ⴰⵃⵡⴰⵛ ⵏ ⵉⵃⴰⵃⴰⵏ ⵏ ⵜⵎⴰⵏⴰⵔ
| ⴰⵃⵡⴰⵛ ⵏ ⵉⵃⴰⵃⴰⵏ ⵏ ⵜⵎⴰⵏⴰⵔ | |
|---|---|
| ⴰⵃⵡⴰⵛ ⵏ ⵉⵃⴰⵃⴰⵏ | |
 | |
| ⵓⵎⵍⴰⵏ ⵅⴼ ⵜⵥⵓⵕⵉ | |
| ⴰⵏⴰⵡ ⵏ ⵜⵥⵓⵕⵉ | ⴰⴱⵍⴷⵉ |
| ⵜⴰⵎⵓⵔⵜ | ⵍⵎⵖⵔⵉⴱ |
| ⵜⴰⵎⵏⴰⴹⵜ | ⵉⵃⴰⵃⴰⵏ |
| ⴰⵥⵓⵕ ⴰⴷⵍⵙⴰⵏ | ⵜⴰⵥⵓⵕⵉ ⵜⴰⵎⴰⵣⵉⵖⵜ |
| ⵉⵎⴰⵙⵙⵏ | ⵜⴰⵍⵍⵓⵏⵜ, ⵜⴰⵎⵊⴰ (ⵍⵄⵡⵡⴰⴷ), ⵏⵏⴰⵇⵓⵙ |
| ⵉⵎⵓⵔⴰⵔⵏ | ⵉⵔⴳⴰⵣⵏ |
| ⵜⵉⵥⵓⵕⵉⵡⵉⵏ ⵙⵔⵙ ⵉⵣⴷⵉⵏ | ⴰⵃⵡⴰⵛ, ⴰⵀⵢⵢⴰⴹ, ⵜⴰⵥⵓⵕⵉ ⵏ ⵜⵕⵕⵓⵢⵙⴰ |
ⵙⵏⴼⵍ ⴰⵙⴰⴳⵎ - ⵙⵏⴼⵍ  | |
ⴰⵃⵡⴰⵛ ⵏ ⵉⵃⴰⵃⴰⵏ ⵏ ⵜⵎⴰⵏⴰⵔ ⵏⵖ ⵎⴽⵍⵍⵉ ⵙ ⵉⵜⵜⵢⵓⵙⵙⴰⵏ ⴳ ⵓⵎⵣⵔⵓⵢ ⵙ ⵓⵃⵡⴰⵛ ⵏ ⵉⴷⴰ ⵓ ⴳⵍⵍⵓⵍ, ⵉⴳⴰ ⵢⴰⵜ ⵜⵥⵓⵕⵉ ⵏ ⵓⴼⵕⵕⵊ ⵏⵖ ⵜⴰⵥⵓⵕⵉ ⵜⴰⵏⵙⴷⵔⵓⵔⵎⵜ ⵜⴰⴳⵔⴰⵡⴰⵏⵜ ⵜⴰⵎⴰⵣⵉⵖⵜ ⵜⴰⵎⵖⵔⵉⴱⵉⵜ, ⵜⴻⵜⵜⵢⵓⵙⵙⴰⵏ ⴱⴰⵀⵔⴰ ⵜⵥⵓⵕⵉ ⴰⴷ ⴳ ⵜⵇⴱⵉⵍⵉⵏ ⵏ ⵉⵃⴰⵃⴰⵏ (ⴳⵔ ⵎⵓⴳⴰⴷⵓⵔ ⴷ ⵓⴳⴰⴷⵉⵔ). ⴰⵔ ⵜⵙⵎⵓⵏⴰ ⵜⵥⵓⵕⵉ ⴰⴷ ⴳⵔ ⵓⴷⵔⴰⵣ ⵉⵜⵜⵡⴰⵙⵓⴷⵙⵏ, ⴷ ⵡⴰⵏⵢⴰ ⴰⵎⵥⴰⵡⴰⵏ, ⴷ ⵜⵎⵍⵙⴰ ⵜⵉⵎⵙⵢⵉⵡⵏⵉⵏ, ⴷ ⴰⵔ ⵜⵎⵎⴰⵍ ⵜⵥⵓⵕⵉ ⴰⴷ ⵜⴰⵢⵙⵉ ⵜⴰⴷⵍⵙⴰⵏⵜ ⴷ ⵜⵎⵣⵔⴰⵢⵜ ⵏ ⵜⵇⴱⵉⵍⵉⵏ ⵏ ⵉⵃⴰⵃⴰⵏ ⴷ ⵓⵎⵢⴰⵡⴰⵙ ⴳⵔⴰⵜⵙⵏⵜ. ⵉⴳ ⵓⵃⵡⴰⵛ ⵏ ⵜⵎⴰⵏⴰⵔ ⵙⴳ ⵡⴰⵏⴰⵡⵏ ⵏⵏⵙ ⵏⵏⴰ ⴱⴰⵀⵔⴰ ⵉⵜⵜⵢⵓⵙⵙⴰⵏⵏ ⴷ ⵡⵉⴷ ⵍⵍⵉ ⴱⴰⵀⵔⴰ ⴼⵓⵍⴽⵉⵏⵉⵏ ⵙ ⵓⵙⵏⵎⴰⵍⴰ ⵏⵏⵙ ⵓⵏⵖⵉⴷ. ⴳ ⵓⵙⴳⴳⵯⴰⵙ ⵏ 2022, ⵜⴻⵜⵜⵡⴰⵙⵙⴽⵛⵎ ⵙ ⵜⵍⴳⴰⵎⵜ ⵏ ⵜⴰⵢⵙⵉ ⵜⴰⴷⵍⵙⴰⵏⵜ ⵜⴰⵔⴽⵎⴰⵎⵜ ⵜⴰⵏⴰⵎⵓⵔⵜ ⴳ ⵍⵎⵖⵔⵉⴱ.[1]
ⵜⵉⵎⵥⵍⴰⵢ ⴷ ⵉⴼⵔⴷⴰⵙ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⴰⵎⵢⴰⵏⴰⵡ ⴷ ⵡⴰⵏⴰⵡⵏ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵉⵜⵜⵓⴱⴹⴰ ⵓⵃⵡⴰⵛ ⵏ ⵉⵃⴰⵃⴰⵏ ⵖⴼ ⵡⴰⵏⴰⵡⵏ ⵉⵎⵥⵢⴰⵏⵏ ⵉⵎⵢⴰⵍⵍⴰⵏ ⵙ ⵓⵎⵢⴰⵍⵍⴰ ⵏ ⵙⵉⵏ ⴷ ⵎⵔⴰⵡ ⵏ ⵜⵇⴱⵉⵍⵉⵏ ⴳ ⵜⵎⵏⴰⴹⵜ. ⴷ ⴰⵔ ⵜⵜⵓⵎⴰⵏⵏ ⵉⵎⵣⴰⵔⴰⵢⵏ ⴰⴷ ⴳ ⵡⴰⵏⵢⴰ, ⴷ ⵉⵜⵜⵡⴰⵥⵍⴰⵢ "ⴰⵃⵡⴰⵛ ⵏ ⵜⵎⴰⵏⴰⵔ" ⵙ ⵢⴰⵏ ⵡⴰⵏⵢⴰ ⵉⵥⵥⴰⵢⵏ ⵉⵜⵜⵢⴰⵡⵙⵙⴰⵏⵏ ⵙ "ⴹⴹⵕⴱ ⵉⵥⵥⴰⵢⵏ", ⴳ ⵜⵉⵣⵉ ⵍⵍⵉⴳ ⴰⵔ ⵙⵙⵎⵔⴰⵙⵏⵜ ⵜⵎⴰⵏⴰⴹⵉⵏ ⵢⴰⴹⵏⵉⵏ ⴰⵏⵢⴰⵜⵏ ⵍⵍⵉ ⵎⵉ ⵜⵜⵉⵏⵉⵏ "ⴹⴹⵕⴱ ⵉⵣⵔⴱⵏ" ⴷ ⵙⵙⴽⵛⵎⵏ ⴷ ⵙ ⵓⵃⵡⴰⵛ ⵏⵏⵙⵏ ⵉⵎⵉⵙ ⵏ "ⵟⴰⵎⵟⴰⵎ" ⴷ "ⵛⵛⴼⵏⴰ" ⵍⵍⵉ ⵜ ⵉⵏⵏ ⴰⴽⴽⵯ ⵓⵔ ⵉⴽⴽⵉⵏ ⴰⴷⵍⵍⵉ ⴳ ⵓⵃⵡⴰⵛ ⵏ ⵉⵃⴰⵃⴰⵏ ⵏ ⵖⴰⴷ ⵉⵣⵔⵉⵏ. ⴷ ⴰⵡⴷ ⴰⵔ ⵉⵜⵜⵓⵎⴰⵏ ⵓⵢⴰⵏⵏ ⴳ ⵜⵎⵍⵙⴰ ⵍⵍⵉⴳ ⴰⵔ ⵍⵙⵙⴰⵏ ⵉⵎⵃⵓⵡⵛⵏ ⵏ ⵜⵎⴰⵏⴰⵔ ⵜⵉⵎⵍⵙⴰ ⵜⵉⵎⵍⵍⴰⵍⵉⵏ ⵉⵎⵎⵔⵡⴰⵙⵏ ⴷ ⵓⴷⵓⴽⵓ ⵓⵎⵍⵉⵍ, ⴳ ⵜⵉⵣⵉ ⵍⵍⵉⴳ ⴰⵔ ⵙⵙⵎⵔⴰⵙⵏⵜ ⵜⵎⴰⵏⴰⴹⵉⵏ ⵢⴰⴹⵏⵉⵏ ⵉⴽⵯⵍⴰⵏ ⵉⵎⵣⴰⵔⴰⵢⵏ. ⴷ ⴰⵡⴷ ⴳ ⵜⴽⵓⵎⵎⵉⵢⵜ/ⵍⴽⵎⵎⵉⵢⵜ, ⵍⵍⵉ ⴳ ⴰⵔ ⵉⵜⵜⵎⵣⴰⵔⴰⵢ ⵓⴽⵍⵓ ⵏ ⵢⵉⴼⵉⵍⵓ ⵏ ⵜⴽⵓⵎⵎⵉⵢⵜ, ⴷ ⴰⵔ ⵉⵜⵜⴳⴳⴰ ⴰⴱⵔⴽⴰⵏ ⴷⴰⵔ ⵉⵎⵃⵓⵡⵛⵏ ⴰⴽⴽⵯ ⴳ ⵜⵎⴰⵏⴰⵔ, ⴷ ⴰⵣⴳⴳⵯⴰⵖ ⴷ ⵓⵣⴳⵣⴰⵡ ⴳ ⵜⵎⴰⵏⴰⴹⵉⵏ ⵢⴰⴹⵏⵉⵏ. ⴷ ⴰⴷ ⵓⵔ ⵏⵜⵜⵓ ⵎⴰⵙ ⵎⵎⵔⵡⴰⵙⵏ ⴳ ⴽⵔⴰ ⵏ ⵜⵖⴰⵡⵙⵉⵡⵉⵏ ⵢⴰⴹⵏ ⵣⵓⵏ ⴷ ⵜⵉⵍⴰⵍⵜ ⵏ ⵜⵎⵖⴰⵔⵉⵏ, ⵍⵍⵉ ⵓⵔ ⵉⴽⵛⵛⵓⵎⵏ ⵉ ⵓⵃⵡⴰⵛ ⵏ ⵉⵔⴳⴰⵣⵏ ⴷ ⵉⵜⵜⵓⵥⵍⴰⵢ ⴰⵙⵏ ⵓⵃⵡⴰⵛ ⵏⵏⵙⵏ ⵓⵙⵍⵉⴳ ⵍⵍⵉ ⵜ ⵉⴳⴰⵏ ⴷ "ⴰⵃⵡⴰⵛ ⵏ ⵜⵎⵖⴰⵔⵉⵏ".
ⴰⵃⵡⴰⵛ ⵏ ⵉⵃⴰⵃⴰⵏ ⵏ ⵜⵎⴰⵏⴰⵔ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⴰⵃⵡⴰⵛ ⵏ ⵜⵎⴰⵏⴰⵔ ⵉⵍⴰ ⵢⴰⵏ ⵡⴰⴷⴷⵓⵔ ⴱⴰⵀⵔⴰ ⵉⵅⴰⵜⵔⵏ ⴳ ⵜⵇⴱⵉⵍⵜ ⵏ ⵉⵃⴰⵃⴰⵏ ⴰⵛⴽⵓ ⵢⵓⵎⵥ ⵓⴽⴰⵏ ⵙⵓⵔ ⴳ ⵓⵃⵡⴰⵛ ⴰⵥⵖⵓⵕⴰⵏ ⵏ ⵜⵇⴱⵉⵍⵉⵏ ⵏ ⵉⵃⴰⵃⴰⵏ. ⴷ ⵡⴰⴷⴷⵓⵔ ⴰⴷ ⵍⵍⵉ ⵉⵍⵍⴰⵏ ⴷⴰⵔ ⵓⵃⵡⴰⵛ ⵏ ⵜⵎⴰⵏⴰⵔ ⵉⴽⴽⴰ ⴷ ⵜⴰⴱⵔⵉⴷⵜ ⵏ ⵜⵎⵙⴽⵔⵜ ⵏⵏⵙⵏ. ⴷ ⵎⴽⵍⵍⵉ ⵙ ⵉⵜⵜⵢⵓⵙⵙⴰⵏ ⴳ ⵜⵎⴰⵏⴰⵔ ⵎⴰⵙ ⴷ ⴽⴽⴰⵏⵜ ⵜⵎⵙⴽⵉⵔⵉⵏ ⴰⴷ ⵜⴰⵎⵓⵣⴰⵢⵜ ⴷ ⵓⴼⵓⴽⵙ ⵏ ⵕⵕⴰⵢⵙ ⴷ ⵓⵙⵏⵎⴰⵍⴰ ⴷ ⵓⵙⵡⵓⴷⴷⵓ ⵏⵏⵙ ⵉⵥⵉⵍⵏ ⵉ ⵜⵔⴰⴱⴱⵓⵜ. ⴷ ⵜⵔⴰⴱⴱⵓⵜ ⴰⴷ ⵜⵍⵍⴰ ⴳⵉⵙ ⵜⵓⴳⴷⵜ ⵏ ⵜⴳⵔⵓⵎⵎⴰ, ⴽⵓ ⵢⴰⵜ ⵜⵍⵍⴰ ⵖⵓⵔⵙ ⵜⵡⵓⵔⵉ ⵏⵏⵙ:
ⵜⴰⵔⴰⴱⴱⵓⵜ ⵏ ⵡⵓⴳⴳⵓⴳ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵜⴰⵔⴰⴱⴱⵓⵜ ⴰⴷ ⴰⵔ ⴳⵉⵙ ⵜⴻⵜⵜⵉⵍⵉⵏ ⵉⵎⵃⵓⵡⵛⵏ ⵍⵍⵉ ⵉⵙⴽⴰⵔⵏ ⵢⴰⵏ ⵡⴰⴷⵓⵔ ⵉⴳⴰⴷⴷⴰⵏ, ⴷ ⴰⵔ ⴳⵉⵙ ⵜⴻⵜⵜⵉⵍⵉⵏ ⵓⴳⴳⴰⵔ ⵏ ⵙⵉⵎⵔⴰⵡ ⵏ ⵓⵎⵃⵓⵡⵛ. ⵜⴻⵜⵜⵡⴰⵙⵙⴰⵏ ⵜⵔⴰⴱⴱⵓⵜ ⴰⴷ ⵙ ⵓⵎⵙⴰⵙⴰ ⵏ ⵉⵎⵓⵙⵙⵓⵜⵏ ⵏⵏⵙ. ⴷ ⴰⵔ ⵉⵜⵜⵉⵏⵉ ⵓⵙⵍⵎⴰⴷ ⵎⵓⵃⵎⵎⴰⴷ ⴼⴰⵔⵉⵙ ⵎⴰⵙ ⴷ ⴰⵎⵓⵙⵙⵓ ⵏ ⵉⴹⴰⵕⵏ ⵉⵔⵡⴰⵙ ⴰⵎⵓⵙⵙⵓ ⵏ ⵉⵙⴰⵏ ⵍⵍⵉ ⵉⴳⴰⵏ ⴰⵎⵔⵉⴳ ⵏ ⵉⵎⵏⴰⵢⵏ ⴳ ⵓⵎⵏⵖⵉ. ⴳ ⵢⴰⵜ ⵜⵓⴳⴳⴰ ⵏ ⵕⵕⴰⵢⵙ ⵏ ⵜⵔⴰⴱⴱⵓⵜ ⵏ ⵓⵃⵡⴰⵛ ⵜⵎⴰⵏⴰⵔ, ⵉⵙⴰⵡⵍ ⴳⵉⵙ ⵖⴼ ⵉⵎⵓⵙⵙⵓⵜⵏ ⴰⴷ ⵍⵍⵉ ⵎⵉ ⵉⵜⵜⵉⵏⵉ ⵉ ⴽⵔⴰ ⴳⵉⵜⵙⵏ "ⵉⵄⴰⵡⴷⵏ", ⴷ ⵍⵍⵉ ⵉⴳⴰⵏ ⵜⵉⴷⵓⴳⴰⵎⵉ (ⵉⵙⵎⴰⵍⵏ ⵙ ⵉⴹⵓⴹⴰⵏ) ⵏ ⵕⵕⴰⵢⵙ. ⴷ ⴰⵔ ⵜⵜⵢⵓⴱⴹⴰⵏ ⵉⵄⴰⵡⴷⵏ ⴰⴷ ⵖⴼ ⴽⵕⴰⴹ ⵉⴳⵣⵎⴰⵏ; ⵄⴰⵡⴷ ⵏ 6, ( ⵍⵍⵉ ⵉⵜⵜⵢⵓⵙⵙⴰⵏⵏ ⵙ ⴽⵕⴰⴹ ⵉⵎⵓⵙⵙⵓⵜⵏ: ⴰⵎⵣⵡⴰⵔⵓ ⵉⴳⴰ ⵜ 6 ⵏ ⵜⵉⵢⵢⴰⵜ ⵏ ⵓⴹⴰⵕ ⵙ ⵢⴰⵜ ⵜⴽⴽⵍⵜ; ⵜⵉⵙ ⵙⵏⴰⵜ 6 ⵏ ⵉⵄⵡⴰⴷⵏ, ⴰⴳⵏⵙⵓ "ⵜⵙⵏⵓⵎⴽ 6 ⵏ ⵜⵉⵢⵢⴰⵜ ⵏ ⵓⴹⴰⵕ ⵙ ⵜⵖⵔⴷⵉⵏ"/ⴱⵕⵕⴰ "ⵜⵙⵏⵓⵎⴽ 6 ⵏ ⵜⵢⵜⵉ ⵏ ⵓⴹⴰⵕ ⵙ ⴷⴰⵜ"; ⵜⵉⵙ ⴽⵕⴰⴹⵜ 6 ⵏ ⵉⵄⵡⴰⴷⵏ ⴷ ⵓⴷⵔⴰⵣ). ⵉⵍⵎⵎⴰ ⵄⴰⵡⴷ ⵏ 9, ⴷ ⴳ ⵜⴳⵉⵔⴰ 12 ⵏ ⵉⵄⵡⴰⴷⵏ ⵙ ⵜⵢⵜⵉ ⵏ ⵓⴹⴰⵕ. ⴷ ⴰⵡⴷ ⴰⵔ ⵏⵜⵜⴰⴼⴰ ⵎⴰⵙ ⵉⵍⵍⴰ ⵓⵎⵓⵙⵙⵓ ⵏ "ⴰⵊⵖⴰⵢⵎⵉ", ⵉⵜⵜⵡⴰⵙⵙⴰⵏ ⵙ ⵡⴰⵏⵢⴰ ⵏⵏⵙ ⵉⵔⵡⵉⵏ (Compliqué), ⴷ ⴰⵔ ⵉⵙⵙⵏⵜⵉ ⵙ ⴽⵕⴰⴹⵜ ⵜⵉⵢⵢⴰⵜ ⵜⵉⵎⵢⴰⴹⴼⴰⵕⵉⵏ ⵙ ⵓⴹⴰⵕ ⴰⴼⴰⵙⵉ ⴷ ⵉⴹⴼⵕ ⵜⵏⵜ ⴷ ⵙⵏⴰⵜ ⵜⵉⵢⵢⴰⵜ ⵙ ⵓⴹⴰⵕ ⴰⵥⵍⵎⴰⴹ, ⵉⵍⵎⵎⴰ ⵜⴹⴼⵕ ⵜⵏⵜ ⴷ ⵙⵏⴰⵜ ⵜⵉⵢⵢⴰⵜ ⵜⵉⴼⴰⵙⵉⵢⵉⵏ (ⵙ ⵓⴼⴰⵙⵉ) ⴷ ⵙ ⵓⴹⴰⵕ ⴰⵥⵍⵎⴰⴹ ⵙⵏⴰⵜ ⵜⵉⵢⵢⴰⵜ ⴷ ⴰⵔ ⵉⵜⵜⴳⵓⵔⵓ ⵓⵎⵓⵙⵙⵓ ⴰⴷ ⵙ ⵙⵏⴰⵜ ⵜⵉⵢⵢⴰⵜ ⵜⵉⴼⴰⵙⵉⵢⵉⵏ, ⴹⴰⵕⵜ ⵏⵏⵙⵏⵜ ⴰⵔ ⴷ ⵉⵜⵜⵙⴼⴼⴰⵖ ⵓⵎⴷⵔⴰⵣ ⴰⴹⴰⵕ ⵏⵏⵙ ⴰⴼⴰⵙⵉ ⵙ ⴷⴰⵜ, ⴷ ⵢⵓⵡⵜ ⵙⵔⵙ ⵙⵏⴰⵜ ⵜⵡⴰⵍ ⴷ ⴰⵔ ⵜ ⵉⵙⵙⵓⵔⵔⵉⵢ ⵙ ⵜⵖⵔⴷⵉⵏ ⵙ ⵙⵏⴰⵜ ⵜⵉⵢⵢⴰⵜ ⵉⵎⵢⴰⴹⴼⴰⵕⵏ, ⴷ ⴰⵔ ⵉⵜⵜⵎⵓⵜⵜⵉ ⵉⵍⵎⵎⴰ ⵙ ⴰⴷ ⵉⵙⴼⴼⴰⵖ ⴰⴹⴰⵕ ⵏⵏⵙ ⴰⵥⵍⵎⴰⴹ ⵙ ⴷⴰⵜ, ⴷ ⴰⵔ ⵙⵉⵙ ⵉⴽⴽⴰⵜ ⵙⵏⴰⵜ ⵜⵡⴰⵍ ⴷ ⴰⵔ ⵜ ⵉⴷ ⵉⵙⴼⴼⴰⵖ ⵙ ⴷⴰⵜ, ⴷ ⴰⵔ ⵙⵉⵙ ⵉⴽⴽⴰⵜ ⵙⵏⴰⵜ ⵜⵉⵢⵢⴰⵜ, ⵉⵍⵎⵎⴰ ⴰⵔ ⵉⵜⵜⵓⵔⵔⵉ ⵙ ⴷⴼⴼⵉⵔ, ⴷ ⴰⵔ ⵉⴽⴽⴰⵜ ⵙ ⵓⴹⴰⵕ ⵏⵏⵙ ⵙⵏⴰⵜ ⵜⵉⵢⵢⴰⵜ... ⴷ ⴰⵔ ⵉⵜⵜⵉⵍⵉ ⵡⴰⵍⴰⵙ ⵏ ⵡⴰⵏⵢⴰ ⴰⴷ ⵙ ⵜⴼⵙⵙⵉ, ⴰⴽⴷ ⵓⵎⵙⴰⵙⴰ ⴷ ⵓⵡⵇⵇⵔ ⵏ ⵡⴰⴷⵓⵔ ⴳ ⵜⵉⴳⴳⵉ ⵏ ⵓⵎⵓⵙⵙⵓ.
ⴰⵢⵍⵍⵉ ⵉⵥⵍⵉⵏ ⴰⵎⵓⵙⵙⵓ ⴰⴷ ⵏ ⵓⵊⵖⴰⵢⵎⵉ ⵉⴳⴰ ⵜ ⵡⴰⵏⵢⴰ ⵏⵏⵙ ⵉⵎⵓⵏⵏ ⴷ ⵉⵜⵜⵙⵓⴷⵙⵏ, ⴷ ⵓⵎⵉⵙⵉ/ⵜⵎⵏⴽⵏⵉⵜ ⴳⵔ ⵜⴰⴳⴳⴰⵍⵜ ⵏ ⵜⴼⴽⴽⴰ ⴷ ⵓⵏⵖⴰⴷ ⵏ ⵓⵙⵏⴼⵍⵓⵍ. ⴷ ⴰⵔ ⵉⵜⵜⵉⵔⵉ ⵓⵎⵓⵙⵙⵓ ⵢⴰⵏ ⵓⵙⵏⵜⵓ ⵢⴰⵜⵜⵓⵢⵏ ⴷ ⵓⴼⵔⴰⵢ ⴰⵎⵥⴰⵡⴰⵏ ⴰⵎⵣⵡⴰⵔⵓ/ⴰⵎⵣⵡⵔ, ⴷ ⴱⵍⴰ ⵏⵜⵜⵓ ⴰⵎⵙⴰⵙⴰ ⵏ ⵉⴳⵎⴰⵎⵏ ⵏ ⵜⵔⴰⴱⴱⵓⵜ (ⵉⵎⵃⵓⵡⵛⵏ). ⴷ ⴰⵔ ⵉⵜⵜⵙⵓⵎⵓⵏ ⴰⴼⵓⴽⵙ ⵏ ⵓⵎⴷⵔⴰⵣ (ⵕⵕⴰⵢⵙ) ⴷ ⵓⵏⵛⴽ ⵍⵍⵉ ⵉⴽⴽⴰ ⴳ ⵜⵥⵓⵕⵉ ⴰⴷ ⴷ ⵜⵎⵓⵣⴰⵢⵜ ⵏⵏⵙ ⴳⵉⵙ ⴷ ⵜⵣⵎⵔⵜ ⵏⵏⵙ ⵖⴼ ⴰⴷ ⵉⵎⵙⴰⵙⴰ ⴷ ⵜⵔⴰⴱⴱⵓⵜ ⵏⵖ ⴷ ⴷ ⵓⵎⵙⴰⵙⴰ ⴰⵎⴳⵔⵓ, ⴷ ⵓⵙⴽⴽⵉⵔ/ⵜⵉⴳⴳⵉ ⵏ ⵉⵎⵓⵙⵙⵓⵜⵏ ⵙ ⵜⴱⵔⵉⴷⵜ ⵜⴰⵎⴳⵔⵓⵜ. ⴷ ⵓⵔ ⵉⵍⵍⵉ ⵓⵔⴷⵓ, ⵎⴰⵙ ⴷ ⴰⵎⵓⵙⵙⵓ ⵏ ⵓⵊⵖⴰⵢⵎⵉ ⵉⴳⴰ ⵢⴰⵏ ⵙⴳ ⵉⵎⵓⵙⵙⵓⵜⵏ ⵉⵥⵍⵉⵏ ⵏ ⵓⵃⵡⴰⵛ ⵏ ⵜⵎⴰⵏⴰⵔ, ⵍⵍⵉ ⵜ ⵉⵜⵜⴰⴷⵊⴰⵏ ⴰⴷ ⵉⴳ ⵢⴰⵏ ⵡⴰⵏⴰⵡ ⵉⵥⵍⵉⵏ ⵙ ⵢⵉⵖⴼ ⵏⵏⵙ ⵖⴼ ⵡⴰⵏⴰⵡⵏ ⴰⵏⵏ ⵢⴰⴹⵏⵉⵏ ⵏ ⵓⵃⵡⴰⵛ ⵍⵍⵉ ⴳ ⵉⵃⴰⵃⴰⵏ.
ⴷ ⴰⵔ ⵉⵜⵜⵉⵏⵉ ⵓⵎⵔⵣⵓ ⵓⵙⴰⵎⴰ ⵍⵀⴷⴷⴰⵊ ⵢⴰⵏ ⵙⴳ ⵉⵎⵔⵣⵓⵜⵏ ⴳ ⵢⵉⴳⵔ ⴰⴷ ⵎⴰⵙ ⴷ "ⴰⵎⵓⵙⵙⵓ ⵏ "ⴰⵙⴱⵉⴹⵕ" ⵉⴳⴰ ⴰⵎⵓⵙⵙⵓ ⴰⴼⵓⵀⵔⵉ (ⵏ ⵓⵙⵓⵡⴼ) ⵉ ⵓⴼⵏⴰ ⵏⵖ ⴷ ⵉ ⵓⵙⵏⴳⵓ ⴹⴰⵕⵜ ⵏ ⵜⵕⵥⵉ/ⵜⵔⵉⵔⵉⵜ ⴳ ⵓⵎⵜⵡⵉ". ⴷ ⴽⵓⴷⵏⵏⴰ ⴰⵙⵏ ⵢⴰⴽⴽⴰ ⵕⵕⴰⵢⵙ ⵜⴰⵎⵓⵍⵉ/ⵜⴰⴷⵓⴳⴰⵎⵜ ⴰⴼⴰⴷ ⴰⴷ ⵜⵜ ⵙⴽⵔⵏ, ⴰⵔ ⵉⵜⵜⵍⵀⵓ ⵡⴰⴷⵓⵔ ⵙ ⵜⴽⵏⵉ ⵙ ⵓⵣⴷⴷⴰⵔ, ⵣⵓⵏ ⴷ ⵉⴳ ⵜ ⵛⵛⴰⵏ ⴳ ⵉⴹⴰⵕⵏ ⵏⵏⵙⵏ. ⴷ ⵉⵍⵍⴰ ⵓⵍⴰ ⴰⵎⵓⵙⵙⵓ ⵏ ("ⴹⴹⵕⴱ ⵏ ⵢⵉⴳⵉⵡⵔ, ⴰⴱⵔⴷⴰⴽⴽ ⵏ ⵜⵉⵣⵣⴰ) ⵍⵍⵉ ⵙⴽⴰⵔⵏ ⵙⵉⵏ ⵉⵎⵃⵓⵡⵛⵏ, ⴷ ⴰⵔ ⴷ ⵜⵜⴼⴼⴰⵖⵏ ⵓⴳⴳⵓⴳ ⴷ ⴰⵔ ⵉⵜⵜⴰⵙⵉ ⴽⵓ ⵢⴰⵏ ⵙⴳⵉⵙⵏ ⵙⵏⴰⵜ ⵜⵉⵣⵣⴰ, ⴷ ⵓⵎⵓⵙⵙⵓ ⴰⴷ ⴰⴷ ⵙ ⴰⵔ ⵜⵜⵇⵇⵍⵏ ⵡⵉⵍⵍⵉ ⴰⴽⴽⵯ ⵜⵜⴼⵕⵕⴰⵊⵏⵉⵏ ⵙ ⵓⵚⵚⴰⴱ ⴷ ⵓⵏⵏⵖⵣⵍ.
ⴰⵎⵓⵙⵙⵓ ⵏ ⵓⴱⵔⴷⴰⴽⴽ ⵏ ⵜⵉⵣⵣⴰ ⴷ ⵏⵜⵜⴰ ⴰ ⵖⴼ ⴱⴰⵀⵔⴰ ⵉⴳⴳⵓⵜ ⵡⴰⵡⴰⵍ ⴳ ⵎⴰⴷ ⵉⵥⵍⵉⵏ ⵙ ⵓⵏⴰⵎⴽ ⴷ ⵓⴼⵓⵖ/ⵓⵏⴼⵍⵓⵍⵓ ⵏⵏⵙ, ⵉⵍⵍⴰ ⵎⴰ ⵉⵜⵜⵉⵏⵉⵏ ⵎⴰⵙ ⵉⴳⴰ ⴰⵇⴱⵓⵔ, ⴷ ⴰⵔ ⵉⵎⵎⴰⵍ ⵜⵉⴼⵔⴰⵜ ⴳⵔ ⵜⵇⴱⵉⵍⵉⵏ, ⴰⵛⴽⵓ ⵙⵉⵏ ⵉⵎⵃⵓⵡⵛⵏ ⵍⵍⵉ ⵏⴻⵏⵏⴰ ⴳⴰⵎⵍⵍⵉ ⴰⵔ ⵜⵜⵉⵍⵉⵏ ⴳ ⵙⵏⴰⵜ ⵜⵇⴱⵉⵍⵉⵏ ⵎⵣⴰⵔⴰⵢⵏⵉⵏ ⴷ ⵎⵎⴰⵖⵏⵉⵏ ⴳⵔⴰⵜⵙⵏⵜ ⴰⴷⵍⵍⵉ. ⴷ ⴰⴷ ⵀⵍⵍⵉ ⵙⴽⵔⵏ ⴰⵎⵓⵙⵙⵓ ⴰⵏⵏ ⴰⵔ ⵜⴻⵜⵜⵉⵍⵉ ⵜⵉⴼⴰⵔⵜ ⴳⵔ ⵜⵇⴱⵉⵍⵉⵏ ⴰⵏⵏ. ⴳ ⵢⴰⵜ ⵜⵓⴳⴳⴰ ⵢⴰⴹⵏ, ⵉⵏⵏⴰ ⵜⵜ ⵢⴰⵏ ⵙⴳ ⵉⵎⵃⵓⵡⵛⵏ ⵉⵎⵣⵡⵓⵔⴰ ⵏ ⵉⵃⴰⵃⴰⵏ, ⵉⵏⵏⴰ ⵎⴰⵙ ⴷ ⴹⴹⵕⴱ ⵏ ⵢⵉⴳⵉⵡⵔ ⵉⴳⴰ ⵢⴰⵏ ⵓⵎⵓⵙⵙⵓ ⴰⵎⴰⵢⵏⵓ, ⴷ ⵜⵓⵍⵍⵉⵙⵜ ⵏⵏⵙ ⵉⴳⴰ ⵜⵜ ⵎⴰⵙ ⵜ ⵉⵏⵏ ⵉⴽⴽⴰ ⵎⵃⵏⴷ ⵍⵄⵊⵊⵉⴹ (ⵜⴰⵎⵍⵍⴰ ⵏ ⵕⴱⴱⵉ ⴼⵍⵍⴰⵙ) ⵍⵍⵉ ⵉⴳⴰⵏ ⵢⴰⵏ ⵙⴳ ⵉⵎⵃⵓⵡⵛⵏ ⵏ ⵉⵃⴰⵃⴰⵏ, ⴰⵔ ⵉⵜⵜⵉⵏⵉ ⵉ ⵉⵎⴷⴷⵓⴽⴽⴰⵍ ⵏⵏⵙ ⵎⴰⵙ ⴷ ⵏⵜⵜⴰ ⴰⴷ ⵜ ⵉⴷ ⵢⵓⵡⵉⵏ ⵜⵉⵣⵉ ⵍⵍⵉ ⵉⵙⴽⴰⵔ ⵜⴰⵡⵓⵔⵉ ⵏⵏⵙ (ⴰⵎⴰⵣⵓ) ⴳ ⵓⴳⵓⵔⵏⴰ (ⵍⵎⴳⵣⵣⵔⵜ/ⴰⵙⵖⵔⵙ), ⵢⴰⵙⵉ ⴷ ⵙⵏⴰⵜ ⵜⵉⵣⵣⴰ ⵎⴰⵢⴰⴷ ⵉⵙⵍⵍⴰ ⵉ ⵜⵎⵊⴰ (ⵍⵄⵡⵡⴰⴷ) ⵉⵍⵀⵓ ⵏⵉⵜ ⴰⵔ ⵙⵉⵙⵏ ⵉⵜⵜⵓⵔⴰⵔ ⴰⵢⵍⵍⵉⴳ ⵜ ⵉⵙⵙⵓⵙⵎ ⵓⵎⵓⵙⵙⵓ ⴰⵏⵏ ⵍⵍⵉ ⵉⵙⴽⴰⵔ, ⴷ ⵉⵙⵙⵓⵙⵎ ⵓⵍⴰ ⵡⵉⵍⵍⵉ ⵖⵉⵏⵏ ⵉⵍⵍⴰⵏ. ⴷ ⵙⴳ ⵖⵉⵏⵏ ⴰ ⴳ ⵜ ⵢⵓⵙⵉ ⴰⵔ ⵙⵉⵙ ⴱⴷⴷⴰ ⵉⵜⵜⵓⵔⴰⵔ ⴰⵢⵍⵍⵉⴳ ⵜⵎⵙⴰⵙⴰ ⴷ ⵜⵥⵓⵕⵉ ⵏ ⵓⵃⵡⴰⵛ, ⴷ ⴰⵔ ⵜ ⴱⴷⴷⴰ ⵉⵙⵙⵎⵔⴰⵙ ⴳ ⴽⵓ ⵜⴰⵎⵖⵔⴰ ⴷ ⵓⵣⵎⵣⵣⵓ ⵏⵜⵜⴰ ⴷ ⵓⵎⴷⴷⴰⴽⴽⵯⵍ ⵏⵏⵙ ⵍⵃⵓⵙⴰⵢⵏ ⵡⴰⵔⵅⴰ ⵍⵍⵉ ⵉⵣⴷⴰⵖⵏ ⴳ ⵓⴹⵡⵡⴰⵕ ⵏ ⵉⵎⵔⴰⵢⵏ.
ⴳ ⵢⴰⵜ ⵜⵓⴳⴳⴰ ⵢⴰⴹⵏ, ⵉⵏⵏⴰ ⵢⴰⵏ ⵙⴳ ⵉⵎⵔⵣⵓⵜⵏ ⴳ ⵜⵥⵓⵕⵉ ⵏ ⵓⵃⵡⴰⵛ ⵎⴰⵙ ⴷ ⴰⵢⵍⵍⵉ ⵉⵏⵏⴰ ⴷⴷⴰ ⴱⵉⵀⵉ ⵉⵣⵎⵔ ⵉⵙ ⵉⵥⵍⵉ ⵖⴰⵙ ⴷ ⵓⵣⵎⵣ ⵏⵏⵙ. ⵙ ⵓⵢⴰ, ⵉⵡⴰ ⵀⴰⵜ ⴰⴱⵔⴷⴰⴽⴽ ⴰⴷ ⵏ ⵜⵉⵣⵣⴰ ⵉⴽⴽⴰ ⵜ ⵉⵏⵏ ⴰⴷⵍⵍⵉ ⴳ ⵖⴰⴷ ⵉⵣⵔⵉⵏ ⴷ ⵉⴳⴰ ⴰⵇⴱⵓⵔ ⵓⵔ ⴷ ⴰⵎⴰⵢⵏⵓ, ⵃⴰⵇⵇⴰⵏ ⴳ ⵜⵉⵣⵉ ⴰⵏⵏ ⵉⵛⵇⵇⴰ ⴷ ⵉⵡⵄⵕ ⴷ ⵉⴷⵔⵓⵙ ⵎⴰⴷ ⴰⵙ ⵉⵙⵙⵏⵏ, ⴷ ⵉⵣⵎⵔ ⵉⵙ ⵉⵡⴰⴷⵙ ⴷⴷⴰ ⴱⵉⵀⵉ ⵎⴰⵙ ⵉⴳⴰ ⵓⵏⴰⵔⴰⴳ ⵏⵏⵙ ⴰⵎⵣⵡⴰⵔⵓ ⵍⵍⵉ ⵉⵥⴹⴰⵕⵏ ⴰⴷ ⵉⵙⴽⵔ ⵏⵖ ⴰⴷ ⵉⵙⵖⵓⴷⵓ ⴰⵎⵓⵙⵙⵓ ⵏ ⵜⵉⵣⵣⴰ, ⴷ ⵉⵙⵏⴼⵍⵓⵍ ⴷ ⵉⵔⵏⴰ ⴷ ⴳⵉⵙ ⵉⵎⵓⵙⵙⵓⵜⵏ ⵢⴰⴹⵏⵉⵏ. ⵎⴰⵛⴰ, ⴼⵍⵏ ⵜ ⵉⵇⴱⵓⵔⵏ ⴳ ⵢⴰⵜ ⵜⵉⵣⵉ. ⴷ ⵡⵓⴳⴳⵓⴳ ⴰⴷ ⵏⵖ ⴷ ⴰⴷⵓⵔ ⴰⴷ, ⵉⵍⵍⴰ ⴷⴰⵔⵙ ⵉⵍⵓⴳⵏⵏ ⵏⵏⵙ ⵏⵏⴰ ⵓⵔ ⵉⵅⵚⵚⵉ ⴰⴷ ⵜⵏ ⵉⵣⵔⵉ ⵓⵎⵃⵓⵡⵛ, ⴷ ⵡⴰⵏⵏⴰ ⵜⵏ ⵉⵣⵔⵉⵏ ⴰⵔ ⵜ ⵙⵙⵓⴼⵓⵖⵏ ⵙⴳ ⵡⴰⴷⵓⵔ. ⴰⵎⴷⵢⴰ, ⴰⵙⵍⴳⵏ ⵏ ⵜⵎⵍⵙⵉⵜ ⵍⵍⵉ ⵙ ⵉⵅⵚⵚⴰ ⴰⴷ ⵜⵉⵍⵉ ⵢⴰⵜ ⵜⵎⵍⵙⵉⵜ ⴷⴰⵔ ⵉⵎⵃⵓⵡⵛⵏ ⴽⵓⵍⵍⵓ ⵜⵏ ⵙⴳ ⵓⴳⴰⵢⵢⵓ ⴰⵔ ⴰⴹⴰⵕ. ⴷ ⵓⵢⵍⵍⵉ ⵉⵥⵍⵉⵏ ⵙ ⴽⵔⴰ ⵏ ⵉⵍⴳⴰⵎⵏ ⵢⴰⴹⵏ ⵣⵓⵏ ⴷ:
- ⴰⵙⵓⵖⵏ ⵏ ⵓⵙⵢⵉⵡⵏ ⵏ ⵓⴽⵍⵓ.
- ⵉⵅⵚⵚⴰ ⴰⴷ ⵉⴳ ⵕⵕⴰⵢⵙ ⵏ ⵜⵔⴰⴱⴱⵓⵜ ⴰⵎⵓⵣⴰⵢ ⴳ ⵜⵥⵓⵕⵉ ⴰⴷ.
- ⴰⵡⵇⵇⵔ ⵏ ⵜⴱⵔⵉⴷⵜ ⵏ ⵓⵙⵍⵙⵉ ⴷ ⵉⵍⴳⴰⵎⵏ ⵏⵏⵙ.
- ⴰⴷ ⵉⵣⵎⵔ ⵓⵎⴷⵔⴰⵣ ⴰⴷ ⵉⴹⴼⵕ ⴰⵏⴳⵔⴰⵡ ⵏ ⵉⵎⵓⵙⵙⵓⵜⵏ ⴱⵍⴰ ⴰⵙⵏⴱⵓⵜⵜⵍ ⵏⵖ ⵜⴰⵣⵣⴰⵣⵜ.
- ⴰⴷ ⵓⵔ ⵍⵙⵉⵏ ⴽⵔⴰ ⵏ ⵜⵎⵙⵔⴰⴳⵜ (ⵍⵎⴰⴳⴰⵏⴰ) ⵏⵖ ⵎⴰⴷ ⵜⵜ ⵉⵔⵡⴰⵙⵏ.
- ⴰⴷ ⵓⵔ ⵍⵙⵉⵏ ⵜⵜⵇⴰⵛⵔ(ⵜⴰⵔⵖⵉⵡⵉⵏ).
- ⴰⴷ ⴹⴼⵕⵏ ⵉⵎⵓⵙⵙⵓⵜⵏ ⵏ ⵕⵕⴰⵢⵙ ⴷ ⵜⴷⵓⴳⴰⵎⵉⵏ ⵏⵏⵙ.
ⴰⵏⵢⴰ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵜⴰⵍⵍⵓⵏⵜ:
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⴳ ⵢⴰⵏ ⵓⵎⵙⴰⵡⴰⵍ ⵏ ⵓⵎⵣⵔⴰⵡ ⵢⴰⵙⵉⵏ ⴰⵣⵡⴰⵖ ⴷ ⵜⵓⴳⴷⵜ ⵏ ⵕⵕⵡⴰⵢⵙ ⵏ ⵉⵃⴰⵃⴰⵏ ⵣⵓⵏ ⴷ ⵕⵕⴰⵢⵙ ⵙⵄⵉⴷ ⴱⵓⵜⴼⵓⵙⵜ, ⵢⴰⵏ ⵙⴳ ⵉⵎⵣⵡⴰⵔⵏ ⵏ ⵜⵥⵓⵕⵉ ⵏ ⵓⵃⵡⴰⵛ ⵏ ⵉⵃⴰⵃⴰⵏ ⵏ ⵜⵎⴰⵏⴰⵔ, ⵉⵙⵙⵍⴽⵏ ⴰⵙ ⵎⴰⵙ ⴷ ⴰⵏⵢⴰ ⴳ ⵜⵥⵓⵕⵉ ⴰⴷ ⵓⵔ ⵉⴳⵉ ⴰⵎⵙⴰⵎⵎⴰ/ⴰⴳⴰⵛⵓⵔⴰⵏ, ⵎⴰⵛⴰ ⴰⵔ ⴼⵍⵍⴰⵙ ⵜⵜⵉⵍⵉⵏ ⴽⵔⴰ ⵏ ⵉⴱⵟⵟⵓⵜⵏ. ⴰⴷ ⵏⵙⵙⵏⵜⵉ ⵙⴳ (ⴰⵙⵉⵢⵙ ⵏⵖ ⴰⵙⵓⵊⴷ ⵏⵖ "ⴰⵣⵣⵓⵔⵔⵓ", ⵉⵡⴰⵍⴰ ⵜ ⵉⴷ ⵡⵓⵍ ⵏ ⵡⴰⵏⵢⴰ (ⵏⵏⵇⵔ) ⵉⵍⵎⵎⴰ ⵙ (ⴰⵙⵏⵅⵍⴼ). ⴷ ⴳ ⵢⴰⵜ ⵜⵓⴳⴳⴰ ⵢⴰⴹⵏ ⵏ ⵕⵕⴰⵢⵙ ⴰⵇⴱⵓⵔ ⵍⵃⵓⵙⴰⵢⵏ ⵡⴰⵛⵔⴰⵔ, ⵍⵍⵉ ⵉⴳⴰⵏ ⴰⵎⵥⵍⴰⵢ ⴳ ⵢⵉⵎⵉⵙ ⵏ ⵜⴰⵍⵍⵓⵏⵜ ⴷ ⵡⴰⵏⵢⴰ ⵏⵏⵙ, ⵉⵙⴰⵡⵍ ⴰⵙ ⵖⴼ ⵜⵓⴷⵔⵜ ⵏⵏⵙ ⵜⴰⵥⵓⵕⴰⵏⵜ, ⴷ ⵉⵏⵏⴰ ⵎⴰⵙ ⵉⵍⵎⴷ ⴰⴼⵓⴽⵙ ⴰⴷ ⵙ ⵜⴷⵔⴰⵡⵜ ⵏⵏⵙ ⴳ ⵜⵎⵖⵔⵉⵡⵉⵏ ⴷ ⵜⴼⵓⴳⵍⵉⵡⵉⵏ, ⴷ ⵉⴽⴽⵓⵙⴰ ⵜⴰⵥⵓⵕⵉ ⴰⴷ ⵙⴳ ⴷⴰⵔ ⴱⴰⴱⴰⵙ (ⵏⵏⴰ ⵉⴳⴰⵏ ⴰⵙⵖⵢⴰⴷ ⵏ ⵡⴰⵏⵢⴰ ⵏ ⵜⵎⵊⴰ) ⴷ ⵡⴰⵏⵜⵜⴰⵢ ⵏⵏⵙ/ⵄⵎⵎⵉⵙ (ⵍⵍⵉ ⵉⴳⴰⵏ ⴰⵙⵖⵢⴰⴷ ⵏ ⵡⴰⵏⵢⴰ ⵏ ⵜⴰⵍⵍⵓⵏⵜ) ⴳ ⵓⵙⴳⴳⵯⴰⵙ ⵏ 1971. ⴷ ⵉⴽⴽⴰ ⵜ ⵉⵏⵏ ⵙⴳ ⵉⴳⵎⴰⵎⵏ ⵍⵍⵉ ⵉⵎⵎⵓⴷⴷⴰⵏ ⵖⵔ ⴼⵕⴰⵏⵚⴰ. ⴷ ⴳ ⵜⵓⴳⴳⴰ ⴰⵏⵏ ⵏⵉⵜ, ⵉⵏⵏⴰ ⵎⴰⵙ ⴷ ⵜⴰⵎⴳⵓⵔⵉ ⵏ ⵜⴰⵍⵍⵓⵏⵜ ⴰⵔ ⵜⴻⵜⵜⵉⵣⵡⵉⵔ ⵙ ⴰⴷ ⵣⵡⴰⵔ ⴰⵡⵉⵏ ⵉⵍⵎ ⵏ ⵡⴰⵖⴰⴹ ⵙⴳ ⵓⴳⵓⵔⵏⴰ/ⵓⵙⵖⵔⵙ ⵏⵖ ⵙⴳ ⵓⴳⴰⴷⴰⵣ, ⴷ ⴰⵔ ⵜ ⵙⵙⵉⵔⵉⴷⵏ ⵙ ⵡⴰⵎⴰⵏ ⵔⵖⴰⵏⵉⵏ ⴷ ⵜⵉⵙⵏⵜ, ⵉⵍⵎⵎⴰ, ⴰⵔ ⵉⵜⵜⵓⵙⵔⴰⵙ ⵖⴼ ⵢⴰⵏ ⵓⴽⵛⵛⵓⴹ ⴰⵡⵔⴻⵔⵔⴰⵢ, ⴷ ⴳ ⵢⵉⵎⵉⵙ ⴰⴷ ⴰⵔ ⵉⵜⵜⵓⵙⵎⵔⴰⵙ ⵓⴽⵛⵛⵓⴹ ⵏ ⵡⴰⵥⵉ/ⵓⵥⵓⴽⴰ, ⵉⵍⵎⵎⴰ ⵙ ⵜⵎⵀⵍⵜ ⵏ ⵜⴳⵏⵉ, ⴷ ⴳ ⵜⴳⵉⵔⴰ ⴰⵔ ⵉⵜⵜⵓⵙⵔⴰⵙ ⵢⵉⵎⵉⵙ ⴰⵏⵏ ⴳ ⵜⴰⴼⵓⴽⵜ ⴰⵔ ⴽⵉⵖ ⵏⵉⵜ ⴱⴰⵀⵔⴰ ⵉⵣⵡⴰ. ⴷ ⵉⵙⵙⵍⴽⵏ ⴰⵙ ⴷⴷⴰ ⵍⵃⵓⵙⴰⵢⵏ ⵙ ⵓⵙⵓⵖⵏ ⵏ ⵓⵙⵏⵓⵃⵢⵓ ⵏⴳⵔ ⵜⴰⵍⵍⵓⵏⵜ ⵉⵜⵜⵡⴰⵙⴽⴰⵔⵏ ⵙ ⵢⵉⵍⵎ ⴷ ⵜⴰⵍⵍⵉ ⵉⵜⵜⵡⴰⵙⴽⴰⵔⵏ ⵙ ⵓⴱⵍⴰⵙⵜⵉⴽ. ⴰⵛⴽⵓ ⵜⴰⵎⵣⵡⴰⵔⵓⵜ ⴰⵔ ⵜⴰⴽⴽⴰ ⵢⴰⵏ ⵢⵉⵎⵙⵍⵉ ⵉⴷⵓⵙⵏ ⴷ ⵉⵏⵖⴱⴰⵏ ⴷ ⵉⴼⵓⵍⴽⵉⵏ ⵓⴳⴳⴰⵔ ⵏ ⵜⵉⵏⵏ ⵏ ⵓⴱⵍⴰⵙⵜⵉⴽ. ⴷ ⵜⴰⵍⵍⵓⵏⵜ ⴰⴷ ⴰⵔ ⵜⵜ ⵙⵙⵎⵔⴰⵙⵏ ⴽⵕⴰⴹ ⵏⵖ ⴷ ⴽⴽⵓⵥ ⵎⴷⴷⵏ ⴳ ⵓⵃⵡⴰⵛ ⴷ ⴰⵔ ⵖⵉⴼⵙⵏ ⵜⵜⵓⴱⴹⴰⵏ ⵉⴱⵟⵟⵓⵜⵏ ⵍⵍⵉ ⵏⴱⴷⵔ ⴳⴰⵎⵍⵍⵉ. ⵙⴳ ⵉⵏⵙⵎⵔⴰⵙⵏ ⵉⵎⵇⵔⴰⵏⵏ ⵏ ⵡⴰⵏⵢⴰ ⴰⴷ: ⵃⵎⴰⴷ ⵓⵄⴱⴷⵓ, ⴱⵉⵀⵉ ⵍⴼⵙⵢⴰⵏ ⴷ ⵢⵉⵡⵉⵙ ⵍⵃⵓⵙⴰⵢⵏ ⵍⴼⵙⵢⴰⵏ, ⵜⴰⵔⵡⴰ ⵏ ⴱⵓⵜⴼⵓⵙⵜ, ⴱⵉⵀⵉ ⵉⴽⵔⵛ... .
ⵏⵏⴰⵇⵓⵙ:
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵉⵎⵉⵙ ⴰⴷ ⵉⴳⴰ ⵢⴰⵏ ⵙⴳ ⵉⵅⴰⵜⴰⵔⵏ ⵏ ⵉⵎⴰⵙⵙⵏ ⵍⵍⵉ ⵉⵄⵣⵣⴰⵏ ⴷⴰⵔ ⵎⴷⴷⵏ ⴰⴷ ⵙⵙⴼⵍⴷⵏ ⵉ ⵜⵏⴰⵏⴰ/ⵓⵙⵔⵙⵔ ⵏⵏⵙ, ⴷ ⵏⵏⴰⵇⵓⵙ ⴰⴷ ⴰⴷ ⵉⵙⵏⵓⵍⴼⵓⵏ ⴰⵎⵢⴰⵙ ⴷ ⵓⵎⵙⴰⵙⴰ ⴳⵔ ⵉⵎⴰⵙⵙⵏ. ⴳ ⵓⵎⴰⵡⴰⵍ ⴰⴼⵕⴰⵏⵚⵉⵚ, ⴰⵔ ⴰⵙ ⵜⵜⵉⵏⵉⵏ "le Tambour de frein" (ⵜⵓⴷⵉⵎⵜ ⵏ ⵓⵎⴰⵡⴰⵖ).[2]
ⵍⵄⵡⵡⴰⴷ/ⵜⴰⵎⵊⴰ:
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵜⴰⵥⵓⵕⵉ ⵏ ⵓⵃⵡⴰⵛ ⵓⵔ ⵜⵣⵎⵉⵔ ⴰⴷ ⵜⵎⴷ ⴱⵍⴰ ⴰⵏⵢⴰ ⵏ ⵜⵎⵊⴰ. ⴰⵛⴽⵓ ⵉⵍⴰ ⵢⴰⵏ ⵡⴰⵣⴰⵍ ⴰⵎⵇⵔⴰⵏ, ⴷ ⵉⵍⵍⴰ ⵎⴰ ⵉⵜⵜⵉⵏⵉⵏ ⵉ ⵓⵃⵡⴰⵛ ⵍⵄⵡⵡⴰⴷ, ⴷ ⴰⵔ ⵜⵜⵉⵏⵉⵏ ⵙ ⵓⵎⴷⵢⴰ "ⵢⴰⵍⵍⴰⵀ ⴷⴰⵔ ⵍⵄⵡⵡⴰⴷ". ⵓⵟⵟⵓⵏ ⵏ ⵉⵏⵙⵎⵔⴰⵙⵏ ⵏ ⵢⵉⵎⵉⵙ ⴰⴷ ⴰⵔ ⵜⵜⴳⴳⴰⵏ ⴽⵕⴰⴹ ⵏⵖ ⴷ ⴽⴽⵓⵥ ⵏ ⵎⴷⴷⵏ.
ⴳ ⵢⴰⵏ ⵓⵎⵙⴰⵡⴰⵍ ⵏ ⵓⵎⵔⵣⵓ ⵢⴰⵙⵉⵏ ⴰⵣⵡⴰⵖ ⴷ ⵕⵕⴰⵢⵙ ⴱⵕⴰⵀⵉⵎ ⵉⵇⵇⵊⴷⵔ, ⵢⴰⵏ ⵙⴳ ⵉⵏⵙⵎⵔⴰⵙⵏ ⵏ ⵍⵄⵡⵡⴰⴷ ⵙⴳ ⵜⵙⴰⵎⵔⴰⵡⵉⵏ ⵏ ⵜⵊⵕⵎⴰ ⵍⵍⵉ ⵉⵣⵔⵉⵏ, ⵉⵍⵎⴷ ⵜⴰⵥⵓⵕⵉ ⴰⴷ ⵙⴳ ⵖⵓⵔ ⵉⴷ ⴷⴰⴷⴷⴰⵙ/ⵄⵎⵎⵉⵙ. ⴷ ⵉⵙⴰⵡⵍ ⴰⵙ ⵖⴼ ⵜⴼⵔⴽⵉⵡⵉⵏ ⵏ ⵜⵎⴳⵓⵔⵉ ⵏ ⵢⵉⵎⵉⵙ ⴰⴷ ⵏ ⵍⵄⵡⵡⴰⴷ. ⵙ ⵉⵣⵡⴰⵔ ⴰⵔ ⵙⵜⴰⵢⵏ ⴽⵔⴰ ⵏ ⵓⵖⴰⵏⵉⵎ ⵉⴼⵓⵍⴽⵉⵏ ⵏⵖ ⴷ ⵜⴰⵡⵜⵎⵜ ⵏ ⵓⵖⴰⵏⵉⵎ ⵍⵍⵉ ⵙⵓⵔ ⵓⵔ ⵉⵍⵍⵉⵏ ⵖⵉⵍⴰⴷ ⵙ ⵓⵙⵔⴰⴳ ⵏ ⵜⵓⵇⵇⵓⵔⵜ. ⵉⵍⵎⵎⴰ, ⴰⵔ ⴷ ⵜⴻⵜⵜⴰⵛⴽⴰ ⵜⴼⵔⴽⵜ ⵏ ⵓⵙⵖⵓⵙ ⵏ ⵜⵖⴰⵏⵉⵎⵜ ⴳ ⵓⴳⵏⵙⵓ ⴷ ⴰⵔ ⴳⵉⵙ ⵙⴽⴰⵔⵏ ⵚⴹⵉⵚⵜ ⵜⵛⵏⴱⴰ (ⵉⴳⴱⴱⴰⵢⵏ) ⴳ ⵓⴼⵍⵍⴰ, ⴷ ⵢⴰⵏ ⴳ ⵓⵣⴷⴷⴰⵔ ⵏⵏⵙ. ⴷ ⵖⵉⴷ ⵉⵅⵚⵚⴰ ⴰⴷ ⴳⵉⵙ ⵏⵡⵇⵇⵔ ⵜⵉⵎⵙⵖⴰⵍⵉⵏ ⵏ ⵜⵛⵏⴱⴰ ⴷ ⵓⵎⵢⴰⴳⴳⵓⴳ/ⵓⵎⵣⴰⵔⴰⵢ ⴳⵔⴰⵙⵏ ⴰⴼⴰⴷ ⴰⴷ ⵏⵙⵍⵍⴰ ⵉ ⵢⴰⵏ ⵢⵉⵎⵙⵍⵉ ⵏⵖ ⵉ ⵢⴰⵏ ⵡⴰⵏⵢⴰ ⵉⴼⵓⵍⴽⵉⵏ. ⴳ ⵢⴰⵜ ⵜⵓⴳⴳⴰ ⵢⴰⴹⵏ, ⵉⵏⵏⴰ ⴳⵉⵙ ⵃⴰⵙⴰⵏ ⵓⵍⵢⵉⵎⴰⵎ ⵎⴰⵙ ⵍⵍⴰⵏ ⵙⵉⵏ ⵡⴰⵏⴰⵡⵏ ⵏ ⵍⵄⵡⵡⴰⴷ: ⵢⴰⵏ ⵉⵜⵜⵡⴰⵙⴽⴰⵔ ⵙ ⵓⵖⴰⵏⵉⵎ, ⴷ ⵢⴰⵏ ⵉⵜⵜⵡⴰⵙⴽⴰⵔ ⵙ ⵓⵣⴰⵖⵓⵔ ⵍⵍⵉ ⵎⵉ ⵜⵜⵉⵏⵉ ⵍⵄⵡⵡⴰⴷ ⵏ ⵡⴰⵏⴰⵙ. ⵙⵉⵏ ⵉⵜⵙⵏ ⵜⵜⵡⴰⵙⵙⵏⵏ ⵙ ⵜⵓⵏⵖⵉⵍⵜ ⵍⵍⵉ ⵎⵉ ⵜⵜⵉⵏⵉⵏ "ⵜⴰⴽⵎⵓⵎⵜ ⵉⵙⴷⵉⴷⵏ" ⵍⵍⵉ ⵉⴳⴰⵏ ⵜⵓⵙⴷⴰⴷⵜ ⵏ ⵜⵓⵣⵔⵜ (épaisseur) ⴷ ⵢⵉⵎⵙⵍⵉ, ⴷ ⴰⵡⴷ ⵜⵍⵍⴰ ⵜⴽⵎⵓⵎⵜ ⵉⴹⵏⵉⵏ ⴳ ⵜⵓⵣⵔⵜ ⴷ ⵢⵉⵎⵙⵍⵉ.
ⵉⵙⵏⴰⵃⵢⴰ ⵕⵕⴰⵢⵙ ⵄⴱⴷⵍⵍⴰⵀ ⴰⵅⵔⵙⵙⵓⵎ ⴳⵔ ⴽⵕⴰⴹ ⵉⵙⵔⵜⴰⵏ ⵉⴷⵙⵍⴰⵏⵏ ⵏ ⵡⴰⵏⵢⴰ ⵏ ⵜⵎⵊⴰ, ⵍⵍⵉ ⵉⵍⵎⴷ ⵙⴳ ⴷⴰⵔ ⴱⴰⴱⴰⵙ ⵎⵓⵃⵎⵎⴰⴷ ⵓ ⵃⵎⴰⴷ ⴰⵅⵔⵙⵙⵓⵎ ⵍⵍⵉ ⵉⵎⵎⵓⵜⵏ ⴳ 1991. ⴷ ⵉⵍⵎⴷ ⵜⵏ ⵜⵉⵣⵉ ⵍⵍⵉ ⵉⴽⵙⵙⴰ, ⴷ ⴳⴰⵏ ⵉⵙⵔⵜⴰⵏ ⴰⴷ: ⵜⴰⵢⵜⵉ ⵏ ⵓⵙⵜⴰⵔⴰ, ⵜⴰⵢⵜⵉ ⵉⵥⵥⴰⵢⵏ, ⴷ ⵜⵢⵜⵉ ⵏ ⵢⵉⴳⵉⵡⵔ ⵍⵍⵉ ⵉⵜⵜⵢⵓⵙⵙⴰⵏⵏ ⵙ ⵓⴱⵔⴷⴰⴽⴽ ⵏ ⵜⵉⵣⵣⴰ/ⴹⴹⵕⴱ ⵏ ⵢⵉⴳⵉⵡⵔ.
ⵙⴳ ⵉⵏⵙⵎⵔⴰⵙⵏ ⵉⵎⵇⵔⴰⵏⵏ ⵏ ⵡⴰⵏⵢⴰ ⴰⴷ: ⵎⵓⵃⵎⵎⴰⴷ ⵓ ⵄⵍⵉ ⴰⵜⴰⵏⴰⵏ ⵏⵏⴰ ⵉⵜⵜⵡⴰⵙⵙⵏⵏ ⵙ ⴷⴷⴰⵅⵉⵚ, ⵍⵃⵙⵏ ⵓ ⵄⴱⴷⵍⵎⴰⵍⴽ, ⵍⵃⵙⵏ ⴱⵓⵃⵔⵉⵛ, ⵎⵙⵄⵓⴷ ⵙⵜⵜⵉⵏ.. .[3]
ⴰⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵏ ⵓⵃⵡⴰⵛ ⵏⵖ ⴷ ⴰⵎⵕⵉⵢⵙ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⴰⵎⵕⵉⵢⵚ ⴰⴷ ⴰⴷ ⵉⵜⵜⴰⵙⵉⵏ ⵜⴰⵎⵙⵜⴳⴳⴰⵔⵜ ⵏ ⵓⵙⵡⵓⴷⴷⵓ ⵏ ⵓⵃⵡⴰⵛ ⴷ ⵓⵙⵏⵎⴰⵍⴰ ⵏⵏⵙ, ⴷ ⴰⴷ ⵉⴳ ⴰⵎⵓⵣⴰⵢ ⴳ ⵢⵉⴳⵔ ⴰⴷ, ⴷ ⵏⵜⵜⴰ ⴰⴷ ⵢⴰⴽⴽⴰⵏ ⵜⵉⵎⵓⵍⴰ/ⵜⵉⴷⵓⴳⴰⵎⵉⵏ ⵍⵍⵉ ⵙ ⵉⵅⵚⵚⴰ ⴰⴷ ⵜⵏ ⵙⴽⵔⵏ ⵜⵉⵣⵉ ⵍⵍⵉ ⵔⴰⴷ ⵎⵎⴰⵜⵜⵉⵏ ⵙⴳ ⵜⴼⵉⵔⵜ ⴰⵔ ⵜⴰⵢⵢⴰⴹ, ⵏⵖ ⴷ ⵜⵉⵣⵉ ⵏ ⵓⵙⵏⴼⵍ ⵏ ⵓⵎⵓⵙⵙⵓ ⴷ ⵡⴰⵏⵢⴰ, ⴷ ⵙⴳ ⵜⴳⵓⵔⵉⵡⵉⵏ ⵍⵍⵉ ⴱⴰⵀⵔⴰ ⵉⵜⵜⵢⵓⵙⵙⴰⵏⵏ ⴷ ⵍⵍⵉ ⵉⵙⵙⵎⵔⴰⵙ ⵓⵎⵕⵉⵢⵙ: "ⴰⵀ ⴰⵀⴰ" ⵏⵖ "ⴰ ⵢⵢⵉⵢ" ⴷ "ⴰⵙⵜⴰⵡ ⴰⵀⵢⴰⵡ!" ⵏⵖ "ⴰⵀⵢⴰⵡ ⵡⵙⵜⴰ ⵀⵢⴰⵡ !". ⴰⵔ ⵉⵜⵜⵉⵏⵉ ⵕⵕⴰⵢⵙ ⵄⵓⵎⴰⵕ ⴱⵓⵄⵊⵉⵏ ⵉⵡⵉⵙ ⵏ ⵓⵅⴰⵜⴰⵔ ⵏ ⵓⵃⵡⴰⵛ ⵏ ⵉⵃⴰⵃⴰⵏ ⴱⵉⵀⵉ ⴱⵓⵄⵊⵉⵏ ⴷ ⵓⵎⵕⵉⵢⵙ ⵏ ⵜⵔⴰⴱⴱⵓⵜ ⵏ ⵓⵃⵡⴰⵛ ⵏ ⵜⵎⴰⵏⴰⵔ, ⵎⴰⵙ ⵉⵃⵎⵍ ⵜⴰⵥⵓⵕⵉ ⴰⴷ ⵙⴳ ⵎⴰⴷ ⵉⵎⵥⵥⵉ. ⴷ ⴰⵔ ⵉⵙⴽⴰⵔ ⵜⴰⵔⴰⴱⴱⵓⵜ ⵏⵏⵙ ⵉⵎⵥⵥⵉⵢⵏ ⴷ ⵉⵎⴷⴷⵓⴽⴽⴰⵍ ⵏⵏⵙ ⴰⴼⴰⴷ ⴰⴷ ⵃⵓⵡⵛⵏ, ⴷ ⴰⵔ ⵉⵍⵙⵙⴰ ⵜⵉⵎⵍⵙⴰ ⵏ ⴱⴰⴱⴰⵙ ⵍⵍⵉ ⵉⵍⵙⵙⴰ ⵙ ⵓⵃⵡⴰⵛ. ⴷ ⴰⵔ ⴱⴷⴷⴰ ⵉⵙⵙⵓⵙⵓⵎ ⵉⵙⵍⵎⴰⴷⵏ ⵏⵏⵙ ⴷ ⵉⴽⴽⴰ ⵜ ⵉⵏⵏ ⵉⴳⴰ ⵢⴰⵏ ⵓⵄⵔⵔⵉⵎ ⵍⵍⵉ ⴱⴰⵀⵔⴰ ⵉⵜⵜⵙⴷⵉⴽⵏ ⴽⵓⴷⵏⵏⴰ ⵉⵥⵕⵕⴰ ⴰⵃⵡⴰⵛ ⴳ ⴽⵔⴰⵢⴳⴰⵜⵜ ⴰⵣⵎⵣⵣⵓ ⵏⵖ ⵜⴰⵎⵖⵔⴰ. ⴷ ⵉⵍⵀⴰ ⴰⵔ ⵉⵜⵜⵍⵎⴰⴷ ⵉⵎⵓⵙⵙⵓⵜⵏ ⴰⵏⵏ ⴰⵢⵍⵍⵉⴳ ⴰⵙⵏ ⵉⵙⵙⵏ, ⴷ ⵉⵍⵎⴷ ⴽⵉⴳⴰⵏ ⴷⴰⵔ ⵕⵕⴰⵢⵙ ⵓⵜⵙⵓⴽⴰ, ⵍⵍⵉ ⵜ ⵉⵏⵏ ⵉⴽⴽⴰⵏ ⵉⴳⴰ ⵛⵛⵉⵅ ⵏⵏⵙ ⴳ ⵜⵥⵓⵕⵉ ⴰⴷ. ⴷ ⵉⴳ ⵖⵉⵍⴰⴷ ⵄⵓⵎⴰⵕ ⴱⵓⵄⵊⵉⵏ ⵢⴰⵏ ⵙⴳ ⵉⵙⵍⵎⴰⴷⵏ ⵉⵎⵇⵇⵔⴰⵏⵏ ⵏ ⵜⵥⵓⵕⵉ ⴰⴷ, ⴷ ⵢⵉⵡⵣ ⵖⴼ ⵓⴹⴰⴽⴰⵍ ⵏ ⵓⵣⴷⴷⵓⵢ ⵏⵏⵙ ⴱⵍⴰ ⴽⵔⴰ ⵏ ⵓⵙⴼⵙⴰ ⴷ ⵓⵔⵊⴰⵏ ⵏⵏⵙ. ⴷ ⵉⵙⵙⵍⴽⵏ ⴰⵙ ⴰⵡⴷ ⵖⴼ ⵜⵓⴳⴷⵜ ⵏ ⵉⴼⵔⵉⵙⵏ ⵍⵍⵉ ⵉⵅⵚⵚⴰⵏ ⴰⴷ ⵉⵍⵉⵏ ⴳ ⵓⵎⵕⵉⵢⵙ:
ⴰⴳⵍⵍⴰ ⴷ ⵜⵓⵎⵎⵍⴰ ⵜⴰⵣⴷⴷⴰⴳⵜ. ⵜⵉⵏⵏⵓⵥⴰ ⴷ ⵜⵉⵏⵥⴻⵥⵜ. ⴰⵖⵓⴷⵓ ⵏ ⵓⵎⵓⴳⴳⵓ/ⵓⵎⵙⵓⵔⵓⴼ ⴷ ⵉⴳⵎⴰⵎⵏ ⵏ ⵜⵔⴰⴱⴱⵓⵜ ⴷ ⵓⴳⴷⵓⴷ. ⴰⴹⴰⴽⴰⵍ ⵏ ⵓⵣⴷⴷⵓⵢ ⵏ ⵜⵥⵓⵕⵉ ⴰⴷ ⴱⵍⴰ ⴽⵔⴰ ⵏ ⵓⵙⴼⵙⴰ ⴷ ⵓⵔⵊⴰⵏ. ⵜⴰⵣⵎⵔⵜ ⵖⴼ ⵓⵥⵉⴹⵕ ⵏ ⵜⵎⵙⵜⴳⴳⴰⵔⵜ ⵜⴰⵏⵎⴷⵓⵜ ⵜⵉⵣⵉ ⵏ ⵍⵍⵉ ⵉⵜⵜⵕⵉⵢⵙ ⵜⴰⵔⴰⴱⴱⵓⵜ. ⴰⴷ ⴷⴰⵔⵙ ⵢⵉⵍⵉ ⵢⵉⵎⴰⵏ ⵏ ⵜⵥⵓⵕⵉ ⵎⵇⵇⴰⵔ ⵓⵔ ⵍⵍⵉⵏ ⵜⵖⵔⴰⴷ.
ⵜⴰⵡⵓⵔⵉ ⵏ ⵓⵎⵕⵉⵢⵙ, ⵉⵙⵏⴼⵍⵓⵍ ⴳⵉⵙ ⵜⵓⴳⴷⵜ ⵏ ⵕⵕⵡⴰⵢⵙ ⵉⵅⴰⵜⴰⵔⵏ ⵏ ⵓⵃⵡⴰⵛ ⵏ ⵉⵃⴰⵃⴰⵏ ⵣⵓⵏ ⴷ (ⴰⵄⵕⴰⴱ ⵣⵔⴱⴰⵏ, ⵓⵜⵙⵓⴽⴰ, ⵉⴷⴰⵎⵎⵏ, ⵙⴰⵄⵉⴷ ⵓⵃⵓⴷⴰ, ⵃⴰⵙⴰⵏ ⵓⵎⵓⵍⵉⴷ, ⵎⵓⵃⵎⵎⴰⴷ ⵣⵔⴱⴰⵏ, ⴰⵄⵕⴰⴱ ⴱⵓⵄⵊⵉⵏ, ⵄⴱⴷⵕⵕⵃⵎⴰⵏ ⵓⵊⴷⴷⵉ...).[4][5]
ⵜⵉⵎⵍⵙⵉⵜ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵉⵎⵎⴰ ⴰⵢⵍⵍⵉ ⵉⵥⵍⵉⵏ ⵙ ⵜⵎⵍⵙⴰ, ⴷ ⴰⵎ ⵓⵢⵍⵍⵉ ⵙ ⵏⴻⵏⵏⴰ ⴳⴰⵎⵍⵍⵉ, ⵎⴰⵙ ⴰⵔ ⵜⴻⵜⵜⵉⵍⵉ ⵢⴰⵜ ⵜⵎⵍⵙⵉⵜ ⵉⵎⵎⵔⵡⴰⵙⵏ ⴷⴰⵔⵙⵏ ⴽⵓⵍⵍⵓ ⵜⵏ, ⵜⵉⵎⵍⵙⵉⵜ ⴰⴷ ⴰⵔ ⴳⵉⵙ ⵜⴻⵜⵜⵉⵍⵉ ⵕⵥⵥⴰ ⵜⵓⵎⵍⵉⵍⵜ ⴷ ⵜⴼⴰⵕⴰⵊⵉⵢⵜ ⵏⵖ ⵍⴼⴰⵕⴰⵊⵉⵢⴰ ⵎⵎⵓ ⵓⴽⵍⵓ ⵓⵎⵍⵉⵍ. ⴷ ⴰⵔ ⵉⵜⵜⵉⵏⵉ ⵓⵎⵔⵣⵓ ⵓⵙⴰⵎⴰ ⵍⵀⴷⴷⴰⵊ ⵎⴰⵙ ⴷ ⴰⴽⵍⵓ ⴰⵎⵍⵍⴰⵍ ⵉⴳⴰ ⵜⵉⵎⵍⵙⵉⵜ ⵏ ⵢⵉⵎⵏⵖⵉ ⴷⴰⵔ ⵉⵃⴰⵃⴰⵏ. ⴷ ⵜⵜⵛⴰⵎⵉⵔ ⵍⵍⵉ ⵉⵍⴰⵏ ⵢⴰⵏ ⵓⵎⴳⴳⵕⴹ ⵉⵟⵟⴰⴼⵏ ⴽⵔⴰ ⵏ ⵜⵊⵔⵔⴰⵢ ⴳ ⵜⵙⴳⴰ ⵜⴰⵥⵍⵎⴰⴹⵜ ⴷ ⴰⵔ ⵜⴻⵜⵜⵢⵓⵍⵙⵙⴰ ⴷⴷⵓ ⵏ ⵜⴼⴰⵕⴰⵊⵉⵢⵜ. ⴷ ⴰⵡⴷ ⵍⴽⵎⵎⵉⵢⵜ ⵍⵍⵉ ⵉⵜⵜⵢⴰⴳⴰⵍⵏ ⵖⴼ ⵜⵙⴳⴰ ⵜⴰⵥⵍⵎⴰⴹⵜ ⵏ ⵓⵎⵃⵓⵡⵛ, ⴷ ⵜⵖⴰⵡⵙⴰ ⵜⵉⵙ ⴽⴽⵓⵥⵜ ⵉⴳⴰ ⵜⵜ ⴰⴷⵓⴽⵓ ⵍⵍⵉ ⵉⵜⵜⵢⵓⵙⴽⴰⵔⵏ ⴳ ⵢⵉⵍⵎ ⴷ ⴰⴷ ⵉⴳ ⵓⴽⵍⵓ ⵏⵏⵙ ⵓⵎⵍⵉⵍ.
ⵉⵍⵍⴰ ⵉⵎⵉⴽⴽ ⵏ ⵓⵎⵣⴰⵔⴰⵢ ⵏⴳⵔ ⵜⵎⵍⵙⵉⵜ ⵏ ⵜⵔⴰⴱⴱⵓⵜ ⵏ ⵡⵓⴳⴳⵓⴳ ⴷ ⵜⵉⵏⵏ ⵏ ⵓⵎⵕⵉⵢⵙ. ⴰⵎⴳⴳⴰⵔⵓ ⴰⴷ ⴰⵔ ⴷ ⵉⵔⵏⵏⵓ ⵉ ⵜⵎⵍⵙⵉⵜ ⵍⵍⵉ ⵏⴱⴷⵔ "ⴰⵊⵊⴱⵉⵔ" ⵏⵖ "ⴰⵇⵔⴰⴱ", ⵍⵍⵉ ⵉⵥⵍⵉⵏ ⵖⴰⵙ ⵙ ⵓⵏⵙⵙⵉⵅⴼ ⵏ ⵜⵔⴰⴱⴱⵓⵜ.
ⴰⵃⵡⴰⵛ ⵏ ⵜⵎⵖⴰⵔⵉⵏ ⴳ ⵉⵃⴰⵃⴰⵏ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⴰⵃⵡⴰⵛ ⵏ ⵜⵎⵖⴰⵔⵉⵏ ⵏⵖ ⴷ ⵍⵀⴹⵕⵜ ⵏ ⵜⵎⵖⴰⵔⵉⵏ. ⵉⴳⴰ ⵢⴰⵏ ⵡⴰⵏⴰⵡ ⵉⵥⵍⵉⵏ, ⴷ ⵓⵃⵡⴰⵛ ⴰⴷ ⴰⵔ ⴳⵉⵙ ⵜⵜⵓⵙⴽⴰⵔⵏ ⵜⵓⴳⴷⵜ ⵏ ⵉⵎⵓⵙⵙⵓⵜⵏ ⴷ ⵉⴷⵔⴰⵣⵏ, ⴷ ⴰⵔ ⵜⵜⵎⵓⵏⴰⵏⵜ ⴳ ⵉⴷⵖⴰⵔⵏ ⵉⵥⵍⵉⵏ ⵙⵉⵙⵏⵜ ⴳ ⵓⴳⵏⵙⵓ ⵏ ⵜⴳⵎⵎⴰ ⴷ ⵓⵔ ⴰⵔ ⴷⵉⴷⵙ ⵜⵜⵉⵍⵉⵏ ⵉⵔⴳⴰⵣⵏ. ⴷ ⵉⴷ ⵃⵉⵏⴰ ⴰⵔ ⵜⵜⴳⴳⴰⵏ ⵉⵔⴳⴰⵣⵏ ⵏ ⵓⴹⵡⵡⴰⵕ ⴰⵏⵏ ⵖⴰⵙ ⵉⵎⵙⴼⵍⵉⴷⵏ ⵏⵖ ⵉⴳⴷⵓⴷⵏ, ⴷ ⵓⵔ ⴰⵙ ⵢⵓⴼⵉ ⵓⴱⵕⵕⴰⵏⵉ ⴰⴷ ⵢⵉⵍⵉ ⴳⵔ ⵉⵔⴳⴰⵣⵏ ⴰⵏⵏ.
ⴳ ⵓⵃⵡⴰⵛ ⵏ ⵜⵎⵖⴰⵔⵉⵏ ⴳ ⵉⵃⴰⵃⴰⵏ, ⴰⵔ ⵜⵜⵓⵙⵎⵔⴰⵙⵏ ⵉⵎⴰⵙⵙⵏ ⵥⵍⵉⵏⵉⵏ ⴰⵎ ⵏⵏⴰⵇⵓⵙ ⴷ ⵓⴽⴱⴰⵍ ⴷ ⵜⴳⵏⵣⴰ. ⴷ ⴰⵔ ⴽⵓⵍⵍⵓ ⴷⵔⵔⵓⵏⵜ ⵜⵎⵖⴰⵔⵉⵏ ⵙ ⵓⵃⵡⴰⵛ ⴷ ⵓⵎⴰⵔⴳ ⴰⵎⴳⵔⵓ ⴷ ⴰⵔ ⵜⵜⵙⵎⵙⴽⴰⵍⵏⵜ ⵉⵣⵍⴰⵏ ⴷ ⵡⴰⵏⵢⴰⵜⵏ ⴷ ⵜⴳⵓⵔⵉⵡⵉⵏ, ⴷ ⴰⵡⴷ ⵜⵉⵖⵔⵉⵜⵉⵏ ⵍⵍⵉ ⴱⴰⵀⵔⴰ ⵉⵙⵜⴰⵡⵀⵎⵎⴰⵏ ⴳ ⵓⵃⵡⴰⵛ ⵏⵏⵙⵏⵜ. ⴰⵔ ⵜⵜⵎⵔⴰⵔⴰⵏⵜ ⴰⴷⵔⴰⵣ ⵢⴰⵜ ⵙ ⵢⴰⵜ, ⴷ ⴰⵔ ⵜⴻⵜⵜⵓⵙⵔⴰⵙ ⵛⵛⴼⵏⴰ ⵏ ⵓⴱⵔⴷⵉⴽⴽ ⴳ ⵜⵓⵥⵥⵓⵎⵜ ⵏⵏⵙⵏⵜ ⵎⴳⴰⵍ ⵏ ⵓⵃⵡⴰⵛ ⵏ ⵉⵔⴳⴰⵣⵏ, ⵍⵍⵉⴳ ⵓⵔ ⴰⵔ ⴳⵉⵙ ⴰⴽⴽⵯ ⴷⵔⵔⵓⵏⵜ ⵜⵎⵖⴰⵔⵉⵏ; ⵎⴰⵛⴰ ⴳ ⴽⵔⴰ ⵏ ⵜⴽⴽⴰⵍ ⴰⵔ ⵜⴷⵔⵔⵓ ⵜⵎⵖⴰⵔⵜ ⵜⴰⵎⵛⵛⴰⵢⴱⵓⵜ ⴰⵎ ⵜⵎⴷⵢⴰⵣⵜ ⵎⴰⵛⴰ ⵉⵅⵚⵚⴰ ⴰⴷ ⵏⵏ ⵜⵉⵍⵉ ⴳ ⵢⴰⵜ ⵜⵃⴰⵏⵓⵜ ⵉⵥⵍⵉⵏ ⵏⵖ ⴷ ⴰⴷ ⵜⵃⴱⵓ ⵓⴷⵎ ⵏⵏⵙ ⵙ ⴽⵔⴰ ⵏ ⵓⵎⵍⵃⴰⴼ ⵏⵖ ⴽⵔⴰ ⵢⴰⴹⵏ ⴰⴼⴰⴷ ⴰⴷ ⵓⵔ ⵢⵓⵎⴰⵏ ⵎⴰⴷ ⵜⴳⴰ, ⴷ ⵜⵖⴰⵡⵙⴰ ⴰⴷ ⵓⵔ ⴰⵔ ⵜⵜ ⵙⵓⵔ ⵙⴽⴰⵔⵏ ⵜⵇⴱⵉⵍⵉⵏ ⵏ ⵉⵃⴰⵃⴰⵏ ⴷ ⵓⵔ ⵙⵓⵔ ⵜⵍⵍⵉ ⴳ ⵓⴱⴰⵔⴰⵣ ⵏ ⵓⵃⵡⴰⵛ ⴳ ⵓⵣⵎⵣ ⴰⴷ.[6]
ⴰⵣⴰⵍ ⵏ ⵓⵃⵡⴰⵛ ⵏ ⵉⵃⴰⵃⴰⵏ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵎⴰⴷ ⵜⴳⴰ ⵜⵣⴷⴰⵢⵜ ⵏⴳⵔ ⵓⵙⴳⴷ ⴷ ⵜⵥⵓⵕⵉ ⵏ ⵓⵃⵡⴰⵛ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵜⴰⵥⵓⵕⵉ ⵏ ⵓⵃⵡⴰⵛ ⵜⴳⴰ ⵢⴰⵜ ⵜⵥⵓⵕⵉ ⵉⵙⵙⵓⵎⵓⵏⵏ ⵉⵎⴰⵏ ⵏ ⵜⴳⵔⴰⵡⵜ ⴷ ⵜⴰⴳⴳⴰⵍⵜ ⵏⵏⵙ ⴷ ⵢⵉⵎⴰⵏ ⵏⵏⵙ ⵏ ⵜⵇⴱⵉⵍⵜ, ⴷ ⵓⵔ ⵉⵍⵍⵉ ⴰⵡⴷ ⵢⴰⵜ ⵏⵏⴰ ⵜ ⵉⵜⵜⴰⴷⵊⴰⵏ ⴰⴷ ⵉⴳ ⵎⴳⴰⵍ ⵏ ⵓⵙⴳⴷ, ⴰⵛⴽⵓ ⵓⵎⴰⵏⵏ ⴱⴷⴷⴰ ⵉⵡⵜⵜⴰⵙⵏ ⵏⵏⵙ ⵉ ⵓⴳⴷⵓⴷ. ⴷ ⴳ ⵜⴳⵉⵔⴰ ⵏ ⵓⵃⵡⴰⵛ, ⴰⵔ ⵉⵜⵜⴰⴹⵓ ⵢⴰⵏ ⵙⴳ ⵉⵅⴰⵜⴰⵔⵏ ⵏ ⵉⵎⵃⵓⵡⵛⵏ ⴰⵏⵏ ⵏⵖ ⵛⵛⵉⵅ ⵏⵏⵙⵏ ⵙ ⵜⵓⵥⵥⵓⵎⵜ ⵏⵏⵙⵏ, ⴷ ⴰⵔ ⴰⵙ ⵜⵜⵙⵓⵜⵓⵍⵏ ⵉⵎⵃⵓⵡⵛⵏ ⴰⵏⵏ ⵢⴰⴹⵏ, ⴷ ⴰⵔ ⵉⵜⵜⵍⵀⵓ ⵓⵔⴳⴰⵣ ⴰⵏⵏ ⵙ ⴰⴷ ⵉⴼⴽ ⵜⵓⵜⵔⴰ ⴷ ⴰⵔ ⵜ ⵉⵙⴳⵓⵔⵓ ⵙ ⴽⵔⴰ ⵏ ⵜⴳⵓⵔⵉⵡⵉⵏ ⵜⵉⵏⵉⵎⴰⵏⵉⵏ ⴷ ⵓⵙⵏⵉⵎⵎⵔ. ⴷ ⴰⵔ ⵜⵜⴳⴳⴰ ⵜⵖⴰⵡⵙⴰ ⴰⴷ ⵍⵍⵉ ⵉⵙⴽⴰⵔ ⴰⵎ ⵢⴰⵏ ⵓⵙⵏⴼⴰⵍⵉ/ⵜⵏⴼⴰⵍⵉⵜ ⵖⴼ ⵓⵎⵢⴰⵙⴰ ⵏⴳⵔ ⵉⴳⵎⴰⵎⵏ ⵏ ⵜⵔⴰⴱⴱⵓⵜ.
ⴰⵎⵢⴰⵡⴰⵙ ⴷ ⵜⴰⵢⵔⵉ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⴰⵢⵍⵍⵉ ⵉⵙⵙⵉⴳⵓⵜⵏ ⴰⵣⴰⵍ ⴰⴷ ⴰⵏⴰⵥⵓⵕ ⵉⴳⴰ ⵜ ⵎⴰⵙ ⴷ ⴰⵃⵡⴰⵛ ⴰⴷ ⵉⵏⵏⵓⵕⵥⵎ ⵜⵉⴳⴳⵓⵔⴰ ⵏⵏⵙ ⵉ ⴽⵓ ⵢⴰⵏ. ⵉⴳⴰ ⵢⴰⵜ ⵜⵥⵓⵕⵉ ⵉⵙⵎⵓⵏⵏ ⴳⵔ ⵉⵎⵣⴰⵔⴰⵢⵏ ⵏ ⵉⵙⵡⵉⵔⵏ ⵏ ⵡⴰⵎⵓⵏ ⵙⵡⴰ ⴳⴰⵏ ⵉⵏⵙⴱⵖⵓⵔⵏ ⵓⵍⴰ ⵉⵎⵥⵍⴰⴹ. ⴷ ⴰⵔ ⵉⵙⵙⵓⵎⵓⵏ ⵓⵃⵡⴰⵛ ⵉⵎⴰⵏ ⵏ ⵓⵎⵢⴰⵡⴰⵏ ⴳⵔ ⵉⵎⵃⵓⵡⵛⵏ ⵏⵏⵙ, ⵍⵍⵉⴳ ⴰⵔ ⵜⵜⵎⵓⵜⵜⵉⵢⵏ ⵉⴼⵓⴽⵙⵏ ⴷ ⵜⵎⵢⵓⵔⵉⵏ ⵙⴳ ⵢⴰⵜ ⵜⴰⵙⵓⵜ ⴰⵔ ⵜⴰⵢⵢⴰⴹ ⵙ ⵢⵉⵎⴰⵏ ⵏ ⵜⴰⵢⵔⵉ.
ⴰⵣⴰⵍ ⵏ ⵓⴱⵔⴷⴰⴽⴽ ⵏ ⵜⵉⵣⵣⴰ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⴰⵢⵍⵍⵉ ⵉⵔⵏⴰⵏ ⴰⵣⴰⵍ ⵉ ⵓⵃⵡⴰⵛ ⵏ ⵜⵎⴰⵏⴰⵔ ⵉⴳⴰ ⵜ ⵓⵙⵏⵓⴱⴳ ⵏ ⵓⴳⵍⵍⵉⴷ ⵃⴰⵙⴰⵏ ⵡⵉⵙ ⵙⵉⵏ ⵉ ⵉⵎⵃⵓⵡⵛⵏ ⵏ ⵓⵃⵡⴰⵛ ⵏ ⵉⵃⴰⵃⴰⵏ (ⵜⴰⵎⴰⵏⴰⵔ ⴷ ⵉⴷⴰ ⵡⵉⵙⴰⵔⵏ), ⵖⴼ ⵜⵓⴳⴳⴰ ⵏ ⴷⴷⴰ ⴱⵉⵀⵉ ⴱⵓⵄⵊⵉⵏ ⴳ ⵜⵙⴰⵎⵔⴰⵡⵉⵏ ⵏ ⵜⵊⵕⵎⴰ ⵍⵍⵉ ⵉⵣⵔⵉⵏ, ⴷ ⵉⴳ ⵡⵓⵟⵟⵓⵏ ⵏ ⵉⵎⴷⵔⴰⵣⵏ 200 ⵏ ⵓⵎⴷⵔⴰⵣ ⵍⵍⵉ ⵉⵜⵜⵓⴱⴹⴰⵏ ⵖⴼ ⵙⵏⴰⵜ ⵜⵙⴳⴳⵉⵡⵉⵏ. ⴷ ⴳ ⵜⴼⵓⴳⵍⴰ ⴰⵏⵏ ⵜⵙⵙⵓⵙⵎ ⴱⴰⵀⵔⴰ ⵜⵔⴰⴱⴱⵓⵜ ⵏ ⵓⵃⵡⴰⵛ ⵏ ⵉⵃⴰⵃⴰⵏ ⴰⴳⵍⵍⵉⴷ ⵃⴰⵙⴰⵏ ⵡⵉⵙ ⵙⵉⵏ, ⵙⵍⴰⵡⴰⵏ ⴰⴽⴽⵯ ⴰⴱⵔⴷⴰⴽⴽ ⵏ ⵜⵉⵣⵣⴰ ⵍⵍⵉ ⵉⴼⴽⴰⵏ ⵢⴰⵏ ⵡⴰⵜⵉⴳ ⴷ ⴰⵎⵇⵔⴰⵏ ⵉ ⵓⵃⵡⴰⵛ ⵏ ⵜⵎⴰⵏⴰⵔ.[7][8][9]
ⵜⴰⴷⵔⴰⵡⵜ ⵏ ⵓⵃⵡⴰⵛ ⵏ ⵉⵃⴰⵃⴰⵏ ⴳ ⵉⴼⵉⵍⵎⵏ ⵓⵏⵜⵉⵎⵏ ⴷ ⵉⵥⵓⵕⴰⵏⵏ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵓⵔ ⵏⵣⵎⵉⵔ ⴰⴷ ⵏⵙⴰⵡⵍ ⵖⴼ ⵓⵃⵡⴰⵛ ⵏ ⵉⵃⴰⵃⴰⵏ ⴱⵍⴰ ⵏⴱⴷⵔ ⵢⴰⵜ ⵙⴳ ⵜⴷⵔⴰⵡⵉⵏ ⵏⵏⵙ ⵜⵉⵅⴰⵜⴰⵔⵉⵏ ⴳ ⵜⵡⵓⵔⵉ ⵜⴰⵏⴰⵥⵓⵕⵜ ⴷ ⵜⵎⵣⵔⵓⵢⴰⵏⵜ, ⵍⵍⵉ ⵉⵙⵎⵓⵜⵜⴳ ⵓⴷⵓⴽⵜⵓⵔ ⵎⵓⵃⵎⵎⴰⴷ ⵓⴱⵉⵀⵉ ⵙ ⵓⵣⵡⵍ ⵏ "ⵉⵃⴰⵃⵉⵢⵏ ⴷ ⵎⵓⴳⴰⴷⵓⵔ/ⵜⴰⵚⵚⵓⵕⵜ: ⵜⵉⵎⴰⵜⴰⵔⵉⵏ ⵙⴳ ⵜⴷⵍⵙⴰ" ⴷ ⵙⴳ ⵓⴼⴰⵔⵙ ⵏ ⵡⴰⵎⵎⴰⵙ ⵏ ⵎⵓⴳⴰⴷⵓⵔ ⵏ ⵜⵣⵔⴰⵡⵉⵏ ⴷ ⵉⵔⵣⵣⵓⵜⵏ ⴳ ⵓⵙⴳⴳⵯⴰⵙ ⵏ 2024. ⴷ ⴱⵍⴰ ⵏⵜⵜⵓ ⵜⴰⴷⵔⴰⵡⵜ ⵏ ⵓⵃⵡⴰⵛ ⵏ ⵜⵎⴰⵏⴰⵔ ⴳ ⵉⵎⴰⵣⵉⵖⵏ ⴰⵎ ⵓⴼⵉⵍⵎ "ⵓⵔⵖ ⵓⵔ ⵉⵜⵜⵎⵉⴷⵏ/ⵍⴽⵏⵣ ⵓⵔ ⵉⵜⵜⴽⵎⵎⴰⵍⵏ" ⵏ ⵓⵎⵙⵙⵓⴼⵖ ⵄⴱⴷⵍⵄⵣⵉⵣ ⵓ ⵙⵙⴰⵢⵃ, ⴰⵙⴳⴳⵯⴰⵙ ⵏ 2006.[10]
ⵜⴰⴷⵔⴰⵡⵜ ⵏ ⵓⵃⵡⴰⵛ ⵏ ⵜⵎⴰⵏⴰⵔ ⴳ ⵉⵏⵎⵓⴳⴳⴰⵔⵏ ⴷ "ⵍⵎⵡⴰⵙⵎ" ⵉⴷⵖⵔⴰⵏⵏ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵉⵜⵜⵡⴰⵙⵙⴰⵏ ⵓⵃⵡⴰⵛ ⵏ ⵉⵃⴰⵃⴰⵏ ⵙ ⵜⵉⵍⵉⵜ ⵏⵏⵙ ⵉⴷⵓⵙⵏ ⴳ ⵉⵏⵎⵓⴳⴳⴰⵔⵏ ⵉⵏⴰⵎⵓⵔⵏ ⵣⵓⵏ ⴷ ⴰⵏⵎⵓⴳⴳⴰⵔ ⵏ ⵉⵥⵓⵕⴰⵏ ⵏ ⵜⵥⵓⵕⵉⵡⵉⵏ ⵏ ⵡⴰⵢⴷⴰ ⴳ ⵜⵎⴷⵉⵏⵜ ⵏ ⵓⵡⵍⵓⵥ ⴳ ⵜⵙⴳⴰ ⵏ ⵜⵔⵓⴷⴰⵏⵜ ⵙ ⵜⵏⵙⵙⵉⵖⴼⵜ ⵏ ⵄⵓⵎⴰⵕ ⴱⵓⵄⵊⵉⵏ. ⴷ ⴱⵍⴰ ⵏⵜⵜⵓ ⵜⴰⴷⵔⴰⵡⵜ ⵏ ⵓⵃⵡⴰⵛ ⵏ ⵜⵎⴰⵏⴰⵔ ⴳ ⵓⵍⵎⵓⴳⴳⴰⵔ ⴰⵏⴰⵎⵓⵔ ⵏ ⵜⵥⵓⵕⵉⵡⵉⵏ ⵜⵉⵎⴰⴷⵏⴰⵏⵉⵏ/ⵜⵉⵖⵔⴼⴰⵏⵉⵏ ⴳ ⵓⵙⴳⴳⵯⴰⵙ ⵏ 1986 ⴳ ⵎⵕⵕⴰⴽⵛ, ⵍⵍⵉⴳ ⴷ ⴳⵉⵙ ⵉⴷⵔⴰ ⵕⵕⴰⵢⵙ ⴱⵕⴰⵀⵉⵎ ⵓⵄⴱⴷⵓ ⴷ ⴱⵉⵀⵉ ⵉⴽⵔⵛ ⴷ ⵄⴱⴷⵕⵕⵃⵎⴰⵏ ⵓⵊⴷⴷⵉ... ⵉⵍⵎⵎⴰ ⵙ ⵜⴷⵔⴰⵡⵜ ⵜⴰⵣⴰⵍⴰⵏⵜ ⴳ ⵓⵏⵎⵓⴳⴳⴰⵔ ⵏ ⵢⵉⵎⵉ ⵏ ⵜⴰⵏⵓⵜ ⴰⵙⴳⴳⵯⴰⵙ ⵏ 2006 ⵙ ⵜⵏⵙⵙⵉⵖⴼⵜ ⵏ ⵃⵎⴰⴷ ⵓⵜⵙⵓⴽⴰ (ⵜⴰⵎⵍⵍⴰ ⵏ ⵕⴱⴱⵉ ⴼⵍⵍⴰⵙ). ⴷ ⵜⵉⵍⵉⵜ ⵏ ⵓⵃⵡⴰⵛ ⵏ ⵜⵎⴰⵏⴰⵔ ⴳ ⵓⵏⵎⵓⴳⴳⴰⵔ ⵏ "ⵜⵉⵎⵉⵜⴰⵔ" ⵍⵍⵉⴳ ⴳⵉⵙ ⴷⵔⴰⵏ ⵜⵓⴳⴷⵜ ⵏ ⵜⴽⴽⴰⵍ. ⴷ ⴰⵡⴷ ⵜⴰⴷⵔⴰⵡⵜ ⵏ ⵜⵔⴰⴱⴱⵓⵜ ⴰⴷ ⴳ ⵉⵏⵎⵓⴳⴳⴰⵔⵏ ⴷ ⵉⵣⵎⵣⵣⴰ ⴷ ⵜⴼⵓⴳⵍⵉⵡⵉⵏ ⵍⵍⵉ ⵉⵜⵜⵉⵍⵉⵏ ⴳ ⵉⵃⴰⵃⴰⵏ, ⴷ ⵍⵍⵉ ⵉⴳⴰⵏ ⴰⵙⵓⵖⵏ ⵖⴼ ⵜⵔⴰⴱⴱⵓⵜ ⴰⴷ ⴰⴷ ⴳⵉⵙⵏ ⵜⴷⵔⵓ, ⵙⵍⴰⵡⴰⵏ ⴰⴽⴽⵯ ⵜⴰⵔⴰⴱⴱⵓⵜ ⴰⴷ ⴰⵔ ⵜⵙⴽⴰⵔ ⴰⵡⴷ ⵜⴰⵥⵓⵕⵉ ⴰⴷ ⴽⵓⴷⵏⵏⴰ ⵉⵜⵜⵉⵍⵉ ⵓⵙⵏⵓⴱⴳ ⵏ ⵡⵓⴷⵎⴰⵡⵏ ⵉⵅⴰⵜⴰⵔⵏ ⵙⵍⴰⵡⴰⵏ ⴰⴽⴽⵯ ⴰⵏⵏⵓⵕⵥⵎ ⵏ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⵓⴳⴳⵓⴳ ⵏ ⵓⵣⵔⴰⵔ ⵏ ⵜⴳⵔⴰⵡⵜ ⵏ ⵙⴷⵉ ⵍⵊⴰⵣⵓⵍⵉ/ⴰⵊⴰⵣⵓⵍⵉ ⴳ ⵡⴰⵙⵙ ⵡⵉⵙ ⵙⵉⵏ ⵏ ⵜⵔⵣⴼⵜ ⵜⴰⴳⵍⴷⴰⵏⵜ ⵉ ⵜⵙⴳⴰ ⵏ ⵎⵓⴳⴰⴷⵉⵔ, ⴳ ⵜⴷⴳⴳⵯⴰⵜ ⵏ ⵡⴰⵙⵙ ⵏ ⵓⴽⵡⴰⵙ 16 ⵉⵏⵏⴰⵢⵔ ⴳ ⵓⵙⴳⵯⴰⵙ ⵏ 2020. ⴷ ⴰⵡⴷ ⵜⴰⴷⵔⴰⵡⵜ ⵏ ⵜⵔⴰⴱⴱⵓⵜ ⴰⴷ ⴳ ⵓⵏⵏⵓⵕⵥⵎ ⵏ ⵓⵙⵓⵏ ⵏ ⵓⵏⵎⵓⴳⴳⴰⵔ ⵏ ⵜⵎⴰⵏⴰⵔ ⴳ ⵓⵙⴳⴳⵯⴰⵙ ⵏ 1989,[11]ⴷ ⵜⵉⵍⵉⵜ ⵏⵏⵙⵏ ⴰⵡⴷ ⴳ ⵉⵏⵎⵓⴳⴳⴰⵔⵏ ⵉⴷⵖⵔⴰⵏⵏ ⵣⵓⵏ ⴷ ⴰⵍⵎⵓⴳⴳⴰⵔ ⵏ ⵜⵎⴰⵏⴰⵔ ⴳ ⵓⵙⴳⴳⵯⴰⵙ ⴰⵏⵏ ⵏⵉⵜ ⵙ ⵓⵙⴼⵓⴳⵍⵓ ⵙ ⵜⴰⴷⴷⴰⴳⵜ ⵏ ⵡⴰⵔⴳⴰⵏ. ⴷ ⵓⵍⴰ ⴰⵏⵎⵓⴳⴳⴰⵔ ⵏ ⵜⵎⴰⵏⴰⵔ ⴳ ⵓⵙⴳⴳⵯⴰⵙ ⵏ 2015 ⴷ 2025, ⴷ ⵓⵏⵎⵓⴳⴳⴰⵔ ⵍⵍⵉ ⵜⵙⵏⵎⴰⵍⴰ ⵜⵎⵙⵎⵓⵏⵜ ⵏ ⵜⴱⵓⵏⵣⵉⴳⵜ ⴳ ⵜⵎⴰⵏⴰⵔ ⴳ ⵓⵙⴳⴳⵯⴰⵙ ⵏ 2012 ⴷ 2016. ⴷ ⵜⴻⵜⵜⵢⵓⵙⵙⴰⵏ ⴱⴰⵀⵔⴰ ⵜⵔⴰⴱⴱⵓⵜ ⴰⴷ ⵏ ⵓⵃⵡⴰⵛ ⵏ ⵜⵎⴰⵏⴰⵔ ⵙ ⵜⴷⵔⴰⵡⵉⵏ ⵏⵏⵙ ⴳ ⵉⵏⵎⵓⴳⴳⴰⵔⵏ ⴷ ⵜⴼⵓⴳⵍⵉⵡⵉⵏ ⵜⵉⵏⴰⵎⵓⵔⵉⵏ ⵍⵍⵉ ⵉⵜⵜⵓⵙⴽⴰⵔⵏ ⴳ ⴽⵓ ⴰⵙⴳⴳⵯⴰⵙ, ⵣⵓⵏ ⴷ ⵍⵎⵓⵙⵎ/ⵓⵏⵎⵓⴳⴳⴰⵔⵏ ⵏ ⵙⵉⴷⵉ ⵙⵄⴰⵢⴷ ⴳ ⵜⵎⴰⵏⴰⵔ ⴷ ⵙⵉⴷⵉ ⴱⵓⵙⴽⵔⵉ ⴳ ⵙⵎⵉⵎⵓ ⴷ ⴰⵡⴷ ⴰⵙⴼⵓⴳⵍⵓ ⵙ ⵜⴼⵓⴳⵍⴰ ⵏ ⵓⴷⴰⴱⵓ.
ⵜⵉⵔⵣⴰⴼ ⵜⵉⴱⵕⵕⴰⵏⵉⵏ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵓⵔ ⵜⴱⴷⴷ ⵜⵉⵍⵉⵜ ⵏ ⵓⵃⵡⴰⵛ ⵏ ⵉⵃⴰⵃⴰⵏ ⵖⴰⵙ ⴳ ⵉⵏⵎⵓⴳⴳⴰⵔⵏ ⵉⴷⵖⵔⴰⵏⵏ ⴷ ⵉⵏⴰⵎⵓⵔⵏ, ⵎⴰⵛⴰ ⵜⵍⴽⵎ ⵜⴷⵔⴰⵡⵜ ⵏⵏⵙ ⵜⵓⴳⴷⵜ ⵏ ⵜⵎⵉⵣⴰⵔ ⵜⵉⴳⵔⴰⵖⵍⴰⵏⵉⵏ ⴳ ⵓⵕⵓⴱⴱⴰ, ⴰⵙⵢⴰ ⴷ ⵜⴼⵔⵉⵇⵜ... ⴰⵎ ⵜⴷⵔⴰⵡⵜ ⵏⵏⵙⵏ ⴳ ⵙⵙⴰⵄⵓⴷⵉⵢⴰ ⴳ ⵓⵙⴳⴳⵯⴰⵙ ⵏ 1979, ⴷ ⵜⵓⵏⵙ, ⴷⴷⵣⴰⵢⵔ, ⵍⵉⴱⵢⴰ, ⵙⵡⵉⵙⵔⴰ, ⴼⵕⴰⵏⵚⴰ, ⴽⴰⵏⴰⴷⴰ... ⴰⵢⵍⵍⵉ ⵉⵎⵎⴰⵍⵏ ⴰⵣⴰⵍ ⵏ ⵓⵃⵡⴰⵛ ⴰⴷ ⴷ ⵎⴰⵙ ⵓⵔ ⵜⵇⵇⵉⵎ ⵜⵔⴰⴱⴱⵓⵜ ⴰⴷ ⵖⴰⵙ ⴳ ⵢⴰⵜ ⵜⵎⵏⴰⴹⵜ.
ⵜⴰⵡⵊⵉⵡⵉⵏ ⵍⵍⵉ ⵉⵜⵜⵢⵓⵙⵙⴰⵏⵏ ⵙ ⵓⵃⵡⴰⵛ ⵏⵖ ⵍⵍⵉ ⵉⵙⴽⴰⵔⵏ ⴰⵃⵡⴰⵛ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵎⵇⵇⴰⵔ ⴷⵔⵓⵙⵏ ⵉⵙⵓⴳⴰⵎ ⵏⵏⴰ ⵉⵙⴰⵡⴰⵍⵏ ⵖⴼ ⵉⵙⵎⴰⵡⵏ ⵏ ⵜⵡⵊⵉⵡⵉⵏ ⵏⵏⴰ ⵉⵙⴽⴰⵔⵏ/ⵉⵙⵙⵎⵔⴰⵙⵏ ⵜⴰⵥⵓⵕⵉ ⵏ ⵓⵃⵡⴰⵛ ⴳ ⵉⵃⴰⵃⴰⵏ, ⵎⴰⵛⴰ ⴰⵙⵎⵔⵙ ⵏ ⵜⵥⵓⵕⵉ ⴰⴷ ⴰⵔ ⵉⵜⵜⵎⵓⵜⵜⵉ ⵙⴳ ⵉⴷ ⴷⴰⴷⴷⴰⵜⵏ/ⵍⴰⵊⴷⵓⴷ ⴰⵔ ⴰⵢⵢⴰⵡⵏ ⴳ ⵜⵡⵊⵉⵡⵉⵏ ⴰⴷ, ⴰⵢⵍⵍⵉ ⵉⵜⵜⴰⵡⵙⵏ ⴳ ⵓⴼⵔⴰⴳ ⵖⴼ ⵡⴰⵢⴷⴰ ⴰⴷ ⴰⴷⵍⵙⴰⵏ ⴰⵔⴽⵎⴰⵎ. ⵖⴼ ⴽⵔⴰ ⵜⵓⵍⵍⵉⵙⵉⵏ ⵜⵉⵎⵉⵡⴰⵏⵉⵏ ⴷ ⵜⵡⵍⴰⴼⵉⵏ ⵍⵍⵉ ⵉⵍⵍⴰⵏ ⴳ "ⵜⴰⵖⵍⵓⵙⵜ ⵏ ⵉⴽⵜⵜⵓⵢⵏ" ⵍⵍⵉ ⵉⴳⴰⵏ ⵢⴰⵏ ⵓⵙⴰⴳⵎ ⴰⵅⴰⵜⴰⵔ ⴷ ⵓⵎⵣⵔⵓⵢⴰⵏ ⵉ ⴰⵢⵜ ⵉⵃⴰⵃⴰⵏ, ⵏⵣⵎⵔ ⴰⴷ ⵏⴱⴷⵔ ⴽⵔⴰ ⵙⴳ ⵜⵡⵊⵉⵡⵉⵏ ⴰⴷ ⵏⵏⴰ ⴱⴰⵀⵔⴰ ⵉⵜⵜⵢⵓⵙⵙⴰⵏⵏ ⴳ ⵓⵃⵡⴰⵛ ⵏ ⵜⵎⴰⵏⴰⵔ: ⵜⴰⵡⵊⴰ ⵏ ⴱⵓⵜⴼⵓⵙⵜ ⴳ ⵓⴹⵡⵡⴰⵕ ⵏ ⵉⴷⵓⵍⴰⴷⵉⴱ (ⵜⴰⵎⴰⵏⴰⵔ). ⵜⴰⵡⵊⴰ ⵏ ⴰⵢⵜ ⴱⵏ ⵄⵓⵎⴰⵕ ⴳ ⵓⴹⵡⵡⴰⵕ ⵏ ⴱⵓⵎⵊⵊⵉ (ⵜⴰⵎⴰⵏⴰⵔ). ⵜⴰⵡⵊⴰ ⵏ ⴱⵓⵄⵊⵉⵏ ⴳ ⵓⴹⵡⵡⴰⵕ ⵏ ⴰⵢⵜ ⵓⵙⵓⵍ (ⵜⵉⵎⵣⴳⵉⴷⴰ ⵏ ⵓⴼⵜⴰⵙ). ⵜⴰⵡⵊⴰ ⵏ ⵣⵔⴱⴰⵏ ⴳ ⵓⴹⵡⵡⴰⵕ ⵏ ⵜⴱⵍⵖⵓⵜ (ⵜⴰⵔⴳⴰⵏⵜ).[12]
ⴰⵃⵡⴰⵛ ⴳ ⵡⴰⵍⵍⵏ ⵏ ⵜⴰⵙⵓⵜ ⵜⴰⵎⴰⵢⵏⵓⵜ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵉⴼⴰⵡ ⵎⴰⵙ ⴷ ⴰⵃⵡⴰⵛ ⵔⴰⴷ ⵢⴰⵎⵥ ⴰⵣⴰⵍ ⴰⵏⵏ ⵏⵉⵜ ⵍⵍⵉ ⴰⵙ ⴼⴽⴰⵏ ⵉⵎⵣⵡⵓⵔⴰ ⵏⵏⵖ. ⴷ ⵡⴰⵏⵥⴰ ⵖⴼ ⵓⵢⴰⴷ ⵉⴳⴰ ⵜ ⵓⴽⵛⵛⵓⵎ ⵏ ⵉⵄⵔⵔⵉⵎⵏ ⵙ ⵜⵥⵓⵕⵉ ⴰⴷ. ⵉⵍⵍⴰ ⴳⵉⵙⵏ ⵡⵉⵍⵍⵉ ⵢⴰⵇⵇⵔⴰⵏ ⴳ ⵜⵙⴷⴰⵡⵉⵢⵉⵏ, ⴷ ⴰⵔ ⵜⵜⵓⵔⵔⵉⵏ ⵙ ⵜⵎⴰⵣⵉⵔⵜ ⴽⵓ ⴰⵏⴱⴷⵓ ⴷ ⵢⴰⵙⵉ ⴷⵉⴷⵙ ⵍⴽⵎⵎⵉⵢⵜ ⵏⵏⵙ ⴷ ⵜⵎⵍⵙⵉⵜ ⵏ ⵓⵃⵡⴰⵛ ⵏⵏⵙ ⵣⵓⵏ ⴷ ⴽⵔⴰ ⵏ ⵓⵎⵏⴰⵢ, ⴷ ⵉⴳ ⵜ ⵜⵙⵇⵙⴰⴷ ⵎⴰⵏⵉ ⵜⵔⵉⴷ? ⴰⵔ ⴰⴽ ⴷ ⵉⵜⵜⵉⵏⵉ: (ⴷⴰⵔ ⵍⵄⵡⵡⴰⴷ). ⵉⵙⵏⵓⵎⴽ ⵙⵉⵙ ⴷⴰⵔ ⵓⴷⵔⴰⵣ, ⴷ ⴰⵔ ⵉⴼⴼⴰⵍ ⴽⵓⵍⵍⵓ ⵜⵉⵖⴰⵡⵙⵉⵡⵉⵏ ⵍⵍⵉ ⵙⵜⴰⵡⵀⵎⵎⴰⵏⵉⵏ ⴰⴼⴰⴷ ⴰⴷ ⵏⵏ ⵢⵉⵍⵉ ⴳ ⴷⴰⵔ ⵓⵃⵡⴰⵛ. ⴷ ⴰⵡⴷ ⵜⴰⵙⵏⵉⵡⵉⵏ ⵜⵉⴼⴰⵢⵙⴱⵓⴽⵉⵏ ⴰⵎⵎ (ⴰⵙⴰⵢⵙ أسايس) ⴷ ⵜⵓⴳⴷⵜ ⵏ ⵜⵙⵏⵉⵡⵉⵏ ⵢⴰⴹⵏ ⵍⵍⵉ ⵢⵓⵡⵙⵏ ⴳ ⵓⵙⵓⵙⵙⵏ ⵙ ⵜⵥⵓⵕⵉ ⴰⴷ.
ⴰⵙⵉⴷⴼ ⵏ ⵓⵃⵡⴰⵛ ⵏ ⵉⵃⴰⵃⴰⵏ ⴳ ⵡⴰⵢⴷⴰ ⴰⵏⴰⵎⵓⵔ ⴰⵔⴽⵎⴰⵎ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⴳ ⵓⵙⴳⴳⵯⴰⵙ ⵏ 2022, ⵉⵜⵜⵢⵓⵙⴽⴰⵔ ⵓⵙⵓⵜⵔ ⵏ ⵓⵙⵉⴷⴼ ⵏ ⵓⵃⵡⴰⵛ ⵏ ⵉⵃⴰⵃⴰⵏ ⴳ ⵡⴰⵢⴷⴰ ⴰⵏⴰⵎⵓⵔ ⴰⵔⴽⵎⴰⵎ ⵙⴳ ⵖⵓⵔ ⵡⴰⵎⵎⴰⵙ ⵏ ⵎⵓⴳⴷⵓⵔ ⵏ ⵜⵣⵔⴰⵡⵉⵏ ⴷ ⵉⵔⵣⵣⵓⵜⵏ, ⴷ ⵓⵙⵎⵣⴷⵉ ⴷ ⵜⵎⵙⵎⵓⵏⵜ ⵏ ⵓⵃⵡⴰⵛ ⵏ ⵜⵎⴰⵏⴰⵔ. ⴷ ⴰⵔ ⵉⵜⵜⵉⵏⵉⵏ ⵓⵏⵙⵙⵉⵖⴼ ⵏ ⵡⴰⵎⵎⴰⵙ ⵏ ⵎⵓⴳⴰⴷⵓⵔ ⵎⵓⵃⵎⵎⴰⴷ ⵓⴱⵉⵀⵉ ⵎⴰⵙ ⵜⴼⴽⴰ ⵜⵎⴰⵡⴰⵙⵜ ⵏ ⵜⴷⵍⵙⴰ ⵜⴰⵢⵢⵉⵀⵜ ⵏⵏⵙ ⵖⴼ ⵓⵙⵓⵜⵔ ⵏ ⵓⵙⵉⴷⴼ, ⴷ ⵜⴼⴽⴰ ⵢⴰⵏ ⵓⵙⵉⵙⵎⵍ ⵉ ⵓⵃⵡⴰⵛ ⵏ ⵉⵃⴰⵃⴰⵏ ⴷⴷⵓ ⵡⵓⵟⵟⵓⵏ ⵏ IDPCM:81BD51. ⴰⵢⴰ ⵔⴰⴷ ⵢⴰⵡⵙ ⴳ ⵓⴼⵔⴰⴳ ⵖⴼ ⵜⵥⵓⵕⵉ ⴰⴷ. ⵓⵔ ⵉⵎⵉⵍ ⵉⵣⵎⵉⵔ ⴰⴷ ⵉⵜⵜⵢⵓⵙⴽⴰⵔ ⵓⵙⵉⴷⴼ ⴰⴷ ⴱⵍⴰ ⵜⵉⵍⵉⵜ ⵏ ⵜⵎⵙⵎⵓⵏⵜ ⵏ ⵓⵃⵡⴰⵛ ⵏ ⵜⵎⴰⵏⴰⵔ ⵍⵍⵉ ⵉⵜⵜⵓⵙⵙⵔⵙⵍⵏ ⴳ ⵓⵙⴳⴳⵯⴰⵙ ⵏ 2002 ⵙ ⵓⵡⵜⵜⴰⵙ ⵏ ⵓⵙⵏⵎⵍ ⵏ ⵡⴰⵢⴷⴰ ⴰⴷ ⴳ ⵓⵙⵡⵉⵔ ⴰⵏⴰⵎⵓⵔ ⴷ ⵓⴳⵔⴰⵖⵍⴰⵏ, ⴷ ⵙ ⵎⴰⵙ ⵉⴳⴰ ⵢⴰⵜ ⵜⴰⵢⵙⵉ ⵜⴰⵎⴰⵣⵉⵖⵜ ⵜⴰⵥⵖⵓⵕⴰⵏⵜ. ⴷ ⵓⵢⴰⴷ ⴰⵔ ⵉⵎⵎⴰⵍ ⴰⵣⴰⵍ ⵏ ⵓⵃⵡⴰⵛ ⵏ ⵉⵃⴰⵃⴰⵏ ⴷ ⵜⵣⴷⴰⵢⵜ ⵏⵏⵙ ⴷ ⵡⴰⴽⴰⵍ ⴷ ⵉⵎⵣⴷⴰⵖⵏ ⵙⵍⴰⵡⴰⵏ ⴰⴽⴽⵯ ⵎⴰⵙ ⵉⴳⴰ ⵢⴰⵜ ⵜⵥⵓⵕⵉ ⵉⵟⵟⴰⴼⵏ ⵢⴰⵏ ⵢⵉⴹⵉⵚ ⵉⵅⴰⵜⵔⵏ ⴰⵢⵍⵍⵉ ⵏⵉⵜ ⵉⵙⵙⵍⴽⴰⵏⵏ ⵓⵢⴰⵏⵏ ⵉⴳⴰ ⵜ ⵓⵔⵣⴰⴼ ⵏ ⵓⵎⵔⵣⵓ ⴰⵎⵉⵔⵉⴽⴰⵏⵉ ⴼⵔⵉⴷⵉⵔⵉⴽ ⴱⵓⵍ ⴱⵓⵍⵥ ⵉ ⵜⵎⴰⵏⴰⵔ ⴳ ⵜⵙⵎⵎⵓⵎⵔⴰⵡⵉⵏ ⵏ ⵜⵊⵕⵎⴰ ⵍⵍⵉ ⵉⵣⵔⵉⵏ, ⴷ ⵓⵙⵓⵙⵔ ⵏⵏⵙ ⵉ ⵜⴳⴷⵉⵎⵉⵏ ⵏⵏⴰ ⵉⵥⵍⵉⵏ ⵙ ⵓⵃⵡⴰⵛ ⵍⵍⵉ ⵉⵜⵜⵓⵙⵔⴰⵙⵏ ⴷⵖⵉ ⴳ ⵜⵙⴷⵍⵉⵙⵜ ⵏ ⵓⴽⵓⵏⴳⵕⵉⵙ ⴰⵎⵉⵔⵉⴽⴰⵏⵉ ⵍⵍⵉ ⵉⴳⴰⵏ ⴽⵔⴰ ⵏ ⵜⵙⴼⵉⴼⵉⵏ ⵏⵏⴰ ⴱⴰⵀⵔⴰ ⵉⵍⴰⵏ ⴰⵜⵉⴳ ⴷ ⵍⵍⵉ ⵉⴷⵔⵓⵙ ⵎⴰ ⴳ ⵔⴰⴷ ⵜⵏ ⵙⵓⵔ ⵜⴰⴼⴷ.[13][14]
ⵉⵎⵉⵣⵉⵢⵏ ⴷ ⵉⵙⵡⵡⵓⵕⴹⵏ/ⵉⵙⴼⵙⴰⵜⵏ ⵏⵏⴰ ⵉⵙⴷⵉⴷⴷⵉⵏ ⴰⵃⵡⴰⵛ ⵏ ⵉⵃⴰⵃⴰⵏ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⴰⵙⴼⵙⴰ ⴳ ⵡⴰⵏⵢⴰ ⴷ ⵉⵎⴰⵙⵙⵏ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵙⴳ ⵉⵙⴼⵙⴰⵜⵏ ⴰⴷ ⵍⵍⵉ ⵉⵙⵙⵏ ⵓⵃⵡⴰⵛ ⵏ ⵉⵃⴰⵃⴰⵏ ⴳ ⵉⵙⴳⴳⵯⴰⵙⵏ ⴰⴷ ⴳⴳⵓⵔⴰⵏⵉⵏ; ⵉⴳⴰ ⵜ ⵓⵙⵉⴷⴼ ⵏ ⴽⵔⴰ ⵏ ⵉⵎⴰⵙⵙⵏ ⵉⵎⵥⴰⵡⴰⵏⵏ ⵏⵏⴰ ⵓⵔ ⴰⴽⴽⵯ ⴰⴷⵍⵍⵉ ⵉⵍⵍⴰⵏ ⴳ ⵜⵎⵏⴰⴹⵜ ⵜⴰⵥⵖⵓⵕⴰⵏⵜ ⵏ ⵜⵥⵓⵕⵉ ⴰⴷ, ⵣⵓⵏ ⴷ ⵟⴰⵎⵟⴰⵎ ⴷ ⴷⴷⵔⴱⵓⴽⴰ ⴷ ⵛⵛⴼⵏⴰ. ⵎⵇⵇⴰⵔ ⴷⴰ ⵙⵙⵎⵔⴰⵙⵏ ⵉⵎⴰⵙⵙⵏ ⴰⴷ ⴳ ⴽⵔⴰ ⵏ ⵡⴰⵏⴰⵡⵏ ⵉⵎⵥⴰⵡⴰⵏⵏ, ⵎⴰⵛⴰ ⴷⴰ ⵙⵙⵉⴷⵔⵓⵙⵏ ⴳ ⵡⴰⵣⴰⵍ ⵏ ⵡⴰⵏⵢⴰ ⴰⵥⵖⵓⵕⴰⵏ ⵏ ⵓⵃⵡⴰⵛ ⵏ ⵉⵃⴰⵃⴰⵏ, ⵍⵍⵉ ⵉⵍⴰⵏ ⵢⴰⵏ ⵡⴰⵏⵢⴰ ⴷ ⴰⵎⴽⵓⵏ ⴷ ⵍⵍⵉ ⵉⵜⵜⵉⵔⵉⵏ ⴰⵎⵢⴰⵙ ⴷ ⵜⵎⵙⴰⵙⵉⵜ ⵍⵍⵉ ⵉⵙⵏⴰⵃⵢⴰⵏ ⵜⴰⵢⵙⵉ ⴰⴷ ⴳⵔ ⵜⵙⵓⵜⵉⵏ ⴼ ⵜⵙⵓⵜⵉⵏ. ⴰⵙⵉⴷⴼ ⵏ ⵣⵓⵏ ⴷ ⵉⵎⴰⵙⵙⵏ ⴰⴷ ⴷⴰ ⵙⵙⵉⴷⵔⵓⵙⵏ ⴳ ⵡⴰⵣⴰⵍⵏ ⵏ ⵜⵥⵓⵕⵉ ⴰⴷ ⴷ ⵜⵎⴰⴳⵉⵜ ⵏⵏⵙ ⵜⴰⵎⵏⵢⴰⵜ ⵜⴰⴼⴰⵍⴽⴰⵢⵜ ⴷ ⴳ ⵕⵕⵛⵛ ⴰⵎⴳⵔⵓ ⵏⵏⴰ ⵉⵜⵜⵓⵙⵏⵎⴰⵍⴰⵏ ⴷ ⵡⴰⵏⵢⴰ ⵏⵏⵙ ⵉⵎⵓⵏⵏ ⵏ ⵉⵎⴰⵙⵙⵏ ⵉⴱⵍⴷⵉⵢⵏ ⵣⵓⵏ ⴷ ⵜⴰⴳⵏⵣⴰ ⴷ ⵓⴽⴱⴰⵍ, ⴷ ⵣⵓⵏ ⴷ ⴰⵢⴰⴷ ⴰⴷ ⵉⵜⵜⵙⵔⴰⴳⵏ ⵉ ⵜⵥⵓⵕⵉ ⴰⴷ ⴰⴷ ⵜⵜ ⵢⵉⵍⵉⵃ, ⴷ ⴰⴷ ⵙⵓⵔ ⵜⴳ ⵖⴰⵔ ⵢⴰⵏ ⵓⴼⵕⵕⵊ ⵓⵏⵣⵉⵍ ⵏⵏⴰ ⵓⵔ ⵉⵎⵎⴰⵍⵏ ⵉⵎⴰⵏ ⵏ ⵜⴰⵢⵙⵉ ⴰⴷ ⵜⴰⵔⴽⵎⴰⵎⵜ.
ⴰⵙⴼⵙⴰ ⴳ ⵉⵎⵓⵙⵙⵓⵜⵏ ⴷ ⵜⵔⴱⴱⴰⵡⵜ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵓⵔ ⵉⴱⴷⴷ ⵓⵙⴼⵙⴰ ⵏⵏⴰ ⵉⴽⴽⴰⵏ ⴼ ⵓⵃⵡⴰⵛ ⵏ ⵉⵃⴰⵃⴰⵏ ⵖⴰⵔ ⵖⴼ ⵡⴰⵏⵢⴰ, ⵎⴰⵛⴰ ⵉⵍⴽⵎ ⵓⵢⴰⵏⵏ ⴰⵔ ⴰⴽⴽⵯ ⵉⵎⵓⵙⵙⵓⵜⵏ ⵉⵥⵖⵓⵕⴰⵏⵏ, ⵍⵍⵉ ⵉⴳⴰⵏ ⵙⴳ ⵜⵖⴰⵡⵙⵉⵡⵉⵏ ⵏⵏⴰ ⴱⴰⵀⵔⴰ ⵉⵙⵜⴰⵡⵀⵎⵎⴰⵏ ⴳ ⵜⵥⵓⵕⵉ ⴰⴷ, ⴷ ⵍⵀⴰⵏ ⴷ ⴽⵔⴰ ⵏ ⵉⵎⵃⵓⵡⵛⵏ ⴰⵔ ⴼⴼⴰⵍⵏ ⵉⵎⵓⵙⵙⵓⵜⵏ ⴰⵏⵏ ⵍⵍⵉ ⵉⴳⴰⵏ ⵉⵏⵖⴰⴷⵏ ⴷ ⵍⵍⵉ ⵉⵜⵜⵉⵔⵉⵏ ⵢⴰⵏ ⵓⴼⵓⴽⵙ ⵢⴰⵜⵜⵓⵢⵏ ⴷ ⵜⵓⴳⴳⴰⵣ ⵏ ⵜⵔⴰⴱⴱⵓⵜ, ⴷ ⴰⵔ ⵜⵏ ⵙⵙⵏⴼⴰⵍⵏ ⵙ ⴽⵔⴰ ⵏ ⵉⵎⵓⵙⵙⵓⵜⵏ ⵉⵎⵇⵔⵓⵊⵊⴰⵄⵏ ⵏⵖ ⵉⴳⴰⵛⵓⵔⴰⵏⵏ ⵏⵏⴰ ⴳ ⵓⵔ ⵜⵍⵍⵉ ⵜⵎⵙⴰⵙⵉⵜ ⴷ ⵓⵔ ⵖⵓⵔⵙ ⵜⵍⵍⵉ ⴰⵡⴷ ⴽⵔⴰ ⵏ ⵜⵣⴷⴰⵢⵜ ⴷ ⵓⵃⵡⴰⵛ ⵏ ⵉⵃⴰⵃⴰⵏ ⵏⵏⴰ ⵉⴳⴰⵏ ⴰⵥⵖⵓⵕⴰⵏ.
ⴰⵙⴼⵙⴰ ⴳ ⵜⵎⵍⵙⵉⵜ ⵜⴰⴱⵍⴷⵉⵜ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵉⴳⴰ ⵙⴳ ⵉⵙⵏⴼⴰⵍⵏ ⵉⵎⵇⵔⴰⵏⵏ ⵏⵏⴰ ⵉⵜⵜⴰⴷⵊⴰⵏ ⵜⴰⵥⵓⵕⵉ ⴰⴷ ⵜⴰⵔⴽⵎⴰⵎⵜ ⵜⴰⵥⵖⵓⵕⴰⵏⵜ ⴰⴷ ⵜⵏⵖⵓⴱⵓ, ⴷ ⵡⴰⴳⴳⵓⴳ ⵖⴼ ⵜⵎⵍⵙⵉⵜ ⴰⴷ ⵜⴰⴱⵍⴷⵉⵜ ⵏⵏⴰ ⵢⵓⴼⵔⴰⵔⵏ ⴷ ⵉⵎⵓⵏⵏ, ⵍⵍⵉ ⵉⵜⵜⵙⵓⵎⵏ ⵉⵎⴰⵏ ⵏ ⵓⵖⵢⵓⴷ ⴰⵎⴳⵔⵓ ⴰⵎⵏⵖⵢⴰⵏ. ⵉⵙⵔⴳ ⵓⵢⴰⵏⵏ ⴰⵢⵍⵍⵉⴳ ⴷ ⵓⵎⴰⵏⵏ ⴽⵔⴰ ⵏ ⵜⵎⵍⵙⴰ ⵜⵉⴼⵔⵇⴰⵛⵉⵏ ⵏⵏⴰ ⵓⵔ ⵉⵜⵜⵎⵙⴰⵙⴰⵏ ⴷ ⵜⵎⵍⵙⵉⵜ ⵜⴰⴱⵍⴷⵉⵜ ⵜⴰⵥⵖⵓⵕⴰⵏⵜ ⵏ ⵜⵥⵓⵕⵉ ⴰⴷ. ⴰⵙⵏⴼⵍ ⴰⴷ ⵓⵔ ⴰⵔ ⵏⵏ ⵉⴽⴽⴰⵜ ⵖⴰⵔ ⴳ ⵜⵡⵉⵍⴰ ⵏ ⴱⵕⵕⴰ ⵏ ⵓⵃⵡⴰⵛ, ⵎⴰⵛⴰ ⴰⵔ ⵏⵏ ⵉⴽⴽⴰⵜ ⴰⵡⴷ ⴳ ⵜⵏⵏⵓⴳⵍⴰ ⵜⴰⴷⵍⵙⴰⵏⵜ ⵏⵏⴰ ⵜ ⵉⵣⴷⴰⵢⵏ ⴷ ⵉⵥⵓⵕⴰⵏ ⵏⵏⵙ ⵉⵎⵣⵔⵢⴰⵏⵏ ⵉⴷⵖⵔⴰⵏⵏ.
ⴰⵙⴼⵙⴰ ⵙ ⵓⵙⵖⵍⵍⴰ ⴰⵙⵖⵏⵣⵉ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵍⵀⴰⵏ ⴽⵔⴰ ⵏ ⵎⴷⴷⵏ ⴰⵔ ⵙⴽⴰⵔⵏ ⴳ ⵜⵥⵓⵕⵉ ⴰⴷ ⵢⴰⵏ ⵡⴰⵎⵎⴰⴽ ⵙ ⵔⴰⴷ ⴰⵡⵉⵏ ⵉⴷⵔⵉⵎⵏ, ⴱⵍⴰ ⵜ ⵉⵡⵉⵏ ⴳ ⵓⴼⵔⴰⴳ ⵖⴼ ⵉⵍⴳⴰⵎⵏ ⵏⵏⵙ ⵉⵥⵖⵓⵕⴰⵏⵏ ⵙⵡⴰ ⴳ ⵜⵎⵍⵙⵉⵜ ⵓⵍⴰ ⴳ ⵉⵎⴰⵙⵙⵏ... ⴰⵢⵍⵍⵉ ⴰⵖ ⵢⵓⴷⵊⴰⵏ ⴰⴷ ⵏⵥⵕⵕⴰ ⴽⵔⴰ ⵏ ⵉⴼⵕⵕⵉⵊⵏ ⵉⵙⵖⵏⵣⵉⵜⵏ ⵍⵍⵉⴳ ⵓⵔ ⵉⵍⵍⵉ ⵓⴷⴰⵙⵉⵍ ⴰⵥⵖⵓⵕⴰⵏ ⵏ ⵜⵥⵓⵕⵉ ⴰⴷ. ⴷ ⴳⵉⵏ ⵖⴰⵙ ⴰⵙⴷⵔⵓⵔⵎ ⵚⴰⴼⵉ ⵍⵍⵉ ⵏⵏ ⵢⴰⴳⴳⵓⴳⵏ ⵖⴼ ⵜⵎⵔⵉⵙⵜ ⵙ ⵜⵎⵢⵓⵔⵉⵏ. ⵜⵓⵎⴰⵏⵜ ⴰⴷ ⴰⵔ ⵜⴻⵜⵜⴰⵡⵙ ⴳ ⵓⵙⵏⵏⵓⵖⵊⵓ ⵏ ⵜⵥⵓⵕⵉ, ⴷ ⴰⵔ ⵏⵏ ⵜⵉⵜⵜⵉ ⴼ ⵡⴰⵣⴰⵍ ⵏⵏⵙ ⴰⴷⵍⵙⴰⵏ ⴷ ⵓⵍⴰ ⵜⵉⵏⵏⵓⴳⵍⴰ ⵏⵏⵙ.
ⵓⵣⴷⵉⵔⵏ ⵏ ⵓⵙⴼⵙⴰ ⵏ ⵜⵥⵓⵕⵉ ⵏ ⵓⵃⵡⴰⵛ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵜⴰⴷⵔⵙⵉ ⵏ ⵉⵎⴷⵔⴰⵡⵏ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵉⴷ ⵃⵉⵏⴰ ⴰⵔ ⵜⵜⴳⴳⴰⵏ ⵖⴰⵔ ⵎⵔⴰⵡ ⵏ ⵉⵎⵃⵓⵡⵛⵏ, ⴰⴼⴰⴷ ⴰⴷ ⵙⵙⴹⵕⴰⵏ ⴰⵔⵔⴰⵣ ⴰⵥⵕⴼⴰⵏ ⵏⵏⴰ ⵉⴳⴳⵓⵜⵏ, ⴰⵢⵍⵍⵉ ⵉⵜⵜⴳⴳⴰⵏ ⵓⵣⴷⵉⵔ ⵖⴼ ⵓⵎⵙⴰⵙⴰ ⵏ ⵜⵔⴱⴱⴰⵡⵜ ⵜⴰⵎⴳⵔⵓⵜ ⴷ ⵜⵕⵡⵉ ⴷ ⵓⵖⵓⴷⵓ ⵏⵏⵙ.
ⴰⵙⴷⵔⵓⵔⵎ ⵍⵍⵉ ⴳ ⴰⵔ ⴱⴰⵀⵔⴰ ⵙⵙⵉⴳⵓⵜⵏ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⴰⵔ ⵙⴽⴰⵔⵏ ⴽⵔⴰ ⵏ ⵉⵎⵃⵓⵡⵛⵏ ⴽⵔⴰ ⵏ ⵉⵎⵓⵙⵙⵓⵜⵏ ⵉⵎⵇⵔⵓⵊⵊⴰⵄ ⵏⵏⴰ ⴳ ⴰⵔ ⴱⴰⵀⵔⴰ ⵙⵙⵉⴳⵓⵜⵏ ⴰⴼⴰⴷ ⴰⴷ ⵙⵙⵓⵙⵎⵏ ⴰⴳⴷⵓⴷ ⴷ ⵉⵎⵙⵓⴷⵙⵏ, ⴷ ⵉⵎⵓⵙⵙⵓⵜⵏ ⴰⵏⵏ ⵉⵜⵜⵉⵏ ⵏⵏⵉⵏ ⴱⴰⵀⵔⴰ ⵖⴼ ⵜⵏⵏⵓⴳⵍⴰ ⵍⵍⵉ ⵙ ⵉⵜⵜⵢⵓⵙⵙⴰⵏ ⵓⵃⵡⴰⵛ ⵏ ⵉⵃⴰⵃⴰⵏ.
ⵥⵕ ⵓⴳⴳⴰⵔ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]ⵉⵙⴰⵖⵓⵍⵏ
[ⵙⵏⴼⵍ | ⵙⵏⴼⵍ ⴰⵙⴰⴳⵎ]- ^ ⵢⴰⵙⵉⵏ ⴰⵣⵡⴰⵖ,ⵜⴰⵣⵔⴰⵡⵜ ⵜⴰⵎⵣⵔⵓⵢⴰⵏⵜ ⵏ ⵜⴰⵢⵙⵉ ⵜⴰⴷⵍⵙⴰⵏⵜ ⵏ ⵜⵎⵏⴰⴹⵜ ⵏ ⵉⵃⴰⵃⴰⵏ (ⴰⵃⵡⴰⵛ ⴰⵎ ⵓⵣⵓⵔⵜ), ⴰⵔⵣⵣⵓ ⴰⵙⴷⴰⵡⴰⵏ 2024/2025.
- ^ ⵓⵙⴰⵎⴰ ⵍⵀⴷⴷⴰⵊ (25 ⵎⴰⵕⵚ 2025). ⵢⴰⵏ ⵓⴼⵉⴷⵢⵓ ⵖⴼ ⵢⵉⵎⵉⵙ ⵏ ⵏⵏⴰⵇⵓⵙ, ⵜⴰⵙⵏⴰ ⵏ ⵓⵙⴰⵢⵙ أسايس. ⵉⵜⵜⵢⵓⵥⵕⴰ ⴰⵙⵙ 15/1/2026.
- ^ ⵢⴰⵏ ⵏ ⵓⴱⵉⴷⵢⵓ ⵏ ⵢⵉⵎⵙⵍⵉ ⵏ ⵍⵄⵡⵡⴰⴷ ⵏ ⵉⵃⴰⵃⴰⵏ, ⵄⴱⴷⵓⵍⵍⴰⵀ ⴰⵅⵔⵙⵙⵓⵎ
- ^ "Discover Popular Videos | Facebook". www.facebook.com (in ⵜⴰⵏⴳⵍⵉⵣⵜ). Retrieved 2026-01-14.
- ^ ayouz vision (2019-01-20). laawad ihahan من اجمل الترات المغربية رقصات احواش مع عواد حاحا تمنار براسة المرحوم محمد زربان. Retrieved 2026-01-14 – via YouTube.
- ^ ⵏⴰⵊⴷⵉ ⵎⵓⵃⵎⵎⴰⴷ ,ⵜⴰⵣⵔⴰⵡⵜ ⵜⴰⵏⴳⵍⴰⵎⵜ ⵉ ⵜⵥⵓⵕⵉ ⵏ ⵓⵃⵡⴰⵛ ⵏ ⵉⵃⴰⵃⴰⵏ, ⴰⵔⵣⵣⵓ ⴰⵙⴷⴰⵡⴰⵏ 2018.
- ^ ⵓⵙⴰⵎⴰ ⵍⵀⴷⴷⴰⵊ, ⵖⴼ ⵓⴱⵔⴷⴰⴽ ⵏ ⵜⵉⵣⵣⴰ. أسايس ⴰⵙⴰⵢⵙ. ⵉⵜⵜⵢⵓⵥⵕⴰ ⴰⵙⵙ ⵏ 15/1/2026.
- ^ ⵓⵙⴰⵎⴰ ⵍⵀⴷⴷⴰⵊ, ⵖⴼ ⵓⴱⵔⴷⴰⴽⴽ ⵏ ⵜⵉⵣⵣⴰ ⴳ ⵓⴼⵉⵙⴱⵓⴽ. ⵉⵜⵜⵢⵓⵥⵕⴰ ⴰⵙⵙ ⵏ 15/1/2026.
- ^ ⵓⵙⴰⵎⴰ ⵍⵀⴷⴷⴰⵊ, "ⵢⴰⵏ ⵓⴼⵉⴷⵢⵓ ⵏ ⵜⴷⵔⴰⵡⵜ ⵏ ⵓⵃⵡⴰⵛ ⵏ ⵉⵃⴰⵃⴰⵏ ⵏ ⵜⵎⴰⵏⴰⵔ ⴳ ⵓⵏⵎⵓⴳⴳⴰⵔ ⵏ ⵜⵥⵓⵕⵉⵡⵉⵏ ⵜⵉⵖⵔⴼⴰⵏⵉⵏ ⴳ ⵎⵕⵕⴰⴽⵛ ⴳ 1985". ⴰⵙⴰⵢⵙ أسايس. ⵉⵜⵜⵢⵓⵥⵕⴰ ⴰⵙⵙ ⵏ 15/1/2026.
- ^ ⵓⵏⵜⵉⵎ ⵖⴼ ⵉⵃⴰⵃⴰⵏ (ⵙ ⵜⵄⵕⴰⴱⵜ). ⵉⵜⵜⵢⵓⵥⵕⴰ ⴳ 2026-01-14 – ⴳ ⵓⴼⵉⵙⴱⵓⴽ.
- ^ ⵜⴰⴷⵔⴰⵡⵜ ⵏ ⵜⵔⴰⴱⴱⵓⵜ ⵏ ⵓⵃⵡⴰⵛ ⵏ ⵜⵎⴰⵏⴰⵔ ⴳ ⵓⵏⵏⵓⵕⵥⵎ ⵏ ⵓⵙⵓⵏ ⵏ ⵓⵏⵎⵓⴳⴳⴰⵔ ⵏ ⵜⵎⴰⵏⴰⵔ ⴳ ⵓⵙⴳⴳⵯⴰⵙ ⵏ 1989. ⵉⵜⵜⵢⵓⵥⵕⴰ ⴰⵙⵙ ⵏ 15/1/2026.
- ^ ⵓⵙⴰⵎⴰ ⵍⵀⴷⴷⴰⵊ, ⵜⴰⵙⵏⴰ ⵏ ⵓⴼⵉⵙⴱⵓⴽ(ⴰⵙⴰⵢⵙ أسايس). ⵉⵜⵜⵢⵓⵥⵕⴰ ⴰⵙⵙ ⵏ 14/1/2026.
- ^ بودرة, نادية (2022-11-16). "وزارة الثقافة تدرج رقصة أحواش احاحان ضمن لائحة الجرد العام للتراث اللامادي الوطني لسنة 2022 - جريدة العالم الأمازيغي" (in ⵜⴰⵄⵔⴰⴱⵜ). Retrieved 2026-01-14.
- ^ الدرايدي, هشام. "رقصة أحواش "احاحان" ضمن التراث اللامادي الوطني". alalam (in ⵜⴰⵄⵔⴰⴱⵜ). Retrieved 2026-01-14.