴽⵔⴰ ⵏ ⵜⵡⵡⵔⵉ ⵉⵛⵇⵇⴰⵏ ⴰⵛⴽⵓ ⴽⴽⴰⵏⵜⵜⵉⵏ ⵡⴰⵎⴰⵏ ⵇⵇⵕⵕⴱⵏ ⵙ ⵓⴷⵎ ⵡⴰⴽⴰⵍ.

ⵓⴳⴳⵓⴳⵏ

ⵙ ⵜⵎⴰⵣⵉⵖⵜ, ⵓⴳⴳⵓⴳ ⴷⴰⵔⵙ ⵙⵉⵏ ⵉⵏⵓⵎⴰⴽ:

ⵓⴳⴳⵓⴳ ⵉⵙⵎⵓⵏⴰⵏ ⴰⵎⴰⵏ.
ⵓⴳⴳⵓⴳ ⵏ ⵜⵔⴳⴰ, ⴰⵔ ⵉⵙⵙⴰⵇⵇⵍⴰⵢ ⴰⵎⴰⵏ ⵙⴳ ⵡⴰⵙⵉⴼ ⵙ ⵜⵔⴳⴰ.

ⵉⵎⵖⵔⵉⴱⵉⵏ ⵉⵇⵇⴱⵓⵕⵏ ⵓⵔ ⵙⵙⵉⵏ ⵓⴳⴳⵓⴳⵏ ⵏ ⵡⴰⵙⵙⴰⴷ, ⵓⵔ ⵙⵙⵉⵏ ⵓⴳⴳⵓⴳⵏ ⴷⴰ ⵉⵙⵎⵓⵏⴰⵏ ⴰⵎⴰⵏ ⵎⴰⵛⵛ ⵙⵙⵏⴻⵏ ⵓⴳⴳⵓⴳⵏ ⴷⴰ ⵉⵙⵙⴰⵇⵇⵍⴰⵢⵏ ⴰⵎⴰⵏ ⵙⴳ ⵡⴰⵙⵉⴼ ⵙ ⵜⵔⴳⴰ. ⴰⵎⴰⵏ ⴳⴰⵏ ⴰⵥⵓⵕ ⵏ ⵜⵓⴷⵔⵜ ⵎⴰⵢⴰⵏ ⴰⴼ ⵓⵔ ⵉⴼⵉⵍ ⵓⴼⴳⴰⵏ ⴰⵇⵇⴱⵓⵕ ⴽⵔⴰ ⵏ ⵜⵖⴰⵔⴰⵙⵜ ⵜ ⵉⵙⵙⵍⴽⴰⵎⵏ ⵙⵔⵙⵏ ⵓⵔ ⵜⵜ ⵉⵡⵎⵉⵥ, ⵉⵚⴽⴰ ⵓⴳⴳⵓⴳⵏ ⴰⴼⴰⴷ ⴰⴷ ⵉⵙⵙⵍⴽⵎ ⴰⵎⴰⵏ ⵙ ⵉⴳⵔⴰⵏ ⵏⵙ, ⵉⵚⴽⴰ ⵓⴳⴳⵓⴳⵏ ⴰⴼⴰⴷ ⴰⴷ ⵉⵙⵙⵍⴽⵎ ⴰⵎⴰⵏ ⵙ ⵜⴳⵎⵎⵉ ⵏⵙ, ⵉⵚⴽⴰ ⵓⴳⴳⵓⴳⵏ ⴰⴼⴰⴷ ⴰⴷ ⵉⵥⵥⵓ ⵜⵓⴷⵔⵜ ⴳ ⵜⵡⵏⵏⴰⴹⵜ ⵏⵙ, ⵉⵚⴽⴰ ⵓⴳⴳⵓⴳⵏ ⴰⴼⴰⴷ ⴰⴷ ⵉⵙⵙⵍⴽⵎ ⴰⵎⴰⵏ ⵉ ⵉⵎⵓⴷⴰⵔ ⵏⵙ ⴷ ⵜⵓⴳⴰ ⵏⵏⵙⵏ.

ⵉⴳⴰ ⵜⵉⴷⵜ ⵎⴰⵙ ⴰⴼⴳⴰⵏ ⴰⵇⵇⴱⵓⵕ ⵓⵔ ⵉⵚⴽⵉ ⵓⴳⴳⵓⴳⵏ ⵓⵎⵇⵇⵕⴰⵏⴻⵏ ⵣⵓⵏ ⵓⴳⴳⵓⴳⵏ ⵏ ⵡⴰⵙⵙⴰⴷ, ⵎⴰⵛⵛ ⴰⵜ ⵉⵡⴼⴰ ⵢⴰⵜ ⵜⵖⴰⵔⴰⵙⵜ ⵢⴰⴹⵏⵉ ⵎⴰ ⵙ ⵉⵙⵎⵓⵏⴰ ⴰⵎⴰⵏ, ⵜⴰⵖⴰⵔⴰⵙⵜ ⴰⴷ ⵜⵔⵡⴰⵙ ⵜⴰⵖⴰⵔⴰⵙⵜ ⵏ ⵓⴳⴳⵓⴳⵏ, ⴰⵔ ⴳⵉⵙ ⵉⵙⵙⵎⵔⴰⵙ ⵜⴰⴼⵕⴹⵉⵜ ⵏⵖ ⵜⴰⵏⵓⵜ.

ⵜⴰⴼⵕⴹⵉⵜ

ⵜⴰⴼⵕⴹⵉⵜ ⵏⵖ ⴰⴼⵕⴹⵉ ⵜⴳⴰ ⵉⵙⵍⵍⵡⵉ ⵏ ⵉⵎⵖⵔⵉⴱⵉⵏ, ⴰⵛⴽⵓ ⵉⴳⴰ ⵜⴰⵢⴰⴼⵓⵜ ⵏ ⵡⴰⴽⴰⵍ ⵏ ⵍⵎⵖⵔⵉⴱ. ⵜⴰⴼⵕⴹⵉⵜ ⵜⴳⴰ ⵜⵓⵚⴽⴰ ⵉⵜⵜⵔⵙⵏ ⵏⵖ ⵉⵜⵜⵢⴰⵖⴰⵣⵏ ⴳ ⵡⴰⴽⴰⵍ, ⴰⵔ ⵜⴻⵜⵜⵓⵢⵙⴽⴰⵔ ⴳ ⵓⴹⵖⴰⵕ ⵙⴳ ⴰⴷ ⵣⵔⵔⵉⵏ ⵡⴰⵎⴰⵏ ⵏ ⵓⵏⵥⴰⵕ ⴰⴼⴰⴷ ⴰⵜⵏ ⴳⵉⵙ ⵙⵎⵓⵏⴻⵏ, ⴰⴼⴰⴷ ⴰⴷ ⵜⵏ ⵙⵙⵎⵔⵙⵏ ⴳ ⵎⵙⵡⵉ ⵏ ⵉⴳⵔⴰⵏ ⴰⴽⵓⴷ ⵏⵏⴰ ⵉⵣⵔⵉ ⵓⵏⵥⴰⵕ. ⴰⵔ ⵜⴻⵜⵜⵓⵢⵙⴽⴰⵔ ⵙⴳ ⵉⵥⵕⴰⵏ ⴷ ⵡⴰⴽⴰⵍ ⵏⵖ ⵙⴳ ⵓⴽⵏⴽⵉⵍ. ⵜⴳⴰ ⵜⴰⴼⵕⴹⵉⵜ ⵜⴰⵢⴰⴼⵓⵜ ⵉⵎⵎⵔⵡⴰⵙⵏ ⴷ ⵓⴳⴳⵓⴳ ⴰⵜⵔⴰⵔ ⵎⵍⵎⵎⵉ ⴷⴰ ⵜⵙⴽⴰⵔ ⵣⵓⵏ ⵜⴰⵡⵡⵓⵔⵉ ⵏⵙ.

ⴰⵙⵎⵔⵙ ⵏ ⵜⴼⵕⴹⵉⵜ ⴰⵔ ⵉⵙⵖⴰⵡⵙⴰ ⵙ ⵓⴷⵖⴰⵕ ⵢⴰⵜⵜⵓⵢⵏ ⴰⴼⴰⴷ ⴰⴷ ⵙⴳⵉⵙ ⵜⴼⴽ ⵜⴼⵕⴹⵉⵜ ⴰⵎⴰⵏ ⵉ ⵉⴷⵖⴰⵕⵏ ⵢⴰⴹⵏⵉ, ⵎⴰⵢⴰⴷ ⴰ ⵢⵓⴷⴷⵊⴰⵏ ⵜⴰⴼⵕⴹⵉⵜ ⴰⴷ ⵜⵜⵉⵍⵉ ⴳ ⵜⵎⵉⵣⴰⵔ ⵏ ⵓⴷⵔⴰⵔ ⵓⴳⴳⴰⵔ ⵏ ⵜⵎⵉⵣⴰⵔ ⵓⵥⴰⵖⴰⵕ. ⴳ ⵜⵎⵉⵣⴰⵔ ⵏ ⵓⴷⵔⴰⵔ ⴰⵔ ⵜⵜ ⵙⵙⵎⵔⴰⵙⵏ ⴰⴼⴰⴷ ⴰⴷ ⵙⵙⵓⵏ ⵉⴳⵔⴰⵏ ⵎⴰⵛⴰ ⴳ ⵜⵎⵉⵣⴰⵔ ⵏ ⵓⵥⴰⵖⴰⵕ ⴰⵔ ⵜⵜ ⵙⵙⵎⵔⴰⵙⵏ ⴰⴼⴰⴷ ⴰⴷ ⵙⴳⵉⵙ ⵙⵙⴰⵏ ⵉⵎⵓⴷⴰⵔ ⵏⵏⵙⵏ.

ⴰⵖⵕⵓⵕ

ⴰⴼⴰⴷ ⴰⴷ ⵉⵙⵙⵓ ⵓⴼⴳⴰⵏ ⵉⴳⵔⴰⵏ ⵏⵙ ⵙ ⵡⴰⵎⴰⵏ, ⴰⵔ ⴷ ⵉⵙⵙⵓⴼⵓⵖ ⴰⵎⴰⵏ ⵙⴳ ⴷⴷⵓ ⴰⴽⴰⵍ ⵙ ⵢⴰⵜ ⵜⵖⴰⵔⴰⵙⵜ ⵉⴳⴰⵏ ⵜⵓⴷⴷⵉⵙⵜ ⴽⵉⴳⴰⵏ ⴰⵙ ⵜⵜ ⵉⴳⴰⵏ ⴷ "ⴰⵖⵕⵓⵕ", ⵜⴰⵖⴰⵔⴰⵙⵜ ⴰⴷ ⴰⵔ ⵙⵉⵙ ⴷ ⵉⵙⵙⵓⴼⵓⵖ ⵓⴼⴳⴰⵏ ⴰⵎⴰⵏ ⵙⴳ ⵓⵏⴰ (ⴷⴷⵓ ⴰⴽⴰⵍ) ⴰⴼⴰⴷ ⴰⴷ ⵙⵔⵙⵏ ⵉⵙⵙⵓ ⵉⴳⵔⴰⵏ ⵏⵙ. ⴰⵖⵕⵓⵕ ⴰⵔ ⵉⵜⵜⵄⵎⵎⴰⴷ ⴼ ⵜⵣⵎⵔⵜ ⵏ ⵓⴼⴳⴰⵏ ⵏⵖ ⴼ ⵜⵣⵎⵔⵜ ⵏ ⵉⵎⵓⴷⴰⵔ ⵣⵓⵏ ⴰⵖⵢⵓⵍⵏ ⴰⵙⵔⴷⵓⵏ ⵏⵖ ⴰⴳⵎⴰⵔ, ⴳ ⵎⴰ ⵉⴳⴳⵓⵜⵏ ⴰⵔ ⵉⵜⵜⵄⵎⵎⴰⴷ ⴼ ⵉⵎⵓⴷⴰⵔ ⴰⵛⴽⵓ ⵏⵓⵜⵏⵉ ⴰⴷ ⵉⵖⵉⵏ ⴰⴷ ⵙⵡⵡⵓⵔⵉⵏ ⴰⵙⵙ ⴰⴽⴽⵯ, ⴰⵔ ⴷ ⴰⵇⵇⵍⴰⵢⵏ ⵡⴰⵎⴰⵏ ⵉⵍⵎⴰ ⵎⵓⵏⴻⵏ ⴳ ⵢⴰⵜ ⵜⴼⵕⴹⵉⵜ ⵏ ⵓⵙⵎⵓⵏ ⵡⴰⵎⴰⵏ ⴰⵔⵉⴳ ⴳⴳⵓⵜⵏ ⴰⵛⴽⵓ ⴰⵔ ⴷ ⴰⵇⵇⵍⴰⵢⵏ ⵉⵎⵉⴽ ⵙ ⵉⵎⵉⴽ, ⴽⵓ ⵜⵉⴽⴽⵍⵉ ⴰⵔ ⴳⵉⵙ ⴷ ⴰⵇⵇⵍⴰⵢⵏ ⵉⵎⵉⴽ ⵏ ⵡⴰⵎⴰⵏ, ⴰⴽⵓⴷ ⵏⵏⴰ ⴳⴳⵓⵜⵏ ⵡⴰⵎⴰⵏ ⴳ ⵜⴼⵕⴹⵉⵜ ⵉⵍⵎⴰ ⵜⵜⵢⴰⵕⵥⴰⵎⵏ ⴰⴷ ⵎⵓⵏⵏ ⴷ ⵓⵙⴰⵔⵓ ⵏⵖ ⴷ ⴽⵔⴰ ⵏ ⵜⴰⵔⴳⴰ ⴰⴼⴰⴷ ⴰⴷ ⴼⵜⵓⵏ ⵙ ⵉⴳⵔⴰⵏ.

ⵜⵉⵟⵟⵉ ⵏ ⵡⴰⵎⴰⵏ

ⵙⴳ ⵉⵣⵎⴰⵣ ⵉⵇⵇⴱⵓⵕⵏ ⴰⴷ ⵉⴷⴷⵔ ⵓⴼⴳⴰⵏ ⴳ ⵡⴰⴽⴰⵍ ⵏ ⵍⵎⵖⵔⵉⴱ, ⵜⴰⵙⵓⵍⵜ ⴰⴷ ⵓⵔ ⵜⵥⴹⴰⵕ ⴰⴷ ⵜⵉⵍⵉ ⵎⵍⴰ ⴷ ⵓⵔ ⵉⵍⵍⵉ ⵢⴰⵏ ⵡⴰⵏⴰⵡ ⵏ ⵓⵣⵔⴼ ⴷⴰⵙ ⵉⵥⴹⴰⵕ ⴰⴷ ⵉⵙⵡⵓⴷⴷⵓ ⵜⵓⴷⵔⵜ ⵏⵙ ⴳ ⵎⴰ ⵉⵣⴷⵉⵏ ⵙ ⵜⵉⵙⵇⵇⴰⵏ ⵉⵏⴳⵔ ⵓⴷⵎⴰⵡⵏ ⵏ ⵓⵏⴰⵎⵓⵏ, ⵜⵉⵙⵇⵇⴰⵏ ⵏ ⵜⵡⵊⵊⴰ, ⵜⵓⴽⴽⵙⴰ, ⵜⴰⴷⴰⵎⵙⴰ ⴷ ⵓⵙⵎⵓⴷⴷⵓ ⵏ ⵡⴰⵎⴰⵏ ⵓⵍⴰ ⵏⵜⵜⴰ. ⴰⵛⴽⵓ ⵎⴽⵍⵍⵉ ⵏⵙⵙⵏ ⴰⵎⴰⵏ ⴳⴰⵏ ⴰⵖⴱⴰⵍⵓ ⵏ ⵜⵓⴷⵔⵜ, ⵉⴳ ⵓⵔ ⵜⵏ ⵉⵏⴱⴰⴹ ⴽⵔⴰ ⵏ ⵓⵣⵔⴼ ⵉⵍⴰ ⴼⵍⵍⴰⵙⵏ ⵉⵍⵉⵏ ⵉⵏⴰⵖⴰⵏ ⵉⵛⵇⵇⴰⵏ, ⴽⵓ ⵢⴰⵏ ⴳ ⵎⵉⴷⴷⵏ ⵉⵔⴰ ⴰⴷ ⴳⵏ ⵡⴰⵎⴰⵏ ⵡⵉⵏⵙ ⵡⴰⵃⴷⵓⵜ ⴷ ⵡⵉⵏ ⵉⴳⵔⴰⵏ ⵏⵙ ⵡⴰⵃⴷⵓⵜⵏ. ⴳ ⵜⴰⵙⴳⵉⵡⵉⵏ ⵏ ⵍⵎⵖⵔⵉⴱ ⵎⴰⵕⵕⴰ ⵜⵍⵍⴰ ⵢⴰⵜ ⵜⵖⴰⵔⴰⵙⵜ ⵏ ⵓⵙⵡⵓⴷⴷⵓ ⵏ ⵡⴰⵎⴰⵏ, ⵏⵖ ⵏⵥⴹⴰⵕ ⴰⴷ ⵏⵉⵏⵉ ⵎⴰⵙ ⵜⴰⵖⴰⵔⴰⵙⵜ ⵏ ⵓⵙⵡⵓⴷⴷⵓ ⵏ ⵡⴰⵎⴰⵏ ⴳ ⵍⵎⵖⵔⵉⴱ ⴷⴰⵔⵙ ⵜⵉⴼⵔⴰⵙ ⵎⵎⵔⵡⴰⵙⵏⵉⵏ ⵎⵇⵇⴰⵔ ⵉⵍⵍⴰ ⴽⵉⴳⴰⵏ ⵏ ⵓⵖⴰⵔⴰⵙ ⵉⵏⴳⵔ ⵜⵎⴰⵣⵉⵔⵜ ⴷ ⵜⴰⵢⵢⴰⴹ. ⴰⵔ ⵏⵜⵜⴰⴼⴰ ⵎⴰⵙ ⵍⵍⴰⵏ ⵉⵔⵎⵎⵓⵙⵏ ⵉⵎⴰⵣⴰⵔⵏ ⴳ ⵜⵎⵉⵣⴰⵔ ⴰⴽⴽⵯ.^[5] ^[6]

ⴰⵙⵙⵍⴽⵎ ⵏ ⵡⴰⵎⴰⵏ ⵙ ⵉⴳⵔⴰⵏ

ⴰⵏⴳⵔⴰⵡ ⵏ ⵓⴳⴳⵓⴳ ⴳ ⵜⵎⵏⴰⴹⵜ ⵏ ⵓⵥⵍⴰⴳ, ⵜⵔⵏⴰⵜⴰ, ⵣⴰⴳⵓⵔⴰ, 2016 (ⴰⵙⵓⵍⴼ ⵏ ⵙⵍⵉⵎⴰⵏ ⵡⴰⵍⴷⴰⵡⴷⵉ)

ⵜⵉⴽⵍⵉ ⵜⴰⵎⵣⵡⴰⵔⵓⵜ ⴳ ⵜⵉⵟⵟⵉ ⵏ ⵡⴰⵎⴰⵏ ⵉⴳⴰⵜ ⵓⵙⵙⵍⴽⵎ ⵏ ⵡⴰⵎⴰⵏ ⵙ ⵉⴳⵔⴰⵏ, ⴰⴷ ⵏⵙⵙⵍⴽⵎ ⴰⵎⴰⵏ ⵙ ⵉⴳⵔⴰⵏ ⵉⵍⵎⴰ ⵏⴱⴹⵓ ⴰⵎⴰⵏ ⴼ ⵉⴳⵔⴰⵏ ⵏ ⴽⵓ ⵢⴰⵏ. ⴰⴼⴰⴷ ⴰ ⵉⵙⵙⵍⴽⵎ ⵓⴼⴳⴰⵏ ⴰⵎⵖⵔⵉⴱⵉ ⴰⵎⴰⵏ ⵙ ⵉⴳⵔⴰⵏ ⴰⵔ ⵉⵙⵙⵎⵔⴰⵙ ⴽⵉⴳⴰⵏ ⵏ ⵉⵎⴰⵙⵙⵏ ⵣⵓⵏ ⵜⵉⵔⴳⴳⵯⵉⵏ, ⵉⵙⵓⵔⴰ, ⵙⴰⵢⵍⴰⵍ, ⵓⴳⴳⵓⴳⵏ, ⵜⵉⴼⵕⴹⵉⵏ (ⵏⵖ ⵉⴼⵕⴹⵉⵏ) ⴷ ⵓⴳⴳⴰⵔ.^[6] ^[1]

ⵓⴳⴳⵓⴳ: ⵉⴳⴰ ⵉⵎⵉⵙⵙ ⵏ ⵉⵎⵉⵥ ⵏⵖ ⵏ ⵓⵙⵙⴰⵇⵇⵍⴰⵢ ⵏ ⵡⴰⵎⴰⵏ ⵙⴳ ⵡⴰⵙⵉⴼ, ⴰⵔ ⵉⵜⵜⵢⴰⵡⵚⴽⴰ ⵙⴳ ⵉⵥⵕⴰⵏ ⵡⴰⵃⴷⵓⵜⵏ ⵏⵖ ⵙⴳ ⵉⵥⵕⴰⵏ ⴷ ⵜⵓⴳⴰ ⴰⵛⴽⵓ ⵓⵔ ⴰⴷ ⵜⵏ ⵜⵜⴰⵡⵉⵏ ⵡⴰⵎⴰⵏ ⵏ ⵡⴰⵙⵉⴼ. ⵓⴳⴳⵓⴳ ⵏⵜⵜⴰ ⴰⴷ ⵢⴰⴽⴽⴰⵏ ⴰⵎⴰⵏ ⵉ ⵜⴰⵔⴳⵯⴰ.
ⵜⴰⵔⴳⵯⴰ: ⵜⴳⴰ ⴰⵙⴰⴽⴰ ⵏ ⵡⴰⵎⴰⵏ ⵉⵜⵜⵢⴰⵖⴰⵣⵏ ⴳ ⵡⴰⴽⴰⵍ, ⴽⵓ ⵜⴰⵇⵇⴱⵉⵍⵜ ⴰⵔ ⵜⵇⵇⴰⵣ ⵜⵉⵔⴳⵯⴰ ⵏⵙ ⴷ ⴰⵔ ⴼⵍⵍⴰⵙ ⵙⴽⴰⵔⵏ ⵜⴰⵡⴰⵍⴰ ⴳ ⵜⵡⵡⵓⵔⵉⵡⵉⵏ ⵉⵣⴷⵉⵏ ⵙ ⵜⵓⴳⴳⵓⵥⵜ ⵏⵙ. ⵜⴰⵔⴳⵯⴰ ⵏⵜⵜⴰⵜ ⴰⵔ ⵜⵜⴳⴳⴰ ⴰⵙⴰⴽⴰ ⵉⵎⵇⵇⵓⵕⵏ, ⴰⵔ ⴷ ⵜⵙⵙⴰⵇⵇⵍⴰⵢ ⴰⵎⴰⵏ ⵙⴳ ⵡⴰⵙⵉⴼ ⴰⵔ ⵜⴰⴽⴽⴰ ⵉ ⵉⵙⵓⵔⴰ.
ⴰⵙⴰⵔⵓ: ⵉⴳⴰ ⴰⵙⴰⴽⴰ ⵉⵎⵥⵥⵉⵏ ⵏ ⵡⴰⵎⴰⵏ, ⴰⵔ ⵉⵟⵟⴰⵎⵥ ⴰⵎⴰⵏ ⵙⴳ ⵜⴰⵔⴳⵯⴰ ⴰⵔ ⵜⵏ ⵉⵙⵙⵍⴽⴰⵎ ⵙ ⵉⴳⵔⴰⵏ, ⵢⴰⵜ ⵜⴰⵔⴳⵯⴰ ⴰⵔ ⵜⴱⵟⵟⵓ ⴰⵎⴰⵏ ⴼ ⴽⵉⴳⴰⵏ ⵏ ⵉⵙⵓⵔⴰ. ⴳ ⵜⵖⵓⵣⵉ ⵏ ⵉⵙⵓⵔⴰ ⵓⵔ ⴰⴷ ⴳⵉⵙⵏ ⵜⵜⴷⵔⵓ ⵜⴰⵇⵇⴱⵉⵍⵜ ⵎⴰⵕⵕⴰ, ⴽⵓ ⴰⵙⴰⵔⵓ ⴰⵔ ⴳⵉⵙ ⵜⵜⴷⵔⵓⵏ ⵏⵖ ⴰⵔ ⴳⵉⵙ ⵙⵡⵡⵔⴰⵢⵏ ⵎⵉⴷⴷⵏ ⴷⴰ ⵙⴳⵉⵙ ⵉⵙⵙⵡⴰⵏ ⵡⴰⵀⴰ. ⵓⵍⴰ ⵜⵓⴳⴳⵓⵥⵜ ⵏ ⵓⵙⴰⵔⵓ ⴰⵔ ⴼⵍⵍⴰⵙ ⵜⵜⴱⵉⴷⴷⵏ ⴽⴰ ⵎⵉⴷⴷⵏ ⵉⵙⵙⵎⵔⴰⵙⵏ ⴽⵓ ⴰⵙⴰⵔⵓ.
ⵙⴰⵢⵍⴰⵍ: ⵉⴳⴰ ⴰⵏⴰⵡ ⵏ ⵉⵙⵓⵔⴰ ⵉⵙⵙⵍⴽⴰⵎⵏ ⴰⵎⴰⵏ ⵙ ⵉⴳⵔⴰⵏ ⴰⴽⵓⴷ ⵏⵏⴰ ⵉⵍⵍⴰ ⴽⵔⴰ ⵏ ⵓⵊⴰⵡ ⵏⵖ ⴽⵔⴰ ⵏ ⵡⴰⴽⴰⵍ ⵉⴳⴳⵯⵉⵣⵏ ⵉⵏⴳⵔ ⵜⴰⵔⴳⵯⴰ ⴷ ⵉⴳⵔⴰⵏ. ⵏⵥⴹⴰⵕ ⴰⴷ ⵏⵉⵏⵉ ⵎⴰⵙ ⵙⴰⵢⵍⴰⵍ ⵉⴳⴰ "ⴰⵙⴰⵔⵓ ⵉⵜⵜⴰⵢⵍⴰⵍⵏ" ⵏⵖ "ⴰⵙⴰⵔⵓ ⵉⴽⴽⴰⵏ ⵉⴳⵏⵡⴰⵏ" ⵖⵉⵏ ⴰⴷⴷⵉ ⵉⴽⴽⴰ ⵉⵙⵎ ⵏⵙ, ⴰⵔ ⵉⵜⵜⵢⴰⵡⴱⵏⴰ ⵙ ⵉⵥⵕⴰⵏ ⴷ ⵡⴰⴽⴰⵍ ⴰⵔ ⵙⵉⵙⵏ ⵙⴽⴰⵔⵏ ⵉⴳⵓⴷⴰⵔ ⵣⵓⵏ ⵡⵉⵏ ⵜⴳⵎⵎⵉ ⴰⴼⴰⴷ ⴰⴷ ⵙⵙⵍⴽⵎⵏ ⴰⵎⴰⵏ ⵉ ⵉⴳⵔⴰⵏ.
ⵜⴰⴼⵕⴹⵉⵜ: ⴰⴽⵓⴷ ⵏⵏⴰ ⵓⵔ ⴷ ⴽⴽⵉⵏ ⵡⴰⵎⴰⵏ ⴰⵙⵉⴼ ⴰⵔ ⴷ ⵜⵜⴽⴽⴰⵏ ⵜⴰⴼⵕⴹⵉⵜ, ⵏⵜⵜⴰⵜ ⴰⴷ ⵉⵙⴽⴰⵔⵏ ⵜⴰⵡⵡⵔⵉ ⵏ ⵜⵔⴳⵯⴰ ⴰⵛⴽⵓ ⵓⵔ ⵙⵓⵍ ⴰⴷ ⵜⵜⵉⵍⵉ, ⴰⵔ ⴰⴽⴽⴰⵏ ⴰⵎⴰⵏ ⵏⵉⵛⴰⵏ ⵉ ⵉⵙⵓⵔⴰ ⵉⵎⵥⵢⴰⵏⴻⵏ, ⴽⵓ ⴰⵙⴰⵔⵓ ⴰⵔ ⵉⵙⵙⵍⴽⴰⵎ ⴰⵎⴰⵏ ⵉ ⵉⴳⵔ ⵏ ⴱⴰⴱ ⵏⵙ.

ⵉⵔⵎⵎⵓⵙⵏ ⵏ ⵜⵉⵟⵟⵉ ⵏ ⵡⴰⵎⴰⵏ

ⵜⵉⵟⵟⵉ ⵏ ⵡⴰⵎⴰⵏ ⵓⵔ ⵜⴳⵉ ⴽⵔⴰ ⵜⵡⵡⵓⵔⵉ ⵉⴳⴰⵏ ⵜⴰⴼⵔⴰⵔⵜ ⴰⵛⴽⵓ ⵜⵣⴷⵉ ⵙ ⵡⴰⵎⴰⵏ, ⴰⵖⴱⴰⵍⵓ ⵏ ⵜⵓⴷⵔⵜ ⵏ ⵓⴼⴳⴰⵏ, ⵎⴰⵢⴰⴷ ⴰⴼ ⵓⵔ ⴼⵍⵍⴰⵙ ⵉⵜⵜⴱⴷⴷⴰ ⵡⴰⵏⵏⴰ ⴽⴰ ⵢⵔⴰⵏ ⵏⵖ ⵡⴰⵏⵏⴰ ⴽⴰ ⵉⵙⴰⵍⴰⵏ, ⴰⵔ ⴼⵍⵍⴰⵙ ⵜⵜⴱⴷⴷⴰⵏ ⵉⵎⵏⴱⴰⴹⵏ ⵏ ⴽⵓ ⵜⴰⵇⵇⴱⵉⵍⵜ, ⵉⵎⵏⴱⴰⴹⵏ ⴼ ⴷ ⵎⵙⵉⵛⴽⵉⵏ ⵎⵉⴷⴷⵏ ⵏ ⵜⵎⴰⵣⵉⵔⵜ ⵎⴰⵕⵕⴰ. ⵓⵍⴰ ⵜⴰⵖⴰⵔⴰⵙⵜ ⵏ ⵓⵙⵡⵓⴷⴷⵓ ⵜⴳⴰ ⵜⵓⵙⵙⵏⴰ ⵙⴽⵔⵏ ⵉⵎⵣⵡⵡⵓⵔⴰ ⴰⵔ ⵜⵜⵉⴷ ⵜⴼⴼⴰⵍ ⵜⴰⵙⵓⵜ ⵉ ⵜⴰⵢⵢⴰⴹ.

ⴰⵏⴱⴹⵓ: ⴰⵔ ⵉⵜⵜⴳⴳⴰ ⴰⴼⴳⴰⵏ ⵉⵄⴷⵍⵏ, ⴰⵔ ⴼⵍⵍⴰⵙ ⴷ ⵜⵜⵎⵙⵉⵛⴽⵉⵏ ⵎⵉⴷⴷⵏ ⴰⴽⴽ ⵏ ⵜⵇⵇⴱⵉⵍⵜ ⴰⴼⴰⴷ ⴰⴷ ⵉⴱⵉⴷⴷ ⴼ ⵡⴰⵎⴰⵏ, ⴳ ⴽⵉⴳⴰⵏ ⵏ ⵜⵎⵓⵣⴰⵔ ⴰⵔ ⴰⵙ ⵜⵜⵉⵏⵉⵏ "ⵍⵎⵇⵇⴷⴷⵎ ⵏ ⵡⴰⵎⴰⵏ", ⴰⵛⴽⵓ ⴰⵔ ⵉⵜⵜⵏⴱⴰⴹ ⴳ ⵜⵉⵟⵟⵉ ⵏ ⵡⴰⵎⴰⵏ ⵉⵏⴳⵔ ⵎⵉⴷⴷⵏ ⵏ ⵜⵇⵇⴱⵉⵍⵜ ⴰⵔ ⴼⵍⵍⴰⵙ ⵙⴽⴰⵔⵏ ⵉⵙⵜⴰⵢⵏ. ⴰⵏⴱⴹⵓ ⴰⵔ ⵉⵜⵜⵏⴱⴰⴹ ⴳ ⵡⴰⵎⴰⵏ ⵎⴰⵛⵛ ⴰⵔ ⵉⵜⵜⵉⴹⴼⵓⵕ ⴰⵣⵔⴼ ⴰⵇⵇⴱⵓⵔ ⴷⴰ ⵅⴼ ⴷ ⵎⵙⵉⵛⴽⵉⵏ ⴰⵢⵜ ⵜⵇⵇⴱⵉⵍⵜ ⵙⴳ ⵣⵉⴽⴽ.
ⵜⴰⴼⵔⴷⵉⵜ: ⵜⴳⴰ ⴰⴼⵔⴷⵉⵙ ⵏ ⵓⵙⵖⴰⵍ ⵏ ⵜⵉⵣⵉ, ⵜⵎⵣⴰⵔⴰⵢ ⵙⴳ ⵜⴰⵇⵇⴱⵉⵍⵜ ⵙ ⵜⴰⵢⵢⴰⴹ, ⵙⴳ ⵓⵙⵓⵏ ⵙ ⵡⴰⵢⵢⴰⴹ. ⴰⵔ ⴳⵉⵙ ⵜⵜⵉⵍⵉ 3 ⵜⵙⵔⴰⴳⵉⵏ, 9 ⵏ ⵜⵙⵔⴰⴳⵉⵏ ⵉⵍⵉ ⵉⴳ ⴳⵉⵙ 12 ⵏ ⵜⵙⵔⴰⴳⵜ. ⵉⵙⵎ ⵏⵙ "ⵜⴰⴼⵔⴷⵉⵜ" ⵏⵖ "ⵜⴰⴼⵔⴷⵉⵜ ⵏ ⵡⴰⵎⴰⵏ" ⵏⵖ "ⵜⴰⴼⵔⴷⵉⵜ ⵏ ⵜⵔⴳⴰ".
ⴰⵙⴼⵙⵉ: ⵉⴳⴰ ⴰⴷⵖⴰⵔ ⵏⵖ ⵏⵥⵥⴹⴰⵕ ⴰⴷ ⵏⵉⵏⵉ ⵎⴰⵙ ⵉⴳⴰ ⵜⴰⴳⴳⵓⵔⵜ ⵏⵖ ⵜⵉⴼⵍⵓⵜ ⵏ ⵡⴰⵎⴰⵏ, ⵏⵜⵜⴰ ⴰⵙ ⴰⴷ ⵜⵜⵢⴰⵡⵇⵇⴰⵏ ⵡⴰⵎⴰⵏ ⴼ ⵜⵔⴳⵯⴰ, ⵏⵖ ⴰⵔ ⵙⵉⵙ ⵜⵜⵢⴰⵇⵇⴰⵏ ⵡⴰⵎⴰⵏ ⴼ ⵓⵙⴰⵔⵓ ⵙⴳ ⵜⵔⴳⵯⴰ ⵏⵖ ⴰⵔ ⵙⵉⵙ ⵜⵜⵢⴰⵇⵇⴰⵏ ⵡⴰⵎⴰⵏ ⵙⴳ ⵓⵙⴰⵔⵓ ⵙ ⵡⴰⵢⵢⴰⴹ. ⴰⵔ ⴰⵙ ⵜⵜⵉⵏⵉⵏ ⵓⵍⴰ "ⵕⵕⴱⵟⵟ ⵏ ⵡⴰⵎⴰⵏ".

ⴰⵣⵎⵣ ⵏ ⵜⵉⵙⵙⵉ ⵏ ⵉⴳⵔⴰⵏ

ⴰⵣⵎⵣ ⵏ ⵜⵉⵙⵙⵉ ⵏ ⵉⴳⵔⴰⵏ ⵏⵖ ⴰⵣⵎⵣ ⵏ ⵎⵙⵡⵉ ⵉⴳⴰ ⴰⵣⵎⵣ ⴳ ⵡⴰⵙⵙ ⴷⴰ ⴳ ⴰⴷ ⵙⵙⵡⴰⵏ ⵎⵉⴷⴷⵏ ⵉⴳⵔⴰⵏ ⵏⵙ. ⴰⵣⵎⵣ ⵏ ⵜⵉⵙⵙⵉ ⵉⵣⴷⵉ ⵙ ⵓⵖⴱⴰⵍⵓ ⵏ ⵡⴰⵎⴰⵏ, ⵉⵙ ⵉⴳⴰ ⵜⴰⵔⴳⵯⴰ ⵏⵖ ⵜⴰⴼⵕⴹⵉⵜ.

ⴰⵣⵎⵣ ⵏ ⵜⵔⴳⵯⴰ: ⴰⴽⵓⴷ ⵏⵏⴰ ⴷ ⴽⴽⴰⵏ ⵡⴰⵎⴰⵏ ⵜⴰⵔⴳⵯⴰ ⵏⵉⵛⴰⵏ ⵙⴳ ⵡⴰⵙⵉⴼ ⴰⵔ ⵙⵙⵡⴰⵏ ⵎⵉⴷⴷⵏ ⵉⴹ ⵓⵍⴰ ⴰⵣⴰⵍ, ⴰⵛⴽⵓ 24 ⵏ ⵜⵙⵔⴰⴳⵜ ⴳ ⵡⴰⵙⵙ, ⴰⵛⴽⵓ ⴰⵎⴰⵏ ⵏ ⵜⵔⴳⵯⴰ ⵙⵙⵓⴷⴰⵏ ⴱⴷⴷⴰ.
ⴰⵣⵎⵣ ⵏ ⵜⴼⵕⴹⵉⵜ: ⴰⴽⵓⴷ ⵏⵏⴰ ⴷ ⴽⴽⴰⵏ ⵡⴰⵎⴰⵏ ⵜⴰⴼⵕⴹⵉⵜ, ⴰⵔ ⵙⵙⵡⴰⵏ ⵎⵉⴷⴷⵏ ⴰⵣⴰⵍ ⵙⴳ ⵜⵉⴼⴰⵡⵜ ⴰⵔ ⵜⵉⵏ ⵡⵓⵜⵛⵉ.

ⵜⵉⵟⵟⵉ ⵏ ⵡⴰⵎⴰⵏ

ⴰⵎⴰⵏ ⴳ ⴽⵓ ⵜⴰⵇⵇⴱⵉⵍⵜ ⴰⵔ ⵜⵜⵢⴰⴱⴹⴰⵏ ⴼ ⵉⴳⵔⴰⵏ, ⵜⴰⵊⵓⵎⵎⴰ ⵏ ⵉⴳⵔ ⴰⴷ ⵉⵙⵡⵓⵜⵜⵓⵢⵏ (ⵉⵜⵜⵃⴷⴷⴰⴷⵏ) ⵜⴰⵙⵎⴽⵜⴰ ⵏ ⵡⴰⵎⴰⵏ ⴷⴰ ⵉⵔⴰ ⴰⵙ ⵉⵜⵜⵢⴰⴼⴽⴰ, ⵉⴳ ⵉⵎⵇⵇⵓⵕ ⵉⴳⵔ ⴰⵔ ⴰⵙ ⴰⴽⴽⴰⵏ ⴽⴰⴷⴰ ⵏ ⵡⴰⵎⴰⵏ, ⵉⴳ ⵉⵎⵥⵥⵉ ⴰⵔ ⴰⵙ ⴰⴽⴽⴰⵏ ⵉⵎⵉⵇⵇ ⵏ ⵡⴰⵎⴰⵏ. ⴳ ⴽⵔⴰ ⵏ ⵜⵇⵇⴱⵉⵍⵉⵏ, ⵓⵟⵟⵓⵏ ⵏ ⵜⴰⴷⴷⴰⴳⵉⵏ ⵓⵍⴰ ⵏⵜⵜⴰ ⴰⵔ ⵉⵙⵡⵓⵜⵜⵓⵢ ⵜⴰⵙⵎⴽⵜⴰ ⵏ ⵡⴰⵎⴰⵏ ⴷⴰ ⵉⵔⴰ ⴰⴷ ⴰⵙ ⵉⵜⵜⵢⵓⴼⴽⴰ, ⴰⵛⴽⵓ ⵉⴳ ⴷⵔⵓⵙⵏ ⵡⴰⵎⴰⵏ ⴰⵔ ⵙⵙⵡⴰⵏ ⵎⵉⴷⴷⵏ ⴽⴰ ⵜⴰⴷⴷⴰⴳⵉⵏ ⵓⵔ ⴰⴷ ⵙⵙⵡⴰⵏ ⴰⴽⴰⵍ ⴰⴽⴽⵯ. ⴰⵔ ⵜⵜⵢⴰⴱⴹⴰⵏ ⵡⴰⵎⴰⵏ ⴼ ⵡⴰⴽⴰⵍ ⴷ ⵉⵎⴷⴰⵏⴻⵏ, ⴰⵔ ⵉⵜⵜⵉⵍⵉ ⵉⴳ ⵜⵜⵢⴰⴱⴹⴰⵏ ⵡⴰⵎⴰⵏ ⴽⴰ ⴼ ⵡⴰⵔⵔⴰⵡ ⵏ ⵜⵇⵇⴱⵉⵍⵜ, ⵢⴰⵏ ⵉⴳⴰⵏ ⴰⴱⵕⵕⴰⵏⵉ ⴼ ⵜⵇⵇⴱⵉⵍⵜ ⵓⵔ ⴰⴷ ⴰⵙ ⴰⴽⴽⴰⵏ ⴰⵎⴰⵏ ⴰⵛⴽⵓ ⵓⵔ ⵉⴳⵉ ⵉⵡⵉⵙ ⵏ ⵜⵇⵇⴱⵉⵍⵜ. ⴰⴽⵓⴷ ⵏⵏⴰ ⵜⵜⵢⴰⴱⴹⴰⵏ ⵡⴰⵎⴰⵏ ⴼ ⵡⴰⴽⴰⵍ ⴷ ⵉⵎⵣⴷⴰⵖ, ⴰⵔ ⴰⵙⵏ ⵙⴽⴰⵔⵏ ⵜⴰⵡⴰⵍⴰ, ⵜⴰⵡⴰⵍⴰ ⵉⴳⴰⵜⵜ ⵓⵙⵏⵎⴰⵍⴰ ⵏ ⵎⵉⴷⴷⵏ ⴳ ⵎⵙⵡⵉ ⵏ ⵉⴳⵔⴰⵏ, ⵎⴰⵜⵜⴰ ⵡⴰⴷⴰ ⵉⵔⴰⵏ ⴰⴷ ⵉⴳ ⴰⵎⵣⵡⴰⵔⵓ ⴷ ⵎⴰⵜⵜⴰ ⵡⴰⴷⴰ ⵉⵔⴰ ⴰⴷ ⵉⴳ ⴰⵎⴳⴳⴰⵔⵓ ⴷ ⵎⴰⵜⵜⴰ ⵡⴰⴷⴰ ⵉⵔⴰⵏ ⴰⴷ ⵉⴹⴼⴰⵕ ⵡⴰⵢⵢⴰⴹ. ⴳ ⵜⵉⴳⵉⵔⴰ ⵜⴰⵡⴰⵍⴰ ⵏ ⵜⵉⵙⵙⵉ ⴰⵔ ⵜⵙⵙⵓⴷⴰⵡ ⵙ ⵉⵎⵉⵔ, ⴰⴽⵓⴷ ⵏⵏⴰ ⴽⵎⵎⵍⵏ ⴽⵓⵍⵍⵓ ⵎⵉⴷⴷⵏ ⴰⵔ ⴷ ⵜⵜⴰⵍⵙⵏ ⴷⴰⵖ ⵙⴳ ⵓⵎⵣⵡⴰⵔⵓ.

ⵜⴰⵖⴰⵔⴰⵙⵜ ⵏ ⵜⵉⵟⵟⵉ ⵏ ⵡⴰⵎⴰⵏ

ⴰⵙⵙⵎⵔⵙ ⵏ ⵜⴰⵏⴰⵙⵜ ⴳ ⵜⵙⴳⴰ ⵏ ⵜⴼⵔⴰⵡⵜ ⵏ ⵡⴰⵎⵎⵍⵏ, ⵍⵎⵖⵔⵉⴱ

ⵜⵉⵟⵟⵉ ⵏ ⵡⴰⵎⴰⵏ ⵜⴹⴼⵓⵕ ⵉ ⵡⴰⴷⵓⴷ ⵏⵖ ⵉ ⵓⵣⵎⵣ, ⴰⵙⵙ ⴰⴷ ⴰⵔ ⵙⵙⵎⵔⴰⵙⵏ ⵎⵉⴷⴷⵏ "ⵍⵎⴰⴳⴰⵏ ⵏⵖ ⵜⴰⵙⵔⴰⴳⵜ" ⵎⴰⵛⵛ ⴳ ⵎⴰ ⵉⵣⵔⵉⵏ ⴰⵔ ⵙⵙⵎⵔⴰⵙⵏ ⵎⵉⴷⴷⵏ "ⵜⴰⵏⴰⵙⵜ" ⵏⵖ "ⵍⵎⴰⴳⴰⵏⴰ ⵏ ⵡⴰⵎⴰⵏ", ⵜⴰⵏⴰⵙⵜ ⵜⴳⴰ ⵉⵎⵉⵙⵙ ⴰⵣⴰⵢⴽⵓ ⵏ ⵜⵉⵟⵟⵉ ⵏ ⵡⴰⵎⴰⵏ ⴳ ⵍⵎⵖⵔⵉⴱ ⵓⵔ ⵉⵜⵜⵢⵓⵙⵙⴰⵏ ⵎⴰⵏ ⵓⵣⵎⵣ ⴰⴳ ⵙⵙⵏⵜⵉⵏ ⵉⵎⵖⵔⵉⴱⵉⵏ ⴰⵙⵙⵎⵔⵙ ⵏⵙ ⵎⴰⵛⵛ ⵏⵙⵙⵏ ⵎⴰⵙ ⵜⴳⴰ ⵜⴰⵇⵇⴱⵓⵔⵜ, ⴼⵍⵏⵜⵜⵉⴷ ⵉⵎⵣⵡⵡⵓⵔⴰ ⵉ ⵉⵎⴳⴳⵓⵔⴰ ⵜⴰⵙⵓⵜ ⴼ ⵜⴰⵙⵓⵜ. ⵜⵍⵍⴰ ⵜⴰⵏⴰⵙⵜ ⴳ ⵜⵎⵉⵣⴰⵔ ⵢⴰⴹⵏⵉ ⵣⵓⵏ ⵉⵕⵓⵎⵉⵏ ⵣⵓⵏ ⵉ ⵜⵎⵉⵣⴰⵔ ⵏ ⵍⵇⵇⴱⵍⵜ (ⵍⵄⵉⵕⴰⵇ, ⵍⵓⵕⴹⵓⵏ ...) ⵜⵉⵍⵉ ⵓⵍⴰ ⴳ ⵜⵎⵉⵣⴰⵔ ⵏ ⴰⵙⵢⴰ ⵜⴰⵏⴰⵎⵎⴰⵙⵜ, ⵎⴰⵢⴰⴷ ⴰⵔ ⵉⵜⵜⵉⵏⵉ ⵢⴰⵏ ⵡⴰⵡⴰⵍ, ⴰⴼⴳⴰⵏ ⵉⴳⴰ ⵢⴰⵏ ⵜⵓⵙⵙⵏⴰ ⵜⴳⴰ ⵢⴰⵜ.

ⵜⴰⵏⴰⵙⵜ: ⵜⴳⴰ ⵉⵎⵉⵙⵙ ⵉⵜⵜⵢⴰⵅⴷⴰⵎⵏ ⵙⴳ ⵓⵎⵖⵓⵣ ⵏ ⵡⴰⵏⴰⵙ, ⵎⴰⵢⴰⵏⵏ ⴰⴼ ⴰⵙ ⴼⴽⴰⵏ ⵉⵙⵎ ⵏ ⵜⴰⵏⴰⵙⵜ. ⵜⵍⴰ ⵜⴰⵏⴰⵙⵜ ⵢⴰⵏ ⵓⵅⴱⵓ ⵙⴳ ⵉⵣⴷⴷⴰⵔ ⴳ ⵡⴰⵎⵎⴰⵙ ⵏ ⵓⴷⵉⵙ ⵏⵙ, ⴰⵔ ⵜⵜⵉⵙⵔⴰⵙ ⵓⵏⴱⴹⵓ ⴳ ⵡⴰⵎⴰⵏ ⴰⴼⴰⴷ ⴰⴷ ⵙⵔⵙ ⴽⵛⵎⵏ ⵡⴰⵎⴰⵏ, ⵉⵇⵇⴰⵏ ⴰⵙ ⴷ 10 ⵏ ⵜⵓⵙⴷⵉⵙⵉⵏ ⴰⴼⴰⴷ ⴰⴷ ⵜⵄⵎⵎⵕ ⵙ ⵡⴰⵎⴰⵏ. ⴰⵎⴰⵏ ⴰⵔ ⵜⵜⵢⴰⴱⴹⴰⵏ ⴼ ⵉⵎⵣⴷⴰⵖ ⵏ ⵜⵇⵇⴱⵉⵍⵜ ⵙ ⵜⴰⵏⴰⵙⵉⵏ, ⴽⵓ ⵉⴳⵔ ⴰⵔ ⴰⵙ ⴰⴽⴽⴰⵏ ⵓⵟⵟⵓⵏ ⵏ ⵜⴰⵏⴰⵙⵉⵏ ⴷⴰ ⵜ ⵉⵡⴷⴰⵏ ⴳ ⵜⵉⵙⵙⵉ.
ⵜⴰⵡⴰⵍⴰ: ⵜⴳⴰ ⴰⵙⵏⵎⴰⵍⴰ ⵏ ⵎⵉⴷⴷⵏ ⴳ ⵓⵣⵎⵣ ⵏ ⵎⵙⵡⵉ, ⵎⴰⵜⵜⴰ ⵡⴰⴷⴰ ⵉⵔⴰⵏ ⴰⴷ ⵉⵣⵡⴰⵔ ⴷ ⵎⴰⵜⵜⴰ ⵡⴰⴷⴰ ⵉⵔⴰⵏ ⴰⴷ ⵜ ⵉⴹⴼⴰⵕ, ⵡⴰⵍⵍⵉ ⵉⵣⵡⴰⵔⵏ ⴷⴰⵔⵙ ⵜⴰⵡⴰⵍⴰ ⵜⵣⵡⴰⵔ ⵡⴰⵍⵍⵉ ⵜ ⵉⴹⴼⴰⵕⵏ, ⵜⵙⵙⵓⴷⵓ ⵜⵡⴰⵍⴰ ⴰⵔ ⵜⵜⴹⵡⵡⴰⵕ ⵢⴰⵏ ⵙ ⵢⴰⵏ ⴰⵔⵉⴳ ⵣⵔⵉⵏ ⴽⵓⵍⵍⵓ ⴰⵢⵜ ⵓⵙⵓⵏ ⵏⵖ ⴽⵓⵍⵍⵓ ⴰⵜ ⵜⵇⵇⴱⵉⵍⵜ.
ⵜⴰⵇⵇⴱⵉⵍⵜ: ⵏⵖ ⵍⵊⵎⴰⵄⵜ ⵏⵖ ⴰⵇⵇⴱⵉⵍ ⵏⵖ ⴰⵡⴽⴽ ⵉⵎⵍⵍⴰⴽⵏ, ⵜⵙⵎⵓⵏ ⵜⵇⵇⴱⵉⵍⵜ ⵎⵉⴷⴷⵏ ⴰⴽⴽⵯ ⴷⴰ ⵉⵙⵙⵡⴰⵏ ⵙⴳ ⵢⴰⵜ ⵜⵔⴳⵯⴰ, ⵢⴰⵏ ⵓⵔ ⴰⴷ ⵉⵙⵙⵡⴰⵏ ⵓⵔ ⵉⴳⵉ ⵙⴳ ⵜⵇⵇⴱⵉⵍⵜ, ⵏⵖ ⵓⵔ ⵉⴳⵉ ⵙⴳ ⵜⵇⵇⴱⵉⵍⵜ ⵎⴰⵢⴰⵏ ⴰⴼ ⵓⵔ ⴰⴷ ⵉⵙⵙⵡⴰ ⵙⴳ ⵜⵔⴳⵯⴰ ⵏ ⵜⵇⵇⴱⵉⵍⵜ. ⴽⵓ ⵜⴰⵇⵇⴱⵉⵍⵜ ⴰⵔ ⵜⵜⵡⴰⵍⴰ ⵉ ⵢⴰⵜ ⵜⵇⵇⴱⵉⵍⵜ, ⵏⵥⵥⴹⴰⵕ ⴰⴷ ⵏⵉⵏⵉ ⵎⴰⵙ ⵜⴰⵔⴳⵯⴰ ⵜⴳⴰ ⴰⵢⴷⴰ ⴰⵎⴳⵔⵓ.^[1]

ⴰⵅⵍⴰⵍ: ⵉⴳⴰ ⵢⴰⵏ ⵉⵎⵉⵙⵙ ⵉⵜⵜⵢⴰⵡⵙⵙⵎⵔⴰⵙⵏ ⴳ ⵓⵙⵖⴰⵍ ⵏ ⵡⴰⵎⴰⵏ ⵏ ⵜⴼⵕⴹⵉⵜ, ⵉⴽⴽⴰⴷ ⵉⵙⵎ ⵏⵙ ⴰⵅⵍⴰⵍ ⵏ ⵜⴰⵢⵢⵏⵉⵡⵜ ⵎⵉⵏⵣⵉ ⴰⵔ ⵉⵜⵜⵢⴰⵡⵅⴷⴰⵎ ⵙⴳⵉⵙ, ⵎⴰⵛⵛ ⵉⵥⴹⴰⵕ ⴰⴷ ⵉⵜⵜⵢⴰⵡⵙⴽⴰⵔ ⵙⴳ ⵓⴽⵛⵛⵓⴹ ⵏ ⴽⵔⴰ ⵏ ⵜⴰⴷⴷⴰⴳⵜ ⵢⴰⴹⵏⵉ ⵣⵓⵏ ⴰⵣⵎⵎⵓⵔ.

ⴰⵅⵍⴰⵍ ⴳ ⵍⵡⴰⵃⵜ ⵏ ⵜⴳⵎⵓⵜ, 2006
ⴰⵙⵙⵎⵔⵙ ⵏ ⵓⵅⵍⴰⵍ, ⵍⵡⴰⵃⵜ ⵏ ⵜⴳⵎⵓⵜ, 2006

ⴰⵙⵎⵔⵙ ⴷ ⵜⵙⵎⵓⵔⵜ ⵏ ⵡⴰⵎⴰⵏ

ⴰⵙⵙⵎⵔⵙ ⴷ ⵜⵙⵎⵓⵔⵜ ⵏ ⵡⴰⵎⴰⵏ ⵣⵓⵏ ⴰⴽⴽⵯ ⵉⵖⵔⴼⴰⵏ, ⵉⵎⵖⵔⵉⴱⵉⵏ ⴰⵔ ⵙⵉⵙⵏ ⵙⵙⵡⴰⵏ ⵏⵖ ⴰⵔ ⵜⵏ ⵙⵙⴰⵏ ⵏⵓⵜⵏⵉ ⴷ ⵉⵎⵓⴷⴰⵔ ⵏⵙⵏ. ⵜⴰⵖⴰⵔⴰⵙⵜ ⵓⵔ ⴳⵉⵙ ⴽⵔⴰ ⵏ ⵓⵎⵣⴰⵔⴰⵢ ⵉⴳⴳⵓⴷⵉⵏ ⵉⵏⴳⵔ ⵜⴰⵙⴳⵉⵡⵉⵏ ⵏ ⵍⵎⵖⵔⵉⴱ ⴰⵔ ⵜⵏ ⵙⵙⵎⵔⴰⵙⵏ ⵙ ⵢⴰⵜ ⵜⵖⴰⵔⴰⵙⵜ. ⴳ ⵎⵙⵡⵉ ⵏ ⵉⴳⵔⴰⵏ, ⴰⵔ ⴷ ⵜⵜⵎⵓⴷⴷⵓⵏ ⵡⴰⵎⴰⵏ ⵙⴳ ⵡⴰⵙⵉⴼ ⴰⵔ ⵉⴳⵔⴰⵏ ⵙⴳ ⵓⴳⴳⵓⴳ, ⵜⴰⵔⴳⵯⴰ, ⴰⵙⴰⵔⵓ ⵙ ⵓⵙⴼⵙⵉ ⵉⵍⵎⴰ ⴽⵛⵎⵏ ⵙ ⵉⴳⵔ, ⴰⴼⴰⴷ ⴰⴷ ⵙⵔⵙⵏ ⵙⵙⵓⵏ ⵜⴰⴷⴷⴰⴳⵉⵏ ⵏⵖ ⵜⴰⴷⴷⴰⴳⵉⵏ ⴷ ⵡⴰⴽⴰⵍ ⵉⴳ ⴳⵉⵙ ⴽⵔⴰ ⵏ ⵜⵓⴳⴰ ⵣⵓⵏ ⴰⵎⵣⴳⵓⵔ, ⵉⵔⴷⵏ, ⵜⵉⵎⵥⵉⵏ ⵏⵖ ⴽⵔⴰ ⵏ ⵡⴰⵏⴰⵡ ⵢⴰⴹⵏⵉ. ⴰⵙⵙⵎⵔⵙ ⵢⴰⴹⵏⵉ ⵉⴳⴰⵜ ⵜⵉⵙⵙⵉ ⵏ ⵓⴼⴳⴰⵏ ⴷ ⵉⵎⵓⴷⴰⵔ, ⴰⴼⴳⴰⵏ ⴰⵔ ⴷ ⵜⵜⴰⵡⵉⵏ ⴰⵎⴰⵏ ⵙⴳ ⵓⵖⴱⴰⵍⵓ (ⵍⵄⵉⵏ) ⵏⵖ ⵙⴳ ⵡⴰⵙⵉⴼ ⴰⵔ ⴷ ⵜⵏⵉⴷ ⵜⵜⴰⵡⵉⵏ ⵙ ⵜⴰⴷⴷⴰⵔⵜ ⴰⵊⵊⵉⵏⵜⵏ ⴰⵔⵉⴳ ⵎⵎⵣⴷⴰⴳⵏ ⴳ ⵖⵓⵙⵏ ⵉⵍⵎⴰ ⴰⵔ ⵙⴳⵉⵙⵏ ⵙⵙⴰⵏ, ⴰⵛⴽⵓ ⴽⵔⴰ ⵙ ⵎⴰⵟⵍⵏ ⵡⴰⵎⴰⵏ ⴳ ⵜⴰⴷⴷⴰⵔⵜ ⴰⵔ ⵉⵜⵜⴰⴳⴳⵣ ⵡⴰⵔⵔⴰⵙ ⵙ ⵉⵣⴷⴰⵔ ⵏ ⵓⴳⴷⵓⵔ ⵏⵖ ⵏ ⵜⵉⵅⵉⴱⵉⵜ. ⴰⵙⵙⵎⵔⵙ ⵡⵉⵙⵙ ⴽⵕⴰⴹ ⵉⴳⴰⵜ ⴰⵙⵉⵔⴷ, ⴰⵔ ⵙⵙⵉⵔⵉⴷⵏ ⵎⵉⵙⴷⴷⵏ ⵙ ⵡⴰⵎⴰⵏ, ⴰⵔ ⵙⵙⵉⵔⵉⴷⵏ ⵉⴼⵛⴽⴰⵏ ⵏ ⵓⵏⵡⴰⵍ ⵏⵖ ⵉⵃⵔⵓⵢⵏ ⴷⴰ ⵍⵙⵙⴰⵏ.

ⵜⵉⵙⵙⵉ ⵏ ⵉⴳⵔⴰⵏ

ⴰⵙⵙⵎⵔⵙ ⴰⵎⵣⵡⴰⵔⵓ ⵏ ⵡⴰⵎⴰⵏ ⴳ ⵍⵎⵖⵔⵉⴱ ⵜⴳⴰⵜ ⵜⵉⵙⵙⵉ ⵏ ⵉⴳⵔⴰⵏ ⵎⵉⵏⵣⵉ ⴰⵔ ⴼⵍⵍⴰⵙ ⵜⵜⵄⵎⵎⴰⴷⵏ ⵎⵉⴷⴷⵏ ⴳ ⵜⵓⴷⵔⵜ ⵏⵏⵙⵏ ⴰⴼⴰⴷ ⴰⴷ ⵙⵢⴰⴼⴰⵏ ⵓⵜⵜⵛⵉ ⵏⵏⵙⵏ ⴷ ⵓⵜⵜⵛⵉ ⵏ ⵉⵎⵓⴷⴰⵔ ⵏⵏⵙⵏ.

ⵜⵉⵙⵙⵉ ⵏ ⵉⵎⵓⴷⴰⵔ

ⴰⵎⴰⵏ ⴳⴰⵏ ⵜⴰⴼⴰⴷⴰ ⵜⴰⵎⵇⵇⵕⴰⵏⵜ ⵏ ⵜⵓⴷⵔⵜ, ⵓⵔ ⵥⴹⴰⵕⵏ ⵉⵎⵓⴷⴰⵔ ⴰⴷ ⴷⴷⵔⵏ ⵡⴰⵔ ⴰⵎⴰⵏ. ⵜⵓⴷⵔⵜ ⵏ ⵓⴼⴳⴰⵏ ⵜⵣⴷⵉ ⵙ ⵉⵎⵓⴷⴰⵔ ⴷ ⵉⴳⵔⴰⵏ ⵏⵙ, ⵏⵓⵜⵏⵉ ⴰⴷ ⵉⵜⵜⴰⴷⴷⵊⴰⵏ ⴰⴼⴳⴰⵏ ⴰⴷ ⵉⵎⵎⵓⴷⴷⵓ ⵙⴳ ⵜⵎⴰⵣⵉⵔⵜ ⵙ ⵜⴰⵢⵢⴰⴹ ⴰⴼⴰⴷ ⴰⴷ ⴰⵙⵏ ⵢⴰⴼ ⴰⵎⴰⵏ ⴷ ⵜⵓⴳⴰ. ⴳ ⵉⵣⵎⴰⵣ ⵣⵡⴰⵔⵏⵉⵏ ⵉⴳⴳⵉ ⵏ ⵡⴰⴽⴰⵍ, ⵉⴷⴷⵔ ⵓⴼⴳⴰⵏ ⵡⴰⵔ ⵜⴰⴷⴷⴰⵔⵜ ⵡⴰⵔ ⵜⴰⵎⴰⵣⵉⵔⵜ, ⴰⵔ ⵉⵜⵜⵉⴹⴼⵓⵕ ⴰⵎⴰⵏ ⴷ ⵜⵓⴳⴰ ⵉⵏⵏⴰ ⴳ ⵍⵍⴰⵏ.

ⵉⵎⵓⴷⴰⵔ ⴳⴰⵏ ⵙⴳ ⵉⵡⵜⵜⴰⵙⵏ ⵏ ⵜⵓⴷⵔⵜ ⵜⴰⴷⴰⵎⵙⴰⵏⵜ ⵏ ⵓⴼⴳⴰⵏ, ⵎⴰⵢⴰⴷⴷ ⴰⴷ ⵜ ⵉⵜⵜⴰⴷⵊⴰⵏ ⴰⴷ ⵉⵙⵉⴳⴳⵉⵍ ⴰⵎⴰⵏ ⵉ ⵉⵅⴼ ⵏⵙ, ⵉⵙⵉⴳⴳⵍⵉⵏ ⵉ ⵉⵎⵓⴷⴰⵔ ⵏⵙ.

ⵜⵉⵙⵙⵉ ⵏ ⵓⴼⴳⴰⵏ

ⴰⴼⴳⴰⵏ ⴰⵡⴷ ⵏⵜⵜⴰ ⵉⵙⵖⴰⵡⵙⴰ ⵙ ⵡⴰⵎⴰⵏ ⵉ ⵜⴰⵙⵓⵍⵜ ⵏ ⵜⵓⴷⵔⵜ ⵏⵙ, ⵓⵔ ⴰⴷ ⵉⵙⵙⴰ ⵓⴼⴳⴰⵏ ⵙⴳ ⵓⵖⴱⴰⵍⵓ ⵉⵏⵏⴰ ⵓⴽⴰⵏ ⵉⴳⴰ, ⴰⵔ ⵉⵙⵖⴰⵡⵙⴰ ⵙ ⵡⴰⵎⴰⵏ ⵉⵎⵣⴷⴰⴳⵏ ⵣⵓⵏ ⴷ ⴰⵎⴰⵏ ⵏ ⵉⵖⴱⵓⵍⴰ ⴷ ⵡⴰⵎⴰⵏ ⵏ ⵓⵏⴰ.